1-2. Ль гора Мәтта 5:11, гәрәке әм ль тәнгасийа чаԝа бьньһерʹьн?

ИСА МӘСИҺ соз дабу шагьртед хԝә кӧ әԝана ԝе бәхтәԝар бьн. Ӧса жи, әԝи готьбу йед кӧ ԝи һʹьз дькьн, ԝе рʹасти тәнгасийа бен (Мәтта 10:22, 23; Луԛа 6:20-23). Әм бәхтәԝар ьн кӧ әм шагьртед Иса нә. Ле гава малбәта мә һьмбәри мә дәрдькʹәвә, дәԝләт пәй мә дькʹәвә, йан гава һәвалхәбатчи йан һәвалдәрсханед мә зоре ль мә дькьн кӧ әм тьштәки хьраб бькьн, гәло әв йәк ль сәр мә чаԝа һʹӧкӧм дькә? Тьштед ӧса һьлбәт дькарьн мә әʹщьз бькьн.

² Бь нормали зерандьн бона мәрьва мәʹнийа шабуне нинә. Гәло ль гора Хәбәра Хԝәде, гәрәке әм ль тәнгасийа чаԝа бьньһерʹьн? Мәсәлә, Аԛубе шагьрт ньвисибу кӧ гава әм зәʹмәта дькʹьшиньн, гәрәке әм бь зедәйи дьлтәнг нәбьн, ле ша бьн (Аԛуб 1:2, 12). Ӧса жи, Иса Мәсиһ готьбу кӧ һәгәр мәрьв пәй мә бькʹәвьн, гәрәке әм диса жи шабуна хԝә ӧнда нәкьн (Мәтта 5:11 бьхунә). Гава әм дькʹәвьн тәнгасийе, гәло әм чаԝа дькарьн шабуна хԝә хԝәй бькьн? Ве йәкеда, нәʹма кӧ Аԛуб ль ԛьрʹна йәке шагьртед Иса Мәсиһрʹа ньвисибу, дькарә али мә бькә. Ле пешийе, ԝәрә әм бьвиньн кӧ ԝи чахи, хушк-бьра рʹасти чь щурʹә тәнгасийа дьһатьн.

3. Ԝәхтәкә кьн паши кӧ Аԛуб бу шагьрте Иса Мәсиһ, чь ԛәԝьми?

³ Ԝәхтәкә кьн паши кӧ Аԛуб, бьре Иса, бу шагьрте ԝи, ль бажаре Оршәлиме зерандьна Мәсиһийа дәстпебу (Кʹаред Шандийа 1:14; 5:17, 18). Паши кӧштьна Стәйфан, гәләк шагьртед Иса Мәсиһ жь бажер рʹәвийан у «бәлайи тʹопрахед Щьһустане у Самәрйайе бун.» Һьнә кәс һʹәта Кипрус у Әнтакйайе чун (Кʹаред Шандийа 7:58–8:1; 11:19). Бинә  бәр чʹәʹве хԝә кӧ һʹале ԝан чьԛас зор бу! Диса жи, ԝана мьзгин ль һәр дәра бь хирәт бәла дькьр, у ль тʹәмамийа Императорийа Рʹоме гәләк щьват һатьн саз кьрьн (1 Пәтрус 1:1). Ле чәндәк шунда, әԝана рʹасти тәнгасийед дьһа гьран һатьн.

4. Ԛьрʹна йәкеда, шагьртед Иса Мәсиһ рʹасти чь щурʹә зәʹмәта дьһатьн?

⁴ Ԛьрʹна йәкеда, шагьртед Иса Мәсиһ рʹасти гәләк зәʹмәта дьһатьн. Мәсәлә, ԝәкә сала 50 йа Д.М., Императоре Рʹоме Клаԝдйос фәрман дабу кӧ һʹәму Щьһу жь Рʹоме дәркʹәвьн. Ләма жи Щьһу кӧ бунә Мәсиһи мәщбур бун малед хԝә бьһельн у ль щийед дьн щиԝар бьн (Кʹаред Шандийа 18:1-3). Незики сала 61 йа Д.М., Паԝлосе шанди ньвиси кӧ әԝ хушк-бьра ль бәр һәр кәси һатьбун беһӧрмәткьрьн, ԝана дькьрьнә кәле у тʹалан дькьрьн (Ибрани 10:32-34). Хенщи ве йәке, һьнә Мәсиһи кʹәсиб бун у нәхԝәш дькʹәтьн (Рʹомайи 15:26; Филипи 2:25-27).

