1-2. Пешийа кӧ мәрьв бе ньхӧмандьне, әԝ гәрәке чь бькә?

 НАВА ван пенщ салед пашьнда, милйонәк мәрьва зедәтьр ча Шәʹдед Йаһоԝа һатьнә ньхӧмандьне. Гәләк жь ԝана мина Тимотʹейо дәрһәԛа рʹастийе «жь зарʹотийа хԝәда» һин бунә (2 Тимотʹейо 3:14, 15). Һьнәка жи чахе ида мәзьн бунә Йаһоԝа нас кьрьнә. Мәсәлә, жьнькәкә кӧ тʹәви Шәʹдед Йаһоԝа Кʹьтеба Пироз һин дьбу, 97 салийа хԝәда һатә ньхӧмандьне!

² Һәрге тӧ Кʹьтеба Пироз һин дьби йан жи һәрге де-баве тә Шәʹдед Йаһоԝа нә, гәло тӧ дьхԝази бейи ньхӧмандьне? Әв нетәкә гәләк баш ә! Ле пешийа кӧ тӧ бейи ньхӧмандьне, тӧ гәрәке хԝә тʹәсмили Йаһоԝа ки. Ве готареда әме шеԝьр кьн, кӧ тʹәсмилбуйин чь те һʹәсабе. Ӧса жи әв готар ԝе али тә бькә, ԝәки тӧ нәтьрси әве гаве бавежи у бейи ньхӧмандьне.

ТʹӘСМИЛБУЙИН ЧЬ ТЕ ҺʹӘСАБЕ?

3. Мәсәла биньн, кӧ бәре кʹе Йаһоԝарʹа һатьбунә тʹәсмилкьрьне?

³ Кʹьтеба Пирозда те готьне, кӧ чахе кәсәки хԝә тʹәсмили Йаһоԝа дькьр, әԝ бона нетәкә мәхсус дьһатә кʹьфшкьрьне. Тʹәмамийа мьләте Исраеле Йаһоԝарʹа һатьбу тʹәсмилкьрьне. Ле һьнә мәрьв нав ԝанда, бь щурʹе мәхсус һатьбунә тʹәсмилкьрьне. Мәсәлә, «кʹофийа пироз» йа тʹәсмилбуйине, кʹижан кӧ сәр сәре Һарун бу, дьһатә һʹәсабе кӧ әԝ бона хьзмәтийа мәхсус ча кʹаһине мәзьн һатьбу кʹьфшкьрьне (Ԛануна Кʹаһинтийе 8:9). Ԝәʹде бәре Нәзир жи бь щурʹе мәхсус  дьһатьнә тʹәсмилкьрьне. Хәбәра Ибрани, йа кӧ ча «Нәзир» һатийә ԝәлгәрʹандьне, те һʹәсабе «Башԛәкьри» йан жи «Тʹәсмилкьри». Нәзир гәрәке ль гора ԝан ԛәдәхәкьрьнед мәхсус бьжитана, кʹижан кӧ Ԛануна Мусада бона ԝан һатьбу ньвисаре (Жьмар 6:2-8).

4. (а) Әԝед кӧ хԝә тʹәсмили Йаһоԝа дькьн, чаԝа бона нетәкә пироз башԛәкьри нә? (б) Кәсе кӧ дьхԝазә бьбә шагьрте Иса, гәрәке чь бькә? (Бьньһерʹә ӧса жи шькьл.)

⁴ Гава тӧ хԝә тʹәсмили Йаһоԝа дьки, тӧ сафи дьки кӧ бьби шагьрте Иса Мәсиһ у ԛьрара Хԝәде әʹмьре хԝәда дьди сәр щийе пешьн. Әв йәк чь те һʹәсабе? Иса гот: «Һәрге йәк жь ԝә бьхԝазә пәй мьн бе, әԝ ида гәрәке бона хԝә нәжи» (Мәтта 16:24). Тӧ ча хьзмәткʹаре Йаһоԝа, йе кӧ әʹмьре хԝә тʹәсмили ԝи кьрийә, гәрәке һʹәму тьштед кӧ мьԛабьли хԝәстьна ԝи нә, инкʹар ки (2 Корьнтʹи 5:14, 15). Тӧ гәрәке «кьред бьнйатʹа инсен», мәсәлә бенамуси, инкʹар ки (Галати 5:19-21; 1 Корьнтʹи 6:18). Гәло чәтьн ә ль гора ԝан ԛануна бьжийи? Һәрге тӧ Йаһоԝа һʹәз дьки у баԝәр би кӧ ԛанунед ԝи бона кʹара тә нә, ԝе тәрʹа чәтьн нибә ԝан ԛануна бини сери (Зәбур 119:97; Ишайа 48:17, 18). Бьраки бь наве Николас ӧса дьбежә: «Тӧ дькари ԛанунед Йаһоԝа һʹәсаб ки ча ԛәфәса кәле йан жи ча ԛәфәса шера, йед кӧ тә жь тʹәлька дьпарезьн».

