1. «Әʹдьлайийа Хԝәде» чь йә у әԝ чьма бона мә керһати йә? (Филипи 4:6, 7)

 ӘʹДЬЛАЙИКӘ ӧса һәйә кӧ мәрьвед ве дьнйайе һаш пе тʹӧнә нә. Әв әʹдьлайи, «әʹдьлайийа Хԝәде» йә. Баве мәйи әʹзмана ве әʹдьлайе дьдә достед хԝә. Чахе Хԝәде әʹдьлайа хԝә дьдә мә, дьле мә рʹьһʹәт дьбә (Филипи 4:6, 7 бьхунә). Бь сайа ве әʹдьлайе, әм бунә достед ԝан мәрьва, йед кӧ Хԝәде һʹьз дькьн. Ӧса жи, мә достийа незик тʹәви «Хԝәдейе кӧ әʹдьлайийе дьдә» ԛазанщ кьрийә (1 Тʹесалоники 5:23). Чахе әм Баве хԝә Йаһоԝа дьһа баш нас бькьн, баԝәрийа хԝә ԝи биньн у гӧһ бьдьне, бешьк әʹдьлайа ԝи ԝе ԝәʹде тәнгасийа дьле мә рʹьһʹәт бькә.

2. Әм чьрʹа баԝәр ьн кӧ әм дькарьн «әʹдьлайийа Хԝәде» дәст хьн?

² Гава тьштед хьраб, мәсәлә нәхԝәшийед кӧ бәла дьбьн, тʹәшԛәлед тʹәбйәте, тʹәвльһәвбуна ԝәлатда зедә дьбьн, йан жи әм рʹасти пәйкʹәтьна тен, гәло бь рʹасти дьбә кӧ әм «әʹдьлайийа Хԝәде» бьстиньн, у дьле мә рʹьһʹәт бьминә? Тьштед ӧса дькарьн тьрс у хофе бькьн дьле мә. Ле Иса ширәтәкә ӧса да шагьртед хԝә: «Бьра дьле ԝә нәԛьлԛьлә у нәтьрсьн!» (Йуһʹәнна 14:27). Ча баш ә кӧ хушк-бьред мә гӧһ дьдьн ве ширәте. Бь аликʹарийа Йаһоԝа, әԝана ԝәʹде тәнгасийед гьранда жи дьлрʹьһʹәт дьминьн.

3. Нәхԝәшийед кӧ бәла дьбьн чаԝа дькарьн дьлрʹьһʹәтийе жь мә бьстиньн?

³ Нәхԝәшийед кӧ щики йан сәр тʹәмамийа дьнйайе бәла дьбьн дькарьн жийина мә бь тʹәмами сәробьни кьн. Мәсәлә, нәхԝәшийа коронавирусе, сәр гәләк мәрьва пʹьрʹ хьраб һʹӧкӧм кьрийә. Чахе жь мәрьва пьрсин кӧ нәхԝәшийа коронавирусе сәр ԝан чаԝа һʹӧкӧм кьрийә, жь ԝан ниве зәʹф готьн, кӧ ԝәʹде пандәмийе хәԝ нәдькʹәтә чʹәʹве ԝан.  Жь бо ве йәке, һәжмара мәрьва кӧ хәма дькʹьшиньн, кʹәтьнә депресийайе, ичʹкә у наркотикева һатьнә гьредане, гәләк зедә буйә. Ӧса жи, малбәтада зордари зедә буйә, у гәләк мәрьва дьхԝәст хԝә бькӧжьн. Һәрге ль щийе кӧ тӧ дьмини нәхԝәшикә ӧса зу бәла бьбә, гәло чь дькарә али тә бькә, ԝәки тӧ жь бо хәм у дәрда бь зедәйи дьлтәнг нәби у жь Хԝәде әʹдьлайе бьстини?

4. Готьнед Иса дәрһәԛа рʹожед ахьрийе чаԝа дькарьн дьле мә рʹьһʹәт бькьн?

⁴ Иса пешда готьбу кӧ рʹожед ахьрийеда гәләк щийа нәхԝәши ԝе бәла бьн (Луԛа 21:11). Гәло занәбуна ве йәке чаԝа әʹдьлайе дькә дьле мә? Чахе нәхԝәши бәла дьбьн, әм әʹщебмайи наминьн. Әм жь ван ԛәԝьмандьна, кӧ дьнеда дьԛәԝьмьн, фәʹм дькьн, кӧ готьнед Иса йәк пәй йәке тенә сери. Ләма жи, әм гӧһ дьдьн ве ширәта кӧ Иса дайә мә: «Һаш жь хԝә һәбьн кӧ һун хԝә ӧнда нәкьн» (Мәтта 24:6).

