1. Гәләк жь мә рʹасти чь чәтьнайа тен?

 ГӘЛО тәрʹа чәтьн ә кӧ бьгьһижи нетәкә хԝәйә рʹӧһʹани? b Һәрге ӧса нә, тӧ тʹәне нини. Мәсәлә, Филип дьхԝәст дӧайед хԝә баш кьра у һе зедә дӧа кьра, ле әԝи бона дӧа ԝәʹдә нәдьдит. Ле нета Ерикайе әԝ бу, кӧ ԝәʹдәда һәрʹә щьвинед бона хьзмәтийе. Ле йәкә әԝ тʹьме дәрәнги дькʹәт. Томас чәнд щара хирәт дькьр кӧ Кʹьтеба Пироз жь сәри һʹәта хьлазийе бьхунә. Әԝ дьбежә: «Һʹәԝаса мьн хԝәндьна Кʹьтеба Пирозрʹа тʹӧнә бу. Мьн се щара дәстпедькьр, ле һәр щар әз тʹәне дьгьһиштьмә һʹәта Ԛануна Кʹаһинтийе».

2. Һәгәр бона мә чәтьн ә бьгьһижьн нета хԝә, чьма гәрәке әм бәрхԝә нәкʹәвьн?

² Һәрге тәрʹа чәтьн ә бьгьһижи нета хԝә, бәрхԝә нәкʹәвә. Һәла һе бона нетәкә һеса жи, мәрьв гәрәке гәләк ԛәԝат у ԝәʹде хԝә хәрщ кә. Әв йәк кӧ тӧ дьхԝази бьгьһижи нетәкә хԝә, дьдә кʹьфше ԝәки тӧ достийа хԝә тʹәви Йаһоԝа ԛимәт дьки у дьхԝази бь щурʹе лапи баш ԝирʹа хьзмәт ки. Йаһоԝа хирәта тә ԛимәт дькә (Зәбур 103:14; Миха 6:8). Ләма жи ль гора дәрәщә у ԛәԝата хԝә нете дайнә пешийа хԝә. Гәло тӧ чаԝа дькари бьгьһижи нета хԝә? Ԝәрә әм дина хԝә бьдьнә чәнд фькьред баш.

3. Чьма фәрз ә кӧ хԝәстьна мә һәбә?

³ Сәва кӧ әм бьгьһижьн нетед рʹӧһʹани, хԝәстьн гәләк фәрз ә. Чьмки гава хԝәстьна мәйә мәзьн һәйә, әм һәр тьшти дькьн ԝәки бьгьһижьнә нета хԝә. Хԝәстьна дьле  мә мина баки йә, кӧ али ԛәйьке дькә, ԝәки бьгьһижә щи. Һәрге ба тʹьме һәбә, гәмиван ԝе бьгьһижә нета хԝә. У һәрге ба дьһа ԛәԝи бә, әԝе дьһа зу бьгьһижә нета хԝә. Мина ве йәке, хԝәстьна дьле мә чьԛас мәзьн бә, һаԛас мәщал дьһа зедә дьбә, кӧ әме бьгьһижьнә нета хԝә. Деԝид, бьраки жь Ел Салвадоре, дьбежә: «Һәрге хԝәстьна дьл һәйә, мәрьв дьһа зедә хирәт дьбә. Мәрьв һәр тьшти дькә, ԝәки тʹӧ тьшт рʹийа ԝи нәгьрә бьгьһижә нета хԝә». Ле тӧ чь дькари бьки ԝәки хԝәстьна тә зедә бә?

4. Әм бона чь дькарьн дӧа бькьн? (Филипи 2:13). (Бьньһерʹә ӧса жи шькьл.)

