1. Һьнә хьзмәткʹаред Йаһоԝа рʹасти чь щурʹә тәнгасийа тен?

ГӘЛО чәтьнайед тә һәнә? Дьбәкә хушк йан бьраки дьле тә ешандийә (Аԛуб 3:2). Йан жи, дьбәкә һәвалхәбатчи йан һәвалдәрсханед тә ԛәрфед хԝә тә дькьн, чьмки тӧ хьзмәткʹаре Йаһоԝа йи (1 Пәтрус 4:3, 4). Дьбәкә һьнә мәрьвед тә нахԝазьн кӧ тӧ һәрʹи щьвина йан жи дәрһәԛа баԝәрийа хԝә кәсәки дьнрʹа гьли ки (Мәтта 10:35, 36). Гава тәнгасийед мә йед гьран һәнә, щарна гәләк зор ә кӧ әм амьн бьминьн. Ле әм дькарьн баԝәр бьн кӧ чь тәнгасийед мә һәбьн жи, Йаһоԝа ԝе билани у ԛәԝате бьдә мә кӧ әм сәбьр кьн.

2. Ль гора Рʹомайи 15:4, хԝәндьна Кʹьтеба Пироз дькарә сәр мә чаԝа һʹӧкӧм бькә?

² Кʹьтеба Пирозда, Йаһоԝа нишани мә дькә кӧ мәрьвед ԛьсурдар чаԝа һьмбәри тәнгасийед гьран амьн дьман. Чаԝа кӧ Паԝлосе шанди ньвисибу, Йаһоԝа дьхԝазә кӧ әм жь сәрһатийед ӧса дәрса һин бьн (Рʹомайи 15:4 бьхунә). Хԝәндьна ван сәрһатийа дькарә дьлбини у һевийе бьдә мә. Ле сәва кӧ әм бь рʹасти кʹаре бьстиньн, нә бәс ә кӧ әм тʹәне Кʹьтеба Пироз бьхуньн. Гәрәке әм изне бьдьн кӧ Ньвисаред Пироз сәр фькред мә һʹӧкӧм бькьн у дьле мә бьгьрьн. Һәгәр проблемәкә мә һәбә, гәло әм дькарьн чь бькьн? Сәва кӧ әм рʹебәрийа баш бьстиньн, гәрәке әм (1) дӧа бькьн, (2) сәрһатийед кӧ әм дьхуньн бьдьнә бәр чʹәʹве хԝә, (3) кʹур бьфькьрьн у (4) тьштед кӧ әм һин дьбьн бьдьнә хәбате. Ньһа әме шеԝьр кьн кӧ әм чаԝа дькарьн жь ван гава кʹаре бьстиньн. * Паше, әме бь аликʹарийа ван гава дина хԝә бьдьн сәрһатийа Даԝьд Пʹадша у Паԝлосе шанди.

3. (а) Пешийа кӧ тӧ Кʹьтеба Пироз бьхуни, ԝе баш бә кӧ тӧ чь бьки? (б) Ль гора рʹезед нишанкьри, әв йәк чьма фәрз ә?

 ³ (1) Дӧа бькә. Пешийа кӧ тӧ хԝәндьна Кʹьтеба Пироз дәстпеки, жь Йаһоԝа аликʹарийе бьхԝазә кӧ тӧ жь хԝәндьне кʹаре бьстини. Мәсәлә, һәгәр проблемәкә тә һәбә у тӧ ньзани кӧ ве проблеме чаԝа сафи бьки, жь Йаһоԝа аликʹарийе бьхԝазә кӧ тӧ принсипед керһати бьвини, йед кӧ дькарьн рʹебәрийа тә бькьн (Филипи 4:6, 7; Аԛуб 1:5).

4. Әм чаԝа дькарьн жь хԝәндьна Кʹьтеба Пироз дьһа зедә кʹаре бьстиньн?