5. (а) Ль гора Филипи 4:8, 9, гава нәхԝәши бәла дьбьн, гәло әм дькарьн бона чь дӧа бькьн? (б) Тӧ чаԝа дькари жь аудио ньвисандьна Кʹьтеба Пироз кʹаре бьстини?

⁵ Нәхԝәшикә кӧ бәла дьбә дькарә мә гәләк дьлтәнг кә у тьрс-хофе бькә дьле мә. Әв йәк һатә сәре хушкәкә мә, йа кӧ әм бежьн наве ԝе Моника йә. b Паши кӧ апе ԝе, пьсмаме ԝе у дохдьре ԝе жь нәхԝәшийа коронавирусе мьрьн, әԝ дьтьрсийа кӧ әԝе жи нәхԝәш кʹәвә у ве нәхԝәшийе дәрбази дийа хԝәйә әʹмьрда мәзьн кә. Әԝ дьфькьри кӧ әԝе рʹуйе ве пандәмийеда хәбата хԝә жи ӧнда кә. Ләма жи әԝ бәрхԝә дькʹәт һәла әԝе бькарьбә әʹбура хԝә бькә у пʹәре кʹьре бьдә, йан на. Жь бо ван хәм у дәрда, һʹьше ԝе нә рʹьһʹәт бу у хәԝ нәдькʹәтә чʹәʹве ԝе. Ле ԝәхт шунда, дьле Моникайе диса рʹьһʹәт бу. Гәло чаԝа? Әԝе Йаһоԝарʹа дӧа кьр, дьле хԝә ԝирʹа вәкьр у жь ԝи хԝәст кӧ рʹьһʹәтийе бькә дьле ԝе, ԝәки әԝ бькарьбә сәр тьштед баш бьфькьрә (Филипи 4:8, 9 бьхунә). Әԝе гӧһ дьда «дәнге» Йаһоԝа бь сайа аудио ньвисандьна Кʹьтеба Пироз. Әԝ дьбежә: «Әв дәнге хԝәш дьле мьн рʹьһʹәт дькьр у дьани бира мьн, кӧ Йаһоԝа гәләки бона мьн хәм дькә» (Зәбур 94:19).

6. Леколина шәхси у щьвинед мә чаԝа дькарьн тәрʹа бьбьн аликʹар?

⁶ Нәхԝәшийед бәлабуйи дькарьн жийина мәйә һәррʹожи тʹәвльһәв кьн. Ле гәрәке әв йәк нәбә мәʹни, ԝәки әм леколина хԝәйә шәхси у щьватед хԝә бәрʹдьн. Һәрге тӧ сәрһатийед хушк-бьред мә, әʹдәбйәт у видеойед мәда бьньһерʹи, тӧйе бьвини, кӧ әԝана чаԝа һьмбәри кӧл-дәрдед хԝә бь амьни Йаһоԝарʹа хьзмәт дькьн (1 Пәтрус 5:9). Щьвинед мә ԝе али тә бькьн, сәр тьштед баш бьфькьри у жь Кʹьтеба Пироз дьлбинийе бьстини. Һьм жи щьватеда тӧ дькари дьле кәсед дьн  ԛәԝи ки, у әԝана жи дькарьн дьле тә ԛәԝи кьн (Рʹомайи 1:11, 12). Бинә бәр чʹәʹве хԝә, кӧ Йаһоԝа чаԝа али хьзмәткʹаред хԝә дькә, мәсәлә гава әԝана нәхԝәш дькʹәвьн, гава тьрс у хоф дькʹәвә дьле ԝан, йан гава әԝана дәрде тʹәнебуне дькʹьшиньн. Һәрге тӧ сәр мәсәла ԝан бьфькьри, баԝәрийа тә ԝе дьһа ԛәԝи бә, у тӧйе жь дьл баԝәр би, кӧ Йаһоԝа пьштгьрийа тә дькә.

7. Тӧ дькари жь Йуһʹәннайе шанди чь һин би?

