1. Пешийа кӧ тә һинбуна Кʹьтеба Пироз дәстпекьрьбу, жийина тә чь щурʹәйи бу?

 ПЕШИЙА кӧ тә тʹәви Шәʹдед Йаһоԝа һинбуна Кʹьтеба Пироз дәстпекьрьбу, жийина тә чь щурʹәйи бу? Дьԛәԝьмә тӧ нә жи дьхԝази жийина хԝәйә бәре бини бира хԝә. Дьбәкә фькьр у ньһерʹандьна ве дьнйайе сәр хәйсәт-һʹӧнӧр у ньһерʹандьна тә һʹӧкӧм кьрьнә. Һʹале мә гәләка ӧса бу. Әм «ве дьнеда ... бе гӧман у бе Хԝәде бун» (Әфәси 2:12). Ле бь сайа һинбуна Кʹьтеба Пироз, әʹмьре мә бь тʹәмами һатә гӧһастьне!

2. Гава тә Кʹьтеба Пироз леколин дькьр, тә чь фәʹм кьр?

² Гава тә Кʹьтеба Пироз леколин дькьр, тә дит кӧ Баве тәйи әʹзмана тә гәләк һʹьз дькә. Тә фәʹм кьр ԝәки сәва кӧ тӧ ԛәбулкьрьна Йаһоԝа бьстини у бьби пʹара малбәта ԝи, лазьм ә кӧ тӧ жийин, ньһерʹандьн у фькред хԝә бьгӧһези у ль гора ԛанунед ԝи бьжи (Әфәси 5:3-5).

3. Ль гора Колоси 3:9, 10, Йаһоԝа дьхԝазә кӧ әм чь бькьн, у ве готареда әме чь һин бьн?

³ Йаһоԝа Баве мәйи әʹзмана йә. Әԝи әм әʹфьрандьнә, ләма жи изна ԝи һәйә ԝәки бона мә ԛәйд-ԛануна дайнә. Әԝ дьхԝазә ԝәки пешийа ньхӧмандьне әм сәр хԝә бьхәбьтьн, ԝәки «мәрьве кәвьн» жь хԝә бехьн * (Колоси 3:9, 10 бьхунә). Әв готар ԝе али ԝан бькә, йед кӧ дьхԝазьн бенә ньхӧмандьне, ԝәки щаба ван се пьрса бьдьн: (1) «Мәрьве кәвьн» чь те һʹәсабе? (2) Йаһоԝа чьрʹа дьхԝазә ԝәки әм «мәрьве кәвьн» жь хԝә бехьн? (3) Әм чаԝа дькарьн ве йәке бькьн? Һәгәр әм ида  ньхӧманди нә, әв готар ԝе али мә бькә, ԝәки әм хԝә жь хәйсәт-һʹӧнӧред «мәрьве кәвьн» дур бьгьрьн.

4. «Мәрьве кәвьн» чь щурʹәйи йә?

⁴ «Мәрьве кәвьн» те һʹәсабе әԝ мәрьв, йе кӧ ль гора хԝәстьнед бәдәнейә гӧнәкʹар дьфькьрә у дьжи. Әԝ мәрьв дькарә хԝәһʹьз, һерс, бешекьр у ԛӧрʹә бә. Ӧса жи әԝ мәрьв дьбәкә порнографийа у филмед бь бенамуси у зордари, һʹьз дькә. Бал ԝи бешьк һьнә хәйсәтед баш жи һәнә, у дьԛәԝьмә әԝ хԝә сәва готьн у кьред хԝәйә хьраб сущдар дькә. Ле хԝәстьна ԝи һаԛас тʹӧнә, ԝәки ньһерʹандьн у рʹабун-рʹуньштьна хԝә бьгӧһезә (Галати 5:19-21; 2 Тимотʹейо 3:2-5).

5. Гәло әм дькарьн «мәрьве кәвьн» бь тʹәмами жь хԝә бехьн? (Кʹаред Шандийа 3:19)

⁵ Әм гӧнәкʹар ьн, ләма жи әм нькарьн һʹәму фькьр у хԝәстьнед хьраб жь һʹьш у дьле хԝә дәрхьн. Щарна, әм сәва тьштәки кӧ мә готийә йан кьрийә пʹошман дьбьн (Йерәмийа 17:9; Аԛуб 3:2). Ле гава әм «мәрьве кәвьн» жь хԝә дехьн, хԝәстьнед бәдәне ида мә контрол накьн. Һьнге ньһерʹандьн, рʹабун-рʹуньштьн у хәйсәт-һʹӧнӧред мә тенә гӧһастьне (Ишайа 55:7; Кʹаред Шандийа 3:19 бьхунә).

