1-2. Паши ньхӧмандьне мәрьв чь кʹәрәма дьстиньн?

 ГАВА әм тенә ньхӧмандьне у дьбьнә пʹара малбәта Йаһоԝа, әм гәләк ша дьбьн. Чаԝа Даԝьд Пʹадша готьбу: «Хԝәзи ль ԝи кӧ Тӧ [Йаһоԝа, ДТʹ] дьбьжери у незики Хԝә дьки, кӧ әԝ һʹәԝшед Тәда бьминә» (Зәбур 65:4).

² Сәва кӧ тӧ бьби досте Йаһоԝа, гәрәке тӧ жь дьл бьхԝази незики ԝи би (Аԛуб 4:8). Гава тӧ әʹмьре хԝә тʹәсмили Йаһоԝа дьки у тейи ньхӧмандьне, тӧ бь щурʹе мәхсус незики Йаһоԝа дьби. Баԝәр бә кӧ паши ньхӧмандьне, әԝе гәләк кʹәрәма сәр тәда бьбаринә (Малахи 3:10; Йерәмйа 17:7, 8).

3. Паши тʹәсмилбуйин у ньхӧмандьне мәрьв кʹижан щабдарийа һьлдьдә сәр хԝә? (Ԝаиз 5:4, 5)

³ Һәмьки ньхӧмандьн тʹәне дәстпека хьзмәтийе йә. Чахе тӧ әв гава фәрз давежи, тӧ гәрәке хирәт бьки ԝәки ԝәʹде тәнгаси у щерʹьбандьна жи сонда хԝә бини сери (Бьхунә Ԝаиз 5:4, 5). Ча шагьрте Иса, ԝе баш бә ԝәки тӧ һәр тьшти бьки, кӧ чʹәʹв бьди ԝи у гӧһ бьди тʹәмийед ԝи (Мәтта 28:19, 20; 1 Пәтрус 2:21). Әв готар ԝе али тә бькә, ԝәки тӧ ве йәке бьки.

ԜӘʹДЕ ЩЕРʹЬБАНДЬН У ТӘНГАСИЙА ЖИ БӘРДӘԜАМ КӘ ПӘЙ ИСА ҺӘРʹӘ

4. Чь те һʹәсабе кӧ шагьртед Иса гәрәке «стуна хԝәйә щәфе һьлгьрә»? (Луԛа 9:23)

⁴ Нәфькьрә кӧ паши ньхӧмандьне, әʹмьре тә ԝе бе хәм у проблема бә. Иса готьбу, ԝәки шагьртед  ԝи гәрәке «стуна хԝәйә щәфе» һьлгьрьн, демәк, әԝана гәрәке «һәр рʹож» ве йәке бькьн (Бьхунә Луԛа 9:23). Ле гәло әв йәк те һʹәсабе кӧ шагьртед Иса ԝе тʹьме тәнгасийа бькʹьшиньн? Һәмьки на. Иса тʹәне дьхԝәст бьгота ԝәки хенщи кʹәрәма, шагьртед ԝи ԝе рʹасти чәтьнайа жи бен, у һьнә жь ван чәтьнайа дькарьн гьран бьн жи (2 Тимотʹейо 3:12).

5. Иса соз дабу ԝәки кәсед кӧ һазьр ьн ԛӧрбана бькьн, ԝе чь кʹәрәма бьстиньн?

⁵ Дьԛәԝьмә тӧ жь алийе малбәта хԝә рʹасти пәйкʹәтьна һати, йан жи тә хәбата баш инкʹар кьрийә, сәва кӧ шьхӧле Пʹадшатийа Хԝәде әʹмьре хԝәда дайни сәр щийе пешьн (Мәтта 6:33). Баԝәр бә, кӧ Йаһоԝа амьнийа тә дьвинә (Ибрани 6:10). Дьбәкә тә жи ван гьлийед Иса сәр хԝә тʹәхмин кьрийә: «Әз рʹаст ԝәрʹа дьбежьм, һәр кәсе кӧ бона хатьре наве мьн у мьзгинийе, мал, йан хушк, йан бьра, йан де, йан бав, йан зарʹ, йан әʹрде хԝә һиштийә, әԝе ньһа 100 щари зедәтьр мал, хушк, бьра, де, зарʹ, әʹрд тʹәви зерандьна бьстинә у дьнйа тʹәзәда жийина һʹәта-һʹәтайе» (Маркос 10:29, 30). Рʹасти жи кʹәрәмед кӧ тә стандьнә, жь ԛӧрбанкьрьнед кӧ тә кьрьнә, мәзьнтьр ьн (Зәбур 37:4).

