1-2. Һәрге тӧ бона ньхӧмандьне һәла һе һазьр нини, чьрʹа тӧ гәрәке дьлтәнг нәби? (Бьньһерʹә шькьле сәр рʹуйе пешьн.)

 ГӘЛО тӧ дьхԝази бейи ньхӧмандьне? Ньхӧмандьн нетәкә гәләк баш ә. Һәрге тӧ дьфькьри ԝәки тӧ бона ньхӧмандьне һазьр и у рʹуспийед щьвате жи ԛайил ьн, тӧ дькари ԝәхтәкә незикда бейи ньхӧмандьне. Рʹожед гәләк хԝәш хьзмәтийа Йаһоԝада һивийа тә нә.

² Ле дьԛәԝьмә кәсәк тәрʹа дьбежә, ԝәки пешийа кӧ бейи ньхӧмандьне, тӧ гәрәке сәр хԝә бьхәбьти у һьнә гӧһастьна бьки. У дьԛәԝьмә тӧ хԝәха жи ӧса дьфькьри. Һәрге ӧса нә, дьлтәнг нәбә. Фьрԛи тʹӧнә тӧ щаһьл и йан әʹмьрда мәзьн и, тӧ дькари рʹӧһʹанида пешда һәри у бьгьһижи ве нета фәрз.

3. Мәрьве Әтйопи жь Филипо чь пьрси у чь пьрс пешда те? (Кʹаред Шандийа 8:37, 38)

³ Бьхунә Кʹаред Шандийа 8:37, 38. Мәрьве Әтйопи жь Филипо мьзгинван пьрси: «Чь наһелә кӧ әз бемә ньхӧмандьне?» Мәрьве Әтйопи жь дьл дьхԝәст бе ньхӧмандьне. Гәло әԝ бона ве гава фәрз һазьр бу?

4. Мәрьве Әтйопи ча нишан кьр, ԝәки әԝ дьхԝазә дьһа зедә занәбуне бьстинә?

⁴ Мәрьве Әтйопи «бона һʹәбандьне һатьбу Оршәлиме» (Кʹаред Шандийа 8:27). Ӧса дьһатә кʹьфше, кӧ әԝи дине Щьһуйа ԛәбул кьрьбу. Бешьк, әԝи жь Ньвисаред Пироз сәр зьмане Ибрани дәрһәԛа Йаһоԝа гәләк тьшт заньбу. Ле әԝи бь хирәт дьхԝәст дьһа зедә пебьһʹәсә. Әм ве йәке жь кʹӧ заньн? Гава Филипо ле сәр рʹе дит, әԝи жь дьл ньвисаред Ишайа пʹехәмбәр дьхԝәндьн (Кʹаред Шандийа 8:28). Ча те кʹьфше бона мәрьве Әтйопи, занәбуна  чәнд рʹастийед сәрәкә бәс нибун. Әԝи дьхԝәст дьһа зедә пебьһʹәсә.

5. Мәрьве Әтйопи чаԝа тьштед кӧ пеһʹәсийа бу, ани сери?

⁵ Мәрьве Әтйопи «ԝәкʹиле тʹәмамийа хьзна» жьн-пʹадшайа Әтйопийайе бу (Кʹаред Шандийа 8:27). Ләма жи бешьк әԝ ԛә бәтал нибу, чьмки гәләк щабдарийед ԝи һәбун. Ле диса жи, әԝи ԝәʹде хԝә бона һʹәбандьна Йаһоԝа вәдьԛәтанд. Бона ԝи, һинбуна рʹастийед сәрәкә бәс нибу. Әԝи дьхԝәст тьштед кӧ пеһʹәсийа бу, бинә сери. Ләма жи, сәва кӧ Йаһоԝа бьһʹәбинә, әԝ жь Әтйопийайе дьчу пʹарьстгәһа Оршәлиме. Бона ве рʹийа дьреж гәләк ԝәхт у пʹәрә лазьм бу, ле бона ԝи, һʹәбандьна Йаһоԝа һежайи һәр тьшти бу.

