1. Гава әм сәр созе жийина һʹәта-һʹәтайе дьфькьрьн, әв йәк чаԝа сәр мә һʹӧкӧм дькә?

 ЙАҺОԜА соз дайә кӧ әԝе «жийина һʹәта-һʹәтайе» бьдә кәсед, кӧ гӧһ дьдьнә ԝи (Рʹомайи 6:23). Гава әм сәр ви созе Хԝәде дьфькьрьн, гәло әв йәк али мә накә кӧ әм ԝи һе зедә һʹьз бькьн? Бәле, Баве мәйи әʹзмана достед хԝә ӧса һʹьз дькә, кӧ дьхԝазә ԝәки әԝана һәр у һәр бьжин.

2. Созе жийина һʹәта-һʹәтайе чаԝа али мә дькә?

² Бь сайа созе жийина һʹәта-һʹәтайе, әм дькарьн нава чәтьнайед иройинда ԛәԝи бьсәкьньн. Һәрге дьжмьнед мә бежьн кӧ ԝе мә бькӧжьн, диса жи әме Йаһоԝарʹа амьн бьминьн, чьмки әм заньн кӧ әԝе мә жь мьрьне рʹакә у жийина һәр-һәйи бьдә мә (Йуһʹәнна 5:28, 29; 1 Корьнтʹи 15:55-58; Ибрани 2:15). Гәло әм чьма дькарьн баԝәр бьн, кӧ жийина һʹәта-һʹәтайе реали йә? Ԝәрә әм дина хԝә бьдьнә ван мәʹнийа.

3. Әм чьрʹа дькарьн баԝәр бьн, кӧ Йаһоԝа дькарә жийина һәр-һәйи бьдә мә? (Зәбур 102:12, 24, 27)

³ Әм заньн кӧ Йаһоԝа дькарә жийина һʹәта-һʹәтайе бьдә мә, чьмки әԝ Канийа жийине йә у әԝ хԝәха һәр у һәр дьжи (Зәбур 36:9). Чәнд рʹез нишани мә дькьн, кӧ Йаһоԝа тʹьме һәбуйә у ԝе тʹьме һәбә. Мәсәлә, Зәбур 90:2 дьбежә кӧ Йаһоԝа «жь һәр-һәйе һʹәта-һʹәтайе» йә. Зәбур 102 жи ӧса дьбежә (Зәбур 102:12, 24, 27 бьхунә). Һәбаԛуԛ жи дәрһәԛа Баве мәйи әʹзмана ӧса ньвисибу: «Ма йе жь һәрһәйийе нә тӧ йи, Йа Хӧдан, Хԝәдайе мьн йе пироз? Те нәмьри» (Һәбаԛуԛ 1:12, ИМ).

4. Һәрге мәрʹа чәтьн ә фәʹм бькьн, кӧ Йаһоԝа һәртʹьм һәбуйә, гәло әм гәрәке жь бо ве йәке хәмгин бьн?

 ⁴ Кʹьтеба Пироз дьбежә, кӧ Йаһоԝа «Хԝәдайе һәрһәйи» йә. Гәло тәрʹа чәтьн ә ве йәке фәʹм бьки? (Ишайа 40:28, ИМ) Бь рʹасти жи гәләк мәрьва зор те кӧ ве йәке фәʹм бькьн. Мәсәлә, Әлиһу дәрһәԛа Хԝәде готьбу кӧ леколина «һәжмара салед ԝи» набә (Ибо 36:26). Ле әв йәк кӧ әм тьштәки фәʹм накьн найе һʹәсабе, кӧ әв тьшт нә рʹаст ә. Мәсәлә, дьԛәԝьмә әм рʹьнд фәʹм накьн, кӧ рʹонайи чаԝа дьхәбьтә, ле әв йәк һьлбәт найе һʹәсабе, кӧ рʹонайи тʹӧнә йә. Мина ве йәке, дьбәкә әм тʹӧ щар бь тʹәмами фәʹм нәкьн, кӧ Йаһоԝа чаԝа тʹьме һәбу у ԝе тʹьме һәбә, ле әв йәк найе һʹәсабе, кӧ Хԝәде һәр у һәр нажи. Рʹастийа дәрһәԛа Хԝәде ве йәкева гьредайи нинә, кӧ әм чь фәʹм дькьн у чь фәʹм накьн (Рʹомайи 11:33-36). Ль гора Кʹьтеба Пироз, пешийа чекьрьна әʹрд у әʹзмана, Йаһоԝа һәбу. Әʹфьрандаре һәр тьшти әԝ ә (Йерәмйа 51:15; Кʹаред Шандийа 17:24). Ле гәло диса чь мәрʹа избат дькә, кӧ әм дькарьн һʹәта-һʹәтайе бьжин?

