Сәва кӧ Йаһоԝа жь мә рʹази бә, гәрәке баԝәрийа мә һәбә. Ле Кʹьтеба Пироз дьбежә, кӧ баԝәрийа һьнә мәрьва тʹӧнә йә (2 Тʹесалоники 3:2). Ве рʹезеда Паԝлос бәʹса мәрьвед «нәһәԛ у хьраб» дькьр, йед кӧ зӧлми ль ԝи дькьрьн. Ле гьлийед ԝи дәрһәԛа баԝәрийе, нә тʹәне дәрһәԛа ԝана бу. Кәсед дьн жи һәнә, баԝәрийа кʹижан тʹӧнә йә. Мәсәлә, һьнә мәрьв избатийед зәлал инкʹар дькьн, ԝәки Хԝәде һәйә (Рʹомайи 1:20). Һьнә мәрьв жи баԝәр дькьн, кӧ кәсәк йан жи ԛәԝатәкә мәзьн һәйә. Ле әв йәк бәс нинә, ԝәки Йаһоԝа жь ԝан рʹази бә.

Әм гәрәке баԝәр бьн, ԝәки Йаһоԝа һәйә у Әԝ ԝан мәрьва хәлат дькә, баԝәрийа кʹижана ԛәԝи ә (Ибрани 11:6). Баԝәри бәре рʹӧһʹе пироз ә. Сәва кӧ әм рʹӧһʹе пироз бьстиньн, әм гәрәке Йаһоԝарʹа дӧа бькьн (Луԛа 11:9, 10, 13). Ӧса жи гавәкә фәрз кӧ ча рʹӧһʹе пироз бьстиньн әв ә, ԝәки Кʹьтеба Пироз бьхуньн, йа кӧ жь бина бәр Хԝәде һатийә ньвисаре. Паше жи, әм гәрәке сәр ван тьшта, чь кӧ дьхуньн, кʹур бьфькьрьн у ль гора ве йәке бьжин. Рʹӧһʹе пироз дькарә сәр әʹмьре мә һʹӧкӧм кә у али мә бькә, ԝәки әм ль гора баԝәрийа хԝә бьжин, кӧ Йаһоԝа жь мә рʹази бә.