6-7. Һʹьзкьрьна һьндава Йаһоԝа дьле мәрьве Әтйопида чаԝа мәзьн дьбу?

⁶ Мәрьве Әтйопи жь Филипо дәрһәԛа һьнә рʹастийед тʹәзә йед фәрз пеһʹәсийа, мәсәлә кӧ Мәсиһ бь рʹаст кʹи йә (Кʹаред Шандийа 8:34, 35). Бешьк, гава Мәрьве Әтйопи бьһист, ԝәки Иса бона ԝи чь кьрийә, әԝ гәләк ша бу. Гәло әԝи паше чь кьр? Рʹаст ә әԝи дькарьбу ча прозелитәки хԝәйиԛәдьр бьма, ле һʹьзкьрьна һьндава Йаһоԝа у Иса Мәсиһ дьле ԝида һаԛас мәзьн бьбу, кӧ әԝи сафи кьр бе ньхӧмандьне. Әԝи дьхԝәст бьбә шагьртәки Иса Мәсиһ. Филипо дит кӧ әԝ бона ве йәке һазьр ә, ләма жи ԝи ньхӧманд.

⁷ Һәрге тӧ мина мәрьве Әтйопи һәрәкʹәт бьки, тӧ дькари бона ньхӧмандьне һазьр би. Ԝи чахи, тӧйе жи жь дьл бежи: «Чь наһелә кӧ әз бемә ньхӧмандьне?» Әме ньһа бьвиньн кӧ тӧ ча дькари мина мәрьве Әтйопи гава бавежи: Әԝ тʹьме һин дьбу, тьштед кӧ педьһʹәсийа дьани сери у һʹьзкьрьна һьндава Хԝәде дьле хԝәда мәзьн дькьр.

8. Ль гора Йуһʹәнна 17:3, гәрәке әм чь бькьн?

⁸ Бьхунә Йуһʹәнна 17:3. Гәло әв гьлийед Иса дьле тә ԛәԝи кьрийә, ԝәки тӧ леколина Кʹьтеба Пироз дәстпеки? Гәләка жь мә ӧса дәстпекьрийә. Гәло әв гьли мә жи һелан накьн, кӧ әм бәрдәԝам кьн занәбуне бьстиньн? Бәле. Әме занәбуна хԝә һʹәта-һʹәтайе зедә бькьн у Йаһоԝа Хԝәде дьһа баш нас бькьн (Ԝаиз 3:11). Чьԛас зедә әм һин бьбьн, һаԛас һе зедә әме незики Йаһоԝа бьн (Зәбур 73:28).

9. Чахе әм рʹастийед сәрәкә педьһʹәсьн, гәрәке әм чь бькьн?

⁹ Гава мә дәстпекьр Йаһоԝа нас бькьн, әм рʹастийед сәрәкә һин бун. Ве нәʹма Ибранийарʹа, Паԝлосе шанди гот  кӧ һинкьрьнед сәрәкә әв һәнә «дәрсед пешьнә садә». Әԝи нәдьхԝәст бьгота кӧ рʹастийед сәрәкә беԛимәт ьн. Әԝи әв рʹасти бәрамбәри шире дайике кьр, кӧ бона зарʹоке гәләк фәрз ә (Ибрани 5:12; 6:1). Ле ӧса жи, әԝи Мәсиһийарʹа гот, кӧ әԝана гәрәке һьм рʹастийед сәрәкә һьм жи рʹастийед кʹур бьзаньбьн. Гәло тӧ дьхԝази рʹастийед кʹур һин бьби? Гәло тӧ дьхԝази дәрһәԛа Йаһоԝа у ԛьрара ԝи дьһа зедә пебьһʹәси?

10. Чьма гәләк мәрьварʹа чәтьн ә леколина бькьн?

