Ве пьрсе әԝ мәрьв дьдьн, йед кӧ ван рʹеза зу-зу дьхуньн. Ле те кʹьфше кӧ әв рʹез бәʹса дӧ меред бь наве Мәфибошәт дькьн. Гәло бь рʹасти чь ԛәԝьмибу?

Һʹәфт кӧрʹ у дӧ ԛизед Шаԝул Пʹадша һәбун. Кӧрʹе Шаԝул йе пешьн Йонатʹан бу. Паше, щарийа Шаԝул бь наве Ритспа кӧрʹәк жерʹа ани, у наве ԝи Мәфибошәт бу. Наве кӧрʹәки Йонатʹан жи Мәфибошәт бу. Демәк, наве кӧрʹе Шаԝул Пʹадша Мәфибошәт бу, у наве нәвийе ԝи жи Мәфибошәт бу.

Рʹожәке, Гибонийа кӧ ԝәлате Исраеледа дьжитьн бәр чʹәʹве Шаԝул рʹәш бун, у әԝи дьхԝәст ԛьрʹа ԝан һʹәмуйа бьанийа. Ча те кʹьфше, гәләк Гибони һатьнә кӧштьне. Әв йәк гӧнәки гьран бу, чьмки рʹожед Йешуда, сәрокед Исраеле тʹәви Гибонийа пәймана әʹдьлайе гьредабун (Йешу 9:3-27).

Рʹожед Шаԝул Пʹадшада, әв пәйман һе ԛәԝатеда бу. Диса жи, Шаԝул дьхԝәст ԛьрʹа Гибонийа бьанийа. Ль гора Кʹьтеба Пироз, хуна Гибонийа сәр Шаԝул у мала ԝи бу (2 Самуйел 21:1). Ләма жи гава Даԝьд бу пʹадша, Гибонийед кӧ сах ман, сәва ве гӧне гьран газьнед хԝә жерʹа кьрьн. Сәва кӧ Йаһоԝа әʹрде Исраеле диса кʹәрәм кьра, Даԝьд жь Гибонийа пьрси кʹа бәрдела гӧне Шаԝул гәрәке чь бә. Дәԝса кӧ пʹәрә бьхԝазьн, Гибонийа хԝәстьн кӧ Даԝьд һʹәфт кӧрʹед Шаԝул бьдә дәсте ԝан, ԝәки әԝ бенә кӧштьне (Жьмар 35:30, 31). Даԝьд Пʹадша хԝәстьна ԝан ԛәбул кьр (2 Самуйел 21:2-6).

Шаԝул у Йонатʹан ида шәрʹда мьрьбун, ле кӧрʹе Йонатʹан Мәфибошәт һе сах бу. Жь бо ԛәзике, әԝ зарʹотийеда сәԛәт бу. Ләма жи әшкәрә йә, кӧ әԝи тʹәви кальке хԝә һʹьщуми сәр Гибонийа нәкьрьбу. Даԝьд тʹәви Йонатʹан пәймана достийе гьредабу, у кӧрʹе Йонатʹан Мәфибошәт жи бьн ве пәйманеда бу (1 Самуйел 18:1; 20:42). Кʹьтеба Пироз дьбежә кӧ ләма жи Даԝьд «Мәфибошете кӧрʹе Йонатʹан параст» (2 Самуйел 21:7, ИМ).

Диса жи, Даԝьд хԝәстьна Гибонийа ԛәбул кьр. Әԝи дӧ кӧрʹед Шаԝул, кӧ наве йәки жь ԝан Мәфибошәт бу, у пенщ нәвийед Шаԝул данә дәсте ԝан (2 Самуйел 21:8, 9). Бь ви щурʹәйи, гӧне хунрʹетьне жь ԝәлат һатә һьлдане.

Әм дькарьн жь ве сәрһатийе дәрсәкә фәрз һин бьн. Хԝәде тʹәмикә зәлал дабу: «Бав гәрә дәԝса зарʹа нәйенә кӧштьне, нә жи зарʹ дәԝса баве бенә кӧштьне» (Ԛануна Дӧщари 24:16). Һәгәр дӧ кӧрʹ у пенщ нәвийед Шаԝул бегӧнә буна, Йаһоԝа ԝе жь сафикьрьна Даԝьд рʹази нибуйа. Ԛануне ӧса жи дьгот кӧ «һәр кәс бона гӧнәйе хԝә» гәрәке бе кӧштьне. Чаԝа кӧ те фәʹмкьрьн, гава Шаԝул дьхԝәст Гибони бькӧштана, әԝ һʹәфт нәфәред мала ԝи жи пьштгьрийа ԝи кьрьбун. Ләма, әԝана жи гӧнәкʹар бун, у ԝана щәзайа кьред хԝә станд.

Чаԝа кӧ әв сәрһати нишан дькә, һәгәр кәсәки шаши кьрьбә, әԝ нькарә бежә кӧ әԝи тʹәне хԝәстьна кәсәки анийә сери у ләма жи әԝ гӧнәкʹар нинә. Кʹьтеба Пироз ӧса дьбежә: «Шьвәрʹийа гавед хԝә әʹнәнә кә у һʹәму рʹийед тә шьдийайи бьн» (Мәтʹәлок 4:24-27; Әфәси 5:15).