5. Мәщала Адәм у Һәԝайе һәбу кӧ жийинәкә ча бьстандана?

⁵ Зу йан дәрәнг, һʹәму шинкайи дьчʹьлмьсьн, у һʹәму һʹәйԝан дьмьрьн. Жь алийе дьнва жи, гава Хԝәде мәрьвед пешьн әʹфьранд, әԝи мәщал да ԝан, кӧ тʹӧ щар нәмьрьн, ле һʹәта-һʹәтайе бьжин. Йаһоԝа Адәмрʹа ӧса гот: «Жь дара ԛәнщи у хьраби наскьрьне нәхԝә, чьмки ԝе рʹожа гава тӧ жь ԝе бьхԝи, те әʹсә бьмьри» (Дәстпебун 2:17). Һәрге Адәм у Һәԝайе гӧһ бьдана Йаһоԝа, әԝана ԝе нәмьрана. Ча те кʹьфше Йаһоԝа ԝе рʹожәке изьн бьда ԝан, кӧ жь «дара жийине» жи бьхԝьн. Ӧса, ԝана ԝе жийина һәр-һәйи бьстанда b (Дәстпебун 3:22).

6-7. (а) Диса әм жь кʹӧ заньн, ԝәки Йаһоԝа нахԝазә кӧ әм бьмьрьн? (б) Дьнйа тʹәзәда, тӧ дьхԝази чьва мьжул би? (Шькьла бьньһерʹә.)

⁶ Зандар дьбежьн кӧ мәжуйе мәда һаԛас щи һәйә, ԝәки әм нькарьн тʹәмамийа әʹмьре хԝәда ԝи тʹьжә бькьн. Ль гора готарәке, кӧ сала 2010-да һатьбу дәрхьстьне, мәжуйе мә ԛаси 2,5 милйон гигабайти йә. Демәк һәрге бәрамбәр кьн, дәрте кӧ әв тʹере дькә,  ԝәки бәрнама телевизийоне 3 милйон сьһʹәти (зедәтьри 300 сали) бе ньвисандьне (Scientific American Mind). Дьԛәԝьмә әԝ щи кӧ мәжуйе мәда һәйә, жь ве йәке зедәтьр бә жи. Әв һәжмар мәрʹа дьдә кʹьфше, кӧ Йаһоԝа мәжуйе мә нә тʹәне бона әʹмьрәки 70 йан 80 сали чекьрийә (Зәбур 90:10).

