1. Щьнәта рʹӧһʹани чь йә, у әм дьхԝазьн чь бькьн?

 ИРО сәр әʹрде щьнәта бь симболик һәйә. Ве щьнәтеда бь милйона мәрьв ьн, йед кӧ әʹдьлайеда ньн у шьхӧлед баш дькьн. Мәрьвед кӧ кʹәтьнә щьнәта рʹӧһʹани, дьхԝазьн теда бьминьн у али мәрьвед дьн бькьн, ԝәки әԝана жи бькʹәвьнә ве щьнәте. Әв щьнәт, щьнәта рʹӧһʹани йә a!

2. Щьнәта рʹӧһʹани чьрʹа мәхсус ә?

² Мире-щьна ве дьнеда нәфрʹәти, хьраби у хофи тʹьжә кьрийә, ле Йаһоԝа щики симболик саз кьрийә, кʹидәре кӧ әʹдьлайи у йәкти һәйә (1 Йуһʹәнна 5:19; Әʹйанти 12:12). Хԝәдайе мәйи дьлован дьвинә, кӧ әв система хьраб чаԝа зьраре дьдә мәрьва, ле Әԝ али хьзмәткʹаред хԝә дькә, ԝәки әԝана хԝә бехофийеда тʹәхмин кьн у бь шабуне Ԝирʹа хьзмәт кьн. Кʹьтеба Пироз дьбежә, кӧ щьнәта рʹӧһʹани мина «сьтʹаргәһ» у «бахчәкә ави» йә (Ишайа 4:6; 58:11, ИМ). Бь сайа кʹәрәма Йаһоԝа, мәрьвед кӧ ве щьнәта рʹӧһʹанида дьжин, дькарьн ван рʹожед хьлазийеда, йед кӧ гәләк чәтьн ьн, бәхтәԝар у хԝәйкьри бьн (Ишайа 54:14; 2 Тимотʹейо 3:1).

3. Ԝәʹде бәре гьлийед жь кʹьтеба Ишайа сәре 65, ча һатьнә сери?

³ Йаһоԝа бь сайа Ишайа пʹехәмбәр, бәреда готьбу кӧ әʹмьр щьнәта рʹӧһʹанида ԝе чаԝа бә. Әм дькарьн ван гьлийа кʹьтеба Ишайа сәре 65-да бьвиньн. Әв  гьли щара пешьн сала 537, Б.Д.М.-да һатьнә сери. Ԝи ԝәʹдәйи, Щьһуйед кӧ тʹобә кьрьн, жь дилтийа Бабилоне һатьнә хьлазкьрьне у вәгәрʹийанә ԝәлате хԝә. Йаһоԝа Хԝәде щьмәʹта хԝә кʹәрәм кьр у али ԝан кьр, ԝәки әԝана бажаре Оршәлиме тʹәзәда ава кьн у пʹарьстгәһе диса бькьнә щийе һʹәбандьна рʹаст (Ишайа 51:11; Зәкәрйа 8:3).

4. Иро гьлийед жь Ишайа сәре 65 ча тенә сери?

⁴ Гьлийед жь кʹьтеба Ишайа сәре 65, щара дӧда жь сала 1919 Д.М.-да дәстпекьрьн бенә сери. Ԝе сале хьзмәткʹаред Йаһоԝа жь дилтийа Бабилона Мәзьн һатьнә азакьрьне. Паше, щьнәта рʹӧһʹани сәр тʹәмамийа дьнйайе һеди-һеди мәзьн бу. Мьзгинванед хирәт гәләк щьват ава кьрьн у хәйсәт-һʹӧнӧред баш нав хԝәда пешда анин. Кәсед кӧ бәре мина гӧр у шера, зӧльм у зордар бун, тʹәрка хәйсәтед хьраб дан, «мәрьве ну» ль хԝә кьрьн у бунә мәрьвнә баш (Әфәси 4:24). Һәмьки гәләк кʹәрәмед кӧ Ишайа пʹехәмбәрти кьрьбу, ԝе бь тʹәмами дьнйа тʹәзәда бенә сери. Ле һәла һе иро жи, әм жь щьнәта рʹӧһʹани кʹарәкә мәзьн дьстиньн. Ньһа әме бьвиньн, кӧ щьнәта рʹӧһʹани ча сәр мә һʹӧкӧм дькә у чьрʹа әм гәрәке тʹӧ щар жь ве щьнәте дәрнәкʹәвьн.

