1. Гәләк хьзмәткʹаред Хԝәде чь ԛӧрбана дькьн, у чьма?

БЬ МЬЛЙОНА хьзмәткʹаред Хԝәде ԛӧрбанед мәзьн кьрьнә. Мәсәлә, гәләк хушк у бьра азәп дьминьн, у гәләк хушк у бьрайед зәԝьщи сафи кьрийә кӧ зарʹока нәйньн дьнйайе. Һьнә малбәт пәй һәбуке накʹәвьн. Сәбәба ван сафикьрьна йәк ә: Әԝ дьхԝазьн чь жь дәсте ԝан те бькьн кӧ Йаһоԝарʹа хьзмәт бькьн. Әԝ жь һʹале хԝә рʹази нә у баԝәр ьн кӧ Йаһоԝа ԝе бона һʹәму һʹәԝщәдарийед ԝан хәм бькә. Әԝ чьма һаԛас баԝәр ьн? Дәмед бәреда, Йаһоԝа бона һʹәԝщәдарийед хьзмәткʹаред хԝә хәм дькьр. Мәсәлә, Йаһоԝа һәр тʹьм али Бьраһим дькьр, йе кӧ ԝәк «баве ԝан һʹәмуйед кӧ . . . баԝәрийе тиньн» те нав кьрьн (Рʹом. 4:11, ИМ).

2. (а) Ль гора Ибрани 11:8-10, 16, Бьраһим чьма бь рʹәзәдьли жь бажаре Уре дәркʹәт? (б) Ль ве готаре, әме сәр чь хәбәр дьн?

² Бьраһим бь дьлхԝази жийана рʹьһʹәт йа ль бажаре Уре һишт. Гәло чьма? Чьмки әԝ һивийа ‹бажаре кӧ бьнгәһа ԝи сахләм ә› дьма (Ибрани 11:8-10, 16 бьхунә). Әв чь «бажар» ә? Гава Бьраһим һивийе дьма кӧ әв бажар бе ава кьрьн, әԝ рʹасти кʹижан тәнгасийа дьһат? Әм ча дькарьн сәбра Бьраһим у һьнә хушк у бьрайед мә йед иройин, хԝәрʹа бькьн мәсәлә?

3. «Бажаре» кӧ Бьраһим һивийа ԝи бу, чь йә?

³ Бажаре кӧ Бьраһим һивийе бу, Пʹадшатийа Хԝәде йә. Әв Пʹадшати жь Иса Мәсиһ у 144 000 кәсед һьлбьжарти  пек те. Паԝлосе шанди әв Пʹадшати ԝәк «бажаре Хԝәдейе сах, Оршәлима әʹзмана» нав кьр (Ибрн. 12:22; Әʹйан. 5:8-10; 14:1). Иса Мәсиһ шагьртед хԝәрʹа гот кӧ бьра әԝ жь бо һатьна ве Пʹадшатийе дӧа бькьн, бона кӧ хԝәстьна Хԝәде ԝәк ль әʹзмен, ль рʹуйе әʹрде жи бе сери (Мәт. 6:10).

4. Ль гора Дәстпебун 17:1, 2, 6, Бьраһим дәрһәԛа Пʹадшатийа создайида чь заньбу?

⁴ Гәло Бьраһим заньбу кӧ Пʹадшатийа Хԝәде ԝе ча бе саз кьрьн? На. Гәләк сәдсала, әв әʹламәти ԝәк «сӧрʹ» дьма (Әфәс. 1:8-10; Колс. 1:26, 27). Ле бәле, Бьраһим заньбу кӧ һьнә кәсед жь зӧрʹәта ԝи ԝе бьбьн пʹадша. Йаһоԝа әв йәк ԝирʹа соз дабу (Дәстпебун 17:1, 2, 6 бьхунә). Бьраһим бь ви сози һаԛас баԝәр бу кӧ ԝи те бежи Мәсиһ дьдит, йе кӧ ԝе бьбә Пʹадшайе Пʹадшатийа Хԝәде. Ләма, Иса Щьһуйарʹа ӧса гот: «Баве ԝә Бьраһим бь һевийа кӧ ԝе рʹожа мьн бьвинә гәләк ша бу; ԝи әԝ дит у дьлгәш бу» (Йуһʹн. 8:56, ИМ). Бәле, Бьраһим заньбу кӧ һьнә кәсед жь зӧрʹәта ԝи ԝе бьбьн пʹара Пʹадшатийа Хԝәде, у әԝ һазьр бу ԝәки һивийе бә, һʹәта кӧ Йаһоԝа ве созе хԝә бинә сери.

