1. Зәбур 18:46-да, Даԝьд Йаһоԝа бәрамбәри чь дькә?

 ҺЬНӘ тьштед кӧ тен сәре мә, дькарьн ньшкева жийина мә тʹәвльһәв кьн. Ча баш ә, кӧ әм дькарьн жь Йаһоԝа Хԝәде аликʹарийе бьхԝазьн! Готара пешийа веда, әм пеһʹәсийан, кӧ Йаһоԝа Хԝәдайе сах ә у тʹьме һазьр ә али мә бькә. Чахе әм дьвиньн, кӧ Әԝ чаԝа али мә дькә, әм дьһа избат дьбьн ԝәки «Хӧдан сах ә» (Бьхунә Зәбур 18:46). Ле паши ван гьлийа, Даԝьд Хԝәдерʹа гот «Ԛәйайе мьн». Гәло әԝи чьрʹа ӧса гот?

2. Ве готареда әме чь шеԝьр кьн?

² Ве готареда әме бьвиньн, кӧ Йаһоԝа чьрʹа те навкьрьне Зьнар йан жи Ԛәйа, у әв йәк дәрһәԛа ԝи чь мә һин дькә. Ӧса жи, әме пебьһʹәсьн, кӧ әм ча дькарьн итʹбарийа хԝә Йаһоԝа биньн, Ԝи чаԝа Зьнар сәва хԝә һʹәсаб кьн у чʹәʹв бьдьнә һʹӧнӧред ԝи.

ЙАҺОԜА ЧЬРʹА ТЕ НАВКЬРЬНЕ ЗЬНАР?

3. Кʹьтеба Пирозда хәбәра «зьнар», гәләк щар ча те хәбьтандьне? (Бьньһерʹә журнале.)

³ Һьнә рʹезед Кʹьтеба Пирозда, Йаһоԝа те навкьрьне «зьнар». Гәләк щар, чахе хьзмәткʹаред Йаһоԝа пәсьне ԝи дьдан, ԝана ԝи нав дькьр ча зьнар. Щара пешьн Ԛануна Дӧщари 32:4-да те готьне, ԝәки Йаһоԝа Хԝәде мина «Зьнар» ә. Һанна дийа Самуйел жи дӧайед хԝәда гот, кӧ «зьнарәки ԝәки Хԝәдайе мә тʹӧнәйә» (1 Самуйел 2:2, ИМ). Һәбаԛуԛ жи сәр Йаһоԝа гот «Зьнар» (Һәбаԛуԛ 1:12). Йаһоԝа хԝәха жи, хԝә бәрамбәри зьнарәки кьр (Ишайа 44:8). Гәло Йаһоԝа чьрʹа те навкьрьне зьнар? Ԝәрә әм се мәʹнийа шеԝьр кьн у бьвиньн кӧ әм ча дькарьн Йаһоԝа  чаԝа Зьнаре хԝә һʹәсаб кьн (Ԛануна Дӧщари 32:31).

4. Йаһоԝа чь щурʹәйи сьтʹара мә йә? (Зәбур 94:22)

⁴ Йаһоԝа сьтʹара мә йә. Мина зьнарәки мәзьн, кӧ ԝәʹде фьртоне мәрьварʹа дьбә сьтʹар, Йаһоԝа жи ԝәʹде чәтьнайа мә дьпʹарезә (Бьхунә Зәбур 94:22). Әԝ али мә дькә, ԝәки әм достийа хԝә тʹәви ԝи ԛәԝи хԝәй кьн у ӧса жи соз дьдә, кӧ ахьрийеда әԝе мә жь һʹәму кӧл-дәрда хьлаз кә (Һәзәԛел 34:25, 26).

5. Йаһоԝа ча дькарә бона мә бьбә сьтʹар?

