1. Һәр кәс гәрәке чь сафикьрьне бькә?

 РʹОЖА иройин лазьм ә кӧ һʹәму мәрьв сафикьрьнәкә фәрз бькьн. Гәло әԝана ԝе Йаһоԝа Хԝәде ча Һʹӧкӧмдаре һьмзор сәр тʹәмамийа гәрдуне ԛәбул бькьн, йан ԝе пьштгьрийа дьжмьне ԝи бькьн, демәк Мире-щьна? Һәр кәс гәрәке ве сафикьрьне бькә. Ахьрийа һәр кәси ве йәкева гьредайи йә, кӧ әԝана ԝе чь сафи кьн (Мәтта 25:31-33, 46). Ԝәʹде «тәнгасийа мәзьн», әԝана ԝе йан сах бьминьн у жийина һʹәта-һʹәтайе бьстиньн, йан жи ԝе бенә ԛьрʹкьрьне (Әʹйанти 7:14; 14:9-11; Һәзәԛел 9:4, 6).

2. (а) Ль гора Ибрани 10:35-39, гәрәке әм чь бькьн? (б) Кʹьтеба Әʹйанти чаԝа дькарә али мә бькә?

² Ибрани 10:35-39 бьхунә. Һәгәр тә сафи кьрийә кӧ пьштгьрийа сәрԝертийа Йаһоԝа бьки, тә сафикьрьнәкә һәрә баш кьрийә. Ньһа тӧ дьхԝази али кәсед дьн бьки кӧ әԝана жи сафикьрьна рʹаст бькьн. Бона ве йәке тӧ дькари әʹламәтийа жь кʹьтеба Әʹйанти бьди хәбате. Әв кʹьтеб һьм зәлал дькә кӧ чь ԝе бе сәре дьжмьнед Йаһоԝа, һьм жи дьбежә ԝәки кәсед кӧ бь амьни пьштгьрийа сәрԝертийа ԝи дькьн, ԝе чь кʹәрәма бьстиньн. Ԝе баш бә ԝәки әм ван рʹастийед фәрз рʹьнд леколин бькьн, ԝәки бькарьбьн бь амьни Йаһоԝарʹа хьзмәт кьн у али кәсед дьн бькьн, кӧ әԝана жи бенә сәр рʹийа рʹастийе у Йаһоԝарʹа хьзмәт кьн.

3. Ве готареда әме чь шеԝьр кьн?

³ Ве готареда, әме дина хԝә бьдьн ван пьрса: Кәсед кӧ пьштгьрийа сәрԝертийа Хԝәде дькьн, ԝе чь кʹәрәма  бьстиньн? Чь ԝе бе сәре ԝан мәрьва йед кӧ пьштгьрийа щәʹнәԝьре соре гәвәз дькьн дәрһәԛа кʹижани кʹьтеба Әʹйантида те готьне?

4. Хәԝн-хәйала Йуһʹәннайе шандида кʹе бун тʹәви Иса Мәсиһ сәр әʹзмана?

⁴ Хәԝн-хәйаләкеда, Йуһʹәннайе шанди дӧ кʹома дьвинә, йед кӧ пьштгьрийа сәрԝертийа Йаһоԝа дькьн у жийина һәрһәйи дьстиньн. Кʹома пешьн жь 144 000 мәрьва йә (Әʹйанти 7:4). Әԝана сәр әʹрде тенә бьжартьне, ԝәки тʹәви Иса Мәсиһ сәр әʹзмен пʹадшатийе бькьн (Әʹйанти 5:9, 10; 14:3, 4). Хәԝн-хәйаледа, әԝана тʹәви Иса Мәсиһ сәр әʹзмана «ль сәр чʹийайе Сийоне» сәкьни нә (Әʹйанти 14:1).

5. Дәмәкә незикда, йед кӧ жь 144 000 мәрьва сәр әʹрде манә, ԝе ча бьн?