⁴ (2) Бьдә бәр чʹәʹве хԝә. Әв йәк кӧ әм дькарьн тьшта бьдьнә бәр чʹәʹве хԝә, пʹешкʹешәкә жь Хԝәде йә. Гава тӧ Кʹьтеба Пирозда дәрһәԛа кәсәки дьхуни, һʹале ԝи бьдә бәр чʹәʹве бькә. Хԝә дәԝса ԝи дайнә у бинә бәр чʹәʹве хԝә кӧ әԝи чь дьдит у чь тʹәхмин дькьр. Әв йәк ԝе али тә бькә кӧ тӧ жь хԝәндьна Кʹьтеба Пироз дьһа зедә кʹаре бьстини.

5. Әм чаԝа дькарьн кʹур бьфькьрьн, у әв йәк чьма фәрз ә?

⁵ (3) Кʹур бьфькьрә. Ль сәр рʹезед кӧ тӧ дьхуни кʹур бьфькьрә у тедәрхә кӧ әԝ бона тә чьрʹа керһати нә. Әв йәк ԝе али тә бькә кӧ тӧ тʹемайе дьһа баш фәʹм бьки. Гәло чаԝа? Бинә бәр чʹәʹве хԝә кӧ тӧ дьхԝази хԝарьнәкә хԝәш чеки. Нә бәс ә кӧ һәр тьшт бәр дәсте тә һәбә. Лазьм ә кӧ тӧ һәр тьшти рʹаст бьди хәбате. Мина ве йәке, сәва кӧ тӧ жь готьнед Кʹьтеба Пироз кʹаре бьстини, гәрәке тӧ ль сәр ԝан кʹур бьфькьри у ԝан бь һәвва гьреди. Бона фькьрандьна кʹур, жь хԝә һьнә пьрса бьпьрсә у ль сәр щабед ԝан бьфькьрә, мәсәлә: «Мәрьве дәрһәԛа кʹижани әз дьхуньм чь кьр кӧ проблема хԝә сафи бькә? Йаһоԝа чаԝа али ԝи кьр? Дәрсед кӧ мьн жь ве сәрһатийе стандьнә чаԝа дькарьн али мьн бькьн кӧ әз һьмбәри тәнгасийа амьн бьминьм?»

6. Чьма фәрз ә ԝәки әм тьштед кӧ һин бунә бьдьнә хәбате?

⁶ (4) Бьдә хәбате. Иса Мәсиһ готьбу кӧ һәгәр әм тьштед кӧ һин дьбьн пек нәйньн, әме мина ԝи мәрьви бьн, йе кӧ ханийе хԝә ль сәр ԛуме ава дькә. Әԝ чьԛас хирәт бькә жи, щәфе ԝи бадиһәԝа йә. Гәло чьма? Чьмки һәгәр фьртонә у селав ль ханийе ԝи кʹәвә, хани ԝе һьлше (Мәтта 7:24-27). Мина ве йәке, һәгәр әм дӧа бькьн, бьдьнә бәр чʹәʹве хԝә у кʹур бьфькьрьн, ле тьштед кӧ әм һин бунә пек нәйньн, щәфе мә ԝе бадиһәԝа бә. У гава әм рʹасти зерандьн йан тәнгасийа бен, әме нькарьбьн амьн бьминьн. Ле һәгәр әм леколине бькьн у тьштед кӧ әм һин бунә бьдьнә хәбате, әме сафикьрьнед баш бькьн, әʹдьлайи ԝе бькʹәвә дьле мә, у баԝәрийа мә ԝе дьһа ԛәԝи бә (Ишайа 48:17, 18). Кʹа әм бьвиньн кӧ әм бь сайа ван чар гава жь сәрһатийа Даԝьд Пʹадша дькарьн чь дәрса бьстиньн.

7. Ньһа әме дәрһәԛа сәрһатийа кʹе шеԝьр кьн?

