1-2. Лекʹолина сәрһатийа Шьмшон чь кʹаре мәрʹа тинә?

 ГАВА тӧ наве Шьмшон дьбьһейи, гәло чь те бира тә? Дьԛәԝьмә ԛәԝата ԝийә мәзьн те бира тә. Ле щарәке Шьмшон бона сафикьрьнәкә нәбаш, ешәкә мәзьн кʹьшанд. Диса жи Йаһоԝа дина хԝә дьда амьнийа Шьмшон у сәрһатийа ԝи бона кʹара мә дайә ньвисаре.

² Йаһоԝа бь сайа Шьмшон аликʹарикә мәзьн да щьмәʹта хԝә Исраелийа. Бь ԛьрʹна паши мьрьна Шьмшон, Йаһоԝа Паԝлосе шанди һелан кьр, ԝәки әԝ наве Шьмшон нава рʹеза меред баԝәрмәндда бьньвисә (Ибрани 11:32-34). Мәсәла Шьмшон дькарә ԛәԝате бьдә мә. Һәла һе дәрәщед чәтьнда жи, әԝи хԝә дьспартә Йаһоԝа. Ве готареда әме бьвиньн, кӧ әм дькарьн жь Шьмшон чь һин бьн у мәсәла ԝи чаԝа дькарә дьле мә ԛәԝи бькә.

3. Шьмшон чь щабдари станд?

³ Гава Шьмшон һатә буйине, Исраели бьн дәсте Фьльстийада бун у дьһатьнә зерандьне (Һʹакьмти 13:1). Ләма жи Исраелийа гәләк еш дькʹьшанд. Йаһоԝа Шьмшон бьжарт кӧ Исраелийа жь дәсте Фьльстийа хьлаз кә (Һʹакьмти 13:5). Щабдарикә нә һеса бу! Шьмшон гәрәке итʹбарийа хԝә Йаһоԝа бьанийа, сәва кӧ бькарьбуйа әԝ щабдари бьанийа сери.

4. Йаһоԝа чаԝа али Шьмшон кьр кӧ әԝ хԝә жь дәсте Фьльстийа хьлаз кә? (Һʹакьмти 15:14-16)

⁴ Әме ньһа шеԝьр кьн кӧ Шьмшон чаԝа хԝә дьспартә Йаһоԝа у аликʹарийа ԝи ԛәбул дькьр. Щарәке  әскәред Фьльстийа һатьбунә Ләһийе, ԝәки Шьмшон бьгьрьн. Меред Щьһудайе тьрсийан у сафи кьрьн, ԝәки Шьмшон бьдьнә дәсте дьжмьна. Ԝана Шьмшон пе дӧ бәна гьреда у тʹәсмили Фьльстийа кьр (Һʹакьмти 15:9-13). Ле «рʹӧһʹе Хӧдан бьһез һатә сәр» Шьмшон, у әԝи бәне дәстед хԝә ԛәтанд. Паше әԝи «һәстийәки чәнга кʹәрәки йа тʹәзә дит», әв һьлда у пе ви 1 000 меред Фьльсти кӧшт! (Бьхунә Һʹакьмти 15:14-16)

5. Шьмшон чаԝа нишан кьр кӧ әԝ хԝә дьсперә Йаһоԝа?

⁵ Бь рʹасти, һәстийе чәнга кʹәр, чʹәкәки нәтʹәбийәти бу. Гәло Шьмшон чьрʹа әв да хәбате? Бе шьк, Шьмшон заньбу ԝәки сәркʹәтьна ԝи нә кӧ чʹәква, ле Йаһоԝава гьредайи бу. Әв мере баԝәрмәнд сәва кӧ ль гора хԝәстьна Йаһоԝа һәрәкʹәт бькә, чь кӧ кʹәтә бәр дәсте ԝи, да хәбате. Бәле, Шьмшон хԝә дьспартә Йаһоԝа, ләма жи әԝ сәрдькʹәт!

6. Гава әм щабдарикә хԝә тиньн сери, әм чь дькарьн жь Шьмшон һин бьн?

