1. Пешийа кӧ хушкәкә азәп мер кә, ԝе баш бә кӧ әԝ жь хԝә чь бьпьрсә?

ҺʹӘМУ шагьртед Иса Мәсиһ бьн сәритийа ԝийә беԛьсурда ньн. Ле гава жьн мер дькә, әԝ дькʹәвә бьн сәритийа мерәки ԛьсурдар. Әв йәк щарна зәʹмәт ә. Ләма пешийа кӧ хушкәк мер кә, ԝе баш бә кӧ әԝ жь хԝә бьпьрсә: «Гәло әв бьра ԝе бона малбәте бьбә сәрәки баш? Гәло һʹәбандьна Йаһоԝа жийана ԝида щийе пешьн дьгьрә? Һәгәр на, әз жь кʹӧ заньм кӧ паше гава әм бьзәԝьщьн, әԝе жь алийе рʹӧһʹанива сәритийа малбәте бькә?» Ԝе һьлбәт баш бә кӧ хушк дәрһәԛа хԝә жи һьнә пьрса бьпьрсә: «Гәло чь һʹӧнӧред мьн йед баш һәнә? Гәло әз йәкә бь сәбьр у дәствәкьри мә? Гәло достийа мьн тʹәви Йаһоԝа ԛәԝи йә?» (Ԝаиз 4:9, 12). Һәгәр жьнькәк пешийа зәԝаще сафикьрьнед баш бькә, әԝе зәԝаща хԝәда дьһа бәхтәԝар бә.

2. Ве готареда, әме щабед кʹижан пьрса бьстиньн?

² Бь милйона хушкед мә сәритийа меред хԝә ԛәбул дькьн. Ләма жи әԝана һежайи пʹайа нә! Әм амьнийа ван хушкарʹа фьрнаԛ дьбьн! Ве готареда, әме щабед ван се пьрса бьстиньн: (1) Һьнә жьнед меркьри рʹасти чь чәтьнайа тен? (2) Жьнед меркьри чьма гәрәке сәритийа меред хԝә ԛәбул бькьн? (3) Жьн у мер дькарьн жь мәсәла Иса, Абигаил у Мәрйәме чь һин бьн?

3. Чьрʹа зәԝащеда жьн-мер рʹасти проблема тен?

³ Зәԝащ бь әʹсле хԝә пʹешкʹешәкә беԛьсур жь Хԝәде йә, ле сәд һʹәйф кӧ инсан беԛьсур ниньн (1 Йуһʹәнна 1:8). Ләма Кʹьтеба Пироз жьн-мерарʹа дьбежә кӧ зәԝаща  ԝанда тәнгасийед ԝан ԝе һәбьн (1 Корьнтʹи 7:28). Гәло жьн дькарьн рʹасти чь щурʹә чәтьнайа бен? Ԝәрә әм һьнә жь ван чәтьнайа шеԝьр кьн.

4. Һьнә жьн чьма дьфькьрьн кӧ сәритийа мер ԝана ньмьз дькә?

⁴ Һьнә жьн дьбәкә дьфькьрьн кӧ ԛәбулкьрьна сәритийа мер ԝана ньмьз дькә. Мәсәлә, хушкәкә мә йа бь наве Марисел, йа кӧ ль Америкайе дьжи, ӧса дьбежә: «Кʹидәре әз мәзьн бум, дьготьн кӧ гәрәке жьн у мер дь һәр тьштида ԝәк һәв бьн. Әз заньм кӧ принсипа сәритийе жь Йаһоԝа те, у әԝ дьхԝазә кӧ жьн ԛәдре мере хԝә бьгьрә. Диса жи, щарна мьнрʹа һеса нинә кӧ әз сәритийа мере хԝә ԛәбул бькьм.»

5. Дәрһәԛа рола жьнада кʹижан ньһерʹандьнед шаш һәнә?

