1. Һьнә хьзмәткʹарарʹа чьрʹа чәтьн ә һәрʹьн хьзмәтийе? (Бьньһерʹә ӧса жи шькьл.)

 ЧА ХЬЗМӘТКʹАРЕД Йаһоԝа, әм мьзгинийе бәла дькьн, чьмки әм Йаһоԝа һʹәз дькьн у дьхԝазьн али мәрьва бькьн, ԝәки әԝана жи ԝи нас кьн. Гәләк мьзгинван бь рʹасти шьхӧле бәлакьрьна мьзгинийе һʹәз дькьн. Ле һьнә кәс һаԛас жь ве йәке шабуне настиньн. Гәло чьрʹа? Һьнә мәрьв гәләк шәрмокә нә у дьфькьрьн кӧ әԝана нькарьн баш һин кьн. Һьнә кәс жи хԝә нәрʹьһʹәт тʹәхмин дькьн, гава дьчьнә мал бь мал. Һьнәк нахԝазьн мәрьва әʹщьз бькьн. Һьнәк жи нахԝазьн, кӧ жь бо мьзгинийе кәсед дьн нәрʹьһʹәт хԝә тʹәхмин кьн. Һәмьки хушк-бьред мә гәләки Йаһоԝа һʹәз дькьн, ле диса жи бона ԝан һеса нинә, кӧ тʹәви мәрьвед нәнас дәрһәԛа мьзгинийе хәбәр дьн. Ле әԝана заньн, кӧ әв шьхӧләки фәрз ә, ләма жи тʹьме хьзмәт дькьн. Бе шьк, әв йәк дьле Йаһоԝа гәләк ша дькә!

2. Һәрге тӧ щарна жь хьзмәтийе шабуне настини, чьрʹа тӧ гәрәке бәр хԝә нәкʹәви?

² Һәрге тӧ щарна жь хьзмәтийе шабуне настини, бәр хԝә нәкʹәвә. Дьԛәԝьмә мәʹни әв ә, кӧ тӧ йәки мьлук и у нахԝази бь зедәйи дина кәсед дьн бькʹьшини сәр хԝә. Ӧса жи, дьԛәԝьмә тӧ нахԝази кәсед дьн дьлтәнг ки, йан жи мәрьва әʹщьз ки. Баве тәйи әʹзмана һәстед тә рʹьнд фәʹм дькә у дьхԝазә али тә бькә (Ишайа 41:13). Ве готареда, әме дина хԝә бьдьнә пенщ дәрәща, кӧ ча һәстед ӧса алт кьн у хьзмәтийеда шабуне бьстиньн.

ЖЬ КʹЬТЕБА ПИРОЗ ԚӘԜАТЕ БЬСТИНӘ

3. Чь али Йерәмйа пʹехәмбәр дькьр хәбәра Хԝәде бәла кә?

³ Бәре жи, Хәбәра Хԝәде ԛәԝат дьда хьзмәткʹаред ԝи,  ԝәки әԝана бькарьбьн щабдарийед хԝә биньн сери. Мәсәлә, Йерәмйа пʹехәмбәр бьдә бәр чʹәʹве хԝә. Гава Йаһоԝа ԝирʹа гот, кӧ әԝ гәрәке шәʹдәтийе бьдә, әԝ тьрсийа. Йерәмйа гот: «Әз ньзаньм готьн бежьм; жь бәр кӧ щаһьл ьм!» (Йерәмйа 1:6). Ле гьлийед Йаһоԝа ԝи ԛәԝи кьрьн. Әԝи гот: «Дьле мьнда бу мина агьрәки векʹәти, . . . у әз жь бо хԝәгьртьне ԝәстийам» (Йерәмйа 20:8, 9). Щабдарийа Йерәмйа чьԛас зор бу жи, гьлийед Йаһоԝа ԛәԝат дьданә ԝи, кӧ әԝ щабдарийа хԝә бинә сери.