5. Әм жь кʹӧ заньн кӧ Бьраһим һивийа Пʹадшатийа Хԝәде дьма?

⁵ Гәло Бьраһим ча әʹйан кьр кӧ әԝ һивийа «бажар» йан Пʹадшатийа Хԝәде дьма? Мәсәлә, Бьраһим нәбу бажарване тʹӧ пʹадшатийа ве дьнйайе. Әԝ кʹочбәр бу, конада дьжит у пьштгьрийа тʹӧ пʹадшаки нәкьр. Ӧса жи, ԝи хԝәрʹа пʹадшатик ава нәкьр, ле ԝи гӧһ дьда Йаһоԝа у һивийе дьма кӧ Йаһоԝа созе хԝә бинә сери. Бь ви аԝайи, Бьраһим баԝәрикә мәзьн әʹйан дькьр. Ньһа әме дина хԝә бьдьн һьнә тәнгасийед кӧ әԝ рʹасти ԝан дьһат у бьбиньн кӧ әм дькарьн жь сәрһатийа ԝи чь дәрса һьлдьн.

6. Ур бажарәки ча бу?

⁶ Бажаре Уре бажарәки рʹьһʹәт, дәԝләмәнд у парасти бу. Дәрдора Уре суред бьльнд һәбун, у се алийед ви бажари  канал һәбун. Хәлке Уре хԝәнди бун, у кәвьр-кӧчʹькед Уреда гәләк ньвисаред кәвьн һатьн дитьн, йед кӧ нишан дькьн кӧ Ур бажарәки аршвершийе бу. Ханийед мәрьва жь кәрпич бун, у диԝар сиԝахкьри у рʹәнгкьри бун. Һьнә ханийада 13-14 одә у һәԝшед кәвьркьри һәбун.

7. Чьма лазьм бу кӧ Бьраһим хԝә бьсперә Йаһоԝа?

⁷ Лазьм бу кӧ Бьраһим баԝәр бә кӧ Йаһоԝа ԝе ԝи у малбәта ԝи бьпарезә. Гәло чьма? Бьраһим у Сара ида нә маләкә рʹьһʹәт у парастида, ле нав чоледа конада дьжитьн. Бьраһим у малбәта ԝи ида бь суред мәзьн у каналед кʹур нәдьһатьн парастьн. Ви һʹалида, пʹьрʹ һеса бу кӧ дьжмьн һʹьщуми ԝан бькьра.

8. Щарәке, чь һат сәре Бьраһим?

⁸ Бьраһим гӧһ дьда Хԝәде, ле әԝ диса жи рʹасти һьнә тәнгасийа дьһат. Мәсәлә, щарәке, ль ԝәлате кӧ Йаһоԝа әԝ шандьбу, хәлайи дәстпебу. Хәлайи һаԛас мәзьн бу кӧ Бьраһим ԝәхтәкә кьн тʹәви малбәта хԝә ль Мьсре ма. Ль ԝе дәре, Фьрәԝьн Сара ани мала хԝә, ԝәки перʹа бьзәԝьщә. Һʹәта кӧ Йаһоԝа Фьрәԝьн щәза кьр у Фьрәԝьн Сара вәгәрʹанд бал мере ԝе, бинә бәр чʹәʹве хԝә кӧ Бьраһим бона жьна хԝә чьԛас дьтьрсийа! (Дәстп. 12:10-19)

9. Малбәта Бьраһимда чь проблем һәбун?

