1-2. (а) Һʹәчʹи зәʹф ԝәʹде ньхӧмандьне чь дьԛәԝьмә? (б) Ве готареда, әме дәрһәԛа чь шеԝьр кьн?

 ТӘ ԚӘ дитийә кӧ ча мәрьв тенә ньхӧмандьне? Пешийа кӧ әԝана бенә ньхӧмандьне, тӧ дьбьһейи кӧ әԝана ча щаба дӧ пьрса дьдьн. Тӧ дьвини кӧ һәр кәс чьԛас ша йә. Чахе әԝана жь аве дәрдькʹәвьн, һәр кәс ԝанрʹа чʹәпька ледьхә у шабуна ньге ԝан әʹрд нагьрә. Һәр һʹәфте, бь һʹәзара мәрьв ве гаве давежьн у ча Шәʹдед Йаһоԝа тенә ньхӧмандьне.

² Гәло тӧ дьхԝази бейи ньхӧмандьне? Һәрге әре, тӧ ве дьнйа хьрабда мәрьвәки гәләк ԛимәт и, чьмки тӧ ‹Хԝәде дьгәрʹи› (Зәбур 14:1, 2). Фьрԛи тʹӧнә тӧ щаһьл йан әʹмьрда мәзьн и, әв готар бона тә һатийә ньвисандьне. Әв готар ԝе дьле мәрьвед кӧ һатьнә ньхӧмандьне жи ԛәԝи кә, кӧ әԝана һʹәта-һʹәтайе Йаһоԝарʹа хьзмәте кьн. Әме ньһа се мәʹнийа шеԝьр кьн кӧ әм чьрʹа дьхԝазьн Йаһоԝарʹа хьзмәт кьн.

3. Хьзмәткʹаред Йаһоԝа чьрʹа рʹастийе у һәԛийе һʹьз дькьн? (Зәбур 119:128, 163)

³ Йаһоԝа тʹәми дайә хьзмәткʹаред хԝә, ԝәки рʹастийе һʹьз бькьн (Зәкәрйа 8:19). Иса шагьртед хԝәрʹа гот, кӧ әԝана пәй рʹастийе һәрʹьн (Мәтта 5:6). Мәрьвед ӧса бь дьл у щан дьхԝазьн кӧ чь бәр чʹәʹве Хԝәде ԛәнщ у рʹаст ә, ве йәке бькьн. Гәло тӧ жи рʹастийе у һәԛийе һʹьз дьки? Әм баԝәр ьн, кӧ әре! Тӧ дәрәԝийе, һәр тьштед нәрʹаст у хьрабийе нәфрʹәт дьки (Бьхунә Зәбур 119:128, 163). Дәрәԝи, йәк жь хәйсәтед Мире-щьна йә, йе кӧ сәрԝере ве дьнйайе йә (Йуһʹәнна 8:44; 12:31). Нетәкә Мире-щьна әԝ ә, кӧ наве Йаһоԝа Хԝәде бәр чʹәʹве һәр  кәси рʹәш кә. Жь ԝәхта рʹабәрибуна бахче Еденеда, Мире-щьна дәрһәԛа Хԝәдайе мә гәләк дәрәԝа бәла дькә. Әԝ дьхԝазә мәрьва бьдә баԝәркьрьне, кӧ Йаһоԝа сәрԝерәки хԝәһʹьз ә, нә рʹаст у нә жи һәԛ ә, у ԛәнщийе жь мәрьва вәдьшерә (Дәстпебун 3:1, 4, 5). Дәрәԝед Мире-щьна мәрьва һелан дькьн, ԝәки әԝана дәрһәԛа Йаһоԝа хьраб бьфькьрьн. Мире-щьна дькарә сәр кәсед кӧ рʹастийе һʹьз накьн һʹӧкӧм бькә, ԝәки әԝана һʹәму тьштед хьраб у мьрʹдарʹ бькьн (Рʹомайи 1:25-31).

4. Йаһоԝа ча нишан кьрийә ԝәки әԝ «Хԝәдайе рʹастийе» йә? (Бьньһерʹә ӧса жи шькьл.)