МӘРЬВЕД КӦ ЩЬНӘТА РʹӦҺʹАНИДА НЬН ЧА ХԜӘ ТʹӘХМИН ДЬКЬН

5. Ль гора созе жь Ишайа 65:13, әʹмьре щьнәта рʹӧһʹанида чаԝа нә?

⁵ Рʹӧһʹанида тʹер у сьһʹәт-ԛәԝат ьн. Пʹехәмбәртийа Ишайа фьрԛийа мәзьн дьдә кʹьфше ортʹа кәсед кӧ щьнәта рʹӧһʹанида дьжин у кәсед дьн (Бьхунә Ишайа 65:13). Йаһоԝа бь мәрʹдани али хьзмәткʹаред хԝә дькә, ԝәки әԝана достийа хԝә тʹәви Ԝи хԝәй кьн. Хԝәде рʹӧһʹе пироз дьдә мә, бал мә Кʹьтеба Пироз һәйә у ӧса жи гәләк әʹдәбйәтед сәр һʹиме Кʹьтеба Пироз. Ләма жи әм алийе рʹӧһʹанида тʹер у бәхтәԝар ьн (Бәрамбәр кә Әʹйанти 22:17). Ле мәрьвед кӧ щьнәта рʹӧһʹанида ниньн, ԝе «бьрʹчи бьминьн . . . , тʹи бьминьн . . . , [у] шәрми бьн, ИМ». Әԝана жь Хԝәде дур ьн, ләма жи ԝи һʹалида ньн (Амос 8:11).

6. Йоԝел 2:21-24-да дәрһәԛа чь те готьне у әм ча дькарьн жь ван тьшта кʹаре бьстиньн?

⁶ Йоԝел пʹехәмбәр, тьштед кӧ Йаһоԝа бь мәрʹданийе дьдә хьзмәткʹаред хԝә, бәрамбәри гәньм, шәрав у бьзьре зәйтʹуне кьр (Йоԝел 2:21-24). Йаһоԝа һʹәԝщед мәйә рʹӧһʹани рʹази дькә бь аликʹарийа Кʹьтеба Пироз, әʹдәбйәтед мәйә сәр һʹиме Кʹьтеба Пироз, малпәра мә, щьват у щьватед мәзьн. Әм дькарьн һәр рʹож жь ван тьшта кʹаре бьстиньн у рʹӧһʹанида тʹер у сьһʹәт-ԛәԝат бьн.

7. Ль гора Ишайа 65:14, әм чьрʹа бәхтәԝар ьн?

⁷ Ша у рʹази нә. Щьмәʹта Йаһоԝа шабуна дькьнә ԛирʹин, чьмки дьле ԝана бь рʹазибуне тʹьжә йә (Бьхунә Ишайа 65:14). Рʹастийед Кʹьтеба Пироз, йед кӧ баԝәрийа мә ԛәԝи дькьн у бәрдьлийе дьдьнә мә, у гӧмана мәйә сәр һʹиме ԛӧрбана Иса, шабуне дькьнә дьле мә. Гава әм тʹәви хушк-бьра дәрһәԛа ван тьшта хәбәр дьдьн, әв йәк мә бь рʹасти бәхтәԝар дькә! (Зәбур 34:8; 133:1-3)

8. Дӧ нишанед фәрз, йед щьнәта рʹӧһʹани кʹижан ьн?

⁸ Һʹәзкьрьн у йәктийа нав хьзмәткʹаред Йаһоԝада, дӧ нишанед щьнәта рʹӧһʹани нә. Әв «йәктийа тʹам» нишани мә дькә, кӧ әʹмьр дьнйа тʹәзәда ԝе  чь щурʹәйи бә. Ԝи чахи һʹәзкьрьн у йәктийа ортʹа мәда, ԝе дьһа ԛәԝи бә (Колоси 3:14). Хушкәкә мә тинә бира хԝә, кӧ гава әԝе Шәʹдед Йаһоԝа нас кьр, әԝе чь тедәрхьст. Әԝ дьбежә: «Бәре мьн шабун нәдьстанд, һәла һе малбәта хԝәда жи. Мьн һʹәзкьрьна жь дьл щара пешьн нав Шәʹдед Йаһоԝада дит». Һәр кәсе кӧ дьхԝазә бь рʹасти бәхтәԝар бә, гәрәке бькʹәвә щьнәта рʹӧһʹани. Фьрԛи тʹӧнә кӧ мәрьвед ве дьнйайе дәрһәԛа мә чь дьфькьрьн, Йаһоԝа Хԝәде у малбәта ԝи мә һʹәз дькьн (Ишайа 65:15).

