Пьрсед Хԝәндәвана
Зәбур 12:7 ӧса дәстпедьбә: «Те нобәдарийа [ԝан] бьки». Гәло әв гьли дәрһәԛа «бәләнгаза» йә (рʹеза 5), йан әв бәʹса «готьнед Хӧдан» дькә (рʹеза 6)?
Контекста ԝан рʹеза дьдә кʹьфше, ԝәки рʹеза 7-да хәбәрдан дәрһәԛа мәрьва дьчә.
Ль гора Зәбур 12:1-4, кәсед «амьн жь нава мәрьва һатьнә һьлатьн». Ньһа дина хԝә бьдә Зәбур 12:5-7:
«‹Бона хатьре фәԛиред шеланди
У заринийа бәләнгаза,
Әзе ньһа рʹабьм› Хӧдан дьбежә,
‹Ԝан бькьмә щики бехоф, кʹижан дәмана ԝе йәке нә›.
Готьнед Хӧдан, готьнед хальс ьн,
Мина зиве кʹура ахинда һʹәланди нә у һʹәфт щара әԝ паԛьжкьри нә.
Хӧдано, Те нобәдарийа [ԝан] бьки,
Һʹәта-һʹәтайе [ԝана] жь ви ньсьли хԝәй ки».
Рʹеза 5 дьдә кʹьфше, кӧ Хԝәде дәрһәԛа «бәләнгаза» дьбежә, кӧ Әԝе ԝана хьлаз кә.
Рʹеза 6-да те готьне, кӧ «готьнед Хӧдан, готьнед хальс ьн», мина «зиве». Бәле, бона мә Кʹьтеба Пироз бь рʹасти жи гәләк ԛимәт ә (Зәбур 18:30; 119:140).
Паше, Зәбур 12:7 ӧса дьбежә: «Хӧдано, Те нобәдарийа [ԝан] бьки, һʹәта-һʹәтайе [ԝана] жь ви ньсьли хԝәй ки». Гәло хәбәра «ԝан» бәʹса чь йан кʹе дькә?
Жь бәр кӧ рʹеза 7 паши рʹеза шәша те, кʹидәреда ньвисар ә «готьнед Хӧдан», һьнә мәрьв дьбәкә дьфькьрьн, ԝәки хәбәра «ԝан» бәʹса гьлийед Хԝәде дькә. Әм рʹьнд заньн, ԝәки Хԝәде Кʹьтеба Пироз пʹарьстийә жь ԝан дьжмьна, йед кӧ дьхԝәстьн ве кʹьтебе ԛәдәхә кьн у кʹӧта кьн (Ишайа 40:8; 1 Пәтрус 1:25).
Ле чаԝа кӧ рʹеза 5 дьдә кʹьфше, Йаһоԝа али фәԛира у «бәләнгаза» дькә у ԝана хьлаз дькә (Ибо 36:15; Зәбур 6:4; 31:1, 2; 54:7; 145:20).
Демәк, рʹеза 7-да хәбәра «ԝан» дәрһәԛа кʹе те готьне?
Гава әм ве зәбуре һур бь һур лекʹолин дькьн, әм фәʹм дькьн ԝәки хәбәра «ԝан», бәʹса мәрьва дькә.
Зәбур 12:1 бәʹса мәрьвед «амьн» дькә, кʹижана кӧ мәрьвед хьраб дьхапиньн. Паше, рʹеза 3-да те готьне, кӧ Йаһоԝа ԝе «заре һʹәму һʹьләкʹара бьбьрʹә». Ль гора ве зәбуре, әм дькарьн баԝәр бьн, ԝәки Хԝәде ԝе хьзмәткʹаред хԝә хьлаз кә, чьмки гьлийед «хальс ьн», демәк зәлал ьн.
Ләма жи рʹеза 7 дьбежә, кӧ Йаһоԝа ԝе «ԝан» мәрьва, демәк кәсед кӧ жь алийе хьрабава рʹасти зӧлмийе тен, бьпʹарезә у хьлаз кә.
Ньвисаред Ибранида йед Масорети, хәбәра «ԝан» те хәбьтандьне. Септуагинта Йунанида рʹеза 7-да, дӧ щара хәбәра «мә» ньвисийә, ләма жи ча кʹьфш ә әв дәрһәԛа фәԛир у «бәләнгаза» йә. Ӧса жи рʹеза 7 дьбежә, кӧ Хԝәде ԝе кәсед амьн «жь ви ньсьли хԝәй» кә, демәк жь мәрьвед хьраб (Зәбур 12:7, 8). Ԝәлгәрʹандьнәкә Ньвисаред Ибранида сәр зьмане Арами, рʹеза 7-да ӧса те готьне: «ЙА ХӦДАН, тӧйе кәсед рʹаст бьпʹарези, тӧйе ԝана һʹәта-һʹәтайе жь ви ньсьле хьраб бьпʹарези». Әв ԝәлгәрʹандьн жи избат дькә, ԝәки Зәбур 12:7 бәʹса «готьнед Хӧдан» накә.
Ләма жи әв рʹез гӧмане дьдә мәрьвед «амьн», кӧ Хԝәде ԝе али ԝан бькә.