⁹ Малбәта Бьраһимда проблемед мәзьн һәбун. Жьна ԝи Сара безарʹок бу. Гәләк сала, әԝ сәва ве йәке пʹьрʹ хәмгин дьбун. Ләма, Сарайе хьзмәткʹара хԝә Һащәр да Бьраһим, ԝәки әԝ жь бо Бьраһим у Сарайе зарʹока бинә. Ле чахе Һащәр һʹәмлә ма, ԝе Сара ньмьз дькьр. Проблем һаԛас мәзьн бу кӧ Сарайе бәри Һащәре да (Дәстп. 16:1-6).

10. Баԝәрийа Бьраһим ча һат щерʹьбандьн?

¹⁰ Ԝәхт дәрбаз бу, Сара һʹәмлә ма у кӧрʹе хԝә Исһаԛ ани дьнйайе. Бьраһим һәр дӧ кӧрʹед хԝә – һьм Исһаԛ һьм жи Исмайил – һʹьз дькьр. Ле бәле, жь бәр кӧ Исмайил ԛәрфед хԝә бь Исһаԛ дькьрьн, Бьраһим мәщбур бу кӧ Исмайил у Һащәре жь мале бьшинә (Дәстп. 21:9-14). Паше, Йаһоԝа жь Бьраһим хԝәст кӧ әԝ Исһаԛ ԛӧрбан бькә (Дәстп. 22:1, 2; Ибрн. 11:17-19). Һәр дӧ щара жи, лазьм бу кӧ Бьраһим баԝәр бә кӧ Йаһоԝа ԝе созед хԝә йед дәрһәԛа Исмайил у Исһаԛда бинә сери.

11. Чьма лазьм бу кӧ Бьраһим бь сәбьр һивийа Йаһоԝа бьминә?

¹¹ Һәр тʹьм лазьм бу кӧ Бьраһим бь сәбьр һивийа Йаһоԝа бьминә. Гава әԝ тʹәви малбәта хԝә жь бажаре Уре дәркʹәт, әʹмре ԝи дьбәкә жь 70 сали зедәтьр бу (Дәстп. 11:31–12:4). Ль ԝәлате Кәнане, Бьраһим ԝәкә 100 сал конада дьжит. Бьраһим 175 сал әʹмьр кьр, ле ԝи пекһатьна созе Йаһоԝа кӧ әԝе ԝәлате Кәнане бьдә зӧрʹәта ԝи, нәдит (Дәстп. 25:7). Ӧса жи, әԝи сазкьрьна бажер, демәк сазкьрьна Пʹадшатийа Хԝәде жи нәдит. Бәле, Бьраһим чьԛас жи рʹасти гәләк тәнгасийа дьһат, әԝи баԝәрийа хԝә хԝәй дькьр у әԝ бь дьлхԝәши һивийа Йаһоԝа дьма. Гәло чь али Бьраһим дькьр кӧ әԝ сәбьр бькә? Йаһоԝа әԝ һәр тʹьм дьпараст у ԝәк досте хԝә дьдит (Дәстп. 15:1; Иша. 41:8; Аԛуб 2:22, 23).

12. Әм һивийа чь нә, у әме ньһа чь бьньһерʹьн?

¹² Ԝәк Бьраһим, әм жи һивийа Пʹадшатийа Хԝәде нә. Һьлбәт нә лазьм ә кӧ әм һивийа сазкьрьна Пʹадшатийа Хԝәде бьминьн, чьмки сала 1914-да, Пʹадшати  ида һат саз кьрьн у ль әʹзмана һʹӧкӧм дькә (Әʹйан. 12:7-10). Ле бәле, әм һивийе нә кӧ Пʹадшатийа Хԝәде ль сәр әʹрде жи һʹӧкӧм бькә. Һʹәта ԝе рʹоже, әме жи ԝәк Бьраһим рʹасти гәләк тәнгасийа бен. Гәло һьнә хьзмәткʹаред Йаһоԝа ча Бьраһим хԝәрʹа кьрьнә мәсәлә? Журнала «Бьрща Ԛәрәԝьлийе» дәрһәԛа гәләк сәрһатийед хушк у бьра гьли дькә, йед кӧ ԝәк Бьраһим сәбьр у баԝәрийа хԝә әʹйан кьрийә. Ньһа әме дина хԝә бьдьн һьнә тьштед фәрз йед ван сәрһатийа.