⁶ Бь ԛәԝата Йаһоԝа, әм жи дькарьн щабдарийед хԝә биньн сери, һәла һе һәрге әԝана гәләк чәтьн жи тенә кʹьфше. Щара Хԝәде бь щурʹед ӧса али мә дькә, кӧ әм нә жи һивийе нә. Мина Шьмшон, әм жи баԝәр ьн, ԝәки Йаһоԝа ԝе али мә бькә, кӧ әм хԝәстьна ԝи биньн сери. Бона ве йәке, лазьм ә кӧ әм һәртʹьм хԝә бьсперьн Хԝәде у баԝәр бьн кӧ әԝе али мә бькә (Мәтʹәлок 16:3).

7. Чьрʹа фәрз ә кӧ әм рʹебәрийа Йаһоԝа бьгәрʹьн? Мәсәле бинә.

⁷ Гәләк хушк-бьред мә, йед кӧ сәр проектед авакьрьна авайед тʹәшкиләте дьхәбьтьн, нишан кьрьнә ԝәки әԝана хԝә дьсперьн Йаһоԝа. Бәре, бьред мә Одед Щьвата у авайед дьн, һʹәчʹи зәʹф тʹәзәда ава дькьрьн. Ле жь бо ве йәке кӧ тʹәшкиләта Йаһоԝа чьԛас дьчә мәзьн дьбә, лазьм бу ԝәки әв метод бенә гӧһастьне. Бьред щабдар бона рʹебәрийе Йаһоԝарʹа дӧа дькьрьн у  хирәт дькьрьн кӧ методед тʹәзә бьщерʹьбиньн. Мәсәлә, авайи дьһатьнә кʹьрʹине у тʹәзәкьрьне. Роберт, йе кӧ сәр тʹәмамийа дьнйайе гәләк проектед авакьрьнеда аликʹари дайә, ӧса дьбежә: «Серида, бона һьнәка әв методед тʹәзә чәтьн бун. Чьмки бәре мә әв шьхӧл щурʹәки майин дькьр. Ле хушк-бьра һазьр бун һини гӧһастьнед тʹәзә бьн, у әшкәрә бу кӧ Йаһоԝа әв гӧһастьн кʹәрәм дькьр». Әв мәсәлә жи нишан дькә, кӧ Йаһоԝа чаԝа рʹебәрийа хьзмәткʹаред хԝә дькә, ԝәки хԝәстьна ԝи биньн сери. Щара гәрәке әм жь хԝә бьпьрсьн: «Гәло әз рʹебәрийа Йаһоԝа дьгәрʹьм? Гәло әз һазьр ьм гӧһастьна бькьм, ԝәки бь щурʹе лапә баш Йаһоԝарʹа хьзмәт кьм?»

8. Щарәке гава Шьмшон гәләк тʹи бу, әԝи чь кьр?

⁸ Ль гора Кʹьтеба Пироз, Шьмшон тьштед дьн жи дькьр, чь кӧ мәрьва әʹщебмайи дькьрьн. Мәсәлә, әԝи тʹәне пе дәста шерәк кӧшт у паше 30 меред Фьльсти Ашкалонеда кӧшт (Һʹакьмти 14:5, 6, 19). Шьмшон заньбу кӧ бе аликʹарийа Йаһоԝа, әԝе тʹӧ щар нькарьбә тьштед ӧса мәзьн бькә. Щарәке әв йәк әшкәрә бу. Паши кӧ әԝи 1 000 Фьльсти кӧшт, әԝ гәләк тʹи бу. Гәло әԝи чь кьр? Әви нә кӧ хԝәха хԝәст чʹарәке бькә, ле жь Йаһоԝа аликʹари хԝәст (Һʹакьмти 15:18).

9. Йаһоԝа ча щаба һәԝаргазийа Шьмшон да? (Һʹакьмти 15:19)

⁹ Йаһоԝа дәнге Шьмшон бьһист у бь кʹәрәмәти ӧса кьр, кӧ каникә аве кʹьшийа. Гава Шьмшон ав вәхԝар, «рʹӧһʹе ԝи зьвьрʹи у вәжийа», демәк әԝи диса ԛәԝат станд (Бьхунә Һʹакьмти 15:19). Ча те кʹьфше, бь сала шунда, гава Самуйел пʹехәмбәр кʹьтеба Һʹакьмти ньвиси, әв кани һе һәбу. Чахе Исраелийа дьдит, кӧ әв кани дькʹьшә, дьԛәԝьмә дьһатә бира ԝан, кӧ һәрге әԝана хԝә бьсперьн Йаһоԝа, Әԝе ԝәʹдәда һʹәԝщед хьзмәткʹаред хԝәйә амьн рʹази кә.