⁴ Бона хԝәстьне дӧа бькә. Бь сайа рʹӧһʹе пироз, Йаһоԝа дькарә дьле тә ԛәԝи кә, ԝәки тӧ бьгьһижи нета хԝә (Бьхунә Филипи 2:13). Щара әм нетәке датиньн пешийа хԝә, чьмки әм заньн кӧ гәрәке ве йәке бькьн. Ле дьбәкә хԝәстьна мә тʹӧнә йә кӧ әм бьгьһижьнә ве нете. Ԝәрә әм дина хԝә бьдьнә сәрһатийа хушкәкә бь наве Норина, йа кӧ жь Угандайе йә. Әԝе дьхԝәст тʹәви кәсәки һинбуна Кʹьтеба Пироз дәрбаз кә, ле дьфькьри кӧ әԝ дәрсдарәкә баш нинә, ләма жи хԝәстьна ԝе кем бу. Гәло чь али ԝе кьр? Әԝ дьбежә: «Мьн һәр рʹож жь Йаһоԝа лава дькьр, ԝәки әԝ хԝәстьна мьн зедә кә, кӧ һинбуна Кʹьтеба Пироз дәрбаз кьм. Мьн дәстпекьр ль гора дӧайед хԝә, фәрәсәтед хԝәйә һинкьрьне баш кьм. Паши чәнд мәһа, мьн дит кӧ хԝәстьна мьн зедә буйә. Һәма ве сале, мьн дӧ һинбунед Кʹьтеба Пироз дәстпекьр».

5. Әм дькарьн дәрһәԛа чь бьфькьрьн, кӧ хԝәстьна мә зедә бә ԝәки бьгьһижьн нета хԝә?

⁵ Кʹур бьфькьрә кӧ Йаһоԝа бона тә чь кьрийә (Зәбур 143:5). Паԝлосе шанди сәр кʹәрәмед Йаһоԝа кʹур дьфькьри. Әв йәк ле һелан дькьр, ԝәки дьһа зедә Йаһоԝарʹа хьзмәт кә (1 Корьнтʹи 15:9, 10; 1 Тимотʹейо 1:12-14). Һәрге тӧ жи кʹур бьфькьри, кӧ Йаһоԝа бона тә чь кьрийә, хԝәстьна тә ԝе һе зедә бә, ԝәки бьгьһижи нета хԝә (Зәбур 116:12). Дина хԝә бьде, кӧ чь али хушкәкә жь Һондурасе кьрийә, ԝәки әԝ бьгьһижә нета хԝә у бьбә пешәнга һәртʹьм. Әԝ дьбежә: «Мьн дьани бира хԝә кӧ Йаһоԝа чьԛас мьн һʹьз дькә. Әԝи али мьн кьрийә, ԝәки әз бьбьм хьзмәткʹара ԝи. Әԝ мьн дьбә хԝәйи у мьн дьпарезә. Гава әз сәр ван тьшта дьфькьрим, һʹьзкьрьна мьн һьндава Йаһоԝа дьһа ԛәԝи дьбу у хԝәстьна мьн зедә дьбу, ԝәки бьбьм пешәнг».

6. Чь дькарә али мә бькә кӧ әм хԝәстьна хԝә дьһа ԛәԝи кьн?

⁶ Дина хԝә бьдә кʹәрәма. Гәло чь али Ерикайе кьр кӧ дәрәнги нәкʹәвә? Әԝ дьбежә: «Мьн те дәрхьст кӧ чахе әз дәрәнг дьчумә сәр щьвинед бона хьзмәтийе, гәләк мәщалед баш жь дәсте мьн дьчун. Ле һәрге әз зу бьһатама, мьне бькарьбуйа сьлав бьда хушк-бьра у ԝәʹдә тʹәви  ԝан дәрбаз кьра. Мьне фькьред баш бьбьһиста, йед кӧ ԝе али мьн бькьрана ԝәки мьн дьһа баш хьзмәт кьра у шабун бьстанда». Ерика дина хԝә дьдайе кӧ әԝе чь кʹаре бьстинә, гава ԝәʹдәда һәрә сәр щьвина. Гәло тӧ дькари дина хԝә бьди кʹижан кʹәрәма? Һәрге нета тә әв ә кӧ Кʹьтеба Пироз бьхуни, йан дӧайед хԝә баш ки, бьфькьрә кӧ әв йәк ԝе ча достийа тә тʹәви Йаһоԝа дьһа ԛәԝи кә (Зәбур 145:18, 19). Ле һәрге нета тә әв бә, ԝәки тӧ сәр һʹӧнӧрәки хԝә бьхәбьти, дина хԝә бьде кӧ әв һʹӧнӧр чаԝа али тә дькә ԝәки һәләԛәтийа хԝә тʹәви кәсед дьн һе баш ки (Колоси 3:14). Хԝәрʹа бьньвисә кӧ тӧйе чь кʹаре бьстини, гава бьгьһижи нета хԝә у тʹьме дина хԝә бьдә ве ньвисаре. Томас дьбежә: «Чьԛас мәʹни һәбьн кӧ әз бьгьһижьмә нета хԝә, һаԛас һе зедә әзе бона ве йәке хирәт бьм».

