Һьнә мер културед ӧсада мәзьн бунә, кӧ ԛәдьре жьна нагьрьн. Мәсәлә, Боливйайеда, бәрпьрсийарәки мьһале бь наве Һанс, дьбежә: «Һьнә мер ӧса мәзьн бунә, кӧ әԝана дьфькьрьн, ԝәки жь кʹӧлфәта ԛимәттьр ьн. Ләма жи әԝана ԛәдьре жьна нагьрьн». Ль Тәйԝане, рʹуспики бь наве Шәнгшйан, дьбежә: «Кʹидәре кӧ әз дьминьм, гәләк кәс дьфькьрьн, ԝәки кʹӧлфәт гәрәке фькьр у ньһерʹандьна хԝә малхе хԝәрʹа нәбежә. Гава мерәк ньһерʹандьна кʹӧлфәта хԝә һьлдьдә һʹәсаб, кәсед дьн дькарьн бежьн, кӧ әԝ мер нинә». Һьнә мер жи ньһерʹандьна хԝә һьндава жьна бь щурʹәки дьн нишан дькьн. Мәсәлә, әԝана пе һʹәнәкед нәбаш жьна ньмьз дькьн.

Фьрԛи тʹӧнә әм чь щурʹә културада мәзьн бунә, диса жи әм дькарьн ньһерʹандьна хԝә бьгӧһезьн у ԛәбул кьн, кӧ мер жь кʹӧлфәта четьр ниньн (Әфәси 4:22-24). Ве йәкеда ньһерʹандьна Йаһоԝа ԝе али мә бькә. Ве готареда, әме пебьһʹәсьн кӧ Йаһоԝа чаԝа ԛәдьре жьна дьгьрә, ча бьра дькарьн чʹәʹв бьдьнә Йаһоԝа у ча рʹуспи дькарьн мәсәләкә баш бьн, ве йәкеда кӧ ԛәдьре хушка бьгьрьн.

ЙАҺОԜА ЧА ԚӘДРЕ ЖЬНА ДЬГЬРӘ?

Йаһоԝа мәсәләкә беԛьсур ә ԝе йәкеда, кӧ ча гәрәке ԛәдьре кʹӧлфәта бьгьрьн. Ча Бавәки дьлован, әԝ һʹәму зарʹед хԝә гәләк һʹәз дькә (Йуһʹәнна 3:16). Йаһоԝа хушкед амьн ча ԛизед хԝәйә ԛимәт һʹәсаб дькә. Дина хԝә бьдьнә чәнд дәрәща, кӧ Йаһоԝа Хԝәде ча ԛәдьре кʹӧлфәта дьгьрә.

Йаһоԝа фьрԛийе накә ортʹа кʹӧлфәт у мера. Йаһоԝа һьм мер һьм жи жьн, дьлԛе хԝәда әʹфьрандьнә (Дәстпебун 1:27).  Демәк, Әԝи аԛьл у фәрәсәт дьһа зедә нәдайә мера у һьм жи мера жь жьна четьр һʹәсаб накә (2 Дирок 19:7). Әԝи жьн у мер ӧса әʹфьрандьнә, кӧ әԝана дькарьн рʹастийед Кʹьтеба Пироз мина һәв фәʹм бькьн у чʹәʹв бьдьнә Хԝәде. Йаһоԝа ԝан жьн у мера, йед кӧ баԝәрийа хԝә ԝи тиньн, ԝәкә һәв ԛимәт дькә. Һьнәк жь ԝан ԝе һʹәта-һʹәтайе сәр әʹрде бьжин, ле һьнә жь ԝан жи ԝе ча кʹаһин у пʹадша сәр әʹзмана сәрԝертийе бькьн (2 Пәт. 1:1). Бәле, Йаһоԝа кʹӧлфәта ньмьз һʹәсаб накә.

Әԝ гӧһ дьдә ԝан. Йаһоԝа һәст у хәмед кʹӧлфәта һьлдьдә һʹәсаб. Мәсәлә, әԝи гӧһ да дӧайед Рʹаһеле у Һаннайе у щаба дӧайед ԝан да (Дәстпебун 30:22; 1 Самуйел 1:10, 11, 19, 20). Кʹьтеба Пирозда ӧса жи дәрһәԛа сәрһатийед ԝан мера һатийә ньвисаре, йед кӧ гӧһе хԝә дьданә жьна. Мәсәлә, Бьраһим щарәке ль гора хԝәстьна Йаһоԝа гӧһ да жьна хԝә Сәрайе (Дәстпебун 21:12-14). Даԝьд Пʹадша жи гӧһ да Абигаиле. Бь рʹасти, Даԝьд фәʹм кьр, ԝәки Йаһоԝа Абигаил шандийә, кӧ ԝирʹа хәбәр дә (1 Самуйел 25:32-35). Иса мина Баве хԝә беԛьсур бу, ле диса жи әԝи гӧһ дьда дийа хԝә Мәрйәме (Йуһʹәнна 2:3-10). Әв мәсәлә нишан дькьн, кӧ Йаһоԝа кʹӧлфәта ԛимәт дькә у гӧһ дьдә ԝан.

