1. Иса пешийа мьрьна хԝә мерәки сущдаркьрирʹа чь гот? (Луԛа 23:39-43)

 ИСА у дӧ кәсед сущдаркьри, йед кӧ кʹеләка ԝи дардакьри бун, һеди-һеди дәст жь жийина хԝә бәрʹдьдан (Луԛа 23:32, 33). Ван һәр дӧ мера ԛәрфед хԝә Иса дькьрьн, ләма жи әшкәрә йә, кӧ әԝ шагьртед ԝи нибун (Мәтта 27:44; Марԛос 15:32). Ле паше, йәки жь ԝан фькьра хԝә гӧһаст. Әԝи гот: «Иса, мьн бир бини, гава бь Пʹадшатийа хԝәва бейи». Иса ԝирʹа гот: «Әз тәрʹа рʹаст иро дьбежьм, те тʹәви мьн Щьнәтеда би» (Луԛа 23:39-43 бьхунә). Кʹьтеба Пироз набежә кӧ ви мери мьзгина «Пʹадшатийа Әʹзмана» пешда ԛәбул кьрьбу. Ӧса жи, Иса нәгот кӧ әв мер ԝе бькʹәвә Пʹадшатийе (Мәтта 4:17). Иса бәʹса Щьнәта сәр әʹрде дькьр. Ле әм ве йәке жь кʹӧ заньн?

2. Чь нишан дькә кӧ мере тʹобәдар Щьһу бу?

² Ча кʹьфш ә, әв мере кӧ тʹобә кьр, Щьһу бу. Әԝи йе дьнрʹа ӧса гот: «Тӧ жь Хԝәде натьрси? Нә тӧ жи хут ԝи щәзайида йи?» (Луԛа 23:40). Щьһуйа баԝәр дькьр, кӧ Хԝәде йәк ә, ле кәсед жь мьләтед дьн баԝәр дькьрьн, ԝәки гәләк хӧдан һәнә (Дәркʹәтьн 20:2, 3; 1 Корьнтʹи 8:5, 6). Һәрге меред сущдаркьри жь мьләтед дьн буна, дьбәкә әԝи ӧса йе дьнрʹа бьгота: «Тӧ жь хӧдана натьрси». Ӧса жи, Иса нә кӧ бона мьләтед дьн, ле «тʹәне бона пәзед мала» Исраеле, һатьбу шандьн (Мәтта 15:24). Хԝәде Исраелийарʹа әʹйан кьрьбу, кӧ әԝе мьрийа рʹакә. Дьбәкә мере тʹобәдар әв йәк заньбу. Хенщи ве йәке, готьнед ԝи нишан дькьн, кӧ әԝи баԝәр дькьр, ԝәки Йаһоԝа ԝе Иса жь мьрьне рʹакә, сәва кӧ әԝ  Пʹадшатийа Хԝәдеда сәрԝертийе бькә. Әԝ баԝәр бу кӧ Йаһоԝа ԝе ԝи жи жь мьрьне рʹакә.

3. Гава Иса бәʹса Щьнәте дькьр, мере тʹобәдар чь дьда бәр чʹәʹве хԝә? (Дәстпебун 2:15)

³ Чаԝа Щьһу, әви мери бешьк заньбу кӧ Йаһоԝа мәрьвед пешьн Адәм у Һәԝа щьнәтеда сәр әʹрде щиԝар кьрьбун. Ләма жи, ча те кʹьфше әԝи фәʹм дькьр, ԝәки Щьнәта кӧ Иса бәʹса ԝе дькьр, бахчәки бәдәԝ ә, сәр рʹуйе әʹрде (Дәстпебун 2:15 бьхунә).

4. Ԝе баш бә кӧ әм чь һин бьн?

⁴ Гәло жийина Щьнәтеда, кӧ Иса бәʹса ԝе кьрьбу, ԝе чаԝа бә? Дәма сәрԝертийа Сьлеман Пʹадша, щьмәʹт әʹдьлайеда дьжит. Әв йәк кӧ Иса жь Сьлеман мәзьнтьр ә, мә дьдә баԝәр кьрьне, ԝәки әԝе тʹәви һәмпʹадшед хԝә кʹәрәмед мәзьн сәр инсанәтеда бьбаринә (Мәтта 12:42). Ләма жи, лазьм ә кӧ ‹пәзед дьн› бьзаньбьн гәрәке чь бькьн, ԝәки бькарьбьн һʹәта-һʹәтайе Щьнәтеда бьжин (Йуһʹәнна 10:16).