5. Ньһа әме щабед кʹижан пьрса бьстиньн?

⁵ Аԛуб нәʹма хԝә пешийа сала 62 йа Д.М., ньвиси. Әԝи рʹьнд заньбу кӧ хушк-бьра дькʹәтьн тәнгасийа. Бь рʹебәрийа Йаһоԝа, Аԛуб һьнә ширәтед баш данә ԝан, ԝәки әԝана нава тәнгасийада шабуна хԝә ӧнда нәкьн. Ньһа әме нәʹма Аԛуб леколин бькьн у щабед ван пьрса бьстиньн: Аԛуб бәʹса чь щурʹә шабуне дькьр? Чь дькарә бьбә сәбәб кӧ Мәсиһи шабуна хԝә ӧнда бькә? Билани, баԝәри у мерхаси чаԝа дькарьн али мә бькьн кӧ әм нава тәнгасийада жи шабуна хԝә ӧнда нәкьн?

6. Ль гора Луԛа 6:22, 23, шагьртед Иса Мәсиһ чьма дькарьн нава тәнгасийада шабуне ӧнда нәкьн?

⁶ Һьнә кәс дьфькьрьн кӧ һәгәр сьһʹәта  ԝан баш бә, пʹәре ԝан гәләк бә у малбәта ԝанда әʹдьлайи һәбә, әԝ йәк бәс ә кӧ мәрьв бәхтәԝар бә. Ле шабуна бәʹса кʹижани кӧ Аԛуб дькьр, пʹарәкә «бәре рʹӧһʹ» ә у һʹале мәва гьредайи нинә (Галати 5:22). Мәсиһи шабуне дьстинә у бәхтәԝар ә, чьмки занә кӧ әԝ чʹәʹв дьдә Иса у дьле Йаһоԝа ша дькә (Луԛа 6:22, 23 бьхунә; Колоси 1:10, 11). Чаԝа кӧ алава һӧндьре ләмпеда те пʹарастьн ԝәки нәтәмьрә, әв шабун жи ӧса дьле Мәсиһида дьшьхӧлә. Гава сьһʹәт-ԛәԝата ԝан хьраб дьбә йан пʹәре ԝан наминә, диса жи әв шабуна ԝан натәмьрә. Ӧса жи, зерандьн у ԛәрфед мәрьва нькарьн ве алаве бьтәмьриньн. Сәрда жи, гава дьжмьн дьхԝазьн кӧ ве алаве бьтәмьриньн, әв алав дьһа гӧрʹ дьбә. Чахе әм сәва баԝәрийа хԝә рʹасти тәнгасийа тен, әв йәк избат дькә кӧ әм бь рʹасти шагьртед Иса Мәсиһ нә (Мәтта 10:22; 24:9; Йуһʹәнна 15:20). Ләма Аԛуб ӧса ньвиси: «Хушк-бьрайед мьн, шабунәкә мәзьн һʹәсаб кьн, гава һун бькʹәвьнә нава щурʹә-щурʹә щерʹьбандьна» (Аԛуб 1:2).

7-8. Чахе баԝәрийа мә ԝәʹде тәнгасийа те щерʹьбандьне, әм чь кʹаре дьстиньн?

⁷ Аԛуб бәʹса сәбәбәкә дьн жи кьр кӧ Мәсиһи чьма һазьр ьн ԝәки ль һьмбәри тәнгасийед гьран жи сәбьр бькьн. Әԝи гот: «Щерʹьбандьна баԝәрийа ԝә сәбьре пешда тинә» (Аԛуб 1:3). Щерʹьбандьн у тәнгаси ԝәк агьре бона һʹәсьн ә. Гава шурәк егьрда те соркьрьн у паше аведа те саркьрьн, шур дьһа ԛайим дьбә. Мина ве йәке, гава әм ль һьмбәри тәнгасийа сәбьр дькьн, баԝәрийа мә дьһа ԛәԝи дьбә. Ләма Аԛуб ӧса ньвиси: «Сәбьр жи, бьра бь думька дьреж бә, ԝәки һун кʹамьл у гьһишти бьн, тʹӧ кемасикә ԝә тʹӧнәбә» (Аԛуб 1:4). Гава әм дьвиньн кӧ тәнгасийед мә баԝәрийа мә дьһа ԛәԝи дькьн, әм дькарьн ль һьмбәри ԝан бь шабуне сәбьр бькьн.