Әԝ итʹбарийа хԝә ԝан тинә. Мәсәлә, Йаһоԝа шьхӧле хԝәйкьрьна тʹәмамийа әʹрде дабу нә тʹәне дәсте Адәм, ле Һеԝайе жи (Дәстпебун 1:28). Әв йәк нишан дькә, кӧ Йаһоԝа Һеԝа жь Адәм кемтьр һʹәсаб нәдькьр, ле ча һәвалкʹара ԝи һʹәсаб дькьр. Ӧса жи, Йаһоԝа баԝәрийа хԝә пʹехәмбәред хԝә Дәбора у Һулдайе дьани, кʹӧлфәтед кӧ рʹебәрийа хьзмәткʹаред ԝи дькьрьн. Ԝана һәла һе ширәт данә һʹакьм у пʹадша жи (Һʹакьмти 4:4-9; 2 Пʹадшати 22:14-20). Йаһоԝа иро жи шьхӧле хԝә тʹәсмили кʹӧлфәтед Мәсиһи дькә. Әв хушкед мәйә амьн ча мьзгинван, пешәнг у мисйонер хьзмәт дькьн. Әԝана аликʹарийе дьдьнә проектед авакьрьне, паԛьжкьрьна Одед Щьвате у авайед Бәйтʹәле. Һьнәк жь ԝан Бәйтʹәледа хьзмәт дькьн, һьнәк жи шьхӧле ԝәлгәрʹандьнеда кʹар дькьн. Әв хушкед мә ордикә мәзьн ьн, йед кӧ хԝәстьна Йаһоԝа пек тиньн (Зәбур 68:11). Бәле, Йаһоԝа жьна сьст у бекер һʹәсаб накә.

БЬРА ЧАԜА ДЬКАРЬН МИНА ЙАҺОԜА ЖЬНА ԚИМӘТ КЬН?

Бьрано, гәло әм мина Йаһоԝа хушка ԛимәт дькьн? Сәва кӧ әм ве йәке тедәрхьн, әм гәрәке фькьр у кьред хԝә рʹьнд лекʹолин бькьн. Бона ве йәке, аликʹари мәрʹа лазьм ә. Чаԝа кӧ рентгед дькарә нәхԝәшийа дьл нишан кә, ӧса жи һәваләки мә у Кʹьтеба Пироз, дькарә нишани мә бькә һәла дьле хԝәда әм һьндава кʹӧлфәта чаԝа ньн. Гәло әм ча дькарьн ве аликʹарийе бьстиньн?

Жь һәваләки хԝә бьпьрсә (Мәтʹәлок 18:17). Жь һәваләки хԝәйә бь итʹбар, ԛәнщ у хирәт бьпьрсә: «Тӧ ча дьфькьри, әз хушка ԛимәт дькьм? Гәло хушк тедәрдьхьн кӧ әз ԛәдьре ԝан дьгьрьм? Гәло лазьм ә кӧ әз һьнә тьштада бемә гӧһастьне?» Һәрге һәвале тә дина тә бькʹьшинә сәр һьнә шашийед тә, нәхәйдә, ле һазьр бә сәр хԝә бьхәбьти у хԝә рʹаст ки.

Кʹьтеба Пироз лекʹолин кә. Сәва кӧ тӧ фәʹм ки һәла тӧ бь рʹасти хушка ԛимәт дьки йан на, мәщала лапә баш әв ә, кӧ Кʹьтеба Пироз лекʹолин ки (Ибрани 4:12). Ӧса тӧйе бьвини, кӧ бәре һьнә мера кʹӧлфәт ԛимәт дькьрьн, ле һьнәка на. Паше кьред ԝан бәрамбәри кьред хԝә бькә. Ӧса жи, сәва кӧ тӧ гьлийед жь һьнә рʹеза шаш фәʹм нәки у дәрһәԛа жьна бь щурʹе нәрʹаст нәфькьри, лазьм ә рʹезед Кʹьтеба Пироз бәрамбәри һәв ки. Мәсәлә, 1 Пәтрус 3:7-да те готьне, кӧ гәрәке ԛәдьре жьна бьгьрьн, чьмки әԝана «ԛьсьме сьст» ьн. b Гәло әв йәк те һʹәсабе кӧ аԛьл у фәрәсәтед жьна ԛаси аԛьл у фәрәсәтед мера нинә? Һәмьки на! Гьлийед  Пәтрус бәрамбәри Галати 3:26-29 бькә. Әв рʹез нишан дькьн, кӧ Йаһоԝа һьм мер һьм жи жьн бьжартьнә, ԝәки тʹәви Иса сәр әʹзмана сәрԝертийе бькьн. Чь кӧ тӧ жь Кʹьтеба Пироз һин дьби у тьштед кӧ һәвалед тә тәрʹа дьбежьн, дькарьн али тә бькьн ԝәки тӧ һе зедә ԛәдьре хушка бьгьри.

