1-2. Гава дәрәщед мә тенә гӧһастьне, һьнә принсипед Кʹьтеба Пироз чьрʹа бона мә дьһа ԛимәт дьбьн?

 РʹОЖА дәʹԝате, бук у зәʹва рʹьнд гӧһ дьдьн готара зәԝаще. Принсипед ве готареда һьлбәт ԝанрʹа нас ьн. Ле жь ве рʹожеда әв принсип бона ԝан дьһа фәрз дьбьн. Гәло чьма? Чьмки ида лазьм ә кӧ әԝана ча жьн у мер ль гора ван принсипа бьжин.

² Гава кӧ жьн у мер дьбьн де-бав һьнге жи бона ԝан һьнә принсип дьһа фәрз дьбьн. Бь сала, дьбәкә ԝана гӧһ дабу гәләк готаред дәрһәԛа мәзьнкьрьна зарʹа. Ле ньһа әв принсип бона ԝан дьһа фәрз ьн, чьмки әԝ ида бунә де-бав. Чь щабдарикә мәзьн ә! Бәле, гава дәрәщед мә тенә гӧһастьне, һьнә принсип дькарьн бона мә дьһа ԛимәт бьн. Хьзмәткʹаред Йаһоԝа, чаԝа кӧ пʹадшед Исраелерʹа һатьбу готьне, Ньвисаред Пироз «тʹәмамийа рʹожед әʹмьре хԝәда» дьхуньн у ль сәр ԝан кʹур дьфькьрьн (Ԛануна Дӧщари 17:19).

3. Ве готареда, әме чь шеԝьр кьн?

³ Де-бавно, әв йәк кӧ һун дькарьн зарʹед хԝә дәрһәԛа Йаһоԝа һин кьн, ԛәдьрәки гәләк мәзьн ә. Һьлбәт нета ԝә нә тʹәне әв ә кӧ һун дәрһәԛа Йаһоԝа ԝана һин кьн. Һун дьхԝазьн али ԝан бькьн кӧ әԝана Хԝәде жь дьл һʹьз бькьн. Гәло һун чаԝа дькарьн һʹьзкьрьна Йаһоԝа бькьнә дьле зарʹед хԝә? Ве готареда, әме дина хԝә бьдьн чар принсипед жь Кʹьтеба Пироз, йед кӧ дькарьн али ԝә бькьн (2 Тимотʹейо 3:16). Ӧса жи, әме бьвиньн кӧ һьнә де у бава жь ширәтед Кʹьтеба Пироз чаԝа кʹар стандьнә.

4. Чь дькарә али де у бава бькә кӧ һʹьзкьрьна һьндава Йаһоԝа бькьнә дьле зарʹед хԝә? (Аԛуб 1:5)

⁴ Принсипа 1: Рʹебәрийа Йаһоԝа бьгәрʹьн. Жь Йаһоԝа биланийе бьхԝазьн, ԝәки һун бькарьбьн али зарʹед хԝә бькьн кӧ әԝана ԝи һʹьз бькьн (Аԛуб 1:5 бьхунә). Ширәтед һәри баш жь Йаһоԝа Хԝәде тен. Әм ве йәке жь кʹӧ заньн? Йа пешьн, чьмки Йаһоԝа «канийа жийане» йә, әԝ баве һәри щерʹьбанди йә (Зәбур 36:9). Йа дӧда, ширәтед ԝи һәртʹьм бона мә кʹаре тиньн (Ишайа 48:17).

5. (а) Тʹәшкиләта Йаһоԝа чаԝа али де-бава дькә? (б) Чаԝа кӧ видеойеда һатә кʹьфше, де-бавәки зарʹед хԝә ча мәзьн кьрьн?

⁵ Йаһоԝа бь сайа Хәбәра хԝә у тʹәшкиләта хԝә, хԝарьна рʹӧһʹани тʹер-тʹьжә дьдә, чь кӧ ԝе али ԝә бькә кӧ һун һʹьзкьрьна Йаһоԝа бькьнә дьле зарʹед хԝә (Мәтта 24:45). Мәсәлә һун дькарьн гәләк ширәтед керһати ве рʹеза готарада бьвиньн: «Аликари Бона Малбәте», кʹижан кӧ әʹдәбйәтед мәда у сәр малпәра мә һатьнә дәрхьстьне. Ӧса жи, сәрһати, видео у синәм, кӧ сәр jw.org һәнә, дькарьн али де-бава бькьн кӧ зарʹед хԝә ль гора рʹебәрийа Йаһоԝа мәзьн кьн * (Мәтʹәлок 2:4-6).