⁷ Ӧса жи Йаһоԝа хԝәстьна мәзьн кьрийә дьле мә, кӧ әм дьхԝазьн бьжин. Кʹьтеба Пироз дьбежә кӧ Хԝәде «һәр-һәйити кьр дьле мәрьва» (Ԝаиз 3:11, ИМ). Ләма жи, мьрьн бона мә дьжмьн ә (1 Корьнтʹи 15:26). Чахе әм гьран нәхԝәш дькʹәвьн, әм һәр тьшти дькьн, ԝәки хԝә жь ве нәхԝәшийе ԛәнщ кьн. Мәсәлә, әм дьчьн бал дохдьр, у әм дьбәкә дәрмана вәдьхԝьн, ԝәки ԛәнщ бьн. Чь жь дәсте мә те, әм ве йәке дькьн, кӧ сах бьминьн. У гава мәрьвәки мәйи һʹьзкьри дьмьрә, фьрԛи тʹӧнә щаһьл бә йан әʹмьрда мәзьн, йәкә гәләк ԝәхт дьле мә дешә (Йуһʹәнна 11:32, 33). Бәле, Йаһоԝа һьм хԝәстьна жийина һәр-һәйи кьрийә дьле мә, һьм жи әм ӧса әʹфьрандьнә, кӧ әм бькарьбьн һʹәта-һʹәтайе бьжин. Хенщи ве йәке, һьнә тьштед дьн жи избат дькьн, кӧ әм дькарьн жийина һәр-һәйи бьстиньн. Кʹа әм дина хԝә бьдьнә һьнә кьред Йаһоԝа йед бәре у йед ньһа, кʹижан кӧ избат дькьн, ԝәки нета ԝи һьндава инсанәте нәһатийә гӧһастьне.

8. Ишайа 55:11 дәрһәԛа ԛьрара Йаһоԝа бона инсанәте, чь нишани мә дькә?

⁸ Рʹаст ә Адәм у Һәԝайе гӧнә кьрьн у бь ве йәке мьрьн анинә сәр зарʹед хԝә,  ле йәкә Йаһоԝа ԛьрара хԝә нәгӧһастийә (Ишайа 55:11 бьхунә). Әԝ дьхԝазә кӧ мәрьвед амьн һәр-һәйи бьжин. Тьштед кӧ Йаһоԝа готийә у кьрийә, ԝәки ԛьрара хԝә пек бинә, ве йәке әшкәрә нишан дькьн.

9. Хԝәде чь соз дайә? (Данийел 12:2, 13)

⁹ Йаһоԝа соз дайә кӧ әԝе мьрийа рʹакә у мәщале бьдә ԝан, ԝәки һʹәта-һʹәтайе бьжин, у хьзмәткʹаред Хԝәде йед бәре бь ве йәке баԝәр бун (Кʹаред Шандийа 24:15; Тито 1:1, 2). Мәсәлә, Ибо баԝәр бу, кӧ Йаһоԝа жь дьл дьхԝазә мьрийа рʹакә (Ибо 14:14, 15). Данийел пʹехәмбәр заньбу кӧ мәщала мьрийа һәйә, ԝәки бенә рʹакьрьн у һʹәта-һʹәтайе бьжин (Зәбур 37:29; Данийел 12:2, 13 бьхунә). Щьһуйед кӧ рʹожед Исада дьжитьн заньбун, ԝәки Йаһоԝа дькарә «жийина һʹәта-һʹәтайе» бьдә хьзмәткʹаред хԝәйә амьн (Луԛа 10:25; 18:18). Иса жи чәнд щара бәʹса ве йәке кьрьбу, у әԝ хԝәха жи пе ԛәԝата Баве хԝә жь мьрьне һат рʹакьрьн (Мәтта 19:29; 22:31, 32; Луԛа 18:30; Йуһʹәнна 11:25).

10. Әв йәк кӧ дәмед бәреда һьнә кәс жь мьрьне һатьбун рʹакьрьне, чь избат дькә? (Шькьл бьньһерʹә.)