⁵ Нава ԛьрʹнада, бь һʹәзара мәрьв тенә бьжартьне, ԝәки бьбьнә пʹара кʹома жь 144 000 бьжартийа (Луԛа 12:32; Рʹомайи 8:17). Ле Йуһʹәннарʹа һатьбу готьне ԝәки рʹожед пашьнда, кәсед кӧ жь ве кʹоме сәр әʹрде манә ԝе һьндьк бьн, у әԝана ԝе пешийа дәстпека тәнгасийа мәзьн «мора» пашьн бьстиньн (Әʹйанти 7:2, 3; 12:17). Әԝана ԝәʹде тәнгасийа мәзьн ԝе жь әʹрде бенә һьлдане, у сәр әʹзмана кʹома жь 144 000 ԝе ида тʹәмам бә. Әԝана ԝе ль әʹзмана тʹәви ԝан йед кӧ бәре жь мьрьне һатьбун рʹакьрьне у тʹәви Иса Пʹадшатийе бькьн (Мәтта 24:31; Әʹйанти 5:9, 10).

6-7. (а) Йуһʹәнна кʹижан кʹомәкә дьн жи дит, у әм дәрһәԛа ве кʹоме чь заньн? (б) Чьма готьнед жь кʹьтеба Әʹйанти сәре 7 һьм бона 144 000 бьжартийа, һьм жи бона әʹлаләта мәзьн фәрз ә?

⁶ Ле паше, Йуһʹәннайе шанди «әʹлаләтәкә ӧса мәзьн» дит, һәжмара кʹижани беһʹәсаб бу (Әʹйанти 7:9, 10). Кʹьтеба Әʹйанти дәрһәԛа ԝан ӧса дьбежә: «Әвана әԝ ьн, йед кӧ жь ԝе тәнгасийа мәзьн һатьнә, чӧхед хԝә пе хуна ԝи Бәрхи шуштьнә» (Әʹйанти 7:14). Паши ве йәке кӧ әԝ әʹлаләт жь тәнгасийа мәзьн хьлаз бә, әԝана ԝе сәр әʹрде бьжин у гәләк кʹәрәма бьстиньн (Зәбур 37:9-11, 27-29; Мәтʹәлок 2:21, 22; Әʹйанти 7:16, 17).

⁷ Чаԝа кӧ кʹьтеба Әʹйанти сәре 7 нишан дькә, һьм 144 000 кәсед бьжарти, һьм жи әʹлаләта мәзьн ԝе кʹәрәмед мәзьн бьстиньн. Тӧ жи дькари нав ԝанда би! Рʹожед пʹьрʹ хԝәш пешийа мә нә. Һьнге әме гәләк ша бьн, кӧ мә пьштгьрийа сәрԝертийа Йаһоԝа кьрийә. Гәло кʹьтеба Әʹйанти дәрһәԛа тәнгасийа мәзьн диса чь дьбежә? (Мәтта 24:21).

8. Тәнгасийа мәзьн ԝе чаԝа дәстпебә, у әв йәк ԝе ча сәр һʹәчʹи зәʹф мәрьва һʹӧкӧм бькә?

⁸ Чаԝа кӧ мә готара пешийа веда дит, дәмәкә незикда сәрԝеред политики ԝе һʹьщуми сәр динед ԛәлп бькьн, кʹижан кӧ тенә навкьрьне «Бабилона Мәзьн» (Әʹйанти 17:16, 17). Әв йәк ԝе бьбә дәстпека тәнгасийа мәзьн. Гәло дьбә жь бо ве йәке гәләк мәрьв тʹәзә бьхԝазьн пьштгьрийа Йаһоԝа бькьн? На! Кʹьтеба Әʹйанти сәре 6 нишан дькә, ԝәки ԝан рʹожед чәтьнда, кәсед кӧ Йаһоԝарʹа хьзмәт накьн ԝе хԝә бьсперьн «чʹийа», демәк системед политики у комерси. У чьмки әԝана ԝе алийе Пʹадшатийа Хԝәде нәгьрьн, Йаһоԝа ԝе ԝана ча дьжмьн һʹәсаб кә (Луԛа 11:23; Әʹйанти 6:15-17).

9. Ԝәʹде тәнгасийа мәзьн, фьрԛийа нав хьзмәткʹаред Йаһоԝа у кәсед дьнда ԝе чаԝа әшкәрә бә, у ахьри ԝе чь бә?

