1. Әв йәк кӧ әм тʹәшкиләта Йаһоԝада ньн, әм чь кʹәрәма дьстиньн?

 КʹӘРӘМӘКӘ чьԛас мәзьн ә, кӧ әм ван рʹожед хьлазийеда пʹара тʹәшкиләта Йаһоԝа нә! Һʹале дьнйайе чьԛас дьчә хьраб дьбә, ле Йаһоԝа гәләк хушк-бьред әʹзиз дайә мә, йед кӧ али мә дькьн (Зәбур 133:1). Әԝ али мә дькә ԝәки малбәта мә ԛәԝи у бәхтәԝар бә (Әфәси 5:33–6:1). У әԝ биланийе дьдә мә, ԝәки әм бәр чәтьнайа сәбьр кьн у шабуна хԝә ӧнда нәкьн.

2. Әм гәрәке чь бькьн у чьрʹа?

² Әм гәрәке хирәт бьн, ԝәки бәрдәԝам кьн бь амьни Йаһоԝарʹа хьзмәт кьн. Гәло чьрʹа? Чьмки кемасийед кәсед дьн щара дькарьн мә әʹщьз кьн. Дьбәкә әм жь бо кемасийед хԝә жи әʹщьз дьбьн, илаһи чахе әм һьнә шашийа диса у диса дькьн. Бәле, әм гәрәке бәрдәԝам кьн бь амьни Йаһоԝарʹа хьзмәт кьн (1) гава хушк йан бьрак дьле мә дешинә, (2) гава әм жь бо проблемед зәԝащеда әʹщьз дьбьн у (3) гава әм жь бо шашийед хԝә дьлтәнг дьбьн. Ве готареда әме дина хԝә бьдьнә ԝан дәрәща, у ӧса жи пебьһʹәсьн, кӧ әм жь хьзмәткʹаред Йаһоԝайә бәре чь дькарьн һин бьн.

ГАВА ХУШК ЙАН БЬРАК ДЬЛЕ МӘ ДЬЕШИНӘ

3. Һьнә хьзмәткʹаред Йаһоԝа рʹасти чь проблеме тен?

³ Проблем. Дьбәкә һьнә хәйсәтед хушк-бьра мә әʹщьз бькьн. Һьнәк жи дьԛәԝьмә бь щурʹед майин дьле мә бешиньн. Рʹуспийед щьвате жи щара шашийа дькьн. Жь бо проблемед ӧса дьле һьнәка дькарә сәр тʹәшкиләта Йаһоԝа сар бә. Дәԝса кӧ әԝана тʹәви хушк-бьра мьл бь мьл Хԝәдерʹа хьзмәт кьн, дьбәкә әԝана хԝә жь кәсед кӧ дьле ԝан ешандийә, дур бьгьрьн йан жи тʹәрка щьвата бьдьн (Сефанйа 3:9). Гәло рʹаст ә ӧса бькьн? Ԝәʹде бәре  хьзмәткʹарәки Хԝәде жи рʹасти проблемәкә ӧса һатьбу. Ԝәрә әм бьньһерʹьн кӧ әм чь дькарьн жь сәрһатийа ԝи һин бьн.

4. Паԝлосе шанди рʹасти чь проблема дьһат?

⁴ Мәсәла жь Кʹьтеба Пироз. Паԝлосе шанди заньбу, кӧ хушк-бьра беԛьсур ниньн. Гәло әԝ рʹасти чь проблема дьһат? Мәсәлә, гава әԝ тʹәзә бу шагьрте Иса, һьнә хушк-бьред жь щьвата Оршәлиме итʹбарийа хԝә ԝи нәдьанин (Кʹаред Шандийа 9:26). Чәнд сал шунда, һьнә мәрьва дәрһәԛа ԝи тьштед хьраб готьн, кӧ наве ԝи рʹәш кьн (2 Корьнтʹи 10:10). Щарәке Паԝлос дит, кӧ рʹуспики ча жь тьрса бәр мәрьва, сафикьрьнәкә нәрʹаст кьр, жь бо чь жи бона һьнәка дькарьбу бьбуйа кәвьре лькʹӧмандьне (Галати 2:11, 12). Паԝлос ӧса жи жь бо кьред һәвале хԝә, Маркос, гәләк әʹщьз бу (Кʹаред Шандийа 15:37, 38). Ле йәкә әԝ жь хушк-бьра нәдьрʹәвийа у тʹәрка хьзмәтийе нәдьда. Гәло чь али Паԝлос кьр тәйах кә?