7. Чь али бьре мә Жулио у кʹӧлфәта ԝи кьр, кӧ бьгьһижьнә нета хԝә?

⁷ Тʹәви ԝан ԝәʹдә дәрбаз кә, кʹе кӧ тә һелан дькә бьгьһижи нета хԝә (Мәтʹәлок 13:20). Дина хԝә бьдьне, кӧ чь али бьре мә Жулио у кʹӧлфәта ԝи кьр, ԝәки хьзмәтийа хԝә дьһа зедә кьн. Әԝ дьбежә: «Мә һәвалед ӧса хԝәрʹа дьжбарт, йед кӧ мә һелан дькьрьн бьгьһижьнә нета хԝә у мә ԝанрʹа дәрһәԛа нета хԝә дьгот. Гәләк жь ԝан ида гьһиштьнә нетед хԝә, ләма жи ԝана дькарьбу ширәтед баш бьдьнә мә. Һәвалед мә гәләк щар жь мә дьпьрсин кӧ шьхӧле мә ча дьчә, у чахе лазьм бу ԝана дьл дьда бәр мә».

8. Һәрге әм тʹәне һьнге хирәт бьн, гава хԝәстьна мә һәбә, чь дькарә бьԛәԝьмә? (Бьньһерʹә ӧса жи шькьл.)

⁸ Щара хԝәстьна мә тʹӧнә кӧ әм тьштәки бькьн. Гәло әв те һʹәсабе кӧ әм нькарьн сәр хԝә бьхәбьтьн ԝәки бьгьһижьнә нета хԝә? На. Ве мәсәле бьдә бәр чʹәʹве хԝә: Ԛәԝата ба һәйә ԝәки ԛәйьке бьве бәрбь ԝи щийи, кʹидәре кӧ лазьм ә. Ле ԛәԝата ба һәр рʹож мина һәв нинә, һәнә рʹож кӧ ба ԛә найе. Гәло әԝ те һʹәсабе ԝәки гәмиван нькарә пешда һәрʹә? Нә һәр гав. Мәсәлә, һьнә ԛәйьк пе бабьрка нә у һьнәк жи пе моторе нә. Бь аликʹарийа ван тьшта, ԛәйьк дькарә бәр бь нета хԝә һәрʹә. Хԝәстьна мә мина баки ӧса йә, щара ԛәԝи йә у щара жи кем ә. Һьнә рʹожа һʹәԝаса мә тʹӧнә йә, кӧ дәрһәԛа нета хԝә бьфькьрьн у бона ве йәке тьштәки бькьн. Ләма жи һәрге әм тʹәне ви чахи хирәт бьн гава хԝәстьна мә һәбә, дьбәкә әм ԛә нәгьһижьн нета хԝә. Ле чаԝа кӧ гәмиван мәщалед дьн жи дьгәрʹә кӧ бьгьһижә нета хԝә, әм жи дькарьн мәщала бьгәрʹьн кӧ бьгьһижьн нета хԝә, һәла һе ви чахи жи гава хԝәстьна мә тʹӧнә йә. Һәмьки әв йәк һеса нинә. Ле гава әм бьгьһижьн нета хԝә, әме гәләк ша бьн. Пешийе ԝәрә әм дина хԝә бьдьнә пьрсәке кӧ дькарә пешда бе.

9. Гәло лазьм ә кӧ әм хирәт бькьн, ԝәки бьгьһижьнә нета хԝә, гава хԝәстьна мә тʹӧнә йә жи? Шьровәкә.