 ⁹ Ԝәʹде тәнгасийа мәзьн, фьрԛийа нав хьзмәткʹаред Йаһоԝа у кәсед дьнда ԝе әшкәрә бе кʹьфше. Жь һʹәму мәрьва, тʹәне әԝана ԝе Йаһоԝа Хԝәдерʹа хьзмәт бькьн у пьштгьрийа «щәʹнәԝьр» нәкьн (Әʹйанти 13:14-17). Әԝана ԝе Йаһоԝарʹа амьн бьминьн, ләма жи дьжмьнед Йаһоԝа ԝе гәләк һерс кʹәвьн. Ахьрийеда коалисйа мьләта ԝе сәр тʹәмамийа дьнйайе һʹьщуми сәр хьзмәткʹаред Хԝәде бькә. Кʹьтеба Пирозда әв һʹьщумкьрьн те навкьрьне һʹьщуме Гог жь Магоге (Һәзәԛел 38:14-16).

10. Чаԝа кӧ Әʹйанти 19:19-21 нишан дькә, Йаһоԝа ԝе чь бькә гава дьжмьн һʹьщуми сәр хьзмәткʹаред ԝи бькьн?

¹⁰ Гава кӧ әв һʹьщум дәстпебә, Йаһоԝа ԝе бь «агьре хәзәба хԝә» щаба ԝан бьдә (Һәзәԛел 38:18, 19, 21-23). Кʹьтеба Әʹйанти сәре 19 бәʹса ве йәке дькә. Йаһоԝа ԝе Кӧрʹе хԝә бьшинә, ԝәки әԝ хьзмәткʹаред ԝи бьпарезә у дьжмьнед ԝан ԛьрʹ кә. Ԝи шәрʹида, «ордийед әʹзмен», демәк мәләкед амьн у 144 000 кәсед бьжарти, ԝе али Иса Мәсиһ бькьн (Әʹйанти 17:14; 19:11-15). Ахьрийеда һʹәму мәрьв у тʹәшкиләтед кӧ һьмбәри Йаһоԝа нә, ԝе бенә ԛьрʹкьрьне (Әʹйанти 19:19-21 бьхунә).

11. Әʹламәтийа һәри фәрз жь кʹьтеба Әʹйанти чь йә?

¹¹ Бьдә бәр чʹәʹве хԝә кӧ гава дьжмьнед Хԝәде бь тʹәмами бенә ԛьрʹкьрьне, кәсед амьн ԝе чьԛас ша бьн! Чахе Бабилона мәзьн бе кʹӧтакьрьне, сәр әʹзмана ԝе шабунәкә гәләк мәзьн бә (Әʹйанти 19:1-3). Ле «дәʹԝата Бәрх» ԝе шабунәкә дьһа мәзьн бинә. Кʹьтеба Әʹйантида һәма әԝ ә әʹламәтийа һәри фәрз (Әʹйанти 19:6-9).

12. Ль гора Әʹйанти 21:1, 2, дәʹԝата Бәрх ԝе кʹәнге дәстпебә?

¹² Гәло әв дәʹԝат ԝе кʹәнге бә? Пешийа кӧ шәрʹе Һармәгәдоне дәстпебә, 144 000 кәсед бьжарти ԝе гьшк ида сәр әʹзмана бьн. Ле дәʹԝата Бәрх ԝе дәрберʹа дәстпенәбә (Әʹйанти 21:1, 2 бьхунә). Дәʹԝата Бәрх ԝе паши шәрʹе Һармәгәдоне у ԛьркьрьна һʹәму дьжмьнед Хԝәде дәстпебә (Зәбур 45:3, 4, 13-17).

13. Гәло дәʹԝата Бәрх чь те һʹәсабе?

