1. Пешийа мьрьна Пәтрусе шанди, Йаһоԝа чь щабдари да ԝи?

 ПӘТРУСЕ шанди гәләк сал бь амьни Йаһоԝарʹа хьзмәт дькьр. Әԝ тʹәви Иса дьчу хьзмәтийе, дәштед тʹәзәда мьзгини бәла дькьр у ча әндәме кʹома рʹебәрийе хьзмәт дькьр. Пешийа мьрьна Пәтрус, Йаһоԝа һе зедә шьхӧл да ԝи. Ԝәкә сала 62-64 Д.М.-да, әԝи жь бина бәр Хԝәде дӧ нәʹмә ньвисин, демәк йәке Пәтрус у дӧдӧйе Пәтрус. Пәтрус баԝәр дькьр, кӧ паши мьрьна ԝи, әв дӧ нәʹмед ԝи ԝе али Мәсиһийа бькьн (2 Пәтрус 1:12-15).

2. Нәʹмед Пәтрус чьма ӧса фәрз ьн?

² Пәтрус һьнге нәʹмед хԝә ньвисин, чахе хушк-бьра жь бо «щурʹә-щурʹә щерʹьбандьна» хәмгин дьбун (1 Пәтрус 1:6). Пʹехәмбәред дәрәԝин дьхԝәстьн һинкьрьнед ԛәлп у бенамусийе бькьнә щьвате (2 Пәтрус 2:1, 2, 14). Һьнә ԝәʹдә шунда, Мәсиһийед кӧ Оршәлимеда дьжитьн «ахьрийа һәр тьшти» дитьн, демәк чахе бажаре Оршәлиме у система Щьһуйа жь алийе әскәред Рʹомайи һатьнә ԝеранкьрьне (1 Пәтрус 4:7). Бе шьк, нәʹмед Пәтрус али хушк-бьра дькьрьн, ԝәки хԝә бона тәнгасийа һазьр кьн у Йаһоԝарʹа амьн бьминьн. b

3. Чьма гәрәке әм дӧ нәʹмед Пәтрус лекʹолин бькьн?

³ Рʹаст ә Пәтрус нәʹмед хԝә Мәсиһийед ԛьрʹна йәкерʹа ньвиси, ле диса жи Йаһоԝа нәʹмед ԝи кьрә пʹара Хәбәра Хԝә, ԝәки әм жи бькарьбьн кʹаре бьстиньн (Рʹомайи 15:4). Иро жи һәр дәра бенамуси бәла буйә, ләма жи баԝәрийа мә те щерʹьбандьне у һеса нинә кӧ Йаһоԝарʹа хьзмәт кьн. Хенщи ве йәке, зутьрәке тәнгасийа мәзьн ԝе  дәстпебә. Һәр дӧ нәʹмед Пәтрусда, ширәтед гәләк фәрз һәнә. Әԝ нәʹмә ԝе али мә бькьн һивийа рʹожа Хԝәде бьн, тьрса бәр мәрьва алт кьн у бь дьл у щан һәвдӧ һʹәз бькьн. Һьм жи, һьнә ширәт дькарьн али рʹуспийа бькьн, кӧ рʹьнд шьвантийа бәрхед Хԝәде бькьн.

4. Ль гора 2 Пәтрус 3:3, 4, чь дькарә баԝәрийа мә сьст кә?

⁴ Гәләк мәрьв баԝәрийа хԝә пʹехәмбәртийед Кʹьтеба Пироз найньн. Жь бо ве йәке кӧ әм гәләк ԝәхт дәрһәԛа ахьрийа ве дьнйайе хәбәр дьдьн, һьнә мәрьв щара ԛәрфед хԝә мә дькьн. Һьнәк жи дьбежьн, кӧ рʹожа Хԝәде ԝе тʹӧ щар нәйе (Бьхунә 2 Пәтрус 3:3, 4). Һәрге әм тьштед ӧса ԝәʹде хьзмәтийе, сәр хәбате, йан жи жь нәфәред мале бьбьһен, шьк дькарә бькʹәвә дьле мә у баԝәрийа мә сьст кә. Гәло гьлийед Пәтрус чаԝа дькарьн али мә бькьн?

