1. Һьнә хьзмәткʹаред Йаһоԝа дьԛәԝьмә бона чь бәр хԝә дькʹәвьн?

 БӘРДЬЛИКӘ чьԛас мәзьн ә, ԝәки Йаһоԝа щьмәʹта хԝә ча кʹом ԛәбул дькә! Кʹьтеба Пироз дьбежә, кӧ Хԝәде жь щьмәʹта хԝә «рʹази йә» (Зәбур 149:4, ИМ). Ле һьнә кәс жь хԝә дьпьрсьн: «Гәло Йаһоԝа жь мьн жи рʹази йә? Бәре жи, һьнә хьзмәткʹаред Йаһоԝа дӧдьли дьбун кӧ Йаһоԝа жь ԝан рʹази йә, йан на (1 Самуйел 1:6-10; Ибо 29:2, 4; Зәбур 51:11).

2. Йаһоԝа кʹе ԛәбул дькә?

² Кʹьтеба Пироз әшкәрә нишан дькә, ԝәки мәрьвед ԛьсурдар дькарьн ԛәбулкьрьна Йаһоԝа бьстиньн. Гәло чь щурʹәйи? Әм гәрәке баԝәрийа хԝә Иса биньн у бенә ньхӧмандьне (Йуһʹәнна 3:16). Бь ви щурʹәйи, әм бәр мәрьва дьдьнә кʹьфше, кӧ мә гӧнед хԝә тʹобә кьрийә у соз дайә Хԝәде, кӧ әме хԝәстьна ԝи биньн сери (Кʹаред Шандийа 2:38; 3:19). Гава әм ӧса дькьн, Йаһоԝа гәләк ша дьбә. Һәрге әм хирәт бькьн кӧ хԝәйе созе хԝә бьн, Йаһоԝа ԝе жь мә рʹази бә у мә ча достед хԝә ԛәбул бькә (Зәбур 25:14).

3. Ве готареда әме чь шеԝьр кьн?

³ Гәло һьнә кәс чьрʹа щарна дьфькьрьн кӧ Хԝәде жь ԝан рʹази нинә? Гәло Йаһоԝа ча нишан дькә, кӧ әԝ мә ԛәбул дькә? У Мәсиһи чаԝа дькарә баԝәр бә, кӧ Хԝәде ԝи ԛәбул дькә?

 ҺЬНӘ КӘС ЧЬРʹА ДЬФЬКЬРЬН КӦ ЙАҺОԜА ЖЬ ԜАН РʹАЗИ НИНӘ?

4-5. Һәрге әм хԝә беԛимәт һʹәсаб дькьн жи, әм дькарьн чьда дӧдьли нәбьн?

⁴ Һьнә мәрьв жь бьчʹуктайе хԝә бекер һʹәсаб дькьн (Зәбур 88:15). Бьраки бь наве Адриан дьбежә: «Мьн хԝә һәртʹьм беԛимәт һʹәсаб дькьр. Гава әз бьчʹук бум, мьн дӧа дькьр, кӧ малбәта мьн щьнәтеда бьжи, ле әз баԝәр бум кӧ әз нә һежа бум ԝедәре бьжим». Бьраки бь наве Тони, де-баве кʹижани кӧ нә Шәʹдед Йаһоԝа нә, дьбежә: «Де-баве мьн мьнрʹа тʹӧ щара нәдьготьн, кӧ әԝана мьн һʹәз дькьн йан жи мьнрʹа фьрнаԛ дьбьн. Мьн чь жи дькьр, әԝана тʹӧ щар рʹази нибун».

⁵ Һәрге әм жи щарна хԝә беԛимәт һʹәсаб дькьн, ԝәрә әм биньн бира хԝә, кӧ Йаһоԝа әм чаԝа кʹьшандьнә бәрбь хԝә (Йуһʹәнна 6:44). Йаһоԝа занә кӧ дьле мәда чь һәйә, у әԝ һʹӧнӧред мәйә баш дьвинә, һәрге әм ван навиньн жи (1 Самуйел 16:7; 2 Дирок 6:30). Гава әԝ дьбежә кӧ әм ԛимәт ьн, әм дькарьн ве йәкеда дӧдьли нәбьн (1 Йуһʹәнна 3:19, 20).

6. Паԝлосе шанди сәр гӧнед хԝәйә бәре чаԝа дьньһерʹи?

