1. Әм чьрʹа дькарьн бежьн, ԝәки гӧмана Бьраһим ԛәԝи бу?

 ЙАҺОԜА соз дабу досте хԝә Бьраһим, кӧ әԝе һʹәму мьләтед дьнйайе бь сайа зӧрʹәта ԝи кʹәрәм кә (Дәстпебун 15:5; 22:18). Баԝәрийа Бьраһим ԛәԝи бу у әԝ дӧдьли нәдьбу, кӧ созе Хԝәде ԝе бе сери. Ле гава Бьраһим 100 сали у жьна ԝи 90 сали бу, кӧрʹе ԝан һе тʹӧнә бу (Дәстпебун 21:1-7). Диса жи Кʹьтеба Пирозда те готьне: «Бьраһим бь гӧман баԝәр кьр, кӧ әԝе бьбә баве гәләк мьләта, чаԝа һатьбу готьне» (Рʹомайи 4:18). Ахьрийеда гӧмана Бьраһим һатә сери. Әԝ бу баве Исһаԛ, кӧрʹе кӧ әԝ бь һʹьзрәт һивийе бу. Бьраһим чьрʹа баԝәр бу, кӧ Йаһоԝа ԝе созе хԝә бинә сери?

2. Бьраһим чьрʹа баԝәр бу, кӧ созе Йаһоԝа ԝе бе сери?

² Достийа Бьраһим тʹәви Йаһоԝа гәләк ԛәԝи бу. Ләма жи әԝ «ԝе йәкеда баԝәр бу, кӧ [Хԝәде] соз дайә ԝе бинә сери жи» (Рʹомайи 4:21). Йаһоԝа жь Бьраһим рʹази бу. Жь бо баԝәрийа ԝи, Хԝәде әԝ ча мәрьвәки рʹаст һʹәсаб кьр (Аԛуб 2:23). Ль гора Рʹомайи 4:18, гӧман у баԝәрийа Бьраһим һәвва гьредайи бун. Әме ньһа бьвиньн, кӧ Паԝлосе шанди, Рʹомайи сәре 5-да дәрһәԛа гӧмане чь готьбу.

3. Паԝлос дәрһәԛа гӧмане чь гот?

³ Паԝлос зәлал кьр, кӧ әм чьрʹа дькарьн баԝәр бьн, ԝәки гӧмана мә ԝе бе сери (Рʹомайи 5:5). Ӧса жи әԝ али мә дькә, кӧ әм чаԝа дькарьн гӧмана хԝә  һе ԛәԝи кьн. Әме ньһа Рʹомайи 5:1-5 лекʹолин кьн. Ԝәʹде лекʹолине бьфькьрә, ԝәки гӧмана тә дәрһәԛа ахьрийе дьле тәда ча гав бь гав гәш буйә. Әв лекʹолин ԝе бьдә кʹьфше, ԝәки тӧ ча дькари һевийа хԝә дьһа ԛәԝи ки. Ԝәрә әм дина хԝә бьдьнә һевийа кӧ ԝе әʹсәйи бе сери.

4. Рʹомайи 5:1, 2 бәʹса чь дькә?

⁴ Бьхунә Рʹомайи 5:1, 2. Паԝлосе шанди әв йәк щьвата Рʹомайарʹа ньвиси. Хушк-бьред ԝедәре дәрһәԛа Йаһоԝа у Иса пеһʹәсийа бун, ԝана баԝәрийа хԝә ава кьрьбу у бьбунә шагьртед Иса. Хԝәде әԝана жь бо баԝәрийа ԝан «рʹаст» һʹәсаб дькьр у бь рʹӧһʹе пироз һьлбьжартьн. Бәле, әԝана бьбунә хԝәйе һевикә хԝәш.

5. Һевийа кәсед бь рʹӧһʹ бьжарти чь йә?