5. Тӧ жийина Щьнәтеда чаԝа дьди бәр чʹәʹве хԝә?

⁵ Тӧ жийина Щьнәтеда чаԝа дьди бәр чʹәʹве хԝә? Дьԛәԝьмә тӧ бахчәки бәдәԝ дьди бәр чʹәʹве хԝә, мина бахче Едене (Дәстпебун 2:7-9). Миха пʹехәмбәр бәрева готьбу, кӧ һʹәму хьзмәткʹаред Хԝәде ԝе бьн рʹәза хԝәда у бьн дара хԝәйә һежиреда рʹунен (Миха 4:3, 4). Ӧса жи, Кʹьтеба Пироз дьбежә кӧ хԝарьн ԝе тʹер-тʹьжә һәбә (Зәбур 72:16; Ишайа 65:21, 22). Ләма жи, тӧ дьбәкә дьди бәр чʹәʹве хԝә, ԝәки тӧ чаԝа бь шабун тʹәви дост у мәрьвед хԝә, у һәла һе тʹәви кәсед кӧ жь мьрьне рʹабунә жи, бахчәки бәдәԝда бәр сьфрәки мәзьн рʹуньшти йи, у һәԝа бь бина кӧлиркава тʹьжә йә. Бәле, жийинәкә пʹьрʹ хԝәш пешийа мә йә. Ле хенщи ван тьшта, әме Щьнәтеда шьхӧлед ӧса бькьн, йед кӧ ԝе мәрʹа шабуне биньн.

6. Щьнәтеда, әме чь бькьн? (Шькьл бьньһерʹә.)

⁶ Йаһоԝа әм ӧса әʹфьрандьнә, кӧ әм жь кʹәда хԝә шабуне дьстиньн (Ԝаиз 2:24). Илаһи ԝәʹде Сәрԝертийа Иса йа Һʹәзарсали, әме гәләк тьштава мьжул бьн. Ԝе дәме, кәсед кӧ жь тәнгасийа мәзьн дәрбаз бунә у бь милйона кәсед кӧ жь мьрьне һатьнә рʹакьрьне ԝе һʹәԝще кʹьнщ, хԝарьн у мала бьн. Сәва кӧ һʹәԝщед ԝан рʹази кьн, гәләк хәбат гәрәке бе кьрьне, у әме бешьк жь ве хәбате шабунәкә мәзьн бьстиньн. Чаԝа кӧ Йаһоԝа дьхԝәст, ԝәки Адәм у Һәԝайе бахче кӧ әԝана теда дьжитьн, хԝәй кьрана, ԝе лазьм бә кӧ әм жи Щьнәта тʹәзә хԝәй бькьн. Ӧса жи, ԝе  лазьм бә, ԝәки әм бь милйона мәрьварʹа, йед кӧ жь мьрьне бенә рʹакьрьне, дәрһәԛа Йаһоԝа у ԛьрара ԝи гьли кьн, у һәла һе ԝанрʹа жи йед кӧ гәләк сал пешийа рʹожед Иса дьжитьн.

7. Әм дькарьн чьда баԝәр бьн, у чьрʹа?

⁷ Әм дькарьн баԝәр бьн, кӧ жийина Щьнәтеда ԝе әʹдьл, бәрдар у бь организә бә. Гәло чьрʹа? Чьмки Йаһоԝа хԝәха бь мәсәләкә бьчʹук нишан кьрьбу, ԝәки жийина бьн сәрԝертийа Кӧрʹе ԝида ԝе чаԝа бә. Әв мәсәла, сәрԝертийа Сьлеман Пʹадша йә.

8. Готьнед Зәбур 37:10, 11, 29 щара пешьн чаԝа һатьн сери? (Ве журналеда «Пьрсед Хԝәндәвана» бьньһерʹә.)