10. Сәва кӧ әм жь Йаһоԝа аликʹарийе бьстиньн, гәрәке әм чь бькьн? (Бьньһерʹә ӧса жи шькьл.)

¹⁰ Фьрԛи тʹӧнә әм дәстпʹешә нә, йан жи әм хьзмәтийеда чьԛас пешдачуйи нә, диса жи әм гәрәке аликʹарийе жь Йаһоԝа бьхԝазьн. Әм гәрәке бь мьлукти ԛәбул кьн, кӧ тʹәне бь аликʹарийа Йаһоԝа әм дькарьн бь рʹасти сәркʹәвьн. Гава Шьмшон ава канийе вәхԝар, йа кӧ Йаһоԝа да ԝи, әԝи диса ԛәԝат станд. Мина Шьмшон, гава әм аликʹарийа кӧ Йаһоԝа дьдә мә, ԛәбул дькьн, баԝәрийа мә дьһа ԛәԝи дьбә (Мәтта 11:28).

11. Әм чаԝа дькарьн хԝә бь тʹәмами бьсперьн аликʹарийа Йаһоԝа? Мәсәләке бинә.

¹¹ Ԝәрә әм дина хԝә бьдьнә мәсәла бьре мә Алексей, йе кӧ ль Русйайе рʹасти пәйкʹәтьна те. Гәло чь али ԝи дькә, ԝәки дәрәщед лапә чәтьнда амьн бьминә? Әԝ у жьна ԝи һәр рʹож дина хԝә дьдьнә тьштед рʹӧһʹани. Әԝ дьбежә: «Әз хирәт дькьм кӧ лекʹолина шәхси дәрбаз кьм у һәр рʹож Кʹьтеба Пироз бьхуньм. Һәр сьбәһ, әз у жьна мьн рʹеза рʹоже шеԝьр дькьн у тʹәвайи Йаһоԝарʹа дӧа дькьн». Әм жь ве мәсәле чь һин дьбьн? Дәԝса кӧ әм хԝәда баԝәр бьн, гәрәке әм итʹбарийа хԝә Йаһоԝа биньн. Бона ве йәке, лазьм ә кӧ әм һәр рʹож баԝәрийа хԝә ԛәԝи кьн. Мәсәлә, бь сайа дӧакьрьне, лекʹолина Кʹьтеба Пироз, чуйина щьвина у хьзмәткьрьне.  Паше, Йаһоԝа ԝе аликʹарийа лазьм бьдә мә, ԝәки әм тʹьме ԝирʹа хьзмәт кьн. Чаԝа кӧ Әԝи ԛәԝат дьда Шьмшон, Әԝе ԛәԝате бьдә мә жи.

12. Шьмшон кʹижан сафикьрьна нәбаш кьр, у әв сафикьрьна ԝи чаԝа жь йед бәре щӧдә бу?

¹² Шьмшон мина мә, йәки гӧнәкʹар бу, ләма жи әԝи щара сафикьрьнед нәбаш дькьр. Илаһи жь бо сафикьрьнәкә нәбаш гәләк тьштед хьраб һатьн сәре ԝи. Һьнә ԝәхт шунда, чахе Шьмшон чаԝа һʹакьм хьзмәт дькьр, әԝи «нәԝала Сорәкеда жьнәке һʹәз кьр у наве ԝе Дәлила бу» (Һʹакьмти 16:4). Пешийа ве йәке, Йаһоԝа изьн да Шьмшон, ԝәки әԝ бьбә дәргистийе ԛизәкә Фьльсти, чьмки әԝи мьԛабьли «Фьльстийа мәщале дьгәрʹийа» кӧ ԝана бькӧжә. Паше, Шьмшон ль бажаре Фьльстийа, Газайеда мала ԛавәкеда ма. Һьнге Хԝәде ԛәԝат да Шьмшон, ԝәки әԝ һьмбәри Фьльстийа шәрʹ бькә (Һʹакьмти 14:1-4; 16:1-3). Ле дәрәща ԝи тʹәви Дәлилайе щӧдә бу, чьмки дьԛәԝьмә Дәлила Исраели бу у һәләԛәтийа тʹәви ԝе, мәщал нәдьда ԝи, ԝәки мьԛабьли Фьльстийа шәрʹ бькә.

