1. Ԛьрʹна йәкеда щьват ча организәкьри бу?

 ГАВА Йаһоԝа щабдарийа дьдә хьзмәткʹаред хԝә, әԝ дьхԝазә кӧ әԝана бь тʹәрбәти ве йәке бькьн (1 Корьнтʹи 14:33). Мәсәлә, хԝәстьна Йаһоԝа әв ә, кӧ мьзгини сәр тʹәмамийа дьнйайе бе бәлакьрьне (Мәтта 24:14). Йаһоԝа әв шьхӧл дайә дәсте Иса. У Иса дина хԝә дьде, ԝәки әв шьхӧл бь тʹәрбәти бе кьрьне. Ԛьрʹна йәкеда, гәләк бажарада щьват дьһатьнә сазкьрьне у рʹуспи дьһатьнә кʹьфшкьрьне, кӧ рʹебәрийе ван щьвата бькьн (Кʹаред Шандийа 14:23). Оршәлимеда кʹомәкә рʹуспийа, йед кӧ шанди у меред әʹмьрда мәзьн бун, тьшт сафи дькьрьн, у һʹәму щьвата гәрәке хԝә ль ван сафикьрьна бьгьртана (Кʹаред Шандийа 15:2; 16:4). Хушк-бьра гӧһ дьданә ве рʹебәрийе, ләма жи щьват «баԝәрийеда дьшьдийан у рʹож бь рʹож һʹәсабе ԝан зедә дьбу» (Кʹаред Шандийа 16:5).

2. Жь сала 1919, Йаһоԝа ча рʹебәрийа щьмәʹта хԝә дькә у хԝарьна рʹӧһʹани дьдә ван?

² Иро жи, Йаһоԝа хьзмәткʹаред хԝә организә дькә. Жь сала 1919, Иса кʹомәкә бьчʹук жь меред бь рʹӧһʹ кʹьфшкьри саз кьр, ԝәки рʹебәрийа шьхӧле бәлакьрьна мьзгинийе бькә у ԝәʹдәда хԝарьна рʹӧһʹани бьдә пәйчуйед ԝи a (Луԛа 12:42). Әшкәрә йә ԝәки Йаһоԝа шьхӧлед ԝан кʹәрәм дькә (Ишайа 60:22; 65:13, 14).

3-4. (а) Әв йәк кӧ әм организәкьри нә, чьрʹа керһати йә? Мәсәлә бинә. (б) Ве готареда әме чь шеԝьр кьн?

 ³ Һәрге әм организәкьри нибуна, мәйе нькарьбуйа щабдарийед кӧ Иса дайә мә бьанийа сери (Мәтта 28:19, 20). Мәсәлә, һәрге бьра мьһал сәр щьвата пʹаравәнәкьрана, ԝи чахи һәр кәс ԝе кʹидәре бьхԝәста ԝедәре хьзмәт кьра. Ӧса мьзгинван ԝе тʹьме мьһаләк бьдана хәбате, ле мьһалед дин ԝе бьмана. Чахе әм организәкьри нә, гәло әм диса чь кʹаре дьстиньн?

⁴ Гава Иса сәр әʹрде бу, әԝи рʹебәрийа шагьртед хԝә дькьр у иро жи әԝ бәрдәԝам дькә рʹебәрийе дьдә мә. Ве готареда әме дина хԝә бьдьнә мәсәла кӧ Иса мәрʹа һиштийә у бьвиньн кӧ тʹәшкиләта мә ча чʹәʹв дьдә ве мәсәле. Ӧса жи әме бьвиньн, кӧ әм чаԝа дькарьн нишан кьн, ԝәки әм тʹәшкиләта Йаһоԝа ԛимәт дькьн.

