1. Даԝьд дәрһәԛа мьлуктийа Йаһоԝа чь гот?

ГӘЛО Йаһоԝа мьлук ә? Бәле! Зәбурбеж Даԝьд ӧса ньвиси: «Нәфсбьчʹукийа тә [мьлуктийа тә] әз бьльнд кьрьм» (2 Сам. 22:36; Зәб. 18:35). Гава Даԝьд әв готьн дьньвисин, ԝи бәлки дьани бира хԝә кӧ Самуйел пʹехәмбәр чаԝа һатьбу мала баве ԝи кӧ пʹадшаки ну кʹьфш бькә. Жь 8 лаԝька, йе һәри бьчʹук Даԝьд бу. Диса жи, Йаһоԝа әԝ һьлбьжарт кӧ дәԝса Шаԝул бьбә пʹадша (1 Сам. 16:1, 10-13).

2. Ве готареда, әме сәр чь хәбәр дьн?

² Даԝьд пʹадша бе шьк ван готьнед зәбурбежрʹа ԛайил бу, йе кӧ дәрһәԛа Йаһоԝа ӧса гот: «Хԝә ԛуз дькә, дина Хԝә дьдә әʹрд у әʹзмана . . . Әԝ фәԛир жь хԝәлийе рʹадькә . . . ԝәки кʹеләка әʹсьлзада бьдә рʹуньштандьне» (Зәб. 113:6-8). Ве готареда, әме йа әʹԝльн бьвиньн кӧ Йаһоԝа мьлуктийа хԝә чаԝа әʹйан кьрийә. Паше, әме жь сәрһатийед Шаԝул Пʹадша, Данийел пʹехәмбәр у Иса Мәсиһ дәрһәԛа мьлуктийе һьнә дәрсед фәрз бьстиньн.

3. Йаһоԝа ль мә чаԝа дьньһерʹә, у әв йәк чь избат дькә?

³ Мьлуктийа Йаһоԝа жь һәләԛәтийа ԝи йа бь инсанед ԛьсурдаррʹа әʹйан дьбә. Әԝ һьм һʹәбандьна мә  ԛәбул дькә һьм жи мә ԝәк достед хԝә ԛәбул дькә (Аԛуб 4:8). Йаһоԝа Кӧрʹе хԝә ԝәк ԛӧрбанәкә жь бо гӧнәһед мә дайә у бь ви аԝайи рʹе вәкьрийә, кӧ әм бьбьн достед ԝи. Йаһоԝа бь рʹасти жи пʹьрʹ дьлован у дьлрʹәʹм ә!

4. Йаһоԝа чь дайә мә, у чьма?

⁴ Йаһоԝа мьлуктийа хԝә бь аԝайәки дьн жи әʹйан дькә. Йаһоԝа дькарьбу әм бе азайа бьжартьне бьәʹфьрандана. Ле бәле, ԝи әм бь сурәте хԝә чекьрьнә, у әԝ изне дьдә кӧ әм ль гора дьле хԝә ԛьрара бькьн. Һьмбәри Йаһоԝа, әм һьлбәт пʹьрʹ бьчʹук ьн. Диса жи, әԝ дьхԝазә кӧ әм жь дьл ԝирʹа хьзмәт бькьн жь бәр кӧ әм ԝи һʹьз дькьн у жь бәр кӧ әм фәʹм дькьн кӧ рʹебәрийа ԝи бьфәйдә йә (Ԛан. Дщр. 10:12; Иша. 48:17, 18). Ма әм нә шькьрдар ьн кӧ Йаһоԝа һаԛас мьлук ә?

5. Жь алийе мьлуктийева, әм дькарьн жь Йаһоԝа чь дәрса бьстиньн? (Бьньһерʹә шькле рʹуйе журнале.)

