1. Иса Мәсиһ чьрʹа жь Йаһоԝа һиви кьр кӧ әԝ шагьртед ԝи хԝәй бькә?

ШӘВА пашьн пешийа мьрьна хԝә, Иса Мәсиһ ль сәр чәтьнайед кӧ ԝе рʹасти шагьртед ԝи бьһатана, дьфькьри. Иса достед хԝә һʹьз дькьр, ләма жи әԝи жь Баве хԝә һиви кьр кӧ Әԝ ԝана «жь Йе Хьраб хԝәй кә» (Йуһʹәнна 17:14, 15). Иса заньбу чахе әԝ ԝе вәгәрʹә әʹзмана, Шәйтʹан ԝе пәй хьзмәткʹаред Йаһоԝа кʹәвә. Ләма жи шагьртед Иса Мәсиһ һʹәԝщәйи хԝәйкьрьне нә.

2. Әм чьма дькарьн баԝәр бьн кӧ Йаһоԝа ԝе гӧһ бьдә дӧайед мә?

² Йаһоԝа Иса Мәсиһ һʹьз дькә, ләма жи гӧһ да ве дӧайе ԝи. Һәгәр әм жи чь жь дәсте мә те бькьн кӧ дьле Йаһоԝа ша бькьн, әԝе мә жи һʹьз бькә, у гава әм рʹәща бькьн кӧ әԝ али мә бькә у мә хԝәй бькә, әԝе гӧһ бьдә дӧайед мә. Мина бавәки дьлован, Йаһоԝа бона зарʹед хԝә хәм дькә. Бь ви щурʹәйи, Йаһоԝа наве хԝә жи дьпʹарезә.

3. Әм чьма һʹәԝщәйи хԝәйкьрьне нә?

³ Иро, әм гәләки һʹәԝщәйи пʹарастьне нә, чьмки Шәйтʹан жь әʹзмен һатийә авитьне сәр әʹрде у «әԝ жь һерсе хԝә дьхԝә» (Әʹйанти 12:12). Әԝ һьнә кәса дьдә баԝәркьрьне кӧ гава әԝана пәй мә дькʹәвьн, әԝ те һʹәсабе кӧ әԝана ‹Хԝәдерʹа ԛӧльх дькьн› (Йуһʹәнна 16:2). Һьнә кәсед кӧ Хԝәде баԝәр накьн жи зӧлме ль мә дькьн, чьмки әм нә мина мәрьвед ве дьнйайе нә. Ле чь жи һәбә, нә лазьм ә кӧ әм бьтьрсьн. Гәло чьма? Чьмки Хәбәра Хԝәде ӧса дьбежә: «Хӧдан хԝәха амьн ә, ԝе ԝә бьшьдинә у жь Йе Хьраб хԝәй кә» (2 Тʹесалоники 3:3). Гәло Йаһоԝа мә чаԝа хԝәй дькә? Ньһа әме щаба ве пьрсе бьстиньн.

4. Ль гора Әфәси 6:13-17, Йаһоԝа мә бь сайа чь хԝәй дькә?

⁴ Йаһоԝа һьнә чʹәкед рʹӧһʹани дайә мә, йед кӧ дькарьн мә жь һʹьщумед Шәйтʹан хԝәй кьн (Әфәси 6:13-17 бьхунә). Әв чʹәкед рʹӧһʹани гәләк ԛәԝи у керһати нә! Ле сәва кӧ әм жь ԝан кʹаре бьстиньн, гәрәке әм ԝана ль хԝә бькьн у жь хԝә нәехьн. Ньһа әме бьвиньн кӧ һәр йәк жь ван чʹәка чь те һʹәсабе.

5. Кʹәмбәра рʹастийе чь йә, у чьма фәрз ә кӧ әм бь ве кʹәмбәре пьшта хԝә гьредьн?