6. Паши ньхӧмандьне, чьрʹа диса жи лазьм ә ԝәки тӧ һьмбәри хԝәстьнед бәдәне шәрʹ бьки?

⁶ Паши ньхӧмандьне, диса жи лазьм ә ԝәки тӧ һьмбәри хԝәстьнед бәдәне шәрʹ бьки (1 Йуһʹәнна 2:16). Чьмки тӧ һәла һе мәрьвәки ԛьсурдар и, у дьбәкә тӧ щара хԝә мина Паԝлосе шанди тʹәхмин дьки, йе кӧ готьбу: «Әз бь кʹурайийа дьле хԝә ԛануна Хԝәде бәгәм дькьм, ле ԛанунәкә дьн нава хԝәда дьбиньм кӧ мьԛабьли ԝе ԛануна һʹьше мьн бәгәм кьрийә дькә шәрʹ у мьн дькә һесире ԛануна гӧна, йа кӧ нава мьнда йә» (Рʹомайи 7:22, 23). Дьбәкә тӧ жь бо кемасийед хԝә дьлтәнг дьби. Чахе тӧ тейи щерʹьбандьне, бинә бира хԝә, кӧ чахе тә хԝә тʹәсмили Хԝәде кьр, тә чь соз да ԝи. Әв соз ԝе али тә бькә, ԝәки тӧ амьн бьмини. Гәло ча?

7. Әв йәк кӧ тә әʹмьре хԝә тʹәсмили Йаһоԝа кьрийә, ча дькарә али тә бькә жерʹа амьн бьмини?

⁷ Гава тӧ әʹмьре хԝә тʹәсмили Йаһоԝа дьки, әв те һʹәсабе, ԝәки тӧ хԝәстьн у нетед хԝә инкʹар дьки (Мәтта 16:24). Ләма жи гава тӧ тейи щерʹьбандьне, нәлазьм ә ԝәки тӧ гәләк бьфькьри һәла тӧйе чь бьки. Тә пешда сафи кьрийә, Йаһоԝарʹа амьн бьмини у һәр тьшти бьки, ԝәки дьле Ԝи ша ки. Бь ве йәке тӧ чʹәʹв дьди Ибо, йе кӧ ӧса готьбу: «Һʹәта мьрьне беԛьсуртийа хԝә наһельм!» (Ибо 27:5, ДТʹ).

8. Гава тӧ тейи щерʹьбандьне, чьрʹа лазьм ә ԝәки тӧ бини бира хԝә, кӧ тә чь соз дайә Йаһоԝа?

⁸ Сәва кӧ тӧ бькарьби щерʹьбандьнада амьн бьмини, бинә бира хԝә кӧ тә чаԝа дӧайед хԝәда соз дабу Йаһоԝа, ԝәки тӧ ида пʹара ԝи йи. Мәсәлә, гәло тәйе изьн бьда, ԝәки дьле тә бькʹәта кәсәки зәԝьщи? Һәмьки на, чьмки тә сафи кьрьбу кӧ тӧйе тьштәки ӧса нәки. Һәрге тӧ изьн нәди кӧ хԝәстьнед хьраб бькʹәвьнә дьле тә, ԝе нәлазьм бә ԝәки тӧ хԝәстьнед ӧса жь дьле хԝә дәрхи. Тӧйе гӧһ бьди ве ширәте: «Рʹийа хьрабада нәгәрʹә» (Мәтʹәлок 4:14, 15).