4. Чьрʹа лазьм ә, кӧ әм Кʹьтеба Пироз бьхуньн у сәр ве кʹур бьфькьрьн? (Колоси 1:9, 10)

⁴ Әм жи жь Хәбәра Хԝәде ԛәԝате дьстиньн. Паԝлосе шанди хушк-бьред жь бажаре Колосирʹа ньвиси, кӧ әԝана «занәбуна рʹӧһʹанива тʹьжи бьн», чь кӧ ԝе али ԝан бькьра, ӧса бьжин «чаԝа лайиԛи Хӧдан ә» у «ԛәнщикьрьнеда хԝәйибәр бьн» (Бьхунә Колоси 1:9, 10 ). Бәлакьрьна мьзгинийе йәк жь ван шьхӧлед ԛәнщ ә. Ләма жи, гава әм Кʹьтеба Пироз дьхуньн у сәр ве кʹур дьфькьрьн, баԝәрийа мә һьндава Йаһоԝа дьһа ԛәԝи дьбә, у әм дьһа баш фәʹм дькьн, кӧ Мьзгинийа дәрһәԛа бәлакьрьна Пʹадшатийа Хԝәде чьԛас фәрз ә.

5. Әм ча дькарьн жь хԝәндьн у лекʹолина Кʹьтеба Пироз бь тʹәмами кʹаре бьстиньн?

⁵ Сәва кӧ әм жь Кʹьтеба Пироз бь тʹәмами кʹаре бьстиньн, әм гәрәке ләз нәкʹәвьн у бь һʹәмде хԝә бьхуньн, лекʹолин кьн у кʹур бьфькьрьн. Һәрге тәрʹа чәтьн бә рʹезәке фәʹм бьки, ве рʹезе сәрʹа-бәрʹа нәхунә. Бь сайа Индекса Әʹдәбийәта Бьрща Ԛәрәԝьлийе йан жи бь сайа Рʹебәрийа Лекʹолинкьрьне бона Шәʹдед Йаһоԝа, информасийайе дәрһәԛа ве рʹезе бьгәрʹә. Чьԛас тӧ һур бь һур лекʹолина бьки, һаԛас тӧйе итʹбарийа хԝә рʹастийа жь Кʹьтеба Пироз бини (1 Тʹесалоники 5:21). У чьԛас тӧ итʹбарийа хԝә ве йәке бини, һаԛас тӧйе бь шабуне дәрһәԛа ве йәке кәсед дьнрʹа жи гьли ки.

ХԜӘ БОНА ХЬЗМӘТИЙЕ ҺАЗЬР КӘ

6. Чьрʹа лазьм ә, кӧ әм хԝә бона хьзмәтийе һазьр кьн?

⁶ Һәрге тӧ хԝә бона хьзмәтийе һазьр ки, тӧйе ида нәтьрси кӧ тʹәви мәрьва хәбәр ди. Пешийа кӧ Иса шагьртед хԝә шандә хьзмәтийе, әԝи али ԝан  кьр, кӧ әԝана хԝә бона ве йәке һазьр кьн (Луԛа 10:1-11). Ԝана ль гора рʹебәрийа ԝи һәрәкʹәт дькьр у хԝә бона хьзмәтийе һазьр дькьрьн, әԝана пешдачуйи бун у жь ве йәке шабун дьстандьн (Луԛа 10:17).

7. Әм ча дькарьн хԝә бона хьзмәтийе һазьр кьн? (Бьньһерʹә ӧса жи шькьл.)

⁷ Гәло әм ча дькарьн хԝә бона хьзмәтийе һазьр кьн? Мәсәлә, әм дькарьн пешда бьфькьрьн, кӧ ча мьзгинийе бь гьлийед һеса у тʹәбийәти бәла кьн. Ӧса жи әм дькарьн пешда бьфькьрьн, кӧ мәрьв ԝе чь бежьн, у чәнд щаба бона ве йәке һазьр кьн. Паше, чахе әм рʹасти мәрьва бен, әм дькарьн чаԝа һәвал, рʹьһʹәт у бь бәшәра хԝәш тʹәви ԝан хәбәр дьн.

8. Хьзмәткʹаред Хԝәде ча мина дәрданед һʹәрʹи нә?

