1. Гәло хԝәстьна де-бава бона зарʹед ԝан чь йә?

 ДЕ-БАВНО, әм заньн кӧ һун дьхԝазьн али зарʹед хԝә бькьн, ԝәки әԝана Йаһоԝа нас бькьн у ԝи һʹьз бькьн. Ле әм нькарьн Хԝәде бьвиньн. Гәло һун ча дькарьн али зарʹед хԝә бькьн, кӧ әԝана баԝәрийа хԝә Хԝәде биньн у незики ԝи бьн? (Аԛуб 4:8)

2. Де-бав ча дькарьн али зарʹед хԝә бькьн, ԝәки әԝана дәрһәԛа һʹӧнӧред Йаһоԝа пебьһʹәсьн?

² Сәва кӧ зарʹед мә незики Йаһоԝа бьн, гәләк фәрз ә ԝәки әм тʹәви ԝан Кʹьтеба Пироз һин бьн (2 Тимотʹейо 3:14-17). Ле мәщаләкә дьн жи һәйә, кӧ ча әԝана дькарьн дьһа баш Йаһоԝа нас кьн. Кʹьтеба Мәтʹәлокда, бавәк кӧрʹе хԝәрʹа дьбежә, ԝәки әԝ һʹӧнӧред Йаһоԝа, кʹижан кӧ әʹфринада тенә кʹьфше, тʹьме бира хԝәда хԝәй кә (Мәтʹәлок 3:19-21). Әме ньһа бьвиньн кӧ де-бав чаԝа дькарьн али зарʹед хԝә бькьн, ԝәки әԝана бь сайа әʹфрина Йаһоԝа дьһа баш нас кьн.

3. Де-бав гәрәке чьда али зарʹед хԝә бькьн?

³ Кʹьтеба Пирозда дәрһәԛа Хԝәде те готьне кӧ «жь әʹфьрандьна дьнйайеда һʹӧнӧред ԝийә нәхӧйа, . . . бь әʹфьрина хӧйа дьбьн, зәлал тенә дитьне» (Рʹомайи 1:20). Де-бавно, һьлбәт ԝәрʹа һʹәԝас ә тʹәви зарʹед хԝә тʹәбийәтеда ԝәʹдә дәрбаз кьн. Ԝи чахи зарʹед хԝәрʹа нишан кьн, кӧ ортʹа әʹфринед Йаһоԝа у һʹӧнӧред ԝида, чь һәвгьредан һәйә. Әме ньһа бьвиньн, кӧ ве йәкеда де-бав ча дькарьн чʹәʹв бьдьнә Иса.

4. Иса ча бь сайа әʹфрина дәрсәкә фәрз да шагьртед хԝә? (Луԛа 12:24, 27-30)

⁴ Рʹожәке, Иса дина шагьртед хԝә кʹьшандә сәр ԛарʹԛарʹ  у сосьна (Бьхунә Луԛа 12:24, 27-30). Рʹаст ә Иса һʹәму һʹәйԝан у гӧл-сосьн нас дькьр, ле диса жи әԝи дина шагьртед хԝә кʹьшандә сәр ԝан чʹьвик у кӧлирка, йед кӧ ԝанрʹа нас бун. Ԝе рʹоже, дьԛәԝьмә ԛарʹԛарʹ бәр чʹәʹвед ԝан дьфьрʹийан у дәр-дора ԝан тʹьжә кӧлирк вәбьбун. Һәла бьдьнә бәр чʹәʹве хԝә, кӧ ча Иса дәсте хԝә дьрежи чʹьвик у сосьна кьр, ԝәки дина шагьртед хԝә бькʹьшинә сәр ԝан. Ле паше әԝи чь кьр? Әԝи дәрһәԛа мәрʹдани у ԛәнщийа Баве хԝә, дәрсәкә фәрз да шагьртед хԝә. Чаԝа кӧ Йаһоԝа тәйрәда у кӧлирка хԝәй дькә, әԝе кʹьнщ у хԝарьне бьдә хьзмәткʹаред хԝә жи.