⁷ Тʹьме һʹале хушк-бьра бьпьрсә. Жь бо нәхԝәшийед бәлабуйи дьԛәԝьмә лазьм ә, ԝәки әм бона хԝәйкьрьна сьһʹәта-ԛәԝата хԝә у йа кәсед дьн, жь хәлԛе дур бьсәкьньн, у һәла һе жь хушк-бьра жи. Дәрәщед ӧсада, дьбәкә һʹале тә мина һʹале Йуһʹәннайе шанди бә. Әԝи гәләк дьхԝәст досте хԝә Гайос рʹу бь рʹу бьдита (3 Йуһʹәнна 13, 14). Ле Йуһʹәнна фәʹм дькьр, кӧ ԝәхтәке, әԝ нькарә досте хԝә Гайос бьвинә. Диса жи, Йуһʹәнна чь жь дәсте ԝи дьһат дькьр, кӧ хԝә бьгьһинә досте хԝә, у жерʹа нәʹмәк ньвиси. Һәрге тӧ нькарьби һәрʹи мала хушк-бьра, дьбәкә тӧ дькари бь сайа тʹел йан Интернете тʹәви ԝан текли би. Гава тӧ тʹәви хушк-бьра хәбәр ди, дьле тә ԝе дьһа рʹьһʹәт бә. Һәрге дәрде тә гәләк гьран бә, дьле хԝә рʹуспийарʹа вәкә у изьне бьдә, ԝәки әԝана тә һелан кьн (Ишайа 32:1, 2).

8. Тʹәшԛәләк чаԝа дькарә дьлрʹьһʹәтийе жь мә бьстинә?

⁸ Гава тʹәшԛәлед ӧса дьԛәԝьмьн ча лейи, әʹрдһʹәж йан жи агьр мешәйа дькʹәвә, тьрс у хофәкә мәзьн дькарә ԝәхтәкә дьреж дьле тәда бьминә. Һәрге рʹуйе ве йәкеда мәрьвәки тә әʹмьре хԝә ӧнда кьрийә, йан тʹәмамийа мал у мьлкʹе тә жь дәсте тә чуйә, һьнге дьбәкә дьле тә бешә, тӧ хԝә бечʹарә тʹәхмин ки у һәла һе һерс кʹәви жи. Ле әв найе һʹәсабе кӧ дьле тә тʹәне ль сәр мал у мьлкʹ ә, йан жи баԝәрийа тә кем ә. Гава мәрьв дькʹәвә тәнгасийе, нормал ә, кӧ әԝ әʹщьз бә (Ибо 1:11). Ле ван дәрәщед гьранда жи тӧ дькари дьлрʹьһʹәтийе бьвини. Гәло чаԝа?

9. Иса әм чаԝа бона тʹәшԛәла һазьр кьрьнә?

⁹ Гәләк мәрьв дьфькьрьн кӧ һәрема ԝанда тʹӧ тʹәшԛәләкә тʹәбийәте ԝе нәԛәԝьмә. Ле һәла готьнед Иса бинә бира хԝә. Әм жь готьнед ԝи заньн кӧ тʹәшԛәлед хьраб ԝе зедә бьн у әԝ дькарьн бенә сәре мә жи. Иса шагьртед хԝәрʹа готьбу, пешийа кӧ хьлази бе, «әʹрдһʹәжед мәзьн» у тʹәшԛәлед дьн жи ԝе бьԛәԝьмьн (Луԛа 21:11). Ӧса жи, әԝи пешда бәʹса «зедәбуна нәһәԛийе» кьрьбу. Мәсәлә, әм иро дьвиньн кӧ зӧлм, зордари у тероризм дьԛәԝьмьн (Мәтта 24:12). Иса ԛә нәготьбу, кӧ әв бәла ԝе тʹәне бенә сәре кәсед кӧ Йаһоԝа Хԝәде инкʹар дькьн. Чаԝа әм заньн, гәләк хьзмәткʹаред Йаһоԝа жи рʹуйе ван тʹәшԛәлада зьрар стандьнә (Ишайа 57:1; 2 Корьнтʹи 11:25). Дьбәкә Йаһоԝа мә бь кʹәрәмәти жь һʹәму тʹәшԛәла хԝәй нәкә, ле әԝ ԝе бона һʹәԝщед мә хәм бькә, ԝәки әм бина хԝә фьрә кьн у дьлрʹьһʹәтийе ӧнда нәкьн.

