Сара * гьли дькә: «Әз йәкә шәрмокә мә у хԝәда баԝәр ниньм, ләма жи мьнрʹа чәтьн ә нава ԝан мәрьвада бьм, йед кӧ гәләк хԝәда баԝәр ьн у тʹьме дьхԝазьн йа хԝә бькьн. Ле тʹәви мәрьвед хәйсәтда нәрм у мьлук әз рʹьһʹәт ьм. Мьнрʹа һеса йә мәрьвед ӧсарʹа дьле хԝә вәкьм у дәрһәԛа проблемед хԝә гьли кьм. Һәвалед мьнә лапә незик мьлук у нәрм ьн».

Жь гьлийед Сарайе те кʹьфше, ԝәки мәрьв һʹьз дькьн тʹәви мәрьвед мьлук һәвалтийе бькьн. Мәрьвед мьлук Йаһоԝа жи хԝәш тен. Әԝ Хәбәра хԝәда мә һелан дькә: «Мьлуктийе . . . ль хԝә ԝәргьрьн» (Колс. 3:12). Ле мьлукти чь йә? Иса ча мьлукти дьда кʹьфше? У әв һʹӧнӧр әʹмьре мә ча дьһа баш дькә?

Мәрьвед мьлук дьлда әʹдьл ьн. Әԝана һьндава мәрьвада нәрм у һʹәйф ьн, у чахе тьштәк ԝана әʹщьз дькә әԝана хԝә дьгьрьн у рʹьһʹәтийе хԝәй дькьн.

Һьнәк дьфькьрьн кӧ мәрьвед мьлук сьст ьн, ле бь рʹасти әԝана ԛәԝи нә. Хәбәра Йунани кӧ һатийә ԝәлгәрʹандьне ча «мьлукти», сәр һәспе бәйани дьготьн, йе кӧ һатьбу зәфткьрьне. Рʹаст ә ԛәԝата һәспе диса жи һәбу, ле әԝ һатьбу һинкьрьне кӧ ԛәԝата хԝә зәфт кә у контрол кә. Әм жи чахе мьлук ьн, әм ча бежи кемасийед хԝә зәфт дькьн у сәр хԝә дьхәбьтьн сәва тʹәви мәрьва әʹдьлайе хԝәй кьн.

Дьбәкә һун ӧса дьфькьрьн: «Әз мәрьвәки мьлук ниньм». Әм дьжин дьнйакә ӧсада, кʹидәре мәрьв һерс у бесәбьр ьн, ләма жи мәрʹа нәһеса йә мьлук бьн (Рʹом. 7:19). Рʹаст ә лазьм ә зәʹмәте бькʹьшиньн, ԝәки бьбьнә мәрьвнә мьлук, ле рʹӧһʹе Йаһоԝайи пироз ԝе ԛәԝате бьдә мә сәва әм әве нете биньн сери (Галт. 5:22, 23). Ле чьрʹа һежа йә әм сәр хԝә бьхәбьтьн, сәва бьбьнә мәрьвнә мьлук?

Мьлукти һʹӧнӧрәки ӧса йә, кӧ мәрьва бәрбь хԝә дькʹьшинә. Әм жи мина Сарайе, бәʹса кʹижане мә жоре кьр, дьхԝазьн нава ԝан мәрьвада бьн, йед кӧ хәйсәтда нәрм ьн. Иса пе мәсәла хԝә нишан кьр, кӧ мәрьве нәрм у мьлаһим чь щурʹәйи нә (2 Корн. 10:1). Һәла һе зарʹед кӧ ԝи нас нәдькьрьн жи, дьхԝәстьн незики Иса бьн (Марԛ. 10:13-16).