5. Чь али Паԝлос дькьр, ԝәки гӧмана хԝә хушк-бьра нәбьрʹә? (Колоси 3:13, 14) (Бьньһерʹә ӧса жи шькьл.)

⁵ Паԝлос хушк-бьра һʹәз дькьр, ләма жи әԝи бь зедәйи дина хԝә нәдьда кемасийед ԝан. Дәԝса ве йәке, әԝи дина хԝә дьда хәйсәтед ԝанә баш. Бь сайа һʹәзкьрьне, Паԝлос дьбахшандә мәрьва у гот, кӧ әм жи гәрәке ӧса бькьн (Бьхунә Колоси 3:13, 14). Мәсәлә, Паԝлос бахшандә һәвале хԝә Маркос. Гава Паԝлос щара пешьн рʹеԝитийа мисйонертида бу, Маркос әԝ һишт чу. Ле йәкә әԝи хәйд дьле хԝәда нәдьгьрт. Паше, Паԝлос нәʹмәке хԝәда пʹайе һәвалкʹаре хԝә Маркос да, у дьгот кӧ әԝи бәрдьли да ԝи (Колоси 4:10, 11). Гава Паԝлос ль Рʹоме мала хԝәда гьрти бу, әԝи хԝәст ԝәки Маркос бе у али ԝи бькә (2 Тимотʹейо 4:11). Те кʹьфше, ԝәки Паԝлос гӧмана хԝә хушк-бьра нәдьбьрʹи.

6-7. Чьрʹа фәрз ә кӧ әм зу бьбахшиньнә хушк-бьра у һʹәзкьрьне һьндава ԝанда бьдьнә кʹьфше? (1 Йуһʹәнна 4:7)

⁶ Дәрс. Йаһоԝа мәрʹа дьбежә, ԝәки әм бәрдәԝам кьн һʹәзкьрьне һьндава хушк-бьра бьдьнә кʹьфше (Бьхуньн 1 Йуһʹәнна 4:7). Һәрге хушк йан бьрак дьле мә бешинә жи, әм дькарьн баԝәр бьн, кӧ әԝи нәдьхԝәст ӧса бькьра, ле дьхԝазә ль гора принсипед Кʹьтеба Пироз бьжи (Мәтʹәлок 12:18). Кемасийед мә чьԛас зәʹф бьн жи, Хԝәде мә һʹәз дькә. Чахе әм шашийа дькьн, әԝ пьшта хԝә надә мә у  сәр мә һерс накʹәвә (Зәбур 103:9). Бәле, Баве мәйи әʹзмана Хԝәдейе әʹфукʹар ә у әм жи гәрәке чʹәʹв бьдьнә ԝи! (Әфәси 4:32–5:1)

