1. Йаһоԝа чь ԛәдьр дайә мә?

ЧЬ ԚӘДЬРӘКИ мәзьн ә кӧ Йаһоԝа әм щьвата хԝәда ԛәбул кьрьнә. Щьватеда әʹдьлайи һәйә, у әм бь шабуне һәврʹа Йаһоԝа дьһʹәбиньн. Ле гәло щьватеда рола тә чь йә?

2. Паԝлосе шанди чәнд намәйед хԝәда кʹижан мәсәлә ани?

² Мәсәләкә кӧ Паԝлосе шанди чәнд намәйед хԝәда бь кʹар ани, али мә дькә кӧ әм рола хԝә фәʹм бькьн. Ван намәйада, Паԝлос щьват бәрамбәри бәдәне кьр, у ԝи әндәмед щьвате бәрамбәри пʹаред бәдәне кьр (Рʹом. 12:4-8; 1 Корн. 12:12-27; Әфәс. 4:16).

3. Ве готареда, әме чь һин бьн?

³ Ве готареда, әме дина хԝә бьдьн се дәрсед фәрз, йед кӧ әм дькарьн жь мәсәла Паԝлос бьстиньн. Йа йәке, әме һин бьн кӧ щьвата Йаһоԝада, рола * һәр кәси һәйә. Йа дӧда, әме бьбиньн кӧ һәрге мә зор те кӧ әм рола хԝә фәʹм бькьн, әм дькарьн чь бькьн. У йа сьсийа, әме бьбиньн кӧ чьма фәрз ә кӧ әм рола хԝә һәр тʹьм пек биньн.

4. Рʹомайи 12:4, 5 чь мә һин дькә?

⁴ Дәрса пешьн әв ә кӧ малбәта Йаһоԝада, щийе һәр кәси һәйә. Паԝлос ӧса гот: «Ԝәк кӧ дь бәдәна мә дә  гәләк әндам һәнә у кʹаре һʹәму әндама щьһе йә, ӧса жи әм йед кӧ гәләк ьн, әм бь Мәсиһ йәк бәдән ьн у әм һʹәму әндамед һәв ьн» (Рʹом. 12:4, 5, ИМ). Паԝлос чь дьхԝәст бьгота? Щьватеда, рола һәр кәси жь һәв щӧдә йә, ле һәр кәс бь ԛимәт ә.

5. Йаһоԝа чь пʹешкʹеш данә щьвате?

⁵ Мәсәлә, һьнә бьра һатьнә кʹьфш кьрьн кӧ рʹебәрийа щьвате бькьн (1 Тʹеслн. 5:12; Ибрн. 13:17). Бь дәсте Иса Мәсиһ, Йаһоԝа әԝ ԝәк пʹешкʹеш данә щьвата хԝә (Әфәс. 4:8). Һьнә жь ԝан ԝәк әндәмед Кʹома Рʹебәрийе, аликʹаред Кʹома Рʹебәрийе, әндәмед комитейа Филиале, бәрпьрсийаред мьһале, мамостәйед мәкʹтәбед теократик, рʹуспийед щьвате у бәрдәстийед щьвате хьзмәт дькьн. Әв бьра жь алийе рʹӧһʹе пирозва тен кʹьфш кьрьн кӧ мийед Йаһоԝа хԝәй бькьн у бона һʹәԝщед щьвате хәм дькьн (1 Пәт. 5:2, 3).

6. Ль гора 1 Тʹесалоники 2:6-8, бьрайед кӧ жь алийе рʹӧһʹе пирозва тен кʹьфш кьрьн чь дькьн?

⁶ Бьра жь алийе рʹӧһʹе пирозва тен кʹьфш кьрьн кӧ щурʹә-щурʹә щабдарийа биньн сери. Чаԝа кӧ дәст у пʹе у пʹаред дьн йед бәдәне жь бо кʹара бәдәне һәвкʹарийе дькьн, бьрайед кʹьфшкьри жи жь бо кʹара щьвате һәвкʹарийе дькьн. Әԝ пәсна нагәрʹьн, ле нета ԝан әв ә кӧ хушк у бьра жь алийе рʹӧһʹанива ава бькьн у ԛәԝи бькьн (1 Тʹесалоники 2:6-8 бьхунә). Ма әм жь Йаһоԝарʹа шькьрдар ниньн кӧ ԝи бьрайед һаԛас фәдакʹар, хирәт у зен данә мә?