5. (а) Тӧ ча дькари әʹмьре хԝә тʹәсмили Йаһоԝа ки? (б) Фьрԛийа ортʹа тʹәсмилбуйине у ньхӧмандьне чь йә? (Бьньһерʹә ӧса жи шькьл.)

⁵ Гәло тӧ ча дькари хԝә тʹәсмил Йаһоԝа бьки? Тӧ дӧада гәрәке соз бьди Ԝи, ԝәки тӧйе тʹәне ԝирʹа хьзмәт ки у ԛьрара ԝи бона тә ԝе сәр щийе пешьн бә. Бь ви щурʹәйи тӧ соз дьди Йаһоԝа,  ԝәки тӧйе ԝи «бь тʹәмамийа дьле хԝә, бь тʹәмамийа щанийа хԝә, бь тʹәмамийа һʹьше хԝә у бь тʹәмамийа ԛәԝата хԝә» һʹәз бьки (Маркос 12:30). Чахе тӧ хԝә тʹәсмили Йаһоԝа дьки, әв йәк тʹәне тӧ у Йаһоԝа заньн, ле гава тӧ тейи ньхӧмандьне, әв йәк мәрьвед дьн жи дьвиньн. Сонда тʹәсмилбуйине тьштәки гәләк пироз ә, у Йаһоԝа дьхԝазә тӧ ль гора ве сонда хԝә бьжийи (Ԝаиз 5:4, 5).

ЧЬРʹА ТӦ ГӘРӘКЕ ӘʹМЬРЕ ХԜӘ ТʹӘСМИЛИ ЙАҺОԜА КИ?

6. Чь гәрәке мәрьв һелан кә, ԝәки әʹмьре хԝә тʹәсмили Йаһоԝа кә?

⁶ Мәʹнийа сәрәкә кӧ чьрʹа тӧ әʹмьре хԝә тʹәсмили Йаһоԝа дьки әв ә, кӧ тӧ ԝи һʹәз дьки. Һʹәзкьрьна тә нә тʹәне сәр һʹиме һәстед тә йә, ле ӧса жи «занәбуна рʹӧһʹанива» гьредайи йә, демәк бь сайа тьштед кӧ тӧ дәрһәԛа Йаһоԝа һин буйи, һʹәзкьрьна тә һьндава ԝи ԛәԝи буйә (Колоси 1:9). Бь сайа лекʹолина Кʹьтеба Пироз тӧ баԝәр дьки, ԝәки (1) Хԝәдайе рʹаст Йаһоԝа йә, (2) Кʹьтеба Пироз жь бина бәр Ԝи йә у (3) Йаһоԝа тʹәшкиләта хԝә дьдә хәбате, ԝәки ԛьрара хԝә бинә сери.

7. Пешийа кӧ әм хԝә тʹәсмили Йаһоԝа кьн, әм гәрәке чь бькьн?

⁷ Кәсед кӧ әʹмьре хԝә дьдьнә дәсте Йаһоԝа, гәрәке һинкьрьнед сәрәкә жь Кʹьтеба Пироз бьзаньбьн у ль гора ԛанунед Йаһоԝа бьжин. Чь жь дәсте ԝан те әԝана дькьн, ԝәки кәсед дьнрʹа дәрһәԛа баԝәрийа хԝә гьли кьн (Мәтта 28:19, 20). Әԝана Йаһоԝа гәләк һәʹз дькьн у бь дьл у щан дьхԝазьн тʹәне Йаһоԝарʹа хьзмәт кьн. Тӧ жи гәрәке  ӧса бьки. Тӧ гәрәке әʹмьре хԝә тʹәсмили Йаһоԝа ки у бейи ньхӧмандьне нә кӧ бона хатьре кәсе кӧ Кʹьтеба Пироз тә һин кьрийә, нә бона хатьре де-баве хԝә, нә жи бона хатьре һәвалед хԝә, ле жь бо һʹәзкьрьна һьндава Йаһоԝа.