⁸ Паԝлосе шанди ӧса гот: «Әв хьзнә нава мә дәрданед һʹәрʹида һәйә» (2 Корьнтʹи 4:7). Шьхӧле бәлакьрьна дәрһәԛа Пʹадшатийа Хԝәде бь рʹасти жи хьзнә йә, чьмки бь сайа ве йәке, мәрьв дькарьн рʹийа жийине бьвиньн (2 Корьнтʹи 4:1). Дәрданед һʹәрʹи хьзмәткʹаред Хԝәде нә, йед кӧ мьзгинийе бәла дькьн. Рʹожед Паԝлосда, һьнә тьштед ԛимәт, мәсәлә хԝарьн, шәрав у пʹәрә дәрданед һʹәрʹида щигӧһасти дькьрьн. Мина ве йәке, Йаһоԝа мьзгинийа ԛимәт тʹәсмили мә кьрийә. Әԝ ԛәԝате дьдә мә, ԝәки әм бькарьбьн ве мьзгинийе бь амьни бәла кьн.

ЖЬ ЙАҺОԜА МЕРХАСИЙЕ БЬХԜАЗӘ

9. Сәва кӧ әм жь мәрьва нәтьрсьн, әм гәрәке чь бькьн? (Бьньһерʹә ӧса жи шькьл.)

⁹ Щарна тьрса бәр мәрьва сәр мә һʹӧкӧм дькә. Гәло әм ча дькарьн әве тьрсе жь дьле хԝә дәрхьн? Ԛьрʹна йәкеда, гава шандийарʹа һатә готьне, кӧ мьзгинийе бәла нәкьн, әԝана нәтьрсийан у шьхӧле бәлакьрьна мьзгинийе нәданә сәкьнандьне, ле дәԝсе жь Йаһоԝа аликʹари хԝәстьн, ԝәки бь мерхаси мьзгинийе бәла кьн. Йаһоԝа дәрберʹа щаба дӧайе ԝан да (Кʹаред Шандийа 4:18, 29, 31). Һәрге әм щарна жь мәрьва бьтьрсьн, әм жи гәрәке дӧа бькьн. Әм гәрәке жь Йаһоԝа аликʹарийе бьхԝазьн, кӧ әм мәрьва һʹәз бькьн у бь мерхаси мьзгинийе бәла кьн.

10. Йаһоԝа ча али мә дькә? (Ишайа 43:10-12)

 ¹⁰ Йаһоԝа мә ча Шәʹдед хԝә бьжартийә у соз дайә, кӧ әԝе али мә бькә мерхас бьн (Бьхунә Ишайа 43:10-12). Мәсәлә, әԝ бь сайа ван чар тьшта али мә дькә: Йа йәке, фьрԛи тʹӧнә әм мьзгинийе кʹидәре бәла дькьн, Иса тʹьме тʹәви мә йә (Мәтта 28:18-20). Йа дӧда, Йаһоԝа бь сайа мәләка али мә дькә (Әʹйанти 14:6). Йа сьсийа, Йаһоԝа бь сайа рʹӧһʹе пироз али мә дькә, кӧ әм ван тьшта биньн бира хԝә, чь кӧ әм һин бунә (Йуһʹәнна 14:25, 26). Йа чара, Йаһоԝа гәләк хушк-бьра дайә мә. Бәле, бь аликʹарийа Йаһоԝа у хушк-бьред дәлал, әме бькарьбьн мерхас бьн у бәрдәԝам кьн мьзгинийе бәла кьн.

БЬКʹӘВӘ ҺʹӘЙРА МӘРЬВА У НЬҺЕРʹАНДЬНА ПОЗИТИВ ХԜӘЙ КӘ

11. Әм ча дькарьн хьзмәтийеда дьһа зедә мәрьва бьвиньн? (Бьньһерʹә ӧса жи шькьл.)