5. Де-бав бь сайа чь дькарьн дәрһәԛа Йаһоԝа зарʹед хԝә һин кьн?

⁵ Де-бавно, чахе һун зарʹед хԝә һин дькьн, һун чьда дькарьн чʹәʹв бьдьнә Иса? Мәсәлә, һун дькарьн зарʹед хԝәрʹа дәрһәԛа һʹәйԝан йан кӧлиркәке хәбәр дьн, кʹижан кӧ һун һʹьз дькьн. Гава һун ве йәке дькьн, ԝанрʹа шьровәкьн, кӧ әԝ әʹфрин дәрһәԛа Йаһоԝа чь әшкәрә дькә. Паше, жь зарʹед хԝә бьпьрсьн һәла әԝана тʹәбийәтеда һʹәчʹи зәʹф чь һʹьз дькьн. Һәрге һун бәʹса ԝан тьшта бькьн чь кӧ ԝана хԝәш те, әԝана ԝе рʹьнд гӧһ бьдьнә ԝә, гава һун дәрһәԛа һʹӧнӧред Йаһоԝа ԝанрʹа гьли кьн.

6. Әм жь мәсәла дийа Кристофер чь дькарьн һин бьн?

⁶ Гәло лазьм ә ԝәки де-бав гәләк ԝәʹде хԝә сәр ве йәке хәрщ кьн, кӧ дәрһәԛа кӧлирк йан һʹәйԝанәки леколин кьн у паше зарʹед хԝәрʹа бежьн, кӧ әԝ дәрһәԛа Йаһоԝа чь мә һин дькә? На, әԝ йәк әʹсәйи нинә. Иса дәрһәԛа тәйрәда у гӧл-сосьна дьреж хәбәр нәда, мәсәлә кӧ чаԝа әԝана хӧрәке дәстдьхьн у шин дьбьн. Щара дьбәкә зарʹед ԝә һʹьз дькьн кʹур дәрһәԛа тʹәбийәте шеԝьр кьн, ле щара жи сәва кӧ әԝана фькьрәке фәʹм бькьн, нәлазьм ә дәрһәԛа ве йәке дьреж хәбәр дьн. Бьраки бь наве Кристофер дәрһәԛа зарʹотийа хԝә ӧса дьбежә: «Дийа мьн һеса мәрʹа шьровәдькьр, кӧ чьрʹа фәрз ә ԝәки әм тʹәбийәте ԛимәт кьн. Мәсәлә, гава әм незики чʹийа дьбун, әԝе ӧса дьгот: ‹Һәла дина хԝә бьдьне кӧ чʹийа чьԛас бьльнд у бәдәԝ ьн. Әв чекьрьна дәсте Йаһоԝа йә›. Йан жи, гава әм бәр бәʹре бун, әԝе ӧса дьгот: ‹Һәла дина хԝә бьдьнә ԛәԝата пʹелед бәʹре. Әԝ йәк дьдә кʹьфше кӧ ԛәԝата Йаһоԝа чьԛас мәзьн ә, ӧса нинә?› Әԝ гьлийед ԝейә һеса ле фәрз, гәләк сәр һʹьш у дьле мә һʹӧкӧм дькьр ьн».

7. Һун чаԝа дькарьн али зарʹед хԝә бькьн, ԝәки әԝана дина хԝә бьдьнә әʹфрина у дәрһәԛа ԝан бьфькьрьн?

⁷ Гава зарʹед ԝә мәзьн дьбьн, һун дькарьн ԝана һелан кьн, ԝәки дьһа зедә дина хԝә бьдьнә әʹфрина у дәрһәԛа Йаһоԝа пебьһʹәсьн. Мәсәлә, гава һун тʹәви зарʹед хԝә дәрһәԛа әʹфринәки хәбәр дьдьн, жь ԝан бьпьрсьн: «Әԝ йәк дәрһәԛа Йаһоԝа чь тә һин дькә? Бешьк, фькьред зарʹед ԝә, ԝе дьле ԝә ша кьн (Мәтта 21:16).