8. Шекьрдари чаԝа дькарә али тә бькә кӧ тӧ жийина хԝә бьди дәсте Йаһоԝа? (Зәбур 116:12-14)

⁸ Гава тӧ дәрһәԛа тьштед кӧ Йаһоԝа бона тә кьрьнә дьфькьри, хԝәстьна тә дьһа ԛәԝи дьбә кӧ әʹмьре хԝә тʹәсмили ԝи ки (Бьхунә Зәбур 116:12-14). Кʹьтеба Пирозда те готьне кӧ «һәр дайина ԛәнщ у һәр пʹешкʹеша кʹамьл» жь Йаһоԝа те (Аԛуб 1:17). Пʹешкʹеша лапә мәзьн у ԛимәт, ԛӧрбана Кӧрʹе ԝи Иса йә. Ԝәрә әм дәрһәԛа ве пʹешкʹеша мәзьн бьфькьрьн. Бь сайа ԛӧрбане, тӧ дькари бьби досте Йаһоԝа у һʹәта-һʹәтайе бьжийи (1 Йуһʹәнна 4:9, 10, 19). Щурʹе лапи баш кӧ рʹазибуна хԝә бона һʹәзкьрьн у кʹәрәмед Йаһоԝа бьди кʹьфше әв ә, ԝәки әʹмьре хԝә тʹәсмили ԝи ки (Ԛануна Дӧщари 16:17; 2 Корьнтʹи 5:15). Кʹьтеба Ша бә Жийинерʹа Һʹәта-Һʹәтайе!, дәрса 46, абзаса 4-да, видеойа бь наве Дийарийед Хԝә Пʹешкʹеши Хԝәде Бькьн, зәлал дькә кӧ әм ча дькарьн рʹазибуна хԝә Хԝәдерʹа бьдьнә кʹьфше.

ГӘЛО ТӦ БОНА ТʹӘСМИЛБУЙИНЕ У НЬХӦМАНДЬНЕ ҺАЗЬР И?

9. Чьрʹа мәрьв гәрәке бь рʹәзәдьли хԝә тʹәсмили Йаһоԝа кә?

⁹ Дьбәкә тӧ дьфькьри ԝәки тӧ һазьр нини әʹмьре хԝә тʹәсмили Йаһоԝа ки у бейи ньхӧмандьне. Дьԛәԝьмә пешийе лазьм ә, ԝәки тӧ әʹмьре хԝә ль гора принсипед Йаһоԝа бьгӧһези, йан жи баԝәрийа хԝә дьһа ԛәԝи ки (Колоси 2:6, 7). Нә һʹәму хԝәндәван ԝәк һәв рʹӧһʹанида пешда дьчьн у щаһьл жи щурʹә-щурʹә салийед хԝәда хԝә тʹәсмили Йаһоԝа дькьн у тенә ньхӧмандьне. Дәԝса кӧ тӧ хԝә бәрамбәри кәсед дьн бьки, бьфькьрә кӧ тӧ ча дькари рʹӧһʹанида пешда һәри у һьнә тьштада дьһа баш би (Галати 6:4, 5).

10. Һәрге тӧ һе һазьр нини әʹмьре хԝә тʹәсмили Йаһоԝа ки у бейи ньхӧмандьне, тӧ дькари чь бьки? (Ӧса жи бьньһерʹьн чаргошә « Кани бона Ԝан, Йед кӧ Нава Рʹастийеда Мәзьн Бунә».)

¹⁰ Һәрге тӧ һәла һе һазьр нини әʹмьре хԝә тʹәсмил Йаһоԝа ки, хԝәрʹа нет дайнә, ԝәки әве гаве бавежи. Жь Йаһоԝа лава кә, ԝәки али тә бькә һьнә гӧһастьнед лазьм бьки (Филипи 2:13; 3:16). Баԝәр бә, кӧ Йаһоԝа ԝе гӧһ бьдә дӧайе тә у али тә бькә (1 Йуһʹәнна 5:14).