9. Чь ԝе али тә бькә ԝәки жь һәр тьшти зедәтьр дина хԝә бьди хԝәстьна Йаһоԝа?

⁹ Гәло тәйе хәбатәкә ӧса ԛәбул кьра,  жь бо кʹижане жи тәйе нькарьбуйа тʹьме һәри сәр щьвина? Һәмьки на, чьмки тә сафи кьрьбу кӧ тӧйе хәбатәкә ӧса ԛәбул нәки. Ләма жи ԝе нәлазьм бә, ԝәки тӧ паши ԛәбулкьрьна хәбатәкә ӧса бьфькьри, һәла тӧйе ча һәри щьвина. Бинә бира хԝә кӧ Иса дьхԝәст һәр тьштида дьле Баве хԝә ша кә. Мина ԝи, һәр тьштед кӧ дькарә дьле Хԝәде бешинә, инкʹар кә (Мәтта 4:10; Йуһʹәнна 8:29).

10. Йаһоԝа ԝе ча али тә бькә, ԝәки тӧ паши ньхӧмандьне бәрдәԝам ки пәй Иса һәрʹи?

¹⁰ Чахе тӧ рʹасти тәнгаси у щерʹьбандьна тейи, тӧ дькари нишан ки, ԝәки тӧ жь дьл дьхԝази бәрдәԝам ки пәй Иса һәрʹи. Һәрге тӧ ӧса бьки, баԝәр бә кӧ Йаһоԝа ԝе али тә бькә. Кʹьтеба Пироз дьбежә: «Хԝәде амьн ә, әԝ наһелә кӧ һун жь ԛәԝата хԝә дәр бенә щерʹьбандьне. Әԝе щерʹьбандьнеда дәлиләке жи бькә, кӧ һун бькарьбьн тәйах кьн» (1 Корьнтʹи 10:13).

ӘМ ЧА ДЬКАРЬН БӘРДӘԜАМ КЬН ПӘЙ ИСА ҺӘРʹЬН?

11. Тӧ ча дькари бәрдәԝам ки пәй Иса һәри? (Бьньһерʹә ӧса жи шькьл.)

¹¹ Иса бь дьл у щан Йаһоԝарʹа хьзмәт дькьр у бь сайа дӧакьрьне тʹьме незики Йаһоԝа дьма (Луԛа 6:12). Сәва кӧ тӧ паши ньхӧмандьне бәрдәԝам ки пәй Иса һәрʹи, тӧ гәрәке тʹьме ве йәке бьки, чь кӧ ԝе али тә бькә дьһа незики Йаһоԝа би. Кʹьтеба Пироз дьбежә кӧ «әм гьһиштьнә чь дәрәще, анәгори ԝе йәке бьжин» (Филипи 3:16). Щара тӧйе дәрһәԛа сәрһатийед ԝан хушк-бьра бьбьһейи, йед кӧ сафикьрьнә һе зедә Йаһоԝарʹа хьзмәт кьн. Һьнә жь ԝан дьбәкә чунә Мәкʹтәба  бона Мьзгинванед Пʹадшатийе, йан жи дәрбази щики ӧса бунә, кʹидәре кӧ мьзгинван һьндьк ьн. Ле тӧ дькари хԝәрʹа нетәкә ӧса дәйни? Гәләк хьзмәткʹаред Йаһоԝа һазьр ьн һе зедә хьзмәт кьн (Кʹаред Шандийа 16:9). Ле һәрге ньһа дәрәща тә дәст надә ве йәке бьки, нәфькьрә ԝәки тӧ жь ԝана кемтьр и. Лапә фәрз әв ә, ԝәки тӧ һʹәта хьлазийе амьн бьмини (Мәтта 10:22). Тӧ гәрәке ль гора дәрәща хԝә Йаһоԝарʹа хьзмәт ки у бь ви щурʹәйи бәрдәԝам ки пәй Иса һәрʹи (Зәбур 26:1).

12-13. Тӧ чь дькари бьки һәрге хирәта тә кем буйә? (1 Корьнтʹи 9:16, 17) (Ӧса жи бьньһерʹьн чаргошә « Сьһʹәт-Ԛәԝата Хԝә Бьбә Хԝәйи».)