⁷ Ԛәт дост йан мәрьвәки тә дьле тә ешандийә? Ча әме ньһа бьвиньн, тьштәки ӧса һатьбу сәре Даԝьд Пʹадша жи. Кӧрʹе ԝи Абшалом нәмами ль ԝи кьр у дьхԝаст пʹадшатийе жь дәсте ԝи бьгьрә (2 Самуйел 15:5-14, 31; 18:6-14). Гәло тӧ дькари жь ве сәрһатийе чь дәрса һин би?

8. Тӧ чаԝа дькари аликʹарийа Йаһоԝа бьстини?

⁸ (1) Дӧа бькә. Мина Даԝьд Пʹадша, дьле хԝә Йаһоԝарʹа вәкә у ԝирʹа бежә кӧ тӧ чьма хәмгин и (Зәбур 6:6-9). Паше, жь Йаһоԝа рʹәща бькә кӧ әԝ али тә бькә ԝәки тӧ ԝан принсипа бьвини, йед кӧ дькарьн рʹебәрийа тә бькьн.

9. Чь һатьбу сәре Даԝьд?

⁹ (2) Бьдә бәр чʹәʹве хԝә. Сәрһатийа  Даԝьд бинә бәр чʹәʹве хԝә. Кӧрʹе ԝи Абшалом гәләк сала дӧрʹути дькьр у хԝә бәр щьмәʹте ширьн дькьр (2 Самуйел 15:7). Гава әԝ дьфькьри кӧ ԝәхт ида гьһиштийә, әԝи щәсусед хԝә шандә тʹәмамийа ԝәлат, ԝәки әԝана мәрьва һазьр бькьн кӧ ԝи ча пʹадша ԛәбул бькьн. Хенщи ве йәке, әԝи шеԝьрмәндәки Даԝьд, бь наве Аһитофәл жи хапанд кӧ әԝ пьштгьрийа ԝи бькә у мьԛабьли Даԝьд рʹабә. Паши кӧ Абшалом хԝә ча пʹадша әʹлам кьр, әԝ пәй баве хԝә Даԝьд кʹәт ԝәки ԝи бькӧжә, йе кӧ ча те кʹьфше һьнге гьран нәхԝәш бу (Зәбур 41:1-9). Гава Даԝьд плана Абшалом бьһист, әԝ жь Оршәлиме рʹәвийа. Паше, ордийа Абшалом тʹәви ордийа Даԝьд Пʹадша шәрʹ кьр у да дәр, у Абшалом һатә кӧштьне.

10. Гава Даԝьд Пʹадша рʹасти тәнгасийа һат, әԝи чь нәкьр?

¹⁰ Бинә бәр чʹәʹве кӧ Даԝьд Пʹадша сәва ван тәнгасийа чьԛас хәмгин бу. Әԝи кӧрʹе хԝә Абшалом һʹьз дькьр у итʹбарийа хԝә шеԝьрмәнде хԝә Аһитофәл дьани. Ле ԝана һәрда жи мьханәти ԝи кьр. Ԝана дьле ԝи гәләк ешанд, у сәрда жи дьхԝәстьн ԝи бькӧжьн. Диса жи, Даԝьд итʹбарийа хԝә һьндава һәвалед хԝә йед дьн ӧнда нәдькьр у нәдьфькьри кӧ һәр кәс буйә дьжмьне ԝи. Ӧса жи, әԝ нәкʹәтә һʹәйра хԝә у тʹәне жь ԝәлат нәрʹәви. Бәле, Даԝьд ԝан тәнгасийада мерхаси у сәбьра хԝә ӧнда нәкьр. Гәло чь али ԝи кьр?

11. Гава Даԝьд рʹасти проблема мәзьн һат, әԝи чь кьр?