⁵ Жь алийе дьнва, һьнә дәра мер дьфькьрьн кӧ жьн жь ԝан ньмьзтьр ьн. Хушкәкә бь наве Ивон, йа кӧ ль Америкайа Башуре дьжи, ӧса дьбежә: «Һәрема мәда, пешийе мер хԝарьне дьхԝә, паше жьн. Кәчʹькед бьчʹук гәрәке шьхӧлед мале бькьн, ле кӧрʹед бьчʹук мина ахайе мале нә, у хушк у дайика ԝан ԝанрʹа бәрдәстийе дькьн.» Хушкәкә бь наве Йинглинг, йа кӧ ль Асйайе дьжи, ӧса дьбежә: «Зьмане мәда готьнәк һәйә, кӧ те һʹәсабе ԝәки нә лазьм ә кӧ жьн аԛьл бә йан жи фәрәсәтед ԝе һәбьн. Гәрәке әԝ тʹәне шьхӧлед мале бькә, у изьна ԝе тʹӧнә кӧ әԝ фькред хԝә мере хԝәрʹа бежә.» Ль гора Кʹьтеба Пироз, әв ньһерʹандьна нәрʹаст ә. Мере кӧ бьн һʹӧкӧме ньһерʹандьнед ӧсада дьминә дьлсар ә, әԝ жийина жьна хԝә баргьран дькә, чʹәʹв надә Иса Мәсиһ у дьле Йаһоԝа дешинә (Әфәси 5:28, 29; 1 Пәтрус 3:7).

6. Гәрәке жьнед меркьри чь бькьн бона кӧ достийа хԝә тʹәви Йаһоԝа ԛәԝи бькьн?

⁶ Чаԝа кӧ мә готара пешийеда дит, Йаһоԝа дьхԝазә кӧ мер бона һʹәԝщед малбәта хԝә йед рʹӧһʹани, емосийали у физики хәм бькә (1 Тимотʹейо 5:8). Ле жьнәкә меркьри чьԛас бь шьхӧлед малева мьжул бә жи, гәрәке әԝ хԝәха жи һәр рʹож Кʹьтеба Пироз бьхунә, ль сәр кʹур бьфькьрә у Йаһоԝарʹа жь дьл дӧа бькә. Әв йәк щарна һеса нинә. Шьхӧлед мале гәләк ьн, ләма жи һьнә жьн дьбежьн кӧ бона тьштед ӧса ԝәхт у ԛәԝата ԝан наминә. Ле гәләк фәрз ә кӧ жьн бона ван тьшта ԝәʹдә бьвинә, чьмки Йаһоԝа дьхԝазә кӧ һәр йәк жь мә достийа хԝә тʹәви ԝи ԛәԝи бькә (Кʹаред Шандийа 17:27).

7. Чь дькарә али жьн бькә кӧ әԝ щабдарийа хԝә бинә сери?

⁷ Һʹәму мер гӧнәкʹар ьн, ләма щарна жьнед ԝанрʹа һеса нинә кӧ сәритийа ԝан ԛәбул бькьн. Ле һәгәр жьн рʹьнд фәʹм бькә кӧ ль гора Кʹьтеба Пироз әв йәк чьма фәрз ә, ԝе жерʹа дьһа һеса бә кӧ гӧрʹа мере хԝә бькә.

8. Ль гора Әфәси 5:22-24, жьнед баԝәрмәнд сәритийа меред хԝә чьма ԛәбул дькьн?

⁸ Жьнед баԝәрмәнд сәритийа меред хԝә ԛәбул дькьн, чьмки Йаһоԝа ве йәке дьхԝазә (Әфәси 5:22-24 бьхунә). Әԝана итʹбарийа хԝә Йаһоԝа тиньн у рʹьнд заньн кӧ һʹәму хԝәстьнед ԝи жь һʹьзкьрьне тен у һәр тьште кӧ әԝ жь ԝан дәʹԝа дькә, бона хер-хԝәшийа ԝан ә (Ԛануна Дӧщари 6:24; 1 Йуһʹәнна 5:3).

9. Чьрʹа баш ә кӧ жьн һʹӧкӧме мере хԝә ԛәбул бькә?

