БЕ ШЬК әм ԛимәт дькьн һәр пʹешкʹеша кӧ Йаһоԝа дайә мә, мәсәлә азайа бьжартьне. Ль гора Кʹьтеба Пироз шәрав жи пʹешкʹешәкә жь Хԝәде йә. Хәбәра Хԝәде ӧса дьбежә: «Зийафәт [нан] жь бо кʹәнине те чекьрьн, шәрав шайе дьдә жийине» (Ԝаиз 10:19, ИМ; Зәбур 104:15). Дьԛәԝьмә тә дитийә кӧ проблема һьнә мәрьва ве йәкеда нә, кӧ әԝана зәʹф ичке вәдьхԝьн. Ӧса жи сәр тʹәмамийа дьнйайе ньһерʹандьна мәрьва дәрһәԛа ичкәвәхԝарьне щурʹә-щурʹә йә. Гәло әм чаԝа дькарьн дәрһәԛа вәхԝарьна ичке сафикьрьнед билани бькьн?

Фьрԛи тʹӧнә әм кʹидәре дьжин, йан кʹижан културеда мәзьн бунә, ширәтед Хԝәде тʹьме бона кʹара мә нә. Һәрге әм гӧһ бьдьнә рʹебәрийа Хԝәде, әме сафикьрьнед билани бькьн у бәхтәԝар бьн.

Әм дьвиньн кӧ иро һʹәчʹи зәʹф мәрьв зедә ичкә вәдьхԝьн, һьнә кәс бона кʹефа дьле хԝә ичке вәдьхԝьн у һьнә кәс жи сәва кӧ хәм у дәрдед хԝә бир кьн. У һьнә щийада жи вәхԝарьна зедә нишана мерхасийе йә.

Хԝәдайе мәйи дьлован дәрһәԛа ве йәке рʹебәрийа билан дайә хьзмәткʹаред хԝә. Мәсәлә, әԝи ширәт дайә мә кӧ әм чаԝа дькарьн хԝә жь ахьрийа хьраб, кӧ жь бо вәхԝарьна зедә пешда те, хԝәй кьн. Мәтʹәлок 23:29-35 бәʹса һʹале кәсәки сәрхԝәш у ахьрийа вәхԝарьна зедә дькә. a Рʹуспики бь наве Данийел, йе кӧ Әԝропайеда дьжи, гьли дькә ԝәки пешийа кӧ әԝ бьбуйа Шәʹде Йаһоԝа, жийина ԝи чаԝа бу. Әԝ ӧса дьбежә: «Мьн гәләк ичкә вәдьхԝар, ләма жи мьн сафикьрьнед нәбаш дькьр у гәләк бәла ани сәре хԝә. Гава әз ԝан рʹожед хьраб тиньм бира хԝә, әз хәмгин дьбьм».

Гәло әм чаԝа дькарьн һьндава вәхԝарьна ичке сафикьрьнед аԛьлайи бькьн у хԝә жь ԝан проблема хԝәй кьн, кʹижан кӧ вәхԝарьна зедә пешда тинә? Әм гәрәке бьһельн кӧ ньһерʹандьна Хԝәде сәр фькьр у кьред мә һʹӧкӧм бькә.

Ԝәрә әм бьньһерʹьн кӧ Кʹьтеба Пироз дәрһәԛа вәхԝарьна ичке чь дьбежә, у кӧ чьрʹа һьнә мәрьв ичке вәдьхԝьн.

Хәбәра Хԝәде ԛәдәхә накә вәхԝарьна ичкейә бь маԛули. Кʹьтеба Пироз дьбежә, кӧ вәхԝарьна шәраве дькарә дьле мәрьва ша бькә. Кʹьтеба Пироз ӧса дьбежә: «Тӧ һәрʹә бь шайи нане хԝә бьхԝә у бь дьлгәши шәрава хԝә вәхԝә» (Ԝаиз 9:7, ИМ). Иса Мәсиһ у һьнә хьзмәткʹаред Йаһоԝайә дьн жи щарна шәрав вәдьхԝарьн (Мәтта 26:27-29; Луԛа 7:34; 1 Тимотʹейо 5:23).