10. Чахе әм ньһада хԝә бона тʹәшԛәләке һазьр дькьн, әв йәк чаԝа нишан дькә, кӧ әм баԝәрийа хԝә Йаһоԝа тиньн? (Мәтʹәлок 22:3)

¹⁰ Һәрге әм ньһада хԝә һазьр кьн, ԝе мәрʹа дьһа һеса бә, ԝәки һʹаләки чәтьнда дьлрʹьһʹәт бьминьн. Гәло әв һазьрбун те һʹәсабе, кӧ баԝәрийа мә һьндава Йаһоԝа кем ә? Һәмьки на. Бь рʹасти гава әм хԝә һазьр дькьн, әм баԝәрийа хԝә нишан дькьн, кӧ Йаһоԝа бь рʹасти дькарә али мә бькә. Хәбәра Хԝәде ширәте дьдә мә, ԝәки әм хԝә бона тʹәшԛәлед тʹәбийәте һазьр кьн (Мәтʹәлок 22:3 бьхунә). У тʹәшкиләта Хԝәде бь сайа журнал, щьвин у әʹламәтийа гәләк щара дьле мә ԛәԝи кьрийә, кӧ әм  хԝә бона дәрәщед хоф һазьр кьн. c Бәле, чьмки әм Йаһоԝа баԝәр дькьн, әм ньһада, пешийа кӧ тʹәшԛәләк бе сәре мә, ль гора ве ширәта Кʹьтеба Пироз дьжин.

11. Әм жь мәсәла хушка мә Маргарет чь һин дьбьн?

¹¹ Ԝәрә бьньһерʹьн чь һатә сәре хушка мә Маргарет. Гава кӧ агьрәки мәзьн һәрема ԝе кʹәт, дәԝләте жерʹа гот ԝәки әԝ жь мала хԝә бьрʹәвә. Гәләк кәс жь малед хԝә дьрʹәвийан, ләма сәр рʹе гәләк әʹрәбә һәбун, у рʹе-дьрб һатә дадане. Һәр дәра думанәкә рʹәш бәла бьбу, у Маргарет ԝәхтәке жь әʹрәба хԝә нькарьбу дәркʹәта. Ле чәнтʹе ԝеда хәритә һәбу, әԝе әԝ дәрхьст у хԝәрʹа рʹекә дьн дит. Әԝе һәла һе әв рʹе пешда щерʹьбандьбу, кӧ гава тьштәки хоф бьԛәԝьмә, әԝ бькарьбә ве рʹе зу бьвинә. Бь сайа ве йәке, кӧ әԝе хԝә пешда һазьр кьрьбу, әԝе әʹмьре хԝә хьлаз кьр.

12. Әм чьма гӧһ дьдьн рʹебәрийа кӧ бона сах-сьламәтийа мә те дайине?

¹² Бона сах-сьламәтийа мә у йа мәрьвед дьн, дьбәкә дәԝләт дәркʹәтьна дәрва сәр ԝәхтәке ԛәдәхә бькә, йан бежә кӧ гәрәке әм мала хԝә бьһельн бьрʹәвьн, йан жи рʹебәрикә дьн бьдә мә. Һьнәк кәс гӧһ надьн ван рʹебәрийа, чьмки нахԝазьн мал у мьлкʹе хԝә бьһельн у бьрʹәвьн. Ле гәло дәрәщед ӧсада хьзмәткʹаред Хԝәде чь дькьн? Кʹьтеба Пироз мәрʹа дьбежә: «Гӧрʹа һәр сәрԝерийед мәрьвайеда бьн, бона хатьре Хӧдан, гӧрʹа пʹадшеда бьн, чаԝа сәрԝере һәри бьльнд, ӧса жи гӧрʹа ԝәлийада бьн, кӧ жь алийе пʹадшеда шанди нә» (1 Пәтрус 2:13, 14). Тʹәшкиләта Хԝәде жи бона сах-сьламәтийа мә рʹебәрийе дьдә мә. Мәрʹа ида гәләк щар һатийә готьне, кӧ гәрәке әм адрес у һәжмара тʹела хԝә бьдьн рʹуспийед щьвате, ԝәки әԝана дәрәщед чәтьнда бькарьбьн тʹәви мә текли бьн. Гәло тә ида әв йәк кьрийә? Дьԛәԝьмә мәрʹа рʹебәри бе дайине, кӧ әм чаԝа дькарьн хԝә бьпарезьн, кʹӧда бьрʹәвьн у жь кʹидәре аликʹарийе бьстиньн. Йан жи, дьбәкә мәрʹа бе готьне, кӧ әм чаԝа у кʹәнге дькарьн аликʹарийе бьдьн кәсед дьн. Һәрге әм гӧһ нәдьн ван рʹебәрийа, әм дькарьн жийина хԝә у жийина рʹуспийа жи бькьнә ԛәзийе. Бир нәкьн кӧ әв меред амьн мьԛати мә дьбьн у бона мә хәм дькьн (Ибрани 13:17). Маргарет ӧса дьбежә: «Әз жь сәд сәләфи баԝәр ьм, кӧ рʹебәрийа рʹуспийа у тʹәшкиләте әз жь мьрьне хьлаз кьрьмә».