6. Щоу у жьна ԝи дәрһәԛа рʹебәрийа Йаһоԝа кӧ әԝ бь сайа тʹәшкиләте дьдә, чь дьбежьн?

⁶ Гәләк де у бав аликʹарийа кӧ Йаһоԝа бь сайа тʹәшкиләта хԝә дьдә, гәләк дьшекьриньн. Бавәки бь наве Щоу дьбежә: «Һеса нинә кӧ әм се зарʹед хԝә рʹастийеда мәзьн кьн. Әз у жьна мьн, әм һәр гав дӧа дькьн, кӧ Йаһоԝа али мә бькә. У гәләк щар ӧса дьбә, кӧ готар йан видеойәк ԝәхтда дәрдькʹәвә у али мә дькә кӧ әм проблема хԝә сафи кьн. Әм һәртʹьм хԝә дьсперьн рʹебәрийа Йаһоԝа». Щоу у жьна ԝи тʹәхмин кьрьнә ԝәки готар у видео али зарʹед ԝан дькьн кӧ дьһа незики Йаһоԝа бьн.

7. Чьма лазьм ә кӧ де-бав бьбьнә мәсәла баш? (Рʹомайи 2:21)

⁷ Принсипа 2: Бь рʹабун-рʹуньштьна хԝә бьбьнә мәсәлә. Зарʹ тʹьме дина хԝә дьдьнә де-бавед хԝә у чʹәʹв дьдьнә ԝан.  Һәмьки де у бавед беԛьсур тʹӧнә нә (Рʹомайи 3:23). Диса жи, ԝе баш бә кӧ де у бав чь жь дәсте ԝан те бькьн, ԝәки зарʹед хԝәрʹа бьбьн мәсәла баш (Рʹомайи 2:21 бьхунә). Бавәк дәрһәԛа зарʹа ӧса дьбежә: «Зарʹ мина пәмбу һәр тьшти дькʹьшиньн хԝә. Һәгәр әм ван тьшта нәкьн чь кӧ әм ԝана һин дькьн, әԝана ве йәке ԝе дәрберʹа бьдьн рʹуйе мә». Ләма жи, һәгәр әм дьхԝазьн кӧ зарʹед мә Йаһоԝа һʹьз бькьн, гәрәке әм хԝәха жи Йаһоԝа ԛайим һʹьз бькьн, у ве йәкеда зарʹед хԝәрʹа бьбьнә мәсәлә.

8-9. Һун жь готьнед Ендру у Емайе чь һин дьбьн?

⁸ Де-бав дькарьн бь щурʹә-щурʹә метода зарʹед хԝә һин кьн, ԝәки әԝана Йаһоԝа һʹьз бькьн. Бьраки 17 сали бь наве Ендру, ӧса дьбежә: «Де-баве мә һәртʹьм әм һин дькьрьн кӧ дӧа чьԛас фәрз ә. Һәр евар, һәгәр мьн хԝәха ида дӧа кьрьбу жи, баве мьн диса тʹәви мьн дӧа дькьр. Де-баве мә һәртʹьм мәрʹа дьготьн: ‹Һун һәр гав кʹәнге дьхԝазьн, дькарьн Йаһоԝарʹа хәбәр дьн›. Ләма жи, әз дӧакьрьне гәләк ԛимәт дькьм, у әз аза Йаһоԝарʹа дӧа дькьм у ԝи ча Бавәки дьлован һʹәсаб дькьм». Де-бавно, бир нәкьн ԝәки һʹьзкьрьна ԝә һьндава Йаһоԝа, дькарә зарʹед ԝә жи һелан кә ԝи һʹьз бькьн.

⁹ Ԝәрә әм сәрһатийа Емайе жи шеԝьр кьн. Гава баве ԝе малбәт һишт чу, дәйнәки мәзьн стуйе дийа ԝеда ма. Ема дьбежә: «Дийа мьн алийе економикида гәләк щара дькʹәтә тәнгасийе, ле әԝе һәртʹьм дьгот кӧ Йаһоԝа тʹьме бона һʹәԝщед хьзмәткʹаред хԝә хәм дькә. Әԝе пе жийина хԝә нишан дькьр, кӧ әԝ бь рʹасти жи ве йәке баԝәр дькә. Дийа мьн бь рʹасти жи ӧса дьжит чаԝа кӧ әԝе әз һин дькьрьм». Әв сәрһати нишан дькә кӧ һәгәр проблем һәбьн жи, йәкә де у бав дькарьн зарʹед хԝәрʹа бьбьн мәсәлә (Галати 6:9).

