1. Чь дькарә али хьзмәткʹаред Йаһоԝа бькә, кӧ бәрдәԝам кьн чәтьнайада жерʹа хьзмәт кьн?

 КʹЬТЕБА ПИРОЗДА те готьне, кӧ әм рʹожед хьлазийеда дьжин (2 Тимотʹейо 3:1). Хенщи ԝан чәтьнайа, рʹасти кʹижана кӧ һʹәму мәрьв тен, хьзмәткʹаред Йаһоԝа рʹасти пәйкʹәтьна у мьԛабьлибуне жи тен. Гәло чь дькарә али мә бькә, ԝәки әм ван чәтьнайада бәрдәԝам кьн Йаһоԝарʹа хьзмәт кьн? Мәʹникә фәрз әв ә, кӧ әм бир нәкьн, ԝәки Йаһоԝа Хԝәдайе сах ә (Йерәмйа 10:10; 2 Тимотʹейо 1:12).

2. Әм дәрһәԛа Йаһоԝа чь заньн у чьрʹа фәрз ә, кӧ әм ве йәке бир нәкьн?

² Йаһоԝа һʹәму тәнгасийед мә дьвинә у һазьр ә али мә бькә (2 Дирок 16:9; Зәбур 23:4). Һәрге әм бир нәкьн, кӧ әԝ Хԝәдайе сах ә, әме бькарьбьн һʹәму тәнгасийа сәбьр кьн. Ԝәрә әм дина хԝә бьдьне, кӧ занәбуна ве йәке ча али Даԝьд Пʹадша дькьр.

3. Чахе Даԝьд гот, кӧ «Хӧдан сах ә», бь ве йәке әԝи чь дьхԝәст бьгота?

³ Даԝьд Йаһоԝа нас дькьр у хԝә дьспартә ԝи. Гава Шаԝул Пʹадша у дьжмьнед дьн пәй Даԝьд дькʹәтьн, әԝи жь Йаһоԝа аликʹари хԝәст (Зәбур 18:6). Чахе Хԝәде щаба дӧайе ԝи да у әԝ хьлаз кьр, Даԝьд гот: «Хӧдан сах ә» (Зәбур 18:46). Бь ван гьлийа те кʹьфше, ԝәки Даԝьд нә тʹәне ԛәбул дькьр, кӧ Хԝәде һәйә. Ле чаԝа каникеда те готьне, Даԝьд Йаһоԝа «ча хԝәдеки сах һʹәсаб дькьр, йе кӧ тʹьме али хьзмәткʹаред хԝә дькә». Бәле, Даԝьд жь дәрәщед жийина хԝә заньбу, кӧ Йаһоԝа Хԝәдайе сах ә. Занәбуна ве йәке, али ԝи дькьр бәрдәԝам кә Йаһоԝарʹа хьзмәт кә (Зәбур 18:28, 29, 49).

4. Әм чь кʹаре дьстиньн, гава Йаһоԝа ча Хԝәдайе сах һʹәсаб дькьн?

⁴ Занәбуна ве йәке, кӧ Йаһоԝа Хԝәдайе сах ә дькарә али мә жи бькә, кӧ әм бь дьл у щан жерʹа хьзмәт кьн.  Баԝәрийа мә ԝе ԛәԝате бьдә мә, ԝәки әм һьмбәри тәнгасийа сәбьр кьн у ӧса жи ԝе хԝәстьна мә зедә кә, ԝәки әм жь Йаһоԝа дур нәкʹәвьн у бәрдәԝам кьн Ԝирʹа хьзмәт кьн.

ХԜӘДАЙЕ САХ ԜЕ ԚӘԜАТЕ БЬДӘ ТӘ

5. Гава әм рʹасти чәтьнайа тен, әм дькарьн чьда баԝәр бьн? (Филипи 4:13)

⁵ Һәрге әм бир нәкьн, кӧ Йаһоԝа Хԝәдайе сах ә у һазьр ә али мә бькә, әме бькарьбьн һьмбәри һʹәму тәнгасийа сәбьр кьн. Әм рʹасти чь чәтьнайа жи бен, Хԝәде дькарә али мә бькә. Әԝ Хԝәдайе Һьмзор ә, у әԝ дькарә ԛәԝате бьдә мә, ԝәки әм сәбьр кьн (Бьхунә Филипи 4:13). Ләма жи һәрге әм рʹасти тәнгасийа бен, ԝәрә әм мерхасийа хԝә ӧнда нәкьн. Һәрге мә чәтьнайед бьчʹукда аликʹарийа Йаһоԝа дитийә, әм дькарьн баԝәр бьн, кӧ әԝе чәтьнайед мәзьнда жи али мә бькә.

