1-2. Йаһоԝа хьзмәткʹаред хԝә тʹәглифи кʹӧ дькә?

 ҺӘРГЕ кәсәк тә бьпьрсә, кӧ Йаһоԝа бона тә кʹе йә, гәло тӧйе ча щаба ԝи бьди? Дьбәкә тӧ бежи, кӧ Йаһоԝа Хԝәдайе тә, Дост у Баве тә йә. Бәле, бона мә Йаһоԝа бь рʹасти жи йәки ӧса нә. Ле тӧ ԛә фькьри йи, ԝәки тӧ меване ԝийи дәлал и?

² Даԝьд Пʹадша достийа ортʹа Йаһоԝа у хьзмәткʹаред ԝи, бәрамбәри хԝәйе мале у меване ԝи кьр. Даԝьд ӧса ньвиси: «Хӧдано! Кʹи дькарә Коне Тәда бьминә? Кʹи ԝе сәре чʹийайе Тәйи пироз бьһеԝьрә?» (Зәбур 15:1). Жь ван гьлийед жь бина бәр Хԝәде әм педьһʹәсьн, ԝәки әм дькарьн бьбьн меван у достед Ԝи. Әв тʹәглифкьрьна Йаһоԝа тьштәки гәләк мәхсус ә!

ЙАҺОԜА ДЬХԜАЗӘ КӦ ӘМ БЬБЬН МЕВАНЕД ԜИ

3. Меване Йаһоԝайә пешьн кʹе бу, у һәләԛәтийа ԝан чаԝа бу?

³ Пешийа кӧ Йаһоԝа һәр тьшт бьәʹфьранда, әԝ тʹәне бу. Пешийе әԝи Кӧрʹе хԝә кьрә меване коне хԝәйи симболик. Кʹьтеба Пироз дьбежә, ԝәки Йаһоԝа меване хԝәйи пешьн гәләк һʹәз дькьр. Кӧрʹе ԝи жи һәртʹьм ль бәр Ԝи ша дьбу (Мәтʹәлок 8:30).

4. Паше Йаһоԝа кʹе тʹәглифи коне хԝә кьр?

⁴ Паше Йаһоԝа мәләкед дьн әʹфьрандьн, у әԝана жи бунә меванед ԝи. Кʹьтеба Пироз ԝана нав дькә «лаԝед Хԝәде» у дьбежә, ԝәки әԝана ша нә, кӧ щәм Йаһоԝа нә (Ибо 38:7; Данийел 7:10). Ԝәʹдәки тʹәне мәләк меванед коне Йаһоԝа бун. Паше жи Йаһоԝа инсан әʹфьрандьн у изьн да, ԝәки әԝана жи бькʹәвьнә  коне ԝи. Мәсәлә, нав ԝанда Һәнох, Нӧһ, Бьраһим у Ибо бун. Әԝана достед Хԝәде бун у «рʹийа Хԝәдеда» дьмәшийан (Дәстпебун 5:24; 6:9; Ибо 29:4; Ишайа 41:8).

5. Кʹьтеба Һәзәԛел 37:26, 27 чь нишани мә дькә?

⁵ Ида гәләк ԛьрʹнә йә, кӧ Йаһоԝа Хԝәде достед хԝә тʹәглиф дькә, ԝәки әԝана бьбьнә меванед ԝи (Бьхунә Һәзәԛел 37:26, 27). Мәсәлә, кʹьтеба Һәзәԛел нишани мә дькә, ԝәки Хԝәде бь рʹасти жи дьхԝазә, кӧ хьзмәткʹаред ԝийи амьн незики ԝи бьн. Әԝи соз дайә, ԝәки ԝе тʹәви ԝан пәймана әʹдьлайе гьредә. Жь ван гьлийа те фәʹмкьрьне, ԝәки рʹожәке һʹәму хьзмәткʹаред Йаһоԝа ԝе коне ԝийә симболикда бьбьнә «кәрик», һьм йед кӧ ԝе ль әʹзмана бьжин, һьм жи йед кӧ ԝе сәр әʹрде бьжин (Йуһʹәнна 10:16). Бәле, әв рʹож ида һатийә!

ӘМ КʹӦДӘРЕ БЬН ЖИ, ЙАҺОԜА МӘ ДЬБӘ ХԜӘЙИ

6. Мәрьв ча дькарә бьбә меване коне Йаһоԝа у әв кон кʹидәре йә?