ТʹӘШКИЛӘТА МӘ ЧʹӘʹВ ДЬДӘ ИСА

5. Әм ча дькарьн чʹәʹв бьдьнә Иса? (Йуһʹәнна 8:28)

⁵ Иса жь Баве хԝәйи әʹзмана һин бьбу, кӧ чь бькә у чь бежә. Тʹәшкиләта Йаһоԝа чʹәʹв дьдә Иса у ль гора Кʹьтеба Пироз һин дькә у рʹебәрийа мә дькә (Бьхунә Йуһʹәнна 8:28; 2 Тимотʹейо 3:16, 17). Тʹәшкиләт тʹьме мәрʹа дьбежә, кӧ әм Кʹьтеба Пироз бьхуньн у ль гора ве йәке бьжин. Гәло чьрʹа әм гәрәке гӧһ бьдьнә ве ширәте?

6. Әм чаԝа жь лекʹолина Кʹьтеба Пироз кʹаре дьстиньн?

⁶ Гава әм Кʹьтеба Пироз бь аликʹарийа әʹдәбйәтед тʹәшкиләта мә лекʹолин дькьн, әм кʹаре дьстиньн. Мәсәлә, әм дькарьн һинкьрьнед Кʹьтеба Пироз бәрамбәри ван рʹебәрийа бькьн, йед кӧ әм жь тʹәшкиләте дьстиньн. Чахе әм дьвиньн кӧ рʹебәрийа тʹәшкиләте сәр һʹиме Кʹьтеба Пироз ә, әм дьһа зедә итʹбарийа хԝә тʹәшкиләта Йаһоԝа тиньн (Рʹомайи 12:2).

7. Иса чь дькьр у тʹәшкиләта Йаһоԝа ча чʹәʹв дьдә ԝи?

⁷ Иса Мьзгинийа дәрһәԛа Пʹадшатийа Хԝәде бәла дькьр (Луԛа 4:43, 44). Әԝи ӧса жи шагьртед хԝә дьшанд, ԝәки әԝана ве Мьзгинийе бәла кьн (Луԛа 9:1, 2; 10:8, 9). Иро һәр кәс, кʹе кӧ нава тʹәшкиләта Йаһоԝада нә, фьрԛи тʹӧнә чьԛас щабдарийед ԝан һәнә у әԝана кʹидәре дьжин, гьшк жи мьзгинийе бәла дькьн.

8. Чь ԛәдьр мәрʹа һатийә дайине?

⁸ Бона мә ԛәдьрәки гәләк мәзьн ә, кӧ әм дькарьн кәсед дьнрʹа дәрһәԛа Пʹадшатийа Хԝәде гьли кьн. Әв ԛәдьр һәр кәсирʹа нәһатийә дайине. Мәсәлә, гава Иса сәр әʹрде бу, әԝи изьн нәдьда, ԝәки щьн дәрһәԛа ԝи хәбәр дьн (Луԛа 4:41). Иро, һәрге кәсәк бьхԝазә тʹәви хьзмәткʹаред Йаһоԝа мьзгинийе бәла кә, пешийе әԝ гәрәке ль гора принсипед Йаһоԝа бьжи у избат кә, кӧ әԝ бона ве йәке һазьр ә. Чахе әм һʹәму мәщала дьдьнә хәбате, ԝәки мьзгинийе бәла кьн, бь ве йәке әм дьдьнә кʹьфше, кӧ ви шьхӧли ԛимәт дькьн. Мина Иса, нета мә әв ә, кӧ тʹохьмед рʹастийе дьле мәрьвада бьчиньн у ав дьн (Мәтта 13:3, 23; 1 Корьнтʹи 3:6).

9. Тʹәшкиләта мә ча наве Хԝәде әʹйан дькә?

