1. Гава тӧ дәрһәԛа Йаһоԝа дьфькьри, тӧ чь дьди бәр чʹәʹве хԝә?

 ГӘЛО тә ԛә дайә бәр чʹәʹве хԝә, кӧ Йаһоԝа йәки чаԝа йә? Гава тӧ дӧа дьки, тӧ чь дьди бәр чʹәʹве хԝә? Рʹаст ә, әм нькарьн Йаһоԝа пе чʹәʹве хԝә бьвиньн, ле Кʹьтеба Пироз дьбежә, кӧ әԝ мина агьр, рʹож у мәртʹале йә (Зәбур 84:11; Ибрани 12:29). Хәйала Һәзәԛел пʹехәмбәрда, һазьрийа Йаһоԝа Хԝәде мина сафире, металәкә бьрьԛок у кʹәскәсорәкә бәдәԝ те әʹйанкьрьне (Һәзәԛел 1:26-28). Чахе әм рʹезед ӧса дәрһәԛа Йаһоԝа дьхуньн, хофа Хԝәде дькʹәвә дьле мә у һәла һе әм хԝә нәһежа жи тʹәхмин дькьн.

2. Бона һьнә мәрьва чьрʹа һеса нинә незики Йаһоԝа бьн?

² Йаһоԝа найе дитьне, ләма жи һьнәкарʹа зор ә баԝәр кьн, кӧ әԝ ԝана һʹәз дькә. Һьнә мәрьва жи дьԛәԝьмә жь алийе баве хԝәда ԛә һʹәзкьрьн нәдитьнә. Һьнәк жи әʹмьре хԝәда рʹасти гәләк кӧл-дәрда һатьнә, ләма жи дьфькьрьн кӧ Хԝәде ԝана һʹәз накә. Йаһоԝа һәстед ӧса фәʹм дькә у занә кӧ һьнә мәрьварʹа чьрʹа чәтьн ә незики ԝи бьн. Ләма жи, Йаһоԝа бь сайа Кʹьтеба Пироз нишан дькә, кӧ әԝ Хԝәдеки чьԛас дьлован ә.

3. Чьрʹа әм гәрәке дьһа зедә дина хԝә бьдьнә һʹәзкьрьна Йаһоԝа?

³ Һʹәзкьрьн һʹӧнӧре Йаһоԝайи сәрәкә йә. Ләма жи Кʹьтеба Пироз дьбежә, кӧ «Хԝәде һʹьзкьрьн ә» (1 Йуһʹәнна 4:8). Йаһоԝа һәр тьшти жь бо һʹәзкьрьне дькә. Һʹәзкьрьна Ԝи ӧса мәзьн ә, кӧ әԝ һәла һе ԝан мәрьва жи һʹәз дькә, йед кӧ  ԝи һʹәз накьн (Мәтта 5:44, 45). Ве готареда әме дьһа зедә дәрһәԛа Йаһоԝа у һʹәзкьрьна ԝи шеԝьр кьн. Әм чьԛас баш Йаһоԝа нас кьн, һаԛас һе зедә әме ԝи һʹәз бькьн.

ЙАҺОԜА ДЬЛОВАН У АМЬН Ә

4. Һʹәзкьрьн у дьлованийа Йаһоԝа сәр тә ча һʹӧкӧм дькә? (Бьньһерʹә ӧса жи шькьл.)

⁴ «[Йаһоԝа] гәләк дьлован у тʹьжә рʹәʹм ә» (Аԛуб 5:11, ИМ). Кʹьтеба Пирозда, әԝ хԝә бәрамбәри дайикәкә дьлован дькә (Ишайа 66:12, 13). Бьдә бәр чʹәʹве хԝә, кӧ дайик ча бь һʹәзкьрьне зарʹа хԝә дьдә бәр дьле хԝә. Әԝ зарʹа хԝә сәр чокед хԝә дьһʹәжинә у бь дәнгәки нәрм у ширьн жерʹа хәбәр дьдә. Гава зарʹ дьгьри, йан жи щики ԝи дешә, дайик һәр тьшти дькә, ԝәки ле рʹьһʹәт кә. Мина ве йәке, гава тӧ дьлтәнг дьби, баԝәр бә кӧ Йаһоԝа тә һʹәз дькә у ԝе рʹьһʹәтийа дьл бьдә тә. Кʹьтеба Пироз дьбежә: «Дәма дәрд-кӧл дьле мьнда зедә дьбьн, барьстанийед Тә нәфса мьн ша дькьн» (Зәбур 94:19).