⁶ Ԝәʹде бәре, мәрьв конада һеса дьбун у хԝә жь тәʹв у баране хԝәй дькьрьн. Мәрьва меванед кӧ дьһатьнә конед ԝан, гәләк ԛимәт дькьрьн. Гава әм әʹмьре хԝә тʹәсмил Йаһоԝа дькьн у соз дьдьн, кӧ әме хԝәстьна ԝи биньн сери, әм дьбьнә меване коне ԝи (Зәбур 61:4). Бал мә тʹер-тʹьжә хԝарьна рʹӧһʹани һәйә, у әм жь һәвалтийа тʹәви кәсед дьн, йед кӧ мина мә бунә меванед Йаһоԝа, шабуне дьстиньн. Коне Йаһоԝайә симболик нә тʹәне щики йә. Дьбәкә тӧ бона щьвата мәзьнә мәхсус чуйи ԝәлатәки дьн, у тʹәви ԝан мәрьва буйи нас, йед кӧ меванед коне Йаһоԝа нә. Бәле, хьзмәткʹаред Хԝәде кʹидәре бьн жи, коне Ԝи ԝедәре һәйә (Әʹйанти 21:3).

7. Әм жь кӧ заньн ԝәки хьзмәткʹаред Йаһоԝайә амьн, йед кӧ мьрьнә, һәла һе меванед коне ԝи нә? (Бьньһерʹә ӧса жи шькьл.)

⁷ Ле әм чь дькарьн бежьн дәрһәԛа ԝан хьзмәткʹаред Йаһоԝайә амьн, йед кӧ мьрьнә? Гәло әԝана диса жи меванед коне Йаһоԝа нә? Бәле, чьмки әԝана бира Йаһоԝада ньн у бона ԝи сах ьн. Иса гот: «Ле әв йәк кӧ мьри рʹадьбьн, Муса жи әʹйан кьр. Гава әԝи дәрһәԛа тʹуме стьрийа гьли кьр, әԝи Йаһоԝа нав кьр, ‹Хԝәдайе  Бьраһим, Хԝәдайе Исһаԛ у Хԝәдайе Аԛуб›. Әԝ нә кӧ Хԝәдайе мьрийа йә, ле Хԝәдайе саха йә, чьмки әԝана һʹәму бона ԝи сах ьн» (Луԛа 20:37, 38).

КʹӘРӘМ У ЩАБДАРИЙЕД МӘ

8. Хьзмәткʹаред Йаһоԝа чь кʹаре дьстиньн, гава дьбьнә меванед коне ԝи?

⁸ Чаԝа кӧ кон дькарә мәрьва жь ба у баране бьпʹарезә, ӧса жи коне Йаһоԝа меванед ԝи, жь тьштед кӧ дькарьн зьраре бьдьнә рʹӧһʹанийа ԝан, дьпʹарезә. Һʹәта кӧ әм незики Йаһоԝа бьн, Мире-щьна нькарә зьрара һʹәта-һʹәтайе бьдә мә (Зәбур 31:23; 1 Йуһʹәнна 3:8). Дьнйа тʹәзәда, Йаһоԝа ԝе достед хԝә нә тʹәне рʹӧһʹанида бьпʹарезә, ле ӧса жи жь мьрьне хԝәй кә (Әʹйанти 21:4).

9. Йаһоԝа дьхԝазә, кӧ меванед ԝи чь бькьн?

⁹ Бона мә ԛәдьрәки мәзьн ә, кӧ әм коне Йаһоԝада ньн у достед ԝи нә. Ле әм гәрәке хԝә ча бьдьнә кʹьфше, һәрге әм дьхԝазьн тʹьме меванед Йаһоԝа бьн? Гава әм меванти дьчьнә мала кәсәки, әм гәрәке бьзаньбьн кӧ ԛәйдед ԝе малбәте чь нә. Мәсәлә, дьбәкә хԝәйе мале дьхԝазә, ԝәки әм солед хԝә бехьн, у һәмьки әм һазьр ьн ве йәке бькьн. Һʹәма бь ԝи щурʹәйи, әм гәрәке бьзаньбьн, кӧ Йаһоԝа жь меванед хԝә чь дәʹԝа дькә. Әм Йаһоԝа һʹәз дькьн, ләма жи әм һʹәму тьшти дькьн, ԝәки «һәр алийава ль ԝи хԝәш бен» (Колоси 1:10). Һәрге әм Йаһоԝа ча Досте хԝә һʹәсаб дькьн, диса жи әм гәрәке бир нәкьн, кӧ әԝ Хԝәде у Баве мә йә у әм гәрәке ԛәдьре ԝи бьгьрьн (Зәбур 25:14). Ԝәрә әм тʹӧ щара бир нәкьн, кӧ әԝ кʹи йә. Әв йәк ԝе али мә бькә, ԝан тьшта нәкьн, чь кӧ ԝи хԝәш найе. Бәле, әм дьхԝазьн һәр гав бь мьлукти тʹәви Хԝәдайе хԝә бьмәшьн (Миха 6:8).