¹⁰ Гәләк мәрьварʹа чәтьн ә леколина бькьн. Ле тӧйе чь бежи? Гәло тӧ мәкʹтәбеда һин буйи, кӧ баш бьхуни у һин би? Гәло һʹәԝаса тә сәр хԝәндьн у леколине һәбу? Йан тӧ дьшьрмиш дьбуйи, кӧ бал тә найе стандьне кʹьтеба леколин ки? Һәрге ӧса нә, дьлтәнг нәбә, чьмки гәләк мәрьв ӧса ньн. Ле Йаһоԝа дькарә али тә бькә. Әԝ Мамостәйе һәри баш у беԛьсур ә.

11. Йаһоԝа чаԝа нишан кьрийә кӧ әԝ Мамостәйе Һәри Мәзьн ә?

¹¹ Йаһоԝа Хԝәде Мамостәйе мәйи Һәри Мәзьн ә (Ишайа 30:20, 21). Әԝ Мамостәки бьсәбьр у дьлован ә у һʹале мә рʹьнд фәʹм дькә. Әԝ дина хԝә дьдә һʹӧнӧред баш йед шагьртед хԝә (Зәбур 130:3). Әԝ тӧ щар тьштед жь ԛәԝата мә дәр, жь мә дәʹԝа накә. Бир нәкә, Әԝи мәжийе мә бь щурʹе мәхсус чекьрийә (Зәбур 139:14). Хԝәде әм ӧса әʹфьрандьнә кӧ әм һʹәԝще һинбуне нә. Әʹфьрандаре мә дьхԝазә кӧ әм тʹьме һин бьн у ләзәте жь ве йәке бьстиньн. Ләма жи әм һʹәйра ве йәкеда ньн, кӧ рʹастийед жь Кʹьтеба Пироз пебьһʹәсьн (1 Пәтрус 2:2). Нетед ӧса дайнә пешийа хԝә, йед кӧ тӧйе бькарьби бини сери, у һәр рʹож Кʹьтеба Пироз бьхунә у леколин кә (Йешу 1:8). Бь аликʹарийа Йаһоԝа, тӧйе жь хԝәндьне дьһа зедә ләзәте бьстини у һе зедә дәрһәԛа ԝи пебьһʹәси.

12. Чьрʹа лазьм ә кӧ әм ԝәʹде леколина шәхси дәрһәԛа Иса кʹур бьфькьрьн?

¹² Тʹьме ԝәʹдә бьвинә, ԝәки дәрһәԛа жийин у хьзмәтийа Иса бьфькьри. Сәва кӧ әм бькарьбьн ван рʹожед чәтьнда Йаһоԝарʹа хьзмәт кьн, әм гәрәке чʹәʹв бьдьнә Иса (1 Пәтрус 2:21). Иса Мәсиһ шагьртед хԝәрʹа готьбу, кӧ әԝана ԝе рʹасти тәнгасийа бен (Луԛа 14:27, 28). Ле әԝи баԝәр дькьр, кӧ шагьртед ԝи дькарьн мина ԝи Йаһоԝарʹа амьн бьминьн (Йуһʹәнна 16:33). Дәрһәԛа жийина Иса кʹур леколина бькә у хԝәрʹа нете дайнә, ԝәки жийина хԝәйә һәррʹожида чʹәʹв бьди ԝи.

13. Гәрәке тӧ тʹьме чь жь Йаһоԝа рʹәща бьки у чьрʹа?

¹³ Тʹәне занәбун бәс нинә. Һәмьки занәбун ԝе али тә бькә ԝәки тӧ Йаһоԝа дьһа баш нас бьки, һе зедә ԝи һʹьз бьки у баԝәрийа хԝә ԝи бини (1 Корьнтʹи 8:1-3). Чахе тӧ леколина дьки, жь Йаһоԝа рʹәща кә ԝәки баԝәрийа тә һе ԛәԝи кә (Луԛа 17:5). Әԝ бь мәрʹдани щабед дӧайед ӧса дьдә. Баԝәрийа кӧ сәр һʹиме занәбуна рʹаст ә, ԝе али тә бькә ԝәки тӧ рʹӧһʹанида пешда һәри (Аԛуб 2:26).