5. Һʹәзкьрьна Йаһоԝайә амьн бона тә чь те һʹәсабе?

⁵ Йаһоԝа амьн ә (Зәбур 103:8). Гава әм шаши дькьн, әԝ диса жи мә һʹәз дькә. Исраели гәләк щар дьле Йаһоԝа дешандьн, ле гава әԝана пʹошман дьбун у тʹобә дькьрьн, Йаһоԝа һьндава ԝанда дьлован бу. Әԝи ԝанрʹа гот: «Тӧ бәр чʹәʹве мьн һежа у бь рʹумәт и у әз тә һʹәз дькьм» (Ишайа 43:4, 5, ИМ). Хԝәде найе гӧһастьне. Әм дькарьн баԝәр бьн, кӧ әԝ мә жи һәʹз дькә. Һәрге мә гӧнед гьран кьрийә жи, әԝ пьшта хԝә надә мә. Гава әм тʹобә дькьн у вәдьгәрʹьн бал Йаһоԝа, әм дьвиньн кӧ әԝ диса жи мә һәʹз дькә. Йаһоԝа соз дьдә кӧ әԝе «бь зедәбари бьбәхьшинә» (Ишайа 55:7, ИМ). Ӧса жи Кʹьтеба Пироз дьбежә, ԝәки гӧнәйед мә ԝе бенә бахшандьне у Йаһоԝа ԝе рʹьһʹәтийа дьл бьдә мә (Кʹаред Шандийа 3:19).

6. Зәкәрйа 2:8 дәрһәԛа Йаһоԝа чь мә һин дькә?

⁶ Бьхунә Зәкәрйа 2:8. Йаһоԝа мә һʹәз дькә, ләма жи әԝ һәстед мә фәʹм дькә у һазьр ә мә бьпʹарезә. Гава әм хәмгин дьбьн, әԝ жи хәмгин дьбә. Ләма жи әм дькарьн баԝәр бьн, кӧ әԝ мә дьбьһе гава әм дӧада ԝирʹа дьбежьн: «Мина рʹонайийа чʹәʹва Тӧ мьн хԝәй кә» (Зәбур 17:8). Чʹәʹв пʹарәкә бәдәнейә гәләк назьк  у ԛимәт ә. Ләма жи, гава Йаһоԝа мә бәрамбәри бибока чʹәʹве хԝә дькә, ча бежи әԝ дьбежә: «Һәр кәсе кӧ хьзмәткʹаред мьн дешинә, зийане дьдә ве йәке, чь кӧ бона мьн гәләк ԛимәт ә».

7. Чьрʹа әм гәрәке баԝәрийа хԝә һьндава һʹәзкьрьна Йаһоԝа дьһа ԛәԝи кьн?

⁷ Йаһоԝа дьхԝазә ԝәки әм баԝәр бьн, кӧ әԝ мә һʹәз дькә. Ле әԝ занә ԝәки жь бо щурʹе жийина мәйә бәре, дьԛәԝьмә әм дӧдьли бьн һәла әԝ бь рʹасти мә һʹәз дькә, йан на. Гәло чь дькарә баԝәрийа мә ԛәԝи кә, кӧ әм һʹәзкьрьна Йаһоԝада дӧдьли нәбьн? Дина хԝә бьде, кӧ Йаһоԝа ча һʹәзкьрьна хԝә Исарʹа, кәсед бь рʹӧһʹ бьжартирʹа у мә һʹәмуйарʹа нишан дькә.

ЙАҺОԜА ҺʹӘЗКЬРЬНА ХԜӘ ЧА НИШАН ДЬКӘ?

8. Иса чьрʹа баԝәр бу, кӧ Баве ԝи ле һʹәз дькә?