⁴ Йаһоԝа «Хԝәдайе рʹастийе» йә, у әԝ рʹастийе ԝан мәрьва һин дькә, кʹи кӧ ԝи һʹьз дькьн (Зәбур 31:5, ИМ). Бь ви щурʹәйи, Әԝ мәрьва жь дәрәԝед Мире-щьна аза дькә. Ӧса жи, Йаһоԝа хьзмәткʹаред хԝә һин дькә, ԝәки әԝана рʹаст у һәԛ бьн. Бь сайа рʹастийе әԝана дьһа зедә ԛәдьре хԝә заньн у дьлрʹьһʹәтийе хԝәй дькьн (Мәтʹәлок 13:5, 6). Гава тә Кʹьтеба Пироз леколин дькьр, гәло тә тедәрхьст, ԝәки Йаһоԝа әв тьшт бона тә жи кьрийә? Тӧ пеһʹәсийайи ԝәки рʹийа Йаһоԝа, бона һәр кәси рʹийа һәрә баш ә (Зәбур 77:13). Ләма жи тӧ дьхԝази ван тьшта бьки чь кӧ бәр чʹәʹве Хԝәде рʹаст ә (Мәтта 6:33). Тӧ дьхԝази рʹастийе бьпарези у избат ки, ԝәки һʹәму готьнед Мире-щьна, йед кӧ әԝи дәрһәԛа Йаһоԝа Хԝәде готьнә, дәрәԝ ьн. Ле тӧ ча дькари ве йәке бьки?

5. Тӧ чаԝа дькари нишан ки, ԝәки тӧ рʹасти у һәԛийе һʹьз дьки?

⁵ Тӧ дькари жийина хԝәда ве сафикьрьне бьки у бежи: «Әз дәрәԝед Мире-щьна инкʹар дькьм у пьштгьрийа рʹастийе дькьм. Әз дьхԝазьм ԝәки Йаһоԝа Сәрԝере мьн бә, у тьштед кӧ бәр чʹәʹве ԝи рʹаст ьн, бькьм». Гәло тӧ чаԝа дькари ве йәке бьки? Дӧада хԝә тʹәсмили Йаһоԝа кә у соз бьдә ԝи, кӧ тӧйе һәртʹьм жерʹа хьзмәт ки, у паше ԝәрә ньхӧмандьне. Һʹьзкьрьна һьндава рʹастийе у һәԛийе ԝе али тә бькә, ԝәки тӧ сафи ки, кӧ бейи ньхӧмандьне.

6. Ль гора Зәбур 45:4, әм чьрʹа Иса Мәсиһ һʹьз дькьн?

⁶ Чьрʹа тӧ Иса Мәсиһ һʹьз дьки? Чәнд мәʹнийед баш Зәбур 45:4-да һатьнә дайине (Бьхунә). Иса рʹастийе, мьлуктийе у һәԛийе һʹьз дькә. Һәрге тӧ рʹастийе у  һәԛийе һʹьз дьки, демәк тӧ Иса Мәсиһ жи һʹьз дьки. Иса бь мерхаси һәр тьште кӧ рʹаст бун, дьпараст (Йуһʹәнна 18:37). Ле әԝ ча мьлуктийе дьдә кʹьфше?

7. Мьлуктийа Иса ча сәр тә һʹӧкӧм дькә?

⁷ Иса йәки мьлук ә. Мәсәлә, әԝи тʹӧ щар рʹумәт нәдьда хԝә, ле дьда Баве хԝә (Марԛос 10:17, 18; Йуһʹәнна 5:19). Ле мьлуктийа ԝи ча сәр тә һʹӧкӧм дькә? Гәло әв йәк тә һелан накә, ԝәки тӧ Кӧрʹе Хԝәде һʹьз бьки у чʹәʹв бьди ԝи? Бешьк, һәма ӧса жи һәйә. Гәло Иса чьрʹа йәки мьлук ә? Чьмки әԝ Баве хԝәйи мьлук һʹьз дькә у чʹәʹв дьдә ԝи (Зәбур 18:35; Ибрани 1:3). Иса бь тʹәмами һʹӧнӧред Йаһоԝа әʹйан дькә, ләма жи әм дьхԝазьн незики ԝи бьн.

8. Чьрʹа әм бәхтәԝар ьн кӧ Иса Пʹадше мә йә?

⁸ Әм бәхтәԝар ьн кӧ Иса Пʹадше мә йә, чьмки әԝ Сәрԝере һәри баш ә. Йаһоԝа хԝәха Кӧрʹе хԝә һин кьрийә у әԝ кьрийә Пʹадша (Ишайа 50:4, 5). Ӧса жи, Иса жь һʹьзкьрьна мәзьн, әʹмьре хԝә бона мә бәрва да (Йуһʹәнна 13:1). Иса Пʹадше мә йә, ләма жи әԝ һежайи һʹьзкьрьна мә йә. Кәсед кӧ бь рʹасти ԝи һʹьз дькьн достед ԝи нә у гӧһ дьдьн тʹәмийед ԝи (Йуһʹәнна 14:15; 15:14, 15). Бона мә ԛәдьрәки гәләк мәзьн ә, кӧ әм достед Кӧрʹе Йаһоԝа нә!