ЧЬРʹА ҺЬНӘ МӘРЬВ ХԜӘ ПАШ ДЬХЬН?

11. Йаһоԝа чаԝа али мә дькә ԝәки әм жерʹа амьн бьминьн?

¹¹ Һьнә мәрьв, йед кӧ һазьр ьн хԝә тʹәсмили Йаһоԝа кьн у бенә ньхӧмандьне, диса жи хԝә паш дьхьн. Дьбәкә әԝана дьтьрсьн кӧ паши ньхӧмандьне, ԝе гӧнәки гьран бькьн у жь щьвате бенә дәрхьстьне. Һәрге әв тьрс дьле тәда жи һәйә, баԝәр бә кӧ Йаһоԝа ԝе али тә бькә ԝәки тӧ бькарьби ӧса бьжийи, ча Ԝи хԝәш те (Колоси 1:10). Ӧса жи әԝе ԛәԝате бьдә тә, ԝәки тӧ тьштед рʹаст бьки. Йаһоԝа ида али гәләк мәрьва кьрийә (1 Корьнтʹи 10:13). Ләма жи кәсед кӧ жь щьвате тенә дәрхьстьне, һьндьк ьн. Бәле, Йаһоԝа али хьзмәткʹаред хԝә дькә ԝәки әԝана амьн бьминьн.

12. Чь дькарә али мә бькә гӧнед гьран нәкьн?

¹² Һʹәму мәрьв ԛьсурдар ьн, ләма жи шашийа дькьн (Аԛуб 1:14). Ле диса жи,  гава тӧ тейи щерʹьбандьне, тӧ хԝәха сафи дьки шашийа бьки йан на. Тӧ хԝәха дьжбери кӧ чь щурʹәйи бьжийи. Һьнә мәрьв дьбежьн, кӧ әм нькарьн һәст у кьред хԝә контрол кьн, ле әв йәк нә рʹаст ә. Тӧ дькари хԝәстьнед хьраб контрол ки. Мәсәлә, һәрге хԝәстьнәкә хьраб бькʹәвә дьле тә, тӧ дькари сафи ки кӧ нәкʹәви бәр байе хԝәстьна хԝә. Сәва кӧ тӧ хԝә жь хьрабийе дур бьгьри, һәр рʹож дӧа бькә, Кʹьтеба Пироз лекʹолин кә, һәрʹә щьвата у кәсед дьнрʹа дәрһәԛа баԝәрийа хԝә гьли кә. Әв тьшт ԝе али тә бькьн Йаһоԝарʹа амьн бьмини. Тʹӧ щар бир нәкә кӧ Йаһоԝа ԝе али тә бькә (Галати 5:16).

13. Әм жь сәрһатийа Усьв чь һин дьбьн?

¹³ Сәва кӧ тӧ Йаһоԝарʹа амьн бьмини, тӧ гәрәке хԝә пешда бона щерʹьбандьна һазьр ки. Кʹьтеба Пирозда дәрһәԛа гәләк мәрьва те готьне, йед кӧ һʹәма ӧса жи кьрьбун. Мәсәлә, жьна Потифар чәнд щара дьхԝәст Усьв бьхальфинә, кӧ әԝ сәре хԝә перʹа дайнә. Ле Усьв пешда заньбу чь бькә. Кʹьтеба Пироз дьбежә, кӧ Усьв хԝәстьна ԝе инкʹар кьр у жерʹа гот: «Әзе чаԝа ве хьрабийа мәзьн бькьм у ль бәр Хԝәде гӧнә бькьм?» (Дәстпебун 39:8-10). Бәле, пешийа кӧ Усьв һатә щерʹьбандьне, әԝи заньбу чь бькә. Ԝәʹде щерʹьбандьне, әв йәк али ԝи кьр сафикьрьна рʹаст бькә.

14. Гава әм тенә щерʹьбандьне, әм чаԝа дькарьн амьн бьминьн?

¹⁴ Тӧ ча дькари чʹәʹв бьди Усьв? Тӧ дькари ньһада сафи ки, кӧ һәрге тӧ бейи щерʹьбандьне тӧйе чь бьки. Тьштед кӧ Йаһоԝа нәфрʹәт дькә дәрберʹа инкʹар кә у жь һʹьше хԝә дәрхә (Зәбур 97:10; 119:165). Ԝәʹде щерʹьбандьна әв йәк ве али тә бькә гӧнә нәки, чьмки тә ида пешда хԝә һазьр кьрьбу дәрәщед ӧсада чь бьки.