14. Паԝлосе шанди ча да кʹьфше, кӧ гәләк фәрз ә ԝан тьшта биньн сери, чь кӧ әм педьһʹәсьн? (Бьньһерʹә ӧса жи шькьл.)

¹⁴ Паԝлосе шанди да кʹьфше, кӧ чьԛас фәрз ә, ԝәки шагьртед Иса тьштед кӧ педьһʹәсьн, биньн сери. Әԝи бәʹса сәрһатийа Нӧһ кьр. Йаһоԝа Нӧһрʹа готьбу, кӧ ԝе бь сайа Селаве ԛьрʹа мәрьвед хьраб бинә. Тʹәне занәбуна дәрһәԛа Селаве бәс нибу кӧ Нӧһ у малбәта ԝи хьлаз буна.  Дина хԝә бьдьне, кӧ Пәтрус бәʹса ԝәʹде пешийа Селаве кьр, «гава гәми дьһатә чекьрьне» (1 Пәтрус 3:20). Бәле, Нӧһ у малбәта ԝи ль гора ве йәке гәми ава дькьрьн, чаԝа кӧ Хԝәде ԝанрʹа готьбу (Ибрани 11:7). Пәтрус кьред Нӧһ бәрамбәри ньхӧмандьне кьр у ӧса гот: «Әԝ ав сурәте ньхӧмандьне бу, кʹижан ньһа ԝә хьлаз дькә» (1 Пәтрус 3:21). Чаԝа кӧ бона Нӧһ у малбәта ԝи гәләк ԛәԝат у хирәт лазьм бу, ԝәки бь сала гәмийе ава кьн, ӧса жи тӧ гәрәке ԛәԝате хәрщ ки у хирәт би, сәва кӧ хԝә бона ньхӧмандьне һазьр ки. Ле гәло тӧ гәрәке чь бьки, ԝәки бона ньхӧмандьне һазьр би?

15. Гава кәсәк жь дьл тʹобә дькә, әԝ йәк чьда те кʹьфше?

¹⁵ Бәри пешьн чь кӧ әм гәрәке бькьн әԝ ә, ԝәки әм гӧнед хԝә тʹобә кьн (Кʹаред Шандийа 2:37, 38). Тʹобәкьрьна жь дьл кьред мәда те кʹьфше. Гәло тә тʹәрка хәйсәтед хьраб дайә, йед кӧ Йаһоԝа нәфрʹәт дькә? Мәсәлә, йед ӧса ча бенамуси, кʹьшандьна щьхаре у хәбьтандьна гьлийед хьраб (1 Корьнтʹи 6:9, 10; 2 Корьнтʹи 7:1; Әфәси 4:29). Һәрге тә тʹәрка ԝан тьшта нәдайә, һәр тьшти бькә, ԝәки тӧ бей гӧһастьне. Жь ԝи кәси, кʹе кӧ тʹәви тә һинбуна Кʹьтеба Пироз дәрбаз дькә, йан жи жь рʹуспийа, ширәт у аликʹарийе бьхԝазә. Кәсед щаһьл дькарьн аликʹарийе жь де-бавед хԝә бьхԝазьн, ԝәки бькарьбьн тʹәрка хәйсәтед хьраб бьдьн, кʹижан кӧ рʹийа ԝан дьгьрьн, ԝәки бенә ньхӧмандьне.

16. Һәрге әм дьхԝазьн тʹьме Йаһоԝарʹа хьзмәт кьн, әм гәрәке чь бькьн?