⁹ Дьнйа Шәйтʹан жьна һелан дькә кӧ  әԝана принсипед Йаһоԝа пьшт гӧһе хԝәва бавежьн у сәритийе ча тьштәки бекер һʹәсаб кьн. Кәсед кӧ ӧса дьфькьрьн Хԝәдайе мәйи дьлован нас накьн. Йаһоԝа ԛизед хԝә ԛимәт дькә, ләма әԝ ԛәйдед кӧ ԝана ньмьз дькә, данайнә. Әԝ хушкед кӧ щабдарийед хԝә йед кӧ Йаһоԝа дайә ԝан бь дьл у щан тиньн сери, әʹдьлайе дькьнә малбәта хԝә (Зәбур 119:165). Әв йәк бона кʹара мер, жьн у кʹара зарʹа йә.

10. Әм дькарьн жь готьнед Кароле чь дәрса һин бьн?

¹⁰ Принсипа сәритийе жь алийе Йаһоԝава һатийә данин. Жьнед кӧ сәритийа мере хԝә йед ԛьсурдар ԛәбул дькьн избат дькьн кӧ әԝана Йаһоԝа һʹьз дькьн у һӧрмәте дьдьн ԝи. Хушкәкә бь наве Карол, йа кӧ Америкайа Башуреда дьжи, ӧса дьбежә: «Әз заньм кӧ мере мьн ԝе шашийа бькә. Ӧса жи, әз заньм кӧ реаксийа мьн сәр ԝан шашийа ԝе нишан бькә, кӧ әз чьԛас достийа хԝә тʹәви Йаһоԝа ԛимәт дькьм. Ләма жи әз жь алийе хԝәда һәр тьшти дькьм кӧ сәритийа мере хԝә ԛәбул бькьм, чьмки әз дьхԝазьм дьле Баве хԝәйи әʹзмани ша бькьм.»

11. Чь али хушкәкә мә дькә кӧ бьбахшинә, у әм дькарьн жь готьнед ԝе чь һин бьн?

¹¹ Һәгәр мер һәст у хәмед жьна хԝә һьлнадә һʹәсаб, дьбәкә жерʹа ԝе зор бе кӧ ԛәдре ԝи бьгьрә у сәритийа ԝи ԛәбул бькә. Ле бьньһерʹә кʹа хушкәкә бь наве Анес чь дькә гава тьштәки ӧса дьԛәԝьмә. Әԝ дьбежә: «Әз сәр хԝә дьхәбьтьм кӧ һерс нәкʹәвьм. Әз тиньм бира хԝә кӧ әм гьшк гӧнәкʹар ьн. Нета мьн әв ә кӧ мина Йаһоԝа әʹфукʹар бьм. Гава әз дьбахшиньм, әʹдьлайи дькʹәвә дьле мьн» (Зәбур 86:5). Жьнед әʹфукʹаррʹа дьһа һеса йә кӧ сәритийа меред хԝә ԛәбул бькьн.

12. Кʹьтеба Пироз бәʹса чь щурʹә мәрьва дькә?

¹² Бь дитьна һьнәка, мәрьвәки кӧ гӧрʹа кәсәки дькә, йәки сьст ә. Ле әв йәк нә рʹаст ә. Кʹьтеба Пироз бәʹса гәләк кәса дькә, йед кӧ һьм гӧһдар бун һьм жи гәләк мерхас бун. Мәсәлә, Иса Мәсиһ,  Абигаил у Мәрйәм мәрьвед ӧса бун. Ԝәрә әм бьвиньн һәла әм жь ԝана чь дәрса дькарьн һин бьн.

13. Иса чьрʹа гӧрʹа Йаһоԝада нә?