¹¹ Гава тӧ дьчи хьзмәтийе, ле гәләк мәрьв малда ниньн, гәло тӧ хәмгин дьби? Жь хԝә бьпьрсә: «Гәло мәрьв ньһа кʹидәре нә?» (Кʹаред Шандийа 16:13). «Гәло әԝана чунә хәбате йан жи чунә дькʹане?» Дәрәщед ӧсада, гәло тӧ дькари кʹучʹеда хьзмәт ки, кӧ бькарьби дьһа зедә мәрьва бьвини? Бьраки бь наве Щошуа дьбежә: «Әз базарада у ль щийед кӧ гәләк мәрьв дьчьн тен, мәщала дьвиньм, кӧ мьзгинийе бәла кьм». Ӧса жи, ԝәʹде хьзмәтийа мал бь мал, Щошуа у жьна ԝи Брищит, бәре еваре у Ләʹде нивро дьһа зедә мәрьва дьвиньн (Әфәси 5:15, 16).

12. Әм ча дькарьн тедәрхьн һәла чь мәрьварʹа һʹәԝас ә, йан жи әԝана баԝәрийа хԝә чь тиньн?

¹² Һәрге серида һʹәԝаса мәрьв найе гӧһ бьдә мьзгинийе, тедәрхә һәла чь ԝанрʹа һʹәԝас ә йан жи әԝана баԝәрийа хԝә чь тиньн. Щошуа у Брищит бь аликʹарийа пьрсед сәр рʹуйе бәлавока, хәбәрдане дәстпедькьн. Мәсәлә, чахе әԝана бәлавока бь наве Чь Һун Дәрһәԛа Кʹьтеба Пироз Дьшьрмиш Дьбьн? дьдьнә хәбате, әԝана ӧса дьбежьн: «Һьнә мәрьв һʹәсаб дькьн ԝәки Кʹьтеба Пироз жь Хԝәде йә, ле һьнәк жи на. Ле һун ча дьфькьрьн?» Бь ве методе, гәләк щар хәбәрдана һʹәԝас пешда те.

13. Һәрге мәрьв гӧһ нәдьнә мә, чьрʹа әм диса жи дьгьһижьнә нета хԝә? (Мәтʹәлок 27:11)

 ¹³ Һәрге хьзмәтийеда мәрьв гӧһ нәдьнә мә, диса жи әм дьгьһижьнә нета хԝә. Гәло чь щурʹәйи? Әм хԝәстьна Йаһоԝа у Иса тиньн сери (Кʹаред Шандийа 10:42). Һәрге һʹәчʹи зәʹф мәрьв мале нибьн жи, йан жи мьзгинийе инкʹар кьн, йәкә әм гәрәке шабуна хԝә ӧнда нәкьн, чьмки әм заньн, ԝәки Баве мәйи әʹзмана жь мә рʹази йә (Бьхунә Мәтʹәлок 27:11).

14. Гава мьзгинванәк тʹәви кәсәки һинбуна Кʹьтеба Пироз дәстпедькә, чьрʹа әм гьшк ша дьбьн?

¹⁴ Ӧса жи, гава мьзгинванәк тʹәви кәсәки һинбуна Кʹьтеба Пироз дәстпедькә, әм гьшк жи ша дьбьн. Щарәке, Бьрща Ԛәрәԝьлийеда шьхӧле мә һатьбу бәрамбәркьрьне тʹәви ве йәке, гава зарʹа ӧндабуйи дьгәрʹьн. Гәләк мәрьв һʹәму щийа зарʹе дьгәрʹьн. Гава зарʹ те дитьне, нә тʹәне әв мәрьве кӧ ԝи дитийә, ле һәр кәс ша дьбә. Мина ве йәке, бәлакьрьна мьзгинийеда гәләк мәрьв кʹар дькьн. Сәва кӧ мьзгини һʹәму щийа бе бәлакьрьне, щәфе һәр кәси гәләк ԛимәт у керһати йә, у гава кәсәк тʹәзә те щьвина, һәр кәс ша дьбә.