⁹ Иса наве Хԝәде әʹйан дькьр. Дӧайе хԝәда, Иса ӧса гот: «Мьн тӧ ԝанва дайи әʹйанкьрьне» (Йуһʹәнна 17:26). Тʹәшкиләта Йаһоԝа чʹәʹв дьдә Иса у бь дьл у щан һәр тьшти дькә, ԝәки мәрьв дәрһәԛа наве Хԝәде пебьһʹәсьн. Сәд һʹәйф кӧ наве Хԝәде жь гәләк ԝәлгәрʹандьнед Кʹьтеба Пироз һатийә дәрхьстьне. Ле Ньвисаред  Пироз Ԝәлгәрʹандьна Дьнйа Тʹәзәда, наве Хԝәде ван һʹәму щийа һатийә ньвисаре, кʹидәре кӧ ньвисаред орижиналеда һәбу. Әв ԝәлгәрʹандьна Кʹьтеба Пироз йан һьнә пʹаред ԝе, сәр 270 зьмана зедәтьр һатийә дәрхьстьне. Һун дькарьн брошуреда бь наве Рʹебәри бона Һинбуна Кʹьтеба Пироз, сәр рʹупʹелед 1-5 у 6-13 бьньһерʹьн, кӧ ча наве Хԝәде Кʹьтеба Пирозда диса ван щийа һатийә ньвисаре, кӧ орижиналеда һәбу. Ньвисаред Пироз Ԝәлгәрʹандьна Дьнйа Тʹәзәда йа бона Һинбуне, бьньһерʹә Әʹламәтийа Зедә Щ, кʹидәреда гәләк избаткьрьн һәнә, кӧ чьрʹа наве Хԝәде, гәрәке Ньвисаред Пирозә Йунанида 237 щара һәбә.

10. Гьлийе жьнькәкә жь Мйанмаре чь дьдә кʹьфше?

¹⁰ Мина Иса, әм жи дьхԝазьн али мәрьва бькьн, ԝәки әԝана наве Хԝәде бьзаньбьн. Мйанмареда, гава жьнькәкә 67 сали пеһʹәсийа, кӧ наве Хԝәде һәйә, кʹәла ԝе тʹьжи бу у әԝе гот: «Әз щара пешьн дьбьһем, кӧ наве Хԝәде Йаһоԝа йә. . . . Әв тьштәки һәри фәрз ә, чь кӧ мьн әʹмьре хԝәда бьһистийә». Бәле, гава мәрьвед дьлсах дәрһәԛа наве Хԝәде педьһʹәсьн, әв йәк дькарә әʹмьре ԝан бьгӧһезә.

ТʹЬМЕ ТʹӘШКИЛӘТА МӘ ԚИМӘТ КӘ

11. Рʹуспи ча дькарьн бьдьнә кʹьфше, ԝәки әԝана тʹәшкиләта Йаһоԝа ԛимәт дькьн? (Бьньһерʹә ӧса жи шькьл.)

¹¹ Рʹуспийед щьвате ча дькарьн нишан кьн, ԝәки әԝана тʹәшкиләта Хԝәде ԛимәт дькьн? Гава рʹуспи рʹебәрийе дьстиньн, әԝана гәрәке рʹьнд дина хԝә бьдьнә ве рʹебәрийе у һәр тьшти бькьн, ԝәки биньн сери. Мәсәлә, әԝана дәрһәԛа ве йәке рʹебәрийе дьстиньн, кӧ гәрәке чаԝа щьвина дәрбаз кьн, ча щьватеда дӧа бькьн у ча бәрхед Иса бьбьнә хԝәйи. Гава рʹуспи пәй рʹебәрийа тʹәшкиләте дьчьн, хушк-бьра сәр хԝә тʹәхмин дькьн, кӧ Йаһоԝа ԝана һʹәз дькә у бона ԝан хәм дькә.

12. (а) Чьрʹа әм гәрәке гӧрʹа бьред щабдар бькьн? (Ибрани 13:7, 17) (б) Чьрʹа әм гәрәке дина хԝә бьдьнә хәйсәтед баш, йед бьред щабдар?