13. Гәләк хьзмәткʹаред Хԝәде, йед кӧ бунә кʹочʹбәр, чаԝа дьлрʹьһʹәти у шабуна хԝә ӧнда нәкьрьнә?

 ¹³ Гәләк хушк-бьред мә жь бо шәрʹ, тʹәшԛәлед тʹәбийәте йан тʹәвльһәвбуна ԝәлатда, бунә кʹочʹбәр. Әԝана һәр тьшти дькьн, ԝәки һини һʹале хԝәйи тʹәзә бьн у бәрдәԝам дькьн шьхӧлед рʹӧһʹанива мьжул бьн. Мина Мәсиһийед ԛьрʹна йәке, йед кӧ жь бо пәйкʹәтьна бьбунә кʹочʹбәр, әԝана жи һәр дәра «Мьзгинийа хәбәре» бәла дькьн (Кʹаред Шандийа 8:4). Бәлакьрьна хәбәра хере али ԝан дькә, кӧ бәри һәр тьшти дина хԝә бьдьн Пʹадшатийа Хԝәде, нә кӧ чәтьнайед хԝә. Ләма жи әԝана дьлрʹьһʹәти у шабуна хԝә ӧнда накьн.

14. Чаԝа пәйкʹәтьн дькарә дьлрʹьһʹәтийе жь мә бьстинә?

¹⁴ Ԝәʹде пәйкʹәтьна, әм дькарьн гәләк тьштед кӧ дьлрʹьһʹәтийе дьдьн мә, ӧнда кьн. Чахе әм аза тʹәви һәв тʹоп дьбьн, мьзгинийе бәла дькьн у натьрсьн кӧ әме бькʹәвьн кәле, әм шабуне у дьлрʹьһʹәтийе дьстиньн. Ле һәрге әм нькарьбьн ван тьшта аза бькьн, тьрс у хоф дькарә бькʹәвә дьле мә, кӧ ахьрийеда чь ԝе бьԛәԝьмә. Фькьр у һәстед ӧса нормал ьн. Ле гәрәке әм һаш жь хԝә һәбьн, чьмки Иса пешда готьбу кӧ шагьртед ԝи дькарьн ԝәʹде зерандьна бьлькʹӧмьн (Йуһʹәнна 16:1, 2). Сәва кӧ әм ԝәʹде зерандьна дьлрʹьһʹәтийа хԝә ӧнда нәкьн, гәрәке әм чь бькьн?

15. Чьма нә лазьм ә кӧ әм зерандьна бьтьрсьн? (Йуһʹәнна 15:20; 16:33).

¹⁵ Хәбәра Хԝәде ӧса дьбежә: «Һәр кәсе кӧ дьхԝазә йәктийа Мәсиһ Исада бь хԝәденаси бьжи ԝе бе зерандьне» (2 Тимотʹейо 3:12). Гава ԝәлатәкида, шьхӧле мә һатә ԛәдәхәкьрьне, бьраки бь наве Андрей баԝәр нәдькьр, кӧ ԝе пәй һʹәму хушк-бьра кʹәвьн. Әԝи хԝәрʹа ӧса дьгот: «Ԝәлате мәда Шәʹдед Йаһоԝа гәләк ьн. Дәԝләт ча дькарә мә һʹәмуйа бавежә кәле?» Ле фькьред ӧса, дьлрʹьһʹәти жь ԝи дьстандьн. Алийе дьнва жи, хушк-бьред дьн хԝә дьспартьнә Йаһоԝа, у нәдьфькьрин кӧ әԝана ԝе ԛә нәкʹәвьнә кәле. Ԝана заньбу кӧ рʹожәке, дьԛәԝьмә әԝана бькʹәвьн кәле, ле ԝана мина Андрей гәләк хәм нәдькьр. Ләма жи әԝи сафи кьр, ԝәки мина ван хушк-бьра бьфькьрә у хԝә бь тʹәмами бьсперә Хԝәде. Гәләк ԝәхт дәрбаз нәбу кӧ дьле ԝи рʹьһʹәт бу. У ньһа чьԛас проблемед ԝи һәбьн жи, әԝ шабуна хԝә ӧнда накә. Һʹале мә жи дькарә ӧса бә. Рʹаст ә әм дькарьн рʹасти  зерандьна бен, ле чаԝа Иса готьбу, әм дькарьн амьн бьминьн (Йуһʹәнна 15:20; 16:33 бьхунә).

