1. Мәләкәк чь дьбежә у әв йәк бона мә чь те һʹәсабе?

 ҺӘРГЕ мәләкәк тәрʹа хәбәр да, тәйе гӧһ бьда ԝи? Иро, мәләкәк дьбежә «һʹәму мьләта, бәрәка, зьмана у щьмәʹта»: «Жь Хԝәде бьтьрсьн у шькьрийе бьдьнә ԝи, . . . Сәре хԝә бәр ԝи дайньн, йе кӧ әʹрд у әʹзман, . . . әʹфьрандьнә» (Әʹйанти 14:6, 7). Йаһоԝа Хԝәдайе рʹаст ә, у тʹәне әԝ һежайи һʹәбандьне йә. Әԝи мәщал дайә кӧ әм пʹарьстгәһа рʹӧһʹанида ԝирʹа хьзмәт бькьн. Әв йәк бона мә ԛәдьрәки гәләк мәзьн ә!

2. Пʹарьстгәһа рʹӧһʹани чь йә? (Бьньһерʹә ӧса жи чаргошә « Пʹарьстгәһа Рʹӧһʹани Чь Найе Һʹәсабе».)

² Гәло пʹарьстгәһа рʹӧһʹани чь йә у әм жь кʹидәре дькарьн һур бь һур дәрһәԛа ве йәке пебьһʹәсьн? Пʹарьстгәһа рʹӧһʹани авайикә реали нинә. Ле әԝ һәйә сазкьрьнәкә ӧса, бь сайа кʹижани кӧ Йаһоԝа һʹәбандьна хьзмәткʹаред хԝә, сәр һʹиме ԛӧрбана Иса Мәсиһ ԛәбул дькә. Ԛьрʹна йәкеда, Паԝлосе шанди хьзмәткʹаред Хԝәде йед Ибранирʹа нәʹмә ньвиси у дәрһәԛа пʹарьстгәһа рʹӧһʹани зәлал кьр. b

3-4. Паԝлосе шанди чьрʹа бона Мәсиһийед Ибрани, йед кӧ Щьһустанеда дьман, бәр хԝә дькʹәт у әԝи чь щурʹә али ԝан дькьр?

³ Гәло чьрʹа Паԝлос әв нәʹмә Мәсиһийед Ибранирʹа ньвиси, йед кӧ Щьһустанеда дьман? Дьԛәԝьмә жь бо ван дӧ мәʹнийед сәрәкә. Йа пешьн, әԝи дьхԝәст ԝана һелан кә, чьмки гәләк жь ԝан ль гора дин у баԝәрийа Щьһу мәзьн бьбун. Дьбәкә сәрԝеред религи ԛәрфед хԝә  ԝана дькьрьн кӧ әԝана бьбунә шагьртед Иса Мәсиһ. Гәло чьрʹа? Чьмки нә пʹарьстгәһа ԝан, нә ԛӧрбангәһа ԝан у нә жи кʹаһин һәбун ԝәки ԝедәре хьзмәт кьн. Әв йәк дькарьбу Мәсиһийа дьлтәнг кьра у баԝәрийа ԝан сьст кьра (Ибрани 2:1; 3:12, 14). Һьнә жь ԝан дьԛәԝьмә дьфькьрин, ԝәки вәгәрʹьн нава дине Щьһуйа.

⁴ Йа дӧда, Паԝлосе шанди ԝан хьзмәткʹаред Хԝәде йед Ибранирʹа гот, ԝәки әԝана хирәт накьн кӧ «хԝарьна гьран» бьстиньн, демәк рʹастийед тʹәзә, йан жи йед кʹур фәʹм бькьн (Ибрани 5:11-14). Ӧса дьһатә кʹьфше, ԝәки һьнәк жь ԝан һе пәй Ԛануна Муса дьчун. Ле Паԝлос ԝанрʹа шьровәкьр, ԝәки ԛӧрбанед ль гора Ԛануне, нькарьн гӧнед ԝан бь тʹәмами бьдьнә һьлдане. Ләма жи, һʹӧкӧме ве Ԛануне «һатә бәталкьрьне». Паше, Паԝлос чәнд рʹастийед кʹур ԝана һин кьр. Әԝи ани бира ԝан, ԝәки Хԝәде «гӧманәкә һе ԛәнщ» дайә ԝан, демәк ԝана дькарьбу сәр һʹиме ԛӧрбанкьрьна Иса Мәсиһ бь рʹасти «незики Хԝәде» бьн (Ибрани 7:18, 19).

5. Сәва кӧ әм гьлийед жь кʹьтеба Ибрани фәʹм бькьн, әм гәрәке чь бькьн?