⁵ Ԝәхт шунда Паԝлос Мәсиһийед бь рʹӧһʹ бьжартирʹа, йед ль бажаре Әфәсе, дәрһәԛа һевийа кӧ Хԝәде дайә ԝан ньвиси. Әԝи бәʹса ве хәлате кьр, йа кӧ кәсед бь рʹӧһʹ бьжарти гәрәке бьстандана (Әфәси 1:18). Паԝлос Колосйарʹа жи ньвиси, кӧ әԝана ԝе хәлата хԝә кʹӧдәре бьстиньн. Әԝи әв хәлат нав кьр гӧмана сәр әʹзмана (Колоси 1:4, 5). Һевийа кәсед бьжарти әԝ ә, кӧ әԝана ԝе бона жийина һәрһәйи сәр әʹзмана бенә рʹакьрьне у ԝедәре тʹәви Мәсиһ сәрԝертийе бькьн (1 Тʹесалоники 4:13-17; Әʹйанти 20:6).

6. Бьраки бь рʹӧһʹ кʹьфшкьри, дәрһәԛа гӧмана хԝә чь готьбу?

⁶ Кәсед бьжарти ве һевийе гәләки ԛимәт дькьн. Йәк жь ԝан, бьре Фредерик Франс бу. Щарәке әԝи дәрһәԛа ве гӧмане ӧса гот: «Бе шьк, гӧмана мә ԝе бе сери, у һәр кәсе бьжарти жь 144 000, ԝе хәлата кӧ Хԝәде соз дайә, бьстинә. Бәле, хәлата кӧ әме бьстиньн ԝе дьһа баш бә, нә кӧ ча әм дьдьнә бәр чʹәʹве хԝә». Франс ӧса гот: «Һʹәта иро  жи [әм] ԛимәта ве һевийе заньн. . . . Әм чьԛас ԝәхт һивийа ԝе бьн жи, әме һаԛас зедә рʹази бьн. Һәрге әԝ паши милйона сала бе сери жи, диса һежа йә кӧ әм һивийе бьн. Ньһа әз дьһа зедә һевийа мә ԛимәт дькьм».

7-8. Һевийа һʹәчʹи зәʹф хьзмәткʹаред Йаһоԝа чь йә? (Рʹомайи 8:20, 21)

⁷ Һʹәчʹи зәʹф хьзмәткʹаред Йаһоԝа хԝәйе гӧманәкә дьн ьн. Әԝ баԝәр ьн, кӧ ԝе мина Бьраһим һʹәта-һʹәтайе сәр әʹрде, бьн сәрԝертийа Пʹадшатийа Хԝәдеда бьжин (Ибрани 11:8-10, 13). Паԝлос дәрһәԛа ахьрийа баш, йа ве һевийа хԝәш ньвиси (Бьхунә Рʹомайи 8:20, 21). Гава тә щара пешьн бьһист, кӧ Кʹьтеба Пироз дәрһәԛа ахьрийе чь соз дьдә, гәло һәри зедә кʹижан соз тә хԝәш һат? Дьԛәԝьмә созе кӧ рʹожәке, тӧйе беԛьсур у бегӧнә би? Йан жи созе кӧ мәрьвед тәйи һʹәзкьри ԝе жь мьрьне рʹабьн у щьнәтеда сәр әʹрде бьжин? Бәле, рʹожед гәләк хԝәш һивийа тә нә.

⁸ Фьрԛи тʹӧнә әм һивийа жийина һәрһәйи йа сәр әʹзмана, йан сәр әʹрде нә, һевийа мә дьле мә ша дькә. Ле һевийа мә дькарә һе ԛәԝи бә. Паԝлос зәлал кьр кӧ әв йәк ԝе чаԝа бьбә. Әме ньһа бьвиньн кӧ әԝи дәрһәԛа һевийа мә чь ньвиси йә. Гьлийед ԝи ԝе али мә бькьн, кӧ әм һе зедә баԝәр бьн, ԝәки һевийа мә ԝе әʹсәйи бе сери.

9-10. Чаԝа кӧ сәрһатийа Паԝлос нишан дькә, чь дькарә бе сәре хьзмәткʹаред Хԝәде? (Рʹомайи 5:3) (Бьньһерʹә ӧса жи шькьл.)