⁵ Кʹәмбәра рʹастийе, те һʹәсабе рʹастийед жь Кʹьтеба Пироз. Гәло чьрʹа фәрз ә кӧ әм бь ве кʹәмбәре пьшта хԝә гьредьн? Чьмки Шәйтʹан «баве дәрәԝа йә» (Йуһʹәнна 8:44). Әԝи бь һʹәзара сала дәрәԝ кьрьнә у «тʹәмамийа дьне хальфандийә» (Әʹйанти 12:9). Ле рʹастийед Кʹьтеба Пироз мә чаԝа хԝәй дькьн, ԝәки әм нәйенә хапандьн? Гәло әм чаԝа дькарьн пьшта хԝә бь ве кʹәмбәра симболик гьредьн? Бона ве йәке, гәрәке әм рʹастийа дәрһәԛа Йаһоԝада һин бьбьн, «бь рʹӧһʹ у рʹастийе» ԝи бьһʹәбиньн у дь һәр тьштида һʹәлал бьн (Йуһʹәнна 4:24; Әфәси 4:25; Ибрани 13:18).

6. Зьрьһʹа һәԛийе чь йә, у чьма фәрз ә кӧ әм ви зьрьһʹи ль хԝә бькьн?

⁶ Зьрьһʹа һәԛийе те һʹәсабе ԛанунед Йаһоԝа. Гәло чьма лазьм ә кӧ әм ви зьрьһʹи ль хԝә бькьн? Чаԝа кӧ зьрьһʹ дьле әскәр хԝәй дькә, зьрьһʹа һәԛийе дьле мә жь һʹӧкӧмед хьраб йед ве дьнйайе хԝәй дькә (Мәтʹәлок 4:23). Йаһоԝа дьхԝазә ԝәки әм «бь тʹәмамийа дьле хԝә» ԝи һʹьз бькьн (Мәтта 22:36, 37). Ле Шәйтʹан дьхԝазә сәр дьле мә һʹӧкӧм бькә, ԝәки әм тьштед ве дьнйайе һʹьз бькьн, йед кӧ бәр чʹәʹве Йаһоԝа рʹәш ьн (Аԛуб 4:4; 1 Йуһʹәнна 2:15, 16). Чахе бал Шәйтʹан найе стандьне кӧ бь ве методе мә бьхапинә, әԝ зоре мә дькә, ԝәки әм ԛанунед Йаһоԝа бьтʹәрьбиньн.

7. Әм чаԝа дькарьн зьрьһʹа һәԛийе ль хԝә бькьн?

⁷ Гава әм ньһерʹандьна Йаһоԝа сәр рʹастийе у хьрабийе ԛәбул дькьн, у ль гора ԛанунед ԝи дьжин, әм нишан дькьн кӧ мә зьрьһʹа һәԛийе ль хԝә кьрийә (Зәбур 97:10). Һьнә кәс бәлки дьфькьрьн кӧ ԛанунед Йаһоԝа азайа мә кем дькьн. Ле һәгәр әм ль гора принсипед Кʹьтеба Пироз нәжин, әме бьбьн мина әскәрәки, йе кӧ ԝәʹде шәрʹ зьрьһʹе хԝә дехә, чьмки дьфькьрә кӧ зьрьһʹ гәләк гьран ә. Әв йәк ԝе тьштәки беаԛьлайи буйа, ӧса нинә? Бона ԝан кәса йед кӧ Йаһоԝа һʹьз дькьн, ԛанунед ԝи гьран ниньн. Әԝана фәʹм дькьн кӧ ԛанунед Йаһоԝа ԝана хԝәй дькьн (1 Йуһʹәнна 5:3).

8. Чьрʹа фәрз ә ԝәки әм һәртʹьм һазьр бьн кӧ мьзгине бәла бькьн?