⁵ Паԝлос Мәсиһийед Ибранирʹа зәлал кьр, кӧ чьрʹа һʹәбандьна ԝанә Мәсиһити жь һʹәбандьна ԝанә бәре четьр бу. Һʹәбандьна дине Щьһуйа ль гора Ԛануне, тʹәне «сийа ԝан тьшта нә, йед кӧ ԝе бен, ле рʹасти Мәсиһ ә» (Колоси 2:17). Си тьштәки реали нинә, әв тʹәне форма тьшта дьдә кʹьфше. Һәма бь ԝи щурʹәйи һʹәбандьна Щьһуйа тʹәне сийа һʹәбандьна рʹаст бу. Сәва кӧ Хԝәде һʹәбандьна мә ԛәбул кә, әм гәрәке фәʹм бькьн, кӧ әԝ сәр һʹиме чь гӧнед мә дьбахшинә. Әме ньһа бәрамбәри һәв кьн «сийа ԝан тьшта» (демәк һʹәбандьна хьзмәткʹаред Йаһоԝайә бәре) у «рʹасти», (демәк һʹәбандьна хьзмәткʹаред Йаһоԝайә иро). Ӧса әме дьһа баш фәʹм бькьн, кӧ пʹарьстгәһа рʹӧһʹани чь йә у әв сәва мә чь те һʹәсабе.

6. Коне пироз ча дьһатә хәбьтандьне?

⁶ Щурʹе һʹәбандьна бәре. Паԝлос дәрһәԛа ве коне пироз хәбәр дьда, йа кӧ сала 1512 Б.Д.-да, Муса саз  кьрьбу (Бьньһерʹә диаграма «Һʹәбандьна Хьзмәткʹаред Йаһоԝайә Бәре у Һʹәбандьна Хьзмәткʹаред Йаһоԝайә Иро»). Гава Исраели жь щики дәрбази щики дьн дьбун, ԝана коне пироз тʹәви хԝә дьбьр. Һʹәта кӧ Оршәлимеда пʹарьстгәһ бьһата авакьрьне, коне пироз ԝәкә 500 сали һатә хәбьтандьне (Дәркʹәтьн 25:8, 9; Жьмар 9:22). Әв «Коне Щьвине» бона Исраелийа щийе сәрәкә бу, кʹидәре кӧ Йаһоԝа Хԝәде дьһʹәбандьн. Ԝедәре, ԝана ԛӧрбан дьанин (Дәркʹәтьн 29:43-46). Ле коне пироз ӧса жи тьштәк дьһа мәзьн дьһатә һʹәсабе.

7. Пʹарьстгәһа рʹӧһʹани кʹәнге әʹйан бу?

⁷ Щурʹе һʹәбандьна иро. Ԝәʹде бәре, коне пироз «си у сурәте» тьштед әʹзмани бу у дьда кʹьфше пʹарьстгәһа рʹӧһʹанийә гьринг. Паԝлос гот, ԝәки коне пироз «сурәтәк ә бона зәмане ньһа» (Ибрани 8:5; 9:9). Чахе әԝи нәʹмә Ибранийарʹа ньвиси, пʹарьстгәһа рʹӧһʹани сала 29 Д.М.-да ида һатьбу авакьрьне. Ԝе сале, Иса Мәсиһ һатә ньхӧмандьне, бь рʹӧһʹе пироз һатә бьжартьне, у пʹарьстгәһа рʹӧһʹанида чаԝа Кʹаһине Мәзьн һатә кʹьфшкьрьне c (Ибрани 4:14; Кʹаред Шандийа 10:37, 38).

8-9. Ль гора Ибрани 7:23-27, ортʹа кʹаһинед мәзьн Исраеледа у Кʹаһине Мәзьн, Иса Мәсиһда чь фьрԛи һәйә?

⁸ Щурʹе һʹәбандьна бәре. Кʹаһине Мәзьн ль бәр Хԝәде ортʹәчийе щьмәʹта Исраеле бу. Гава коне пироз һатә тʹәсмилкьрьне, Йаһоԝа Һарун ча кʹаһине мәзьнә пешьн кʹьфш кьр. Ле чаԝа кӧ Паԝлос зәлал кьр, кʹаһин тʹьме дьһатьнә гӧһастьне «чьмки мьрьне нәһьштийә кӧ әԝана тʹьме бьмана» d (Бьхунә Ибрани 7:23-27). Әԝ кʹаһинед мәзьн мәрьвнә ԛьсурдар бун, ләма жи һʹәԝщә бу ԝәки ԝана бона гӧнед хԝә ԛӧрбан банийана. Ортʹа кʹаһинед мәзьн йед Исраеле у Кʹаһине Мәзьн Иса Мәсиһда, фьрԛикә мәзьн һәбу.

