1. Йаһоԝа гәләк щар ча щаба дӧайед хьзмәткʹаред хԝә дьдә?

 ГАВА кәсәк Йаһоԝа Хԝәдерʹа дӧа дькә у жь ԝи аликʹарийе дьхԝазә, әԝ гәләк щар бь сайа хьзмәткʹаред хԝә дьлрʹьһʹәтийе дьдә ԝи (Колоси 4:11). Фьрԛи тʹӧнә рʹуспи, бәрдәстийе щьвате, пешәнг, мьзгинван, щаһьл йан әʹмьрда мәзьн бә, Йаһоԝа дькарә бь сайа ԝи аликʹарийе бьдә кәсед дьн. Ча баш ә кӧ әм дькарьн бь ви щурʹәйи һьм Йаһоԝарʹа һьм жи хушк-бьред хԝәрʹа хьзмәтийе бькьн! Мәсәлә, гава нәхԝәши бәла дьбьн, тʹәшԛәлед тʹәбийәте дьԛәԝьмьн йан пәйкʹәтьн дәстпедьбьн, әм дькарьн бенә һәԝара ԝан.

2. Гава нәхԝәшик бәла дьбә, чьма щарна зор ә, али һәв бькьн?

² Чахе нәхԝәшик щики йан сәр тʹәмамийа дьнйайе бәла дьбә, әв йәк дькарә рʹийа мә бьгьрә кӧ али һәвдӧ бькьн. Мәсәлә, дьбәкә әм гәләк дьхԝазьн һәрʹьн щәм һәвалед хԝә, ле әм ве йәке накьн бона сах-сьламәтийа хԝә у йа ԝан. Дьԛәԝьмә әм дьхԝазьн кәсед кӧ дәсттәнг ьн гази мала хԝә бькьн сәр нанхԝарьне, ле әв жи набә. Йан жи дьбәкә әм дьхԝазьн дьһа зедә али хушк-бьра бькьн, ле чьмки әм нәфәре хԝәйи нәхԝәш дьньһерʹьн, әв жи щарна мәрʹа зәʹмәт ә. Ле диса жи, әм дьхԝазьн али хушк-бьра бькьн. У гава чь жь дәсте мә те әм дькьн, кӧ али ԝан бькьн, әм дьле Йаһоԝа ша дькьн (Мәтʹәлок 3:27; 19:17). Гәло әм чаԝа дькарьн али кәсед дьн бькьн?

3. Әм жь мәсәла рʹуспийед щьвата Моникайе чь һин дьбьн? (Йерәмйа 23:4)

³ Рʹуспи дькарьн чь бькьн? Рʹуспино, хушк у бьра дьһа баш нас бькьн! (Йерәмйа 23:4 бьхунә) Хушка мә Моника, b  йа кӧ мә готара пешийа веда бәʹса ԝе кьрьбу, ӧса дьбежә: «Пешийа пандәмийе, рʹуспийед кʹома мьнә хьзмәтийе тʹәви мьн у хушк-бьред дьн дьчун хьзмәтийе у ԝәхт дәрбаз дькьрьн». У рʹуспийарʹа һеса бу али Моникайе бькьн, гава нәхԝәшийа коронавирусе дәстпебу у чәнд мәрьвед ԝе мьрьн.

4. Рʹуспийа чаԝа али Моникайе кьрьн, у әԝ бона рʹуспийа чь дәрс ә?

⁴ Моника дьбежә: «Рʹуспи ида пешда бона мьн ча һәвал бун, ләма жи мьнрʹа дьһа һеса бу дьле хԝә ԝанрʹа вәкьм у бәʹса хәм у дәрдед хԝә бькьм». Рʹуспи дькарьн жь ве мәсәле чь дәрсе һин бьн? Пешийа кӧ хушк-бьра бькʹәвьн тәнгасийе, ԝанрʹа бьбьнә һәвалед баш у шьванед дьлован. Һәрге тӧ рʹуйе нәхԝәшикә бәлабуйида нькарьби һәрʹи мала хушк-бьра, мәщаләкә дьн бьгәрʹә, кӧ һʹале ԝан бьпьрси у али ԝан бьки. Ӧса жи, Моника дьбежә: «Щарна нава рʹожеда чәнд рʹуспийа мьнрʹа тʹеле дьхьстьн, йан жи смс мьнрʹа дьшандьн. Рʹезед кӧ ԝана нишани мьн дькьрьн, чьԛас мьнрʹа нас бун жи, дьле мьн гәләки дьгьртьн».

