«Әԝ пьсмаме кӧ Боԝаз бәʹса ԝи кьрьбу» чьма гот кӧ һәрге әԝ Рʹутʹерʹа бьзәԝьщә, әԝе мьлкʹе хԝә ӧнда кә? (Рʹутʹ 4:1, 6)

Ԝәʹде бәре чахе мерәки зәԝьщи безӧрʹәт дьмьр, чәнд пьрс пешда дьһатьн: Әʹрде ԝи ԝе кʹерʹа бьминә? Гәло наве малбәта ԝи ԝе бе биркьрьне? Бь аликʹарийа Ԛануна Муса пьрсед ӧса дьһатьнә сафикьрьне.

Һәрге мерәк бьмьра, йан кʹәсиб бьбуйа у әʹрде хԝә бьфьрота, гәло әʹрде ԝи ԝе кʹерʹа бьма? Ԝи чахи бьраки ԝи йан мәрьве ԝийә незик, дькарьбу әʹрде ԝи бькʹьрʹийа у вәгәрʹанда. Бь ви щурʹәйи әʹрде ԝи диса дькʹәтә дәсте малбәта ԝи (Ԛануна Кʹаһинтийе 25:23-28; Жьмар 27:8-11).

Гәло наве малбәта мере мьри чаԝа дьһатә хԝәйкьрьне? Ль гора ԛануне, бьре ԝи кәсе мьри, жьна бьре хԝә жьнти дьани, ԝәки зарʹәк бьһата буйине. Ӧса нав у мал-мьлкʹе кәсе мьри дәрбази ве зарʹе дьбу. Ӧса жи, бь сайа ве ԛануне, жьнәби бехԝәйи нәдьма (Ԛануна Дӧщари 25:5-7; Мәтта 22:23-28).

Ԝәрә әм дина хԝә бьдьнә мәсәла Наһомийе. Әԝ жьна мерәки бь наве Әлимәләх бу. Гава малхе ԝе Әлимәләх у дӧ кӧрʹед ԝе мьрьн, Наһоми стухар бу, чьмки тʹӧ кәс тʹӧнә бу бона ԝе хәм кьра (Рʹутʹ 1:1-5). Чахе Наһоми тʹәви бука хԝә Рʹутʹе вәгәрʹийа Щьһудайе, әԝе жерʹа гот, кӧ Боԝазрʹа бежә ԝәки әԝ ль гора ԛануне, әʹрде ԝан бькʹьрʹә, чьмки әԝ мәрьве Әлимәләх йе незик бу (Рʹутʹ 2:1, 19, 20; 3:1-4). Ле Боԝаз заньбу кӧ нава пьсмамтийа ԝанда «йәки һе незик һәйә». Ләма жи бәри пешьн бь ԛануни ԝи ‹пьсмами› гәрәке әʹрде Әлимәләх бькʹьрʹийа (Рʹутʹ 3:9, 12, 13).

Серида әԝи ‹пьсмами› дьхԝәст аликʹарийе бьдә (Рʹутʹ 4:1-4). Рʹаст ә әԝи заньбу кӧ кʹьрʹина әʹрд бьһа йә, ле әԝ дьфькьри кӧ Наһоми ида пир буйә у нькарә зарʹе бинә, йе кӧ дькарьбу әʹрде Әлимәләх чаԝа мьлкʹ бьстанда. У әԝ дьфькьри кӧ ахьрийеда әʹрде Әлимәләх ԝе бьгьһижә ԝи у әԝе кʹарәкә мәзьн бьстинә.

Ле чахе әԝи ‹пьсмами› бьһист кӧ хенщи ве йәке әԝ гәрәке Рʹутʹ жи жьнти бинә, әԝ пʹошман бу у нәхԝәст әʹрде Әлимәләх бькʹьрʹә. Әԝи гот: «Әз ви борще пьсмамтийе нькарьм бьԛәдиньм, нәбә кӧ әз ԝаре хԝә рʹәш кьм» (Рʹутʹ 4:5, 6). Ле гәло чьрʹа әԝ пʹошман бу?

Һәрге әԝи ‹пьсмами› Рʹутʹ жьнти бьанийа у кӧрʹәк ԝанрʹа бьһата буйине, әԝ кӧрʹьк ԝе әʹрде Әлимәләх ча мьлкʹ бьстанда. Гәло мьлкʹе ԝи ‹пьсмами› ԝе чаԝа рʹәш буйа, демәк зьраре кʹәта? Кʹьтеба Пирозда дәрһәԛа ве йәке тьштәк найе готьне, ле ԝьра чәнд мәʹни һатьнә дайине кӧ дьбәкә чьрʹа әԝе зьраре кʹәта.

• Йа пешьн, бь ньһерʹандьна ԝи, әԝи пʹәре хԝә ԝе бадиһәԝа хәрщ кьра, чьмки ахьрийеда әʹрде Әлимәләх ԝе бьгьһишта кӧрʹе Рʹутʹе.

• Йа дӧда, борще Наһоми у Рʹутʹе дькʹәтә стуйе ԝи.

• Йа сьсийа, һәрге Рʹутʹерʹа жь ԝи ‹пьсмами› зарʹ бьбуна, әԝана ԝе бьбуна һәвалпʹаред мьлкʹе зарʹед ԝи ‹пьсмами›.

• Йа чара, һәрге зарʹед ԝи ‹пьсмами› тʹӧнә буна, ԝи чахи һьм әʹрде Әлимәләх һьм жи әʹрде ԝи, ԝе кӧрʹе Рʹутʹерʹа бьма. Ләма жи гава әԝ бьмьра, әʹрде ԝи ԝе бькʹәта дәсте зарʹа кӧ наве Әлимәләх сәр бу, нә кӧ наве ԝи. Ча кʹьфш ә әԝи ‹пьсмами› нәхԝәст мьлкʹе хԝә ӧнда кә, ԝәки али Наһомийе бькә. Ләма жи әԝи әв щабдари да Боԝаз, изьна кʹижани бь ԛануни һәбу ԝәки әʹрде Әлимәләх бькʹьрʹә. Боԝаз әв щабдари ԛәбул кьр, чьмки әԝи хԝәст «ԝәки наве йе мьри жь нава бьрʹатийа ԝи у щи-ԝаред ԝи ӧнда набә» (Рʹутʹ 4:10).

Ӧса дьһатә кʹьфше, кӧ әԝ ‹пьсмам› пәй наве хԝә кʹәтьбу у нәдьхԝаст мьлкʹе хԝә ӧнда кә. Әԝ йәки хԝәһʹьз бу. Рʹаст ә әԝи дьхԝәст наве хԝә бьпарезә, ле һʹәта рʹожа иро әм ньзаньн наве ԝи чь йә. Әԝи ӧса жи әԝ ԛәдьр ӧнда кьр, кʹижан кӧ Боԝазрʹа һатә дайине. Наве Боԝаз кʹәтә нава хәза ԝе рʹькʹьнийате, жь кʹижане кӧ Иса Мәсиһ һатә буйине. Ча мә дит, әԝи ‹пьсмами› тʹӧ кʹар нәстанд жь бо ве йәке, кӧ әԝ йәки хԝәһʹьз бу у нәдьхԝәст али ԝан мәрьва бькә, йед кӧ һʹәԝще аликʹарийе бун! (Мәтта 1:5; Луԛа 3:23, 32)