⁷ Әм чьԛас незики хьлазийа ве дьнйа хьраб дьбьн, һаԛас әм гәрәке незики хушк-бьра бьн. Дьбәкә жь бо баԝәрийа мә пәй мә кʹәвьн у һәла һе мә бькьнә кәле жи. Һәрге ӧса бьԛәԝьмә, әме гәләк һʹәԝще аикʹарийа хушк-бьра бьн (Мәтʹәлок 17:17). Ԝәрә әм дина хԝә бьдьнә мәсәла рʹуспики жь Испанйайе, бь наве Щозеф a. Жь бо ве йәке кӧ әԝ у бьред дьн тʹәвнәбуйина политики хԝәй дькьрьн, ԝана кьрьнә кәле. Щозеф дьбежә: «Кәледа, әм гьшк тʹәвайи дьман, ләма жи мә щара һәвдӧ әʹщьз дькьр. Лазьм бу кӧ әм бь сәбьр бьн у һәвдӧ бьбахшиньн. Бь сайа ве йәке, йәктийа мә хьраб нәдьбу у мә һәвдӧ дьпʹараст. Гьртийед дьн Шәʹдед Йаһоԝа нибун. Щарәке дәсте мьн бьриндар бу у пʹечʹайи бу, ләма жи мьн нькарьбу шьхӧл бькьра. Ле бьраки кʹьнщед мьн дьшушт у тьштед дьнда жи али мьн дькьр. Чахе әз гәләк һʹәԝще аилкʹарийе бум, һʹәзкьрьна бьра ԛәԝат дьда мьн». Чьԛас фәрз ә кӧ әм һьндава һәвда бь сәбьр бьн у проблемед ортʹа хԝәда ньһада сафи кьн!

ГАВА ЗӘԜАЩА ТӘДА ПРОБЛЕМ ПЕШДА ТЕН

8. Кәсед зәԝьщи рʹасти кʹижан проблема тен?

⁸ Проблем. Һʹәму зәԝащада проблем дькарьн пешда бен. Кʹьтеба Пироз дәрһәԛа ԝан, йед кӧ зәԝьщи нә, дьбежә кӧ әԝана ԝе «рʹасти охьрмед гьран бен» (1 Корьнтʹи 7:28). Гәло чьрʹа? Чьмки жьн-мер ԛьсурдар ьн, хәйсәте ԝан жь һәв щӧдә йә у дьбәкә әԝана културед щӧдәда мәзьн бунә. Паши зәԝаще, дьбәкә һьнә хәйсәтед ԝанә әʹщеб әшкәрә бьн. Тьштед ӧса дькарьн проблема ортʹа ԝанда пешда биньн. Дәԝса кӧ тʹәвайи проблема сафи кьн, дьбәкә әԝана һәвдӧ сущдар кьн. Дьԛәԝьмә әԝана һәла һе бьфькьрьн жь һәв башԛә бьжин, йан жи жь һәвдӧ бьԛәтьн. Гәло әв сафикьрьна рʹаст ә b? Ԝәрә әм дина хԝә бьдьнә сәрһатийа Абигайле, кʹижан кӧ зәԝаща хԝәда рʹасти чәтьнайед гьран дьһат.

9. Абигайл рʹасти чь щерʹьбандьне һат?

⁹ Мәсәла жь Кʹьтеба Пироз. Мере Абигайле, Набал, мәрьвәки сәрт у сәрһʹьшк бу (1 Самуйел 25:3). Бона Абигайле, әʹмьр тʹәви мерәки ӧса, бе шьк гәләк чәтьн бу. Гәло мәщала Абигайле һәбу ԝәки хԝә жь ԝи хьлаз кә? Бәле. Щарәке, Набал Даԝьд у әскәред ԝи беһӧрмәт кьр, жь бо чь жи Даԝьд дьхԝәст һәрʹә у һʹәму меред мала ԝида бькӧжә. Әв йәк бона Абигайле мәщаләкә баш бу, кӧ жь ви мери хьлаз бә (1 Самуйел 25:9-13). Абигайл дькарьбу бьрʹәвийа у изьн бьда, ԝәки Даԝьд нета хԝә бинә сери. Ле әԝе рʹийа Даԝьд гьрт, кӧ әԝ Набал нәкӧжә (1 Самуйел 25:23-27). Гәло Абигайле чьрʹа ӧса кьр?

10. Зәԝаща Абигайле чьԛас зор бу жи, чьрʹа диса жи әԝе зәԝаща хԝә хԝәй дькьр?