⁸ Нәʹма Аԛуб дина мә дькʹьшинә сәр һьнә зәʹмәтед кӧ дькарьн шабуне жь мә бьстиньн. Гәло әв проблем чь нә, у әм чаԝа дькарьн сәри бь ԝанрʹа дәрхьн?

9. Әм чьрʹа һʹәԝще биланийе нә?

⁹ Проблем: Гава тӧ ньзани чь бьки. Чахе әм дькʹәвьн тәнгасийе, гәрәке әм жь Йаһоԝа аликʹарийе бьхԝазьн, ԝәки әм сафикьрьнед баш бькьн, йед кӧ ԝе дьле ԝи хԝәш бен, бона хушк-бьред мә керһати бьн, у ԝе али мә бькьн кӧ әм Йаһоԝарʹа амьн бьминьн (Йерәмйа 10:23). Сәва кӧ әм бьзаньбьн кӧ чь бькьн у дьжмьнарʹа чь бежьн, әм һʹәԝще биланийе нә. Һәгәр әм ньзаньн кӧ чь бькьн, әм дькарьн мерхаси у шабуна хԝә зу ӧнда кьн.

10. Ль гора Аԛуб 1:5, гәрәке әм чь бькьн сәва кӧ әм биланийе бьстиньн?

 ¹⁰ Чʹарә: Жь Йаһоԝа биланийе бьхԝазә. Сәва кӧ әм бь шабуне һьмбәри тәнгасийа сәбьр бькьн, гәрәке әм йа пешьн жь Йаһоԝа биланийе бьхԝазьн, ԝәки әм бькарьбьн сафикьрьнед баш бькьн (Аԛуб 1:5 бьхунә). Һәгәр әм дьфькьрьн кӧ Йаһоԝа щаба дӧайе мә һе нәдайә, гәрәке әм чь бькьн? Гәрәке әм бәрдәԝам кьн дӧа бькьн у жь Йаһоԝа биланийе бьхԝазьн. Йаһоԝа бона ве йәке жь мә әʹщьз набә у һерс накʹәвә. Һәгәр әм бона биланийе дӧа бькьн, ԝәки бькарьбьн ль һьмбәри тәнгасийа сәбьр кьн, Баве мәйи әʹзмани ԝе «бь мәрʹдани» биланийе бьдә мә (Зәбур 25:12, 13). Әԝ тәнгасийед мә дьвинә, дьле ԝи сәр мә дьшәԝьтә, у әԝ һәртʹьм һазьр ә кӧ али мә бькә. Нә әв йәк дьле мә ша дькә! Ле пьрсәкә дьн жи пешда те: Гәло Йаһоԝа чаԝа биланийе дьдә мә?

11. Диса чь әм гәрәке бькьн кӧ биланийе бьстиньн?

¹¹ Йаһоԝа бь сайа Кʹьтеба Пироз биланийе дьдә мә (Мәтʹәлок 2:6). Сәва кӧ әм ве биланийе бьстиньн, гәрәке әм Кʹьтеба Пироз у әʹдәбйәтед ль сәр һʹиме Кʹьтеба Пироз леколин бькьн. Һьлбәт нә бәс ә кӧ әм тʹәне занәбуна хԝә зедә бькьн. Гәрәке әм гӧһ бьдьн ширәтед Хԝәде у ль гора биланийа ԝи бьжин. Аԛуб ӧса ньвиси: «Хәбәре бьԛәдиньн, нә кӧ тʹәне бьбьһен» (Аԛуб 1:22). Чахе әм һәр тьшти ль гора ширәтед Хԝәде бькьн, әме бьбьн мәрьвнә дьһа әʹдьлайиһʹьз, сәрԝахт у дьлрʹәʹм (Аԛуб 3:17). Әв һʹӧнӧр ԝе али мә бькьн кӧ әм нава тәнгасийада шабуна хԝә ӧнда нәкьн.

12. Чьма фәрз ә кӧ әм Кʹьтеба Пироз рʹьнд леколин бькьн?

¹² Мина нәйнькәке, Хәбәра Хԝәде али мә дькә әм тедәрхьн кӧ кемасийед мә чь нә у ль сәр ԝан бьхәбьтьн (Аԛуб 1:23-25). Мәсәлә, гава әм Хәбәра Хԝәде леколин  бькьн, әме фәʹм бькьн кӧ гәрәке әм һерса хԝә контрол бькьн. Бь аликʹарийа Йаһоԝа, әм һин дьбьн кӧ ль һьмбәри мәрьва йан проблемед кӧ дькарьн һерса мә рʹакьн, нәрм бьминьн. Нәрми али мә дькә кӧ әм ль һьмбәри зәʹмәта сәрԝахт бьминьн у сафикьрьнед баш бькьн (Аԛуб 3:13). Бәле, гәләк фәрз ә кӧ әм Кʹьтеба Пироз рʹьнд леколин бькьн!