ЙАҺОԜА ФЬРԚИ НӘДЬКЬРӘ ОРТʹА ИСРАЕЛИЙА

10-11. Ԝәʹде бәре Йаһоԝа ча дьда кʹьфше, кӧ әԝ фьрԛийе накә ортʹа щьмәʹта хԝә?

¹⁰ Йаһоԝа фьрԛийе накә ортʹа меванед хԝә (Рʹомайи 2:11). Мәсәлә, гава Исраели бәрʹийа Синайеда бун, Йаһоԝа фьрԛи нәдькьрә ортʹа ԝан у бона ԝан хәм дькьр.

¹¹ Чахе Йаһоԝа хьзмәткʹаред хԝә жь дилтийа Мьсьре хьлаз кьр, әԝи кʹаһин кʹьфш кьрьн, ԝәки коне пирозда хьзмәт кьн. Ӧса жи ван Леԝийарʹа, йед кӧ конда хьзмәт дькьрьн, һьнә щабдари һатьбунә дайине. Ле гәло Йаһоԝа бона ԝан мәрьва, йед кӧ конда хьзмәт дькьрьн, йан жи незики кон дьжитьн, дьһа зедә хәм дькьр? На, чьмки Йаһоԝа фьрԛийе накә ортʹа хьзмәткʹаред хԝә.

12. Диса чь щурʹәйи Йаһоԝа дьда кʹьфше, ԝәки әԝ фьрԛийе накә ортʹа мәрьва? (Дәркʹәтьн 40:38) (Бьньһерʹә ӧса жи шькьл.)

¹² Фьрԛи тʹӧнә бу Исраели кʹидәре дьман у щабдарийа ԝан чь бу, һәр кәс дькарьбу бьбә досте Йаһоԝа. Мәсәлә, Йаһоԝа ӧса кьр, ԝәки һәр кәс стуна әʹԝр у стуна агьр бьвинә, йа кӧ сәр коне пироз дьсәкьни (Бьхунә Дәркʹәтьн 40:38). Гава стуна әʹԝр щигӧһасти дьбу, кәсед кӧ дури коне пироз дьман жи, дькарьбун ве йәке бьвиньн, һур-муре хԝә у конед хԝә тʹоп кьн у рʹе кʹәвьн (Жьмар 9:15-23). Тʹәмамийа мьләт дәнге дӧ борʹийед  зив дьбьһистьн, йед кӧ дьданә кʹьфше, ԝәки һәр кәс гәрәке кʹаре хԝә бькә у рʹе кʹәвә (Жьмар 10:2). Һәрге кәсәк незики коне пироз дьма, әв йәк нәдьһатә һʹәсабе, кӧ әԝ дьһа незики Йаһоԝа йә. Һәр кәс дькарьбу бьбуйа меване Йаһоԝа, у дӧдьли нәбуйа кӧ ԝе жь рʹебәрийа ԝи кʹаре бьстинә у хԝәйкьри бә. Иро жи, фьрԛи тʹӧнә әм кʹӧдәре дьжин, Йаһоԝа мә һʹәз дькә у бона мә хәм дькә.

ИРО ЖИ ЙАҺОԜА ФЬРԚИЙЕ НАКӘ ОРТʹА МӘРЬВА

13. Иро Йаһоԝа ча дьдә кʹьфше, ԝәки әԝ фьрԛийе накә ортʹа мәрьва?