⁵ Әм дькарьн бь сайа дӧа хԝә бьсперьн Йаһоԝа. Гава әм дӧа дькьн, әм «әʹдьлайийа Хԝәде» дьстиньн, йа кӧ һʹьш у дьле мә дьпʹарезә (Филипи 4:6, 7). Ԝәрә әм дина хԝә бьдьнә сәрһатийа бьре мә Артйом, йе кӧ жь бо баԝәрийа хԝә кʹәтә кәле. Мәрьве кӧ шьхӧле ԝи лекʹолин дькьр, йәки сәрт бу у әԝи Артйом беһӧрмәт дькьр у дьда тьрсандьне. Артйом дьбежә: «Гава әԝи гази мьн дькьр, әз дькʹәтьмә стресе. . . . Мьн һәр щар Йаһоԝарʹа дӧа дькьр. Мьн жь ԝи билани у әʹдьлайа дьл дьхԝәст. Паше ве йәке, дьле мьн ида рʹьһʹәт бу у кьред ԝи мәрьви сәр мьн һʹӧкӧм нәдькьрьн. . . . Бь аликʹарийа Йаһоԝа, мьн хԝә ӧса тʹәхмин дькьр, кӧ те бежи диԝарәки ԛәԝи мьн дьпʹараст».

6. Әм чьрʹа дькарьн итʹбарийа хԝә Йаһоԝа биньн? (Ишайа 26:3, 4)

⁶ Йаһоԝа бь итʹбар ә. Мина зьнар йан чʹийаки, кӧ тʹӧ щар жь щийе хԝә наләԛә, әм заньн кӧ Йаһоԝа жи һазьр ә тʹьме али мә бькә. Әм дькарьн баԝәрийа хԝә ԝи биньн, чьмки әԝ «Зьнаре һәрһәйи йә» (Бьхунә Ишайа 26:3, 4). Әԝ тʹьме һазьр ә созед хԝә бинә сери, гӧһ бьдә дӧайед мә у али мә бькә. Ӧса жи, Йаһоԝа хьзмәткʹаред хԝәрʹа амьн ә (2 Самуйел 22:26). Әԝ щәфе мә тʹӧ щар бир накә у ԝе әʹсәйи мә хәлат кә (Ибрани 6:10; 11:6).

7. Һәрге әм итʹбарийа хԝә Йаһоԝа биньн, әме чь кʹаре бьстиньн? (Бьньһерʹә ӧса жи шькьл.)

⁷ Гава әм итʹбарийа хԝә Йаһоԝа тиньн, әм нишан дькьн, кӧ әм ԝи ча Зьнаре хԝә һʹәсаб дькьн. Әм баԝәр ьн, кӧ гава әм чәтьнайада жи гӧһ дьдьнә Ԝи, әв йәк тʹьме бона кʹара мә йә (Ишайа 48:17, 18). Чахе әм дьвиньн, кӧ Йаһоԝа ча али мә дькә, баԝәрийа мә дьһа ԛәԝи дьбә, у әв йәк али мә дькә һьмбәри чәтьнайед мәзьн жи сәбьр кьн. Гәләк щар, гава әм рʹасти проблемед мәзьн тен у тʹӧ кәс нькарә али мә бькә, әм фәʹм дькьн, ԝәки әм һʹәԝще аликʹарийа Йаһоԝа нә. Бьре мә Владимир дьбежә: «Гава әз кәледа бум, әв йәк мәщаләкә лапә баш бу, кӧ итʹбарийа хԝә Йаһоԝа биньм, чьмки әз тʹьк-тʹәне бум у тʹәне Хԝәде дькарьбу али мьн бькә ван чәтьнайада тәйах кьм».

8. (а) Әм чьрʹа дькарьн бежьн, кӧ Йаһоԝа найе гӧһастьне? (б) Әм чь кʹаре дьстиньн жь ве йәке, кӧ Хԝәде Зьнаре мә йә? (Зәбур 62:6, 7)

⁸ Йаһоԝа найе гӧһастьне. Йаһоԝа мина зьнар ә, ләма жи хәйсәт-һʹӧнӧред ԝи тʹӧ щар найенә гӧһастьне  (Малахи 3:6). Мәсәлә, паши мьԛабьлибуна бахче Еденеда, Йаһоԝа ԛьрара хԝә бона инсанәте нәгӧһаст. Паԝлосе шанди ньвиси, кӧ Йаһоԝа «нькарә хԝә инкʹар кә» (2 Тимотʹейо 2:13). Әв те һʹәсабе, ԝәки тʹӧ тьшт у тʹӧ кәс нькарә сәр һʹӧнӧр, нет йан жи принсипед Ԝи һʹӧкӧм кә. Йаһоԝа найе гӧһастьне, ләма жи әм баԝәр ьн, кӧ Әԝе мә хьлаз кә у чәтьнайада али мә бькә (Бьхунә Зәбур 62:6, 7).