¹⁰ Абигайле гәләк Йаһоԝа һʹәз дькьр у ԛәдьре ньһерʹандьна Йаһоԝа һьндава зәԝаще дьгьрт. Бе шьк, әԝе заньбу кӧ чахе Йаһоԝа зәԝаща пешьн саз кьр, Әԝи чь готә Адәм у Һеԝайе (Дәстпебун 2:24). Абигайле заньбу кӧ бәр чʹәʹве Йаһоԝа зәԝащ пироз ә. Әԝе дьхԝәст дьле Йаһоԝа ша кә, ләма чь жь дәсте  ԝе дьһат әԝе дькьр, ԝәки мала хԝә у мере хԝә хԝәй кә. Әԝе зу тьштәк кьр, ԝәки рʹийа Даԝьд бьгьрә кӧ әԝ Набал нәкӧжә. Ӧса жи әԝ һазьр бу бона гӧнәки кӧ әԝе нәкьрьбу, бахшандьне жь Даԝьд бьхԝазә. Әʹйан ә, кӧ Йаһоԝа әв кʹӧлфәта мерхас у йа кӧ кʹара хԝә нәдьгәрийа, гәләк һʹәз дькьр. Гәло жьн у мер дькарьн жь мәсәла Абигайле чь һин бьн?

11. (а) Йаһоԝа жь кәсед зәԝьщи һивийа чь йә? (Әфәси 5:33) (б) Тӧ жь мәсәла Кармене чь һин буйи? (Бьньһерʹә ӧса жи шькьл.)

¹¹ Дәрс. Һәрге зәԝащ зор бә жи, Йаһоԝа дьхԝазә кӧ жьн у мер һәв нәԛәтьн. Гава жьн у мер хирәт дькьн ԝәки проблемед хԝә сафи кьн, ԛәдьре һәв дьгьрьн у һәв һʹәз дькьн, Йаһоԝа бе шьк жь ԝана рʹази йә (Бьхунә Әфәси 5:33). Ԝәрә әм дина хԝә бьдьнә мәсәла хушкәкә мә бь наве Кармен. Шәш сал шунда паши зәԝаще, әԝе тʹәви Шәʹдед Йаһоԝа һинбуна Кʹьтеба Пироз дәстпекьр у паше һатә ньхӧмандьне. Кармен дьбежә: «Әв сафикьрьна мьн мере мьн хԝәш нәһат, у әԝи кʹӧмрʹәшийа мьн дькьр. Әԝи әз беһӧрмәт дькьрьм у дьгот кӧ ԝе жь мьн бьԛәтә». Диса жи, Кармене 50 сал сәбьр кьр у хирәт кьр, кӧ зәԝаща ԝеда һʹәзкьрьн у ԛәдьр һәбә. Әԝ дьбежә: «Сал чьԛас жи дәрбаз дьбун, әз һин дьбум кӧ бь мәʹрифәти у бь нәрми мере хԝәрʹа хәбәр дьм. Мьн заньбу кӧ зәԝащ бәр чʹәʹве Йаһоԝа пироз ә, ләма жи чь жь дәсте мьн дьһат мьн дькьр, ԝәки зәԝаща хԝә хԝәй кьм. Әз Йаһоԝа һʹәз дькьм, у мьн тʹӧ щар нәдьхԝәст ԝәки жь мере хԝә щьһе бьм c». Һәрге зәԝаща тәда проблем пешда бен, баԝәр бә кӧ Йаһоԝа ԝе пьштгьрийа тә бькә у али тә бькә сәбьр ки.

ГАВА ТӦ ЖЬ БО КЕМАСИЙЕД ХԜӘ ӘʹЩЬЗ ДЬБИ

12. Һәрге мә гӧнәки гьран кьрийә, дьбәкә әм чь бьфькьрьн?