6. Йаһоԝа чьрʹа дьхԝазә ԝәки әм тʹәрка фькьр у хәйсәтед хьраб бьдьн?

⁶ Йаһоԝа мә гәләк һʹьз дькә у дьхԝазә ԝәки әм жь жийине ләзәте бьстиньн, ләма әԝ мәрʹа дьбежә кӧ әм тʹәрка фькьр у хәйсәтед хьраб бьдьн (Ишайа 48:17, 18). Әԝ занә ԝәки мәрьвед кӧ дькʹәвьн бәр байе хԝәстьнед хьраб зьраре дьдьн хԝә у кәсед дьн, у әв йәк дьле Ԝи дешинә.

7. Ль гора Рʹомайи 12:1, 2, гәрәке әм чь сафи кьн?

⁷ Чахе әм сәр хԝә дьхәбьтьн ԝәки хәйсәте хԝә бьгӧһезьн, дьбәкә һьнә мәрьв у һәвалед мә ԛәрфед хԝә мә бькьн (1 Пәтрус 4:3, 4). Дьбәкә әԝана бежьн кӧ әм дькарьн ль гора дьле хԝә бькьн у гәрәке әм изне нәдьн, ԝәки кәсед дьн сәр сафикьрьнед мә һʹӧкӧм кьн. Ле кәсед кӧ ԛанунед Йаһоԝа инкʹар дькьн  бь рʹасти аза ниньн. Әԝана һаш жь сәре хԝә жи тʹӧнә нә, ԝәки изне дьдьнә дьнйа Мире-щьна сәр ԝан һʹӧкӧм кә (Рʹомайи 12:1, 2 бьхунә). Ләма жи гәрәке әм сафи кьн: Гәло әме «мәрьве кәвьн», йе кӧ бьн һʹӧкӧме гӧнә у дьнйа Мире-щьнада йә, хԝәй кьн, йан әме изне бьдьн кӧ Йаһоԝа мә бьгӧһәринә у али мә бькә бьбьнә мәрьвнә дьһа баш? (Ишайа 64:8).

8. Чь дькарә али мә бькә ԝәки әм хԝә жь фькред нәрʹаст у хәйсәтед хьраб дур бьгьрьн?

⁸ Йаһоԝа занә кӧ мәрʹа ԝәхт у щәфа лазьм ә, ԝәки хԝә жь фькред нәрʹаст у хәйсәтед хьраб дур бьгьрьн (Зәбур 103:13, 14). Ле бь сайа Хәбәра хԝә, рʹӧһʹе хԝә у тʹәшкиләта хԝә, Йаһоԝа билани, ԛәԝат у аликʹарийе дьдә мә, ԝәки әм бенә гӧһастьне. Бешьк, тә хԝәха жи ида дәсте Йаһоԝа жийина хԝәда дитийә. Ԝәрә әм бьвиньн кӧ тӧ дькари кʹижан гава бавежи, сәва кӧ «мәрьве кәвьн» жь хԝә бехи у бона ньхӧмандьне һазьр би.

9. Хәбәра Хԝәде ча дькарә али тә бькә?

⁹ Хԝә бь сайа Кʹьтеба Пироз кʹур бьщерʹьбинә. Хәбәра Хԝәде мина нәйньке йә. Әԝ дькарә али тә бькә ԝәки тӧ фькьр, хәбәрдан у кьред хԝә бьщерʹьбини (Аԛуб 1:22-25). Ве йәкеда дәрсдаре тә у хушк-бьред щерʹьбанди дькарьн али тә бькьн. Мәсәлә, бь сайа Ньвисаред Пироз, әԝ дькарьн али тә бькьн кӧ тӧ фәʹм бьки ԝәки тӧ чьда ԛәԝи йи у чьда сьст и. Әԝана дькарьн тә һин кьн, кӧ әʹдәбйәтед Шәʹдед Йаһоԝада ширәтед керһати бьвини, йед кӧ ԝе али тә бькьн тʹәрка хәйсәтед хьраб бьди. Ӧса жи, Йаһоԝа һәртʹьм һазьр ә бе һәԝара тә. Әԝ рʹьнд занә кӧ ча али тә бькә, чьмки һаш пе һәйә дьле тәда чь һәйә (Мәтʹәлок 14:10; 15:11). Ләма жи һәр рʹож дӧа кә у Хәбәра Хԝәде леколин кә.