5. Рʹуспи чаԝа дькарьн фәʹм кьн, һәла хушк у бьра һʹәԝще чь нә у әԝана чаԝа дькарьн али ԝан бькьн?

⁵ Рʹуспи дькарьн бь сайа пьрсед лайиԛ фәʹм бькьн, һәла хушк-бьра һʹәԝще чь нә (Мәтʹәлок 20:5). Гәло щәм ԝана епʹещә нан, ав, дәрман у тьштед дьн һәнә? Гәло дьбәкә әԝана ида хәбате ӧнда дькьн, йан жи пʹәре кʹьрийа ԝан хьлаз дьбә? Гәло ԝанрʹа аликʹари лазьм ә, кӧ алийе дәԝләтеда кʹомәке бьстиньн? Мәсәлә, хушк-бьра аликʹарийа материали данә Моникайе. Ле рʹуспийа пешийа һәр тьшти бь гьлийед ширьн алийе емосийалида у рʹӧһʹанида али ԝе кьрьн, ԝәки әԝ һьмбәри тәнгасийед хԝә сәбьр кә. Моника ӧса дьбежә: «Рʹуспийа тʹәви мьн дӧа дькьрьн. Рʹьнд найе бира мьн кӧ ԝана чь дьготьн, ле те бира мьн кӧ мьн хԝә чаԝа тʹәхмин дькьр. Ԛәй те бежи Йаһоԝа мьнрʹа дьгот: ‹Тӧ тʹәне нини›» (Ишайа 41:10, 13).

6. Һʹәму хушк-бьред щьватеда чаԝа дькарьн али һәвдӧ бькьн? (Шькьл бьньһерʹә.)

⁶ Кәсед дьн дькарьн чь бькьн? Һәмьки рʹуспи гәрәке бона хушк-бьра хәм бькьн. Ле Йаһоԝа ӧса жи дьхԝазә, кӧ әм гьшк ԛәнщийе бькьн у һәвдӧ ԛәԝи кьн (Галати 6:10). Һәла һе тьштәки бьчʹук жи, һәрге жь дьл бә, дькарә сәр кәсәки кӧ нәхԝәш ә ԛайим һʹӧкӧм кә. Мәсәлә, зарʹ дькарьн шькьла нәԛьш кьн, сәва кӧ дьле бьраки ша кьн. Щаһьл дькарьн бона хушкәке тьштед бона мале бькʹьрʹьн, йан жи  шьхӧлед дьн бькьн. Хушк-бьред дьн дькарьн кәсәки нәхԝәшрʹа хԝарьне чекьн. Һьлбәт, гава кӧ нәхԝәшик бәла дьбә, щьватеда һәр кәс һʹәԝще һелане йә. Паши щьвата әм дькарьн һьнәки зедә бьминьн у тʹәви хушк-бьра хәбәр дьн, фьрԛи тʹӧнә рʹу бь рʹу, йан жи бь сайа видеоконференсийайе. У рʹуспийарʹа жи һелан лазьм ә, чьмки гава нәхԝәши бәла дьбьн, әԝ бона хушк-бьра гәләк тьшта дькьн. Һьнәк хушк-бьра рʹазибуна хԝә бь сайа смса нишан дькьн. Һәрге әм «дьл бьдьнә һәв у аликʹарийа һәвдӧ бькьн», әме алийе хԝәда ԛәнщикә мәзьн бькьн (1 Тʹесалоники 5:11).

7. Тʹәшԛәлед тʹәбйәте дькарьн чь зьраре бьдьнә мә?

⁷ Тʹәшԛәләкә тʹәбийәте дькарә жийина кәсәки ньшкева сәробьни кә. Һьнә кәс мал у мьлкʹе хԝә, ханийе хԝә йан һәла һе мәрьвед хԝәйи һʹьзкьри жи ӧнда дькьн. Тьштед ӧса дькарьн бенә сәре хушк-бьред мә жи. Гәло әм чаԝа дькарьн али ԝан бькьн?