⁶ Һьнә Мәсиһи хԝә бона тьштед бәре сущдар дькьн (1 Пәтрус 4:3). Ӧса жи, хьзмәткʹаред Хԝәдейи амьн һьмбәри кемасийед хԝә шәрʹ дькьн. Һәрге дьле тә, тә сущдар бькә, бир нәкә ԝәки хьзмәткʹаред Йаһоԝайи бәре жи хԝә ӧса тʹәхмин дькьрьн. Мәсәлә, Паԝлосе шанди жь бо кемасийед хԝә әʹщьз дьбу (Рʹомайи 7:24). Һәмьки Паԝлос гӧнед хԝә тʹобә кьрьбу у һатьбу ньхӧмандьне, ле диса жи әԝи гот кӧ әԝ «жь шандийа йе һәри паш» ә у һәри гӧнәкʹар ә (1 Корьнтʹи 15:9; 1 Тимотʹейо 1:15).

7. Әм гәрәке чь бир нәкьн?

⁷ Баве мәйи әʹзмана соз дайә кӧ һәрге әм тʹобә бькьн, әԝе бьбахшинә мә (Зәбур 86:5). Ләма жи һәрге әм бона гӧнед хԝәйә бәре жь дьл пʹошман бунә, әм дькарьн баԝәр бьн кӧ Хԝәде бахшандийә мә (Колоси 2:13).

8-9. Гава әм дьфькьрьн кӧ Йаһоԝа жь мә рʹази нинә, әм дькарьн чь бькьн?

⁸ Әм гьшк дьхԝазьн бь дьл у щан Йаһоԝарʹа хьзмәт кьн. Ле һьнә мәрьв дьфькьрьн ԝәки әԝана чь бькьн жи, әв йәк бәс нинә кӧ Йаһоԝа жь ԝан рʹази бә. Хушкәкә бь наве Аманда дьбежә: «Әз хирәт дькьм кӧ бь дьл у щан Йаһоԝарʹа хьзмәт кьм, ле әз чь бькьм жи, әз дьфькьрьм кӧ әв йәк бәс нинә. Ләма жи, әз щарна хирәт дькьм кӧ жь ԛәԝата хԝә зедәтьр бькьм. Ле чахе әз нагьһижьм нета хԝә, әз хәмгин дьбьм у дьфькьрьм ԝәки Йаһоԝа мьнда дӧдьли дьбә».

⁹ Һәрге әм дьфькьрьн кӧ хирәта мә бәс нинә, ԝәки Йаһоԝа жь мә рʹази бә, әм дькарьн чь бькьн? Бир нәкә ԝәки Йаһоԝа сәрт нинә у тʹӧ щара тьштед кӧ жь ԛәԝата мә дәр ә жь мә дәʹԝа накә. Гава әм бь дьл у щан ԝирʹа хьзмәт дькьн, әԝ рʹази йә. Ӧса жи, дина хԝә бьдә мәсәла хьзмәткʹаред Йаһоԝайә бәре. Мәсәлә, Паԝлосе шанди гәләк сал бь хирәт хьзмәт дькьр, гәләк рʹеԝити дькьр у гәләк щьват саз кьрьн. Ле гава дәрәща ԝи һатә гӧһастьне у әԝи ида нькарьбу мьзгинийе мина бәре бәла бькә, гәло Йаһоԝа ча сәр ԝи дьньһерʹи? Паԝлос чь жь дәсте ԝи дьһат дькьр, у Йаһоԝа ԝи кʹәрәм дькьр у жь ԝи рʹази бу (Кʹаред Шандийа 28:30, 31). Мина ве йәке, дәрәщед мә жи дькарьн бенә гӧһастьне, у әме ида нькарьбьн Йаһоԝарʹа ча бәре хьзмәт  бькьн. Ле бона Йаһоԝа, тьште фәрз әв ә кӧ әм бь чь нете ԝирʹа хьзмәт дькьн. Ньһа әме бьвиньн кӧ Йаһоԝа ча мәрʹа дьдә кʹьфше, кӧ әԝ жь мә рʹази йә.

ЙАҺОԜА ЧА НИШАН ДЬКӘ КӦ ӘԜ ЖЬ МӘ РʹАЗИ ЙӘ?