5. Чь ԝе али мә бькә бь сәбьр һивийа кʹӧтакьрьна ве дьнйайе бьн? (2 Пәтрус 3:8, 9)

⁵ Дьбәкә һьнә мәрьв дьфькьрьн, кӧ Йаһоԝа кʹӧтакьрьна ве дьнйа хьраб дәрәнги дьхә. Гьлийед Пәтрус тиньн бира мә, ԝәки ньһерʹандьна Йаһоԝа сәр ԝәʹдә жь ньһерʹандьна мәрьва гәләк щӧдә дьбә (Бьхунә 2 Пәтрус 3:8, 9). Бона Йаһоԝа һʹәзар сал мина рʹожәке йә. Әԝ сәбьр дькә у нахԝазә кӧ кәсәк ԛьрʹ бә. Ле гава рʹожа ԝи бе, әв дьнйа хьраб ԝе ԛьрʹ бә. Бь рʹасти жи ԛәдьрәки чьԛас мәзьн ә, кӧ әм дькарьн әԝ ԝәʹде кӧ майә, мьзгинийе сәр тʹәмамийа дьнйайе бәла кьн.

6. Әм чаԝа дькарьн «һивийа Рʹожа Хԝәде бьн»? (2 Пәтрус 3:11, 12)

⁶ Пәтрус мә һелан дькә, ԝәки әм «һивийа Рʹожа Хԝәде бьн» (Бьхунә 2 Пәтрус 3:11, 12). Әм чаԝа дькарьн ве йәке бькьн? Һәр рʹож дьнйа тʹәзә бьдьнә бәр чʹәʹве хԝә у дәрһәԛа созед Хԝәде кʹур бьфькьрьн. Бьдьнә бәр чʹәʹве хԝә, кӧ әм һәԝа тʹәмьз дькʹьшиньн, хԝарьна тʹәмьз дьхԝьн у сьлавәкә ширьн дьдьнә мәрьвед хԝә, йед кӧ жь мьрьне һатьнә сахкьрьне. Ӧса жи бьдьнә бәр чʹәʹве хԝә ԝан мәрьва, йед кӧ гәләк ԝәхт пешда дьжитьн, у әм ԝана дәрһәԛа пʹехәмбәртийед Кʹьтеба Пироз һин дькьн. Һәрге әм тьштед ӧса бьдьнә бәр чʹәʹве хԝә, әԝ йәк ԝе али мә бькә кӧ әм һивийа рʹожа Хԝәде бьн у баԝәр бьн, кӧ дьнйа тʹәзә незик ә. Әм заньн чь һивийа мә йә. Ләма жи әм гәрәке «һаш жь хԝә һәбьн», сәва кӧ бь һинкьрьнед ԛәлп нәйенә хапандьне (2 Пәтрус 3:17).

7. Тьрса бәр мәрьва ча дькарә сәр мә һʹӧкӧм кә?

⁷ Әм заньн кӧ рʹожа Йаһоԝа незик ә, ләма жи әм бь хирәт мьзгинийе бәла дькьн. Ле һьнә дәрәщада дьԛәԝьмә әм дьтьрсьн шәʹдәтийе бьдьн. Гәло чьрʹа? Чьмки дьԛәԝьмә әм дьтьрсьн кӧ мәрьв ԝе чь бьфькьрьн, йан жи тьштәки нәбаш бькьн. Әв йәк һатә сәре Пәтрус. Шәва пешийа мьрьна Иса, Пәтрус тьрсийа бежә, кӧ әԝ шагьрте Иса йә у әԝи чәнд щара Иса инкʹар кьр (Мәтта 26:69-75). Ле паше, Пәтрус тьрса бәр мәрьва алт кьр у бь дьләки ԛәԝи гот: «Жь мәрьва нәтьрсьн у хԝә ӧнда нәкьн» (1 Пәтрус 3:14). Гьлийед Пәтрус нишан дькьн, кӧ әм дькарьн жь тьрса бәр мәрьва аза бьн.

8. Чь дькарә али мә бькә, кӧ әм жь кәсед дьн нәтьрсьн? (1 Пәтрус 3:15)