6. Дәрәщед әʹмьре Даԝьд чаԝа баԝәрийа ԝи һьндава Йаһоԝа дьһа ԛәԝи кьр?

⁶ Ԝәрә әм дина хԝә бьдьнә дӧ дәрәщед әʹмьре Даԝьд, йед кӧ баԝәрийа ԝи һьндава Йаһоԝа дьһа ԛәԝи кьрьн. Щарәке, гава Даԝьд щаһьл бу у шьванти дькьр, һʹьрчʹәк һат у пәзәки баве ԝи бьр. Щарәкә дьн жи шерәк һат у пәзәк бьр. Һәрдӧ дәрәщада жи Даԝьд бь мерхаси пәй ԝан кʹәт у пәз хьлаз кьрьн. Ле Даԝьд пʹайе хԝә нәда, чьмки әԝи заньбу, кӧ әԝ бь аликʹарийа Йаһоԝа сәркʹәт (1 Самуйел 17:34-37). Әв ԛәԝьмандьн паше жи али Даԝьд дькьрьн, кӧ әԝ итʹбарийа хԝә ԛәԝата Хԝәдайе сах бинә.

7. Ньһерʹандьна рʹаст ча али Даԝьд кьр, кӧ һьмбәри Голйатʹ дәркʹәвә?

⁷ Рʹожәке, гава Даԝьд һе 20 сали жи нибу, әԝ чу сәрики ордийа Исраелийа хә. Һʹале әскәра ԛә нәбаш бу. Жь бо әскәрәки Фьльсти, бь наве Голйатʹ, йе кӧ дьхԝәст тʹәви әскәрәки Исраелийа шәрʹ бькә, тьрсәкә мәзьн кʹәтьбу дьле ԝан, чьмки бәжна ԝи гәләк бьльнд бу (1 Самуйел 17:10, 11). Мәʹнийа тьрса ԝан әв бу, кӧ ԝана дина хԝә дьда бәжн у гьлийед Голйатʹ (1 Самуйел 17:24, 25). Ле Даԝьд дина хԝә дьда тьштәки дьн. Әԝи фәʹм дькьр, кӧ Голйатʹ нә кӧ тʹәви ордийа Исраелийа дьхԝәст шәрʹ бькьра, ле тʹәви ордийа Хԝәдайе сах (1 Самуйел 17:26). Бәле, Даԝьд жь һәр тьшти зедәтьр дәрһәԛа Йаһоԝа дьфькьри. Әԝ баԝәр бу, ԝәки Хԝәдайе кӧ бәре али ԝи кьрьбу, ԝе ижар жи али ԝи бькә. Ләма жи әԝ һьмбәри Голйатʹ дәркʹәт у сәр кʹәт! (1 Самуйел 17:45-51)

8. Гава әм рʹасти чәтьнайа тен, әм ча дькарьн хԝә бьсперьн Йаһоԝа? (Бьньһерʹә ӧса жи шькьл.)

⁸ Гава тӧ рʹасти чәтьнайа тейи, бинә бира хԝә кӧ Хԝәдайе сах һазьр ә пьшта тә бьгьрә. Әв йәк ԝе али тә бькә, ԝәки тӧ һьмбәри чәтьнайед хԝә сәркʹәви (Зәбур 118:6). Сәва кӧ баԝәрийа тә дьһа ԛәԝи бә, бьдә бәр чʹәʹве хԝә, кӧ Йаһоԝа һʹәта ньһа ча али хьзмәткʹаред хԝә кьрийә. Мәсәлә, дина хԝә бьдә сәрһатийед Кʹьтеба Пироз, йед кӧ нишан дькьн, ԝәки бәре Хԝәде хьзмәткʹаред хԝә ча хьлаз дькьр (Ишайа 37:17, 33-37). Ӧса жи дина хԝә бьдә сәрһатийед сәр малпәра jw.org, йед кӧ нишан дькьн, кӧ иро Йаһоԝа ча аликʹарийе дьдә хушк-бьред мә. Хенщи ве йәке, бинә бира хԝә, кӧ Йаһоԝа бона тә чь кьрийә. Дьбәкә Йаһоԝа тә жь дәве һʹьрчʹ, йан шерәки хьлаз нәкьрийә, ле бе шьк, әԝи сәр әʹмьре тә һʹӧкӧм кьрийә. Йа лапә  фәрз әв ә, кӧ Хԝәде тә кьрийә досте хԝә (Йуһʹәнна 6:44). Ньһа жи тӧ бь сайа аликʹарийа ԝи Жерʹа хьзмәт дьки. Жь ԝи рʹәща бькә, ԝәки бинә бира тә, кӧ ча әԝи щаба дӧайед тә дайә, ча ԝәʹдәда али тә кьрийә, йан жи ча һʹаләки чәтьнда, тә буйә хԝәйи. Һәрге тӧ дәрһәԛа ван тьшта бьфькьри, баԝәрийа тә ԝе дьһа ԛәԝи бә, кӧ Йаһоԝа ԝе диса али тә бькә.