¹⁰ Йаһоԝа Канийа Жийине йә, у ԛәԝата ԝи дьгьһиже кӧ мьрийа вәгәрʹинә жийине. Мәсәлә, әԝи ԛәԝат дабу Елйас пʹехәмбәр, ԝәки кӧрʹе жьнәбикә ль бажаре Сәрәптайе жь мьрьне рʹакә (1 Пʹадшати 17:21-23). Паше, Елиша бь аликʹарийа Хԝәде кӧрʹе жьнькәкә Шунәми жь мьрьне рʹакьр (2 Пʹадшати 4:18-20, 34-37). Сәрһатийед ӧса нишан дькьн, кӧ ԛәԝата Йаһоԝа дьгьһиже, ԝәки мьрийа жь мьрьне рʹакә. Гава Иса сәр әʹрде бу, әԝи избат кьр, ԝәки Баве ԝи ԛәԝат дайә ԝи кӧ мьрийа рʹакә (Йуһʹәнна 11:23-25, 43, 44). Иса ньһа сәр әʹзмана йә, у «һʹәму һʹӧкӧме әʹрд у әʹзмен» жерʹа һатийә дайине. Ләма жи, ԛәԝата Иса дьгьһиже, «кӧ һʹәмуйед тʹьрбада» жь мьрьне рʹакә у мәщале бьдә ԝан һʹәта-һʹәтайе бьжин (Мәтта 28:18; Йуһʹәнна 5:25-29).

11. Ԛӧрбана Иса чаԝа рʹе вәдькә кӧ әм һʹәта-һʹәтайе бьжин?

¹¹ Йаһоԝа чьма һишт ԝәки Кӧрʹе ԝийи дәлал һаԛас еше бькʹьшинә у бьмьрә? Иса зәлал нишан кьр, кӧ сәбәб чь йә: «Хԝәде ӧса дьнйа һʹьз кьр, кӧ Кӧрʹе хԝәйи тайе тʹәне бәрва да, ԝәки һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә» (Йуһʹәнна 3:16). Хԝәде Кӧрʹе хԝә ча ԛӧрбан бона гӧне мә бәрва да, ԝәки әм бькарьбьн жийина һәр-һәйи бьстиньн (Мәтта 20:28). Паԝлосе шанди дәрһәԛа ԛьрара Хԝәде ӧса гот: «Мьрьн рʹуйе мәрьвәкида бу, бь мәрьвәки жи ԝе рʹабуна мьрийа бьбә. Чаԝа һʹәмуйед жь Адәм буйи дьмьрьн, ӧса жи һʹәмуйед жь Мәсиһ буйи ԝе сах бьн» (1 Корьнтʹи 15:21, 22).

12. Ԛьрара Йаһоԝа ԝе чаԝа бь сайа Пʹадшатийе бе сери?

¹² Иса Мәсиһ шагьртед хԝә һин кьр, ԝәки дӧа бькьн кӧ Пʹадшатийа Хԝәде бе у ԛьрара Хԝәде сәр әʹрде бе сери (Мәтта 6:9, 10). Гәло ԛьрара Хԝәде чь йә? Пʹарәкә ԛьрара ԝи әв ә, ԝәки инсан һʹәта-һʹәтайе сәр әʹрде бьжин. Сәва кӧ ве ԛьрара хԝә бинә сери, Йаһоԝа Кӧрʹе хԝә ча Пʹадше Пʹадшатийа хԝә кʹьфш кьрийә. Ӧса жи, Хԝәде 144 000 мәрьв ль сәр әʹрде дьжберә, ԝәки әԝана тʹәви Иса ԛьрара Хԝәде биньн сери (Әʹйанти 5:9, 10).

13. Йаһоԝа ньһа чь дькә, у тӧ гәрәке чь бьки?

 ¹³ Йаһоԝа ньһа ‹әʹлаләтәкә мәзьн› тʹоп дькә у һин дькә, ԝәки әԝана бьн Пʹадшатийа ԝида бьжин (Әʹйанти 7:9, 10; Аԛуб 2:8). Иро, дьнйа бь тьрс у шәрʹава тʹьжә йә, ле кәсед кӧ пʹара әʹлаләта мәзьн ьн хирәт дькьн, ԝәки нәфрʹәте бь тʹәмами жь дьле хԝә дәрхьн. Ньһа, әԝана бь симболик шуред хԝә дькьн гисьн, демәк кʹотан (Миха 4:3). Дәԝса кӧ мәрьва шәрʹада бькӧжьн, әԝана дәрһәԛа Хԝәде у нетед ԝи ԝана һин дькьн у бь ве йәке али ԝан дькьн, ԝәки «жийина кӧ рʹасти жийин ә ԛазьнщ кьн» (1 Тимотʹейо 6:19). Дьбәкә мәрьвед ԝан мьԛабьли ԝан дәртен, йан жи әԝана алийе пʹәрава чәтьнайа дькʹьшиньн, чьмки пьштгьрийа Пʹадшатийа Хԝәде дькьн, ле диса жи, Йаһоԝа бона һʹәԝщед ԝан хәм дькә (Мәтта 6:25, 30-33; Луԛа 18:29, 30). Ләма жи, әм баԝәр ьн кӧ Пʹадшатийа Хԝәде бь рʹасти жи сәрԝертийе дькә у ԝе ԛьрара Йаһоԝа бинә сери.