9. Тӧ жь сәрһатийа Татйанайе чь һин буйи?

⁹ Чахе әм дәрһәԛа нет у һʹӧнӧред Йаһоԝа кʹур дьфькьрьн, әв йәк дькарә али мә бькә баԝәрийа хԝә ԝи биньн у Ԝи бькьнә Зьнаре хԝә. Һәрге әм ӧса бькьн, әʹдьлайи ԝе бькʹәвә дьле мә у әме бькарьбьн чәтьнайада жи Йаһоԝарʹа амьн бьминьн (Зәбур 16:8). Хушкәкә бь наве Татйана, йа кӧ жь бо баԝәрийе кьрьбунә гьртийа мале, ӧса дьбежә: «Әз тʹьк-тʹәне бум. Серида, һʹале мьн гәләк чәтьн бу. Әз гәләк дьлтәнг бьбум». Ле гава әԝе фәʹм кьр, кӧ чәтьнайа ԝе, Йаһоԝа у нета ԝива гьредайи йә, әԝе ԛәԝат станд. Татйана дьбежә: «Чахе әз дьфькьрим, кӧ чьрʹа әз ԝи һʹалида ньм, әв йәк али мьн дькьр фәʹм кьм, ԝәки әз бона наве Йаһоԝа ве дәрәщеда ньм. Әве йәке али мьн дькьр дәрһәԛа чәтьнайа хԝә дьшьрмиш нәбьм».

10. Йаһоԝа ча ида ньһа дькарә бона мә бьбә Зьнар?

¹⁰ Зутьрәке әме рʹасти чәтьнайед дьһа мәзьн бен. Һьнге ԝе лазьм бә, кӧ әм дьһа зедә хԝә бьсперьн Йаһоԝа. Ләма жи әм гәрәке ида ньһада баԝәрийа хԝә ԛәԝи кьн, кӧ Йаһоԝа ԝе али мә бькә, ԝәки әм жерʹа амьн бьминьн. Гәло тӧ ча дькари ве йәке бьки? Мәсәлә, Кʹьтеба Пирозда дәрһәԛа сәрһатийед хьзмәткʹаред Хԝәде бьхунә. Сәрһатийед хушк-бьра жи дькарьн баԝәрийа тә дьһа ԛәԝи кьн. Бьвинә кӧ Хԝәде бона хьзмәткʹаред хԝә ча буйә зьнар. Дәрһәԛа ван сәрһатийа кʹур бьфькьрә. Әв йәк ԝе али тә бькә, кӧ Йаһоԝа бьбә Зьнаре тә.

ЧʹӘʹВ БЬДЬНӘ ҺʹӦНӦРЕД ЙАҺОԜА

11. Әм чьрʹа дьхԝазьн чʹәʹв бьдьнә һʹӧнӧред Йаһоԝа? (Ӧса жи бьньһерʹьн чаргошә бь наве « Нет бона Бьред Щаһьл».)

¹¹ Мә дәрһәԛа һʹӧнӧред Йаһоԝа шеԝьр кьр, кʹижан дьдьнә кʹьфше, кӧ әԝ чаԝа зьнар ә. Ньһа әме бьвиньн, кӧ әм ча дькарьн чʹәʹв бьдьнә һʹӧнӧред Ԝи. Әв йәк ԝе али мә бькә, дьһа зедә али хушк-бьра бькьн. Мәсәлә, Иса шагьрте хԝә Шьмһʹун, нав кьр «Кифас», (чь кӧ те ԝәлгәрʹандьне «Пәтрус»), кӧ те һʹәсабе Зьнар йан жи Ԛәйа (Йуһʹәнна 1:42). Бь ве йәке Иса да кʹьфше, кӧ Пәтрус ԝе бәрдьлийе у ԛәԝате бьдә щьвате. Рʹуспийед щьвате бәрамбәри «сийа зьнаре бьльнд, ИМ» дьбьн. Әв йәк дьдә кʹьфше, кӧ әԝана щьвате дьпʹарезьн (Ишайа 32:2). Һәмьки, нә кӧ тʹәне рʹуспи, ле ӧса  жи һәр кәс жь мә дькарә чʹәʹв бьдә ԝан һʹӧнӧред Йаһоԝа (Әфәси 5:1).