Чахе әм мьлук ьн, һьн бона мә баш ә һьн жи бона мәрьвед дор-бәре мә. Һәрге әм мьлук бьн, әме зу нәхәйидьн у һерс нәкʹәвьн (Мәтʹлк. 16:32). Ӧса әме дьле мәрьва нәешиньн,  илаһи дьле ԝан, кʹижана әм һʹьз дькьн, у мәʹни жи ԝе тʹӧнә бә кӧ әм хԝә нәһәԛ тʹәхмин кьн. Хенщи ве йәке, һәрге әм мьлуктийе бьдьнә кʹьфше, мәрьв жи ԝе кʹаре бьстиньн, чьмки әме хԝә контрол кьн у ԝана нәдьнә хәйидандьне.

Рʹаст ә щабдарийед Иса гәләк бун у гәләк шьхӧл стуйе ԝида бу, ле йәкә әԝ тʹьме һьндава гьшкада нәрм у мьлук бу. Ԝәʹде Исада гәләк мәрьв зәлули у тәнгасийеда бун, ләма жи әԝана һʹәԝще дьлдайине бун. Бьдьнә бәр чʹәʹве хԝә әԝан мәрьва бәрдьликә ча стандьн, чахе Иса ԝанарʹа гот: «Ԝәрьнә щәм мьн . . . чьмки әз шкәсти мә у дьлмьлаһим ьм» (Мәт. 11:28, 29).

Ле әм ча дькарьн сәр хԝә бьхәбьтьн, кӧ мина Иса мьлук бьн? Чахе әм Кʹьтеба Пироз леколин дькьн, әм педьһʹәсьн кӧ Иса ча бу һьндава мәрьва у дәрәщед чәтьнда жи ча мьлукти дьда кʹьфше. У чахе әм рʹасти чәтьнайед ӧса тен кӧ мьлуктийа мә те щерʹьбандьне, әм сәр хԝә дьхәбьтьн, ԝәки чʹәʹв бьдьнә мьлуктийа Иса (1 Пәт. 2:21). Ԝәрә әм се тьшта шеԝьр кьн, кʹижана кӧ али Иса дькьрьн мьлук бә.

Иса дьлда йәки шкәсти бу. Иса сәр хԝә гот, кӧ әԝ һьн мьлук ә һьн жи шкәсти йә (Мәт. 11:29). Кʹьтеба Пирозда әԝ дӧ һʹӧнӧр тʹәвайи тенә готьне, чьмки мьлукти гьредайи йә тʹәви шкәстибуне (Әфәс. 4:1-3). Ле чьрʹа әм дькарьн ӧса бежьн?

Шкәстибун али мә дькә, ԝәки чахе дәрһәԛа мә тьштәки дьбежьн, әм һьлнәдьнә дьле хԝә у зу нәхәйидьн. Ле Иса ча хԝә да кʹьфше, гава ԝи нәһәԛ кьрьн кӧ әԝ «пәй хԝарьн у вәхԝарьне кʹәти йә»? Әԝ һерс нәдькʹәт, дәԝсе пе кьред хԝә избат дькьр, кӧ әԝ йәк дәрәԝ ә, чьмки бь рʹасти «сәрԝахти бь әʹмәлед хԝә кʹьфш дьбә кӧ әԝ рʹаст ә» (Мәт. 11:19).

Һәрге кәсәк ԛәрфе хԝә ԝә дькә жь бо мьләте ԝә, рʹәнг-рʹуйе ԝә йан жи жь бо ве йәке кӧ һун жь кʹидәре нә, ԝе баш бә кӧ бь нәрми щаба ԝи бьдьн у рʹьһʹәтийе хԝәй кьн. Питер рʹуспики жь Африкайа Башуре, дьбежә: «Чахе әз жь бо гьлийед кәсәки әʹщьз дьбьм, әз пьрсе дьдьмә хԝә, кӧ Иса ве дәрәщеда ԝе ча хԝә бьда кʹьфше. Әз һин дьбьм кӧ нәкʹәвьмә һʹәйра хԝә, хԝә зәʹф гьран нәгьрьм у зу нәхәйидьм».