8. Пешийа кӧ тʹәшԛәләкә тʹәбийәте бьԛәԝьмә, рʹуспи у сәред мале дькарьн чь бькьн?

⁸ Рʹуспи дькарьн чь бькьн? Рʹуспино, пешийа кӧ тʹәшԛәләкә тʹәбийәте бьԛәԝьмә, али хушк-бьра бькьн, ԝәки әԝана хԝә һазьр кьн. Гәло хушк-бьред щьвате заньн кӧ гәрәке әԝана бона сах-сьламәтийа хԝә, кʹижан гава бавежьн у чь бькьн, ԝәки тʹәви ԝә текли бьн? Хушка мә Маргарет, жь готара пешийа ве, ӧса дьбежә: «Ԝәʹде бәрнама һʹәԝщед щьвате, рʹуспийа пешда мәрʹа готьн у ча бежи әм һʹьшйар кьрьн, кӧ хофа агьре мешәйада һе һәйә. Ԝана гот кӧ һәрге дәԝләт мәрʹа бежә, гәрәке әм жь мала хԝә бьрʹәвьн, йан жи һәрге әм бьвиньн кӧ һʹал дьһа хьраб дьбә, гәрәке әм зу бьрʹәвьн». Әв рʹебәри ԝәхта рʹастда һат, чьмки пенщ һʹәфтә шунда, агьрәки мәзьн мешә кʹәт. Ԝәʹде ԛӧльхкьрьна малбәте, сәред мале дькарьн тʹәви нәфәред хԝә хәбәр дьн, һәла һәр кәс гәрәке дәрәщәкә ӧсада чь бькә. Һәрге һун у зарʹед ԝә ньһада һазьр бьн, ԝәʹде тʹәшԛәла ԝәрʹа ԝе дьһа һеса бә дьлрʹьһʹәт бьминьн.

9. Рʹуспи дькарьн пешийа у паши тʹәшԛәләкә тʹәбийәте чь бькьн?

⁹ Һәрге тӧ сәркʹаре кʹомәкә хьзмәте йи, пешийа кӧ тʹәшԛәләкә тʹәбийәте бьԛәԝьмә, жь хушк-бьред кʹома хԝә адрес у һәжмара тʹеле бьстинә. Хԝәрʹа башԛә бьньвисә у ве ньвисаре тʹьме тʹәзә кә. Паше ԝәʹде тʹәшԛәлед тʹәбийәте, тӧйе бькарьби зу тʹәви хушк-бьра текли би, һʹале ԝан бьпьрси у аликʹарийа лазьм бьди ԝан. Паше, әве информасийайе зу бьдә координаторе кʹома рʹуспийа. Әԝе жи ве информасийайе бьдә бәрпьрсийаре мьһале. Бь сайа һәвкʹарийа ван бьра, аликʹарикә баш ԝе бьгьһижә хушк-бьра. Паши кӧ агьр мешә кʹәт, бәрпьрсийаре мьһала Маргарете, сәва кӧ рʹебәрийе бьдә рʹуспийа, ԝәкә 36 сьһʹәта рʹанәза бу. Әԝи ԝанрʹа дьгот кӧ әԝ чаԝа дькарьн текли бьн тʹәви 450 хушк-бьред кӧ жь малед хԝә рʹәвийа бун у али ԝан бькьн (2 Корьнтʹи 11:27). Бь ви щурʹәйи, тʹӧ кәс бе щи-сьтʹар нәʹма.

10. Рʹуспи чьма баш дина хԝә дьдьн шьхӧле шьвантийе? (Йуһʹәнна 21:15)