9. Әм гәрәке чь бир нәкьн, гава рʹасти чәтьнайа тен? (Мәтʹәлок 27:11)

⁹ Һәрге әм Йаһоԝа ча Хԝәдайе сах һʹәсаб кьн, әме фәʹм бькьн кӧ чәтьнайед мә пьрса лапә фәрзва гьредайи нә, йа кӧ ортʹа Хԝәде у дьжмьне ԝи Мире-щьнада пешда һатийә. Мире-щьна гот, кӧ һәрге әм рʹасти чәтьнайа бен, әме пьшта хԝә бьдьнә Йаһоԝа (Ибо 1:10, 11; бьхунә Мәтʹәлок 27:11). Ле гава әм нава чәтьнайада Йаһоԝарʹа амьн дьминьн, әм нишан дькьн ԝәки әм Ԝи һʹәз дькьн, у әм избат дькьн кӧ Мире-щьна дәрәԝин ә. Ләма жи чахе тӧ жь алийе сәрԝеред дәԝләте рʹасти пәйкʹәтьна тейи, алийе материалида чәтьнайа дькʹьшини, йан жи гава мәрьв гӧһ надьнә рʹастийе, бир нәкә, кӧ әв йәк мәщале дьдә тә дьле Йаһоԝа ша ки. Ӧса жи бир нәкә, кӧ Йаһоԝа ԝе тʹӧ щар изьне нәдә, ԝәки тӧ жь ԛәԝата хԝә зедәтьр бейи щерʹьбандьне (1 Корьнтʹи 10:13). Әԝе ԛәԝате бьдә тә, ԝәки тӧ бькарьби сәбьр ки.

ХԜӘДАЙЕ САХ ԜЕ ТӘ ХӘЛАТ КӘ

10. Хԝәдайе сах ԝе бона хьзмәткʹаред хԝә чь бькә?

¹⁰ Йаһоԝа хьзмәткʹаред хԝә хәлат дькә (Ибрани 11:6). Әԝ ида ньһа әʹдьлайе у шабуне дьдә мә, у ахьрийеда жи ԝе әʹмьре һʹәта-һʹәтайе бьдә мә. Әм дькарьн баԝәр бьн, ԝәки Йаһоԝа һьм дьхԝазә у һьм жи дькарә мә хәлат кә. Баԝәри али мә дькә, кӧ әм мина хьзмәткʹаред Хԝәдейә бәре, бь дьл у щан жерʹа хьзмәт кьн. Мәсәлә, Тимотʹейо,  йе кӧ ԛьрʹна йәкеда дьжит, йәки ӧса бу (Ибрани 6:10-12).

11. Чь али Тимотʹейо дькьр, ԝәки щьватеда бь хирәт кʹар бькә? (1 Тимотʹейо 4:10)

¹¹ Бьхунә 1 Тимотʹейо 4:10. Тимотʹейо баԝәр дькьр, кӧ Хԝәде ԝе ле хәлат кә. Ләма жи, әԝи һьм бона Йаһоԝа, һьм жи бона кәсед дьн бь хирәт кʹар дькьр. Гәло чь щурʹәйи? Паԝлосе шанди жерʹа гот, ԝәки әԝ һинкьрьнеда пешда һәрʹә. Ӧса жи әԝи жерʹа гот, кӧ әԝ бона хушк у бьред щаһьл у әʹмьрда мәзьн бьбә мәсәләкә баш. Хенщи ве йәке, һьнә щабдарийед чәтьн жи жерʹа һатьнә дайине. Мәсәлә, лазьм бу кӧ әԝ бь нәрми у һʹәзкьрьне ширәта бьдә ԝан кәса, йед кӧ һʹәԝще ве йәке бун (1 Тимотʹейо 4:11-16; 2 Тимотʹейо 4:1-5). Тимотʹейо баԝәр бу, кӧ һәрге тʹӧ кәс щәфе ԝи нәвинә, йан жи нәшекьринә, йәкә Йаһоԝа ԝе ле хәлат кә (Рʹомайи 2:6, 7).