¹¹ (3) Кʹур бьфькьрә. Гәло сәрһатийа Даԝьд Пʹадша дина тә дькʹьшинә сәр кʹижан принсипа? Жь хԝә бьпьрсә: «Даԝьд чь кьр кӧ проблема хԝә сафи бькә?» Даԝьд нәдькʹәт панике у бь ләз сафикьрьне нәкьр. Жь алийе дьнва, әԝи изьн нәда тьрсе ԝәки рʹийа ԝи бьгьрә кӧ сафикьрьна бькә. Әԝи һьм жь Йаһоԝа һьм жь достед хԝә аликʹари хԝәст. Паши кӧ әԝи сафикьрьнәк кьр, әԝи дәрберʹа ль гора сафикьрьна хԝә кьр. Даԝьд чьԛас хәмгин бу жи, әԝи изьн нәдьда кӧ дьле ԝи бь кʹин у нәфрʹәтева тʹьжә бә. Ӧса жи, әԝи баԝәрийа хԝә һьндава Йаһоԝа у достед хԝә ӧнда нәдькьр.

12. Йаһоԝа чаԝа али Даԝьд кьр?

¹² Гәло Йаһоԝа чаԝа али Даԝьд Пʹадша кьр? Кʹьтеба Пироз нишан дькә кӧ Йаһоԝа ԛәԝат да Даԝьд, ԝәки әԝ бькарьбә ль һьмбәри ве тәнгасийе сәбьр бькә (Зәбур 3:1-8; сәрньвис). Йаһоԝа сафикьрьнед Даԝьд кʹәрәм кьрьн у али достед Даԝьд йед амьн кьр.

13. Һәгәр кәсәки дьле тә пʹьрʹ ешандьбә, тӧ чаԝа дькари чʹәʹв бьди Даԝьд Пʹадша? (Мәтта 18:15-17)

¹³ (4) Бьдә хәбате. Жь хԝә бьпьрсә: «Әз ча дькарьм чʹәʹв бьдьмә Даԝьд Пʹадша?» Йа йәке, ԝе баш бә кӧ тӧ зу тьштәки бьки сәва проблема хԝә сафи бьки. Ль гора дәрәще, тӧ дькари ширәтед кӧ Мәтта сәре 18 тенә дайине, бьди хәбате (Мәтта 18:15-17 бьхунә). Ле гава тӧ һерс и у әʹщьз и, ләз сафикьрьна нәкә. Жь Йаһоԝа һиви бькә кӧ әԝ дьлрʹьһʹәти у биланийе бьдә тә, ԝәки тӧ бькарьби сафикьрьнед баш бьки. Итʹбарийа хԝә һьндава һәвалед хԝә ӧнда нәкә, у аликʹарийа ԝан инкʹар нәкә (Мәтʹәлок 17:17). Жь һәр тьшти зедәтьр жи, гӧһ бьдә ширәтед кӧ Йаһоԝа бь сайа Хәбәра хԝә дьдә тә (Мәтʹәлок 3:5, 6).

14. Готьнед жь 2 Тимотʹейо 1:12-16; 4:6-11, 17-22 дькарьн мерхасийе бьдьн кʹе?

¹⁴ Дьԛәԝьмә нәфәред тә мьԛабьли тә дәртен, йан жи шьхӧлед Шәʹдед Йаһоԝа  ԝәлате тәда һатьнә ԛәдәхәкьрьн. Һәгәр ӧса йә, готьнед жь 2 Тимотʹейо 1:12-16 у 4:6-11, 17-22 *, йед кӧ Паԝлос кәледа ньвисибун, дькарьн мерхасийе бьдьн тә.

15. Тӧ дькари жь Йаһоԝа чь рʹәща бьки?

¹⁵ (1) Дӧа бькә. Пешийа кӧ тӧ ван рʹеза бьхуни, бь зәлали Йаһоԝарʹа бәʹса проблема хԝә бькә у ԝирʹа бежә кӧ әв проблем чаԝа ль сәр тә һʹӧкӧм дькә. Паше, жь Йаһоԝа рʹәща бькә ԝәки әԝ али тә бькә кӧ тӧ жь сәрһатийа Паԝлос һин би кӧ чаԝа сәри тәнгасийед хԝәрʹа дәрхи.

16. Чь һатьбу сәре Паԝлос?