10. Тӧ жь сәрһатийа Ели чь һин буйи?

¹⁰ Баԝәр бә кӧ ԛанунед Йаһоԝа, ԛанунед һәри баш ьн. Һʹәму ԛанун у ширәтед Йаһоԝа бона кʹара мә нә. Кәсед кӧ ль гора ԛанунед ԝи дьжин, дьбьнә хԝәйе ԛәдьр, нета жийине у бәхтәԝарийа рʹаст дьстиньн (Зәбур 19:7-11). Алийе дьнва жи, кәсед кӧ гӧһ надьн ԛанунед Йаһоԝа у ль гора хԝәстьнед бәдәне дьжин, сәре хԝә дькьнә бәлайе. Ԝәрә әм бьньһерʹьн кӧ мерәки бь наве Ели, чь дьбежә дәрһәԛа ахьрийа ве йәке, гава мәрьв ԛанунед Йаһоԝа пьшт гӧһе хԝәва давежә. Де-баве ԝи Йаһоԝа һʹьз дькьрьн у рʹастийеда ле мәзьн дькьрьн. Ле гава Ели бу хорт, әԝ кʹәтә бәр байе һәвалед хьраб у дәстпекьр бь жийинәкә хьраб бьжи. Әԝи наркотик дьда хәбате, бенамуси у дьзи дькьр. Ели чьԛас дьчу дьбу йәки һерс у зӧлм. Әԝ дьбежә: «Мьн һʹәму тьштед кӧ гәрәке Мәсиһи нәкьн, дькьрьн». Диса жи, Ели бир нәдькьр кӧ әԝ бьчʹуктайеда чь һин бьбу. Ԝәʹдә шунда, әԝи диса һинбуна Кʹьтеба Пироз дәстпекьр. Әԝ гәләк сәр хԝә дьхәбьти у тʹәрка хәйсәтед хьраб да, у сала 2000-да һатә ньхӧмандьне. Гәло әԝи чь кʹар станд, чахе дәстпекьр ль гора ԛанунед Йаһоԝа бьжи? Ели дьбежә: «Әʹдьлайи кʹәтә дьле мьн, у исафа мьн тʹәмьз ә». * Чаԝа кӧ әв сәрһати нишан дькә, кәсед кӧ ԛанунед Йаһоԝа инкʹар дькьн зьраре дьдьнә хԝә. Диса жи, Йаһоԝа һазьр ә али ԝан бькә, кӧ әԝана бенә гӧһастьне.

11. Йаһоԝа чь нәфрʹәт дькә?

¹¹ Нәфрʹәт кә ԝан тьшта, чь кӧ  Йаһоԝа нәфрʹәт дькә (Зәбур 97:10). Ль гора Кʹьтеба Пироз, Йаһоԝа «чʹәʹвед кʹӧбар, зьмане дәрәԝин, дәстед кӧ хуна бесущ дьрʹежьн» нәфрʹәт дькә (Мәтʹәлок 6:16, 17). Ӧса жи, мәрьвед «ԛәтʹьл у ԛәлп» бәр чʹәʹве ԝи рʹәш ьн (Зәбур 5:6). Рʹожед Нӧһда, Йаһоԝа ԛьрʹа һʹәму мәрьвед хьраб ани, чьмки ԝана әʹрд бь зӧлм у зордарийе тʹьжә кьрьбу (Дәстпебун 6:13). Ӧса жи, Йаһоԝа бь сайа Малахи пʹехәмбәр готьбу, ԝәки Әԝ ԝан кәса нәфрʹәт дькә, йед кӧ ԛәста нәмамийа һәвалзәԝаще хԝә дькьн, сәва кӧ жь ԝана бьԛәтьн. Хԝәде һʹәбандьна ԝан ԛәбул накә, у ԝе диԝана ԝан бькә (Малахи 2:13-16; Ибрани 13:4).

12. Чь те һʹәсабе «жь хьрабийе зьвер бьн»?