РʹУСПИ ЧА ԚӘДЬРЕ ХУШКА ДЬГЬРЬН?

Мәсәла рʹуспийед дьлован дькарә али бьред дьн бькә, кӧ әԝана һьндава хушкада гәрәке чаԝа бьн. Гәло рʹуспи ча ԛәдьре хушка дьгьрьн? Ԝәрә әм дина хԝә бьдьнә ван чәнд дәрәща.

Рʹуспи пʹайе хушка дьдьн. Паԝлосе шанди рʹуспийарʹа мәсәләкә баш һишт. Мәсәлә, чахе әԝи Рʹомайарʹа нәʹма ньвиси, әԝи пʹайе чәнд хушка да (Рʹомайи 16:12). Бьдә бәр чʹәʹве хԝә кӧ чахе нәʹма ԝи щьватерʹа һатә хԝәндьне, әԝ хушк чьԛас ша бун! Иро жи, рʹуспи гәләк щар пʹайе хушка дьдьн, бона һʹӧнӧред ԝанә баш у хирәта ԝан хьзмәтийеда. Әв гьлийед ԝан нишани хушка дькьн, кӧ щьват ԛәдьре ԝан дьгьрә. Пʹайидайина рʹуспийайә бь дьлгәрми дькарә хут әв йәк бә, чьда хушк һʹәԝщә нә, у әв ԝана һелан дькә бәрдәԝам кьн бь амьни Йаһоԝарʹа хьзмәт кьн (Мәтʹәлок 15:23).

Гава рʹуспи пʹайе хушка дьдьн, әԝана жь дьл у бь нәрми ве йәке дькьн. Гәло чьрʹа? Хушкәкә бь наве Щесика дьбежә: «Бәле, һʹәԝас ә гава бьра пʹайе хушка дьдьн у дьбежьн ‹әʹфәрьм›, әв йәк гәләк дьле мә ша дькә. Ле гава бьра бона тьштед конкрет пʹайе мә дьдьн, мәсәлә кӧ әм зарʹед хԝә һин дькьн, ԝәки әԝана аԛьл сәр щьвата рʹунен, йан жи сәва кӧ әм дьчьн щийед дур, ԝәки хԝәндәкʹаред хԝә биньн сәр щьвате, әм дьһа зедә шабуне дьстиньн». Чахе рʹуспи бона тьштед конкрет пʹайе хушка дьдьн, әԝана тʹәхмин дькьн, кӧ хушк-бьред щьвате бь рʹасти жи ԝана ԛимәт дькьн.

 Рʹуспи гӧһ дьдьнә хушка. Рʹуспийед мьлук тиньн сәр хԝә, ԝәки фькьр у ньһерʹандьнед баш нә тʹәне тенә һʹьше ԝан. Ләма жи, әԝана фькьред хушка дьпьрсьн у рʹьнд гӧһ дьдьнә ԝан. Бь ви щурʹәйи, рʹуспи дьле хушка ԛәԝи дькьн у хԝәха жи кʹаре дьстиньн. Гәло ча? Рʹуспики бь наве Герардо, йе кӧ Бәйтʹәледа хьзмәт дькә, дьбежә: «Фькьред хушка али мьн дькьн, кӧ әз дьһа баш щабдарийед хԝә биньм сери. Гәләк щар һьнә хушк дьһа зедә ԝәхт фьлан шьхӧли дькьн, нә кӧ бьра». Щьватада, гәләк хушк пешәнг ьн, ләма жи әԝана дьһа зедә һаш жь мәрьвед дәшта хьзмәтийе һәнә. Рʹуспики бь наве Брайан, дьбежә: «Хушкед мә тʹәшкиләтерʹа кʹарәкә мәзьн тиньн, чьмки гәләк һʹӧнӧр у фәрәсәтед ԝанә баш һәнә. Ләма жи чʹәʹв бьдьнә хирәта ԝан!»

Рʹуспийед билан ньһерʹандьна хушка дәрберʹа пьшт гӧһе хԝәва навежьн. Гәло чьрʹа? Рʹуспики бь наве Едԝард, дьбежә: «Ньһерʹандьна хушкәкә щерʹьбанди дькарә али бьраки бькә, кӧ әԝ щабдарийа хԝә дьһа баш бинә сери у һʹале мәрьва дьһа баш фәʹм бькә» (Мәтʹәлок 1:5). Ле һәрге рʹуспи ньһерʹандьна хушкәке нькарә һьлдә һʹәсаб, диса жи әԝ дькарә рʹазибуна хԝә хушкерʹа бьдә кʹьфше.