13. Тӧ жь сәрһатийа бьрайе Билл Ԝалдед чь дәрса дьстини?

¹³ Фәдакʹар бә, демәк һазьр бә бона шьхӧле Хԝәде ԛӧрбана бьки. Һәрге әм дьхԝазьн Пʹадшатийа Хԝәде жийана хԝәда дайньн щийе пешьн у дьле Йаһоԝа ша бькьн, гәрәке әм ԝәк Бьраһим фәдакʹар бьн (Мәт. 6:33; Марԛ. 10:28-30). Сәрһатийа бьраки бь наве Билл Ԝалдед бинә бәр чʹәʹве хԝә. Сала 1942-да, гава Билл незики хьлазкьрьна һинбуна занингәһе бу, әԝи һинбуна Кʹьтеба Пироз дәстпекьр. Йәк жь професоред Билл ԝирʹа гот кӧ пьшти хьлазбуна һинбуне, жь бо ԝи хәбатәк һазьр ә. Ле бәле, Билл тʹәглифа ԝи ԛәбул нәкьр у гот кӧ нета ԝи әв ә кӧ Хԝәдерʹа хьзмәт бькә. Чәндәк шунда, дәԝләте жь бо хьзмәта әскәрийе гази Билл кьр. Билл әв хьзмәт инкʹар кьр, ләма ԝи һьм 10 000 долар щәзайе пʹәра, һьм жи 5 сал щәзайе кәле станд. Ле 3 сал шунда Билл жь кәле дәркʹәт. Паше, ԝи Мәкʹтәба Гиләд хьлаз кьр у ль Африкайе бу мисийонер. Чәнд сал шунда, Билл бь хушкәкә бь наве Еварʹа зәԝьщи, у ԝан һәрду жи Африкайеда бь фәдакʹари хьзмәт дькьр. Ԝәхт шунда, әԝ вәгәрʹийан Америкайе кӧ пәй дийа Билл бьньһерʹьн. Билл дәрһәԛа жийана хԝә ӧса дьбежә: «Жь бо мьн ԛәдрәки пʹьрʹ мәзьн ә кӧ мьн 70 сали зедәтьр дь хьзмәта Йаһоԝада дәрбаз кьр. Әз гәләк щара Йаһоԝа шькьр дькьм кӧ бь сайа  рʹебәрийа ԝи, хьзмәта ԝи бу нета жийана мьн». Гәло тӧ жи дькари хьзмәта һәр тʹьм бьки нета жийана хԝә?

14-15. Сәрһатийа Аристотәлис у Әләни чь мә һин дькә?

¹⁴ Нәфькьрә кӧ жийана тә ԝе бедәрд бә. Жийана Бьраһим мә һин дькә кӧ кәсед кӧ тʹәмамийа әʹмре хԝә хьзмәта Йаһоԝада дәрбаз дькьн жи, рʹасти проблема тен (Аԛуб 1:2; 1 Пәт. 5:9). Мәсәлә, сәрһатийа бьрайе мә Аристотәлис Апостолидис бинә бәр чʹәʹве хԝә. Бьрайе Аристотәлис сала 1946-да Йунаньстане һатьбу ньхӧмандьне у сала 1952-да хушкәкә бь наве Әләни хԝәрʹа нишан кьр. Ԝана дьхԝәст бь һәврʹа жийана хԝә хьзмәта Йаһоԝада дәрбаз бькьра. Ле бәле, Әләни нәхԝәш кʹәт, у мәжийе ԝеда кансәр һат дитьн. Кансәр бь операсийа дәрхьстьн, ле чәнд сал шунда чахе әԝ зәԝьщин, кансәр жь нува чебу. Әләнирʹа диса операсийа кьрьн, ле әԝ нивида кʹьшйа, у иди нькарьбу рʹьнд хәбәр дә. Ле Әләнийе диса жи бәр нәхԝәшийа хԝә у зӧлма дәԝләте, хирәта хԝә ӧнда нәкьр.