¹² Проблем. Һәрге мә гӧнәки гьран кьрьбә, дьбәкә әм дьлтәнг бьн. Кʹьтеба Пироз дьбежә кӧ жь бо гӧнед мә, дьбәкә әм хԝә «шькәсти» тʹәхмин кьн (Зәбур 51:17). Бьраки бь наве Роберт бь сала гәләк хирәт дькьр, ԝәки бьбә бәрдәстийе щьвате. Ле рʹожәке, әԝи гӧнәки гьран кьр у фәʹм кьр кӧ әԝи дьле Йаһоԝа ешандийә. Роберт дьбежә: «Исафа мьн гәләк әз дьчәрчьрандьм. Әз гәләк әʹщьз бум у гьрийам, у мьн Йаһоԝарʹа дӧа кьр. Һьнге әз дьфькьрим кӧ Хԝәде ԝе ида тʹӧ щара гӧһ нәдә дӧайед мьн, чьмки мьн дьле ԝи ешандьбу». Һәрге мә  гӧнә кьрийә, дьбәкә әм хԝә бекер һʹәсаб кьн у бьфькьрьн кӧ Йаһоԝа пьшта хԝә дайә мә (Зәбур 38:4). Һәрге тӧ жи кʹәти һʹаләки ӧса, дина хԝә бьдә хьзмәткʹарәки Йаһоԝа, йе кӧ гӧнәки гьран кьрьбу, ле диса жи хьзмәтийа хԝә нәда сәкьнандьне.

13. Чь һатә сәре Пәтрус?

¹³ Мәсәла Кʹьтеба Пироз. Шәва пешийа мьрьна Иса, Пәтрусе шанди чәнд шаши кьр у ахьрийеда гӧнәки гьран кьр. Пешийе Пәтрус гәләк хԝәда баԝәр бу у гот, кӧ һәрге шандийед дьн тʹәрка Иса бьдьн жи, әԝе тʹӧ щар тʹәрка ԝи нәдә (Маркос 14:27-29). Паше, гава Пәтрус бахче Гетшәманида бу, әԝ чәнд щара хәԝрʹа чу у һʹьшйар нәма (Маркос 14:32, 37-41). Ахьрйеда, гава мәрьв һатьн кӧ Иса бьгьрьн, Пәтрус әԝ һишт у рʹәвийа (Маркос 14:50). Хьлазийеда жи, Пәтрус се щара инкʹар кьр кӧ әԝ Иса нас дькә у һәла һе сәр ве дәрәԝе сонд жи хԝар (Маркос 14:66-71). Гава Пәтрус фәʹм кьр кӧ әԝи гӧнәки чьԛас мәзьн кьрьбу, әԝи чь кьр? Кʹьтеба Пироз дьбежә, кӧ әԝи тәйах нәкьр у кʹәлә-кʹәл гьрийа (Маркос 14:72). Бьдә бәр чʹәʹве хԝә, кӧ гава һәвале ԝи Иса һатә дардакьрьне, Пәтрус чьԛас дьлшкәсти бу у хԝә нәһежа һʹәсаб кьр.

14. Чь али Пәтрус дькьр кӧ бәрдәԝам кә Йаһоԝарʹа хьзмәт кә? (Бьньһерʹә пешьн.)

¹⁴ Чәнд мәʹни һәбун, жь бо чь жи Пәтрус дькарьбу хьзмәтийа хԝә Йаһоԝарʹа бәрдәԝам кә. Йа йәке, әԝи хԝә жь шагьртед дьн дур нәдьгьрт. Әԝ чу бал ԝан у ԝана бе шьк дьле ԝи ԛәԝи кьр (Луԛа 24:33). Ӧса жи, чахе Иса жь мьрьне һатә сахкьрьне, әԝ Пәтрусрʹа хӧйа бу. Дьԛәԝьмә Иса дьхԝәст бәр дьле ԝида бе (Луԛа 24:34; 1 Корьнтʹи 15:5). Паше, гава Иса у Пәтрус тʹәвайи бун, Иса һәвале хԝә нә кӧ сущдар кьр бона шашийед ԝи, ле жерʹа гот кӧ әԝе щабдарийед һе мәзьн бьстинә (Йуһʹәнна 21:15-17). Пәтрус заньбу кӧ әԝи гӧнәки гьран кьрьбу, ле диса жи, әԝи хԝә бекер һʹәсаб нәдькьр. Гәло чьрʹа? Чьмки әԝ баԝәр бӧ кӧ Ахайе ԝи, Иса, гӧмана хԝә ԝи нәбьрʹибу. Ӧса жи бьред рʹӧһʹани али Пәтрус дькьрьн. Гәло әм дькарьн жь мәсәла Пәтрус чь һин бьн?