⁸ Чь дькарә али мә бькә, кӧ әм мәрьва нәтьрсьн? Пәтрус мәрʹа дьбежә:  «Мәсиһ чаԝа Хӧдане пироз дьле хԝәда бьльнд бьгьрьн» (Бьхунә 1 Пәтрус 3:15). Демәк, әм дькарьн сәр ве йәке бьфькьрьн, кӧ Иса Мәсиһ Пʹадше мә йә у ԛәԝата ԝи гәләк мәзьн ә. Һәрге әм щара бәр хԝә дькʹәвьн йан жи дьтьрсьн шәʹдәтийе бьдьн, әм дькарьн дәрһәԛа Пʹадше хԝә бьфькьрьн. Бьдьнә бәр чʹәʹве хԝә, кӧ әԝ сәр тʹәхт рʹуньштийә у бь милйона мәләк дәр-дора ԝи нә. Биньн бира хԝә, кӧ «һʹәму һʹӧкӧме әʹрд у әʹзмен» дәсте ԝида нә, у әԝе «тʹьме һʹәта ахьрийа дьнйайе тʹәви» мә бә (Мәтта 28:18-20). Пәтрус мә һелан дькә, ԝәки әм тʹьме һазьр бьн баԝәрийа хԝә бьпʹарезьн. Сәр хәбате, мәкʹтәбеда, йан жи щийед дьн, мәщал дькʹәвә дәсте мә, кӧ әм мьзгинийе бәла кьн. Бона ве йәке лазьм ә кӧ әм пешда бьфькьрьн у хԝә һазьр кьн, кʹәнге у чь бежьн. Бона мерхасийе дӧа бькьн у баԝәр бьн, кӧ Йаһоԝа ԝе али ԝә бькә мәрьва нәтьрсьн (Кʹаред Шандийа 4:29).

9. Кʹижан дәрәщеда Пәтрус хушк-бьрарʹа һʹәзкьрьн нәда кʹьфше? (Бьньһерʹә ӧса жи шькьл.)

⁹ Пәтрус һин бу кӧ чаԝа һʹәзкьрьне бьдә кʹьфше. Әԝ ԝедәре бу чахе Иса гот: «Әз тʹәмикә ну дьдьмә ԝә: «Һәвдӧ һʹьз бькьн. Чаԝа кӧ мьн һун һʹьз кьрьн,  һун жи ӧса һәвдӧ һʹьз бькьн» (Йуһʹәнна 13:34). Ле диса жи, чахе әԝ кʹәтә бәр байе мәрьвед дьн, әԝи инкʹар кьн кӧ тʹәви хушк-бьред нәщьһу хԝарьне бьхԝә. Паԝлосе шанди, гот кӧ әв йәк «дӧрʹути» йе (Галати 2:11-14). Пәтрус ширәта Паԝлос ԛәбул кьр. Һәр дӧ нәʹмед хԝәда әԝи ньвиси, ԝәки әм гәрәке нә кӧ тʹәне дьле хԝәда хушк-бьра һʹәз бькьн, ле пе кьред хԝә жи һʹәзкьрьне ԝанрʹа бьдьнә кʹьфше.

10. Әм ча дькарьн һʹәзкьрьна бе дӧрʹути нишан кьн? (1 Пәтрус 1:22)

¹⁰ Пәтрус дьбежә кӧ һʹәзкьрьна мә һьндава хушк-бьра, гәрәке бе дӧрʹути бә (Бьхунә 1 Пәтрус 1:22). Һәрге әм «гӧһдарийа рʹастийе» бькьн, әме хушк-бьред хԝә һʹәз бькьн. Ль гора ве рʹастийе, Хԝәде «фьрԛийе накә нава мьләта» (Кʹаред Шандийа 10:34, 35). Һәрге әм щьватеда һʹәзкьрьне тʹәне һьнәкарʹа бьдьнә кʹьфше, әв йәк те һʹәсабе кӧ әм гӧһ надьнә тʹәмийа Иса. Һәмьки, әм жи мина Иса тʹәви һьнә хушк-бьра дьһа незик ьн (Йуһʹәнна 13:23; 20:2). Ле Пәтрус ширәт дьдә мә, кӧ әм гәрәке «хушк-бьра һʹьз бькьн», демәк һʹәзкьрьне һьндава һʹәмуйа бьдьнә кʹьфше, чьмки әм нәфәред малбәтәке нә (1 Пәтрус 2:17).

11. Чь те һʹәсабе һʹәзкьрьна бь дьл у щан?

¹¹ Пәтрус гот, «бь дьле сах һәвдӧ ԛайим һʹьз бькьн». Демәк, чьԛас чәтьн бә жи, йәкә әм гәрәке һʹәму хушк-бьра һʹәз бькьн. Мәсәлә, һәрге бьрак дьле мә бешинә, әм гәрәке чь бькьн? Серида дьбәкә әме бьхԝазьн хԝә мина ԝи бьдьнә кʹьфше. Ле Пәтрус жь Иса пеһʹәсийа, кӧ тьштед ӧса Хԝәде хԝәш найе (Йуһʹәнна 18:10, 11). Пәтрус ньвиси: «Жь бәр хьрабийева хьрабийе нәкьн, йан жь бәр беһӧрмәткьрьнева беһӧрмәткьрьне» (1 Пәтрус 3:9). Һәрге кәсәк дьле мә ешандийә, һʹәзкьрьна жь дьл али мә дькә диса жи һьндава ԝида дьлрʹәмийе бьдьнә кʹьфше.