9. Ишайа 65:16, 17-да чь соз мәрʹа һатийә дайине?

⁹ Дьлрʹьһʹәт ьн. Ишайа 65:14-да те готьне, ԝәки кәсед кӧ нахԝазьн бькʹәвьнә щьнәта рʹӧһʹани, ԝе жь еша дьл бькьнә ԛирʹин у жь хәмгинийе бькьнә ахин. Ле әм чь дькарьн бежьн дәрһәԛа ԝан чәтьнайа, рʹасти кʹижана әм тен? Кʹьтеба Пирозда те готьне: «Тәнгасийед бәре һатьн биркьрьн у бь тʹәвайи жь бәр чʹәʹве [Хԝәде] һатьн вәшартьн» (Бьхунә Ишайа 65:16, 17). Бәле, Йаһоԝа Хԝәде ԝе һʹәму дәрдед мә кʹокева бьдә һьлдане у ԝәхт шунда әме ван һʹәму кӧл-дәрда бь тʹәмами бир кьн.

10. Әм чьрʹа һәләԛәтийа хԝә тʹәви хушк-бьра дьшекьриньн? (Бьньһерʹә ӧса жи шькьл.)

¹⁰ Чахе әм дьчьнә щьвата, әм дьлрʹьһʹәтийе дьстиньн у дәрдед хԝә бир дькьн. Гава әм һʹӧнӧред ӧса ча һʹәзкьрьн, шабун, әʹдьлайи, сәбьркьрьн, ширьнайи, ԛәнщи, баԝәри, мьлукти у хԝәгьртьне дьдьнә кʹьфше, бь ве йәке дьлрʹьһʹәти у әʹдьлайи нав хушк-бьрада пешда те (Галати 5:22, 23). Чь кʹәрәмәкә мәзьн ә, кӧ әм пʹара тʹәшкиләта Йаһоԝа нә! Кәсед кӧ щьнәта рʹӧһʹанида ньн, ԝе бьвиньн кӧ ча Хԝәде созе хԝә тинә сери у «әʹзманәки ну у әʹрдәки ну, ИМ» чедькә.

11. Ль гора Ишайа 65:18, 19, щьнәта рʹӧһʹани гәрәке сәр мә ча һʹӧкӧм кә?

¹¹ Шекьрдар ьн. Ишайа пʹехәмбәр шьровәдькә, кӧ чьрʹа әм гәрәке щьнәта рʹӧһʹанида «ша у . . . дьлгәш» бьн. Мәʹни әв ә, кӧ щьнәта рʹӧһʹани сазкьрьна Йаһоԝа йә (Бьхунә Ишайа 65:18, 19). Йаһоԝа дьхԝазә, ԝәки әм али кәсед дьн бькьн, кӧ әԝана жи жь ве дьнйа хьраб дәркʹәвьн у бькʹәвьн щьнәта рʹӧһʹани. Әм жь щьнәта рʹӧһʹани гәләк кʹәрәм у шабуне дьстиньн, ләма жи әм дьхԝазьн мәрьвед дьнрʹа жи дәрһәԛа ве щьнәте бежьн (Йерәмйа 31:12).

12. Тӧ дәрһәԛа созед жь Ишайа 65:20-24 чь дьфькьри?

 ¹² Әм бьнәлийед щьнәта рʹӧһʹани нә у Йаһоԝа гӧман дайә мә у әм бона ве йәке жи гәләк рʹази нә. Бьдьнә бәр чʹәʹве хԝә, кӧ әме дьнйа тʹәзәда чь бьвиньн у чь бькьн! Кʹьтеба Пироз соз дьдә: «Ԝе ида ль ԝедәре зарʹокәки кӧ тʹәне чәнд рʹожа дьжи нәбә, ԝе пирәки кӧ рʹожед хԝә тʹьжә нәкьрийә тʹӧнәбә». Әме «мала чекьн у ле рʹунен [у] рʹәза дайньн у фекийе [бәред] ԝан бьхԝьн». Әме «бәрʹәдайи кʹәда хԝә нәдьн», чьмки Йаһоԝа ԝе мә кʹәрәм кә. Бәле, Йаһоԝа жийинәкә хԝәш мәрʹа соз дайә. Ԝи чахи, пешийа кӧ кәсәк гази Хԝәде кә, Әԝе пешда һʹәԝщед ԝи бьзаньбә у «һʹәму бинбәри гора дьле ԝан тʹер» бькә (Ишайа 65:20-24, ИМ; Зәбур 145:16).