¹⁶ (2) Бьдә бәр чʹәʹве хԝә. Һʹале Паԝлосе шанди бинә бәр чʹәʹве хԝә. Әԝ Рʹомеда кәледа бу у бь зьнщира гьредайи бу. Әԝ бәре жи кʹәтьбу кәле, ле ижар, әԝи заньбу кӧ әԝе бе кӧштьне. Һьнә һәвалед ԝи пьшта хԝә данә ԝи, у һьн жи әԝ бетʹаԛәт ма (2 Тимотʹейо 1:15).

17. Паԝлосе шанди дькарьбу чь бькьра?

¹⁷ Паԝлосе шанди дькарьбу сәва сафикьрьнед хԝә пʹошман буйа у бьфькьрийа кӧ һәгәр әԝ нәбуйа шагьрте Иса Мәсиһ, әԝе нәкʹәта кәле. Әԝи дькарьбу мәрьвед һәрема Асйайеда, йед кӧ пьшта хԝә дабунә ԝи, һерс кʹәта у итʹбарийа хԝә һьндава достед хԝә йед дьн ӧнда бькьра. Ле Паԝлос ӧса нәкьр. Гәло чь али ԝи кьр кӧ әԝ баԝәри у һевийа хԝә хԝәй бькә?

18. Паԝлос чаԝа ԝәʹде тәнгасийа сәбьр дькьр?

¹⁸ (3) Кʹур бьфькьрә. Ль сәр ве пьрсе бьфькьрә: «Гава Паԝлосе шанди рʹасти тәнгасийа һат, әԝи чь кьр?» Гава әԝ ль бәр мьрьне бу, Паԝлос диса жи бир нәдькьр кӧ тьште һәри фәрз әв ә кӧ әԝ рʹумәте бьдә Йаһоԝа. Ӧса жи, әԝ дьфькьри кӧ әԝ чаԝа дькарә кәсед дьн һелан бькә. Әԝи хԝә дьспарт Йаһоԝа у «һәр гав шәв у рʹож» дӧа дькьр (2 Тимотʹейо 1:3). Әԝи бь зедәйи дина хԝә нәдьда кәсед кӧ пьшта хԝә дабунә ԝи, ле сәва аликʹарийа достед хԝә йед амьн, рʹази бу. Ӧса жи, Паԝлосе шанди Хәбәра Хԝәде бәрдәԝам леколин дькьр (2 Тимотʹейо 3:16, 17; 4:13). Йа һәри фәрз жи, әԝ баԝәр бу кӧ Йаһоԝа у Иса Мәсиһ ԝи һʹьз дькьн. Бәле, ԝана Паԝлос нәһишт, у Паԝлос заньбу кӧ әԝе хәлата хԝә бьстинә.

19. Йаһоԝа чаԝа али Паԝлос дькьр?

¹⁹ Йаһоԝа бь сайа Һагабо пʹехәмбәр пешда Паԝлосрʹа готьбу кӧ әԝе рʹасти зерандьна бе, чьмки әԝ шагьрте Иса Мәсиһ йә (Кʹаред Шандийа 21:11-13). Гәло Йаһоԝа чаԝа али Паԝлос дькьр? Әԝи щаба дӧайед Паԝлос дьда, у тʹьме ԛәԝат дьда ԝи (2 Тимотʹейо 4:17). Паԝлосрʹа һатә готьне кӧ әԝе бьгьһижә хәлата хԝә. Ӧса жи, Йаһоԝа бь сайа достед амьн йед Паԝлос али ԝи дькьр.

20. Ль гора Рʹомайи 8:38, 39, әм ча дькарьн чʹәʹв бьдьнә Паԝлос?