10. Йаһоԝа ча мәрʹа дьбежә кӧ әԝ жь мә рʹази йә? (Йуһʹәнна 16:27)

¹⁰ Бь сайа Кʹьтеба Пироз. Йаһоԝа мәщала дьгәрʹә кӧ нишани хьзмәткʹаред хԝә бькә, ԝәки әԝ ԝана һʹәз дькә у жь ԝан рʹази йә. Кʹьтеба Пирозда дӧ щара те готьне, кӧ Хԝәде дәрһәԛа Иса ӧса гот: «Әв ә Кӧрʹе мьни дәлал, йе кӧ дьле мьн ша дькә» (Мәтта 3:17; 17:5). Гәло тәйе нәхԝәста, кӧ Йаһоԝа тәрʹа жи бьгота ԝәки әԝ жь тә рʹази йә? Һәмьки Йаһоԝа рʹастә-рʹаст мәрʹа хәбәр надә, ле әԝ бь сайа Кʹьтеба Пироз мәрʹа хәбәр дьдә. Гава әм чар кʹьтебед Мьзгинийә пешьн дьхуньн, әм ча бежи дәнге Йаһоԝа дьбьһен. Шагьртед Иса мәрьвед ԛьсурдар бун, ле диса жи, әԝи ԝана һʹәз дькьр (Бьхунә Йуһʹәнна 16:27). Ньһерʹандьнед Иса у ньһерʹандьнед Баве ԝи мина һәв ьн. Ләма жи, гава әм гьлийед Иса дьхуньн, ԝәрә әм бьдьн бәр чʹәʹве хԝә кӧ Йаһоԝа тʹәви мә хәбәр дьдә (Йуһʹәнна 15:9, 15).

11. Гава әм рʹасти чәтьнайа тен, әв йәк чьрʹа найе һʹәсабе, кӧ Йаһоԝа ида жь мә рʹази нинә? (Аԛуб 1:12)

¹¹ Бь кьред хԝә. Йаһоԝа һазьр ә али мә бькә. Мәсәлә, әԝ бона һʹәԝщед мәйә материали хәм дькә. Щарна әм жи мина Ибо рʹасти чәтьнайа тен (Ибо 1:8-11). Ле әв йәк найе һʹәсабе кӧ Хԝәде ида жь мә рʹази нинә. Бь рʹасти, чәтьнайи мәщале дьдә мә кӧ әм избат бькьн ԝәки әм Хԝәде гәләки һʹәз дькьн у итʹбарийа хԝә ԝи тиньн (Бьхунә Аԛуб 1:12). Чахе әм рʹасти чәтьнайа тен, әм дьвиньн кӧ Хԝәде чьԛас бона мә хәм дькә у али мә дькә ԝәки әм сәбьр кьн.

12. Әм жь сәрһатийа Дмитри чь һин дьбьн?

¹² Ԝәрә әм дина хԝә бьдьнә сәрһатийа бьраки бь наве Дмитри, йе кӧ ль Асйайе дьжи. Әԝи хәбата хԝә ӧнда кьрьбу у гәләк мәһа нькарьбу хԝәрʹа хәбата тʹәзә бьвинә. Ләма жи, әԝи сафи кьр ԝәки дьһа зедә хьзмәтийеда кʹар бькә у бьдә кʹьфше, кӧ әԝ итʹбарийа хԝә Йаһоԝа тинә. Мәһ дәрбаз дьбун, ле диса жи, әԝи хԝәрʹа хәбат нәдьдит. Паше, әԝ нәхԝәш кʹәт у кʹәтә щи-ньвина. Шьк кʹәтьнә дьле  ԝи, һәла әԝ бавәки баш ә йан на, у дӧдьли дьбу кӧ Йаһоԝа жь ԝи рʹази йә. Рʹожәке, ԛиза ԝи әв гьлийед жь Ишайа 30:15 сәр кʹахазәке нәшьр кьр: «Дьле хԝәда рʹьһʹәтийе хԝәйи кьн у итʹбари бьдьнә кʹьфше, ДТʹ». Ԛиза ԝи әв кʹахаз дани кʹеләка ԝи у гот: «Баво, гава тӧ хԝә хьраб тʹәхмин ки, ве рʹезе бинә бира хԝә». Дмитри фәʹм кьр, кӧ Йаһоԝа малбәта ԝи тʹи-бьрʹчи у бе щи-сьтʹар наһелә. Әԝ дьбежә: «Лазьм бу кӧ әз рʹьһʹәтийе хԝәй кьм у хԝә бьсперьм Хԝәде». Гава тӧ рʹасти чәтьнайед ӧса тейи, тӧ жи дькари баԝәр би, ԝәки Йаһоԝа бона тә хәм дькә у ԝе али тә бькә, кӧ тӧ сәбьр ки.

13. Йаһоԝа дькарә бь сайа кʹе бьдә кʹьфше, кӧ әԝ жь мә рʹази йә у чаԝа?