12. (а) Һʹәзкьрьна бь дьл у щан мә бәрбь чь һелан дькә? (б) Ль гора видеойа бь наве Йәктийе Ԛимәт Кьн, һун һелан бунә чь бькьн?

¹² Нәʹмә хԝәйә пешьнда, Пәтрус гот кӧ бьра һʹәзкьрьна ԝә һьндава һәвда «бь дьл у щан бә», демәк әм гәрәке һазьр бьн тʹьме һәвдӧ бьбахшиньн (1 Пәтрус 4:8). Дьԛәԝьмә Пәтрус кьрә бира хԝә, кӧ чәнд сал пешда, Иса дәрһәԛа бахшандьне чәнд ширәт данә ԝи. Ԝи чахи, гава Пәтрус гот кӧ әԝе «һʹәта һʹәфт щара» бьбахшинә бьре хԝә, дьԛәԝьмә әԝи һʹәсаб дькьр, кӧ әԝ йәки гәләк дьлован ә. Ле Иса ԝирʹа гот, кӧ әԝ гәрәке 77 щара бьбахшинә бьре хԝә, демәк тʹьме (Мәтта 18:21, 22). Һәрге тәрʹа чәтьн ә ль гора ве тʹәмийа Иса бьжийи, бәр хԝә нәкʹәвә! Әм мәрьвнә гӧнәкʹар ьн, ләма жи щара мәрʹа һеса нинә һәвдӧ бьбахшиньн. Ле гәләк фәрз ә чь жь дәсте мә те бькьн, ԝәки бьбахшиньнә хушк-бьра у әʹдьлайе тʹәви ԝан хԝәйи кьн. c

13. Щарна чьма нә һеса йә, кӧ рʹуспи шьхӧлед шьвантийе бькьн?

¹³ Пәтрус тʹӧ щар бир нәдькьр кӧ Иса паши сахкьрьне чь жерʹа гот: «Шьвантийе пәзед мьн бькә» (Йуһʹәнна 21:16). Һәрге тӧ рʹуспи йи, тӧ зани кӧ әԝ тʹәми тәрʹа жи һатийә дайине. Щара нә һеса йә кӧ рʹуспи бона ԝе щабдарийа фәрз ԝәʹдә вәԛәтиньн. Бәри пешьн, әԝана  гәрәке бона малбәта хԝә хәм бькьн, чаԝа физики, емосийали ӧса жи рʹӧһʹанида. Ӧса жи, әԝана шьхӧле бәлакьрьна мьзгинийеда хирәт ьн у сәр щьвата у щьватед мәзьн пе готара дәртен. Һьнә рʹуспи али Комитейед Һәвкʹарийа Нәхԝәшхана йан жи Идара Шьхӧле Авакьрьне дькьн, йа кӧ мьһала ԝанда нә. Бь рʹасти жи гәләк шьхӧле рʹуспийа һәйә!

14. Чь дькарә рʹуспийа һелан кә, шьхӧле шьвантийе бькьн? (1 Пәтрус 5:1-4)

¹⁴ Пәтрус ширәт да рʹуспийа, кӧ шьвантийе кәрийе пәзе Хԝәде бькьн (Бьхунә 1 Пәтрус 5:1-4). Әм заньн кӧ рʹуспи хушк-бьра һʹәз дькьн у дьхԝазьн али ԝан бькьн. Ле щара шьхӧле рʹуспийа ӧса зәʹф ә у әԝана һаԛас дьԝәстьн, кӧ дьфькьрьн ԝәки нькарьн ԝе щабдарийа хԝә биньн сери. Рʹуспи дькарьн чь бькьн? Әԝана дькарьн дьле хԝә Йаһоԝарʹа вәкьн. Пәтрус ньвиси: «Һәгәр йәк хьзмәткʹарийе дькә, бьра бь ԝе ԛәԝате бькә, кӧ Хԝәде дайе» (1 Пәтрус 4:11). Һәмьки проблемед хушк-бьред мә ве дьнйайеда ԝе бь тʹәмами нәйенә сафикьрьне. Ле бир нәкьн, кӧ «Сәрәкшьван», демәк Иса, жь һәр кәси четьр дькарә али ԝан бькә. Әԝ чаԝа ньһа, ӧса дьнйа тʹәзәда дькарә ве йәке бькә. Хԝәде дьхԝазә ԝәки рʹуспи хушк-бьра һʹәз бькьн, шьвантийа ԝан бькьн у бона ԝан бьбьнә мәсәла баш.