¹³ Гәло дәʹԝата Бәрх чь те һʹәсабе? Чаԝа кӧ зәԝащеда жьн у мер дьбьн йәк, Иса Мәсиһ жи ԝе зәԝаща симболикда тʹәви 144 000, йед кӧ ча «бука» ԝи тенә һʹәсабе, бьбьнә йәк. Һьнгеда, Иса ԝе тʹәви 144 000 һәмпадшайед хԝә 1 000 сали сәр дьнйайе һʹӧкӧм бькә (Әʹйанти 20:6).

14-15. Кʹьтеба Әʹйанти сәре 21, 144 000 кәсед бьжарти бәрамбәри чь дькә? (Бьньһерʹә шькле рʹуйе журнале)

¹⁴ Кʹьтеба Әʹйанти сәре 21-да, 144 000 йед бьжарти бәрамбәри бажарәки гәләк бәдәԝ дькә, наве кʹижане «Оршәлима ну» йә (Әʹйанти 21:2, 9). Әв бажар сәр 12 кәвьра һʹимгьрти йә, сәр кʹижана кӧ навед «донздәһ шандийед Бәрх ньвисар бун». Гәло чьма дина Йуһʹәнна чу сәр ве йәке? Чьмки әԝи наве хԝә ль сәр кәвьрәки дит. Әв ԛәдьрәки чьԛас мәзьн бу! (Әʹйанти 21:10-14; Әфәси 2:20).

¹⁵ Тʹӧ бажарәки мина ви бажари тʹӧнә бу! Мәйдана бажер жь зерʹе хас бу у дәргәһед ԝи жь дӧрʹ һатьнбунә  чекьрьне. Һʹимед сура бажер бь һәр щурʹә кәвьред хасә ԛимәт һатьбунә хәмьландьне (Әʹйанти 21:15-21). Ле тьштәк ле кем бу. Йуһʹәнна ӧса ньвиси: «Мьн бажерда пʹарьстгәһ нәдит, чьмки Хӧдан Хԝәдейе Һʹәму Зорайийе у Бәрх пʹарьстгәһа ԝи нә. Бажар нә һʹәԝще тәʹве у һиве бу кӧ рʹонайи бьдане, чьмки рʹумәта Хԝәде ԝи рʹонайи дькә у Бәрх чʹьра ԝи йә» (Әʹйанти 21:22, 23). Йед кӧ пʹара Оршәлима ну нә, ԝе тʹәви Йаһоԝа бьн (Ибрани 7:27; Әʹйанти 22:3, 4). Демәк, Йаһоԝа у Иса Мәсиһ пʹарьстгәһа ви бажари нә.

16. Ԝәʹде Һʹӧкӧмдарийа Һʹәзарсали чь ԝе бьԛәԝьмә?

¹⁶ Ԝе баш бә ԝәки кәсед бьжарти дәрһәԛа ви бажари бьфькьрьн. Ле әв готар бона ԝан жи фәрз ә, йед кӧ ԝе сәр әʹрде бьжин. Ԝәʹде Һʹӧкӧмдарийа Һʹәзарсали, Оршәлима ну ԝе гәләк кʹәрәма сәр инсанәтеда бьбаринә. Дитьнокеда Йуһʹәнна дит, кӧ кʹәрәмед жь Пʹадшатийа Хԝәде, ча «чʹәмәки ава жийине» дькʹьшийа. Ль һәр дӧ алийед ви чʹәми, даред жийине һәбун. Бәлгед ван дара бона «ԛәнщбуна мьләта бун» (Әʹйанти 22:1, 2). Демәк һьнге, һәр кәс ԝе бькарьбә ван кʹәрәма бьстинә. Гав бь гав, һʹәму мәрьвед гӧһдар ԝе бьгьһижьн беԛьсуртийе. Ида нәхԝәши, еш у һесьред шине ԝе тʹӧнә бьн (Әʹйанти 21:3-5).

17. Ль гора Әʹйанти 20:11-13, ԝәʹдә Һʹӧкӧмдарийа Һʹәзарсали кʹе ԝе кʹәрәма бьстинә?