⁵ Жь алийе мьлуктийева, Йаһоԝа бь рʹасти жи мәсәләкә мәзьн ә. Биланийа ԝи бесинор ә, ле әԝ фькьр у ньһерʹандьнед кәсед дьн жи ԛәбул дькә. Мәсәлә, Йаһоԝа изьн да кӧ Кӧрʹе ԝи ише афьрандьна һәр тьштида али ԝи бькә (Мәтʹлк. 8:27-30; Колс. 1:15, 16). Ӧса жи, ԛӧдрәта Йаһоԝа чьԛас мәзьн ә жи, әԝ һьнә щабдари дьдә кәсед дьн жи. Мәсәлә, ԝи Иса ԝәк Пʹадше Пʹадшатийа хԝә кʹьфш кьрийә, у әԝ 144 000 кәси ԝәк һәмпʹадшайед Иса һьлдьбьжерә (Луԛа 12:32). Жь бо кӧ Иса бьбә Пʹадша у Сәроккʹаһин, ԝи һьлбәт жь Йаһоԝа һинбун стандийә (Ибрн. 5:8, 9). Һәмпʹадшайед Иса жи жь алийе Йаһоԝава тен һин кьрьн кӧ щабдарийа хԝә биньн сери. Ле бәле, Йаһоԝа һәр  гавәкә ԝан контрол накә, ле әԝ баԝәр дькә кӧ әԝе хԝәстьна ԝи биньн сери (Әʹйан. 5:10).

6-7. Әв йәк кӧ Хԝәде щабдарийа дьдә кәсед дьн, чь мә һин дькә?

⁶ Һәрге Хԝәде – йе кӧ һʹәԝщәйи аликʹарийа тʹӧ кәси нинә – щабдарийа дьдә кәсед дьн, ма нә лазьм ә кӧ әм жи ӧса бькьн? Мәсәлә, һәрге тӧ сәре малбәте йан рʹуспийе щьвате йи, ԝе баш бә кӧ тӧ һьнә щабдарийа бьди кәсед дьн, у һәр гавәкә ԝан контрол нәки. Һәрге тӧ Йаһоԝа хԝәрʹа бьки мәсәлә, баре тә ԝе дьһа сьвьк бьбә, у тӧйе кәсед дьн һин бьки у хԝәбаԝәрийа ԝан зедә бьки (Иша. 41:10). Хенщи ве, кәсед хԝәйиһʹӧкӧм дькарьн жь Йаһоԝа чь дәрса бьстиньн?

⁷ Кʹьтеба Пироз нишан дькә кӧ Йаһоԝа һазьр ә ԝәки гӧһ бьдә фькьр у ньһерʹандьна мәләка (1 Пʹадш. 22:19-22). Де у бавно, һун чаԝа дькарьн Йаһоԝа хԝәрʹа бькьн мәсәлә? Бәʹса хәбәре, пешийа кӧ һун сафикьрьнәке бькьн, һун бәлки дькарьн фькра зарʹокед хԝә жи бьпьрсьн. Һәрге дьбә, ль гора фькред ԝан бькьн.

8. Йаһоԝа сәбра хԝә чаԝа Бьраһим у Сарайерʹа әʹйан кьр?

⁸ Мьлуктийа Йаһоԝа жь сәбра ԝи жи әʹйан дьбә. Мәсәлә, гава хьзмәткʹаред ԝи зор те кӧ ԛьраред ԝи ԛәбул бькьн, Йаһоԝа сәбьр дькә. Гава Бьраһим пьрси, кʹа ԝе һәԛ бә кӧ Йаһоԝа бажаред Содом у Гоморайе ԝеран бькә, Хԝәде бь сәбьр гӧһ да ԝи (Дәстп. 18:22-33). Ӧса жи, бинә бира хԝә кӧ Йаһоԝа чаԝа дьлованийа хԝә жьна Бьраһим Сарайерʹа әʹйан кьр. Сара ида пир бу, у гава Хԝәде соз да кӧ әԝе һʹәмлә бьминә, әԝ кʹәнийа. Диса жи, Йаһоԝа һерс нәкʹәт у әʹщьз нәбу, ле ԝи диса жи ԛәдре Сарайе гьрт (Дәстп. 18:10-14).