¹² Ле һәрге тӧ дьфькьри ԝәки дӧайед тә ида жь дьл ниньн, йан жи һәрге тӧ ида мина бәре жь хьзмәтийе йан жь хԝәндьна Кʹьтеба Пироз шабуне настини, ԝи чахи тӧ чь дькари бьки? Һәрге тӧ паши ньхӧмандьне бькʹәви һʹаләки ӧса, нәфькьрә кӧ Йаһоԝа бь сайа рʹӧһʹе пироз ида али тә накә. Мина һәр кәси, тӧ жи мәрьвәки ԛьсурдар и, ләма жи һәстед ӧса щарна дькарьн щәм тә пешда бен. Һәрге хирәта тә сар буйә, мәсәла Паԝлосе шанди бьдә бәр чʹәʹве хԝә. Һәмьки әԝи һәр тьшт дькьр ԝәки чʹәʹв бьдә Иса, ле щарна хԝәстьна ԝи дьһатә гӧһастьне (Бьхунә 1 Корьнтʹи 9:16, 17). Йәкә Паԝлос бь хирәт хьзмәтийеда кʹар дькьр у фьрԛи тʹӧнә бу, ԝе дәме әԝи хԝә ча тʹәхмин дькьр.

¹³ Ләма жи, нә тʹәне сәр һʹиме һәстед хԝә сафикьрьна бькә. Тӧ чь жи тʹәхмин бьки, бьра сафикьрьнед тә рʹаст бьн. Ԝәхт шунда кьред тә ԝе ль сәр  һәстед тә һʹӧкӧм бькьн. Ләма жи, паши ньхӧмандьне бәрдәԝам кә лекʹолина шәхси дәрбаз кә, мьзгинийе бәла бькә, жь дьл дӧа бькә у һәрʹә щьвина. Әв йәк ԝе али тә бькә пәй Иса һәрʹи. Хенщи ве йәке, мәсәла тә ԝе һелане бьдә хушк-бьред дьн жи (1 Тʹесалоники 5:11).

ХԜӘ БЬЩЕРʹЬБИНӘ

14. Гәрәке тӧ хԝә жь кʹижан алийава бьщерʹьбини у чьрʹа? (2 Корьнтʹи 13:5)

¹⁴ Паши ньхӧмандьне, лазьм ә ԝәки тӧ бәрдәԝам ки хԝә бьщерʹьбини (Бьхунә 2 Корьнтʹи 13:5). Щар щара дина хԝә бьдә щурʹе жийина хԝә. Гәло тӧ һәр гав дӧа дьки, Кʹьтеба Пироз дьхуни у лекʹолин дьки, дьчи щьвина у мьзгинийе бәла дьки? Хирәт бькә кӧ тӧ жь ван тьшта шабун у кʹаре бьстини. Мәсәлә, жь хԝә бьпьрсә: «Гәло әз һинкьрьнед сәрәкә жь Кʹьтеба Пироз рʹьнд заньм у дькарьм ԝана мәрьвед дьнрʹа шьровәкьм? Гәло әз дькарьм чь бькьм, ԝәки жь хьзмәтийе дьһа зедә шабуне бьстиньм? Гәло әз дӧайед хԝәда бәʹса чь дькьм? Гәло дӧайед мьн нишан дькьн, кӧ әз хԝә бь тʹәмами дьсперьм Йаһоԝа? Гәло әз тʹьме дьчьмә щьвина? Әз ча дькарьм сәр щьвате дьһа гӧһдар бьм у щаба хԝә бьдьм?»

15-16. Тӧ жь сәрһатийа Роберт чь һин буйи?