12. Әм ча дькарьн бона хушк-бьра бьбьнә сьтʹар?

¹² Бона хушк-бьра бьбә сьтʹар. Щара әм дькарьн бона хушк-бьред хԝә, рʹастә-рʹаст бьбьнә сьтʹар, мәсәлә ви чахи, гава әԝана жь бо тʹәшԛәлед тʹәбийәте, йан жи жь бо шәрʹ малед хԝә ӧнда дькьн, йан жи мәщбур дьбьн малед хԝә бьһельн. Рʹожед пашьн чьԛас чәтьн дьбьн, һаԛас һе зедә мәщал дькʹәвә дәсте мә аликʹарийе бьдьнә һәвдӧ (2 Тимотʹейо 3:1). Ӧса жи әм дькарьн бәрдьлийе бьдьнә хушк-бьра у һʹәзкьрьна хԝә ԝанрʹа бьдьнә кʹьфше. Мәсәлә, әм дькарьн Ода Щьватеда тʹәви ԝан хәбәр дьн у һәр тьшти бькьн, ԝәки щьват бона һәр кәси әв щи бә, кʹидәре кӧ әм дькарьн һелане бьдьнә һәв. Әм дьнйакә сар, сәрт у чәтьнда дьжин. Ләма жи гава хушк-бьред мә тенә щьвате, әм дьхԝазьн чь жь дәсте мә те бькьн, ԝәки әԝана хԝә рʹьһʹәт у хԝәйкьри тʹәхмин кьн.

13. Рʹуспи ча дькарьн бона хушк-бьра бьбьнә сьтʹар? (Бьньһерʹә ӧса жи шькьл.)

¹³ Гава хушк-бьред мә рʹасти чәтьнайа тен, рʹуспи дькарьн бона ԝан бьбьнә сьтʹар. Мәсәлә, ԝәʹде тʹәшԛәлед тʹәбийәте, йан жи гава бь ләз аликʹарийа медисинайе лазьм ә, рʹуспи аликʹарийе дьдьнә хушк-бьра. Ӧса жи рʹуспи бь сайа Кʹьтеба Пироз рʹебәрийе у һелане дьдьнә ԝан. Һәрге рʹуспи рʹьнд гӧһ бьдә хушк-бьра, дьлован бә у һʹале ԝан фәʹм бькә, хушк-бьра ԝе һеса дьле хԝә ԝирʹа вәкьн, чьмки әԝана ԝе тʹәхмин кьн, кӧ әв рʹуспи ԝана ԛимәт дькә. Ахьрийеда, әԝана ԝе бь дьл у щан ширәтед ви рʹуспи ԛәбул кьн (1 Тʹесалоники 2:7, 8, 11).

14. Әм ча дькарьн нишан кьн, кӧ әм мәрьвнә бь итʹбар ьн?

 ¹⁴ Бь итʹбар бә. Әм дьхԝазьн, кӧ кәсед дьн итʹбарийа хԝә мә биньн, илаһи ԝан рʹожед чәтьнда (Мәтʹәлок 17:17). Сәва кӧ кәсед дьн мә ча мәрьвнә бь итʹбар һʹәсаб кьн, гәло әм чаԝа дькарьн чʹәʹв бьдьнә һʹӧнӧред Хԝәде? Мәсәлә, әм гәрәке хԝәйе созед хԝә бьн у һәр тьшти ԝәʹдәда бькьн (Мәтта 5:37). Ӧса жи әм дькарьн али ԝан мәрьва бькьн, йед кӧ һʹәԝще аликʹарийе нә. Хенщи ве йәке, әм гәрәке щабдарийед хԝә ль гора рʹебәрийа кӧ әм дьстиньн, биньн сери.

15. Рʹуспийед бь итʹбар чаԝа кʹаре щьватерʹа тиньн?