9. Де, бав у рʹуспийед щьвате дькарьн жь мәсәла Йаһоԝа чь дәрса бьстиньн?

⁹ Һәрге тӧ де, бав йан рʹуспийе щьвате йи, тӧ дькари жь мәсәла Йаһоԝа чь дәрса бьстини? Гава ль кәсәки зор те кӧ ԛьраред тә ԛәбул бькә, тӧ чь дьки? Гәло тӧ рʹастә-рʹаст ԝирʹа дьбежи кӧ тӧ рʹаст и у әԝ шаш ә, йан хирәт дьки кӧ ньһерʹандьна ԝи фәʹм бьки? Гава кәсед хԝәйиһʹӧкӧм Йаһоԝа хԝәрʹа дькьн мәсәлә, нәфәред малбәте у щьвате жь ве йәке кʹаре дьстиньн. Һʹәта ньһа, мә дина хԝә дайә дәрсед кӧ әм дькарьн жь мьлуктийа Йаһоԝа бьстиньн. Ньһа, әме бьбиньн кӧ әм дькарьн жь һьнә сәрһатийед дьн, йед кӧ Кʹьтеба Пирозда дәрбаз дьбьн, чь дәрса бьстиньн.

10. Йаһоԝа мә чаԝа һин дькә?

¹⁰ Сәрһатийед кӧ Кʹьтеба Пирозда дәрбаз дьбьн, «бона һинбуна мә» һатьнә ньвисандьн (Рʹом. 15:4). Мәсәлә, Кʹьтеба Пироз бәʹса һьнә кәсед мьлук дькә, йед кӧ синоред хԝә заньбун. Ӧса жи, Кʹьтеба Пирозда һьнә сәрһатийед кәсед ԛӧрʹә жи һәнә. Әм дькарьн жь ван сәрһатийа гәләк дәрсед фәрз бьстиньн (Зәб. 37:37; 1 Корн. 10:11).

11. Әм дькарьн жь сәрһатийа Шаԝул чь дәрса бьстиньн?

¹¹ Мәсәлә, бинә бира хԝә кӧ чь һатьбу сәре Шаԝул Пʹадша. Сәрида, әԝ хортәки мьлук бу. Ԝи синоред хԝә заньбун, у әԝ дьтьрсийа кӧ һе зедә щабдарийа ԛәбул бькә (1 Сам. 9:21; 10:20-22). Ле бәле, паши ве йәке кӧ әԝ бу  пʹадша, Шаԝул бу мәрьвәки хԝәсәри хԝә. Щарәке, Шаԝул һивийа Самуйел пʹехәмбәр дьсәкьни, йе кӧ ԝе ԛӧрбанәк пʹешкʹеш бькьра. Ле гава пʹехәмбәр дәрәнги кʹәт, Шаԝул сәбра хԝә ӧнда кьр, у ԝи ԛӧрбанәк пʹешкʹеш кьр. Изна ԝи тʹӧнә бу кӧ ве йәке бькә, ләма Йаһоԝа сәр ԝи һерс кʹәт у ԛьрар кьр кӧ кәсәки дьн бькә пʹадша (1 Сам. 13:8-14). Ԝе баш бә кӧ әм жь ве сәрһатийе дәрса бьстиньн у синоред хԝә бьзаньбьн.

12. Данийел пʹехәмбәр мьлуктийа хԝә чаԝа әʹйан кьр?