Хәбәра Хԝәде әшкәрә дькә кӧ ортʹа вәхԝарьна маԛули у сәрхԝәшбуне фьрԛийа мәзьн һәйә. Әԝ ӧса дьбежә: «Бь шәраве сәрхԝәш нәбьн» (Әфәси 5:18). Хенщи ԝе йәке, әԝ дьбежә кӧ кәсе «сәрхԝәш . . . Пʹадшатийа Хԝәде ԝе ԝар нәбә» (1 Корьнтʹи 6:10). Бәле, Йаһоԝа вәхԝарьна зедә у сәрхԝәшбуне нәфрʹәт дькә. Дәԝса кӧ әм хԝә ль култура хԝә бьгьрьн, әм дьхԝазьн хԝә ль ширәтед Хԝәде бьгьрьн, кӧ әԝи дайә мә.

Һьнә кәс дьбежьн, ԝәки әԝана дькарьн гәләк ичке вәхԝьн у сәрхԝәш нәбьн. Ле әв фькьр гәләк хоф ә, чьмки Ньвисаред Пирозда те готьне, ԝәки Кәсед кӧ ичкева тенә гьредане, дькарьн шашийед мәзьн бькьн у  мьԛабьли Йаһоԝа гӧнед гьран бькьн (Тито 2:3; Мәтʹәлок 20:1). Иса Мәсиһ готьбу кӧ һәрге әм зедә вәхԝьн, әме нькарьбьн дәрбази дьнйа тʹәзә бьн (Луԛа 21:34-36). Гәло чь дькарә али мә бькә кӧ әм ичкева нәйенә гьредане?

Һәрге әм тʹәне ль гора култура хԝә дәрһәԛа вәхԝарьна ичке бьфькьрьн, дьԛәԝьмә әм зьраре бьдьнә хԝә. Әм дьхԝазьн кӧ Йаһоԝа пьрса хԝарьн у вәхԝарьнеда жь мә рʹази бә. Кʹьтеба Пироз ве ширәте дьдә мә: «Аԝа һәрге һун бьхԝьн, вәхԝьн, йан чь шьхӧли кӧ һун бькьн, һәр тьшти бона шькьрдайина Хԝәде бькьн» (1 Корьнтʹи 10:31). Ԝәрә әм дәрһәԛа һьнә пьрса у принсипед Кʹьтеба Пироз бьфькьрьн:

Гәло әз дьхԝазьм тʹәне кәсед дьн хԝәш бем? Кʹьтеба Пироз дьбежә кӧ әм гәрәке пәй «пʹьрʹанийева» нәчьн (Дәркʹәтьн 23:2). Йаһоԝа Исраелийарʹа гот кӧ әԝана гәрәке пәй ԝан мәрийа нәчьн, йед кӧ ширәтед ԝи һьлнадьн һʹәсаб. Әм жи гәрәке гӧһ бьдьнә ве ширәте. Һәрге пьрса ичкәвәхԝарьнеда әм бькʹәвьнә бәр байе фькьред кәсед дьн, дьԛәԝьмә әм жь ԛанун у принсипед Йаһоԝа дур кʹәвьн (Рʹомайи 12:2).

Гәло әз дьхԝазьм ԛәԝата хԝә нишан кьм? Һьнә културада, вәхԝарьна зедә тьштәки нормал ә (1 Пәтрус 4:3). Ле дина хԝә бьде кӧ 1 Корьнтʹи 16:13 мә бәрбь чь һелан дькә: «Һʹьшйар бьминьн, баԝәрийеда һʹимгьрти бьн, әʹгит бьн, бьшьдьн». Гәло ичкә бь рʹасти һʹьш у дьле мә дьһа ԛәԝи дькә? На! Ичкә дькарә һʹьш у аԛьле мә тʹәвльһәв бькә у бьбә сәбәбе сафикьрьнед нәбаш. Бь рʹасти вәхԝарьна зедә нишана ԛәԝате нинә, ле нишана сьстбуне йә. Мәсәлә, Ишайа 28:7 бәʹса кәсәки дькә, йе кӧ жь бо вәхԝарьна ичке анщах рʹе дьчә у дьлькʹӧмә.