9. Ньхӧмандьна мә чьда мина ньхӧмандьна Иса Мәсиһ йә?

⁹ Йәк жь тʹәмийед Иса әԝ ә, кӧ шагьртед ԝи гәрәке бенә ньхӧмандьне (Мәтта 28:19, 20). Әԝ хԝәха жи һатә ньхӧмандьне. Ньхӧмандьна ԝи һьнә алийава жь йа шагьртед ԝи щӧдә йә (Бьньһерʹә чаргошә «Ньхӧмандьна Иса Ча жь йа Шагьртед Ԝи Щӧдә Дьбә?»). Ле һьнә алийава жи мина һәв ьн. Чахе Иса һатә ньхӧмандьне, әԝи да кʹьфше кӧ әԝ дьхԝазә ль гора хԝәстьна Баве хԝә һәр тьшти бькә (Ибрани 10:7). Бь ви щурʹәйи, гава пәйчуйед Иса тенә ньхӧмандьне, әԝана нишан дькьн, кӧ ԝана әʹмьре хԝә тʹәсмили Йаһоԝа Хԝәде кьрийә. Жь ԝе рʹожева, әԝана нә кӧ ль гора хԝәстьна хԝә, ле ль гора хԝәстьна Йаһоԝа дьжин. Ӧса әԝана чʹәʹв дьдьнә Ахайе хԝә.

10. Тӧ чьрʹа Иса Мәсиһ һʹьз дьки, у әв һʹьзкьрьн тә һелан дькә кӧ тӧ чь бьки?

¹⁰ Бәле, тӧ Иса ча Кӧрʹе Йаһоԝайи тайе тʹәне ԛәбул дьки у ша йи, кӧ Хԝәде әԝ кьрийә Пʹадше мә. Тӧ зани кӧ Иса йәки мьлук ә у бь тʹәмами чʹәʹв дьдә Баве хԝә. Тӧ пеһʹәсийайи ԝәки әԝи хԝарьн дьда кәсед бьрʹчи, һеви дьда кәсед дьлшкәсти, у мәрьвед нәхԝәш ԛәнщ дькьрьн (Мәтта 14:14-21). Тӧ ида зани кӧ әԝ иро чаԝа рʹебәрийа щьвате дькә (Мәтта 23:10). У тӧ баԝәр дьки кӧ зутьрәке, әԝе ча Пʹадше Пʹадшатийа Хԝәде гәләк тьштед баш бона мә бькә. Гәло тӧ чаԝа дькари нишан ки, ԝәки тӧ Иса Мәсиһ һʹьз дьки? Гава тӧ чʹәʹв бьди ԝи (Йуһʹәнна 14:21). Мина Иса әʹмьре хԝә тʹәсмили Йаһоԝа кә у паше ԝәрә ньхӧмандьне.

11. Мәʹнийа лапә фәрз кӧ мәрьв чьрʹа тенә ньхӧмандьне, чь йә?

¹¹ Гәло мәʹнийа һәрә фәрз кӧ мәрьв чьрʹа тенә ньхӧмандьне, чь йә? Иса Мәсиһ да кʹьфше, ԝәки хԝәстьна Хԝәде йа һәрә мәзьн чь йә. Әԝи гот: «Хӧдан Хԝәдейе хԝә һʹьз бькә, бь тʹәмамийа дьле хԝә, бь тʹәмамийа щанийа хԝә, бь тʹәмамийа һʹьше хԝә у бь тʹәмамийа ԛәԝата хԝә» (Марԛос 12:30). Гәло әв готьн нишан накьн кӧ тӧ чьԛас Хԝәде һʹьз дьки?

12. Чьрʹа тӧ Йаһоԝа һʹьз дьки? (Бьньһерʹә ӧса жи шькьл.)

¹² Гәләк мәʹни һәнә, жь бо чь жи әм Йаһоԝа һʹьз дькьн. Мәсәлә, тә фәʹм  кьрийә кӧ Йаһоԝа «канийа жийане» йә у «һәр дайина ԛәнщ у һәр пʹешкʹеша кʹамьл» жь ԝи те (Зәбур 36:9; Аԛуб 1:17). Бәле, һәр тьште ԛәнщ дайина Баве мәйи дьлован у дәствәкьри йә.

13. Чьрʹа ԛӧрбана Иса пʹешкʹешәкә гәләк ԛимәт ә?