¹⁰ Щабдарийа рʹуспийа әԝ ә, кӧ бь сайа Кʹьтеба Пироз дьлбинийе бьдьнә хушк-бьра у али кәсед дьлтәнг бькьн (1 Пәтрус 5:2). Чахе тʹәшԛәләкә тʹәбийәте дьԛәԝьмә, рʹуспи йа пешьн дәрһәԛа сах-сьламәтийа хушк-бьра педьһʹәсьн у дьпьрсьн һәла ԝанрʹа хԝарьн, кʹьнщ у щи-сьтʹар лазьм ә, йан на. Ле паши чәнд мәһа жи, дьбәкә ԝанрʹа диса дьлбини у аликʹарийа рʹӧһʹани лазьм бә (Йуһʹәнна 21:15 бьхунә). Бьре мә Һаролд, йе кӧ әндәме Комитейа  Филиале йә у паши тʹәшԛәлед тʹәбийәте тʹәви гәләк хушк-бьра хәбәр дайә, ӧса дьбежә: «Сәва кӧ бьрина дьле ԝан ԛәнщ бә, гәләк ԝәхт лазьм ә. Жийина ԝан дьбәкә һеди-һеди нормал бьбә, ле дьбәкә мьрьна мәрьвәки ԝани дәлал, ӧндакьрьна мал-мьлкʹе ԝан, йан бәлайед кӧ һатьн сәре ԝан, бәр чʹәʹве ԝан нәчьн. Гава кӧ тьштед ӧса тенә бира ԝан, әԝана диса у диса хәмгин дьбьн. Һʹаләки ӧса найе һʹәсабе кӧ баԝәрийа ԝан сьст ә, чьмки фькьр у һәстед ӧса нормал ьн».

11. Малбәт һʹәԝще чь нә?

¹¹ Рʹуспи гәрәке ль гора ве ширәте һәрәкʹәт бькьн: «Тʹәви йед дьгьрин бьгьрин» (Рʹомайи 12:15). Лазьм ә кӧ рʹуспи тʹьме биньн бира кәсед кӧ жь тʹәшԛәла хьлаз бунә, ԝәки Йаһоԝа у хушк-бьра гәләки ԝана һʹьз дькьн. Гәрәке әԝана али малбәта бькьн, кӧ шьхӧле рʹӧһʹани нәдьнә сәкьнандьне, мәсәлә, дӧакьрьн, ԛӧльхкьрьна малбәте, чуйина сәр щьвата у бәлакьрьна мьзгинийе. Ӧса жи, гәрәке әԝана дьле де-бава ԛәԝи кьн, кӧ дина зарʹед хԝә бькʹьшиньн сәр ван тьшта, чь кӧ тʹӧ тʹәшԛәләк нькарә жь ван бьстинә. Де-бавно, биньн бира зарʹед хԝә, кӧ Йаһоԝа һәртʹьм досте ԝан ә у әԝ тʹӧ щар дәсте ԝан бәрʹнадә. У тʹьме зарʹед хԝәрʹа бежьн кӧ сәр тʹәмамийа дьнйайе гәләк хушк-бьред ԝан һәнә, йед кӧ һазьр ьн али ԝан бькьн (1 Пәтрус 2:17).

12. Кәсед дьн чаԝа дькарьн ԝәʹде тʹәшԛәлед тʹәбийәте аликʹарийе бьдьн? (Шькьл бьньһерʹә.)

¹² Кәсед дьн дькарьн чь бькьн? Һәрге незики мала тә тʹәшԛәләкә тʹәбийәте бьԛәԝьмә, жь рʹуспийа бьпьрсә һәла тӧ чаԝа дькари аликʹарийе бьди. Дьбәкә тӧ дькари хушк у бьред кӧ жь тʹәшԛәләке хьлаз бунә, йан жи йед кӧ авакьрьнеда кʹар дькьн, ԝәʹдәлу тʹәглифи мала хԝә ки. Йан жи, дьбәкә тӧ дькари хԝарьн йан тьштед дьн ԝанрʹа бьви. Ле һәрге тʹәшԛәләкә тʹәбийәте дури мала тә бьԛәԝьмә, гәло тӧ чаԝа дькари аликʹарийе бьди? Мәсәлә, тӧ дькари бона кәсед зьрардити дӧа бьки (2 Корьнтʹи 1:8-11). Ӧса жи, тӧ бь сайа ԛӧрбанкьрьнед хԝә, бона шьхӧле һʹәмдьнйайе аликʹарийе бьди, йед кӧ ӧса жи тенә хәрщкьрьне гава тʹәшԛәлед тʹәбийәте дьԛәԝьмьн (2 Корьнтʹи 8:2-5). Һәрге мәщал һәбә ԝәки тӧ һәрʹи ви щийи кʹидәре кӧ тʹәшԛәлә ԛәԝьми йә, дәрһәԛа ве хԝәстьна хԝә рʹуспийарʹа бежә. Һәрге хԝәстьна тә бе ԛәбулкьрьне, дьԛәԝьмә тӧ бейи һинкьрьне, ԝәки бькарьби бь щурʹе һәри баш аликʹарийе бьди.