8. Гава де-бавед Исраели рʹеда бун, чь мәщал дькʹәтә дәсте ԝан?

⁸ Хԝәде жь де-бавед Исраели дәʹԝа дькьр, кӧ гава әԝана рʹеда ньн, тʹәви зарʹед хԝә дәрһәԛа ԛанунед ԝи хәбәр дьн (Ԛануна Дӧщари 11:19). Рʹийед Исраеле дәшт у зозанарʹа дәрбаз дьбун. Рʹеда ԝана дькарьбу гәләк һʹәйԝан, тәйрәдә у кӧлирка бьвиньн. Гава малбәт рʹеда бун, мәщал дькʹәтә дәсте де-бава, кӧ дина зарʹед хԝә бькʹьшиньн сәр тʹәбийәте. Де-бавно, бешьк мәщалед ӧса дькʹәвьнә  дәсте ԝә жи. Ԝәрә әм мәсәла һьнә де-бава шеԝьр кьн.

9. Әм дькарьн жь хушка мә Пунитайе у жь де-баве Катйайе чь һин бьн?

⁹ Дайикәкә бь наве Пунита, йа кӧ Һьндьстанеда шәһәрәки мәзьнда дьжи, ӧса дьбежә: «Гава әм тʹәви малбәта хԝә, меванти дьчьнә гӧнд щәм мәрьвед хԝә, кʹидәре кӧ дәшт у зозан ьн, мәщал дькʹәвә дәсте мә, кӧ әм тʹәви зарʹед хԝә дәрһәԛа әʹфринед Йаһоԝа хәбәр дьн. Гава әм жь шәһәр дәрдькʹәвьн, мәщала зарʹед мә һәйә кӧ әԝана дьһа баш дина хԝә бьдьнә тʹәбийәте. Де-бавно, зарʹед ԝә тʹӧ щар бир накьн гава һун ԝәʹде хԝә тʹәви ԝан тʹәбийәтеда дәрбаз дькьн. Катйа, хушкәкә жь Молдовайе, дьбежә: «Биранинед мьнә һәрә хԝәш әв ьн, гава кӧ мьн ԝәʹде хԝә тʹәви де-баве хԝә дәшт у зозанада дәрбаз дькьр. Бь аликʹарийа ԝана, әз жь зарʹотийеда һин бумә кӧ бьсәкьньм у рʹьнд дина хԝә бьдьмә тʹәбийәте у бь ве йәке дьһа баш Йаһоԝа нас бькьм».

10. Әв де-бав кʹижанарʹа чәтьн ә жь шәһәр дәркʹәвьн, дькарьн чь бькьн? (Бьньһерʹә чаргошә « Аликʹари бона Де-Бава».)