⁹ Бьхунә Рʹомайи 5:3. Паԝлос гот кӧ гава әм рʹасти тәнгасийа тен, һевийа мә дькарә дьһа ԛәԝи бә. Дьԛәԝьмә әв йәк бона мә әʹщебмайи йә. Бь рʹасти, һʹәму шагьртед Иса дькарьн рʹасти чәтьнайа бен. Ԝәрә әм дина хԝә бьдьнә сәрһатийа Паԝлосе шанди. Әԝи Тʹесалоникийарʹа ӧса готьбу: «Гава әм щәм ԝә бун, мә һе һьнгеда ԝәрʹа дьгот, кӧ әме рʹасти  тәнгасийа бен у ӧса жи бу, чаԝа һун заньн» (1 Тʹесалоники 3:4). У Паԝлос Корьнтʹийарʹа ӧса ньвиси: «Әм нахԝазьн кӧ һун һаш жь ԝан тәʹли-тәнгийа тʹӧнәбьн хушк-бьрано, . . . һʹәта кӧ мә дәсте хԝә жь әʹмьре хԝә жи кʹьшанд» (2 Корьнтʹи 1:8; 11:23-27).

¹⁰ Иро хьзмәткʹаред Хԝәде жи дькарьн рʹасти чәтьнайа бен (2 Тимотʹейо 3:12). Жь бо ве йәке тӧ баԝәрийа хԝә Иса тини у пәй ԝи дьчи, гәло тӧ жи рʹасти чәтьнайа һати? Дьԛәԝьмә һәвал у мәрьвед тә ԛәрфед хԝә тә дькьн, йан жи мьԛабьли тә дәртен. Жь бо ве йәке кӧ тӧ дьхԝази һәр тьштида рʹаст у һәԛ би, гәло һәвалхәбатчи йан сәркʹаре тә мьԛабьли тә начьн? (Ибрани 13:18) Жь бо ве йәке кӧ тә кәсед дьнрʹа бәʹса һевийа хԝә кьрийә, гәло жь алийе сәрԝеред дәԝләте, тӧ рʹасти пәйкʹәтьна һати? Фьрԛи тʹӧнә әм рʹасти чь тәнгасийа тен, гәло Паԝлос чьрʹа дьбежә кӧ әм гәрәке ша бьн?

11. Әм чьрʹа дьхԝазьн чәтьнайада сәбьр кьн?

¹¹ Әм дькарьн чәтьнайада жи шабуна хԝә ӧнда нәкьн, чьмки Рʹомайи 5:3 дьбежә кӧ «тәнгаси сәбьре тинә». Һʹәму хьзмәткʹаред Хԝәде ԝе рʹасти тәнгасийа бен. Ләма, чь бе сәре мә жи, әм гәрәке бь дьл у щан һазьр бьн сәбьр кьн. Һәрге әм ӧса бькьн, әме бьвиньн кӧ гӧмана мә ԝе бе сери. Ԝәрә әм дина хԝә бьдьнә мәсәла кӧ Иса ани. Әԝи гот кӧ тʹохьме рʹастийе кʹәтьнә сәр әʹрде кәвьри. Серида мәрьвед ӧса бь шабуне рʹастийе ԛәбул дькьн. Ле гава әԝана рʹасти «тәнгасийа у зерандьне» тен, әԝана жь рʹийа рʹастийе дәрдькʹәвьн. Әм нахԝазьн бьбьнә мина ԝан мәрьва (Мәтта 13:5, 6, 20, 21). Бәле, гава әм рʹасти тәнгаси у зерандьне тен, әв йәк һеса нинә, ле һәрге әм сәбьр кьн, әме кʹаре бьстиньн. Гәло чь щурʹәйи?

12. Әм чь кʹаре дьстиньн гава чәтьнайада сәбьр дькьн?