¹⁷ Гәло кʹе ԝе ван кʹәрәма бьстинә? Пешийе, ԝе әʹлаләта мәзьн йа кӧ жь Һармәгәдоне хьлаз бә, у зарʹед кӧ ԝе паши Һармәгәдоне бенә буйине, ван кʹәрәма бьстиньн. Ӧса жи, кʹьтеба Әʹйанти сәри 20 соз дьдә, кӧ кәсед мьри ԝе бенә сахкьрьне (Әʹйанти 20:11-13 бьхунә). Йед «һʹәԛ», демәк кәсед амьн у йед «нәһʹәԛ», демәк кәсед кӧ мәщала ԝан тʹӧнәбу ԝәки Йаһоԝа нас бькьн, ԝе гьшк диса вәгәрʹьн жийине (Кʹаред Шандийа 24:15; Йуһʹәнна 5:28, 29). Ле гәло әв йәк те һʹәсабе, ԝәки ԝәʹде Һʹӧкӧмдарийа Һʹәзарсали һәр кәс ԝе жь мьрьне рʹабә? На. Йед кӧ пешийа мьрьна хԝә нәдьхԝәстьн Йаһоԝарʹа хьзмәт кьн, ԝе нәйенә рʹакьрьне. Чахе Йаһоԝа мәщал дабу ԝан, ԝәки ԝирʹа хьзмәт кьн, ԝана әв йәк инкʹар  кьр у нишан кьрьн, ԝәки әԝ һежайи жийина һәрһәйи ниньн (Мәтта 25:46; 2 Тʹесалоники 1:9; Әʹйанти 17:8; 20:15).

18. Хьлазийа 1 000 сали, һʹале дьнйайе ԝе чаԝа бә?

¹⁸ Хьлазийа 1 000 сали һәр кәс ԝе беԛьсур бә у тʹӧ кәс ԝе ида бьн һʹӧкӧме гӧне Адәмда нәчәрчьрә, чьмки һʹӧкӧме гӧне ԝи ԝе ида бь тʹәмами бе һьлдане (Рʹомайи 5:12). Бь ви щурʹәйи, хьлазийа Пʹадшатийа Һʹәзарсали һәр кәс ԝе ча бежи сах бә, демәк ԝе бьбә мәрьве беԛьсур (Әʹйанти 20:5).

19. Щерʹьбандьна хьлазийе чьрʹа лазьм ә?

¹⁹ Мире-щьна амьнийа мәрьве беԛьсур, демәк Иса Мәсиһ кьрә бьн шьке, ле Иса һʹәму щерʹьбандьнада амьн ма. Чахе мәщал бькʹәвә дәсте Мире-щьна, кӧ диса мәрьвед беԛьсур бьщерʹьбинә, гәло һәр кәс ԝе мина Иса амьн бьминә? Ԝе һьнге щаба ве пьрсе әʹйан бә, гава хьлазийа 1 000 сали, Мире-щьна жь гәлийе һәй-ԝайе бе бәрʹдане (Әʹйанти 20:7). Кәсед кӧ ԝәʹде ве щерʹьбандьна хьлазийе амьн бьминьн, ԝе жийина һʹәта-һʹәтайе у азайа рʹаст бьстиньн (Рʹомайи 8:21). Ле кәсед кӧ мьԛабьли Хԝәде дәрен, ԝе тʹәви Мире-щьна у щьнед ԝи һʹәта-һʹәтайе бенә кʹӧтакьрьне (Әʹйанти 20:8-10).

20. Пʹехәмбәртийед кʹьтеба Әʹйанти сәр тә чаԝа һʹӧкӧм дькьн?

²⁰ Әв әʹламәтийед жь кʹьтеба Әʹйанти сәр тә чаԝа һʹӧкӧм дькьн? Гәло тӧ нахԝази пе чʹәʹве хԝә бьвини, кӧ әв пʹехәмбәрти ԝе чаԝа бенә сери? Гәло тӧ нахԝази гази кәсед дьн жи бьки, ԝәки әԝана жи тʹәви мә Йаһоԝарʹа хьзмәт кьн? (Әʹйанти 22:17). Әм бь рʹасти жи һʹьзрәта ве рʹоже нә. Мина Йуһʹәннайе шанди, әм жи дьбежьн: «Амин! Ԝәрә йа Хӧдан Иса» (Әʹйанти 22:20).