⁸ Йаһоԝа у Кӧрʹе ԝийи дәлал бь милйарда сала тʹәвайи нә у ортʹа ԝанда һʹәзкьрьнәкә гәләк ԛәԝи пешда һатийә. Гәрдунеда достийа ортʹа ԝанда йа лапә кәвьн ә. Мәтта 17:5-да, Йаһоԝа әшкәрә гот, кӧ әԝ Иса чьԛас һʹәз дькә. Әԝи нә тʹәне гот, ‹Әв ә йе кӧ дьле мьн ша дькә›, ле сәва кӧ әм жи фәʹм бькьн кӧ әԝ Иса чьԛас һʹәз дькә, әԝи жерʹа гот: «Әв ә Кӧрʹе мьни дәлал». Йаһоԝа Исарʹа фьрнаԛ дьбу, илаһи кӧ әԝ һазьр бу әʹмьре хԝә ча ԛӧрбан бәрва бьдә (Әфәси 1:7). У Иса жи рʹьнд заньбу, ԝәки Йаһоԝа ԝи гәләк һʹәз дькә. Ләма жи, әԝи чәнд щара бь баԝәри гот, ԝәки Хԝәде ԝи һʹәз дькә (Йуһʹәнна 3:35; 10:17; 17:24).

9. Әм жь кӧ заньн, ԝәки Йаһоԝа кәсед бь рʹӧһʹ кʹьфшкьри һʹәз дькә? Шьровәкә (Рʹомайи 5:5).

⁹ Йаһоԝа ӧса жи кәсед бь рʹӧһʹ кʹьфшкьри гәләк һʹәз дькә (Бьхунә Рʹомайи 5:5). Зьмане орижиналеда, ве рʹезеда фькьрәкә ӧса те дайине, кӧ һʹәзкьрьна Йаһоԝа һьндава кәсед бь рʹӧһʹ кʹьфшкьри ӧса мәзьн ә, ԝәки бәрамбәри ава чʹәм дьбә. Кәсед бь рʹӧһʹ кʹьфшкьри баԝәр ьн, кӧ әԝана жь алийе «Хԝәдеда һʹьзкьри» нә (Щьһуда 1). Йуһʹәннайе шанди бь ван гьлийа һәстед ԝан әʹйан кьр: «Бьньһерʹьн, Баве әм чаԝа һʹьз кьрьн, ԝәки әм зарʹед Хԝәде бенә готьне» (1 Йуһʹәнна 3:1). Гәло Йаһоԝа тʹәне кәсед бь рʹӧһʹ кʹьфшкьри һʹәз дькә? На. Йаһоԝа избат кьрийә, ԝәки әԝ мә һʹәмуйа һʹәз дькә.

10. Гәло избатийа һʹәзкьрьна Йаһоԝайә лапә мәзьн һьндава мәда кʹижан ә?

¹⁰ Гәло избатийа лапә мәзьн йа һʹәзкьрьна Йаһоԝа чь йә? Һәмьки кʹьрʹин, демәк ԛӧрбана Иса Мәсиһ! Бь сайа ԛӧрбане, Йаһоԝа нишан кьр, ԝәки әԝ мә чьԛас һʹәз дькә (Йуһʹәнна 3:16; Рʹомайи 5:8). Йаһоԝа изьн да, ԝәки Кӧрʹе ԝийи әʹзиз әʹмьре хԝә ча ԛӧрбан бәрва бьдә, ԝәки гӧнед мә бенә бахшандьне у әм бькарьбьн бьбьнә достед Ԝи (1 Йуһʹәнна 4:10). Чьԛас һе зедә әм дәрһәԛа ԛимәта ве ԛӧрбане дьфькьрьн, йа кӧ Йаһоԝа у Иса данә, һаԛас һе баш әм фәʹм дькьн, кӧ һәр дӧ жи чьԛас мә һʹәз дькьн (Галати 2:20). Ԛӧрбан нә тʹәне жь бо пеканина пәймане һатә дайине, ле жь бо һʹәзкьрьне. Иса бона Йаһоԝа гәләк ԛимәт ә. Ләма жи, гава Йаһоԝа изьн да, ԝәки Иса бона мә еше бькʹьшинә у бьмьрә, Әԝи избат кьр, кӧ мә гәләк һʹәз дькә.