¹² Аԛуб кʹьфш кьр, кӧ сәбьркьрьн чь кʹаре тинә. Әԝи ньвиси: «Сәбьр жи, бьра бь думька дьреж бә, ԝәки һун кʹамьл у гьһишти бьн, тʹӧ кемасикә ԝә тʹӧнәбә» (Аԛуб 1:2-4). Чахе Аԛуб бәʹса сәбьркьрьне кьр, гәло әԝи чь дьхԝәст бьгота? Сәбьркьрьн дькарә али мә бькә, кӧ әм дьһа зедә тәйах кьн, баԝәрийа хԝә дьһа ԛәԝи кьн у дьһа зедә итʹбарийа хԝә Йаһоԝа биньн. Ле сәбьр кʹарәкә дьн жи тинә.

13-14. Чь дьԛәԝьмә гава әм сәбьр дькьн у әԝ йәк ча сәр гӧмана мә һʹӧкӧм дькә? (Рʹомайи 5:4)

¹³ Бьхунә Рʹомайи 5:4. Паԝлос гот кӧ сәбьр «ԛәбулкьрьна Хԝәде, ДТʹ» пешда тинә. Демәк, гава баԝәрийа мә те щерʹьбандьне у әм амьн дьминьн, әм ԛәбулкьрьна Йаһоԝа ԛазанщ дькьн. Әв йәк найе һʹәсабе, кӧ Йаһоԝа ша дьбә чахе әм рʹасти тәнгасийа тен. Дәԝсе, гава Йаһоԝа дьвинә кӧ әм тәйах дькьн, әԝ мәрʹа фьрнаԛ дьбә. Рʹасти жи әв йәк кʹәрәмәкә гәләк мәзьн ә! (Зәбур 5:12)

¹⁴ Бьраһим жи бь амьни тәнгасийада сәбьр дькьр у дьле Йаһоԝа ша дькьр. Йаһоԝа әԝ ча досте Хԝә у мәрьвәки рʹаст һʹәсаб дькьр (Дәстпебун 15:6; Рʹомайи 4:13, 22). Йаһоԝа мә жи ӧса һʹәсаб дькә. Әԝ мә ԛәбул дькә, нә жь бо ве йәке, кӧ әм чь шьхӧли дькьн, йан чь щабдарийед мә һәнә, ле әв йәк амьнийа мәва гьредайи йә. Фьрԛи тʹӧнә әм чәнд сали нә, чь һʹалида ньн, йан жи чь  фәрәсәтед мә һәнә, әм дькарьн сәбьр кьн. Гәло ньһа тӧ бь амьни тәнгасийада тәйах дьки? Һәрге әре, бир нәкә кӧ Хԝәде жь тә рʹази йә. Гава әм дьвиньн кӧ Хԝәде жь мә рʹази йә, әв йәк гӧмана мә дьһа ԛәԝи дькә.

15. Паԝлос бәʹса кʹижан фькьра дьн кьр, у һьнә мәрьв чьрʹа әʹщебмайи дьминьн?

¹⁵ Чаԝа кӧ Паԝлос шьровәкьр, гава әм һьмбәри тәнгасийед хԝә сәбьр дькьн, Йаһоԝа жь мә рʹази дьбә. Паԝлос ӧса дьбежә: «Сәбьр жи ԛәбулкьрьна Хԝәде, ԛәбулкьрьна Хԝәде жи гӧмане, ДТʹ» пешда тинә. «У гӧман жи мә рʹурʹәш накә», демәк ԝе бе сери у пʹучʹ дәрнәкʹәвә (Рʹомайи 5:4, 5). Гәло һьнә мәрьв чьрʹа жь ве фькьре әʹщебмайи дьминьн? Пешийа ԝан гьлийа, Паԝлос Рʹомайи 5:2-да готьбу, кӧ гӧмана Мәсиһийед Рʹоме ида һәбу. Ләма жи дьбәкә һьнә мәрьв пьрсәкә ӧса бьдьн: «Һәрге гӧмана ԝан Мәсиһийа ида һәбу, чьрʹа Паԝлос диса бәʹса ве йәке кьр?»

16. Һевийа мәрьв чаԝа дькарә гав бь гав ԛәԝи бә? (Бьньһерʹә ӧса жи шькьл.)