¹³ Иса Мәсиһ гӧрʹа Йаһоԝада нә. Әв йәк һьлбәт найе һʹәсабе кӧ аԛьл йан фәрәсәтед ԝи кем ьн. Әв йәк кӧ Иса Мәсиһ бь щурʹәки зәлал у һеса һин дькьр, нишан дькә кӧ әԝ йәки гәләк сәрԝахт ә (Йуһʹәнна 7:45, 46). Йаһоԝа фәрәсәтед Иса Мәсиһ гәләк ԛимәт дькьр, ләма әԝи изьн да кӧ Иса тʹәви ԝи әʹфьрандьна гәрдунеда бьхәбьтә (Мәтʹәлок 8:30; Ибрани 1:2-4). Ӧса жи, паши кӧ Иса Мәсиһ жь мьрьне рʹабу, Йаһоԝа «һʹәму һʹӧкӧме әʹрд у әʹзмен» да ԝи (Мәтта 28:18). Рʹаст ә Иса гәләк аԛьл у сәрԝахт ә, ле әԝ диса жи хԝә дьсперә рʹебәрийа Йаһоԝа. Гәло чьма? Чьмки әԝ Баве хԝә һʹьз дькә (Йуһʹәнна 14:31).

14. Мер чь дькарьн һин бьн (а) жь ве йәке кӧ Йаһоԝа һьндава жьнада чаԝа нә? (б) жь Мәтʹәлок сәре 31?

¹⁴ Дәрс бона мера. Әв йәк кӧ Йаһоԝа мер ча сәре жьне кʹьфш кьрийә найе һʹәсабе кӧ әԝ жьна жь мера ньмьзтьр һʹәсаб дькә. Йаһоԝа нә тʹәне мера, ле жьна жи ча һәмпʹадшед Иса Мәсиһ дьжберә (Галати 3:26-29). Йаһоԝа итʹбарийа хԝә Кӧрʹе хԝә тинә, ләма жи әԝи һʹӧкӧм дайә ԝи. Мина ве йәке, мерәки аԛьл ԝе һьнә һʹӧкӧм бьдә жьна хԝә жи. Ль гора Кʹьтеба Пироз, жьнәкә жир у сәрхԝә дькарә шьхӧле мале һьлдә дәсте хԝә, мьлкʹ бькʹьрә у бьфьрошә (Мәтʹәлок 31:15, 16, 18 бьхунә). Жьн нә хӧлам ә, йа кӧ гәрәке дәнге хԝә нәкә. Мере кӧ дьхԝазә ль гора принсипед Кʹьтеба Пироз бьжи, ԝе итʹбарийа хԝә жьна хԝә бинә у гӧһ бьдә фькред ԝе (Мәтʹәлок 31:11, 26, 27 бьхунә). Һәгәр мер ԛәдре жьна хԝә бьгьрә, әԝе сәритийа ԝи дьһа һеса ԛәбул бькә.

15. Жьн дькарьн жь мәсәла Иса Мәсиһ чь дәрса һин бьн?

¹⁵ Дәрс бона жьна. Иса Мәсиһ чьԛас пешдачуйи бу жи, әԝ нәдьфькьри кӧ ԛәбулкьрьна сәритийа Йаһоԝа ԝи ньмьз дькә (1 Корьнтʹи 15:28; Филипи 2:5, 6). Мина ве йәке, жьнәкә жир у зен, йа кӧ чʹәʹв дьдә Иса, нафькьрә кӧ ԛәбулкьрьна сәритийа мер, ԝе ньмьз дькә. Әԝ пьштгьрийа мере хԝә дькә – нә тʹәне чьмки ԝи һʹьз дькә, ле һәри зедә чьмки әԝ Йаһоԝа һʹьз дькә у дьхԝазә һӧрмәте бьдә ԝи.

16. Ль гора 1 Самуйел 25:3, 23-28, Абигаил рʹасти чь чәтьнайа һат? (Бьньһерʹә шькле рʹуйе журнале.)