14-15. Ахьрийа ахьрийе, созе Йаһоԝа кӧ мьрьне һʹәта-һʹәтайе бьдә һьлдане, ԝе чаԝа бе сери?

¹⁴ Иса Мәсиһ ньһа сәр әʹзмана сәрԝертийе дькә, у әԝе һʹәму созед Йаһоԝа бинә сери (2 Корьнтʹи 1:20). Жь сала 1914, Иса дьжмьнед хԝә дькә  бьн пʹийе хԝә (Зәбур 110:1, 2). Дәмәкә незикда, Иса у һәмпʹадшед ԝи ԝе һʹәму кәсед хьраб ԛьрʹ кьн (Әʹйанти 6:2).

¹⁵ Ԝәʹде Сәрԝертийа Һʹәзарсали, кәсед мьри ԝе бенә рʹакьрьне, у мәрьвед гӧһдар ԝе бьгьһижьнә беԛьсуртийе. Паши щерʹьбандьна пашьн, мәрьвед кӧ Йаһоԝа ԝана ча кәсед рʹаст һʹәсаб дькә, ԝе «ль әʹрде ԝар бьн у һәр-һәйе ԝе сәр бьжин» (Зәбур 37:10, 11, 29). У мьрьн, демәк «дьжмьне хьлазийе» ԝе кʹокева бе рʹакьрьне (1 Корьнтʹи 15:26).

16. Гәрәке әм һәри зедә бона чь Йаһоԝарʹа хьзмәт бькьн?

¹⁶ Ча мә дит, һевийа жийина һәр-һәйи һевикә сахләм ә, чьмки һʹиме ве һевийе, Хәбәра Хԝәде йә. Бь сайа ве һевийе, әм дькарьн ль һьмбәри тәнгасийед ван рʹожед ахьрийе Йаһоԝарʹа амьн бьминьн. Һәмьки, сәва кӧ Йаһоԝа жь мә рʹази бә, бәс нинә, кӧ әм тʹәне жь бо жийина һәр-һәйи амьн бьминьн. Йа һәри фәрз әв ә, кӧ әм Йаһоԝа у Иса Мәсиһирʹа амьн бьминьн, чьмки әм ԝана гәләк һʹьз дькьн (2 Корьнтʹи 5:14, 15). Ләма жи, әм дьхԝазьн чʹәʹв бьдьнә ԝан у кәсед дьнрʹа дәрһәԛа һевийа хԝә гьли кьн (Рʹомайи 10:13-15). Һәрге әм хԝәһʹьз нибьн, ле дәствәкьри бьн, Йаһоԝа ԝе мә һʹәта-һʹәтайе ча достед хԝә ԛәбул бькә (Ибрани 13:16).

17. Һәр кәс жь мә гәрәке чь бькә? (Мәтта 7:13, 14)

¹⁷ Гәло әме жийина һәр-һәйи бьстиньн? Йаһоԝа әве мәщале дьдә мә. Гәрәке әм рʹийа жийине бьжберьн у сәр ве рʹе бьминьн (Мәтта 7:13, 14 бьхунә). Гәло жийина һәр-һәйи ԝе чаԝа бә? Готара дьнда, әме щаба ве пьрсе бьстиньн.