15. Йаһоԝа дьхԝазә кӧ әм чьда баԝәр бьн? (Зәбур 86:5; Рʹомайи 8:38, 39) (Бьньһерʹә ӧса жи шькьл.)

¹⁵ Дәрс. Йаһоԝа дьхԝазә әм баԝәр бьн, кӧ әԝ мә һʹәз дькә у һазьр ә бьбахшинә мә (Бьхунә Зәбур 86:5; Рʹомайи 8:38, 39). Гава әм гӧнә дькьн, әм хԝә  нәһәԛ дькьн. Әв йәк нормал ә. Ле гәрәке әм нәфькьрьн кӧ Йаһоԝа ида мә һʹәз накә йан жи нахԝазә бьбахшинә мә. Дәԝса ве йәке, әм гәрәке зу аликʹарийе бьхԝазьн. Роберт ӧса дьбежә: «Мьн хԝә дьспартә ԛәԝата хԝә, у әз дьфькьрим кӧ әзе шашийе нәкьм. Жь бо ве ньһерʹандьна нәрʹаст, мьн гӧнә кьр». Әԝи фәʹм кьр кӧ әԝ гәрәке тʹәви рʹуспийед щьвате хәбәр дә. Әԝ дьбежә: «Рʹуспийа нишани мьн кьрьн, ԝәки Йаһоԝа мьн һәʹз дькә, у ԝана һевийа хԝә жь мьн нәбьрʹи. Ԝана дьле мьн ԛәԝи кьр у готьн, кӧ Йаһоԝа пьшта хԝә нәдайә мьн». Әм жи дькарьн дӧдьли нәбьн, кӧ Йаһоԝа мә гәләк һʹәз дькә. Һәрге әм гӧнед хԝә тʹобә бькьн, аликʹарийе бьхԝазьн у хирәт бькьн, ԝәки диса ван шашийа нәкьн, Әԝе бьбахшинә мә (1 Йуһʹәнна 1:8, 9). Һәрге әм шашик жи бәрʹдьн, баԝәрийа кӧ Йаһоԝа мә һʹәз дькә у һазьр ә бьбахшинә мә, ԝе али мә бькә ԝәки әм нәшкен у бәрдәԝам кьн ԝирʹа хьзмәт кьн.

16. Тә чьрʹа сафи кьрийә бәрдәԝам ки Йаһоԝарʹа хьзмәт ки?

¹⁶ Йаһоԝа хирәта мә гәләк ԛимәт дькә, кӧ әм ван рʹожед чәтьнда ԝирʹа хьзмәт дькьн. Бь аликʹарийа Йаһоԝа, әм дькарьн ԝәʹде проблема сәбьр кьн. Һәрге хушк-бьред мә дьле мә бешиньн жи, әм дькарьн бьбахшиньнә ԝан у ԝана һʹәз бькьн. Һәрге зәԝаща мәда проблем пешда бен, әм дькарьн хирәт бькьн кӧ ван проблема сафи кьн у ӧса нишан кьн, кӧ әм Хԝәде һʹәз дькьн у ԛәдьре ньһерʹандьна ԝи һьндава зәԝаще дьгьрьн. У һәрге әм гӧнә бькьн, әм дькарьн жь Йаһоԝа аликʹарийе бьхԝазьн, баԝәр бьн кӧ әԝ мә һʹәз дькә у һазьр ә бьбахшинә мә. Әв йәк ԝе али мә бькә бәрдәԝам кьн жерʹа хьзмәт кьн, у әм дькарьн баԝәр бьн, кӧ Йаһоԝа ԝе кʹәрәма сәр мәда бьбаринә һәрге «әм сьст нәбьн» (Галати 6:9, ИМ).