13. Ԝәлатед ӧсада, кʹидәре шьхӧле мә һатийә ԛәдәхәкьрьне, хушк у бьред мә рʹасти чь тәнгасийа тен?

¹³ Ԝәлатед ӧсада кʹидәре кӧ шьхӧле мә ԛәдәхәкьри йә, жийина хушк-бьред мә зәʹмәт ә. Ԝан ԝәлатада әԝана рʹасти проблемед пʹәрава гьредайи тен, нәхԝәш дькʹәвьн йан мәрьвед хԝәйи һʹьзкьри ӧнда дькьн. Ле жь бо ԛәдәхе, дьԛәԝьмә рʹуспи нькарьбьн аза һәрʹьн тʹәсәлийа хушк-бьра бькьн у дьлбинийе бьдьнә ԝан. Бьре мә Андрей, йе кӧ мә готара пешийа веда бәʹса ԝи кьрьбу, кʹәтьбу ви һʹали. Хушкәкә жь кʹома ԝийә хьзмәтийе алийе пʹәрада кʹәтьбу тәнгасийе. Паше жи, әԝ бь әʹрәбе кʹәтә ԛәзийе. Ԝерʹа чәнд операсийа лазьм бу, у әԝ ида нькарьбу бьхәбьтийа. Ԝәʹде ԛәдәхәкьрьн у пандәмийе, хушк-бьред мә бь дьл у щан али ԝе дькьрьн. Бәле, Йаһоԝа Хԝәде тʹәви ԝе бу.

14. Мәсәла рʹуспийа чаԝа нишани мә дькә, кӧ әм дькарьн хԝә бьсперьн Йаһоԝа?

¹⁴ Рʹуспи дькарьн чь бькьн? Андрей дӧа кьр у чь жь дәсте ԝи дьһат дькьр. Гәло Йаһоԝа чаԝа щаба дӧайе ԝи да? Әԝи бь сайа ԝан хушк-бьра, азайа кʹижана дьһа зедә һәбу, али хушка мә кьр. Мәсәлә, һьнәка бь әʹрәба хԝә ле дьбьрьн щәм дохдьр. Һьнәка жи пʹәрә данә ԝе. Йаһоԝа нет кьрә дьле ԝан, кӧ ль гора мәщалед хԝә али ԝе бькьн, у кʹәд у хирәта ԝан кʹәрәм кьр (Ибрани 13:16). Рʹуспино, һәрге шьхӧле мә те ԛәдәхәкьрьне, жь кәсед дьн бьхԝазьн кӧ әԝана жи аликʹарийе бьдьн (Йерәмйа 36:5, 6). Бәри һәр тьшти, хԝә бьсперьн Йаһоԝа. Әԝе али ԝә бькә, кӧ һун бенә һәԝара хушк-бьра.

15. Гәло әм чаԝа дькарьн ԝәʹде пәйкʹәтьна, йәктийе ортʹа һәвда хԝәй кьн?

¹⁵ Кәсед дьн дькарьн чь бькьн? Ԝәʹде ԛәдәхәкьрьна, дьбәкә әм тʹәне бь кʹомед бьчʹук тʹәвайи тʹоп бьн. Ләма жи гәләк фәрз ә, ԝәки ида ньһада әʹдьлайе ортʹа һәвда хԝәй кьн. Гәрәке әм нә кӧ мьԛабьли хушк-бьра, ле мьԛабьли Мире-щьна шәрʹ бькьн. Ԝе баш бә, кӧ әм дина хԝә нәдьн сәр шаши у ԛьсуред хушк-бьра, у проблема нав һәвда зу-зу сафи кьн (Мәтʹәлок 19:11; Әфәси 4:26). Ԝәрә әм бь дьл у щан али һәвдӧ бькьн (Тито 3:14). Кʹомәка кӧ хушк-бьра данә ве хушка кӧ һʹәԝще аликʹарийе бу, сәр тʹәмамийа кʹома хьзмәтийе баш һʹӧкӧм кьр. Әԝана һʹәму ча малбәтәк незики һәв бун (Зәбур 133:1).