¹² Чахе әм жь рʹуспийа рʹебәрийе дьстиньн, әм гәрәке һазьр бьн, гӧһ бьдьнә ԝан. Ӧса әм дькарьн баре бьред щабдар сьвьк кьн. Кʹьтеба Пироз дьбежә, кӧ әм гәрәке гӧһдарийа ԝан бькьн (Бьхунә Ибрани 13:7, 17). Дьԛәԝьмә щарна әв йәк һеса нибә, чьмки әԝана жи мәрьвнә ԛьсурдар ьн. Һәрге әм бь зедәйи дина хԝә бьдьнә кемасийед ԝан у һʹӧнӧред ԝанә баш тʹәхмин нәкьн, әме дьле дьжмьна ша кьн. Гәло чь щурʹәйи? Дьжмьнед мә дьхԝазьн, ԝәки әм итʹбарийа хԝә рʹебәрийа тʹәшкиләта Хԝәде нәйньн. Һәрге әм итʹбарийа хԝә рʹуспийа нәйньн, ԝәхт шунда әме итʹбарийа хԝә тʹәшкиләта Йаһоԝа жи нәйньн. Гәло әм ча дькарьн дәрәԝед дьжмьна тедәрхьн у инкʹар кьн?

ИТʹБАРИЙА ХԜӘ ҺЬНДАВА ТʹӘШКИЛӘТЕ ӦНДА НӘКӘ

13. Дьжмьнед Хԝәде чь дькьн, ԝәки наве тʹәшкиләта ԝи рʹәш кьн?

¹³ Дьжмьнед Хԝәде һәр тьшти дькьн, ԝәки наве тʹәшкиләта ԝи рʹәш кьн. Мәсәлә, әм жь Кʹьтеба Пироз заньн, ԝәки Йаһоԝа дьхԝазә кӧ хьзмәткʹаред ԝи тʹәмьз бьн, ча алийе нав-намусийеда ӧса жи рʹӧһʹанида. Әԝ дьхԝазә, ԝәки кәсед кӧ хьрабийе дькьн у тʹобә накьн, жь щьвате бенә дәрхьстьне (1 Корьнтʹи 5:11-13; 6:9, 10). Әм гӧһ дьдьнә ве рʹебәрийа Кʹьтеба Пироз. Ләма жи дьжмьнед мә дьбежьн, кӧ әм мәрьва һʹәз накьн у ԝана инкʹар  дькьн, у кӧ әм ван мәрьва ԛәбул накьн, йед кӧ жь мә щӧдә дьбьн.

14. Кʹе дәрһәԛа тʹәшкиләта Йаһоԝа дәрәԝа бәла дькә?

¹⁴ Тедәрхьн кӧ һʹьщумкьрьн жь кʹе те. Мире-щьна дәрһәԛа тʹәшкиләта Йаһоԝа дәрәԝа бәла дькә, чьмки әԝ «баве дәрәԝа йә» (Йуһʹәнна 8:44; Дәстпебун 3:1-5). Ләма жи, әм әʹщебмайи наминьн, кӧ Мире-щьна бь сайа пьштгьред хԝә дәрһәԛа тʹәшкиләта Йаһоԝа дәрәԝа бәла дькә. Ԛьрʹна йәкеда жи ӧса бу.

15. Сәрԝеред религи мьԛабьли Иса у шагьртед ԝи чь дькьрьн?

¹⁵ Иса мәрьвәки беԛьсур бу у әԝи гәләк кʹәрәмәт дькьрьн. Диса жи, пьштгьред Мире-щьна дәрһәԛа ԝи гәләк дәрәԝ бәла дькьрьн. Мәсәлә, сәрԝеред религи мәрьварʹа дьготьн, кӧ Иса «щьна бь сайа сәрԝере щьна дәрдьхә» (Маркос 3:22). Гава Иса бәр диԝане сәкьни бу, сәрԝеред религи готьн, кӧ әԝ кʹьфьрийа дькә, у ԝана мәрьв һелан дькьрьн, ԝәки әԝана мьрьна ԝи бьхԝазьн (Мәтта 27:20). Паше, гава шагьртед Иса мьзгини бәла дькьрьн, дьжмьна мәрьв һьмбәри ԝан рʹакьрьн, ԝәки әԝана зӧлмийе ль ԝан бькьн (Кʹаред Шандийа 14:2, 19). Дәрһәԛа Кʹаред Шандийа 14:2, Бьрща Ԛәрәԝьлийеда йа 1 Кануна Пешьн, сала 1998, һатьбу зәлалкьрьне, кӧ Щьһуйед мьԛабьл нә тʹәне хԝәха мьзгини инкʹар кьрьн, ле ӧса жи кәсед нәщьһу һелан дькьрьн, кӧ мьԛабьли Мәсиһийа дәрен.