¹⁵ Аристотәлис 30 сал пәй жьна хԝә дьньһерʹи. Ван салада, әԝи ԝәк рʹуспи хьзмәт дькьр, дь комитейа одед щьватед мәзьнда кʹар дькьр у ише авакьрьна одед щьватед мәзьнда, аликʹари дьда. Паше, сала 1987-да, гава Әләни мьзгини бәла дькьр, әԝ кʹәтә ԛәзийе у бьриндар бу. Әԝ се сал комайеда ма у паше мьр. Аристотәлис ӧса дьбежә: «Бь сала, әз рʹасти гәләк зәʹмәт у проблемед гьран дьһатьм. Һьнәк жь ԝан ньшкева дәрдькʹәтьн. Ләма, лазьм бу кӧ әз пʹьрʹ сәр хԝә бьхәбьтьм кӧ мерхасийа хԝә ӧнда нәкьм. Диса жи, Йаһоԝа һәр тʹьм али мьн кьрийә кӧ әз бькарьбьм һьмбәри проблема сәбьр бькьм» (Зәб. 94:18, 19). Бәле, Йаһоԝа кәсед кӧ нава тәнгасийада бь амьни ԝирʹа хьзмәт дькьн, пʹьрʹ һʹьз дькә!

16. Бьрайе Нор чь ширәт дабу жьна хԝә?

¹⁶ Дина хԝә бьдә һевийа хԝә. Бьраһим дина хԝә дьда хәлатед кӧ Йаһоԝа ԝе бьдә ԝи, у ве йәке али ԝи дькьр кӧ  әԝ һьмбәри проблема сәбьр бькә. Хушка мә Одри Һайди жи ве йәкеда бу мәсәләкә баш. Мере ԝе йе пешьн Нейтан Нор, жь бо кансәре мьр, у мере ԝе йе дӧда Глед Һайди, бь Алзһәимәр нәхԝәш кʹәт. Хушка мә дьбежә кӧ тьштәки кӧ бьрайе Нор чәнд һʹәфтә бәри мьрьна хԝә жерʹа готьбу, пʹьрʹ али ԝе дькьр: «Нейтан ани бира мьн: ‹Паши мьрьне, тʹӧ тьшт ида нькарә һевийа мә жь дәсте мә бьгьрә, у әме ида тʹӧ щар еше нәкʹьшиньн›. Паше, әԝи гот: ‹Дина хԝә бьдә хәлата хԝә. Бәтал нәминә – жь бо кәсед дьн ԛәнщийе бькә! Әв йәк ԝе али тә бькә кӧ тӧ дьлша бьби›». Чь ширәтәкә баш ә кӧ кәсед дьнрʹа ԛәнщийе бькьн у «дь һевийеда ша бьн»! (Рʹом. 12:12)

17. (а) Ԝе чьма баш бә кӧ әм дина хԝә бьдьн һевийа хԝә? (б) Ль гора Миха 7:7, гәрәке әм чь ньһерʹандьне хԝәй бькьн?

¹⁷ Иро гәләк сәбәб һәнә кӧ әм дина хԝә бьдьн һевийа хԝә. Һʹале дьнйайе зәлал нишан дькә кӧ әм ида гьһиштьнә рʹожед ахьрийе йед ве дьнйайе. Дәмәкә незикда, ‹бажаре кӧ бьнгәһа ԝи сахләм ә› ԝе ль сәр тʹәмамийа әʹрде һʹӧкӧм бькә. Йәк жь кʹәрәмед кӧ әме бьстиньн әв ә, кӧ һʹьзкьрийед мә ԝе жь мьрьне рʹабьн. Ԝе дәме, Йаһоԝа ԝе Бьраһим у малбәта ԝи жи жь мьрьне рʹакә. Гәло тӧйе жи ԝан кʹәрәма бьвини? Һәгәр тӧ һазьр и кӧ ԝәк Бьраһим жь бо Пʹадшатийа Хԝәде ԛӧрбана бьки, амьнийа хԝә нава проблемада хԝәй бьки у бь сәбьр һивийа Йаһоԝа бьмини, тӧйе ԝан кʹәрәма бьбини! (Миха 7:7 бьхунә).