¹³ Ԛӧрбана Иса пʹешкʹешәкә гәләк ԛимәт ә, кӧ Йаһоԝа дайә мә. Әм чьма дькарьн ӧса бежьн? Һәла сәр достийа Йаһоԝа у Кӧрʹе ԝи бьфькьрә. Иса ӧса гот: «Бав мьн һʹьз дькә» у «әз Баве һʹьз дькьм» (Йуһʹәнна 10:17; 14:31). Йаһоԝа у Иса бь милйарда сала тʹәвайи бун, ләма жи достийа ԝан гәләки ԛәԝи йә (Мәтʹәлок 8:22, 23, 30). Һәла бьфькьрә, гава Хԝәде һишт ԝәки Кӧрʹе ԝи гәләк щәфа бькʹьшинә у бе кӧштьне, еша дьле ԝи чьԛас гьран бу. Йаһоԝа тә у һʹәму мәрьва ӧса һʹьз дькә, кӧ әԝи Кӧрʹе хԝәйи һʹьзкьри бона мә кьрә ԛӧрбан. Ләма жи әм дькарьн әʹмьре һʹәта-һʹәтайе бьстиньн (Йуһʹәнна 3:16; Галати 2:20). Гәло әва мәʹникә мәзьн нинә, кӧ әм Хԝәде һʹьз бькьн?

14. Тӧ кʹижан нета һәрә баш дькари бьди пешийа хԝә?

¹⁴ Чьԛас баш тӧ Йаһоԝа нас бьки, һаԛас һе зедә те ԝи һʹьз бьки. Бешьк, тӧ дьхԝази һьм ньһа һьм жи һʹәта-һʹәтайе незики ԝи би. У әв йәк реали йә. Әԝ дьхԝазә ԝәки тӧ бь готьн у кьред хԝә  дьле ԝи ша бьки (Мәтʹәлок 23:15, 16). Тӧ дькари жийина хԝәда бьди кʹьфше, ԝәки тӧ бь рʹасти Йаһоԝа һʹьз дьки (1 Йуһʹәнна 5:3). Әва нета һәрә баш ә йа кӧ тӧ дькари бьди пешийа хԝә!

15. Тӧ ча дькари һʹьзкьрьна хԝә Йаһоԝарʹа бьди кʹьфше?

¹⁵ Гәло тӧ ча дькари һʹьзкьрьна хԝә Йаһоԝарʹа бьди кʹьфше? Йа әʹԝльн, дӧайе хԝәйи шәхсида Йаһоԝарʹа бежә, ԝәки тӧ дьхԝази жийина хԝә тʹәсмили ԝи ки (Зәбур 40:8). Паше гава тӧ бейи ньхӧмандьне, һәр кәс ԝе бьвинә, ԝәки тә жийина хԝә тʹәсмили Йаһоԝа кьрийә. Чаԝа мә серида гот, рʹожа ньхӧмандьне рʹожәкә гәләк хԝәш у мәхсус ә. Тӧ жийинәкә тʹәзә дәстпедьки нә кӧ бона хԝә, ле бона Йаһоԝа (Рʹомайи 14:8; 1 Пәтрус 4:1, 2). Әв йәк дьдә кʹьфше ԝәки тә гавәкә гәләк фәрз авитийә. Демәк ньхӧмандьн дәре жийинәкә хԝәш у бәхтәԝар бәр тә вәдькә. Гәло чаԝа?

16. Ль гора Зәбур 41:12, Йаһоԝа ԝе һʹәму кәсед кӧ жерʹа хьзмәт дькьн, чаԝа кʹәрәм кә?

¹⁶ Тʹӧ кәс мина Йаһоԝа мәрʹд нинә. Фьрԛи тʹӧнә тӧ чьԛас бона Йаһоԝа дьки, әԝе тʹьме дьһа зедә бона тә бькә (Марԛос 10:29, 30). Иро ве дьнйа хьрабда жи, Йаһоԝа соз дьдә ԝәки әԝе жийинәкә хԝәш у бәхтәԝар бьдә тә. Ле әва тʹәне дәстпекә. Рʹеԝитийа кӧ бь сайа ньхӧмандьна тә дәстпебуйә, һе бәрдәԝам дьбә. Тӧ дькари һʹәта-һʹәтайе Баве хԝәйи әʹзманарʹа хьзмәт ки. Һʹьзкьрьна тә у Ԝи ԝе дьһа мәзьн бә, у тӧйе жийина һәрһәйи ԛазанщ ки (Бьхунә Зәбур 41:12).

17. Гәло тӧ дькари чь бьди Йаһоԝа, чь кӧ щәм ԝи тʹӧнә йә?