13. Ль гора Ишайа 65:25, кәсед кӧ дьбьнә хьзмәткʹаред Йаһоԝа, дәстпедькьн чь бькьн?

¹³ Әʹдьлайи у бехофийеда ньн. Бь аликʹарийа рʹӧһʹе пироз, гәләк мәрьвед кӧ бәре зӧльм, шәрʹуд йан жи берʹәʹм бун, щурʹе жийина хԝә гӧһастьнә (Бьхунә Ишайа 65:25). Әԝана сәр хԝә хәбьтинә у тʹәрка хәйсәт-һʹӧнӧред хԝәйә хьраб данә (Рʹомайи 12:2; Әфәси 4:22-24). Һәмьки хьзмәткʹаред Йаһоԝа һе ԛьсурдар ьн у шашийа дькьн. Ле диса жи, Йаһоԝа мәрьвед щурʹә-щурʹә тʹоп кьрийә, у нав ԝанда йәкти у әʹдьлайи һәйә (Тито 2:11). Бәле, хенщи Йаһоԝа тʹӧ кәс нькарә кʹәрәмәтәкә ӧса бькә!

14. Мәсәла бьраки ча дьдә кʹьфше, ԝәки гьлийед жь Ишайа 65:25 рʹаст ьн?

¹⁴ Гәло бь рʹасти мәрьв дькарә хәйсәт-һʹӧнӧре хԝә бьгӧһезә? Ԝәрә әм дина хԝә бьдьнә ве мәсәле. Хортәки 20 сали гәләк щар кʹәтьбу кәле. Әԝ йәки шәрʹуд бу у бь жийинәкә бенамус дьжит. Әԝи әʹрәбә дьзи бу, малед мәрьва тʹалан кьрьбу у ԛачахтийед дьн жи кьрьбу, ләма жи ԝи кьрьбунә кәле. Әԝи тʹьме дьхԝәст шәрʹа бькә. Гава әԝи щара пешьн дәрһәԛа рʹастийа Кʹьтеба Пироз бьһист у чу сәр щьватед Шәʹдед Йаһоԝа, әԝ дӧдьли нәдьбу, кӧ әԝи нета жийине дитийә, у щьнәта рʹӧһʹани һәма әв ә. Чахе әԝ бу Шәʹде Йаһоԝа, әԝи гәләк щар дьда бәр чʹәʹве хԝә, кӧ гьлийед жь Ишайа 65:25 ча сәр ԝи һатьнә сери. Бәре, әԝ мина гӧрәки һар бу, ле ньһа әԝ ида буйә мина бәрхәки.

15. Чьрʹа әм дьхԝазьн, ԝәки кәсед дьн жи бьбьнә пʹара малбәта Йаһоԝа у әм ча дькарьн әве йәке бькьн?

¹⁵ Ишайа 65:13 бь ван гьлийа дәстпедьбә: «Рʹәб Хӧдан ӧса дьбежә». Рʹеза 25 бь ван гьлийа хьлаз дьбә: «Дьбежә Хӧдан». Бәле, гьлийед Йаһоԝа Хԝәде тʹьме рʹаст дәрдькʹәвьн (Ишайа 55:10, 11, ИМ). Иро щьнәта рʹӧһʹани ида һәйә. Йаһоԝа жь хьзмәткʹаред хԝә малбәтәкә мәхсус саз кьрийә. Ве дьнйа хьрабда, әм нава йәктийе у әʹдьлайеда ньн, чьмки әм пʹара малбәта Йаһоԝа нә (Зәбур 72:7). Әм дьхԝазьн, кӧ кәсед дьн жи бьбьнә пʹара малбәта мә, ләма жи әм али мәрьва дькьн, ԝәки әԝана жи бьбьнә шагьртед Иса Мәсиһ (Мәтта 28:19, 20).

АЛИ КӘСЕД ДЬН БЬКӘ КӦ ӘԜАНА ЖИ БЬКʹӘВЬНӘ ЩЬНӘТА РʹӦҺʹАНИ

16. Хԝәстьна мәрьва ча пешда те, кӧ бькʹәвьн щьнәта рʹӧһʹани?