13. Дәлилайе чь ани сәре Шьмшон?

¹³ Дәлилайе жь Фьльстийа гәләк пʹәрә ԛәбул кьр, ԝәки Шьмшон бьхапинә у бьдә дәсте ԝан. Дьԛәԝьмә Шьмшон жь бо бәнгибуне тедәрнәдьхьст, кӧ нета ԝе хьраб ә. Дәлилайе гәләк щар зоре ԝи дькьр, ԝәки әԝ жерʹа бежә, кӧ мәʹнийа ԛәԝата ԝи чьда йә. Ахьрийеда әԝи сьрʹа хԝә жерʹа вәкьр у гот кӧ мәʹнийа ԛәԝата ԝи чь йә. Сәд һʹәйф, шашийа Шьмшон бу сәбәб, кӧ әԝи сәр ԝәʹдәки ԛәԝата хԝә у  ԛәбулкьрьна Хԝәде ӧнда кьр (Һʹакьмти 16:16-20).

14. Чь һат сәре Шьмшон чахе әԝи баԝәрийа хԝә Дәлилайе ани?

¹⁴ Шьмшон дьһа зедә итʹбарийа хԝә Дәлилайе ани, нә кӧ Йаһоԝа. Ахьрийеда жь бо ве йәке, әԝи гәләк еш кʹьшанд. Фьльстийа әԝ гьрт у чʹәʹвед ԝи кор кьрьн. Ԝана әԝ бьрә Газайе у авитьнә кәле, кʹидәре кӧ әԝи дәргәһед бажер рʹакьрьбу. Ԝедәре әԝи мина хӧламәки гәньм дьһера. Паше, Фьльсти бона щәжьне тʹоп бун. Ԝана хӧдане хԝә Дагонрʹа ԛӧрбанәкә мәзьн ани, чьмки ԝана баԝәр дькьр, ԝәки әԝи Шьмшон дайә дәсте ԝан. Ԝана Шьмшон жь кәле дәрхьст у бьрьнә ԝедәре кʹидәре кӧ кʹеф дькьрьн, ԝәки ԛәрфед хԝә ԝи бькьн у «кʹефхԝәш» бьн (Һʹакьмти 16:21-25).

15. Шьмшон чаԝа нишан кьр кӧ әԝи диса итʹбарийа хԝә Йаһоԝа дьани? (Һʹакьмти 16:28-30) (Бьньһерʹә шькьле сәр рʹуйе пешьн.)

¹⁵ Шьмшон шашикә гьран кьр, ле диса жи әԝи пьшта хԝә нәда Йаһоԝа. Әԝи мәщал дьгәрʹийа ԝәки мьԛабьли Фьльстийа шәрʹ бькә, чьмки Йаһоԝа әв шьхӧл дабу дәсте ԝи (Бьхунә Һʹакьмти 16:28-30). Шьмшон жь Йаһоԝа лава кьр кӧ ԝи ԛәԝи кә, ԝәки әԝ жь Фьльстийа һʹәйфе һьлдә. Йаһоԝа дӧайе ԝи ԛәбул кьр у ԛәԝатәкә мәзьн да ԝи. У ве щаре Шьмшон дьһа зедә Фьльсти кӧшт, нә кӧ бәре.

16. Әм дькарьн жь шашийа Шьмшон чь һин бьн?

¹⁶ Рʹаст ә Шьмшон сәва шашийа хԝә гәләк еш у дәрд кʹьшанд, ле әԝи диса жи ԛьрара Йаһоԝа дьани сери. Һәрге әм шашике бькьн у бенә ширәткьрьне, йан жи щабдарикә хԝә щьватеда ӧнда кьн, әм гәрәке хьзмәтийа хԝә нәдьнә сәкьнандьне. Бир нәкьн, Йаһоԝа һазьр ә бьбахшинә мә (Зәбур 103:8-10). Чахе әм шашийа дькьн, чаԝа дәрәща Шьмшонда, Йаһоԝа дькарә ԛәԝате бьдә мә жи, ԝәки әм ԛьрара ԝи биньн сери.