Ԛәԝата рʹаст жь Йаһоԝа те. Сәва кӧ әԝ ве ԛәԝате бьдә мә, гәрәке әм һʹьшйар бьминьн у баԝәрийеда ԛәԝи бьн (Зәбур 18:32). Әм гәрәке хԝә хԝәй кьн жь тʹәлька у һәр тьштед хьраб, йед кӧ дькарьн зийане бьдьнә достийа мә тʹәви Йаһоԝа. Иса Мәсиһ мәсәләкә гәләк баш мәрʹа һиштийә. Гава әԝ сәр әʹрде бу, әԝи бь мерхаси  тьштед рʹаст дькьр. Жь бо ве йәке, гәләк мәрьва ԛәдьре ԝи дьгьртьн.

Гәло әз вәдьхԝьм ԝәки хәм у дәрдед хԝә бир кьм? Зәбурбежәки Йаһоԝарʹа гот: «Дәма дәрд-кӧл дьле мьнда зедә дьбьн, барьстанийед Тә нәфса мьн ша дькьн» (Зәбур 94:19). Гава дьле тә тәнг дьбә, хԝә бьсперә Йаһоԝа, нә кӧ ичке. Сәва кӧ дьле тә рʹьһʹәт бә, гәләк щар Йаһоԝарʹа дӧа бькә у дьле хԝә ԝирʹа вәкә. Ӧса жи ԝе баш бә, кӧ тӧ жь хушк-бьред гьһишти ширәте бьхԝази, чаԝа кӧ гәләк дькьн у кʹаре дьстиньн. Бир нәкә: Гава мәрьв жь бо дәрде хԝә вәдьхԝә, әв йәк дькарә хԝәстьна ԝи сьст кә, ԝәки тьштед рʹаст бькә. Ахьрийеда, дьбәкә әԝ бенамусийе йан жи тьштәки нәбаш бькә (Һосәйа 4:11). Данийел, бәʹса кʹижани мә жоре кьрьбу, ве йәке тинә сәр хԝә: «Әз дьлтәнг бьбум у мьн хԝә сущдар дькьр. Сәва кӧ әз хәмед хԝә бир кьм, гәләк щар әз пәй ичке дькʹәтьм. Ле проблемед мьн дьһа зедә дьбун. Мьн һәвалед хԝә ӧнда кьр у хԝә беԛимәт һʹәсаб дькьр». Гәло чь али Данийел кьр? Әԝ дьбежә: «Мьн фәʹм кьр кӧ әз һʹәԝще Йаһоԝа мә, нә кӧ ичке. Бь аликʹарийа Хԝәде, мьн карьбу бәр проблем у дәрдед хԝә тәйах кьм». Һʹале мә чьԛас бечʹарә бе кʹьфше жи, Йаһоԝа һәртʹьм ԝе дәсте хԝә дьрежи мә дькә (Филипи 4:6, 7; 1 Пәтрус 5:7).

Һәрге тӧ щара ичке вәдьхԝи, сәр ван пьрса бьфькьрә: «Гәло нәфәрәки малбәта мьн, йан һәваләки мьн бәр хԝә дькʹәвә, кӧ әз чьԛас вәдьхԝьм?» Һәрге ӧса йә, дьԛәԝьмә тӧ нә жи һаш пе һәйи, ԝәки хәйсәтәки ӧса нав тәда пешда те. «Гәло әз ньһа һе зедә вәдьхԝьм, нә кӧ бәре?» Һәрге ӧса йә, дьԛәԝьмә тӧ ида һеди-һеди ичкева тейи гьредане. «Гәло бона мьн чәтьн ә, ԝәки әз чәнд рʹожа йан ԝәхтәкә дьреж бейи ичке дәрбаз кьм?» Һәрге ӧса йә, дьбәкә тӧ ида вәхԝарьна ичкева һати гьредане. Ви һʹалида дьбәкә аликʹарийа дохдьра жи тәрʹа лазьм бә.