 ⁹ Йаһоԝа дьхԝазә ԝәки әм бь шабуне у рʹәзәдьли ԝирʹа хьзмәт кьн (Зәбур 100:2; 2 Корьнтʹи 9:7). Гава хԝәстьна мә тʹӧнә йә, гәло лазьм ә ԝәки әм хирәт бькьн кӧ бьгьһижьн нета хԝә? Ԝәрә әм дина хԝә бьдьнә мәсәла Паԝлосе шанди. Әԝи гот: «Әз щәфайе дьдьм бәдәна хԝә у ԝе бьндәст дькьм» (1 Корьнтʹи 9:25-27). Паԝлосе шанди, һәла һе ви чахи жи сәр хԝә дьхәбьти, кӧ тьштед рʹаст бькә, гава һʹәԝаса ви тʹӧнә бу. Гәло Йаһоԝа жь хьзмәтийа Паԝлос рʹази бу? Бешьк, әре! У Йаһоԝа хирәта ԝи кʹәрәм дькьр (2 Тимотʹейо 4:7, 8).

10. Гава хԝәстьна мә тʹӧнә бә жи, чьма һежа йә кӧ әм хирәт бькьн ԝәки бьгьһижьн нета хԝә?

¹⁰ Һәма бь ви щурʹәйи, һәрге хԝәстьна мә тʹӧнә бә, ле әм диса жи хирәт бькьн кӧ бьгьһижьнә нета хԝә, Йаһоԝа ԝе жь мә рʹази бә. Әԝ занә кӧ әм һьнә шьхӧла һʹьз накьн, ле диса жи әм фьлан шьхӧли дькьн чьмки ԝи һʹьз дькьн. Чаԝа кӧ Йаһоԝа Паԝлосе шанди кʹәрәм кьр, әԝе хирәта мә жи кʹәрәм кә (Зәбур 126:5). Гава әм дьвиньн кӧ Йаһоԝа мә кʹәрәм дькә, әм һелане дьстиньн ԝәки дьһа зедә бькьн. Хушка мә Лусина, жь Полонйайе, дьбежә: «Щара һʹәԝаса мьн тʹӧнә бу дәркʹәвьм хьзмәтийе, илаһи гава әз ԝәстийайи бум. Ле паши хьзмәтийе шабун дькʹәтә дьле мьн. Әв йәк пʹешкʹешәкә мәзьн бу»! Ле гава хԝәстьна мә кем бә йан жи тʹӧнә бә, әм дькарьн чь бькьн?

11. Йаһоԝа чаԝа дькарә али мә бькә, ԝәки әм хԝәгьртьне пешда биньн?

¹¹ Бона хԝәгьртьне дӧа бькә. Хԝәгьртьн те һʹәсабе гава кӧ мәрьв һәст у кьред хԝә контрол дькә. Әв те һʹәсабе кӧ гәрәке әм хԝә жь кьред хьраб дур бьгьрьн. Хенщи ве йәке мәрʹа хԝәгьртьн лазьм ә, сәва кӧ әм һәла һе ви чахи жи тьштед ԛәнщ бькьн, гава мәрʹа чәтьн ә йан жи һʹәԝаса мә тʹӧнә. Бир нәкә, хԝәгьртьн бәре рʹӧһʹе пироз ә. Ләма жи бона ве йәке дӧа бькә, ԝәки тӧ бькарьби ви һʹӧнӧри нав хԝәда пешда бини (Луԛа 11:13; Галати 5:22, 23). Деԝид, йе кӧ мә жоре бәʹса ԝи кьрьбу, дьбежә кӧ дӧа чаԝа али ԝи кьрийә. Әԝи дьхԝәст тʹьме леколина шәхси дәрбаз бькә. Әԝ дьбежә: «Мьн Йаһоԝарʹа дӧа дькьр, кӧ әԝ хԝәгьртьне бьдә мьн. Бь аликʹарийа ԝи, мьн хԝәрʹа графика бона леколина шәхси чекьр».

12. Ԝаиз 11:4 чаԝа али мә дькә кӧ әм бьгьһижьнә нета хԝә?