17-18. Мәсәла Майкьл чаԝа мә ԛәԝи дькә? (Бьньһерʹә ӧса жи шькьл.)

¹⁷ Дина хԝә бьдә мәсәла бьраки щаһьл, бь наве Майкьл. Әԝ хьзмәтийеда гәләк хирәт бу. Әԝи ча бәрдәстийе щьвате у пешәнге һәртʹьм хьзмәт дькьр. Ле йазьх, әԝи шаши кьр у ләма жи щабдарийед хԝә щьватеда ӧнда кьр. Әԝ дьбежә: «Һʹәта кӧ әв йәк бьԛәԝьмийа,  әз хьзмәтийеда гәләк хирәт бум. Ле паше те бежи диԝарәки рʹийа мьн гьрт. Рʹаст ә әз тʹӧ щар нәдьфькьрим кӧ Йаһоԝа ԝе тʹәрка мьн бьдә, ле мьн жь хԝә дьпьрси һәла достийа мьн тʹәви Йаһоԝа ԝе диса чаԝа бәре ԛәԝи бә йан на. У әз бәр хԝә дькʹәтьм, һәла әзе диса бькарьбьм мина бәре щьватеда бь тʹәмами кʹар бькьм».

¹⁸ Майкьл тʹәрка хьзмәтийе нәда. Әԝ дьбежә: «Мьн гәләк хирәт дькьр ԝәки диса незики Йаһоԝа бьм. Ләма жи мьн һәр рʹож Йаһоԝарʹа дӧа дькьр у дьле хԝә жерʹа вәдькьр, лекʹолин дькьр у кʹур дьфькьрим». Ԝәʹдә шунда, Майкьл диса щьватеда щабдари стандьн. Әԝ ньһа ча рʹуспи у пешәнге һәртʹьм хьзмәт дькә. Әԝ дьбежә: «Илаһи рʹуспийа али мьн кьрьн у әз һелан дькьрьм. Ӧса мьн фәʹм кьр, ԝәки Йаһоԝа һәла һе мьн һʹәз дькә. Әз бь исафәкә рʹьһʹәт диса дькарьм щьватеда хьзмәт кьм. Әз жь ве дәрәща хԝә тьштәки һин бум: Йаһоԝа ԝе бьбахшинә һәр кәсе кӧ жь дьл тʹобә дькә». Һәрге мә шаши кьрийә жи, әм дькарьн баԝәр бьн, ԝәки Йаһоԝа ԝе щабдарийа бьдә мә у мә кʹәрәм кә. Жь бо ве йәке, гәрәке әм чь жь дәсте мә те бькьн, ԝәки жь рʹийа рʹаст дәрнәйен у бәрдәԝам кьн итʹбарийа хԝә Йаһоԝа биньн (Зәбур 86:5; Мәтʹәлок 28:13).

19. Мәсәла Шьмшон чаԝа дьле тә ԛәԝи кьр?

¹⁹ Ве готареда мә дина хԝә да чәнд сәрһатийед һʹәԝас жь әʹмьре Шьмшон. Рʹаст ә әԝ мәрьвәки гӧнәкʹар бу, ле диса әԝи жи чь жь дәсте ԝи дьһат, дькьр, ԝәки Йаһоԝарʹа хьзмәт кә һәла һе паши ве шашийа хԝә жи, кӧ әԝи дәрһәԛа ԛәԝата хԝә, Дәлилайерʹа гьли кьр. Бәле, Йаһоԝа тʹәрка Шьмшон нәда у диса ԛәԝат да ԝи, ԝәки әԝ хԝәстьна Ԝи бинә сери. Йаһоԝа диса жи ԝи ча йәки баԝәрмәнд һʹәсаб дькьр у наве ԝи кьрә нава рʹеза мәрьвед амьн, йед кӧ Ибрани сәре 11-да һатьнә ньвисаре. Бәле, Баве мәйи әʹзмана гәләк мә һʹәз дькә у рʹожед чәтьнда дьхԝазә ԛәԝате бьдә мә! Әв йәк дьле мә рʹьһʹәт дькә. Мина Шьмшон, ԝәрә әм жь Йаһоԝа рʹәща бькьн у бежьн: «Мьн дь бира хԝәда бинә ... мьн хԝӧрт [ԛәԝи] бькә» (Һʹакьмти 16:28).