Иса фәʹм дькьр кӧ мәрьв сьст ьн. Шагьртед Иса бь дьле сах бун у дьхԝәстьн тьштед рʹаст бькьн, ле жь бо гӧнәкʹарийа хԝә, щара ԝана шаши дькьр. Мәсәлә, Иса шәва пешийа мьрьна хԝә, Пәтрус, Аԛуб, у Йуһʹәннарʹа гот кӧ һʹьшйар бьминьн, ле әԝана һʹьшйар нәман. Иса заньбу «рʹӧһʹ рʹази йә, ле бәдән сьст ә» (Мәт. 26:40, 41). Бәле, Иса ԝана фәʹм дькьр, у ләма сәр ԝан һерс нәдькʹәт у нәдьхәйиди.

Хушкәкә мә Менди гәләк дина хԝә дьда сәр кемасийед мәрьва, ле ньһа әԝ сәр хԝә дьхәбьтә, ԝәки чʹәʹв бьдә мьлуктийа Иса. Әԝ дьбежә: «Әз тʹьме тиньмә бира хԝә, ԝәки һʹәму мәрьв гӧнәкʹар ьн у кемасийед ԝан һәнә. Әз ӧса жи сәр хԝә дьхәбьтьм кӧ мина Йаһоԝа нав мәрьвада хәйсәт-һʹӧнӧред баш бьвиньм». Һәрге һун мина Иса дьлшәԝат бьн у мәрьва фәʹм бькьн, әԝ йәк ԝе али ԝә бькә һьндава ԝанда нәрм бьн.

Иса һәр тьшт дьда дәсте Хԝәде. Иса чахе сәр әʹрде бу, һьндава хԝәда гәләк нәһәԛи дьдит. Мәсәлә, бӧхдан давитьнә ԝи, әԝ беһӧрмәт дькьрьн, у дьзерандьн. Ле һәла һе ԝан чаха жи әԝ рʹьһʹәт дьма, чьмки «хԝә спартьбу һʹакьме сәр рʹастийе» (1 Пәт. 2:23). Иса заньбу ԝәки баве ԝийи Әʹзмана ԝе али ԝи бькә сәбьр кә у ԝәʹдәда диԝана ԝан бькә, йед кӧ һьндава ԝида нәһәԛийе дькьн.

Һәрге әм жь бо нәһәԛийа һьндава хԝә һерс кʹәвьн у бькʹәвьнә дәʹԝ-дозе, әме дәрәще дьһа гьран кьн. Ләма Кʹьтеба Пироз мәрʹа дьбежә: «Һерса мерьв рʹастийа Хԝәде найнә сери» (Аԛуб 1:20). Һәрге һерса мә щи йә жи, жь бо гӧнәкʹарийе әм дькарьн тьштед нәрʹаст бькьн.

Кети, хушкәкә мә жь Алманйайе ӧса дьфькьри: «Һәрге тӧ хԝәха бьн гьлийа дәрнәйи, дәԝса тә ԝе тʹӧ кәс ве йәке нәкә». Ле чахе әԝ һин бу итʹбарийа хԝә Йаһоԝа бинә, ньһерʹандьна ԝе һатә гӧһастьне. Әԝ дьбежә: «Ньһа әз ида ӧса ниньм кӧ тʹьме хԝә һәԛ дәрхьм у бьн гьлийа дәрем. Мьнрʹа ида һеса йә рʹьһʹәтийе хԝәй кьм у нәрм бьминьм, чьмки заньм кӧ һәр тьшт бьн контрола Йаһоԝада нә». Һәрге һьндава ԝәда нәһәԛи һатийә кьрьне, чʹәʹв  бьдьнә мәсәла Иса, итʹбарийа хԝә Хԝәде биньн у ӧса һуне бькарьбьн мьлук бьминьн.

Иса да кʹьфше кӧ һәрге әм дьхԝазьн бәхтәԝар бьн, әм гәрәке мьлук у шкәсти бьн. Әԝи гот: «Хԝәзи ль шкәстийа» (Мәт. 5:5). Ԝәрә шеԝьр кьн, кӧ кʹижан дәрәщада мьлукти али мә дькә.