12. Чьрʹа рʹуспи шьхӧлед щьвате бь дьл у щан дькьн? (Бьньһерʹә ӧса жи шькьл.)

¹² Иро жи рʹуспи дькарьн баԝәр бьн, кӧ Йаһоԝа щәфа у хирәта ԝан дьвинә у шьхӧлед ԝан ԛимәт дькә. Хенщи шьхӧле шьвантийе, һинкьрьн у бәлакьрьна мьзгинийе, һьнә рʹуспи сәр проектед авакьрьне жи дьхәбьтьн, йан жи паши тʹәшԛәлед тʹәбийәте али хушк-бьра дькьн. Һьнәк жь ԝан ль Кʹома Сәрледана Нәхԝәша, йан жи Комитейед Һәвкʹарийа Нәхԝәшханада аликʹарийе дьдьн. Рʹуспи рʹьнд заньн, ԝәки щьват пʹара Йаһоԝа йә, нә кӧ пʹара мәрьва. Ләма жи әԝана щабдарийе хԝә бь дьл у щан тиньн сери у баԝәр ьн, кӧ Хԝәде ԝе хирәта ԝан хәлат кә (Колоси 3:23, 24).

13. Йаһоԝа ча дьньһерʹә сәр ве йәке, гава әм бь хирәт ԝирʹа хьзмәт дькьн?

¹³ Һәрге әм рʹуспи ниньн жи, әм гьшк дькарьн тьштәки бьдьнә Йаһоԝа. Гава әм чь жь дәсте мә те дькьн,  ԝәки Хԝәдерʹа хьзмәт кьн, әԝе жь мә рʹази бә. Әԝ ван ԛӧрбанед мәйә бьчʹук жи дьвинә, йед кӧ әм бона шьхӧле һʹәмдьнйайе дькьн. Һәрге әм шәрмокә нә, ле йәкә сәр щьвата дәсте хԝә бьльнд дькьн кӧ щаба хԝә бьдьн, дьле Хԝәде ша дьбә у әԝ жь мә рʹази йә. Гава әм шашийед мәрьва дьбахшиньнә ԝан, Әԝ гәләк ша дьбә. Һәрге тӧ нькари һаԛас Йаһоԝарʹа хьзмәт ки чьԛас кӧ дьхԝази, диса жи баԝәр бә, кӧ Әԝ ве йәке ԛимәт дькә, чь кӧ тӧ жь дьл дьки. Әԝ тә һʹәз дькә, чьмки тӧ йәки хирәт и у әԝе тә хәлат кә (Луԛа 21:1-4).

НЕЗИКИ ХԜӘДАЙЕ САХ БЬМИНӘ

14. Чьрʹа фәрз ә, кӧ һәләԛәтийа мә тʹәви Йаһоԝа незик бә? (Бьньһерʹә ӧса жи шькьл.)

¹⁴ Һәрге һәләԛәтийа мә тʹәви Йаһоԝа незик ә, әме һәр тьшти бькьн, кӧ ԝирʹа амьн бьминьн. Сәрһатийа Усьв бинә бира хԝә. Әԝи Хԝәде һʹәз дькьр у нәдьхԝәст дьле ԝи бешинә. Ләма жи әԝи бенамуси нәкьр (Дәстпебун 39:9). Сәва кӧ әм незики Йаһоԝа бьн, әм гәрәке жерʹа дӧа бькьн у Кʹьтеба Пироз лекʹолин кьн. Бь сайа ван тьшта, достийа мә тʹәви Хԝәде ԝе дьһа ԛәԝи бә у әме һәр тьшти бькьн, кӧ дьле ԝи нәешиньн (Аԛуб 4:8).