13. Ԝе чьма баш бә кӧ әм сәрһатийед жь Кʹьтеба Пироз леколин бькьн?

¹³ Щарна, паши кӧ әм шашики дькьн, әм һин дьбьн кӧ мә гәрәке чь бькьра у чь нәкьра. Ле сәва һин бьн ԝан шашийа нәкьн, әв нә рʹекә баш ә. Рʹекә дьһа баш әв ә, кӧ әм жь пешдачуйин у шашийед кәсед дьн дәрса һин бьн у биланийе бьстиньн пешийа кӧ әм сәре хԝә бькьнә хәтайе. Ләма Аԛуб әм һелан кьрьн кӧ әм дина хԝә бьдьн сәрһатийед кәсед ӧса ча Бьраһим, Рʹәхаб, Ибо у Елйас (Аԛуб 2:21-26; 5:10, 11, 17, 18). Ван хьзмәткʹаред амьн ль һьмбәри тәнгасийа сәбьр дькьрьн у шабуна хԝә ӧнда нәдькьрьн. Мәсәлед ԝан мә һин дькьн кӧ бь аликʹарийа Йаһоԝа, әм жи дькарьн ль һьмбәри тәнгасийа сәбьр бькьн у шабуна хԝә хԝәй бькьн.

14-15. Чьма фәрз ә кӧ әм шьк жь дьле хԝә дәрхьн?

¹⁴ Проблем: Гава һьнә шьк кʹәтьнә дьле тә. Щарна дьбә кӧ әм һьнә тьшт жь Кʹьтеба Пироз рʹьнд фәʹм накьн. Йан жи дьбәкә Йаһоԝа ӧса щаба дӧайед мә надә, чаԝа кӧ әм һивийе нә. Сәва ве йәке, шьк дькарьн бькʹәвьн дьле мә. Һәгәр әм һаш жь хԝә тʹӧнә нәбьн, әв шьк дькарьн баԝәрийа мә сьст бькьн у достийа мә тʹәви Йаһоԝа хьраб бькьн (Аԛуб 1:7, 8). Сәрда жи, әԝана дькарьн бьбьн сәбәб кӧ әм һевийа хԝә ӧнда бькьн.

¹⁵ Паԝлос һевийа мә бәрамбәри ләнгәре кьр (Ибрани 6:19). Ԝәʹде фьртонәке, ләнгәр гәмийе ԛайим дьгьрә, ԝәки әԝ нәкʹәвә бәр пʹела у ль зьнара нәкʹәвә. Ле һәгәр зьнщира кӧ ләнгәр дьгьрә бьԛәтә, кʹара ләнгәре ԝе ԛәт тʹӧнә бә. Чаԝа кӧ жәнг дькарә зьнщира ләнгәре сьст бькә, шькед кӧ жь һʹьш у дьле мә дәрнайен дькарьн баԝәрийа мә сьст бькьн. Ԝәʹде пәйкʹәтьна, шьк дькарьн баԝәрийа мә кӧ Йаһоԝа ԝе созед хԝә бинә сери, сьст бькьн. Һәгәр әм баԝәрийа хԝә ӧнда кьн, әме һевийа хԝә жи ӧнда кьн. Чаԝа Аԛуб гот, йе дӧдьли «мина пʹелед бәʹре йә кӧ жь байе бьльнд дьбьн у датиньн» (Аԛуб 1:6). Мәрьвәки ӧса ԛә ԝе бькарьбә шабуна хԝә хԝәй бькә?

16. Һәгәр шькед мә һәбьн, гәрәке әм чь бькьн?