¹² Данийел пʹехәмбәр нә ӧса бу. Әԝ тʹәмамийа әʹмре хԝә Хԝәдерʹа бь мьлуктийе хьзмәт дькьр у рʹебәрийа ԝи дьгәрʹийа. Мәсәлә, гава Йаһоԝа әԝ бь кʹар ани кӧ хәԝна Нәбукәднәсәр шьровәкә, Данийел пʹехәмбәр бь мьлукти һʹәму пәсьн дан Йаһоԝа (Дан. 2:26-28). Дәрс жь бо мә чь йә? Һәрге хушк у бьра готаред мә бәгәм дькьн йан һәрге әм дь хьзмәтеда пешдачуйи нә, гәрәке әм пәсне Йаһоԝа бьдьн. Гәрәке әм бь мьлукти ԛәбул бькьн кӧ бе аликʹарийа Йаһоԝа, мәйе нькарьбуйа әв тьшт бькьрана (Фили. 4:13). Дь ви ԝарида, ԝе баш бә кӧ ньһерʹандьна мә ԝәк ньһерʹандьна Иса Мәсиһ бә.

13. Мьлуктийа Иса жь готьнед ԝи йед Йуһʹәнна 5:19, 30-да, чаԝа әʹйан дьбә?

¹³ Иса Мәсиһ чьԛас беԛьсур бу жи, ԝи хԝә һәр тʹьм дьспарт Баве хԝә Йаһоԝа (Йуһʹәнна 5:19, 30 бьхунә). Ԝи тʹӧ щара нәдьхԝәст һʹӧкӧме Баве хԝә зәфте хԝә кә. Иса Мәсиһ һәр тʹьм гӧһ дьда Йаһоԝа, ԝи синоред хԝә заньбун, у ԝи ԛәдре һʹӧкӧмтийа Баве хԝә дьгьрт. Бәле, ԝи ԛәбул дькьр кӧ Баве ԝи жь ԝи мәзьнтьр ә (Йуһʹн. 14:28).

14. Гава тьштәки кӧ нә дь дәсте Исада бу жь ԝи һат хԝәстьн, ԝи чь щаб да?

¹⁴ Щарәке, Аԛуб у Йуһʹәннайе шанди тʹәви дийа хԝә чун бал Иса кӧ ԛәдрәки мәхсус бьхԝазьн. Ԝе гот: «Әʹмьр бькә кӧ әв һәрдӧ кӧрʹед мьн, Пʹадшатийа тәда йәк ль мьле тә йе рʹасте, йе дьн ль мьле тә йе чʹәпе рʹунә». Ле Иса ԝерʹа гот кӧ тʹәне Хԝәде дькарә сафи кә кӧ кʹи ԝе Пʹадшатийеда ль мьле Иса йе рʹасте у чʹәпе рʹунә (Мәт.  20:20-23, ИМ). Иса синоред хԝә бь мьлукти ԛәбул дькьрьн. Әԝ тʹӧ щара жь готьнед Йаһоԝа дәрнәдькʹәт (Йуһʹн. 12:49). Әм чаԝа дькарьн мина Иса бьн?

15-16. Әм чаԝа дькарьн ширәта жь 1 Корьнтʹи 4:6 пек биньн?

¹⁵ Жь бо кӧ әм мина Иса бьн, гәрәке әм гӧһ бьдьн ве ширәта Кʹьтеба Пироз: «Жь ньвисаре дәрнәйен» (1 Корн. 4:6). Ләма, һәрге кәсәк бе бал мә у жь мә ширәте бьхԝазә, гәрәке әм рʹьнд бьфькьрьн бәри кӧ әм ширәте бьдьн ԝи у зоре ль ԝи нәкьн кӧ әԝ ньһерʹандьна мә ԛәбул бькә. Ԝе баш бә кӧ әм дина мәрьва бькʹьшиньн сәр ширәтед Кʹьтеба Пироз у әʹдәбйәтед тʹәшкиләте. Бь ви аԝайи, әм дькарьн пәсне Йаһоԝа бьдьн у нишан бькьн кӧ әм синоред хԝә заньн (Әʹйан. 15:3, 4).