⁸ Жь бина бәр Хԝәде, Даԝьд Пʹадша ньвисибу кӧ ахьрийеда, жийина бьн сәрԝертийа пʹадшаки билан у амьнда ԝе чаԝа бә (Зәбур 37:10, 11, 29 бьхунә). Гава әм мәрьварʹа бәʹса дьнйа тʹәзә дькьн, әм гәләк щара Зәбур 37:11 дьхуньн. Иса хԝәха жи ԝәʹде Хьзмәтийа сәр Чʹийе бәʹса ве рʹезе кьрьбу у бь ве йәке нишан кьрьбу, ԝәки готьнед ве рʹезе ԝе ахьрийеда бенә сери (Мәтта 5:5). Ле ӧса жи, ван готьнед Даԝьд әшкәрә дькьр, кӧ ԝәʹде сәрԝертийа кӧрʹе ԝи Сьлеманда, жийин ԝе чаԝа бә. Гава Сьлеман Пʹадша сәр Исраеле сәрԝерти дькьр, щьмәʹт ль ԝәлатәки «кӧ шир у һьнгьв же дькʹьшә» нав хԝәши у сьламәтийеда бу. Хԝәде ԝанрʹа ӧса готьбу: «Һәгәр һун пе ԛәйдә-ԛанунед мьн рʹабьн-рʹунен у тʹәмийед мьн хԝәй кьн у ԝан бьԛәдиньн, . . . Әзе әʹдьлайе бьдьмә ԝәлате ԝә, һуне рʹьһʹәт пʹалдьн» (Ԛануна Кʹаһинтийе 20:24; 26:3, 6). Әв созед Хԝәде бьн сәрԝертийа Сьлеман Пʹадшада һатьн сери (1 Дирок 22:9; 29:26-28). Ӧса жи, готьнед Даԝьд нишан дькьн, кӧ «нәпʹаке бәтавәбә» (Зәбур 37:10). Ләма жи, әм фәʹм дькьн кӧ готьнед Зәбур 37:10, 11, 29 ԝәʹде бәре һатьн сери у ахьрийеда жи ԝе диса бенә сери.

9. Жьн-пʹадша Шәбайе дәрһәԛа сәрԝертийа Сьлеман Пʹадша чь гот?

 ⁹ Жьн-пʹадша Шәбайе дәрһәԛа хԝәши у сьламәтийа Исраелийед бьн сәрԝертийа Сьлеман Пʹадшада, бьһист. Ләма жи, әԝ жь ԝәлате хԝә һʹәта Оршәлиме һат, кӧ һʹале ԝедәре пе чʹәʹве хԝә бьвинә (1 Пʹадшати 10:1). Паши кӧ әԝе пʹадшатийа Сьлеман дит, әԝе гот: «Бь рʹасти ниви тʹәне жи жь бо мьн нәһатьбу готьн. . . . Хԝәзи бь зьламед тә у бь ԝан хӧламед тә! Чьмки һәрдәм ль бәр тә дьсәкьньн у шәһрәзайийа [биланийа] тә дьбьһисьн» (1 Пʹадшати 10:6-8, ИМ). Ле сәрԝертийа Сьлеман Пʹадша тʹәне сийа ве йәке бу, кӧ бьн сәрԝертийа Иса Мәсиһда, Йаһоԝа ԝе чь кʹәрәма сәр инсанәтеда бьбаринә.

10. Иса Мәсиһ чь алийава жь Сьлеман Пʹадша мәзьнтьр ә?

¹⁰ Иса һʹәму алийава Сьлеман Пʹадша мәзьнтьр ә. Сьлеман мерәки ԛьсурдар бу. Жь бо һьнә шашийед ԝийә мәзьн, щьмәʹт ԝәхт шунда кʹәтә тәнгасийе. Ле Иса Сәрԝерәки беԛьсур ә, йе кӧ ԛә шашийа накә (Луԛа 1:32; Ибрани 4:14, 15). Һьмбәри щерʹьбандьнед мәзьн, йед кӧ Мире-щьна анин сәре ԝи, Иса Хԝәдерʹа амьн ма. Иса избат кьрийә, кӧ әԝе тʹӧ щар гӧнә нәкә у тʹӧ щара зьраре нәдә кәсед кӧ бьн сәрԝертийа ԝида ньн. Ԛәдьрәки чьԛас мәзьн ә, кӧ әԝ Пʹадше мә йә!

11. Кʹи ԝе тʹәви Иса Мәсиһ һәвкʹарийе бькә?

¹¹ Сәва кӧ ԛьрара Йаһоԝа бона инсанәте у әʹрде бе сери, 144 000 кәс ԝе тʹәви Иса Мәсиһ һәвкʹарийе бькьн у бона мәрьва хәм бькьн (Әʹйанти 14:1-3). Гава әԝана һе ча мәрьв сәр әʹрде дьжитьн, әԝана рʹасти гәләк тәнгасийа дьһатьн, ләма жи ԝе бьбьн сәрԝеред дьлрʹәʹм. Гәло әԝана ԝе чь бькьн?

12. Йаһоԝа ԝе чь шьхӧли бьдә 144 000 кәсед кʹьфшкьри?