¹⁶ Набал, мере Абигаиле мәрьвәки хԝәһʹьз, ԛӧрʹә у бешекьр бу. Диса жи, Абигаиле мәщал нәдьгәрʹийа кӧ йаха хԝә ле хьлаз кә. Әԝе дькарьбу дәнге хԝә нәкьра у бьһишта кӧ Даԝьд у әскәред ԝи мере ԝе бькӧжьн. Ле дәԝса ве йәке, Абигаил сәва мер у малбәта хԝә хԝәй кә, бь мерхаси чу бал Даԝьд у 400 әскәред ԝи, ԝәки тʹәви ԝи хәбәр дә. Сәрда жи, әԝ һазьр бу кӧ нәһәԛийа мере хԝә һьлдә сәр хԝә (1 Самуйел 25:3, 23-28 бьхунә). Даԝьд фәʹм кьр кӧ Йаһоԝа бь сайа ве жьна мерхас, ширәт да ԝи, ԝәки әԝ шашикә мәзьн нәкә.

17. Мер дькарә жь сәрһатийа Даԝьд у Абигаиле чь дәрса һин бә?

¹⁷ Дәрс бона мера. Абигаил жьнәкә сәрԝахт бу, у Даԝьд гӧһ да ширәта ԝе. Ләма әԝи хуна кәсед бесущ нәрʹьжанд. Мина Даԝьд, мерәки аԛьлмәнд ԝе ньһерʹандьна жьна хԝә һьлдә һʹәсаб пешийа кӧ сафикьрьнәкә фәрз бькә. Ньһерʹандьна жьна ԝи, дькарә али ԝи бькә кӧ әԝ сафикьрьнәкә нәаԛьлайи нәкә.

18. Жьн дькарьн жь мәсәла Абигаиле чь дәрса һин бьн?

 ¹⁸ Дәрс бона жьна. Фьрԛи тʹӧнә мер Шәʹде Йаһоԝа йә йан на, кʹӧлфәта кӧ Йаһоԝа һʹьз дькә у ԛәдре мере хԝә дьгьрә, дькарә ль сәр малбәта хԝә баш һʹӧкӧм кә. Әԝе мәʹнийа нәгәрʹә кӧ жь ԝи бьԛәтә. Жьнәкә баԝәрмәнд ԝе ԛәдре мере хԝә бьгьрә у сәритийа ԝи ԛәбул бькә. Бь ви щурʹәйи, әԝе дьбәкә бькарьбә мере хԝә һелан кә кӧ әԝ дәрһәԛа Йаһоԝа һин бә (1 Пәтрус 3:1, 2). Һәгәр ԛәнщийа жьне дьле мере ԝе нәгьрә жи, Йаһоԝа амьнийа ԝе ԛимәт дькә у жь ԝе рʹази йә, чьмки әԝ сәритийа мере хԝә ԛәбул дькә.

19. Кʹәнге лазьм ә кӧ жьн гӧрʹа мере хԝә нәкә?

¹⁹ Һәгәр мер бьхԝазә кӧ жьна ԝи ԛанун у принсипед Кʹьтеба Пироз бьтʹәрьбинә, гәло жьна ԝи гәрәке чь бькә? Мәсәлә, һәгәр мере хушкәкә мә бьхԝазә кӧ әԝ дәрәԝа, дьзийе йан жи тьштәки ӧса бькә, чь кӧ Йаһоԝа нәфрʹәт дькә, гәло әԝ гәрәке чь бькә? Жь һәр тьшти зедәтьр, лазьм ә кӧ Мәсиһи гӧһ бьдьн Йаһоԝа. Ләма һәгәр мер бьхԝазә кӧ жьна ԝи тьштәки хьраб бькә, гәрәке әԝ ве йәке инкʹар бькә у бь нәрми, ле зәлал жерʹа бежә кӧ әԝ чьма нькарә гӧрʹа ԝи бькә (Кʹаред Шандийа 5:29).

20. Әм жь кʹӧ заньн кӧ Мәрйәм гәләк незики Йаһоԝа бу?