15. Әм ча дькарьн нишан кьн, кӧ әм Йаһоԝа дьгәрʹьн? (Ибрани 11:6)

¹⁵ Дьԛәԝьмә тӧ баԝәр дьки, кӧ тә рʹийа рʹаст дитийә у дьхԝази бь тʹәмамийа дьле хԝә Йаһоԝарʹа хьзмәт ки. Ле диса жи, тьштәк дьбә сәбәб кӧ тӧ әʹмьре хԝә тʹәсмили Йаһоԝа наки у найейи ньхӧмандьне. Дәрәща ӧсада дина хԝә бьдә мәсәла Даԝьд Пʹадша у жь Йаһоԝа рʹәща бькә: «Мьн әʹнәнә кә, Хӧдано,  дьле мьн заньбә, мьн бьщерʹьбинә у фькьред мьн бьзаньбә. Дина хԝә бьде, ха әз нә рʹийа хьрабда мә, рʹийа һʹәта-һʹәтайеда рʹебәрийа мьн бькә» (Зәбур 139:23, 24). Йаһоԝа кәсед «кӧ ль ԝи дьгәрʹьн» хәлат дькә. Әв йәк кӧ тӧ хирәт дьки, ԝәки хԝә тʹәсмили Йаһоԝа ки у бейи ньхӧмандьне, нишани Йаһоԝа дькә, кӧ тӧ ԝи дьгәрʹи (Бьхунә Ибрани 11:6).

БӘРДӘԜАМ КӘ НЕЗИКИ ЙАҺОԜА БӘ

16-17. Йаһоԝа кәсед кӧ рʹастийеда мәзьн бунә чаԝа дькʹьшинә бәрбь хԝә? (Йуһʹәнна 6:44)

¹⁶ Иса готьбу, кӧ Йаһоԝа мәрьвед дьлпʹак дькʹьшинә бәрбь хԝә (Бьхунә Йуһʹәнна 6:44). Дина хԝә бьде әв йәк бона тә чь те һʹәсабе. Гава Йаһоԝа кәсәки дькʹьшинә бәрбь хԝә, әв те һʹәсабе кӧ Әԝ дьле ԝида тьштәки баш дьвинә. Йаһоԝа ԝи мәрьви ча «мьлкʹе» хԝәйи мәхсус һʹәсаб дькә (Ԛануна Дӧщари 7:6). Бәле, тӧ жи бона Йаһоԝа мәхсус и.

¹⁷ Һәрге тӧ рʹастийеда мәзьн буйи, дьԛәԝьмә дьфькьри ԝәки тӧ Йаһоԝарʹа хьзмәт дьки, нә жь бо ве йәке кӧ Йаһоԝа тә кʹьшандийә бәрбь хԝә, ле чьмки де-баве тә Шәʹдед Йаһоԝа нә. Ле Кʹьтеба Пироз дьбежә: «Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:8; 1 Дирок 28:9). Һәрге тӧ гава пешьн бавежи, ԝәки незики Йаһоԝа би, әԝе жи незики тә бә. Йаһоԝа һәр кәси дькʹьшинә бәрбь хԝә, бәле кәсед кӧ рʹастийеда мәзьн бунә жи. Чаԝа кӧ Аԛуб 4:8-да те готьне, гава кәсәк дьхԝазә незики Йаһоԝа бә, Әԝ жи незики ԝи дьбә (Бәрамбәр кә 2 Тʹесалоники 2:13).

18. Готара дьнда әме чь шеԝьр кьн? (Зәбур 40:8)

¹⁸ Гава тӧ жийина хԝә тʹәсмили Йаһоԝа дьки у тейи ньхӧмандьне, тӧ чʹәʹв дьди Иса Мәсиһ. Әԝи бь шабуне хԝәстьна Йаһоԝа дьани сери (Бьхунә Зәбур 40:8; Ибрани 10:7). Готара дьнда, әме бьвиньн кӧ паши ньхӧмандьне чь ԝе али тә бькә бь амьни Йаһоԝарʹа хьзмәт ки.