¹⁶ Жь хенщи ве кӧ гәрәке әм пәсне Йаһоԝа бьдьн, сәбәбед дьн жи һәнә кӧ гәрәке әм чьма мьлук бьн. Ньһа әме бьбиньн кӧ мьлукти чаԝа дькарә шабуне бьдә мә у али мә бькә кӧ әм тʹәви кәсед дьн аштийеда бьн.

17. Кәсед мьлук чьма һе бәхтәԝар ьн?

¹⁷ Кәсед мьлук һе бәхтәԝар ьн. Гәло чьма? Кәсед кӧ синоред хԝә заньн аликʹарийа кәсед дьн бь шькьрдари ԛәбул дькьн. Мәсәлә, бинә бира хԝә кӧ гава Иса 10 мәрьвед кʹоти ԛәнщ кьрьн, чь ԛәԝьми. Тʹәне йәк жь ԝан вәгәрʹийа кӧ жь Исарʹа шькьр бькә, чьмки ԝи әԝ жь нәхԝәшийәкә бечʹарә фьльтанд. Әв мәрьв сәва аликʹарийа Иса шькьрдар бу, у ԝи пәсне Хԝәде да (Луԛа 17:11-19).

18. Мьлукти чаԝа али мә дькә кӧ әм бь кәсед дьнрʹа аштийеда бьн? (Рʹомайи 12:10)

¹⁸ Мәрьвед мьлукрʹа һеса йә кӧ кәсед дьнрʹа достийе бькьн у аштийеда бьминьн.  Гәло чьма? Әԝ ԛәбул дькьн кӧ кәсед дьн жи хԝәйе һʹӧнәред баш ьн, у әԝ бь ԝан баԝәр ьн. Гава кәсед дьн ише хԝәда пешдачуйи нә, мәрьвед мьлук ша дьбьн у пәсне ԝан дьдьн (Рʹомайи 12:10 бьхунә).

19. Ахьрийа хьраб йед ԛӧрʹәбуне чь нә?

¹⁹ Ле бәле, мәрьвед ԛӧрʹә зор те кӧ пәсне кәсед дьн бьдьн, чьмки әԝ һәр тʹьм дьхԝазьн пәсна бьстиньн. Әԝ хԝә бь кәсед дьн бәрамбәр дькьн  у дьхԝазьн жь ԝан баштьр бьн. Әԝ баԝәр накьн кӧ кәсед дьн жи дькарьн ишед баш бькьн, ләма әԝ һәр тʹьм дьхԝазьн һәр тьшти хԝә бь хԝә бькьн (Галт. 5:26). Мәрьвед ӧса зор те кӧ достийе бь кәсед дьнрʹа хԝәй бькьн. Һәрге тӧ тедәрхи кӧ дьле тәда ԛӧрʹәти һәйә, дӧа бькә кӧ Йаһоԝа али тә бькә кӧ бькарьби бь сайа «нубуна һьше хԝә» жь ви хәйсәте хьраб бьфьльти (Рʹом. 12:2, ИМ).

20. Чьма фәрз ә кӧ әм мьлук бьн у синоред хԝә бьзаньбьн?

²⁰ Әм чьԛас шекьрдар ьн кӧ Баве мә Йаһоԝа мьлук ә! Әԝ мьлуктийа хԝә кәсед дьнрʹа әʹйан дькә, у ԝе баш бә кӧ әм жи ӧса бькьн. Ӧса жи, ԝе баш бә кӧ әм мәрьвед кӧ бь мьлукти Йаһоԝарʹа хьзмәт дькьн хԝәрʹа бькьн мәсәлә. Бьра әм һәр тʹьм пәсне Йаһоԝа бьдьн! (Әʹйан. 4:11) Һәрге әм ӧса бькьн, Хԝәде ԝе хьзмәта мә ԛәбул бькә, чьмки әԝ мәрьвед мьлук һʹьз дькә.