11. Әм жь Йерәмйа 31:3 чь һин дьбьн?

¹¹ Ча мә дит, Йаһоԝа һʹәзкьрьна хԝә вәнашерә, ле әшкәрә дьдә кʹьфше (Бьхунә Йерәмйа 31:3). Йаһоԝа әм кʹьшандьнә бәрбь хԝә, чьмки әԝ мә һʹәз дькә (Бәрамбәр кә Ԛануна Дӧщари 7:7, 8). Тʹӧ кәс у тʹӧ тьшт нькарә мә жь ве һʹәзкьрьне бьԛәтинә (Рʹомайи 8:38, 39). Гәло һʹәзкьрьна Йаһоԝа сәр тә ча  һʹӧкӧм дькә? Зәбура 23 бьхунә у бьвинә кӧ һʹәзкьрьн у дьлованийа Йаһоԝа сәр Даԝьд чаԝа һʹӧкӧм кьрьбу у ча дькарә сәр мә жи һʹӧкӧм бькә.

ҺʹӘЗКЬРЬНА ЙАҺОԜА СӘР ТӘ ЧА ҺʹӦКӦМ ДЬКӘ?

12. Зәбура 23 бәʹса чь дькә?

¹² Бьхунә Зәбур 23:1-6. Зәбура 23, кʹьлама дәрһәԛа итʹбарийа һьндава һʹәзкьрьн у хәмкьрьна Йаһоԝа йә. Ве зәбуреда, Даԝьд бәʹса достийа ортʹа хԝә у Шьване хԝә Йаһоԝа кьр. Даԝьд хԝә бь тʹәмами дьспартә рʹебәрийа Йаһоԝа. Әԝи заньбу, кӧ Йаһоԝа ԝе һәр рʹож һʹәзкьрьна хԝә жерʹа бьдә кʹьфше. Гәло Даԝьд чьрʹа ве йәкеда ӧса баԝәр бу?

13. Даԝьд чьрʹа баԝәр бу, ԝәки Йаһоԝа ԝе бона ԝи хәм бькә?

¹³ «Әз нә һʹәԝще тьштәки мә». Даԝьд баԝәр бу, кӧ Йаһоԝа ле дьбә хԝәйи, чьмки Йаһоԝа һәртʹьм һʹәԝщед ԝи рʹази дькьр. Ӧса жи Даԝьд заньбу, ԝәки Йаһоԝа досте ԝи йә у жь ԝи рʹази йә. Ләма жи, әԝ баԝәр бу, кӧ Йаһоԝа ԝе тʹьме ле бьбә хԝәйи. Даԝьд баԝәрийа хԝә һʹәзкьрьна Йаһоԝа дьани, ләма жи әԝ бь зедәйи хәмгин нәдьбу, ле бәхтәԝар бу у дьле ԝи рʹьһʹәт бу (Зәбур 16:11).

14. Йаһоԝа ча бь дьловани мә дьбә хԝәйи?

¹⁴ Йаһоԝа бь дьловани мә дьбә хԝәйи, илаһи гава әм рʹасти тәнгасийа тен. Чахе малбәта хушкәкеда бь наве Клар, a йа кӧ 20 сала зедәтьр Бәйтʹәледа хьзмәт кьрьбу, чәнд проблем пәй һәв пешда һатьн, әԝе ньзаньбу чь бькә. Инсулте баве ԝе хьст, хушкәкә ԝе жь щьвате һатә дәрхьстьне у малбәта ԝе бизнеса  хԝәйә бьчʹук у мала хԝә ӧнда кьр. Гәло Йаһоԝа ча бь дьловани ԝана бу хԝәйи? Клар дьбежә: «Йаһоԝа рʹож бь рʹож бона һʹәԝщед малбәта мьн хәм дькьр. Гәләк щар, Йаһоԝа дьһа зедә дьда мә, нә кӧ чьԛас әм һʹәԝщә бун! Гава әз ԝан рʹожа тиньм бира хԝә у дәрһәԛа аликʹарийа Йаһоԝа дьфькьрьм, һʹәзкьрьна ԝи тʹьме те бәр чʹәʹве мьн. Әв йәк али мьн дькә, бь шабуне ԝирʹа хьзмәт кьм гава әз рʹасти проблемед дьн жи тем».