²⁰ (4) Бьдә хәбате. Жь хԝә бьпьрсә: «Гәло әз чаԝа дькарьм чʹәʹв бьдьмә Паԝлосе шанди?» Мина Паԝлос, гәрәке әм һазьр бьн кӧ сәва баԝәрийа хԝә әме рʹасти зерандьна бен (Марԛос 10:29, 30). Сәва кӧ әм ль һьмбәри тәнгасийа амьн бьминьн, гәрәке әм тʹьме Йаһоԝарʹа дӧа бькьн у Кʹьтеба Пироз леколин бькьн. Гәрәке әм тʹӧ щар бир нәкьн кӧ йәк жь тьштед һәри фәрз әв ә кӧ әм рʹумәте бьдьн Йаһоԝа. Әм дькарьн баԝәр бьн кӧ Йаһоԝа ԝе мә тʹӧ щара нәһелә у тʹӧ тьшт нькарә мә жь һʹьзкьрьна ԝи бьԛәтинә (Рʹомайи 8:38, 39 бьхунә; Ибрани 13:5, 6).

21. Чь али Айа у Һектор кьр кӧ әԝ сәри бь тәнгасийед хԝәрʹа дәрхьн?

²¹ Һʹале мә чь бә жи, әм дькарьн жь сәрһатийед кәсед амьн, йед кӧ Кʹьтеба Пироз  бәʹса ԝан дькә, ԛәԝат у мерхасийе бьстиньн. Мәсәлә, сәрһатийа Уньс али хушкәкә Жапони йа бь наве Айа кьр, ԝәки нәтьрсә хьзмәт кә ԝедәре, кʹидәре гәләк мәрьв ьн. Ле сәрһатийа Рʹутʹе, хԝәстьна хортәки бь наве Һектор, де-баве кʹижани Шәʹдед Йаһоԝа ниньн – зедә кьр кӧ әԝ дәрһәԛа Йаһоԝа һин бә у ԝирʹа хьзмәт бькә.

22. Тӧ чаԝа дькари жь сәрһатийед жь Кʹьтеба Пироз кʹаре бьстини?

²² Ль сәр jw.org у ль әʹдәбйәтед мә, тӧ дькари гәләк сәрһатийед жь Кʹьтеба Пироз бьвини. Видео, аудио-драма, кʹьтеб у журналед мә дькарьн али тә бькьн кӧ тӧ ван сәрһатийа бьди бәр чʹәʹве хԝә у жь ԝан ԛәԝат у мерхасийе бьстини. * Пешийа кӧ хԝәндьне дәстпеки, гӧһ бьди аудиоки йан видеоки бьньһерʹи, дӧа бькә кӧ Йаһоԝа али тә бькә кӧ тӧ фькьред лазьм хԝәрʹа бьвини. Кʹур бьфькьрә кӧ гава хьзмәткʹаред Йаһоԝа йед бәре рʹасти тәнгасийа дьһатьн, ԝана чь кьр у Йаһоԝа чаԝа али ԝан кьр. Тедәрхә кӧ тӧ чаԝа дькари һьнә дәрсед жь ван сәрһатийа дь жийана хԝәда бьди хәбате. Бона аликʹарийа Йаһоԝа рʹази бә. Рʹазибуна хԝә ԝирʹа бь ве йәке бьдә кʹьфше, кӧ кәсед дьн бьшьдинә у али ԝан бькә.

23. Ль гора Ишайа 41:10, 13, Йаһоԝа ԝе чаԝа али мә бькә?

²³ Иро дьнйа дь бьн контрола Шәйтʹанда йә, у жийин щара гәләк зәʹмәт ә (2 Тимотʹейо 3:1). Ле диса жи нә лазьм ә кӧ әм бь зедәйи бьтьрсьн у бәрхԝә кʹәвьн. Йаһоԝа һале мә рʹьнд занә. Әԝи соз дайә кӧ һәгәр әм бькʹәвьн жи, әԝе мә бь дәсте хԝәйи рʹасте бьгьрә (Ишайа 41:10, 13 бьхунә). Бәле, әм дькарьн баԝәр бьн кӧ Хԝәде ԝе али мә бькә. Тәнгасийед мә чь бьн жи, әм дькарьн жь Кʹьтеба Пироз ԛәԝате бьстиньн, ԝәки әм бькарьбьн сәбьр кьн у Йаһоԝарʹа амьн бьминьн.