⁹ Щурʹе һʹәбандьна иро. Иса Мәсиһ чаԝа Кʹаһине мәйә Мәзьн, «коне рʹастда» хьзмәт дькә, кʹижан кӧ Йаһоԝа саз кьрийә, «нә кӧ мәрьва» (Ибрани 8:1, 2). Паԝлос ӧса шьровәкьр: «Кʹаһинтийа [Иса] хьлаз набә, чьмки әԝ һʹәта-һʹәтайе дьминә». Әԝи гот кӧ Иса Мәсиһ йәки «беԛӧсур, жь гӧнәкʹара щӧдәбуйи» йә. Ӧса жи әԝи гот, ԝәки «нә лазьм ә кӧ әԝ һәр рʹож . . . бона гӧнед хԝә» ԛӧрбана бьдә, чаԝа кӧ кʹаһинед мәзьн дькьрьн. Әме ньһа бәрамбәри һәв кьн фьрԛийа ортʹа ԛӧрбан у ԛӧрбангәһа хьзмәткʹаред Йаһоԝайә бәре у йа иро.

10. Ԛӧрбанед сәр ԛӧрбангәһе дина мәрьва дьданә сәр чь?

¹⁰ Щурʹе һʹәбандьна бәре. Бәр коне пироз ԛӧрбангәһәкә жь сьфьр һәбу. Сәр ве ԛӧрбангәһе, һʹәйԝан чаԝа ԛӧрбан Йаһоԝарʹа дьанин (Дәркʹәтьн 27:1, 2; 40:29). Ле бь сайа ван ԛӧрбана, гӧнед щьмәʹте бь тʹәмами нькарьбун бьһатана бахшандьне (Ибрани 10:1-4). Ԛӧрбанед кӧ тʹьме дьһатьнә дайине, әв ԛӧрбана тʹәк дьданә кʹьфше, йа кӧ ахьрийеда ԝе һʹәму мәрьв жь гӧна хьлаз кьра.

11. Иса сәр кʹижан ԛӧрбангәһе әʹмьре хԝә ча ԛӧрбан да? (Ибрани 10:5-7, 10)

¹¹ Щурʹе һʹәбандьна иро. Иса Мәсиһ заньбу кӧ Йаһоԝа әԝ шандә сәр әʹрде,  ԝәки әԝ әʹмьре хԝә ча ԛӧрбан бона һʹәму мәрьва бьдә (Мәтта 20:28). Бь ньхӧмандьна хԝә Иса нишан кьр, ԝәки әԝ һазьр ә хԝәстьна Йаһоԝа бинә сери (Йуһʹәнна 6:38; Галати 1:4). Ԛӧрбангәһа симболик, сәр кʹижане Иса әʹмьре хԝә чаԝа ԛӧрбан бәрва да, дьһатә һʹәсабе «хԝәстьна» Хԝәде. Хԝәстьна Йаһоԝа әԝ бу, ԝәки Иса әʹмьре хԝәйи беԛьсур бона мәрьва бәрва бьдә. Иса «щарәке бона һәр тʹьм бәдәна хԝә кьрә ԛӧрбан», ԝәки гӧне һәр кәсе кӧ баԝәрийа хԝә ԝи тинә, бе бахшандьне (Бьхунә Ибрани 10:5-7, 10). Ньһа әме дина хԝә бьдьнә сәр тьштед һьндӧрʹе коне пироз.

12. Изьна кʹе һәбу бькʹәвә одед коне пироз?

¹² Щурʹе һʹәбандьна бәре. Коне пироз у пʹарьстгәһед кӧ паше Оршәлимеда һатьнә авакьрьне, мина һәв бун. Һьндӧрʹда дӧ одә һәбун, «Щийе Пироз» у «Щийе Һәри Пироз», у ортʹа ԝанда пʹәрʹдәк һәбу (Ибрани 9:2-5; Дәркʹәтьн 26:31-33). Һьндӧрʹе Щийе Пирозда шәмдана зерʹин, ԛӧрбангәһа бона бьхуре у сьфрәкә бона нане ԛӧрбанкьри һәбу. Тʹәне изьна кʹаһинед бьжарти һәбу, кӧ бькʹәвьнә Щийе Пироз, ԝәки хьзмәтийа пироз биньн сери (Жьмар 3:3, 7, 10). Щийе Һәри Пирозда сьндоԛа пәймане һәбу, кӧ дьда кʹьфше ԝәки Йаһоԝа ԝедәре йә (Дәркʹәтьн 25:21, 22). Тʹәне изьна кʹаһине мәзьн һәбу, кӧ һәр сал Рʹожа Кʹәԝандьне пьшт пʹәрʹдева бькʹәвә Щийе Һәри Пироз (Ԛануна Кʹаһинтийе 16:2, 17). Ԝедәре әԝи сал бь сал хуна һʹәйԝанед ԛӧрбанкьри бона гӧнед  хԝә у йед щьмәʹте дьани. Паше, Йаһоԝа бь сайа рʹӧһʹе пироз зәлал кьр, кӧ әв һәр тьшт бь рʹасти чь те һʹәсабе (Ибрани 9:6-8). e