¹² Щабдарийа кӧ Иса у һәмпʹадшед ԝирʹа һатә дайине, жь щабдарийа кӧ Сьлеман Пʹадшарʹа һатьбу дайине зедәтьр ә. Сьлеман тʹәне бона чәнд милйон мәрьва ԝәлатәкида щабдар бу. Ле сәрԝертийа Пʹадшатийа Хԝәде, ԝе бона һʹәму мәрьвед сәр тʹәмамийа дьнйайе щабдар бә. Бәле, Йаһоԝа бь рʹасти жи щабдарикә гәләк мәзьн дьдә 144 000 кәсед бьжарти.

13. Һәмпʹадшед Иса Мәсиһ ԝе чь щабдарийа фәрз биньн сери?

¹³ Мина Иса Мәсиһ, 144 000 кәсед кʹьфшкьри ԝе ча пʹадша у кʹаһин хьзмәт бькьн (Әʹйанти 5:10). Бьн Ԛануна Мусада, шьхӧле кʹаһинайә сәрәкә әԝ бу, кӧ сьһʹәт-ԛәԝата мәрьва йа физики у рʹӧһʹани бьпарезьн. Әв йәк кӧ «Ԛанун сийа ԝан тьштед ԛәнщ ә», логики йә кӧ һәмпʹадшед Иса Мәсиһ ԝе бона һʹәԝщед хьзмәткʹаред Хԝәде, ча алийе физики ӧса жи алийе рʹӧһʹанида хәм бькьн (Ибрани 10:1). Гәло дьнйа тʹәзәда, әме чаԝа рʹебәрийе жь ԝана бьстиньн? Әм ве йәке ньзаньн, ле әм дькарьн баԝәр бьн, кӧ һәр тьшт ԝе бь организә бе кьрьне (Әʹйанти 21:3, 4).

14. Һәләԛәтийа ортʹа ‹пәзед дьн› у бьред Мәсиһ чьԛас незик ә?

¹⁴ Иса Мәсиһ, кәсед кӧ ԝе тʹәви ԝи сәрԝертийе бькьн, ча ‹кәрийе бьчʹук› нав кьр (Луԛа 12:32). Ӧса жи, әԝи бәʹса кәсед дьн кьр, йед кӧ әԝи ча ‹пәзед  дьн› нав кьр. Әв дӧ кʹом дьбьн кәрик (Йуһʹәнна 10:16). Иро, әԝана тʹәвайи һәвкʹарийе дькьн, у сәр әʹрде Щьнәте жи һәвкʹарийа ԝан ԝе бәрдәԝам бә. Ԝе дәме, ‹кәрийе бьчʹук› ԝе ида сәр әʹзмана бә, у ‹пәзед дьн› ԝе бькарьбьн һʹәта-һʹәтайе сәр әʹрде бьжин. Ле сәва кӧ ‹пәзед дьн› Щьнәтеда бьжин, лазьм ә кӧ әԝана ида ньһада һьнә тьшта бькьн.

15. (а) ‹Пәзед дьн› чаԝа тʹәви бьред Мәсиһ һәвкʹарийе дькьн? (б) Тӧ чаԝа дькари чʹәʹв бьди ви бьрайи кӧ дәрманханеда шәʹдәтийе дьдә? (Шькьл бьньһерʹә.)

¹⁵ Мәщала ви мере тʹобәдар тʹӧнә бу, кӧ пешийа мьрьна хԝә шекьрдарийа хԝә Исарʹа бьда кʹьфше. Һʹале ‹пәзед дьн› жь һʹале мере сущдаркьри, щӧдә йә. Гәләк мәщалед ԝан һәнә кӧ шекьрдарийа хԝә нишан кьн. Мәсәлә, гава әԝана пьштгьрийа бьред Иса Мәсиһ йед кʹьфшкьри дькьн, әԝана нишан дькьн, кӧ ԝи һʹьз дькьн. Иса готьбу кӧ әԝе диԝана ‹пәзед дьн› сәр һʹиме ве йәке бькә (Мәтта 25:31-40). Ләма жи, гәрәке әм шьхӧле бәлакьрьна мьзгинийеда бь дьл у щан пьштгьрийа бьред Мәсиһ бькьн (Мәтта 28:18-20). Сәва ве йәке, ԝе баш бә кӧ әм һащәтед бона һинбуна Кʹьтеба Пироз рʹьнд бьдьнә хәбате, мәсәлә кʹьтеба «Ша бә Жийинерʹа Һʹәта-Һʹәтайе!». Һәрге тӧ ньһа тʹәви тʹӧ кәси һинбуна Кʹьтеба Пироз дәрбаз наки, гәло тӧ дькари хԝәрʹа нет дайни, ԝәки чьԛас дәсте тә те һинбуна Кʹьтеба Пироз тʹәви мәрьва дәстпеки?