16. Гәрәке әм ԝәʹде зерандьна гӧһ бьдьн кʹижан рʹебәрийе?

¹⁶ Гава шьхӧле мә бь тʹәмами йан һьнә алийада те ԛәдәхәкьрьне, дьбәкә әм жь Бәйтʹәле йан жь рʹуспийа рʹебәрийе бьстиньн. Нета ве рʹебәрийе әԝ ә, кӧ әм бенә хԝәйкьрьне, хԝарьна рʹӧһʹани бәрдәԝам кьн бьстиньн у һʹәта кӧ мәщал һәйә мьзгинийе бәла кьн. Һәрге әм мәʹнийа рʹебәрийе рʹьнд фәʹм нәкьн жи, әм бь дьл у щан дьхԝазьн ль гора ԝе бьмәшьн (Аԛуб 3:17). Ӧса жи, гәрәке әм тʹӧ щар информасийа дәрһәԛа хушк-бьра йан шьхӧлед щьвате, ԝан мәрьварʹа әшкәрә нәкьн, изьна кʹе тʹӧнә ве йәке бьзаньбә (Ԝаиз 3:7).

17. Мина шандийа әм дьхԝазьн бь дьл у щан чь бькьн?

¹⁷ Мәʹникә сәрәкә кӧ Мире-щьна чьрʹа һьмбәри хьзмәткʹаред Хԝәде шәрʹ дькә әԝ ә, кӧ әԝана дәрһәԛа Иса шәʹдәтийе дьдьн (Әʹйанти 12:17). Изьне нәдә кӧ Мире-щьна у дьнйа ԝи тә бьтьрсиньн. Гава әм һьмбәри мьԛабьлибуне мьзгинийе бәла дькьн у мәрьва һин дькьн, дьле мә рʹьһʹәт ә у әм ша дьбьн. Ԛьрʹна йәкеда, гава шандийарʹа һатә ԛәдәхәкьрьне ԝәки мьзгинийе бәла кьн, ԝана сафи кьр кӧ бәри пешьн гӧһ бьдьн Хԝәде. Ԝана бәлакьрьна мьзгинийе нәда сәкьнандьне, у жь ве йәке шабунәкә мәзьн дьстандьн (Кʹаред Шандийа 5:27-29, 41, 42). Һәмьки, һәрге шьхӧле мә бе ԛәдәхәкьрьне, гәрәке әм ԝәʹде бәлакьрьна мьзгинийе фәсал бьн (Мәтта 10:16). Ле һәрге әм чь жь дәсте мә те бькьн, кӧ хәбәра хере бәла кьн, Йаһоԝа ԝе жь мә рʹази бә у дьле мә ԝе рʹьһʹәт бә.

18. Әʹдьлайи у дьлрʹьһʹәтийа кӧ мәрʹа лазьм ә жь кʹӧ те?

¹⁸ Баԝәр бә кӧ ԝәʹде һәри гьранда жи, әм дькарьн дьлрʹьһʹәт бьн. Ԝәхтед ӧсада, гәрәке әм бир нәкьн ԝәки әм һʹәԝще әʹдьлайа Хԝәде нә, әʹдьлайи у дьлрʹьһʹәтийа кӧ тʹәне Йаһоԝа дькарә бьдә мә. Ләма жи чахе нәхԝәши бәла дьбьн, тʹәшԛәлед тʹәбийәте дьԛәԝьмьн йан жи зерандьн дәстпедьбьн, хԝә бьсперә Йаһоԝа, у ль гора рʹебәрийа тʹәшкиләта ԝи бьмәшә. Бинә бәр чʹәʹве хԝә кӧ рʹожед хԝәш һивийа тә нә. Кʹьтеба Пироз ӧса соз дьдә: «Хԝәдейе әʹдьлайийе ԝе тʹәви ԝә бә» (Филипи 4:9). Готара дьнда, әме бьвиньн, кӧ әм чаԝа дькарьн али ԝан хушк-бьра бькьн, йед кӧ кʹәтьнә тәнгасийа, кӧ әԝана бькарьбьн «әʹдьлайийа Хԝәде» бьстиньн.