¹² Йаһоԝа дьхԝазә кӧ әм «жь хьрабийе зьвер бьн» (Рʹомайи 12:9). Хәбәра «зьвер» те һʹәсабе гава тьштәк бәр чʹәʹве мәрьва рʹәш ә у һʹәрам ә. Гава бина хԝарьнәкә гәни дькʹәвә позе мә, мәʹде мә һәв дькʹәвә у әм дәрберʹа дьхԝазьн ве хԝарьне бавежьн, ӧса нинә? Мина ве йәке, гәрәке әм ван тьшта нәфрʹәт бькьн чь кӧ бәр чʹәʹве Йаһоԝа рʹәш ьн, у хԝә жь ԝан тьшта дур бьгьрьн.

13. Чьрʹа фәрз ә кӧ әм һʹьше хԝә бьпарезьн?

¹³ Һʹьше хԝә бьпарезә. Фькред мә ль сәр кьред мә һʹӧкӧм дькьн. Ләма жи Иса готьбу кӧ гәрәке әм фькред хьраб, йед кӧ дькарьн бьбьнә сәбәб кӧ әм гӧнед гьран бькьн, жь һʹьше хԝә дәрхьн (Мәтта 5:21, 22, 28, 29). Һәгәр әм дьхԝазьн дьле Баве хԝәйи әʹзмана ша кьн, гәләк фәрз ә ԝәки әм һʹьше хԝә жь фькред хьраб хԝәй кьн.

14. Хәбәрдана мә чь нишан дькә, у гәрәке әм сәр кʹижан пьрса бьфькьрьн?

¹⁴ Хәбәрдана хԝә контрол кә. Иса ӧса готьбу: «Тьштед кӧ жь дев дәртен, әԝ жь дьл дәртен» (Мәтта 15:18). Бәле, хәбәрдана мә нишан дькә кӧ дьле мәда чь һәйә. Жь хԝә бьпьрсә: «Чьԛас зор бә жи, гәло әз һәртʹьм рʹастийе дьбежьм? Һәгәр әз зәԝьщи йан меркьри мә, гәло әз хԝә жь флирте хԝәй дькьм? Гәло мьн бь тʹәмами тʹәрка хәбәрдана нәщайиз дайә? Гава кәсәк дьле мьн дешинә, гәло әз диса жи рʹьһʹәт щаба ԝи дьдьм?» Ԝе баш бә кӧ тӧ сәр ван пьрса бьфькьри. Чаԝа кӧ дьрун пʹәрчед кʹьнща һәвва дьдьру, хәбәрдана хьраб жи наһелә ԝәки тӧ «мәрьве кәвьн» жь хԝә бехи.  Һәгәр тӧ хирәт бьки кӧ дәрәԝа, хәбәрдана сәрт у бенамус, бьтʹәрькини, тәрʹа ԝе дьһа һеса бә «мәрьве кәвьн» жь хԝә бехи.

15. Әм чаԝа дькарьн «мәрьве кәвьн» ль сәр стуне мьх кьн?

¹⁵ Һазьр бә кӧ гӧһастьна бьки. Паԝлосе шанди бь сайа мәсәләкә баш нишан кьр, кӧ гәрәке әм жийина хԝә чаԝа бьгӧһезьн. Әԝи гот, кӧ гәрәке әм «мәрьве кәвьн» ‹ль сәр стуне мьх бькьн› (Рʹомайи 6:6). Демәк, әм гәрәке чʹәʹв бьдьнә Иса. Гәрәке әм һʹәму фькьр у кьред кӧ Йаһоԝа нәфрʹәт дькә, ча бежи бькӧжьн, ԝәки исафа мә паԛьж бә у рʹийа жийина һәрһәйи ль бәр мә вәбә (Йуһʹәнна 17:3; 1 Пәтрус 3:21). Йаһоԝа ԝе тʹӧ щар сәва хатьре мә ԛанун у принсипед хԝә нәгӧһезә. Гәрәке әм хԝә бьгӧһезьн у ль гора ԛанунед ԝи бьжин (Ишайа 1:16-18; 55:9).

16. Чьрʹа фәрз ә кӧ әм бәрдәԝам кьн мьԛабьли хԝәстьнед нәрʹаст шәрʹ бькьн?