⁸ Ӧса жи, Паԝлос готьбу кӧ гәрәке ньгед мә бона әʹламкьрьна мьзгина әʹдьлайе һазьр бьн. Демәк, гәрәке әм һәртʹьм һазьр бьн кӧ мәрьварʹа бәʹса мьзгина Пʹадшатийе бькьн. Чахе әм дәрһәԛа Кʹьтеба Пироз хәбәр дьдьн, баԝәрийа мә дьһа ԛәԝи дьбә. Сәр тʹәмамийа дьнйайе, хьзмәткʹаред Йаһоԝа мәщала дьгәрʹьн кӧ мьзгине бәла кьн. Мәсәлә, әԝана мьзгине бәла дькьн щийе хәбате, мәкʹтәбеда, мал бь мал, дькʹанада, мәрьвед хԝәрʹа, у һәла һе гава әԝана нькарьн жь мале жи дәркʹәвьн. Һәгәр әм бьтьрсьн у бәлакьрьна мьзгине бьдьнә сәкьнандьне, әме мина ви әскәри бьн, йе кӧ солед хԝә ԝәʹде  шәрʹ дехә. Һәгәр әԝ ӧса бькә у ньгед ԝи бьриндар бьн, әԝе ида нькарьбә ль гора тʹәмийед фәрмандар шәрʹ бькә.

9. Чьма фәрз ә кӧ әм мәртʹале баԝәрийе һьлдьн?

⁹ Мәртʹала баԝәрийе те һʹәсабе баԝәрийа мә һьндава Йаһоԝа. Әм баԝәр дькьн кӧ Йаһоԝа ԝе һʹәму созед хԝә бинә сери. Әв баԝәри али мә дькә кӧ әм «һʹәму тиред агьрийә кӧ Йе Хьраб давежә, бьтәмьриньн». Гәло чьма лазьм ә кӧ әм ве мәртʹала мәзьн бьгьрьн? Чьмки әԝ мә хԝәй дькә, ԝәки һинкьрьнед рʹабәра баԝәрийа мә сьст нәкьн у ԛәрфед мәрьва мерхасийа мә сьст нәкьн. Гава мәрьв мә дәʹф дьдьн кӧ әм ԛанунед Йаһоԝа бьтʹәрьбиньн, бе баԝәрийе әме нькарьбьн ԛәԝи бьсәкьньн. Жь алийе дьнва жи, һәр щар гава әм щийе хәбате йан мәкʹтәбеда һәр тьшти ль гора ԛанунед Йаһоԝа дькьн, әм мәртʹала хԝә ԛәԝи дьгьрьн (1 Пәтрус 3:15). Һәр щар, гава әм хәбатәки кӧ дькарә рʹийа мә бьгьрә ԝәки әм дьһа зедә хьзмәт бькьн, ԛәбул накьн, әм мәртʹала хԝә дьгьрьн (Ибрани 13:5, 6). Ӧса жи, һәр щар гава әм ԝәʹде пәйкʹәтьна диса жи Йаһоԝарʹа хьзмәт дькьн, мәртʹала баԝәрийе мә дьпʹарезә (1 Тʹесалоники 2:2).

10. Кʹӧмзьрьһʹа хьлазбуне чь йә, у чьма фәрз ә кӧ әм ви кʹӧмзьрьһʹи ль хԝә бькьн?

 ¹⁰ Кʹӧмзьрьһʹа хьлазбуне те һʹәсабе һевийа кӧ Йаһоԝа дьдә – һевийа кӧ әԝ ԝе мә жь мьрьне аза бькә у кӧ әԝ ԝе һәр кәсе кӧ хԝәстьна ԝи пек тинә, хәлат бькә (1 Тʹесалоники 5:8; 1 Тимотʹейо 4:10; Тито 1:1, 2). Чаԝа кӧ кʹӧмзьрьһʹ сәре әскәр дьпʹарезә, һевийа хьлазбуне жи һʹьше мә хԝәй дькә. Гәло чаԝа? Әв һеви али мә дькә кӧ әм дина хԝә бьдьн созед Хԝәде у һьмбәри проблема бь зедәйи бәрхԝә нәкʹәвьн. Сәва кӧ әм ви кʹӧмзьрьһʹи ль хԝә бькьн, гәрәке фькред мә ль гора фькред Хԝәде бьн. Мәсәлә, гәрәке әм «гӧмана хԝә нәдьнә сәр һәбука пʹучʹә дәрәԝ, ле ль сәр Хԝәдейе кӧ һәр тьшти бь мәрʹдани дьдә мә» (Зәбур 26:2; 104:34; 1 Тимотʹейо 6:17).