7. Хьзмәта һәр тʹьм чь бәрәкʹәта тинә?

⁷ Һьнә хушк у бьра ԝәк мисийонер, пешәнгед мәхсус у пешәнгед һәртʹьм тен кʹьфш кьрьн. Ль сәрансәре дьнйайе, гәләк хушк у бьра тʹәмамийа ԝәхте хԝә жь бо бәлакьрьна мьзгине хәрщ дькьн. Бь ви аԝайи, ԝана али гәләк кәса кьрийә кӧ әԝ бьбьн шагьртед Иса Мәсиһ. Мал у мьлкʹе ԝан чьԛас һьндьк бә жи, Йаһоԝа бәрәкʹәтед мәзьн дьдә ԝан (Марԛ. 10:29, 30). Әм пʹьрʹ ԛимәте дьдьн хушк у бьрайед ӧса, у әм ша нә кӧ әԝ пʹара щьвате нә.

8. Йаһоԝа чьма ԛимәте дьдә һʹәму мьзгинвана?

⁸ Щьватеда, гәло тʹәне рола бьрайед кʹьфшкьри у хьзмәткʹаред һәртʹьм һәйә? Һьлбәт на! Һәр мьзгинван жь бо Хԝәде у жь бо щьвате бьԛимәт ә (Рʹом. 10:15; 1 Корн. 3:6-9). Йәк жь нетед һәри фәрз йа щьвате әв ә, кӧ мәрьва бькә шагьртед Иса Мәсиһ (Мәт. 28:19, 20; 1 Тимтʹ. 2:4). Һʹәму әндәмед щьватейани һьм мьзгинванед кӧ һатьнә ньхӧмандьне, һьм жи әԝед кӧ һе нәһатьнә ньхӧмандьне – ви иши бь дьл у щан тиньн сери (Мәт. 24:14).

9. Әм чьма ԛимәте дьдьн хушка?

⁹ Йаһоԝа ԛәдре хушка жи дьгьрә у щабдарийед фәрз дьдә ԝан. Әԝ ԛимәте дьдә хушкед меркьри, хушкед кӧ зарʹокед ԝан һәнә, хушкед би у хушкед азәп, йед кӧ бь амьни ԝирʹа хьзмәт дькьн. Кʹьтеба Пироз бәʹса гәләк жьна дькә, йед кӧ дьле Хԝәде ша дькьр. Әԝ бь кьрьнед ԛәнщ, билани, баԝәри, хирәт, мерхаси у мәрʹданийа хԝә мәрʹа бун мәсәлә (Луԛа 8:2, 3; Кʹар. Шанд. 16:14, 15; Рʹом. 16:3, 6; Фили. 4:3; Ибрн. 11:11, 31, 35). Ма әм жь Йаһоԝарʹа шькьрдар ниньн кӧ щьвата мәда хушкед ӧса һәнә?

10. Әм чьма ԛимәте дьдьн хушк у бьрайед әʹмьрда мәзьн?

¹⁰ Ӧса жи, әм хушк у бьрайед әʹмьрда мәзьн жи пʹьрʹ һʹьз дькьн. Һьнә жь ԝан  тʹәмамийа әʹмре хԝә хьзмәта Йаһоԝада дәрбаз кьрийә. Һьнәк жи рʹастийа Кʹьтеба Пироз ну һин бунә. Сьһʹәта гәләк хушк у бьрайед әʹмрда мәзьн ида нә баш ә. Ләма, әԝ бәлки нькарьн щьватеда у хьзмәтеда гәләк иш бькьн. Диса жи, әԝ чьԛас жь дәсте ԝан те хьзмәт дькьн, у әԝ кәсед дьн дьшьдиньн у һин дькьн. Әм жь мәсәла ԝан пʹьрʹ кʹаре дьстиньн. Әм бь рʹасти жи пʹьрʹ ԛимәте дьдьн ԝан, у Йаһоԝа жи гәләк ԛимәте дьдә ԝан (Мәтʹлк. 16:31).