¹⁶ Бәрдәԝам кьн мьԛабьли хԝәстьнед бәдәне шәрʹ бькьн. Паши ньхӧмандьне жи, ԝе лазьм бә кӧ тӧ мьԛабьли хԝәстьнед бәдәне шәрʹ бьки. Ԝәрә әм дина хԝә бьдьнә сәрһатийа мерәки бь наве Маурисио. Щаһьлтийеда әԝ бу һомосексуал. Паше, әԝ рʹасти Шәʹдед Йаһоԝа һат у һинбуна Кʹьтеба Пироз дәстпекьр. Әԝи тʹәрка бенамусийе да у сала 2002-да һатә ньхӧмандьне. Ида гәләк сал дәрбаз буйә, ле диса жи Маурисио дьбежә: «Рʹаст бежьм, щарна диса жи хԝәстьнед нәрʹаст дькʹәвьн дьле мьн». Ле дәԝса кӧ Маурисио дьлтәнг бә у сьст бә, әԝ дьбежә: «Әз заньм кӧ гава әз накʹәвьм бәр байе хԝәстьнед хԝәйә нәрʹаст, әз дьле Йаһоԝа ша дькьм, у әв йәк ԛәԝате дьдә мьн». *

17. Сәрһатийа Набиһайеда чь дина тә кʹьшанд?

¹⁷ Жь Йаһоԝа аликʹарийе бьхԝазә у хԝә нәсперә ԛәԝата хԝә, ле хԝә бьсперә рʹӧһʹе ԝи (Галати 5:22; Филипи 4:6). Гәрәке әм хирәт бькьн кӧ «мәрьве кәвьн» жь хԝә бехьн у дури ве йәке бьн. Дина хԝә бьдә сәрһатийа жьнькәкә бь наве Набиһа. Гава әԝ 6 сали бу, баве ԝе әԝ һишт. Набиһа ӧса дьбежә: «Дьле мьн гәләк дешийа». Гава әԝ мәзьн дьбу, әԝ  чьԛас дьчу дьбу йәкә һерс. Әԝе наркотика дьфрот у сәр чәнд сала кʹәтә кәле. Шәʹдед Йаһоԝа, йед кӧ сәрледана гьртийа дькьрьн, тʹәви ԝе һинбуна Кʹьтеба Пироз дәстпекьрьн. Набиһайе жийина хԝә һеди-һеди дьгӧһаст. Әԝ дьбежә: «Мьнрʹа һеса бу һьнә хәйсәтед хьраб бьтʹәрькиньм, ле гәләк чәтьн бу ԝәки тʹәрка щьхаре бьдьм». Саләк зедәтьр дәрбаз бу, һʹәта кӧ Набиһа тʹәрка щьхаре да. Гәло чь али ԝе кьр? Набиһа дьбежә: «Жь һәр тьшти зедәтьр, мьн дӧа дькьр ԝәки Йаһоԝа али мьн бькә кӧ әз тʹәрка щьхаре бьдьм». Ньһа Набиһа ӧса дьбежә: «Һәгәр мьн карьбу жийина хԝә бьгӧһезьм, ԝәки дьле Йаһоԝа ша кьм, һәр кәс дькарә ве йәке бькә!» *

18. Ль гора 1 Корьнтʹи 6:9-11, гәләк хьзмәткʹаред Хԝәде чь кьрьнә?

¹⁸ Ԛьрʹна йәкеда һьнә кәсед кӧ тьштед хьраб дькьрьн, һатьнә гӧһастьне у паше жь алийе Хԝәдева һатьнә һьлбьжартьне, ԝәки тʹәви Иса пʹадшатийе бькьн. Кʹьтеба Пироз дьбежә ԝәки һьнә жь ԝан, бенамус, һомосексуал у дьз бун (1 Корьнтʹи 6:9-11 бьхунә). Бәле, бь аликʹарийа рʹӧһʹе пироз, ԝана хәйсәт-һʹӧнӧред хԝә гӧһаст. Иро жи, Кʹьтеба Пироз али гәләк кәса кьрийә кӧ жийина хԝә бьгӧһезьн. * Әв йәк кӧ ԝана чаԝа тʹәрка хәйсәтед хьраб дайә, нишан дькә кӧ тӧ жи дькари бейи гӧһастьне у тʹәрка хәйсәтед хьраб бьди, сәва кӧ бькарьби бейи ньхӧмандьне.

19. Готара дьнда әме дәрһәԛа чь шеԝьр кьн?

¹⁹ Кәсед кӧ дьхԝазьн бенә ньхӧмандьне, хенщи кӧ «мәрьве кәвьн» жь хԝә бехьн, әԝана гәрәке ӧса жи «мәрьве ну» ль хԝә кьн. Готара дьн ԝе нишан кә, кӧ әԝана ча дькарьн ве йәке бькьн у кәсед дьн ча дькарьн али ԝан бькьн.