¹³ Иро һьнә Шәʹдед Йаһоԝа незики офиса сәрәкә дьжин, йан жи незики Филиале. Һьнәк жи ԝедәре хьзмәт дькьн, у мәщала ԝан һәйә шьхӧлед ԝедәре бькьн, рʹу бь рʹу бьред щабдар бьвиньн у тʹәви ԝан хәбәр дьн. Һьнә кәс жи, ча бәрпьрсийаре мьһале хьзмәт дькьн, йан жи ча хьзмәткʹаред һәртʹьм, щурʹә-щурʹә щабдарийа тиньн сери. Ле щәм һʹәчʹи зәʹф хьзмәткʹаред Йаһоԝа, мәщал тʹӧнә йә щийед ӧса хьзмәт кьн, йан жи бьбьнә хьзмәткʹаред һәртʹьм. Һәрге дәрәща тә жи ӧса нә, диса жи баԝәр бә, ԝәки Йаһоԝа һʹәму меванед хԝә һʹәз дькә у ԝана дьбә хԝәйи (1 Пәтрус 5:7). Һʹәму хьзмәткʹаред Йаһоԝа хԝарьна рʹӧһʹани у рʹебәрийе дьстиньн у жь алийе Ԝида хԝәйкьри нә.

14. Диса жь чь те кʹьфше, ԝәки Йаһоԝа фьрԛийе накә ортʹа мәрьва?

¹⁴ Бь ве йәке жи те кʹьфше, ԝәки Йаһоԝа фьрԛийе накә ортʹа мәрьва, кӧ әԝ Кʹьтеба Пироз дьгьһинә һʹәму мәрьвед сәр тʹәмамийа дьнйайе. Кʹьтеба Пироз сәр зьмане Ибрани, Арами у Йунани һатьбу ньвисаре. Гәло әԝ мәрьвен, кӧ дькарьн сәр ван  зьманед кәвьн бьхуньн, дьһа незики Йаһоԝа нә? Һәмьки на (Мәтта 11:25).

15. Әм жь кʹӧ заньн, ԝәки Йаһоԝа фьрԛийе накә ортʹа мьләта? (Бьньһерʹә ӧса жи шькьл.)

¹⁵ Сәва кӧ Йаһоԝа жь мә рʹази бә, нәлазьм ә кӧ әм зьманед әʹсьли йед Кʹьтеба Пироз бьзаньбьн, йан жи һинбуна бьльнд бьстиньн. Йаһоԝа биланийа хԝә һәр кәсирʹа пʹешкʹеш дькә, нә кӧ тʹәне кәсед хԝәндирʹа. Кʹьтеба Пироз сәр һʹәзара зьмана һатийә ԝәлгәрʹандьне, ләма жи мәрьв һәр дәра дькарьн ве кʹьтебе бьхуньн у һин бьн кӧ чаԝа бьбьн достед Йаһоԝа (2 Тимотʹейо 3:16, 17).

БӘРДӘԜАМ КӘ ДЬЛЕ ЙАҺОԜА ША КӘ

16. Ль гора Кʹаред Шандийа 10:34, 35 әм гәрәке чь бькьн, ԝәки Йаһоԝа мә ԛәбул кә?

¹⁶ Бона мә бь рʹасти жи кʹәрәмәкә мәзьн ә, кӧ Йаһоԝа мә коне хԝәйи симболикда ча меван ԛәбул дькә. Йаһоԝа гәләк дьлован у меванһʹәз ә. Фьрԛи тʹӧнә, кӧ әм жь кʹижан култур, мьләти у ԝәлати нә, хԝәнди нә йан на, йан жи әм чәнд сали нә, Әԝ мә тʹәглифи коне хԝә дькә. Ле сәва кӧ әԝ мә «ԛәбул» кә, һәмьки фәрз ә, ԝәки әм ль гора принсипед ԝи бьжин (Бьхунә Кʹаред Шандийа 10:34, 35).

17. Готара дьнда әме чь шеԝьр кьн?

¹⁷ Зәбур 15:1-да Даԝьд пьрсәкә ӧса да: «Хӧдано! Кʹи дькарә Коне Тәда бьминә? Кʹи ԝе сәре чʹийайе Тәйи пироз бьһеԝьрә?» Жь бина бәр Хԝәде Даԝьд щаба ван пьрса да. Готара дьнда әме ве йәке шеԝьр кьн у пебьһʹәсьн кӧ әм гәрәке чь бькьн, ԝәки Йаһоԝа мә ԛәбул кә.