¹⁰ Һәрге найе стандьне кӧ һун һәрʹьн дәшт у зозана, һун дькарьн чь бькьн? Амол, йе кӧ ль Һьндьстане дьминә, дьбежә: «Ԝан щийа кʹидәре кӧ әз дьминьм, де-бав сьбе һʹәта еваре дьхәбьтьн. Һьм жи гәләк бьһа йә, кӧ жь шәһәр дәрен, ԝәки дина хԝә бьдьнә тʹәбийәте. Ле һун дькарьн паркәкә бьчʹукда йан жь балконе дина хԝә бьдьнә тʹәбийәте у дәрһәԛа һʹӧнӧред Йаһоԝа хәбәр дьн». Һәрге һун чʹәʹвед хԝә вәкьн у дора мала хԝә бьньһерʹьн, һуне бькарьбьн тьштед гәләк һʹәԝас бьвиньн у нишани зарʹед хԝә бькьн (Зәбур 104:24). Һуне чʹьвик, кʹезьк, шинкайи у гәләк тьштед дьн бьвиньн. Хушка мә Карина, йа кӧ Алманйайеда дьжи, ӧса дьбежә:  «Дийа мьн гәләки кӧлирка һʹьз дькә. Гава әз зарʹ бум у әм тʹәвайи дьгәрʹийан, әԝе тʹьме дина мьн дькʹьшандә сәр кӧлиркед бәдәԝ у назьк». Де-бавно, һун дькарьн бь сайа видео у әʹдәбйәтед тʹәшкиләта мә, тʹәви зарʹед хԝә дәрһәԛа тʹәбийәте хәбәр дьн. Бәле, мала ԝә кʹӧ бә жи, гәләк мәщал һәнә кӧ һун дина зарʹед хԝә бькʹьшиньн сәр әʹфринед Йаһоԝа. Гәло һун дькарьн дина зарʹед хԝә бькʹьшиньн сәр кʹижан һʹӧнӧред Йаһоԝа?

11. Де-бав чаԝа дькарьн али зарʹед хԝә бькьн, ԝәки әԝана һʹьзкьрьна Йаһоԝа тʹәбийәтеда бьвиньн?

¹¹ Сәва кӧ зарʹед ԝә һʹьзкьрьна Йаһоԝа бьвиньн, һун дькарьн дина ԝан бькʹьшиньн сәр ве йәке, кӧ гәләк һʹәйԝан чаԝа чʹежькед хԝә хԝәй дькьн (Мәтта 23:37). Ӧса жи, һун дькарьн нишани ԝан кьн, кӧ тʹәбийәт чьԛас хԝәш у рʹәнг-рʹәнги йә. Карина ӧса дьбежә: «Гава әз тʹәви дийа хԝә дәрва дьгәрʹийам, әм щарна дьсәкьнин, у дийа мьн нишани мьн дькьр, кӧ һʹәму кӧлирк чаԝа жь һәв щӧдә дьбьн у бәдәԝийа ԝан чаԝа һʹьзкьрьна Йаһоԝа нишан дькә. Ида гәләк сал дәрбаз бу йә, ле әз диса жи дина хԝә дьдьмә рʹәнг у бәдәԝийа кӧлирка. Әԝана һәртʹьм тиньн бира мьн, кӧ Йаһоԝа чьԛас мә һʹьз дькә».

12. Де-бав чаԝа дькарьн али зарʹед хԝә бькьн, кӧ әԝана биланийа Йаһоԝа бьвиньн? (Зәбур 139:14) (Бьньһерʹә ӧса жи шькьл.)

¹² Али зарʹед хԝә бькьн, ԝәки әԝана биланийа Хԝәде әʹфринада бьвиньн. Биланийа ԝи жь йа һәр кәси мәзьнтьр ә (Рʹомайи 11:33). Мәсәлә, һун дькарьн зарʹед хԝәрʹа шьровәкьн, кӧ чаԝа һӧлма аве дьбә әʹԝьр у һеса щигӧһасти дьбә (Ибо 38:36, 37). Йан жи һун дькарьн дина ԝан бькʹьшиньн сәр бәдәна мәйә мәхсус (Бьхунә Зәбур 139:14). Бавәки бь наве Владимир ӧса дьбежә: «Рʹожәке, кӧрʹе мә жь бисиклете кʹәт у чока хԝә бьриндар кьр. Чәнд рʹож шунда, бьрина ԝи ԛәнщ бу. Мьн тʹәви жьна хԝә жерʹа гот, ԝәки Йаһоԝа шанәйед бәдәна мә ӧса чекьрьнә, кӧ әԝана дькарьн тʹәзә бьн. Мә гот кӧ тʹӧ тьшт чь кӧ мәрьва чекьрийә, нькарә ве йәке бькә. Мәсәлә, паши ԛәзике, әʹрәбә нькарә хԝәха бе чекьрьне. Әве мәсәле али кӧрʹе мә кьр, ԝәки әԝ биланийа Йаһоԝа фәʹм бькә».