10. Ԝәʹде бәре, чь мәщалед де у бавед Исраели һәбун кӧ тʹәви зарʹед хԝә хәбәр дьн? (Ԛануна Дӧщари 6:6, 7)

¹⁰ Принсипа 3: Һәр гав тʹәви зарʹед хԝә хәбәр дьн. Ԝәʹде бәре, Йаһоԝа хьзмәткʹаред хԝәра дьгот, ԝәки әԝана тʹьме дәрһәԛа ԝи зарʹед хԝә һин кьн (Ԛануна Дӧщари 6:6, 7 бьхунә). Нава рʹожеда, гәләк мәщалед де у бавед Исраели һәбун кӧ зарʹед хԝәрʹа хәбәр дьн у һʹьзкьрьна һьндава Йаһоԝа бькьн дьле ԝан. Мәсәлә, кӧрʹькед Исраели дьбәкә бь сьһʹәта тʹәви баве хԝә зәвйеда дьхәбьтин. Ле кәчʹькед Исраели дьбәкә кʹьнщдьрунеда у шьхӧлед маледа али дийа хԝә дькьрьн. Гава де-бав тʹәви зарʹед хԝә дьхәбьтин, ԝана дькарьбу дәрһәԛа гәләк тʹемед фәрз хәбәрдана, мәсәлә, дәрһәԛа ԛәнщийа Йаһоԝа у кӧ Йаһоԝа чаԝа али малбәта ԝан дькә.

11. Де у бав кʹәнге дькарьн тʹәви зарʹед хԝә хәбәр дьн?

¹¹ Жийина иро, нә мина йа бәре йә. Гәләк ԝәлатада, де-бав дьхәбьтьн у зарʹ жи дьчьн мәкʹтәбе, ләма жи әԝана нькарьн тʹәвайи гәләк ԝәʹдә дәрбаз кьн. Ле ча жи мабә де-бав гәрәке ԝәʹдә бьвиньн ԝәки тʹәви зарʹед хԝә хәбәр дьн (Әфәси 5:15, 16; Филипи 1:10). Бона ве йәке, ԛӧльхкьрьна тʹәви малбәте мәщаләкә пʹьрʹ баш ә. Бьраки щаһьл бь наве Александр ӧса дьбежә: «Баве мьн тʹьме пешда бона ԛӧльхкьрьна тʹәви малбәте графике чедькә у изьне надә, ԝәки тьштәк бьбә мәʹни кӧ ԛӧльхкьрьн дәрбаз нәбә. Паши леколине, әм тʹәвайи рʹудьнен у хԝәрʹа хәбәр дьдьн».

12. Ԝәʹде ԛӧльхкьрьна тʹәви малбәте, гәрәке сәре малбәте чь бир нәкә?

 ¹² Гәло сәре малбәте дькарә чь бькә ԝәки зарʹ ԝәʹде ԛӧльхкьрьна тʹәви малбәте шабуне бьстиньн? Мәсәлә, һәгәр һун кʹьтеба тʹәзә йа бь наве «Ша бә Жийинерʹа Һʹәта-Һʹәтайе!» тʹәви зарʹед хԝә леколин бькьн, ԝе гәләк мәщалед ԝә һәбьн кӧ тʹәви зарʹед хԝә хәбәр дьн. Һәгәр һун дьхԝазьн кӧ зарʹед ԝә дьле хԝә ԝәрʹа вәкьн, һун гәрәке ԝәʹде ԛӧльхкьрьна тʹәви малбәте тʹәви ԝан сәрт нибьн у ԝана сущдар нәкьн. Ӧса жи, һәгәр һьнә ньһерʹандьнед зарʹед ԝә нә ль гора принсипед Кʹьтеба Пироз бьн жи, сәр ԝан һерс нәкʹәвьн, ле ша бьн кӧ әԝана аза дьле хԝә ԝәрʹа вәдькьн. Сәва кӧ һун бькарьбьн али зарʹед хԝә бькьн, гәрәке һун бьзаньбьн кӧ әԝана чь дьфькьрьн, ләма жи ӧса бькьн ԝәки әԝана тʹәви ԝә аза хәбәр дьн.