16. Ль гора Колоси 4:3, 18, әм чаԝа дькарьн али ван хушк-бьра бькьн, йед кӧ рʹасти пәйкʹәтьна тен?

¹⁶ Бь һʹәзара хушк-бьред мә, нава ԛәдәхәкьрьнед  ԝәлатда жи Йаһоԝарʹа хьзмәт дькьн. Һьнәк жь ԝан, жь бо баԝәрийа хԝә кʹәтьнә кәле. Әм дькарьн бона ԝан у малбәтед ԝан дӧа бькьн. Ӧса жи, әм дькарьн бона ԝан дӧа бькьн, йед кӧ аликʹарийа рʹӧһʹани, физики у ԛануни дьдьн хушк-бьра у һазьр ьн бона ԝана азайа хԝә жи ӧнда кьн c (Колоси 4:3, 18 бьхунә). Тʹӧ щар бир нәкә, кӧ дӧайед тә дькарьн али ван хушк-бьра бькьн! (2 Тʹесалоники 3:1, 2; 1 Тимотʹейо 2:1, 2)

17. Әм чаԝа дькарьн хԝә ида ньһада бона пәйкʹәтьна һазьр кьн?

¹⁷ Һун ньһада дькарьн малбәта хԝә бона пәйкʹәтьна һазьр кьн (Кʹаред Шандийа 14:22). Дәрһәԛа тьштед хьраб, йед кӧ һун дьфькьрьн дькарьн бенә сәре ԝә, нәфькьрьн. Дәԝса ве йәке, достийа хԝә тʹәви Йаһоԝа дьһа ԛәԝи кьн у ве йәкеда али зарʹед хԝә жи бькьн. Чахе һун дьлтәнг ьн у бәрхԝә дькʹәвьн, дьле хԝә Йаһоԝарʹа вәкьн (Зәбур 62:7, 8). Тʹәви малбәта хԝә хәбәр дьн, кӧ һун чьрʹа дькарьн итʹбарийа хԝә Йаһоԝа биньн. d Чаԝа кӧ һазьрбуна бона тʹәшԛәлед тʹәбийәте али ԝә у зарʹед ԝә дькә, ӧса жи һазьрбуна бона пәйкʹәтьна, ԝе али ԝә бькә кӧ һун ԛәԝи у дьлрʹьһʹәт бьминьн. Бь ви щурʹәйи зарʹед ԝә ԝе һин бьн итʹбарийа хԝә Йаһоԝа биньн, ӧса жи мерхас бьн у дьлрʹьһʹәт бьминьн.

18. Чь рʹож һивийа мә нә?

¹⁸ Әʹдьлайа Хԝәде дькарә дьл у һʹьше мә бьпарезә (Филипи 4:6, 7). Бь сайа ве әʹдьлайе Йаһоԝа дьле мә рʹьһʹәт дькә, гава кӧ нәхԝәши бәла дьбьн, тʹәшԛәлед тʹәбийәте дьԛәԝьмьн йан пәй мә дькʹәвьн. Әԝ бь сайа рʹуспийед хирәт шьвантийа мә дькә. У әԝи мәщал дайә мә һʹәмуйа, кӧ дәсте хԝә дьрежи һәвдӧ бькьн. Әʹдьлайи, демәк дьлрʹьһʹәтийа кӧ иро дьле мәда һәйә, али мә дькә, кӧ әм хԝә бона охьрмед гьран у һәла һе бона тәнгасийа мәзьн жи һазьр кьн (Мәтта 24:21). Ԝи чахи, ԝе лазьм бә, кӧ әм әʹдьлайа хԝә бьпарезьн у али кәсед дьн бькьн, ԝәки әԝана жи ӧса бькьн. Паши тәнгасийа мәзьн, һʹәму кӧл-дәрд ԝе ида тʹӧнә бьн, у ль гора ԛьрара Йаһоԝайә пешьн, әме жь әʹдьлайа рʹаст, һʹәта-һʹәтайе шабуне бьстиньн! (Ишайа 26:3, 4)