¹⁵ Рʹуспийед бь итʹбар бона щьвате кʹәрәмәкә гәләк мәзьн ьн. Гәло чаԝа? Гава хушк-бьра заньн, кӧ әԝана дькарьн һеса незики рʹуспийа бьн, йан жи тʹәви ԝан текли бьн, әв йәк дьлбинийе дьдә ԝан. Хушк-бьра хԝә хԝәйкьри тʹәхмин дькьн, гава рʹуспи бона ԝан хәм дькьн у һазьр ьн али ԝан бькьн. Ӧса  жи, һәрге рʹуспи нә ль гора фькьред хԝә, ле сәр һʹиме Кʹьтеба Пироз у әʹдәбйәтед тʹәшкиләте рʹебәрийе бьдьн, хушк-бьра ԝе баԝәрийа хԝә ԝан биньн. Хенщи ве йәке, әԝана баԝәрийа хԝә рʹуспийед бь итʹбар тиньн, йед кӧ информасийа ԝанә шәхси тʹӧ кәсирʹа навежьн у хԝәйе созед хԝә нә.

16. Әм чь кʹаре дьстиньн, гава ве йәке дькьн, чь кӧ бәр чʹәʹве Йаһоԝа рʹаст ә?

¹⁶ Тʹьме ве йәке бькьн, чь кӧ бәр чʹәʹве Йаһоԝа рʹаст ә. Һәрге әм ԛәԝи сәр рʹийа рʹастийе бьсәкьньн у ль гора принсипед Кʹьтеба Пироз сафикьрьна бькьн, әв йәк дькарә сәр кәсед дьн жи баш һʹӧкӧм кә. Баԝәри у занәбуна мә чьԛас зедә бә, һаԛас һе ԛәԝи әме сәр рʹийа рʹастийе бьсәкьньн у нәкʹәвьнә бәр байе һинкьрьн у фькьред ве дьнйайе (Әфәси 4:14; Аԛуб 1:6-8). Гава әм әʹламәтийед нәбаш дьстиньн, баԝәрийа мә һьндава Йаһоԝа у созед ԝи али мә дькә, ԝәки әм тʹәвльһәв нәбьн (Зәбур 112:7, 8). Ӧса жи әм һазьр ьн аликʹарийе бьдьнә кәсед кӧ тәнгасийеда ньн (1 Тʹесалоники 3:2, 3).

17. Рʹуспи ча дькарьн али хушк-бьра бькьн?

¹⁷ Кʹьтеба Пироз дьбежә, кӧ рʹуспи гәрәке хԝәгьрти, аԛьлда гьран, маԛул у бәрбьһер бьн. Әԝана али хушк-бьра дькьн дьлрʹьһʹәт бьн у Йаһоԝарʹа амьн бьминьн бь ве йәке, кӧ хԝә ль «готьна амьн» ԛәԝи дьгьрьн (Тито 1:9; 1 Тимотʹейо 3:1-3). Һьм бь мәсәла хԝә, һьм жи бь сайа шьвантийе, рʹуспи дькарьн али хушк-бьра бькьн, ԝәки әԝана лекʹолина шәхси, бәлакьрьна мьзгинийе у щьвина бәрʹнәдьн. Гава хушк-бьред мә рʹасти чәтьнайа тен, рʹуспи дькарьн али ԝан бькьн, ԝәки әԝана гӧмана хԝә Йаһоԝа биньн у дәрһәԛа созед Ԝи бир нәкьн.

18. Әм чьрʹа дьхԝазьн рʹумәте бьдьнә Йаһоԝа у дьһа незики ԝи бьн? (Ӧса жи бьньһерʹьн чаргошә бь наве « Дьһа Незики Йаһоԝа бә».)

¹⁸ Гава әм дәрһәԛа һʹӧнӧред Йаһоԝа дьфькьрьн, әм жи мина Даԝьд Пʹадша дькарьн бежьн: «Шькьр жь Хӧданрʹа, ԛәйайе мьн» (Зәбур 144:1). Бәле, әм тʹьме дькарьн итʹбарийа хԝә Йаһоԝа Хԝәде биньн. Әм чьԛас әʹмьрда мәзьн бьн жи, әм баԝәр ьн, кӧ Йаһоԝа ԝе бәрдәԝам кә али мә бькә рʹӧһʹанида ԛәԝи бьминьн. Ләма жи ԝәрә әм жи бь дьл у щан бежьн: «Әԝ ԛәйайе мьн ә» (Зәбур 92:14, 15).