16. Һәрге әм дәрһәԛа тʹәшкиләте дәрәԝа бьбьһен, әм гәрәке чь биньн бира хԝә?

¹⁶ Иро жи Мире-щьна дәрәԝа дькә у «тʹәмамийа дьне хальфандийә» (Әʹйанти 12:9). Һәрге тӧ дәрһәԛа тʹәшкиләте, йан дәрһәԛа бьред щабдар дәрәԝа  бьбьһейи, бинә бира хԝә, кӧ ԛьрʹна йәкеда дьжмьнед Хԝәде ча һʹьщуми сәр Иса у шагьртед ԝи дькьрьн. Ча Кʹьтеба Пирозда һатьбу пʹехәмбәртикьрьне, хьзмәткʹаред Йаһоԝа иро жи рʹасти зӧлмийе у пәйкʹәтьна тен (Мәтта 5:11, 12). Һәрге әм фәʹм бькьн, кӧ дәрәԝи жь кʹе те, әме нәйенә хапандьне у бькарьбьн хԝә бьпʹарезьн. Гәло чь щурʹәйи?

17. Әм ча дькарьн хԝә жь дәрәԝа бьпʹарезьн? (2 Тимотʹейо 1:13) (Ӧса жи бьньһерʹьн чаргошә бь наве « Нәкʹәвә бәр Байе Дәрәԝа».)

¹⁷ Дәрәԝа инкʹар кьн. Паԝлосе шанди гот, кӧ әм гәрәке чь бькьн гава әм дәрәԝа дьбьһен. Әԝи гот кӧ «гӧһ нәдьнә чʹьловискийа» у хԝә жь «чʹьловискийед . . . һʹәрам дур хԝәй» кьн (1 Тимотʹейо 1:3, 4; 4:7). Зарʹ щарна тьштед ԛьреж дькьнә дәве хԝә, ле мәзьн ӧса накьн, чьмки әԝана заньн, кӧ әв йәк хоф ә. Мина ве йәке, әм дәрәԝа инкʹар дькьн, чьмки әм заньн, кӧ әԝана жь кʹӧдәре тен, у әм хԝә ль «һинкьрьна сахләм» дьгьрьн (Бьхунә 2 Тимотʹейо 1:13).

18. Әм ча дькарьн нишан кьн, кӧ әм ԛәдьре тʹәшкиләта Йаһоԝа дьгьрьн?

¹⁸ Ве готареда мә дит, кӧ тʹәшкиләта Йаһоԝа ча се тьштада чʹәʹв дьдә Иса Мәсиһ. Чахе тӧ Кʹьтеба Пироз лекʹолин дьки, дина хԝә бьде, кӧ тʹәшкиләта мә чь алийада чʹәʹв дьдә Иса. Али хушк-бьра бькә, ԝәки әԝана жи ԛәдьре тʹәшкиләте бьгьрьн. Бь амьни Йаһоԝарʹа хьзмәт кә у дьһа зедә итʹбарийа хԝә тʹәшкиләта ԝи бинә. Ӧса тӧйе нишан ки, ԝәки тӧ тʹәшкиләта Ԝи ԛимәт дьки (Зәбур 37:28). Ԝәрә әм тʹьме ԛимәт кьн, кӧ мәрʹа ԛәдьрәки мәзьн һатийә дайине, ԝәки әм нава хьзмәткʹаред Йаһоԝада ньн, йед кӧ амьн у дьлован ньн!