15. Даԝьд жь чь дьлрʹьһʹәти дьстанд? (Бьньһерʹә ӧса жи шькьл.)

¹⁵ «Нәфса мьн Әԝ нуйәжийин дькә». Даԝьд щарна жь бо дәрд у проблема хәмгин дьбу (Зәбур 18:4-6). Диса жи, һʹәзкьрьн у дьлованийа Йаһоԝа дьле ԝи рʹьһʹәт дькьр. Йаһоԝа досте хԝәйи ԝәстийайи дьбьр бәр «мергед шин, ИМ» у «авед нәрмә әʹдьл». Паши ве йәке Даԝьд диса ԛәԝат дьстанд у дькарьбу бь шабуне Йаһоԝарʹа хьзмәт кә (Зәбур 18:28-32).

16. Һʹәзкьрьна Йаһоԝа ча дьле мә рʹьһʹәт дькә?

¹⁶ Гава әм рʹасти тәнгасийа тен у дьвиньн кӧ «дьлованийа Хӧдан бедаԝи йә, рʹәʹма ԝи ԛәт» хьлаз набә, әм дьшьдьн (Луринед Йерәмйа 3:22, ИМ; Колоси 1:11). Ԝәрә әм дина хԝә бьдьнә мәсәла Рейчьле. Ԝәʹде пандемийа COVID-19, мере ԝе һьм пьшта хԝә да ԝе, һьм жи Йаһоԝа. Гәло Йаһоԝа чаԝа али ԝе кьр? Рейчьл дьбежә: «Йаһоԝа нишани мьн кьр, кӧ әԝ мьн һʹәз дькә. Йаһоԝа гәләк һәвал данә мьн. Ԝана тʹәви мьн ԝәʹдә дәрбаз дькьр, хԝарьн мьнрʹа дьанин, смс у рʹезед гәләк хԝәш мьнрʹа дьшандьн, тʹьме мьнрʹа дькʹәнийан у дьанинә бира мьн, ԝәки Йаһоԝа бона мьн хәм дькә. Әз тʹьме шькьрийе дьдьмә Йаһоԝа, кӧ әԝи малбәтәкә ӧса мәзьн у дьлгәрм дайә мьн».

17. Даԝьд чьрʹа жь хьрабийе нәдьтьрсийа?

¹⁷ «Жь хьрабийе әзе тʹӧ щар нәтьрсьм». Әʹмьре Даԝьд гәләк щар дькʹәтә бьн ԛәзийе у гәләк дьжмьнед ԝи һәбун. Ле жь бо һʹәзкьрьна Йаһоԝа, әԝи хԝә бехофийеда тʹәхмин дькьр. Даԝьд пе чʹәʹве хԝә дьдит, ԝәки Йаһоԝа һʹәму дәрәщада кʹеләка ԝи йә. Ләма жи, әԝи кʹьламәкә хԝәда ӧса гот: «[Йаһоԝа, ДТʹ] әз жь һʹәму хоф-тьрса хьлаз кьрьм» (Зәбур 34:4). Һәмьки, щарна тьрс дькʹәтә дьле Даԝьд, ле һʹәзкьрьна Йаһоԝа жь һʹәму тьрсед ԝи мәзьнтьр бу.

18. Гава тьрс дькʹәвә дьле мә, һʹәзкьрьна Йаһоԝа ча дькарә ԛәԝате бьдә мә?