Мьлукти наһелә зәԝащеда проблем гьран бьн. Роберт, бьраки мә жь Австралйайе, дьбежә: «Мьн жь һерсе жьна хԝәрʹа гьлийед ӧса гот, кӧ дьле ԝе гәләк ешанд. Рʹаст ә мьн нәдьхԝәст ӧса бә, ле йазьх мәри нькарә гьлийед хԝә пашда вәгәрʹинә. Әз ӧса бәрхԝә кʹәтьм чахе мьн дит, кӧ гьлийед мьн ча сәр ԝе һʹӧкӧм бун».

Хәбәрдана хԝәда «әм һʹәму жи гәләки шашийа дькьн», ләма жи һәрге әм зьмане хԝә контрол нәкьн у беһʹәмде хԝә хәбәр дьн, зәԝащеда әʹдьлайи дькарә ӧнда бә (Аԛуб 3:2). Мьлукти ԝан дәрәщада али жьн-мера дькә, кӧ рʹьһʹәт бьминьн у зьмане хԝә бькарьбьн (Мәтʹлк. 17:27).

Роберт сәр хԝә гәләк дьхәбьти, ԝәки зу һерс нәкʹәвә у хԝәгьрти бә. Ле әԝе йәке чь кʹар ани? Әԝ дьбежә: «Ньһа чахе әз у жьна мьн щара әм һәв фәʹм накьн, әз рʹьнд гӧһ дьдьмә ԝе, нәрм хәбәр дьдьм, у хԝә дьгьрьм ԝәки һерс нәкʹәвьм. Һәләԛәтийа мьн тʹәви жьна мьн дьһа баш буйә».

Һәрге әм мьлук бьн, ԝе мәрʹа һеса бә мәрьва фәʹм кьн у зьман ԝанрʹа бьвиньн. Һәвалед мәрьвед хәйдок һьндьк ьн. Ле мьлукти али мә дькә «һәвгьредана әʹдьлайийе хԝәй кьн» (Әфәс. 4:2, 3). Кети бәʹса кʹижане мә жоре кьр, дьбежә: «Чахе әз мьлуктийе дьдьмә кʹьфше, һьнге дьһа мьн хԝәш те тʹәви мәрьва һәвалтийе бькьм, у һәла һе тʹәви ԝан жи, хәйсәте кʹижана гьран ә».

Чахе әм мьлук ьн әм дьлрʹьһʹәт ьн. Кʹьтеба Пироз «сәрԝахтийа жорьн» тʹәви мьлуктийе у әʹдьлайе гьредьдә (Аԛуб 3:13, 17). Мәрьве хәйсәтда нәрм дьлда «рʹьһʹәт» ә (Мәтʹлк. 14:30). Мартин, кʹижанирʹа чәтьн бу мьлук бә, дьбежә: «Әз ньһа сәр гьлийед хԝә насәньм у кем һерс дькʹәвьм, ләма жи әз дьлрʹьһʹәт ьм у дьһа бәхтәԝар ьм».

Бәле, мәрʹа дьбәкә чәтьн бә мьлуктийе нав хԝәда пешда биньн. Бьрак дьбежә: «Һʹәлал бежьм, һʹәта рʹожа иро щара әз жь һерсе дьле хԝәда дьԛьчʹԛьчʹьм». Ле Йаһоԝа ԝе али мә бькә, ԝәки әм сәр хԝә бьхәбьтьм у мьлук бьн (Иша. 41:10; 1 Тимт. 6:11). Әԝ дькарә мә «кʹамьл кә» у «ԛәԝат кә» (1 Пәт. 5:10). Әме жи мина Паԝлосе шанди һеди-һеди бькарьбьн чʹәʹв бьдьнә «мьлукти у ширьнайийа Мәсиһ» (2 Корн. 10:1).