¹² Һивийа дәрәщед гәләк баш нибә. Ве дьнйайеда, ԝе тʹӧ щар мәщалед гәләк баш нәкʹәвьн дәстед мә. Һәрге әм һивийа ԝан рʹожед хԝәш бьн, дьԛәԝьмә әм тʹӧ щара нәгьһижьнә нета хԝә (Бьхунә Ԝаиз 11:4). Бьраки бь наве Данйел дьбежә: «Мәщал у дәрәщед беԛьсур тʹӧнә нә. Ле чахе әм гава давежьн, ԝи чахи дәред тʹәзә бәр мә вәдьбьн». Паул, бьраки жь Угандайе, дәрһәԛа мәʹникә дьн дьбежә, кӧ чьрʹа әм гәрәке нетед хԝә паш нәхьн: «Чьԛас жи мәрʹа чәтьн бә, гава әм дәстпедькьн, әм мәщале дьдьнә Йаһоԝа кӧ мә кʹәрәм кә» (Малахи 3:10).

13. Чьрʹа дьһа баш ә бь гавед бьчʹук бьгьһижьнә нетед хԝә?

¹³ Бь гавед бьчʹук дәстпекә. Щара хԝәстьна мә тʹӧнә йә, чьмки дьԛәԝьмә мәрʹа ӧса те кʹьфше, кӧ чәтьн ә бьгьһижьнә нета хԝә. Һәрге ӧса нә, тӧ дькари бь гавед бьчʹук дәстпеки? Һәрге нета тә әв ә, кӧ һʹӧнӧрәки хԝә баш ки, хирәт бькә кӧ серида тьштед бьчʹукда ве йәке бьди кʹьфше. Һәрге нета тә әв ә кӧ Кʹьтеба Пироз бь тʹәмами бьхуни, тӧ дькари бь пʹаред бьчʹук дәстпеки бьхуни.  Бьре мә Томас дьбежә, кӧ ԝирʹа гәләк чәтьн бу Кʹьтеба Пироз саләкеда бьхунә: «Мьн те дәрхьст кӧ мьн дәрбәкерʹа епʹещә дьхԝәнд. Ләма жи мьн сафи кьр, ԝәки диса серида дәстпекьм бьхуньм, ле ижар мьн һәр рʹож тʹәне чәнд рʹез дьхԝәндьн у әз сәр ԝан кʹур дьфькьрим. Бь ви щурʹәйи, мьн жь хԝәндьне ләзәт дьстанд». Томас ида жь хԝәндьне шабуне дьстанд, ләма жи әԝи ида дьхԝәст дьһа зедә бьхунә. У щәм ԝи һатә стандьне, кӧ Кʹьтеба Пироз бь тʹәмами бьхунә. c

14. Кʹижан чәтьнайи дькарьн ньшкева пешда бен?

¹⁴ Хԝәстьна мә чьԛас һәбә йан әм чьԛас хирәт бьн жи, дьбә кӧ һьнәк чәтьнайи бенә пешийа мә. Мәсәлә, һьнә тьштед кӧ ньшкева дьԛәԝьмьн, дькарьн ԝәʹде жь мә бьстиньн, кʹижан мәйе бьда хәбате кӧ бьгьһижьнә нета хԝә (Ԝаиз 9:11). Щарна әм дькарьн жь бо проблема, ԛәԝат у мерхасийа хԝә ӧнда кьн (Мәтʹәлок 24:10). Йан жи дьбәкә жь бо ве йәке, кӧ әм мәрьвнә гӧнәкʹар ьн, мәрʹа чәтьн ә бьгьһижә нета хԝә (Рʹомайи 7:23). Йан жи, дьбәкә әм ԝәстийайи нә (Мәтта 26:43). Ле чь дькарә али мә бькә дьлтәнг нәбьн?