¹⁶ Гәләк фәрз ә ԝәки тʹьме нава шьхӧлед рʹӧһʹанида бьн. Мәсәлә һәрʹьнә щьвата у щьватада кʹар бькьн (Ибрани 10:24, 25). У гава тӧ ида дәстпеки тʹәви щьвате хьзмәт ки, ве йәкеда хирәт бә. Чьԛас зедә тӧ мьзгинийе бәла ки, һаԛас зедә тӧйе шабуне бьстини (2 Тимотʹейо 4:5). Кәсед щаһьл дькарьн пьрсе бьдьнә хԝә: «Гәло тʹьме де-баве мьн тиньн бира мьн, ԝәки әз һәрʹьм щьвина йан хьзмәтийе? Йан әз хԝәха ван тьшта дькьм?» Һәрге тӧ хԝәха ԝан гава бавежи, тӧйе избат ки, ԝәки тӧ Йаһоԝа баԝәр дьки, ԝи һʹьз дьки у жь ԝи рʹази йи.  Әв кьред тә, йед кӧ тӧ пʹешкʹеши Йаһоԝа дьки, дьдьнә кʹьфше кӧ тӧ бь амьни ԝирʹа хьзмәт дьки (2 Пәтрус 3:11; Ибрани 13:15). Һʹәму тьштед кӧ тӧ бь рʹәзәдьли бона Йаһоԝа дьки, дьле ԝи ша дькьн (Бәрамбәр кә 2 Корьнтʹи 9:7). У ӧса жи гава әм тьштед һәри баш дьдьнә Йаһоԝа, дьле мә бь шабуне тʹьжә дьбә.

17-18. Кʹижан һʹӧнӧре фәрз ԝе али тә бькә, ԝәки тӧ бейи ньхӧмандьне у чьрʹа? (Мәтʹәлок 3:3-6)

¹⁷ Гава тӧ бәрбь ньхӧмандьне һәри, тӧйе рʹасти чәтьнайа жи бейи. Жь бо баԝәрийа тә, һьнә мәрьв дьԛәԝьмә ԛәрфе хԝә тә бькьн у дьбәкә тӧ рʹасти пәйкʹәтьна жи бейи (2 Тимотʹейо 3:12). Һәрге тӧ сәр хԝә дьхәбьти, ԝәки тʹәрка хәйсәтәки хьраб бьди, дькарә ӧса бьԛәԝьмә ԝәки тӧ диса тьштәки хьраб бьки. Йан жи дьԛәԝьмә тӧ дьлтәнг дьби у дьфькьри кӧ тӧ нькари бьгьһижи нета хԝә. Чь ԝе али тә бькә ԝәки тӧ сәбьр ки? Һʹӧнӧрәки гәләк фәрз әԝ һәйә һʹьзкьрьна һьндава Йаһоԝа.

¹⁸ Һʹьзкьрьна тә һьндава Йаһоԝа һʹӧнӧре һәри ԛимәт ә кӧ дьле тәда һәйә (Бьхунә Мәтʹәлок 3:3-6). Әԝ һʹьзкьрьн ԝе али тә бькә, ԝәки тӧ һьмбәри тәнгасийа сәбьр ки. Кʹьтеба Пироз гәләк щар бәʹса һʹьзкьрьна Йаһоԝайә амьн һьндава хьзмәткʹаред ԝи дькә. Һʹьзкьрьна амьн те һʹәсабе кӧ Йаһоԝа ԝе тʹӧ щар хьзмәткʹаред хԝә нәһелә у һʹьзкьрьна ԝи һьндава ԝанда ԝе тʹӧ щар сар нәбә (Зәбур 100:5). Тӧ дьлԛе Хԝәдеда һати әʹфьрандьне (Дәстпебун 1:26). Ле тӧ ча дькари ве һʹьзкьрьне бьди кʹьфше?

19. Тӧ чаԝа дькари һе зедә рʹазибуна хԝә сәва һәр тьште кӧ Йаһоԝа бона тә кьрийә, бьди кʹьфше? (Галати 2:20)