¹⁵ Ӧса жи, фәрз ә ԝәки тӧ һьндава кемасийед хԝә жи һʹәлал би. Сәрһатийа бьраки бь наве Роберт ве йәке зәлал дькә. Әԝ дьбежә: «Гава әз 20 сали бум, әз нив рʹожи дьхәбьтим. Рʹожәке паши хәбате һәвалкʹарәке әз тʹәглифи мала хԝә кьрьм. Әԝе гот кӧ әме малда тʹәне бьн у дькарьн тʹәвайи ԝәʹдәки баш дәрбаз кьн. Серида, мьн мәʹни дьгьрт, ле паше мьн рʹастә-рʹаст жерʹа гот кӧ әзе нәйем у мәʹни чь йә». Роберт тʹәглифа һәвалкʹара хԝә инкʹар кьр, у әԝ һежайи пʹайа йә. Ле паше, гава әԝ ль сәр ве йәке фькьри, әԝи фәʹм кьр кӧ ве дәрәщеда гәрәке хԝә сәре серида рʹаст бьда кʹьфше. Әԝ дьбежә: «Мьн тʹәглифа ԝе мина Усьв дәрберʹа инкʹар нәкьр (Дәстпебун 39:7-9). Бь рʹасти әз әʹщебмайи мам, кӧ инкʹаркьрьна ве тʹәглифе бона мьн чьԛас зор бу. Бь сайа ве сәрһатийе, мьн фәʹм кьр кӧ әз гәрәке достийа хԝә тʹәви Йаһоԝа дьһа ԛәԝи кьм».

¹⁶ Мина Роберт, ԝе баш бә ԝәки тӧ жи хԝә бьщерʹьбини. Һәрге тӧ дәрәщед ӧсада сафикьрьнед рʹаст дьки, диса жи жь хԝә бьпьрсә: «Гәло мьнрʹа һеса  йә бежьм на?» Һәрге лазьм ә ԝәки тӧ ви алива һе сәр хԝә бьхәбьти, дьлтәнг нәбә. Ле ша бә ԝәки тӧ зани кӧ гәрәке сәр хԝә бьхәбьти. Дәрһәԛа ве йәке дӧа бькә у бьфькьрә кӧ чь дькарә хԝәстьна тә ԛәԝи кә, ԝәки тӧ гӧрʹа ԛанунед Йаһоԝа бьки (Зәбур 139:23, 24).

17. Амьнийа мә ча наве Йаһоԝава гьредайи йә?

¹⁷ Әм дькарьн жь сәрһатийа Роберт тьштәки дьн жи һин бьн. Әԝ дьбежә: «Паши кӧ мьн тʹәглифа һәвалкʹара хԝә инкʹар кьр, әԝе гот: ‹Мьн тә щерʹьбанд!› Мьн пьрси кӧ чь щурʹәйи. Әԝе гот кӧ һәваләки ԝе, йе кӧ бәре Шәʹде Йаһоԝа бу, жерʹа готьбу кӧ һʹәму Шәʹдед щаһьл бь жийинәкә дӧрʹу дьжин у һәрге мәщал бькʹәвә дәсте ԝан, әԝана ԝе дьзикава һәр тьшти бькьн. Ләма жи, әԝе һәвале хԝәрʹа готьбу кӧ әԝе ве йәке ль сәр мьн бьщерʹьбинә. Әз чьԛас ша бум, кӧ мьн наве Йаһоԝа рʹумәт кьр!»

18. Паши ньхӧмандьне тӧ дьхԝази чь бьки? (Ӧса жи бьньһерʹә чаргошә « Готаред Керһати».)

¹⁸ Чахе тӧ әʹмьре хԝә тʹәсмили Йаһоԝа дьки у тейи ньхӧмандьне, тӧ нишан дьки, ԝәки тӧ дьхԝази наве Ԝи пироз ки. Йаһоԝа рʹьнд занә, кӧ тӧ рʹасти кʹижан чәтьнайа у щерʹьбандьна тейи, у әԝе хирәта тә кӧ ԝирʹа амьн бьмини, кʹәрәм кә. Баԝәр бә кӧ бь сайа рʹӧһʹе пироз, әԝ дькарә ԛәԝате бьдә тә, ԝәки тӧ амьн бьмини (Луԛа 11:11-13). Бь аликʹарийа Йаһоԝа, тӧ дькари паши ньхӧмандьне бәрдәԝам ки пәй Иса һәрʹи.