¹⁶ Чʹарә: Шькед хԝә жь дьле хԝә дәрхә, баԝәрийа хԝә ԛәԝи бькә. Рʹожед Елйас пʹехәмбәрда, хьзмәткʹаред Йаһоԝа дӧдьли бун. Елйас ԝанрʹа ӧса гот: «Һуне һʹәта чь ԝәхти бь һәр дӧ алива бькӧльн? Һәгәр Хӧдан Хԝәде бә, ль пәй ԝи бьмәшьн; ... һәгәр Баал бә, ль пәй ԝи бьмәшьн!» (1 Пʹадшати 18:21). Иро жи, гәрәке әм ве сафикьрьне ӧса бькьн. Сәва кӧ әм дӧдьли нәбьн, гәрәке әм рʹьнд леколин бькьн у хԝәрʹа избат бькьн кӧ Хԝәдайе рʹасти Йаһоԝа йә, кӧ Кʹьтеба Пироз Хәбәра ԝи йә у кӧ Шәʹдед Йаһоԝа хьзмәткʹаред ԝи нә (1 Тʹесалоники 5:21). Бь ви щурʹәйи, әм дькарьн жь шькед хԝә бьфьльтьн у баԝәрийа хԝә дьһа ԛәԝи бькьн. Һәгәр мәрʹа аликʹари лазьм ә кӧ әм шьк жь дьле хԝә дәрхьн, әм дькарьн тʹәви рʹуспийед щьвате хәбәр дьн. Бәле, сәва кӧ әм бь шабуне Йаһоԝарʹа хьзмәт бькьн, гәрәке әм хԝә паш нәхьн.

17. Һәгәр әм мерхасийа хԝә ӧнда бькьн, чь ԝе бьԛәԝьмә?

¹⁷ Проблем: Гава әм дьлтәнг дьбьн. Хәбәра Хԝәде ӧса дьбежә, «һәгәр тӧ тәнгасийеда дьлсьст би, кӧ ӧса йә тӧ нә хӧрт и», демәк тӧйе ԛәԝата хԝә ӧнда ки (Мәтʹәлок  24:10). Һәгәр тӧ мерхасийа хԝә ӧнда ки, тӧйе шабуна хԝә жи зу ӧнда ки.

18. Хәбәра «сәбьр» чь те һʹәсабе?

¹⁸ Чʹарә: Итʹбарийа хԝә Йаһоԝа бинә кӧ әԝе ԛәԝате бьдә тә. Мәрʹа мерхаси лазьм ә, ԝәки әм бькарьбьн нава тәнгасийада сәбьр бькьн (Аԛуб 5:11). Хәбәра «сәбьр», йа кӧ Аԛуб да хәбате, те һʹәсабе чахе кәсәки ль щийе хԝә ԛәԝи дьсәкьнә. Мәсәлә, бинә бәр чʹәʹве хԝә әскәрәки кӧ һьмбәри һʹьщума дьжмьна ԛәԝи дьсәкьнә у нарʹәвә.

19. Әм дькарьн жь мәсәла Паԝлосе шанди чь һин бьбьн?

¹⁹ Паԝлосе шанди алийе мерхаси у сәбьрева мәсәләкә баш бу. Щарна, әԝи жи хԝә сьст тʹәхмин дькьр. Ле чьмки әԝи хԝә дьспартә ԛәԝата кӧ жь Йаһоԝа дьстанд, әԝи дькарьбу сәбьр кә (2 Корьнтʹи 12:8-10; Филипи 4:13). Һәгәр әм бь мьлукти ԛәбул бькьн кӧ әм һʹәԝще аликʹарийа Йаһоԝа нә, әм жи дькарьн ԛәԝат у мерхасийе бьстиньн (Аԛуб 4:10).

20-21. Әм дькарьн чьда дӧдьли нәбьн?

²⁰ Гава әм рʹасти тәнгасийа тен, гәрәке әм нәфькьрьн кӧ Йаһоԝа мә щәза дькә. Аԛуб ӧса гот: «Бьра тʹӧ кәс, йе кӧ нава щерʹьбандьнеда йә, нәбежә: ‹Хԝәде мьн бь хьрабийе дьщерʹьбинә›, чьмки Хԝәде хьрабийада найе щерʹьбандьне у нә жи йәки дьщерʹьбинә.» (Аԛуб 1:13) Һәгәр әм ве рʹастийеда баԝәр бьн, әме хԝә һе незики Баве хԝәйи дьлован тʹәхмин кьн (Аԛуб 4:8).

²¹ Йаһоԝа тʹӧ щар найе гӧһастьне (Аԛуб 1:17). Гава Мәсиһийед ль ԛьрʹна йәке рʹасти тәнгасийа дьһатьн, Хԝәде пьштгьрийа ԝан дькьр, у бешьк ԝе али мә жи бькә. Бь дьл Йаһоԝарʹа дӧа бькә кӧ әԝ билани, баԝәри у мерхасийа тә зедә бькә. Баԝәр бә кӧ әԝе гӧһ бьдә дӧайед тә у ԝе али тә бькә кӧ тӧ нава тәнгасийада бь шабуне сәбьр бьки!