²⁰ Мәрйәм дийа Иса Мәсиһ гәләк незики Йаһоԝа бу. Әʹйан ә кӧ Мәрйәме Ньвисаред Пироз рʹьнд заньбун. Гава Мәрйәме тʹәви Елизабете хәбәр да, әԝе 20 щара зедәтьр бәʹса Ньвисаред Пироз кьр (Луԛа 1:46-55). Ӧса жи, гава Мәрйәм дәргистийа Усьв бу, мәләке Йаһоԝа пешийе нә кӧ Усьврʹа, ле Мәрйәмерʹа әʹйан бу. Мәләк рʹастә-рʹаст тʹәви Мәрйәме хәбәр да у жерʹа мьзгин да кӧ Кӧрʹе Хԝәде ԝе жерʹа бе буйине (Луԛа 1:26-33). Йаһоԝа Мәрйәм рʹьнд нас дькьр, у әԝ баԝәр бу кӧ Мәрйәм ԝе Кӧрʹе ԝи һʹьз бькә у ԝи хԝәй бькә. Чахе Иса Мәсиһ мьр у бона жийина ль әʹзмана һат рʹакьрьн жи, Мәрйәме бешьк достийа хԝә тʹәви Йаһоԝа бәрдәԝам дькьр (Кʹаред Шандийа 1:14).

21. Мер дькарьн жь сәрһатийа Мәрйәме чь дәрса һин бьн?

 ²¹ Дәрс бона мера. Һәгәр жьнәк Ньвисаред Пироз рʹьнд занә, мере ԝе гәрәке ша бә. Нә лазьм ә кӧ әԝ әʹщьз бьбә у бьфькьрә кӧ жьна ԝи дьхԝазә һʹӧкӧме ԝи һьлдә дәсте хԝә. Гәрәке әԝ фәʹм бькә кӧ һәгәр жьна ԝи готьн у принсипед Кʹьтеба Пироз рʹьнд занә, әв йәк бона кʹара малбәте йә. Һәгәр жьн жь мере хԝә зедәтьр хԝәнди бә жи, диса жи мер сәре малбәте йә у әԝ гәрәке али нәфәред хԝә бькә кӧ әԝана Йаһоԝа бьһʹәбиньн. Мәсәлә, гәрәке әԝ ԛӧльхкьрьна тʹәви малбәте дәрбаз бькә (Әфәси 6:4).

22. Жьн дькарьн жь Мәрйәме чь дәрса һин бьн?

²² Дәрс бона жьна. Рʹаст ә мер сәре малбәте йә у жьн гәрәке гӧрʹа ԝи бькә, ле йәкә жьн гәрәке хԝәха жи бона рʹӧһʹанийа хԝә хәм бькә у баԝәрийа хԝә ԛәԝи бькә (Галати 6:5). Бона ве йәке, әԝ сәва леколина шәхси у фькьрандьна кʹур гәрәке ԝәʹдә бьвинә. Әв йәк ԝе али ԝе бькә кӧ һʹьзкьрьна хԝә һьндава Йаһоԝа хԝәй бькә у һӧрмәте бьдә ԝи. Ӧса жи, жьн ԝе бькарьбә бь шабуне сәритийа мере хԝә ԛәбул бькә.

23. Ԛәбулкьрьна сәритийа мер чьма бона жьн, нәфәред ԝан у щьвате керһати йә?

²³ Кʹӧлфәтед кӧ сәритийа меред хԝә ԛәбул дькьн чьмки Йаһоԝа һʹьз дькьн, жь кʹӧлфәтед кӧ принсипед Йаһоԝа пьшт гӧһе хԝәва давежьн бәхтәԝартьр ьн. Жьнед ӧса бона хорт у ԛиза мәсәләкә баш ьн. Ӧса жи, әԝ һьм дь малбәта хԝәда һьм жи дь щьватеда һʹьзкьрьн у әʹдьлайе пешда тиньн (Тито 2:3-5). Иро, һʹәчʹи зәʹф жь хьзмәткʹаред Йаһоԝа жьн ьн (Зәбур 68:11). Щьватеда, дьхԝази жьн бә, дьхԝази мер бә, рола һәр кәси һәйә. Готара дьнда, әме пебьһʹәсьн кӧ әм чаԝа дькарьн ролед хԝә биньн сери.