16. Әм чаԝа дькарьн хԝә бона жийина Щьнәтеда һазьр кьн?

¹⁶ Гәло әм чаԝа дькарьн хԝә бона жийина Щьнәтеда һазьр бькьн? Мәсәлә, әм дькарьн хәйсәт-һʹӧнӧред баш нав хԝәда пешда биньн, ԝәки Йаһоԝа жь мә рʹази бә. Әм дькарьн ньһада хирәт бькьн, ԝәки бь готьн у кьрьнед хԝә һʹәлал бьн у мәрьвнә тʹәрбәт бьн. Ӧса жи, әм дькарьн Йаһоԝарʹа, һәвалзәԝаще хԝәрʹа у хушк-бьрарʹа амьн бьн. Һәрге әм ве дьнйа хьрабда гӧһ бьдьн Йаһоԝа, ԝе мәрʹа  дьһа һеса бе, дьнйа тʹәзәда жи гӧһ бьдьн ԝи. Ве журналеда готара бь наве «Тӧ Һазьр и Әʹрде Ԝар би?» бьньһерʹә.

17. Гәло лазьм ә кӧ әм бьн баре гӧнед хԝәйи бәреда бьминьн?

¹⁷ Әм ӧса жи гәрәке бьн баре гӧнед хԝәйи бәреда нәминьн. Һьлбәт әм гәрәке нәфькьрьн, кӧ ԛӧрбан һатийә дайине, у әм дькарьн бь һʹәмде хԝә гӧна бькьн (Ибрани 10:26-31). Ле әм дькарьн баԝәр бьн, һәрге мә гӧнәки гьран жь дьл тʹобә кьрийә, жь Йаһоԝа аликʹари хԝәстийә у рʹабун-рʹуньштьна хԝә рʹаст кьрийә, әԝ бь мәрʹдани дьбахшинә мә (Ишайа 55:7; Кʹаред Шандийа 3:19). Бинә бира хԝә кӧ Иса Мәсиһ Ферьсийарʹа чь готьбу: «Әз нәһатьмә гази йед рʹаст кьм, ле гази гӧнәкʹара» (Мәтта 9:13). Бәле, ԛӧрбана Иса дькарә һʹәму гӧнед мә афу бькә.

18. Тӧ дьхԝази тʹәви мере кӧ кʹеләка Иса һатьбу дардакьрьне дәрһәԛа чь хәбәр ди?

¹⁸ Тӧ дькари бьди бәр чʹәʹве хԝә, ԝәки тӧ ида Щьнәтеда ни у тʹәви мере кӧ кʹеләка Иса һатьбу дардакьрьне, хәбәр дьди? Бешьк, һуне хәбәр дьн, кӧ һун бона ԛӧрбана Иса чьԛас рʹази нә. Ӧса жи, тӧ дьбәкә ԝи бьпьрси һәла пешийа мьрьна Иса чь ԛәԝьми бу у готьнед Иса сәр ԝи чаԝа һʹӧкӧм кьрьбун. Әԝ жи дьбәкә жь тә бьпьрсә кӧ жийина рʹожед ахьрийеда чаԝа бу. Әм ша нә кӧ Щьнәтеда, әме бькарьбьн кәсед мина ви мери Хәбәра Хԝәде һин кьн (Әфәси 4:22-24).

19. Әме чьрʹа тʹӧ щар жь жийина Щьнәтеда нәԝәстьн? (Бьньһерʹә шькьле рʹуйе журнале.)

¹⁹ Әме тʹӧ щар жь жийина Щьнәтеда нәԝәстьн. Әме тʹьме кәсед тʹәзә нас бькьн у жь шьхӧлед хԝәш шабуне бьстиньн. Йа һәри хԝәш жи әв ә, кӧ әме бькарьбьн Баве хԝәйи әʹзмана рʹож бь рʹож дьһа баш нас бькьн, у бьн сийа ԝида бәхтәԝар бьжин. Әме һʹәта-һʹәтайе дәрһәԛа ԝи у дәрһәԛа тʹәбийәте тьштед тʹәзә һин бьн. Рʹож бь рʹож, әме Хԝәде һе зедә һʹьз бькьн. Әм жь Йаһоԝа у жь Иса чьԛас рʹази нә, кӧ әме бькарьбьн һʹәта-һʹәтайе Щьнәтеда бьжин!