¹⁶ Сәва кӧ кәсед дьн жи бьхԝазьн бькʹәвьнә щьнәта рʹӧһʹани, һәр кәс жь мә дькарә дина мәрьва бькʹьшинә сәр ве йәке, кӧ әв щики чьԛас хԝәш ә. Ве йәкеда әм гәрәке чʹәʹв бьдьнә Йаһоԝа.  Йаһоԝа зоре мәрьва накә, кӧ әԝана бькʹәвьнә тʹәшкиләта ԝи, дәԝсе әԝ бь нәрми у һʹәзкьрьне ԝана дькʹьшинә бәрбь хԝә (Йуһʹәнна 6:44; Йерәмйа 31:3). Гава кәсед дьлсах дәрһәԛа һʹӧнӧред Йаһоԝа педьһʹәсьн, әԝана дьхԝазьн незики Йаһоԝа бьн. Ле әм ча дькарьн пе хәйсәт у кьред хԝәйә баш, мәрьва бәрбь щьнәта рʹӧһʹани бькʹьшиньн?

17. Әм ча дькарьн али кәсед дьн бькьн, кӧ әԝана жи бькʹәвьнә щьнәта рʹӧһʹани?

¹⁷ Сәва кӧ әм али кәсед дьн бькьн, ԝәки әԝана жи бькʹәвьнә щьнәта рʹӧһʹани, әм гәрәке хушк-бьра һʹәз бькьн у һьндава ԝанда дьлован бьн. Гава мәрьв щара пешьн тенә сәр щьватед мә, әм дьхԝазьн, ԝәки әԝана жи мина кәсед кӧ бәре дьчунә щьвинед бажаре Корьнтʹе, ӧса бежьн: «Рʹасти жи Хԝәде нав ԝәда йә!» (1 Корьнтʹи 14:24, 25; Зәкәрйа 8:23). Ләма жи әм гәрәке бәрдәԝам кьн «һәврʹа тʹьфаԛ бьн» (1 Тʹесалоники 5:13).

18. Чь дькарә али мәрьва бькә, кӧ әԝана бьхԝазьн бьбьнә пʹара тʹәшкиләта мә?

¹⁸ Ньһерʹандьна мә сәр хушк-бьра гәрәке мина ньһерʹандьна Йаһоԝа бә. Дәԝса кӧ әм дина хԝә бьдьнә кемасийед ԝан, йед кӧ ԝе зутьрәке тʹӧнә бьн, әм гәрәке дина хԝә бьдьнә һʹӧнӧред ԝанә баш. Сәва кӧ әм проблемед ортʹа хԝәда бь һʹәзкьрьне сафи кьн, әм гәрәке «һәврʹа ширьн у дьлшәԝат бьн, ль һәв бьбахшиньн» (Әфәси 4:32). Гәләк мәрьвед кӧ ве һʹәзкьрьне нав мәда бьвиньн, ԝе бьхԝазьн бькʹәвьнә щьнәта рʹӧһʹани b.

 ЩЬНӘТА РʹӦҺʹАНИДА БЬМИНӘ

19. (а) Ль гора чаргошә бь наве « Әԝана Чун у Вәгәрʹийан», һьнә кәсед кӧ вәгәрʹийанә щьнәта рʹӧһʹани чь дьбежьн? (б) Әм гәрәке чь бькьн? (Бьньһерʹә ӧса жи шькьл.)

¹⁹ Әм бона щьнәта рʹӧһʹани гәләк шекьрдар ьн! Әв щьнәт чьԛас дьчә һаԛас хԝәш дьбә, у хьзмәткʹаред Йаһоԝа теда зедә дьбьн. Ԝәрә әм тʹьме бона ве щьнәта, кӧ Йаһоԝа дайә мә, шекьрдар бьн. Һәр кәсед кӧ һʹәԝще дьлрʹьһʹәтийе, әʹдьлайе у бехофийе нә, гәрәке бькʹәвьнә щьнәта рʹӧһʹани у теда бьминьн. Ле әм гәрәке һʹьшйар бьминьн, чьмки Мире-щьна һәр тьшти дькә, кӧ мә жь ве щьнәте дәр хә (1 Пәтрус 5:8; Әʹйанти 12:9). Әм гәрәке нәһельн, кӧ әԝ ве йәкеда сәркʹәвә. Ԝәрә әм һәр тьшти бькьн, кӧ бәдәԝбун, тʹәмьзайи у әʹдьлайа щьнәта рʹӧһʹани, бь дьл у щан бьпʹарезьн!