1. Дьбәкә әм жь хԝә чь дьпьрсьн?

ГАВА тӧ ԛьрʹкьрьна религийа ԛәлп, һʹьщума Гоге жь Магоге у шәрʹе Һармәгәдоне тини бәр чʹәʹве хԝә, гәло тьрс дькʹәвә дьле тә? Тә әв пьрс ԛә дайә хԝә: «Гава тәнгасийа мәзьн дәстпебә, гәло әзе бькарьбьм амьн бьминьм?» Һәгәр тӧ щарна ӧса дьфькьри, готьнед Иса Мәсиһ, йед кӧ рʹеза сәрәкәда һәнә, ԝе али тә бькьн. Иса шагьртед хԝәрʹа ӧса готьбу: «Бьра дьле ԝә нәԛьлԛьлә. Хԝәде баԝәр бькьн» (Йуһʹәнна 14:1). Баԝәрикә ԛәԝи ԝе али мә бькә кӧ әм ахьрийе нәтьрсьн.

2. Әм ча дькарьн баԝәрийа хԝә дьһа ԛәԝи бькьн, у ве готареда әме дәрһәԛа чь шеԝьр кьн?

² Әв йәк кӧ әм нава щерʹьбандьнед иройин чаԝа хԝә дьдьнә кʹьфше, әʹйан дькә һәла гәрәке әм кʹижан алийава баԝәрийа хԝә дьһа ԛәԝи кьн. Һәр щар гава әм нава щерʹьбандьнада амьн дьминьн, баԝәрийа мә һе ԛәԝи дьбә. Әв йәк дькарә али мә бькә ԝәʹде щерʹьбандьнед ахьрийеда жи амьн бьминьн. Ве готареда әме дина хԝә бьдьн кӧ шагьртед Иса рʹасти кʹижан чар тәнгасийа дьһатьн, йед кӧ баԝәрийа ԝан дьщерʹьбандьн. Әме бьвиньн кӧ иро әм жи дькарьн рʹасти чәтьнайед ӧса бен у әв чәтьнайи ча дькарьн мә бона ахьрийе һазьр кьн.

3. Хәбәред Иса жь Мәтта 6:30, 33, чь мә һин дькьн?

³ Фәʹмдари йә сәре малбәте дьхԝазә һәр тьшти бькә ԝәки әʹбура нәфәред хԝә бькә. Ле ван рʹожед чәтьнда, әв йәк һеса нинә. Щарна, гава хушк йан бьра хәбата хԝә ӧнда дькьн, гәләк зор ә хԝәрʹа хәбатәкә тʹәзә бьвиньн. Щарна жи, әԝана нькарьн  хәбатәке ԛәбул кьн, чьмки бона Мәсиһийа әԝ хәбат щайиз нинә. Ләма, гәрәке әм ԛайим баԝәр бькьн кӧ Йаһоԝа ԝе чʹарәке бькә, ԝәки әм бькарьбьн әʹбура мала хԝә бькьн. Иса гот кӧ һәгәр әм жь һәр тьшти зедәтьр Пʹадшатийа Хԝәде бьгәрʹьн, Йаһоԝа ԝе бона һʹәԝщед мә хәм бькә (Мәтта 6:30, 33 бьхунә). Һәгәр әм сәд сәләфи баԝәр бьн кӧ Йаһоԝа ԝе мә тʹәне нәһелә, әме бькарьбьн дина хԝә бьдьн сәр тьште һәри фәрз, демәк сәр шьхӧле Пʹадшатийа Хԝәде. Чахе әм дәсте Йаһоԝа жийина хԝәда дьвиньн, әме дьһа незики ԝи бьн у баԝәрийа мә жи ԝе дьһа ԛәԝи бә.

4-5. Чь али малбәтәке кьр, гава ԝанрʹа чәтьн бу әʹбура хԝә бькьн?

⁴ Һәла бьньһерʹә кӧ малбәтәкә жь Венесуелайе дәсте Йаһоԝа чаԝа сәр хԝә дит. Бәре, әʹрде Мигел һәбу у әԝи тʹәви малбәта хԝә бь щоткʹарийе әʹбура хԝә дькьрьн. Паше, ԛачаха бь чʹәка әԝана шеландьн, әʹрде ԝан зәфти хԝә кьрьн у бәри ԝан дан. Мигел ӧса дьбежә: «Ньһа әм зәвикә бьчʹукда, кӧ йа мә нинә, щоткʹарийе дькьн у пе әʹбура хԝә дькьн. Һәр шәбәԛа әз Йаһоԝарʹа дӧа дькьм, ԝәки бона һʹәԝщед мәйә ԝе рʹоже хәм бькә». Жийин бона ԝан зәʹмәт ә, ле Мигел у малбәта ԝи баԝәрийа хԝә Йаһоԝа тиньн, кӧ әԝе бона һʹәԝщед ԝанә рʹоже хәм бькә, у әԝ тʹьме дьчьн хьзмәте у щьвина. Әԝана жь һәр тьшти зедәтьр Пʹадшатийа Хԝәде дьгәрʹьн, у Хԝәде ԝана бьрʹчи наһелә.