13. Щийе Пироз у Щийе Һәри Пироз, бона Мәсиһийа чь те һʹәсабе?

¹³ Щурʹе һʹәбандьна иро. Тʹәне 144 000 мәрьв, жь нава Мәсиһийа бь сайа рʹӧһʹе пироз һатьнә бьжартьне. Әԝана бона һәләԛәтийа хԝәйә мәхсус тʹәви Йаһоԝа, гәләк ша дьбьн, у әԝана ԝе сәр әʹзмана тʹәви Иса ча кʹаһин хьзмәт бькьн (Әʹйанти 1:6; 14:1). Коне пирозда, Щийе Пироз те һʹәсабе һʹале кӧрʹед Хԝәде йед бьжарти, һʹәта кӧ әԝана сәр әʹрде нә (Рʹомайи 8:15-17). Ле Щийе Һәри Пироз коне пирозда, те һʹәсабе әʹзманед кʹидәре кӧ Йаһоԝа дьминә. Пʹәрʹда кӧ Щийе Пироз жь Щийе Һәри Пироз вәдьԛәтанд, те һʹәсабе бәдәна Иса Мәсиһ. Һʹәта кӧ бәдәна ԝийә физики һәбуйа, әԝ нькарьбу дәрбази әʹзмана буйа у пʹарьстгәһа рʹӧһʹанида бьбуйа Кʹаһине Мәзьн. Чахе Иса бәдәна хԝә бона һʹәму мәрьва бәрва да, әԝи бона хьзмәткʹаред Хԝәдейә бьжарти рʹийа жийина сәр әʹзмана вәкьр. Сәва кӧ әԝана хәлата хԝәйә әʹзмана ԝар бьн, әԝана гәрәке бәдәна хԝәйә физики бьһельн (Ибрани 10:19, 20; 1 Корьнтʹи 15:50). Чахе Иса һатә сахкьрьне, паше әԝ пʹарьстгәһа рʹӧһʹанида дәрбази Щийе Һәри Пироз бу. Рʹожәке, һʹәму кәсед бьжарти ԝе һәрʹьн ԝедәре.

14. Ль гора Ибрани 9:12, 24-26, чьрʹа һʹәбандьна пʹарьстгәһа рʹӧһʹанида жь щурʹе һʹәбандьна бәре четьр ә?

¹⁴ Чаԝа мә дит, иро әм бь сайа ԛӧрбана Иса у бь сайа ве йәке кӧ әԝ Кʹаһине Мәзьн ә, дькарьн Йаһоԝа бьһʹәбиньн. Исраеледа кʹаһине мәзьн пе хуна ԛӧрбанед һʹәйԝана дькʹәтә Щийе Һәри Пироз, йе кӧ пе дәсте мәрьва һатьбу чекьрьне. Ле Иса «һәма хут кʹәтә әʹзмен», демәк щийе кӧ жь һʹәму щийед дьн пирозтьр ә, сәва кӧ бәр Йаһоԝа бьсәкьнә. Ԝедәре әԝи ԛимәта әʹмьре хԝәйә физики у беԛьсур, Хԝәдерʹа әʹйан кьр, у «пе хԝәԛӧрбанкьрьне» гӧне мә һьлда (Бьхунә Ибрани 9:12, 24-26). Ԛӧрбанбуна Иса ӧса ԛимәт ә, ԝәки әԝ дькарә мә бь тʹәмами жь гӧна паԛьж кә. Әме ньһа пебьһʹәсьн, кӧ әм гьшк жи дькарьн пʹарьстгәһа рʹӧһʹанида Йаһоԝарʹа хьзмәт кьн, фьрԛи тʹӧнә әме сәр әʹрде, йан сәр әʹзмана бьжин.

15. Кʹе һʹәԝша коне пирозда хьзмәт дькьр?