¹³ Бь сайа хушк-бьра. Йаһоԝа бь сайа хушк-бьра нишани мә дькә, ԝәки әԝ жь мә рʹази йә. Мәсәлә, әԝ дькарә бь сайа ԝана мә ԛәԝи кә. Ԝәрә әм дина хԝә бьдьнә сәрһатийа хушкәкә мә, йа кӧ ль Асйайе дьжи. Әԝе һьм хәбата хԝә ӧнда кьр, һьм жи гьран нәхԝәш кʹәт. Паше мере ԝе, йе кӧ рʹуспи бу, гӧне гьран кьр у щабдарийа хԝә ӧнда кьр. Хушка мә дьбежә: «Мьн фәʹм нәдькьр, кӧ чьрʹа әв йәк һатә сәре мьн. Әз дьфькьрим, дьбәкә мьн шаши кьрийә у Йаһоԝа ида жь мьн рʹази нинә». Хушка мә жь Йаһоԝа рʹәща кьр, ԝәки Әԝ нишани ԝе кә, һәла Әԝ жь ԝе рʹази йә йан на. Гәло Йаһоԝа ча щаба ԝе да? Әԝ дьбежә: «Рʹуспийед щьвате мьнрʹа готьн, кӧ Йаһоԝа мьн һʹәз дькә». Паше, әԝе диса Йаһоԝарʹа дӧа кьр. Әԝ дьбежә: «Һәма ве рʹоже мьн нәʹмә жь һьнә хушк-бьра станд. Чахе мьн гьлийед ԝанә дьлгәрм хԝәнд, мьн фәʹм кьр кӧ Йаһоԝа дӧайед мьн бьһист». Бәле, Йаһоԝа гәләк щар бь сайа хушк-бьра у гьлийед ԝанә ширьн нишани мә дькә, кӧ әԝ жь мә рʹази йә (Зәбур 10:17).

14. Диса ча Йаһоԝа нишан дькә, кӧ әԝ жь мә рʹази йә?

 ¹⁴ Йаһоԝа мә һʹәз дькә, ләма жи әԝ щара бь сайа кәсед дьн ширәта дьдә мә. Мәсәлә, ԛьрʹна йәкеда, Паԝлос жь бина бәр Хԝәде щьватарʹа 14 нәʹмә шанд. Ван нәʹмада Паԝлос бь дьлгәрми дина хушк-бьра кʹьшандә сәр һьнә кемасийед ԝан. Гәло Йаһоԝа чьрʹа бь сайа Паԝлос ширәт да ԝан? Чьмки Йаһоԝа Бавәки дьлован ә, у әԝ зарʹед хԝә һʹәз дькә, ләма жи ԝана ширәт дькә (Мәтʹәлок 3:11, 12). Һәрге кәсәк сәр һʹиме Кʹьтеба Пироз ширәт бьдә мә, әв йәк найе һʹәсабе, кӧ Йаһоԝа мә һʹәз накә у жь мә рʹази нинә (Ибрани 12:6). Диса чь дьдә кʹьфше, ԝәки Йаһоԝа жь мә рʹази йә?

ИЗБАТИЙЕД ДЬН КӦ ЙАҺОԜА ЖЬ МӘ РʹАЗИ ЙӘ

15. Йаһоԝа рʹӧһʹе пироз дьдә кʹе у әм дькарьн чьда баԝәр бьн?

¹⁵ Йаһоԝа рʹӧһʹе пироз дьдә ван мәрьва, жь кʹижана әԝ рʹази йә (Мәтта 12:18). Һәла жь хԝә бьпьрсә: «Гәло әз аликʹарийа рʹӧһʹе пироз жийина хԝәда дьвиньм?» Мәсәлә, чахе тә Йаһоԝа нас нәдькьр, дьбәкә тӧ мәрьвәки бесәбьр буйи. Бь сайа рʹӧһʹе пироз, гәло тӧ ньһа һьндава кәсед дьн дьһа зедә сәбьр нади кʹьфше? Чьԛас тӧ бәре рʹӧһʹе пироз нав хԝәда пешда бини, һаԛас Йаһоԝа ԝе жь тә рʹази бә (Бьньһерʹә чаргошә « Бәре Рʹӧһʹ Чь йә?»).