11-12. Тӧ чьма ԛимәте дьди зарʹок у щаһьлед щьвате?

¹¹ Щьватед мәда зарʹок у щаһьл жи гәләк бьԛимәт ьн. Жь бәр кӧ дьнйа бьн дәсте Мире-щьнда йә у бь фькред хьрабва тʹьжә йә, әԝ рʹасти гәләк тәнгасийа тен (1 Йуһʹн. 5:19). Гава зарʹок у щаһьл щьватада щаб дьдьн, дьчьн хьзмәте у баԝәрийа хԝә бь мерхаси дьпарезьн, әм гәләк ша дьбьн. Бәле, щьватеда рола зарʹок у щаһьла жи пʹьрʹ фәрз ә! (Зәб. 8:2)

¹² Диса жи, һьнә хушк у бьрайед мә зор те кӧ баԝәр бькьн кӧ әԝ щьватеда бь рʹасти жи керһати нә. Чь дькарә али мә бькә кӧ әм фәʹм бькьн кӧ щьватеда рола һәр йәк жь мә һәйә? Ньһа әме щаба ве пьрсе бьстиньн.

13-14. Һьнә хушк у бьра хԝә чьма бекер һʹәсаб дькьн?

¹³ Мәсәла Паԝлосе шанди дина мә дькʹьшинә сәр дәрсәкә дьн жи. Һьнәка зор те кӧ баԝәр бькьн, ԝәки әԝ жь бо щьвате бьԛимәт ьн. Паԝлос ӧса ньвиси: «Һәгәр ньг бежә: ‹Әз нә жь бәдәне мә, чьмки әз нә дәст ьм›, гәло әва мәʹни йә, кӧ әԝ нә жь бәдәне йә? У һәгәр гӧһ бежә: ‹Әз нә жь бәдәне мә, чьмки әз нә чʹәʹв ьм›, гәло әва мәʹни йә, кӧ әԝ нә жь бәдәне йә?» (1 Корн. 12:15, 16) Бь ван готьна, Паԝлос дьхԝәст чь бьгота?

¹⁴ Һәрге тӧ хԝә бь хушк у бьрайед  дьн бәрамбәр бьки, дьбәкә тӧ ԛимәта хԝә нәбини. Һьнә хушк у бьра бәлки жь алийе һинкьрьн, организәкьрьн йан шьвантийева пʹьрʹ жир у зен ьн. Тӧ бәлки дьфькьри кӧ фәрәсәтед тә ԛаси фәрәсәтед ԝан баш ниньн. Әв йәк нишан дькә кӧ тӧ мьлук и у синоред хԝә зани (Фили. 2:3). Ле һаш жь хԝә һәбә! Һәрге тӧ һәр тʹьм хԝә тʹәви кәсед бь фәрәсәтед мәзьн бәрамбәр бьки, тӧйе мерхасийа хԝә ӧнда бьки. Сәрда жи, ча Паԝлос готьбу, тӧйе бәлки бьфькьри кӧ щьватеда щийе тә тʹӧнә. Чь дькарә али тә бькә кӧ тӧ жь фькред ӧса бьфьльти?

15. Ль гора 1 Корьнтʹи 12:4-11, гәрәке әм дәрһәԛа фәрәсәтед хԝә чь бир нәкьн?

¹⁵ Ль сәдсала йәкеда, һьнә шагьртед Иса бь сайа рʹӧһʹе пироз фәрәсәтед мәхсус дьстандьн, ле фәрәсәтед ԝан нә ԝәк һәв бун (1 Корьнтʹи 12:4-11 бьхунә). Фәрәсәтед ԝан чьԛас жь һәв щӧдә бун жи, Йаһоԝа ԛимәт дьда һәр хьзмәткʹарәки хԝә. Иро әм фәрәсәта бь кʹәрәмәти настиньн, ле принсип диса жи әʹйни йә: Фәрәсәтед мә нә ԝәк һәв ьн, ле чʹәʹве Йаһоԝада, әм гьшк бьԛимәт ьн.

16. Гәрәк әм гӧһ бьдьн кʹижан ширәта Паԝлосе шанди?