¹⁶ Сәва кӧ әм фәʹм бькьн Паԝлос чь дьхԝәст бьгота, әм гәрәке бир нәкьн, ԝәки һеви дькарә һеди-һеди мәзьн бә. Мәсәлә, гава тә щара пешьн бьһист, кӧ Кʹьтеба Пироз дәрһәԛа һевийа жийина һʹәта-һʹәтайе чь дьбежә, тӧ чь фькьрийи? Дьԛәԝьмә тә дьгот кӧ әв гьлийед чьԛас хԝәш ьн, ле наԛәԝьмә әԝ бенә сери. Ле чахе тӧ дәрһәԛа Йаһоԝа у созед Кʹьтеба Пироз дьһа зедә пеһʹәсийайи, тӧ баԝәр буйи кӧ әв һеви ԝе бе сери.

17. Паши сонда тʹәсмилбуйине у ньхӧмандьне, һевийа мә чаԝа гав бь гав ԛәԝи буйә?

¹⁷ Паши сонда тʹәсмилбуйине у ньхӧмандьне, мә Йаһоԝа дьһа баш нас кьр у һе зедә Ԝи һʹәз кьр. Паши ве йәке, гӧмана мә дьһа ԛәԝи бу (Ибрани  5:13–6:1). Мә әʹмьре хԝәда дитийә кӧ готьнед жь Рʹомайи 5:2-4 чьԛас ԛәԝи нә. Әм рʹасти гәләк тәнгасийа һатьнә, ле мә сәбьр кьрийә у дитийә, кӧ Хԝәде жь мә рʹази йә. Хԝәде мә һʹәз дькә, ләма жи әм һе зедә баԝәр дькьн ԝәки созед ԝи ԝе бенә сери. Гӧмана мә гав бь гав ԛәԝи дьбә у дьһа реали дьбә. Гӧмана мә һе зедә һʹӧкӧм дькә сәр сафикьрьнед мә, һәләԛәтийа мә тʹәви малбәте у сәр ве йәке, кӧ әм ча ԝәʹде хԝә хәрщ дькьн.

18. Йаһоԝа чь соз дайә мә?

¹⁸ Паԝлосе шанди достед Хԝәдерʹа ньвиси, кӧ һевийа ԝан ԝе бе сери. Әм ве йәке жь кӧ заньн? Паԝлос әв йәк жь бина бәр Хԝәде Мәсиһийарʹа ньвиси: «Гӧман жи мә рʹурʹәш накә, чьмки һʹьзкьрьна Хԝәде сәр мәда бь ԝи Рʹӧһʹе Пироз барийә, йе кӧ мәрʹа һатийә дайине» (Рʹомайи 5:5). Бе шьк, әм дькарьн баԝәрийа хԝә һевийа кӧ Хԝәде дайә мә биньн.

19. Әм чьрʹа дькарьн баԝәр бьн, кӧ гӧмана мә ԝе бе сери?

¹⁹ Йаһоԝа жь Бьраһим рʹази бу у ча досте хԝә һʹәсаб дькьр у жерʹа созәки хԝәш дабу. Һевийа Бьраһим пʹучʹ дәрнәкʹәт. Кʹьтеба Пирозда те готьне: «Бьраһим бь думька дьреж гьһиштә созе Хԝәде» (Ибрани 6:15; 11:9, 18; Рʹомайи 4:20-22). Гӧмана Бьраһим һатә хәлаткьрьне. Һәрге әм гӧмана хԝә ӧнда нәкьн у амьн бьминьн әме жи бенә хәлаткьрьне! Гӧмана мә реали йә, әв мәрʹа шабуне тинә у ԝе әʹсәйи бе сери (Рʹомайи 12:12). Паԝлос ӧса ньвиси: «Бьра Хԝәдейе гӧмане дьле ԝә бь шабуне у әʹдьлайийева бькʹьмкʹьминә, бона ԝе баԝәрийа ԝә, ԝәки гӧмана ԝә бь ԛәԝата Рʹӧһʹе Пироз зедә бә» (Рʹомайи 15:13).