16. Бона бәлакьрьна мьзгинийе Йаһоԝа кʹе дьдә хәбате, у әв йәк сәр тә ча һʹӧкӧм дькә? (1 Тʹесалоники 2:4)

¹⁶ Йаһоԝа шьхӧле бәлакьрьна мьзгинийе дьдә ԝан мәрьва, жь кʹижана әԝ рʹази йә (Бьхунә 1 Тʹесалоники 2:4). Мәсәлә, ԝәрә әм дина хԝә бьдьне, кӧ хушкәкә мә бь наве Щозелин, жь бәлакьрьна мьзгинийе ча кʹар дьстанд. Рʹожәке, Щозелин бекʹеф бу. Әԝ дьбежә: «Әз гәләк ԝәстийайи бум у мьн хԝә бекер һʹәсаб дькьр. Ле әз пешәнг бум, ләма жи лазьм бу кӧ әз һәрʹьм хьзмәтийе. Мьн дӧа кьр у әз чумә хьзмәтийе». Ԝе рʹоже, Щозелине тʹәви жьнькәкә бь наве Мари бу нас, йа кӧ хԝәст Кʹьтеба Пироз һин бә. Чәнд мәһ шунда, Мари готә Щозелине кӧ ԝе рʹоже, әԝе Хԝәдерʹа дӧа кьрьбу ԝәки али ԝе бькә. Щозелине дәрһәԛа ве дәрәще ӧса гот: «Йаһоԝа ча бежи рʹастә-рʹаст мьнрʹа гот: ‹Әз жь тә рʹази мә›».  Һәмьки һәр кәс гӧһ надә мьзгинийе, ле гава әм чь жь дәсте мә те дькьн, кӧ мьзгинийе бәла кьн, әм дькарьн баԝәр бьн, кӧ Йаһоԝа жь мә рʹази йә.

17. Әм жь сәрһатийа Викийе чь һин дьбьн? (Зәбур 5:12)

¹⁷ Кәсед кӧ Йаһоԝа жь ԝан рʹази йә, жь кʹьрʹине кʹаре дьстиньн (1 Тимотʹейо 2:5, 6). Һәрге тә баԝәрийа хԝә ԛӧрбана Иса анийә у һати ньхӧмандьне, ле диса жи хԝә бекер һʹәсаб дьки, тӧ дькари чь бьки? Бир нәкә кӧ ньһерʹандьна Йаһоԝа жь ньһерʹандьна тә щӧдә дьбә. Әԝ ԝан мәрьвед кӧ баԝәрийа хԝә ԛӧрбане тиньн, ча кәсед рʹаст һʹәсаб дькә у соз дьдә кӧ ԝе ԝана кʹәрәм кә (Бьхунә Зәбур 5:12; Рʹомайи 3:26). Хушкәкә бь наве Вики жь фькьрандьна сәр ԛӧрбане кʹар сьтанд. Рʹожәке, гава әԝ дәрһәԛа ԛӧрбане кʹур дьфькьри, әԝе гот: «Йаһоԝа гәләк ԝәхт сәбьрәкә мәзьн һьндава мьнда дьда кʹьфше. . . . Ле диса жи, те бежи мьн ԝирʹа дьгот: ‹Наԛәԝьмә кӧ тӧ мәрьвәкә мина мьн һʹәз бьки. Ԛӧрбана Кӧрʹе тә тʹера бахьшандьна гӧнед мьн накә›». Ле чахе әԝ сәр ԛӧрбане кʹур фькьри, әԝе һеди-һеди фәʹм кьр, кӧ Йаһоԝа чьԛас ле һʹәз дькә. Чьԛас кӧ әм ԛимәта ԛӧрбане бьдьнә бәр чʹәʹве хԝә, һаԛас әме бьвиньн кӧ Йаһоԝа мә һʹәз дькә у жь мә рʹази йә.

18. Әм дькарьн чьда баԝәр бьн һәрге әм бәрдәԝам дькьн Баве хԝәйи әʹзмана һʹәз бькьн?

¹⁸ Һәрге әм ширәтед жь ве готаре бьдьнә хәбате, диса жи дьԛәԝьмә әм щарна дӧдьли бьн, кӧ Йаһоԝа жь мә рʹази йә. Һәрге ӧса бьԛәԝьмә, ԝәрә әм биньн бира хԝә кӧ Йаһоԝа жь «йед кӧ ԝи һʹьз дькьн» рʹази йә (Аԛуб 1:12). Ԝәрә әм бәрдәԝам кьн незики Йаһоԝа бьн у бьвиньн, кӧ әԝ ча нишан дькә ԝәки әԝ жь мә рʹази йә. Бәле, Йаһоԝа «жь мә һәр кәси нә дур ә» (Кʹаред Шандийа 17:27).