¹⁶ Дәԝса кӧ әм хԝә бь кәсед дьн бәрамбәр бькьн, бьра әм гӧһ бьдьн ве ширәта Паԝлосе шанди: «Бьла һәр кәс кʹаре хԝә бьщерʹьбинә. Һьнге мәрьв нә бь кьрьнед һьнәкед дьн, ле тʹәне бь кьрьнед хԝә дькарә пәсне хԝә бьдә» (Галт. 6:4, ИМ).

17. Ԝе чьма баш бә кӧ әм гӧһ бьдьн ширәта Паԝлос?

¹⁷ Һәрге әм ль гора ширәта Паԝлос хԝә бьщерʹьбиньн, әме бәлки бьбиньн кӧ һьнә фәрәсәтед мә жи һәнә. Мәсәлә, рʹуспийед щьвате бәлки готарванәки һостә нинә, ле әԝ бәлки хьзмәтеда пʹьрʹ пешдачуйи йә. Йан жи, дьбә кӧ әԝ нькарә мина рʹуспийед дьн һәр тьшти рʹьнд организә бькә, ле әԝ бәлки шьванәки пʹьрʹ дьлгәрм ә, у ләма хушк  у бьра бь рʹьһʹәти дькарьн һәрʹьн бал ԝи у жь ԝи ширәте бьхԝазьн. Йан жи, әԝ бәлки бьрайәки пʹьрʹ меванһʹьз ә (Ибрн. 13:2, 16). Һәрге әм фәрәсәтед хԝә рʹьнд бьзаньбьн, әме дьһа баш фәʹм бькьн кӧ щьватеда рола мә чь йә, у әме чʹәʹвнәбарийа хушк у бьрайед дьн нәкьн, йед кӧ һʹӧнәред ԝан жь йед мә щӧда нә.

18. Әм чаԝа дькарьн фәрәсәтед хԝә зедә бькьн?

¹⁸ Щьватеда рола мә чь бә жи, ԝе баш бә кӧ әм хирәт бькьн кӧ хьзмәтеда пешда һәрʹьн у фәрәсәтед хԝә зедә бькьн. Ви щурʹәйи, Йаһоԝа мә бь дәсте тʹәшкиләта хԝә һин дькә. Мәсәлә, сәр Щьвина Бьжин у Хьзмәт кьн, әм һин дьбьн кӧ әм чаԝа дькарьн хьзмәтеда һе һостә бьн. Гәло тӧ тьштед кӧ ве бәрнамәйеда һин дьби, рʹьнд бь кʹар тини?

19. Һәрге тӧ дьхԝази һәрʹи Мәктʹәба Мьзгинванед Пʹадшатийе, гәрәке тӧ чь бьки?

¹⁹ Мәкʹтәба Мьзгинванед Пʹадшатийе жи һинбунәкә пʹьрʹ баш дьдә. Хушк у бьрайед кӧ хьзмәта һәртʹьмда нә у әʹмре ԝан 23 һʹәта 65 сали йә, дькарьн һәрʹьн ве мәкʹтәбе. Дьбәкә тӧ дькьфьри кӧ нькари бьгьһижи нетәкә ӧса. Ле бәле, дәԝса кӧ тӧ бьфькьри дәрһәԛа сәбәбед кӧ тӧ чьма һазьр нини һәрʹи ве мәкʹтәбе, ԝе баш бә кӧ тӧ дина хԝә бьди сәбәбед кӧ тӧ чьма дьхԝази һәрʹи. Паше, планәке чекә кӧ тӧ дәʹԝакьрьнед ве мәкʹтәбе бини сери. Бь сайа аликʹарийа Йаһоԝа у хирәта хԝә, тӧйе бәлки бьгьһижи нета хԝә.

20. Рʹомайи 12:6-8 чь мә һин дькә?

²⁰ Дәрса сьсийа, йа кӧ әм дькарьн жь мәсәла Паԝлос бьстиньн Рʹомайи 12: 6-8-да дәрбаз дьбә (бьхунә). Ван рʹезада, Паԝлос диса нишан дькә кӧ щьватеда, һʹӧнәред һәр кәси жь һәв щӧда нә. Ӧса жи, әԝ дьбежә кӧ гәрәк әм фәрәсәтед хԝә бь кʹар биньн кӧ щьвате жь алийе рʹӧһʹанива ава бькьн у ԛәԝи бькьн.