Рʹуспи хушка һин дькьн. Рʹуспийед билан мәщала дьгәрʹьн, ԝәки хушка һин кьн. Мәсәлә, һәрге бьред ньхӧманди тʹӧнә бьн, рʹуспи дькарьн хушка һин кьн, кӧ чаԝа щьвинед бона хьзмәтийе дәрбаз кьн. Ӧса жи, әԝана дькарьн хушка һин кьн, кӧ мәкʹинә у щурʹә-щурʹә һащәта бьдьнә хәбате, ԝәки бькарьбьн сәр проектед авайед тʹәшкиләте кʹар бькьн. Бәйтʹәлада, бәрпьрсийар гәләк щабдарийед щӧдә дьдьнә хушка, мәсәлә, шьхӧле ленерʹина текʹники, кʹьрʹине, һʹәсабдарийе, компӧтәре у шьхӧлед дьн. Гава рʹуспи хушка һин дькьн, әԝана бь ве йәке нишан дькьн, кӧ хушк бь итʹбар у зеньн.

Гәләк хушк чь кӧ жь рʹуспийа һин дьбьн, бона кʹара кәсед дьн дьдьнә хәбате. Мәсәлә, бь сайа ве йәке кӧ хушк жь бьра пʹешед авакьрьне һин дьбьн, һьнә хушк дькарьн паши тʹәшԛәлед тʹәбийәте али хушк-бьра бькьн, кӧ малед ԝана тʹәзәда ава кьн. Һьнә хушк һин бунә ль ԝан щийа хьзмәт кьн, кʹидәре гәләк мәрьв ьн у әԝана бь хирәт хушкед дьн жи, ве йәке һин дькьн. Гәло хушк хԝә ча тʹәхмин дькьн, гава рʹуспи ԝана һин дькьн? Хушкәкә бь наве Щенифер, дьбежә: «Чахе әз сәр проекта авакьрьна Ода Щьвате дьхәбьтим, бәрпьрсийарәки ԝәʹдә дит кӧ мьн һин кә. Әԝи шьхӧле мьн дит у пʹайе мьн дьда. Мьн жь һәвкʹарийа тʹәви ԝи шабун дьстанд, чьмки әԝи әз ԛимәт дькьрьм у итʹбарийа хԝә мьн дьани».

ХУШКА ҺʹӘСАБ КЬН ЧА НӘФӘРЕД МАЛА ХԜӘ

Әм жи мина Йаһоԝа хушкед хԝәйә амьн гәләк һʹәз дькьн! Ләма жи, әм ԝан ча нәфәред мала хԝә һʹәсаб дькьн (1 Тимотʹейо 5:1, 2). Бона мә ԛәдьрәки мәзьн ә, кӧ әм дькарьн тʹәви ԝан хьзмәт кьн. У әм дьхԝазьн ԝәки әԝана бьвиньн кӧ әм ԝана һʹәз дькьн у пьштгьрийа ԝан дькьн. Хушкәкә бь наве Ванеса, дьбежә: «Тʹәшкиләта Йаһоԝада, гәләк бьра һәнә, йед кӧ дьле мьн ԛәԝи дькьн, у әз ша мә, кӧ әз пʹара ве тʹәшкиләте мә». Хушкәкә жь Тәйԝане, дьбежә: «Әз рʹази мә кӧ Йаһоԝа у тʹәшкиләта ԝи, кʹӧлфәта у һәстед ԝан гәләк ԛимәт дькьн. Әв йәк баԝәрийа мьн дьһа ԛәԝи дькә у нишани мьн дькә, ԝәки ԛәдьрәки чьԛас мәзьн ә, кӧ әз тʹәшкиләта Йаһоԝада мә».

Бе шьк, Йаһоԝа гәләк сәрфьнийаз ә, кӧ бьред амьн бь хирәт мина ԝи ԛәдьре кʹӧлфәта дьгьрьн! (Мәтʹәлок 27:11) Скотләндайеда, рʹуспики бь наве Бенжамин, дьбежә: «Ве дьнеда гәләк мер ԛәдьре жьна нагьрьн. Ләма жи гава кʹӧлфәт тенә Ода Щьвате, әм дьхԝазьн, ԝәки әԝана бьвиньн кӧ әм чьԛас ԛәдьре кʹӧлфәта дьгьрьн у ԝана ԛимәт дькьн». Ԝәрә әм гьшк жи чʹәʹв бьдьнә Йаһоԝа у һьндава хушкада дьлован бьн у ԛәдьре ԝан бьгьрьн! (Рʹомайи 12:10)