11. Шуре рʹӧһʹ чь те һʹәсабе, у чьрʹа фәрз ә кӧ әм ви шури бьдьнә хәбате?

¹¹ Шуре рʹӧһʹ те һʹәсабе Хәбәра Хԝәде, демәк Кʹьтеба Пироз. Әв шур дькарә дәрәԝа «жекә» у мәрьва жь хӧламтийа баԝәрийед ԛәлп у әʹдәтед хьраб хьлаз кә (2 Корьнтʹи 10:4, 5; 2 Тимотʹейо 3:16, 17; Ибрани 4:12). Бь сайа леколина шәхси у һинбуна кӧ әм жь тʹәшкиләта Хԝәде дьстиньн, әм һин дьбьн кӧ ви шури бь һостәти бьдьнә хәбате (2 Тимотʹейо 2:15). Хенщи чʹәкед рʹӧһʹани, Йаһоԝа тьштәки дьн жи дьдә мә, йе кӧ мә дьпʹарезә. Гәло чь?

12. Әм диса һʹәԝщәйи чь нә, у чьма?

¹² Әскәрәки щерʹьбанди рʹьнд занә кӧ әԝ нькарә тʹәне һьмбәри ордикә мәзьн сәркʹәвә. Әԝ занә кӧ әԝ һʹәԝщәйи аликʹарийа әскәред дьн ә. Мина ве йәке, әм нькарьн тʹәне һьмбәри Шәй-тʹан у пьштгьред ԝи шәрʹ бькьн у сәркʹәвьн. Әм һʹәԝщәйи аликʹарийа хушк-бьра нә. Бәле, Йаһоԝа бь сайа хушк-бьред ль тʹәмамийа дьнйайе али мә дькә (1 Пәтрус 2:17).

13. Ль гора Ибрани 10:24, 25, әм жь щьвата чь кʹаре дьстиньн?

¹³ Сәва кӧ әм ве аликʹарийе бьстиньн, гәрәке әм һәрʹьн щьвата (Ибрани 10:24, 25 бьхунә). Гава әм дьлтәнг ьн, щьват дькарә ԛәԝате бьдә мә у мә гәш бькә. Щьватеда, әм жь щабед хушк у бьра һелане дьстиньн. Готар у дәрсед ԝан дькарьн хԝәстьна мә кӧ бәрдәԝам кьн Йаһоԝарʹа хьзмәт бькьн, ԛайим бькә. Хәбәрдана пешийа у паши щьвина жи дькарьн мерхасийа мә зедә бькьн (1 Тʹесалоники 5:14). Хенщи ве йәке, щьвин мәщале дьдьн мә кӧ әм али һәвдӧ бькьн, у әв йәк дьле мә ша дькә (Кʹаред Шандийа 20:35; Рʹомайи 1:11, 12). Бәле, кʹара щьвина гәләк ә. Бь сайа щьвина, әм дькарьн бьбьн дәрсдаред баш. Мәсәлә, әм һин дьбьн кӧ әм чаԝа дькарьн Һащәтед Сәрәкә бона Һинкьрьне бь һостәти бьдьнә хәбате. Ләма жи бона щьвата рʹьнд һазьр бә. Ԝәʹде щьвина рʹьнд гӧһ бьдә. Паши щьвина чь тӧ һинбуйи бьдә хәбате. Бь ви щурʹәйи тӧйе бьби «әскәре Мәсиһ Исайи ԛәнщ» (2 Тимотʹейо 2:3).

14. Йаһоԝа чаԝа али мә дькә?

¹⁴ Сәрда жи, бь милйона мәләкед ԛәԝат кʹеләка мә нә. Бинә бәр чʹәʹве хԝә кӧ тʹәне мәләкәк дькарә чь бькә! (Ишайа 37:36). У ньһа, бинә бәр чʹәʹве хԝә кӧ бь милйона мәләк дькарьн чь бькьн! Инсан бә йан щьн бә, тʹӧ кәс нькарә һьмбәри ордийа Йаһоԝа сәркʹәвә. Һәгәр Йаһоԝа тʹәви мә бә, һәжмара дьжмьна ԛәт тьштәк нинә (Һʹакьмти 6:16). Һәгәр һәвалхәбатчи, һәвалдәрсхан йан мәрьвәки  тә мьԛабьли тә рʹадьбә, бир нәкә кӧ дь ви шәрʹида тӧ тʹәне нини. Һʹәта кӧ тӧ гӧһ бьди рʹебәрийа Йаһоԝа, әԝе пьштгьрийа тә бькә.