15. Һәрге чәтьнайи пешда тен, гәло әв йәк те һʹәсабе кӧ әме нәгьһижьн нета хԝә? Шьровәкә. (Зәбур 145:14)

¹⁵ Һәрге тьштәк бьԛәԝьмә әв найе һʹәсабе, ԝәки те ида нәгьһижи нета хԝә. Кʹьтеба Пироз дьбежә кӧ гәләк чәтьнайи дькарьн бенә пешийа мә. Ле диса жи, Хәбәра Хԝәде дьбежә кӧ бь аликʹарийа Йаһоԝа, әм дькарьн сәркʹәвьн (Бьхунә Зәбур 145:14). Бьре мә Филип дьбежә, кӧ чь те һʹәсабе сәркʹәвьн: «Сәркʹәтьна мьн нә кӧ ве йәкева гьредайи йә ԝәки әз чәнд щара дькʹәвьм, ле ве йәкева гьредайи йә кӧ әз диса рʹадьбьм сәр пʹийа у рʹийа хԝә бәрдәԝам дькьм». Девид дьбежә: «Әз хирәт дькьм, кӧ ван чәтьнайа нә кӧ ча кәвьре лькʹӧмандьне, ле ча мәщал бьдьмә  хәбате, кӧ Йаһоԝарʹа нишан кьм ԝәки әз чьԛас ԝи һʹьз дькьм». Бәле, кәсе кӧ хирәт дькә, ԝәки нава чәтьнайада жи бьгьһижә нета хԝә, избат дькә ԝәки әԝ дьхԝазә дьле Йаһоԝа ша кә. Гава Йаһоԝа хирәта мә дьвинә, әԝ жь мә рʹази йә!

16. Әм дькарьн жь чәтьнайед кӧ пешда тен чь һин бьн?

¹⁶ Жь чәтьнайед кӧ пешда тен, дәрса һин бә. Бьфькьрә кӧ әв чәтьнайи чьрʹа пешда һат у жь хԝә бьпьрсә: «Сәва кӧ әԝ чәтьнайи диса пешда нәйе, әз дькарьм чь бькьм?» (Мәтʹәлок 27:12). Щара чәтьнайи дьдьнә кʹьфше, ԝәки әв нета кӧ тә дабу пешийа хԝә, нә ӧса һеса йә. Ләма щарәке жи дәрһәԛа нета хԝә бьфькьрә, һәла бь рʹасти ԛәԝата тә дьгьһиже кӧ ве йәке бьки, йан на. d Һәрге тӧ нәгьһижи нетәкә хԝә, нәфькьрә кӧ Йаһоԝа тә ча йәки бекер һʹәсаб дькә (2 Корьнтʹи 8:12).

17. Чьрʹа әм гәрәке бир нәкьн, кӧ әм ида гьһиштьнә кʹижан нета?

¹⁷ Бир нәкә ԝәки тӧ ида гьһишти чь. Кʹьтеба Пироз дьбежә, кӧ «Хԝәде сәр нәһәԛийе нинә, ԝәки кьред ԝә у әԝ һʹьзкьрьна кӧ ԝә бона наве ԝи да кʹьфше бир бькә» (Ибрани 6:10). Ләма жи дәрһәԛа ԝан тьшта бьфькьрә чь кӧ бал тә ида һатийә стандьне, мәсәлә кӧ тӧ буйи досте Йаһоԝа, бәлакьрьна мьзгинийеда кʹар дьки у һати ньхӧмандьне. Чаԝа кӧ бәре тӧ гьһиштьбуйи нетед хԝәйә рʹӧһʹани, тӧ дькари бәрдәԝам ки пешда һәрʹи у бьгьһижи нетед хԝәйә дьн жи (Филипи 3:16).

18. Гава әм хирәт дькьн кӧ бьгьһижьн нета хԝә, гәрәке әм чь бир нәкьн? (Бьньһерʹә ӧса жи шькьл.)

¹⁸ Бь аликʹарийа Йаһоԝа, тӧ дькари бьгьһижи нета хԝә. Чаԝа кӧ гәмиван дьгьһижә нета хԝә у жь рʹеԝитийа хԝә ләзәте дьстинә, тӧ жи дькари бьгьһижи нета хԝә у жь ве йәке шабуне бьстини. Гава тӧ хирәт дьки ԝәки бьгьһижи нета хԝә, бир нәкә кӧ һʹәта ньһа, Йаһоԝа ча али тә кьрийә у хирәта тә кʹәрәм кьрийә (2 Корьнтʹи 4:7). Һәрге тӧ сьст нәби у дәсте хԝә бәржер нәки, тӧйе кʹәрәмед мәзьн бьстини! (Галати 6:9)