Йаһоԝа Исраелийарʹа готьбу ԝәки пироз бьн. Сәва кӧ әԝана пироз бьн, әԝи ԝанрʹа гот: «Нава щьмәʹта хԝәда бӧхданбийе нәки, нәби байисе сәре һәвале хԝә. Әз Хӧдан ьм» (Ԛануна Кʹаһинтийе 19:2, 16).

Готьна кӧ ве рʹезеда ча «нәби байисе» һатийә ԝәлгәрʹандьне, гьли-готьнәкә Ибрани йә. Ль гора каникә Щьһу, кӧ дәрһәԛа кʹьтеба Ԛануна Кʹаһинтийе йә, әв готьн рʹастә-рʹаст те һʹәсабе «сәр . . . нәсәкьнә» йан «пешбәри . . . нәсәкьнә». Чʹәʹвкани ӧса дьбежә: «Чьмки әм ньзаньн мәʹна ве гьли-готьне чь йә, мәрʹа чәтьн ә фькьра ве рʹезе шьровәбькьн».

Һьнә зандар дьфькьрьн кӧ әв готьн бь рʹеза пешийа вева гьредайи йә, йа кӧ ӧса дьбежә: «Диԝанеда нәрʹастийе нәкьн, пьшта бәләнгаза нәгьрьн нә жи ԛәдьр ль йе мәзьн бькьн, рʹаст ль сәр ише ԝанда бьньһерʹьн» (Ԛануна Кʹаһинтийе 19:15). Ль гора ве йәке, ԛануна жь рʹеза 16 те һʹәсабе кӧ гәрәке Исраелийа диԝанеда, арш-вершийеда йан проблемед малбәтеда, зьрар нәдана мәрьвед дьн у бона кʹара хԝә ԛәлпи нәкьрана. Һьлбәт гәрәке әм тьштед ӧса нәкьн, ле бона рʹеза 16 шьровәкьрьнәкә һе логики һәйә.

Ԝәрә дина хԝә бьдә готьнед пешьн йед ве рʹезе. Хԝәде хьзмәткʹаред хԝәрʹа готьбу кӧ гәрәке әԝ бӧхдане навежьн сәр кәсәки. Гәвәсти чьԛас хьраб бә жи, бӧхдан дьһа хьраб ә (Мәтʹәлок 10:19; Ԝаиз 10:12-14; 1 Тимотʹейо 5:11-15; Аԛуб 3:6). Нета кәсе кӧ бӧхдана давежә әв ә, ԝәки наве кәсәки хьраб бькә. Дьбәкә әԝ мьԛабьли ви кәси тьштед дәрәԝин бежә у бь ви щурʹәйи жийина ԝи бькә бьн хофе. Бинә бира хԝә, кӧ Набот данә бәр кәвьра, чьмки бӧхдан авитьнә ԝи (1 Пʹадшати 21:8-13). Бәле, ча пʹара дӧда йа Ԛануна Кʹаһинтийе 19:16 нишан дькә, дьбәкә әԝе кӧ бӧхдана давежә сәр кәсәки дьн бь рʹасти мьԛабьли жийина ԝи рʹадьбә.

Сәрда жи, бӧхдан щарна нәфрʹәтева гьредайи йә. 1 Йуһʹәнна 3:15 ӧса дьбежә: «Һәр кәсе кӧ бьре ԝи бәр чʹәʹва рʹәш ә, әԝ меркӧж ә у һун заньн кӧ нава тʹӧ меркӧжида жийина һʹәта-һʹәтайе тʹӧнә». Ле һʹәԝас ә ԝәки паши готьнед рʹеза 16, Хԝәде ӧса гот: «Дьле хԝәда нәжәни бьре хԝә» (Ԛануна Кʹаһинтийе 19:17).

Ча те кʹьфше, тʹәмийа жь Ԛануна Кʹаһинтийе 19:16 бона мә жи гәләк фәрз ә. Гәрәке әм фькред хьраб жь һʹьше хԝә дәрхьн у бӧхдана нәвежьн сәр тʹӧ кәси. Һәгәр әм мьԛабьли кәсәки рʹадьбьн, демәк һәгәр әм бӧхдана бавежьн сәр кәсәки, чьмки әм чʹәʹвнәбарийа ԝи дькьн йан ԝи һʹьз накьн, әв йәк дьбәкә те һʹәсабе ԝәки әм ԝи нәфрʹәт бькьн. Лазьм ә ԝәки шагьртед Иса тʹӧ кәси нәфрʹәт нәкьн (Мәтта 12:36, 37).