¹⁹ Пешийе рʹазибуна хԝә Йаһоԝарʹа бьдә кʹьфше (1 Тʹесалоники 5:18). Һәр рʹож пьрсе бьдә хԝә: «Йаһоԝа ча һʹьзкьрьна хԝә нишани мьн кьрийә?» Паше дӧайед хԝәда рʹазибуна хԝә Йаһоԝарʹа бьдә кʹьфше, сәва ве йәке, чь кӧ әԝи бона тә кьрийә. Хԝәде тьштед ԛәнщ бона тә дькә, чьмки әԝ тә һʹьз дькә. Паԝлосе шанди жи әв йәк баԝәр дькьр (Бьхунә Галати 2:20). Жь хԝә бьпьрсә: «Гәло әз жи дьхԝазьм Йаһоԝарʹа бьдьмә кʹьфше кӧ әз ԝи һʹьз дькьм?» Һʹьзкьрьна һьндава Йаһоԝа ԝе али тә бькә, ԝәки тӧ бәр щерʹьбандьн у чәтьнайа сәбьр ки. Әв һʹьзкьрьн ԝе дьле тә ԛәԝи кә, ԝәки тӧ тʹьме Йаһоԝарʹа хьзмәт ки у һәр  рʹож һʹьзкьрьна хԝә һьндава ԝида бьди кʹьфше.

20. Сәва кӧ тӧ жийина хԝә тʹәсмили Йаһоԝа ки, гәрәке тӧ чь бьки, у әв сафикьрьн чьԛас фәрз ә?

²⁰ Ԝәʹдә шунда, һʹьзкьрьна һьндава Йаһоԝа ԝе тә һелан кә, ԝәки тӧ дӧайе шәхсида әʹмьре хԝә тʹәсмили Йаһоԝа ки. Гава тӧ ӧса бьки, тӧйе бьби хԝәйе һевийа хԝәш. Тӧйе һʹәта-һʹәтайе бьн пʹәрʹе Йаһоԝада би. Бь сайа сонда тʹәсмилбуне, тӧйе соз бьди Йаһоԝа кӧ тӧйе һьм рʹожед хԝәшда у һьм жи ԝәʹде чәтьнда ԝирʹа хьзмәт ки. Сонда тʹәсмилбуне тʹәне щарәке те дайине у әԝ сафикьрьнәкә гәләк фәрз ә. Сәр ве йәке бьфькьрә: Тӧйе жийина хԝәда гәләк сафикьрьна бьки, һьнәк жь ԝан гәләк баш ьн, ле сонда тʹәсмилбуне йа лапә баш ә (Зәбур 50:14). Мире-щьна ԝе һәр тьшти бькә, ԝәки һʹьзкьрьна тә һьндава Йаһоԝа, Баве тәйи әʹзманада, сар кә. Әԝ ԛә нахԝазә ԝәки тӧ ԝирʹа амьн бьмини. Тʹӧ щар изьне нәдә ве йәке! (Ибо 27:5) Һʹьзкьрьна ԛәԝи һьндава Йаһоԝа ԝе али тә бькә, ԝәки тӧ ль гора сонда тʹәсмилбуне бьжи у чьԛас дьчә, дьһа незики Баве хԝәйи әʹзмана би.

21. Чьрʹа әм дькарьн бежьн ԝәки ньхӧмандьн нә кӧ хьлази, ле дәстпека хьзмәтийе йә?

²¹ Чахе тӧ дӧада жийина хԝә тʹәсмили Йаһоԝа ки, тʹәви рʹуспийа дәрһәԛа ньхӧмандьне хәбәр дә. Бир нәкә кӧ ньхӧмандьн нә кӧ хьлази, ле дәстпека рʹекә тʹәзә йә. Тӧйе һʹәта-һʹәтайе Йаһоԝарʹа хьзмәт бьки. Ньһада һʹьзкьрьн һьндава Баве хԝә Йаһоԝа дьле хԝәда мәзьн кә. Хԝәрʹа нета дайнә, ԝәки һʹьзкьрьна тә һәр рʹож мәзьн бә. Әв тьшт ԝе али тә бькьн, ԝәки тӧ бьгьһижи нета хԝә, демәк бейи ньхӧмандьне. Рʹожа ньхӧмандьна тә, ԝе рʹожәкә пʹьрʹ хԝәш бә. Ле әв рʹож ԝе тʹәне дәстпека жийинәкә тʹәзә бә. Бьра һʹьзкьрьна һьндава Йаһоԝа у Кӧрʹе ԝи, тʹьме дьле тәда мәзьн бә!