13. Хенщи ԛӧльхкьрьна тʹәви малбәте, де у бав чаԝа дькарьн али зарʹед хԝә бькьн кӧ әԝ дьһа незики Йаһоԝа бьн?

¹³ Де-бавно, нава рʹожеда мәщала бьгәрʹьн кӧ али зарʹед хԝә бькьн, ԝәки әԝана дьһа незики Йаһоԝа бьн. Сәва кӧ һун ԝанрʹа бәʹса Хԝәдайе мәйи дьлован бькьн, әʹсәйи нинә ԝәки һун рʹунен у бь формал Кʹьтеба Пироз леколин кьн. Кʹа бьньһерʹьн кӧ дайикәк наве кʹижане Лиза йә, чь дьбежә: «Мә али зарʹед хԝә дькьр кӧ әԝана бьвиньн ԝәки тʹәбийәт чаԝа дина мә дькʹьшинә сәр Йаһоԝа. Мәсәлә, гава зарʹ сәр кьред кучʹьке мә дькʹәнийан, мә дьгот кӧ әв йәк нишан дькә, ԝәки Хԝәде жи мина мә һʹәнәка у жийине һʹьз дькә».

14. Де-бав чьрʹа гәрәке али зарʹед хԝә бькьн ԝәки әԝана хԝәрʹа һәвалед баш бьжберьн? (Мәтʹәлок 13:20)

¹⁴ Принсипа 4: Али зарʹед хԝә бькьн кӧ әԝана хԝәрʹа һәвалед баш бьжберьн. Хәбәра Хԝәде зәлал дькә кӧ һәвалед мә дькарьн ль сәр мә баш йан хьраб һʹӧкӧм кьн (Мәтʹәлок 13:20 бьхуньн). Де-бавно, гәло һун һәвалед зарʹед хԝә нас дькьн? Гәло ԝә әԝ дитьнә у тʹәви ԝан ԝәхт дәрбаз кьрийә? Һун чаԝа дькарьн али зарʹед хԝә бькьн, ԝәки әԝана тʹәви кәсед кӧ Йаһоԝа һʹьз дькьн һәвалтийе бькьн? (1 Корьнтʹи 15:33).  Дьԛәԝьмә һун дькарьн гази ԝан мәрьва бькьн йед кӧ рʹӧһʹанида ԛәԝи нә, ԝәки әԝана тʹәви малбәта ԝә ԝәʹдә дәрбаз кьн (Зәбур 119:63).

15. Де-бав чаԝа дькарьн али зарʹед хԝә бькьн кӧ әԝана хԝәрʹа һәвалед баш бьжберьн?

¹⁵ Ԝәрә әм сәрһатийа бавәки бь наве Тони шеԝьр кьн. Гәло әԝи у жьна ԝи чаԝа али зарʹед хԝә кьрьн кӧ әԝана хԝәрʹа һәвалед баш бьжберьн? Әԝ дьбежә: «Бь сала, әз у жьна мьн, мә щурʹә-щурʹә хушк у бьред щаһьл у әʹмьрда мәзьн тʹәглифи мала хԝә дькьр. Мә тʹәвайи хԝарьн дьхԝар у ԛӧльхкьрьна тʹәви малбәте дәрбаз дькьр. Әв йәк мәщаләкә баш ә, ԝәки ԝан мәрьва рʹьнд нас кьн йед кӧ Йаһоԝа һʹьз дькьн у бь шабуне ԝирʹа хьзмәт дькьн. Әм гәләк ша нә кӧ бәрпьрсийаре мьһале, мисйонер у кәсед дьн мала мәда манә. Хирәт, һазьрбун у сәрһатийед ԝан, сәр зарʹед мә гәләк баш һʹӧкӧм кьрьнә у али ԝан кьрийә кӧ әԝ дьһа незики Йаһоԝа бьн». Де-бавно, бь рʹасти жи гәләк фәрз ә, ԝәки һун али зарʹед хԝә бькьн, кӧ әԝана хԝәрʹа һәвалед баш бьжберьн!

16. Һәгәр зарʹ нахԝазә Йаһоԝарʹа хьзмәт кә, гәрәке һун чь нәкьн?