15. Әм дькарьн жь сәрһатийа Исраелийа чь дәрса һин бьн? (Ибрани 3:12)

¹⁵ Кәсед кӧ бир дькьн, ԝәки Йаһоԝа Хԝәдайе сах ә, һеса дькарьн жь ԝи дур кʹәвьн. Һәла бинә бира хԝә, кӧ гава Исраели бәрʹийеда бун, чь һатә сәре ԝан. Ԝана заньбу, ԝәки Йаһоԝа һәйә, ле шьк кʹәтә дьле ԝан кӧ Әԝе ԝана бьбә хԝәйи. Ԝана һәла һе пьрсәкә ӧса да: «Гәло Хӧдан нав мәда йә йан на?» (Дәркʹәтьн 17:2, 7). Паши ве йәке, әԝана һьмбәри Хԝәде дәркʹәтьн. Ԝәрә әм тʹӧ щар чʹәʹв нәдьнә ԝан (Бьхунә Ибрани 3:12).

16. Чь дькарә баԝәрийа мә бьщерʹьбинә?

¹⁶ Иро әм рʹасти щурʹә-щурʹә чәтьнайа тен, жь бо чь жи мәрʹа һеса нинә һәләԛәтийа хԝә тʹәви Йаһоԝа ԛәԝи  хԝәй кьн. Гәләк мәрьв баԝәр накьн, кӧ Хԝәде һәйә. Щара ӧса дькарә бе кʹьфше, ԝәки һʹале ԝан мәрьва, йед кӧ гӧһ надьнә Хԝәде дьһа баш ә, нә кӧ йа мә. Әв йәк дькарә баԝәрийа мә бьщерʹьбинә. Һәмьки әм инкʹар накьн, кӧ Хԝәде һәйә, ле диса жи, дьбәкә әм бәр хԝә кʹәвьн һәла Әԝ али мә дькә, йан на. Ньвискʹаре Зәбура 73 жи ԝәхтәки бона ве йәке бәр хԝә дькʹәт. Гава әԝи дит, ԝәки мәрьвед кӧ гӧһ надьнә ԛанунед Хԝәде, чьԛас бәхтәԝар тенә кʹьфше, әԝи жь хԝә пьрси, гәло һежа йә кӧ әԝ Хԝәдерʹа хьзмәт кә, йан на? (Зәбур 73:11-13).

17. Чь дькарә али мә бькә незики Йаһоԝа бьминьн?

¹⁷ Чь али ви зәбурбежи кьр, кӧ әԝи ньһерʹандьна хԝәйә нәрʹаст гӧһаст? Пешийе әԝи дина хԝә да сәр ве йәке, кӧ чь те сәре ԝан мәрьва, йед кӧ Йаһоԝа бир дькьн (Зәбур 73:18, 19, 27). Ӧса жи, әԝи да бәр чʹәʹве хԝә, кӧ хьзмәткʹаред Хԝәде чь кʹаре дьстиньн (Зәбур 73:24). Әм жи дькарьн дина хԝә бьдьнә кʹәрәмед кӧ мә жь Йаһоԝа стандийә. Һәла бьфькьрә, һәрге мә Йаһоԝарʹа хьзмәт нәкьра, жийина мә ԝе чь щурʹәйи буйа. Мина зәбурбеж, ԝәрә әм жи Йаһоԝарʹа амьн бьминьн у ӧса бежьн: «Бона мьн ԛәнщ ә, незики Хԝәде бьм» (Зәбур 73:28).

18. Чьрʹа әм гәрәке нәтьрсьн, кӧ дәмәкә незикда ԝе чь бьԛәԝьмә?

¹⁸ Әм Хԝәдайе сахрʹа хьзмәт дькьн, ләма жи әм дькарьн һьмбәри һʹәму чәтьнайед ван рʹожед хьлазийе сәбьр кьн (1 Тʹесалоники 1:9). Хԝәдайе мә һазьр ә али хьзмәткʹаред хԝә бькә. Ԝәʹде бәре, Әԝ хьзмәткʹаред хԝә дьбу хԝәйи у иро жи Әԝ тʹәви мә йә. Дәмәкә незикда, тәнгасийа мәзьн ԝе дәстпебә. Ле нәлазьм ә кӧ әм бьтьрсьн, чьмки Хԝәде ԝе мә тʹәне нәһелә (Ишайа 41:10). Ԝәрә әм бь мерхаси бежьн: «Хӧдан пьштоване мьн ә у әз натьрсьм» (Ибрани 13:5, 6).