 ¹⁸ Һʹәзкьрьна Йаһоԝа рʹожед чәтьнда ча ԛәԝате дьдә мә? Пешәнгәкә бь наве Сузи дьбежә, кӧ әԝе у мере ԝе хԝә ча тʹәхмин кьрьн, гава кӧрʹе ԝан сафи кьр хԝәсәрихԝә бьжи: «Гава тьштәки гәләк хьраб те сәре тә, әв йәк һаԛас сәр тә һʹӧкӧм дькә, ԝәки тӧ хԝә бечʹарә тʹәхмин дьки. Ле һʹәзкьрьна Йаһоԝа мәрʹа буйә сьтʹаргәһ». Рейчьл, бәʹса кʹижане мә жоре кьр, дьбежә: «Шәвәке әз гәләк дьлтәнг бум у тьрсийам, һьнге мьн бь дәнге бьльнд Йаһоԝарʹа дӧа кьр. Дәрберʹа әʹдьлайи кʹәтә дьле мьн, у мина дайикәкә кӧ зарʹа хԝә рʹадьзинә, Йаһоԝа дьле мьн рʹьһʹәт кьр у әз хәԝрʹа чум. Әз ве йәке тʹӧ щар бир накьм». Рʹуспик бь наве Тасос чар сала кәледа бу, чьмки әԝи инкʹар кьр бьбә әскәр. Гәло әԝи һʹәзкьрьн у дьлованийа Йаһоԝа ча сәр хԝә тʹәхмин кьр? Тасос дьбежә: «Йаһоԝа һе зедә бона мьн хәм дькьр, нә кӧ чьԛас әз һʹәԝщә бум. Ләма жи, мьн жь дьл итʹбарийа хԝә ԝи дьани. Рʹаст ә кәла щики гәләк хьраб бу, ле диса жи Йаһоԝа бь сайа рʹӧһʹе пироз шабун дькьрә дьле мьн. Мьн фәʹм кьр, кӧ әз чьԛас незики ԝи бьм, әзе һаԛас жь ԛәнщийа ԝи кʹаре бьстиньм. Ләма жи кәледа әз бумә пешәнге һәртʹьм».

НЕЗИКИ ХԜӘДАЙЕ ХԜӘЙИ ДЬЛОВАН БӘ

19. (а) Занәбуна ве йәке кӧ Хԝәде мә һʹәз дькә, ча сәр дӧайед мә һʹӧкӧм дькә? (б) Йаһоԝа ча һʹәзкьрьна хԝә хут тәрʹа дайә кʹьфше? (Бьньһерʹә чаргошә «Рʹезед кӧ Али Мә Дькьн Һʹәзкьрьна Йаһоԝа Тʹәхмин кьн».)

¹⁹ Сәрһатийед хушк у бьред мә нишан дькьн, ԝәки «Хԝәдейе һʹьзкьрьне у әʹдьлайийе» тʹәви мә йә (2 Корьнтʹи 13:11). Әԝ бона мә һәр кәси хәм дькә. Әм баԝәр ьн, кӧ «һʹӧба амьн ԝе бьгьрә дора ԝан, кʹижана гӧмана хԝә данә сәр Хӧдан» (Зәбур 32:10). Чьԛас әм дьдьнә бәр чʹәʹве хԝә кӧ әԝ мә һʹәз дькә, һаԛас әм хԝә незики ԝи тʹәхмин дькьн. Әм дькарьн аза дьле хԝә ԝирʹа вәкьн у бежьн, ԝәки әм гәләк һʹәԝщед һʹәзкьрьна ԝи нә. Әм дькарьн жерʹа бәʹса һʹәму кӧл-дәрдед хԝә бькьн у баԝәр бьн, кӧ әԝ һʹале мә фәʹм дькә у һазьр ә али мә бькә (Зәбур 145:18, 19).

20. Һʹәзкьрьна Йаһоԝа ча али мә дькә, кӧ әм дьһа незики ԝи бьн?

²⁰ Чаԝа кӧ агьр рʹожәкә сарда мә гәрм дькә, һʹәзкьрьна Йаһоԝа жи ӧса дьле мә гәрм дькә. Һʹәзкьрьна Йаһоԝа һьм ԛәԝи йә, һьм жи назьк ә. Шабуна хԝә ӧнда нәкә, чьмки Йаһоԝа тә һʹәз дькә. Ләма ԝәрә әм жи бь дьл у щан бежьн: «Әз Йаһоԝа һʹәз дькьм!» (Зәбур 116:1).