¹⁶ Һәгәр ԝә гәләк ԛәԝат хәрщ кьрийә кӧ һʹьзкьрьна һьндава Йаһоԝа бькьн дьле зарʹед хԝә, ле йәкә, зарʹәкә ԝә нахԝазә Йаһоԝарʹа хьзмәт кә, нәфькьрьн кӧ һун де-бавнә хьраб ьн! Йаһоԝа азайа бьжартьне дайә мә һәр кәси. Ләма жи, әм дькарьн хԝәха сафи кьн, кӧ Хԝәдерʹа хьзмәт бькьн йан на. Һәгәр зарʹа ԝә нахԝазә Йаһоԝарʹа хьзмәт кә, һевийа хԝә ӧнда нәкьн кӧ рʹожәке әԝе диса вәгәрʹә бал Йаһоԝа. Мәтʹәлока кӧрʹе ӧндабуйи биньн бира хԝә (Луԛа 15:11-19, 22-24). Әв хорт жь рʹийа рʹаст гәләк дур кʹәт, ле хьлазийе әԝ диса вәгәрʹийа. Һьнә кәс дьԛәԝьмә ӧса бежьн: «Әва тʹәне мәтʹәлок ә. Гәло тьштәки ӧса бь рʹасти дькарә бьԛәԝьмә?» Бәле! Ԝәрә әм сәрһатийа хортәки бь наве Ели шеԝьр кьн.

17. Сәрһатийа Ели чаԝа дьлбинийе дьдә ԝә?

¹⁷ Ели дәрһәԛа де у баве хԝә ӧса дьбежә: «Ԝана гәләк хирәт дькьр кӧ һʹьзкьрьна  һьндава Йаһоԝа у Кʹьтеба Пироз дьле мьнда пешда биньн. Ле гава әз ԝәкә 15 сали бум, әз бумә йәки хԝәсәрихԝә». Ели дәстпекьр бь жийинәкә хьраб бьжи. Де-баве ԝи дьхԝәстьн али ԝи бькьн кӧ әԝ пьшта хԝә нәдә Йаһоԝа, ле әԝи аликʹарийа ԝан инкʹар дькьр. Паши кӧ Ели жь мале чу, әԝи дәстпекьр һьнә тьштед хьраб бькә. Ле диса жи, әԝи һәваләки хԝәрʹа дәрһәԛа Кʹьтеба Пироз гьли дькьр. Ели дьбежә: «Чьԛас кӧ мьн һәвале хԝәрʹа бәʹса Йаһоԝа дькьр, һаԛас дьһа зедә әз дәрһәԛа Йаһоԝа дьфькьрим. Тʹохьмед рʹастийа Кʹьтеба Пироз, кʹижан кӧ де-баве мьн дьле мьнда чандьбун, һеди-һеди шин дьбун». Ԝәʹдә шунда, Ели вәгәрʹийа сәр рʹийа рʹастийе. * Бьдьн бәр чʹәʹве хԝә кӧ де-баве ԝи чьԛас ша дьбун, кӧ ԝана жь бьчʹуктайа ԝида хирәт кьрьбун ԝәки али ԝи бькьн сәва кӧ әԝ Йаһоԝа һʹьз бькә! (2 Тимотʹейо 3:14, 15).

18. Һун һьндава ԝан де-бавада ча ньн йед кӧ зарʹед хԝә бь дьл у щан һин дькьн, кӧ әԝана Йаһоԝа һʹьз бькьн?

¹⁸ Де-бавно, ԝәрʹа ԛәдьрәки мәзьн һатийә дайине, кӧ һун дькарьн зарʹед хԝә һин кьн, ԝәки әԝана бьбьнә хьзмәткʹаред Йаһоԝа (Зәбур 78:4-6). Әв йәк һеса нинә, у әм пʹайе ԝә дьдьн, чьмки һун бәрдәԝам дькьн бь хирәт али зарʹед хԝә бькьн! Баԝәр бьн кӧ һәгәр һун рʹож бь рʹож чь жь дәсте ԝә те бькьн, кӧ зарʹед ԝә Йаһоԝа һʹьз бькьн у ԝана бь ԛәйдә у ԛанунед ԝи мәзьн бькьн, Баве мәйи әʹзмана ԝе жь ԝә гәләк рʹази бә (Әфәси 6:4).