13. Де-бав чаԝа дькарьн али зарʹед хԝә бькьн, кӧ әԝана ԛәԝата Хԝәде әʹфринада бьвиньн? (Ишайа 40:26)

 ¹³ Йаһоԝа дьхԝазә ԝәки әм ль әʹзмана бьньһерʹьн у бьдьн бәр чʹәʹве хԝә, кӧ һʹәму стәйрк чаԝа бь ԛәԝата ԝи щийе хԝәда дьсәкьньн (Бьхунә Ишайа 40:26). Зарʹед хԝәрʹа бежьн кӧ әԝана дина хԝә бьдьнә әʹзмана у кʹур сәр бьфькьрьн. Хушкәкә жь Тәуԝане ӧса дьбежә: «Гава әз бьчʹук бум, щарәке мьн тʹәви дийа хԝә нава тʹәбийәте чадьр лехьст. Жь бәр кӧ әм дури рʹонайа шәһәр бун, мә шәв гәләк стәйрк дитьн. Әв һьнге бу, гава һәвалдәрсханед мьн зоре мьн дькьрьн, ԝәки әз ԛанунед Йаһоԝа бьтʹәрʹьбиньм у әз бәрхԝә дькʹәтьм, кӧ әзе бькарьбьм Йаһоԝарʹа амьн бьминьм йан на. Дийа мьн әз һелан кьрьм, кӧ әз дәрһәԛа ԛәԝата Йаһоԝа бьфькьрьм. Чаԝа кӧ Йаһоԝа һʹәму стәйрк бь ԛәԝата хԝә чекьрьнә, ԛәԝата Ԝи һәйә кӧ али мьн жи бькә. Паши ԝе йәке, мьн дьхԝәст дьһа баш Йаһоԝа нас кьм у тʹьме бь дьл у щан ԝирʹа хьзмәте кьм».

14. Де-бав ча дькарьн али зарʹед хԝә бькьн, кӧ әԝана бьвиньн ԝәки Йаһоԝа Хԝәдейе бь шабуне тʹьжә йә?

¹⁴ Йаһоԝа бь сайа әʹфрина нишани мә дькә, кӧ әԝ Хԝәдеки бь шабуне тʹьжә йә у дьхԝазә кӧ әм жи тʹьме ша бьн. Зандар дьбежьн кӧ һʹәчʹи зәʹф һʹәйԝан, һәла һе чʹьвик у мәʹси жи дьлизьн (Ибо 40:20). Чахе пʹьшикәкә бьчʹук йан жи тʹуләк, дьлизьн, гәло һʹәԝаса зарʹед ԝә ԝанрʹа найе? Гава щарәкә дьн, зарʹед ԝә листька һʹәйԝана тʹәмашә бькьн у бькʹәньн, һун дькарьн биньн бира ԝан, кӧ Йаһоԝа Хԝәдейе бь шабуне тʹьжә йә (1 Тимотʹейо 1:11).

15. Де-бав чаԝа дькарьн али зарʹед хԝә бькьн, ԝәки әԝана дьле хԝә ԝанрʹа вәкьн? (Мәтʹәлок 20:5) (Бьньһерʹә ӧса жи шькьл.)