15. Рʹуспик чаԝа шьхӧле шьвантийе тинә сери? (Бьньһерʹә ӧса жи шькьл.)

¹⁵ Рʹуспики щерʹьбанди бь наве Ԝилйам занә, кӧ шьхӧле шьвантийе чьԛас фәрз ә. Гава пандәмийа коронавирусе дәстпебу, әԝи у рʹуспийед дьн һәр тьшт дькьрьн, ԝәки һәр һʹәфтийе жь хушк-бьред кʹома хԝә бьпьрсьн, кӧ һʹале ԝан чаԝа йә . Әԝ шьровәдькә: «Гәләк хушк-бьра малед хԝәда тʹәне бун, ләма жи әԝана һеса дькарьбун бькʹәтана мьтала у хәмгин буна». Гава хушк йан бьрак хԝә нәбаш тʹәхмин дькә, Ԝилйам рʹьнд гӧһ дьдә ԝи, ԝәки фәʹм бькә, кӧ чь хәм у дәрдед ԝи һәнә у әԝ һʹәԝще чь йә. Паше, әԝ сәр малпәра мә видео йан әʹдәбйәта дьвинә, ԝәки бь сайа ван, хушк-бьра ԛәԝи кә. Әԝ дьбежә: «Иро шьхӧле шьвантийе дьһа зәʹф ә нә кӧ бәре. Әм  һәр тьшти дькьн, ԝәки али кәсед дьн бькьн, кӧ әԝана Йаһоԝа нас кьн. Бь ԝи щурʹәйи, гәрәке әм хирәт бькьн кӧ шьвантийа пәзед Йаһоԝа бькьн, ԝәки әԝана рʹастийеда бьминьн».

16. Әм ча дькарьн дәрсед жь дӧ нәʹмед Пәтрус, әʹмьре хԝәда бьдьнә хәбате?

¹⁶ Мә жь дӧ нәʹмед Пәтрус тʹәне чәнд дәрс шеԝьр кьр. Чьда тӧ дьхԝази пешда һәри? Мәсәлә, дьԛәԝьмә тӧ дьхԝази һе зедә дәрһәԛа дьнйа тʹәзә бьфькьри. Йан жи тӧ дьхԝази сәр хәбате, мәкʹтәбеда йан жи дәрәщәкә дьнда кәсәкирʹа шәʹдәтийе бьди. Дьбәкә тә мәщалед тʹәзә дитийә, кӧ чаԝа һьндава хушк-бьра дьһа зедә һʹәзкьрьне бьди кʹьфше. Рʹуспи дькарьн хԝәрʹа нет дайньн, ԝәки бь дьл у щан у бь хирәт шьвантийа бәрхед Йаһоԝа бькьн. Бь сайа ве лекʹолине, дьԛәԝьмә тә чәнд кемасийед хԝә дит, ле диса жи дьлтәнг нәбә. Бир нәкә, кӧ Пʹадше мә Иса Мәсиһ йәки дьлован ә у әԝе али тә бькә, ԝәки тӧ пешда һәри (1 Пәтрус 2:3). Пәтрус дьбежә, кӧ Хԝәде «ԝе хԝәха ԝә . . . бьшьдинә, ԛәԝат кә, хԝәйибьнгәһ кә» (1 Пәтрус 5:10).

17. Һәрге әм бәрдәԝам кьн хирәт бьн у бьһельн кӧ Йаһоԝа мә һин кә, әме чь кʹәрәма бьстиньн?

¹⁷ Щарәке, Пәтрус хԝә һежа һʹәсаб нәкьр кӧ кʹеләка кӧрʹе Хԝәде бә (Луԛа 5:8). Ле бь аликʹарийа Йаһоԝа у Иса Мәсиһ, Пәтрус бәрдәԝам дькьр бь амьни пәй Иса һәрә. Ахьрийеда Йаһоԝа изьн да Пәтрус, ԝәки әԝ бькʹәвә «Пʹадшатийа һʹәта-һʹәтайейә Хӧдан у Хьлазкьре мә Иса Мәсиһ» (2 Пәтрус 1:11). Чь хәлатәкә мәзьн ә! Мина Пәтрус, һәрге тӧ бәрдәԝам ки хирәт би у изьн бьди Йаһоԝа кӧ тә һин кә, тӧйе жи әʹмьре һʹәта-һʹәтайе бьстини. Паше те бьгьһижи нета баԝәрийа хԝә, демәк бейи хьлазкьрьне (1 Пәтрус 1:9).