ДИНА ХԜӘ БЬДЕ КӦ ТӦ ЧЬԚАС ЙАҺОԜА У МӘРЬВА ҺʹӘЗ ДЬКИ

15. Ча гьлийед жь Мәтта 22:37-39 дькарьн али мә бькьн, кӧ әм жь хьзмәтийе дьһа зедә шабуне бьстиньн? (Бьньһерʹә ӧса жи шькьл.)

¹⁵ Сәва кӧ әм жь бәлакьрьна мьзгинийе дьһа зедә шабуне бьстиньн, әм гәрәке дина хԝә бьдьне, һәла әм чьԛас Йаһоԝа у мәрьва һʹәз дькьн (Бьхунә Мәтта 22:37-39). Бьдә бәр чʹәʹве хԝә кӧ гава әм мьзгинийе бәла дькьн Йаһоԝа чьԛас ша дьбә. Ӧса жи гава мәрьв дәстпедькьн Кʹьтеба Пироз һин бьн, әԝана жи гәләк ша дьбьн. Мәрьвед кӧ гӧһ дьдьнә мә у сафи дькьн Йаһоԝарʹа хьзмәт кьн, дькарьн һʹәта-һʹәтайе бьжин (Йуһʹәнна 6:40; 1 Тимотʹейо 4:16).

16. Һәрге әм нькарьн жь мале дәркʹәвьн, диса жи әм ча дькарьн жь хьзмәтийе шабуне бьстиньн?

¹⁶ Һәрге мәʹни һәйә кӧ тӧ нькари жь мале дәркʹәви, тӧ диса жи дькари бьди кʹьфше, ԝәки тӧ Йаһоԝа у мәрьва һʹәз дьки. Ԝәрә әм дина хԝә бьдьнә сәрһатийа Самуел у Данийайе. Ԝәʹде пандәмийа  COVID-19, әԝана нькарьбун жь мале дәркʹәтана. Ле ԝана бәрдәԝам дькьр пе тʹеле хьзмәт кьн, нәʹмә дьньвисин у бь сайа програма Зуме һинбунед Кʹьтеба Пироз дәрбаз дькьрьн. Ӧса жи Самуел нәхԝәшханеда шәʹдәти дьда, кʹидәре кӧ ԝи жь кансәре ԛәнщ дькьрьн. Әԝ дьбежә: «Жь бо чәтьнайа, мәрьв дькарә физики, емосийали у рʹӧһʹанида сьст бә. Ләма жи әм гәрәке шабуне бьстиньн, гава әм Йаһоԝарʹа хьзмәт дькьн». Рʹожәке Данийа әʹрде кʹәт у се мәһа нькарьбу рʹабә сәр пʹийа. Паше жи, әԝ шәш мәһа кʹӧрсийа сәԛәтада бу. Данийа дьбежә: «Чь жь дәсте мьн дьһат, мьн дькьр. Мәсәлә, мьн шәʹдәти дьда аликʹарчийа дохдьре, кӧ дьһатә бал мьн у ԝан мәрьварʹа, йед кӧ тьшт дьанинә мала мьн. Ӧса жи мьн тʹәви жьнькәке хәбәр да, йа кӧ жь компанийа медисинайе бу». Бәле, чьԛас жи дәрәщә изьн нәдьда кӧ Самуел у Данийа һаԛас хьзмәт кьн, чьԛас кӧ дьхԝазьн, йәкә ԝан чь дәсте ԝан дьһат, дькьрьн. У жь ве йәке ԝана шабунәкә мәзьн дьстанд.

17. Әм ча дькарьн бь тʹәмами жь ве готаре кʹаре бьстиньн?

¹⁷ Сәва кӧ әм жь ве готаре бь тʹәмами кʹаре бьстиньн, ԝәрә әм ԝан пенщ ширәта бьдьнә хәбате. Мәсәлә, хԝарьн бь сайа чәнд тьшта те чекьрьне. Сәва кӧ хԝарьн тәʹм бә, лазьм ә кӧ һʹәму тьшт теда һәбә. Мина ве йәке, һәрге әм һʹәму ширәта бьдьнә хәбате, әме дьһа зедә хьзмәтийе һʹәз бькьн у жь ве шабуне бьстиньн.