¹⁵ Гәло зарʹед ԝәрʹа чәтьн ә бәʹса проблемед хԝә бькьн? Һәрге әре, һун гәрәке али ԝан бькьн, ԝәки әԝана дьле хԝә ԝәрʹа вәкьн (Бьхунә Мәтʹәлок 20:5). Һьнә де-бав тедәрхьстьнә кӧ әԝ йәк һеса йә бькьн, гава әԝана тʹәви зарʹед  хԝә ԝәʹдә тʹәбийәтеда дәрбаз кьн, чьмки ԝедәре тʹӧ тьшт ԝана әʹщьз накә у әԝана һеса дькарьн дина хԝә бьдьнә һәвдӧ. Бавәк жь Тайԝане дәрһәԛа мәʹникә дьн жи дьбежә: «Чахе әм тʹәви зарʹед хԝә нава тʹәбийәте ԝәʹде хԝә дәрбаз дькьн, мәсәлә гава әм һьлдькʹьшьн чʹийа йан жи бәр дәве бәʹре дьмәшьн, бәшәра ԝан хԝәш дьбә. Һьнге мәрʹа һеса йә ԝанрʹа хәбәр дьн у тедәрхьн кӧ дәрдед ԝан чь нә». Катйа, дәрһәԛа кʹижане мә жоре хәбәр дабу, дьбежә: «Паши мәкʹтәбе, дийа мьн әз дьбьрьм паркәкә бәдәԝ. Ԝе дәре, мьнрʹа һеса бу дьле хԝә жерʹа вәкьм кӧ мәкʹтәбеда чь дьԛәԝьми йан чь хәмед мьн һәбун».

16. Малбәт кʹидәре у ча дькарьн ләзәте бьстиньн?

¹⁶ Тʹәбийәтеда, малбәт дькарьн һеса бьн у шабуне бьстиньн. Әв йәк ԝе али ԝан бькә, ԝәки әԝана дьһа зедә һәвдӧ һʹьз бькьн. Кʹьтеба Пироз дьбежә кӧ «дәма кʹәнине һәйә» у «дәма шайе һәйә» (Ԝаиз 3:1, 4). Йаһоԝа щийед гәләк хԝәш у бәдәԝ чекьрьнә, кʹидәре кӧ әм дькарьн һеса бьн у ләзәте бьстиньн. Гәләк малбәт һʹьз дькьн мешә, дәшт у зозанада, сәр чʹийа йан жи бәр дәве бәʹре ԝәʹде хԝә дәрбаз кьн. Һьнә зарʹ һʹьз дькьн паркада бьлизьн, һʹәйԝана бьньһерʹьн, чʹәмада, голада йан жи бәʹреда хԝә аве хьн. Бәле, гава әм дәрдькʹәвьн тʹәбийәте, гәләк мәщалед мә һәнә, кӧ әм дина хԝә бьдьнә чекьрьна дәсте Йаһоԝа у шабунәкә мәзьн бьстиньн!

17. Чьрʹа лазьм ә кӧ де-бав али зарʹед хԝә бькьн, ԝәки әԝана жь әʹфринед Йаһоԝа ләзәте бьстиньн?

¹⁷ Дьнйа тʹәзәда, де-бав у зарʹ ԝе жь тьштед кӧ Йаһоԝа әʹфьрандьнә, һе зедә шабуне бьстиньн, чь кӧ ԝана әʹмьрада нәкьрьбу. Ԝи чахи, әме жь һʹәйԝана нәтьрсьн, у әԝе жи жь мә нәтьрсьн (Ишайа 11:6-9). Кʹаред дәсте Йаһоԝа ԝе мә һʹәта-һʹәтайе ша бькьн (Зәбур 22:26). Ле де-бавно, һун дькарьн иро жи али зарʹед хԝә бькьн, ԝәки әԝана жь тʹәбийәте шабуне бьстиньн. Һәрге һун бь сайа әʹфрина али зарʹед хԝә бькьн, кӧ әԝана Йаһоԝа дьһа баш нас бькьн, әԝана ԝе тʹәви гьлийед Даԝьд Пʹадша ԛайил бьн, йе кӧ гот: «Хӧдано, нава хԝәдейада йәки мина Тә тʹӧнә, нә жи мина кьред Тә, кьр һәнә» (Зәбур 86:8).