Вәхԝарьна ичке дькарә бьбә сәбәбе гәләк кӧл-дәрда, ләма жи һьнә хьзмәткʹаред  Хԝәде ԛә вәнахԝьн. Һьнә кәс жи тәʹма ичке һʹәз накьн. Һәрге кәсәк нәхԝазә ичке вәхԝә, ԛәдьре сафикьрьна ԝи бьгьрә.

Дьбәкә тӧйе бьхԝази хԝәрʹа синора дайни. Пешда сафи кә кӧ тӧ дьхԝази чьԛас у чәнд щара вәхԝи. Йан жи бьфькьрә кӧ тӧ дьхԝази кʹәнге вәхԝи, мәсәлә һʹәфте щарәке йан жи һьнәки ԝәʹде хԝарьне. Кәсед дьн хԝәрʹа сафи кьрьнә, кӧ кʹижан ичке вәхԝьн у кʹижане на. Мәсәлә, әԝана шәрав йан бирәйе вәдьхԝьн, ле ичкед сәрт вәнахԝьн. Сәва ԝи кәси, йе кӧ бона вәхԝарьне хԝәрʹа синор данийә, дьһа һеса йә ичкәвәхԝарьнеда хԝә контрол кә. Мәсиһийе гьһишти бәр хԝә накʹәвә дәрһәԛа ве йәке, кӧ мәрьвед дьн чь дьфькьрьн бона синоред вәхԝарьне, кӧ әԝи хԝәрʹа данийә.

Гава әм сафикьрьнәке дькьн, әм гәрәке бьфькьрьн кӧ кәсед дьн ве йәке ԝе чаԝа ԛәбул кьн. Рʹомайи 14:21 дьбежә: «Ԛәнщ ә нә гошт бьхԝи, нә шәраве вәхԝи у нә жи тьштәки ӧса бьки, кӧ бьре тә бькʹәвә». Тӧ чаԝа дькари ве ширәте бини сери? Һʹәзкьрьне нишан кә. Мәсәлә, һәрге тӧ бьвини кӧ кәсәк жь вәхԝарьна ичке әʹщьз дьбә, ԝе баш бә кӧ тӧ бәр ԝи вәнәхԝи. Бь ви щурʹәйи, тӧйе нишан ки кӧ тӧ ԛәдьре һәстед ԝи дьгьри у накʹәви һʹәйра хԝә (1 Корьнтʹи 10:24).

Ӧса жи әм гәрәке гӧһ бьдьнә ԛанунед дәԝләте дәрһәԛа ичке. Ль гора ван ԛануна, дьԛәԝьмә бона вәхԝарьна ичке сәва щаһьла синор һатьнә данине, йан жи дьԛәԝьмә ԛәдәхә йә кӧ мәрьв ичке вәхԝә чахе әʹрәбе дажо йан жи мәкʹинәке дьдә хәбате (Рʹомайи 13:1-5).

Йаһоԝа гәләк пʹешкʹешед баш мәрʹа дайә. Йәк жь ԝан азайа бьжартьне йә. Әм хԝәха дькарьн сафи кьн, кӧ әм чь бьхԝьн у чь вәхԝьн. Ле әм жь дьл дьхԝазьн бь сафикьрьнед хԝә нишан кьн, ԝәки әм ԛимәт дькьн ве азайа кӧ Йаһоԝа дайә мә. Бәле, әм дьхԝазьн дьле Баве хԝәйи әʹзмана ша кьн.