21-22. Сәрһатийед дӧ бьрайед мә чь мә һин дькьн?

²¹ Сәрһатийа бьрайәки бинә бәр чʹәʹве хԝә. Пьшти кӧ ԝи ль ԝәлатәки хәриб хьзмәт кьрьбу, тʹәшкиләте әԝ шанд Бәйтʹәла ль ԝәлате ԝи. Ԝирʹа готьн кӧ сәбәба кʹьфшкьрьна ну нә әв ә кӧ кемасийа ԝи һәйә, ле әԝ диса жи бәр хԝә кʹәт: «Гәләк мәһа, мьн хԝә бекер һʹәсаб дькьр. Щар щара, мьн дьхԝәст хьзмәта Бәйтʹәледа бьһельм». Гәло ԝи ньһерʹандьна хԝә чаԝа рʹаст кьр? Рʹуспийе щьвате ԝирʹа гот кӧ һинкьрьна кӧ мә кʹьфшкьрьнед хԝә йед бәреда жь Йаһоԝа стандьбу али мә дькә, кӧ әм кʹьфшкьрьна хԝә йа нуда һе керһати бьн. Бьрайе мә фәʹм кьр кӧ гәрәк әԝ бь зедәйи сәр ԝәхта чуйи нәфькьрә, ле дина хԝә бьдә тьштед кӧ әԝ ньһа дькарә бькә.

²² Бьрайәки бь наве Фелис Епископо жи рʹасти тәнгасийәкә ӧса һат. Сала 1956-да, бьрайе Фелис тʹәви жьна хԝә Мәкʹтәба Гиләд хьлаз кьр у ль Боливйайе бу бәрпьрсийаре мьһале. Сала 1964-да, кӧрʹәк ԝанрʹа бу. Фелис ӧса дьбежә: «Мә кʹьфшкьрьна хԝә пʹьрʹ һʹьз дькьр, ләма мә зор һат кӧ әм ве кʹьфшкьрьна хԝә бьһельн. Рʹаст бежьм, ԝәкә саләке, әз гәләк хәмгин бум. Ле бь аликʹарийа Йаһоԝа, мьн ньһерʹандьна хԝә гӧһәранд, у мьн ида дина хԝә да ве йәке, кӧ әз чаԝа дькарьм  бьбьм бавәки баш». Гәло тӧ жи щарна мина ван бьра хԝә тʹәхмин дьки? Гәло тӧ щарна хәмгин дьби жь бәр кӧ тә һьнә кʹьфшкьрьнед бәре ӧнда кьрьнә? Һәрге һʹале тә ӧса йә, ԝе баш бә кӧ тӧ ньһерʹандьна хԝә бьгӧһәрини у бьфькьри кӧ тӧ ньһа чаԝа дькари Йаһоԝарʹа у хушк у бьрарʹа һе баш хьзмәт бьки. Һәрге тӧ бәрдәԝам ки һʹӧнӧред хԝә жь бо аликʹарийа кәсед дьн бь кʹар бини, тӧйе дьлхԝәш бьби у щьвате жь алийе рʹӧһʹанива ава бьки.

23. Ԝе баш бә кӧ әм чь бькьн, у готара дьнда, әме чь бьбиньн?

²³ Йаһоԝа ԛимәте дьдә һәр йәк жь мә. Әԝ дьхԝазә кӧ әм бьбьн пʹара малбәта ԝи. Һәрге әм кʹур бьфькьрьн кӧ әм чаԝа дькарьн хушк у бьра жь алийе рʹӧһʹанива ава бькьн у паше хирәт бькьн кӧ әве йәке биньн сери, әме нәфькьрьн кӧ щьватеда щийе мә тʹӧнә. Ле гәло әм ль хушк у бьрайед дьн чаԝа дьнерʹьн? Әм чаԝа дькарьн нишан бькьн кӧ әм ԛимәте дьдьн ԝан? Готара дьнда, әме ве тʹемайа фәрз бьньһерʹьн.