15. Ль гора Ишайа 54:15, 17, Шәйтʹан у пьштгьред ԝи чьма нькарьн хьзмәткʹаред Хԝәде бьдьнә кәрʹкьрьне?

¹⁵ Гәләк мәʹни һәнә кӧ чьрʹа дьнйа Шәйтʹан мә нәфрʹәт дькә. Йәк жь мәʹнийа әв ә кӧ әм пьштгьрийа политике накьн, чʹәк һьлнадьн у начьнә шәрʹ. Әм мәрьварʹа наве Хԝәде дьдьн наскьрьн, әм әʹлам дькьн кӧ тʹәне Пʹадшатийа Хԝәде дькарә әʹдьлайа рʹаст бинә, у әм ль гора ԛанунед Йаһоԝа дьжин. Әм әшкәрә дькьн кӧ сәрԝере ве дьнйайе – демәк Шәйтʹан – дәрәԝин у меркӧж ә (Йуһʹәнна 8:44). Ӧса жи, әм әʹлам дькьн кӧ дәмәкә незикда, дьнйа Шәйтʹан ԝе бе ԛьрʹкьрьн. Шәйтʹан у пьштгьред ԝи нькарьн мә бьдьнә кәрʹкьрьне! Әме бәрдәԝам кьн чь жь дәсте мә те бькьн кӧ пәсне Йаһоԝа бьдьн. Шәйтʹан чьԛас ԛәԝи бә жи, әԝ нькарә бәлакьрьна мьзгина Пʹадшатийе бьдә сәкьнандьне. Әшкәрә йә кӧ Йаһоԝа мә хԝәй дькә (Ишайа 54:15, 17 бьхунә).

16. Ԝәʹде тәнгасийа мәзьн, Йаһоԝа ԝе хьзмәткʹаред хԝә чаԝа хьлаз бькә?

¹⁶ Ԝәʹде тәнгасийа мәзьн, Йаһоԝа ԝе хьзмәткʹаред хԝә бь дӧ щурʹе мәхсус хьлаз бькә: Йа пешьн, гава пʹадшед дьнйайе ԝе Бабилона Мәзьн – демәк империйа религийа ԛәлп у баԝәрийед ԛәлп – ԛьрʹ бькьн, Йаһоԝа ԝе хьзмәткʹаред хԝә йед амьн хьлаз кә (Әʹйанти 17:16-18; 18:2, 4). Паше, гава Хԝәде һʹәму тьштед дьн кӧ пʹара система Шәйтʹан ьн, ԝәʹде шәрʹе Һармәгәдоне ԛьрʹ кә, әԝе һьнге жи хьзмәткʹаред хԝә хьлаз бькә (Әʹйанти 7:9, 10; 16:14, 16).

17. Чьма фәрз ә кӧ әм незики Йаһоԝа бьн?

¹⁷ Һәгәр әм незики Йаһоԝа бьн, Шәйтʹан ԝе нькарьбә зьрара һәрһәйи бьдә мә. Бь рʹасти, зьрара һәрһәйи ԝе бе сәре ԝи! (Рʹомайи 16:20). Ләма жи һʹәму чʹәкед Хԝәде ль хԝә бькә, у жь хԝә нәехә! Нәфькьрә кӧ тӧ дькари шәрʹа рʹӧһʹанида тʹәне сәркʹәви! Пьштгьрийа хушк-бьра бькә, у гӧһ бьдә рʹебәрийа Йаһоԝа. Баԝәр бә кӧ һәгәр тӧ ӧса бьки, Баве тәйи әʹзмани ԝе ԛәԝате бьдә тә у тә хԝәй бькә! (Ишайа 41:10).