¹⁵ Щурʹе һʹәбандьна бәре. Һʹәԝшәкә коне пироз һәбу. Әԝ щики гәләк фьрә бу у дора ԝе суркьри бу. Ԝедәре кʹаһина щабдарийед хԝә дьанинә сери. Һʹәԝшеда ԛӧрбангәһәкә жь сьфьр һәбу. Сәр ве ԛӧрбангәһа мәзьн, ԛӧрбанед шәԝьтанди дьанин. Ӧса жи, пешийа кӧ кʹаһина хьзмәтийа хԝәйә пироз дәстпекьрана, ԝана һʹәԝза сьфьрда дәст-ньгед хԝә дьшуштьн (Дәркʹәтьн 30:17-20; 40:6-8). Пʹарьстгәһед кӧ паше һатьнә авакьрьне, һʹәԝша ԝанә дәрва жи һәбу. Ԝедәре кәсед кӧ нә кʹаһин бун жи, дькарьбун Хԝәдерʹа хьзмәт кьрана.

16. Кʹе һʹәԝшед пʹарьстгәһа рʹӧһʹанида хьзмәт дькә?

¹⁶ Щурʹе һʹәбандьна иро. Пешийа кӧ кәсед бьжарти һәрʹьн сәр әʹзмана у тʹәви Иса кʹаһинтийе бькьн, әԝана сәр әʹрде бь амьни һʹәԝша һьндӧрʹда йа пʹарьстгәһа рʹӧһʹанида хьзмәт дькьн. Һʹәԝза мәзьн, чаԝа ԝанрʹа ӧса жи хьзмәткʹаред Хԝәдейә дьнрʹа дьда кʹьфше, кӧ  әԝана гәрәке рʹӧһʹанида у нав-намусийеда хԝә тʹәмьз хԝәй кьн. Ле гәло ‹әʹлаләта мәзьн› кʹидәре бь амьни хьзмәт дькьн у пьштгьрийа бьред Мәсиһ дькьн? Йуһʹәннайе шанди дит, кӧ әԝана «ль бәр тʹәхт» сәкьни нә, демәк ль һʹәԝша дәрва. Ԝедәре, әԝана «шәв у рʹо» Хԝәдерʹа хьзмәт дькьн (Әʹйанти 7:9, 13-15). Әм гәләк дьшекьриньн кӧ Йаһоԝа мәщал дайә мә, ԝәки әм пʹарьстгәһа ԝийә рʹӧһʹанида жерʹа хьзмәт кьн!

17. Әм бона Йаһоԝа чь дькарьн бькьн?

¹⁷ Иро мә һʹәмуйарʹа ԛәдьр һатийә дайине, ԝәки ԝәхт, ԛәԝат у мәщалед хԝә бона Пʹадшатийа Хԝәде хәрщ кьн. Паԝлосе шанди ӧса ньвиси: «Тʹьме ԛӧрбана пәсьндайине бьдьнә Хԝәде, аԝа готи бәре зар-зьмане хԝә, йед кӧ наве ԝи иԛрар дькьн!» (Ибрани 13:15). Гава әм һәр тьшти дькьн, ԝәки Йаһоԝарʹа хьзмәте кьн, бь ве йәке әм жь алийе хԝәда йа лапә баш бона ԝи ԛӧрбан дькьн.

18. Ль гора Ибрани 10:22-25, әм гәрәке чь пьшт гӧһе хԝәва нәвежьн у чь бир нәкьн?

¹⁸ Бьхунә Ибрани 10:22-25. Паԝлосе шанди хьлазийа нәʹма хԝәйә Ибранийарʹа, дәрһәԛа чәнд тьшта ньвиси, йед кӧ әм гәрәке тʹӧ щар бир нәкьн у биньн сери. Мәсәлә, әм гәрәке һәртʹьм дӧа бькьн, кәсед дьнрʹа дәрһәԛа гӧмана хԝә бежьн, һәрʹьн щьвина, һәвдӧ һелан у ԛәԝи кьн, һʹәта кӧ Рʹожа Хԝәде бе. Хьлазийа кʹьтеба Әʹйанти, мәләке Йаһоԝа дӧ щара гот, ԝәки әм гәрәке Хԝәдерʹа хьзмәт кьн (Әʹйанти 19:10; 22:9). Ԝәрә әм ван рʹастийед кʹур дәрһәԛа пʹарьстгәһа рʹӧһʹани, ԛә бир нәкьн, у бьшекьриньн ԝәки мәщала мә һәйә Хԝәдейе Һьмзоррʹа хьзмәт кьн!