¹⁷ Бь сайа сонда тʹәсмилбуне у бь сайа ньхӧмандьне, тӧ дькари тьштәки гәләк ԛимәт бьди Баве хԝәйи әʹзмана. Әԝи һәр тьште ԛәнщ у һәр тьште кӧ дьле тә ша дькә, дайә тә. Тӧ жи дькари тьштәки гәләки ԛимәт бьди Хԝәдайе әʹрд у әʹзмана, чь кӧ щәм ԝи тʹӧнә йә. Демәк амьнийа тә у хԝәстьна тә кӧ ԝирʹа хьзмәт бьки (Ибо 1:8; 41:11; Мәтʹәлок 27:11). Гәло жийинәкә жь ве жийине четьр һәйә? Бешьк, һʹьзкьрьна тә һьндава Йаһоԝа  мәʹнийа һәрә баш ә, ԝәки тӧ бейи ньхӧмандьне.

18. Тӧ дькари чь пьрса бьди хԝә?

¹⁸ Гәло тӧ дьхԝази бейи ньхӧмандьне? Щаба ве пьрсе тʹәне тӧ дькари бьди. Жь хԝә бьпьрсә: «Чь наһелә кӧ әз бемә ньхӧмандьне?» (Кʹаред Шандийа 8:36). Һәр се мәʹнийа кӧ ве готареда һәнә, бинә бира хԝә. (1) Тӧ рʹастийе у һәԛийе һʹьз дьки. (2) Тӧ Иса Мәсиһ һʹьз дьки. (3) Йа һәрә фәрз жи әв ә, кӧ тӧ Йаһоԝа һʹьз дьки. Жь хԝә бьпьрсә: «Гәло әз һивийа ԝе рʹоже мә, кӧ һәр кәс рʹастийе бежә у тьште рʹаст бькә? Гәло әз дьхԝазьм, ԝәки Кӧрʹе Хԝәде Пʹадшайе мьн бә у чʹәʹв бьдьмә ԝи? Гәло әз дьхԝазьм Йаһоԝарʹа хьзмәт бькьм у дьле ԝи ша кьм?» Һәрге щабед ван пьрса әре йә, ԝәки ӧса нә тӧ чьрʹа найейи ньхӧмандьне? (Кʹаред Шандийа 16:33).

19. Чьма тӧ гәрәке ньхӧмандьна хԝә паш нәхи? Мәсәләке бинә. (Йуһʹәнна 4:34)

¹⁹ Һәрге тӧ хԝә паш дьхи ԝәки бейи ньхӧмандьне, дина хԝә бьдә мәсәләке кӧ Иса ани (Бьхунә Йуһʹәнна 4:34). Иса ԛәдандьна хԝәстьна Баве хԝә бәрамбәри хԝарьне кьр. Гәло чьрʹа? Чаԝа кӧ хԝарьн бона бәдәна мә керһати йә, ӧса жи әв йәк кӧ Йаһоԝа чь жь мә дәʹԝа дькә бона кʹара мә йә. Йаһоԝа нахԝазә, ԝәки әм тьштед ӧса бькьн чь кӧ ԝе зьраре бьдә мә. Гәло Йаһоԝа дьхԝазә ԝәки тӧ бейи ньхӧмандьне? Һәмьки әре! (Кʹаред Шандийа 2:38) Ләма жи баԝәр бә кӧ һәрге тӧ гӧрʹа тʹәмийа Йаһоԝа бьки у бейи ньхӧмандьне, әв йәк бона кʹара тә йә. Мәсәлә, гава хԝарьнәкә хԝәш бьдьнә бәр тә, те бьхԝи ӧса нинә? Һәма бь ви щурʹәйи тӧ гәрәке хԝә паш нәхи у бейи ньхӧмандьне.

20. Готара дьнда әме дәрһәԛа чь шеԝьр кьн?

²⁰ Һьнәк кәс чьма хԝә паш дьхьн у найенә ньхӧмандьне? Дьԛәԝьмә әԝана дьфькьрьн: «Әз бона ньхӧмандьне һе һазьр ниньм». Сафикьрьна мәйә һәрә фәрз әԝ ә, кӧ әм хԝә тʹәсмили Йаһоԝа бькьн у бенә ньхӧмандьне. Ләма жи гәрәке тӧ ль сәр ве сафикьрьне кʹур бьфькьри. Ӧса жи, ԝәхт у хирәт лазьм ә, сәва кӧ тӧ бона ве йәке һазьр би. Ле һәрге тӧ бь дьл у щан дьхԝази ве гаве бавежи, гәло тӧ чаԝа дькари хԝә һазьр ки? Готара дьнда әме щаба ве пьрсе бьстиньн.