⁵ Рʹожед чәтьнда, Мигел у жьна ԝи Йорайе дина хԝә дьданә ве йәке кӧ Йаһоԝа чаԝа ԝана хԝәй дькьр. Щар-щара, Йаһоԝа бь сайа хушк-бьра али Мигел дькә. Мәсәлә, әԝана алийе материалида кʹомәке дьдьнә ԝи у ӧса жи бона ԝи хәбате дьгәрʹьн. Щарна Йаһоԝа бь сайа филиале кʹомәке дьдә ԝан. Йаһоԝа ԝана тʹӧ щара тʹәне наһелә. Бь сайа аликʹарийа Йаһоԝа, баԝәрийа малбәте дьһа ԛәԝи буйә. Ԛиза ԝанә мәзьн, Йоселин, сәр дәрәщәке кӧ Йаһоԝа али ԝан кьрьбу, ӧса дьбежә: «Мьн ԛәԝата дәсте Йаһоԝа пе чʹәʹве хԝә дит, у ве йәке гәләк дьле мьн гьрт. Әԝ досте мьн ә, у әз баԝәр ьм кӧ әԝе һәртʹьм али мьн бькә. Чәтьнайед мә, мә бона чәтьнайед дьһа гьран һазьр кьрьнә».

6. Гава тӧ алийе пʹәрада рʹасти чәтьнайа тейи, тӧ ча дькари баԝәрийа хԝә дьһа ԛәԝи ки?

⁶ Һьлбәт зор ә чахе чәтьнайед тә алийе пʹәрәда һәнә. Диса жи, тӧ дькари әве дәрәще бьди хәбате, ԝәки баԝәрийа хԝә дьһа ԛәԝи ки. Готьнед Иса жь Мәтта 6:25-34 бьхунә, сәр ван готьна кʹур бьфькьрә у дӧа бькә. Бьфькьрә сәр сәрһатийед хушк-бьред хьзмәтийеда хирәт, кӧ избат дькьн ԝәки Йаһоԝа бона ԝана хәм дькә (1 Корьнтʹи 15:58). Бь ви щурʹәйи, тӧйе дьһа баԝәр би ԝәки  Баве тәйи әʹзмани ԝе али тә жи бькә. Әԝ занә кӧ тӧ һʹәԝще чь йи, у әԝ дькарә тьштед лазьм бьдә тә. Чьԛас зедә тӧ дәсте Йаһоԝа бьвини, һаԛас баԝәрийа тә ԝе һе зедә ԛәԝи бә, у тӧйе һазьр би һьмбәри тәнгасийед дьһа мәзьн сәбьр ки (Һәбаԛуԛ 3:17, 18).

7. Ль гора Мәтта 8:23-26, «фьртонәкә мәзьн» чаԝа баԝәрийа шагьрта щерʹьбанд?

⁷ Гава Иса у шагьртед ԝи бәʹреда ԛәйькеда бун, «фьртонәкә мәзьн» рʹабу. Иса әв дәрәщә да хәбате, ԝәки әԝана баԝәрийа хԝә дьһа бьшьдиньн (Мәтта 8:23-26 бьхунә). Фьртонә чьԛас дьчу дьһа мәзьн дьбу у ԛәйьк бь аве тʹьжә дьбу, ле Иса кʹәтьбу хәԝәкә кʹур. Гава шандийа тьрса әԝ һʹьшйар кьрьн у же һиви кьрьн ԝәки ԝана хьлаз кә, Иса гот: «Чьма һун ӧса тьрсонәк ьн кембаԝәрно?» Шагьрта гәрәке фәʹм кьра кӧ Йаһоԝа дькарә Иса у һәвалед ԝи бьпарезә. Гәло әв чь дәрс ә бона мә? Гава жийина мәда «фьртонәкә мәзьн» рʹадьбә, баԝәрикә ԛайим дькарә али мә бькә кӧ әм сәбьр кьн.

8-9. Баԝәрийа Анеле чаԝа һатә щерʹьбандьн, у чь али ԝе кьр?

⁸ Һәла бьньһерʹә кӧ баԝәрийа хушкәкә азәп бь наве Анел, йа кӧ Порто Рикойеда дьжи, чаԝа ԝәʹде тәнгасийе дьһа ԛәԝи бу. Сала 2017-да, ԝедәре бь рʹасти жи «фьртонәкә мәзьн» йа бь наве «Мариа» рʹабу. Ве фьртоне мала ԝе һьлшанд, у сәрда жи әԝе хәбата хԝә ӧнда кьр. Анел дьбежә: «Ван чәтьнайада, әз гәләк бәрхԝә дькʹәтьм, ле әз һин бум бь сайа дӧа итʹбарийа хԝә Йаһоԝа биньм у нәһельм ԝәки тьрс дәсте мьн сьст бькә».

⁹ Анел дьбежә кӧ гӧһдарикьрьне жи али ԝе дькьр, ԝәки ԝәʹде тәнгасийе сәбьр бькә. Әԝ дьбежә: «Ве йәке кӧ мьн гӧһ дьда рʹебәрийа тʹәшкиләте, али мьн дькьр ԝәки әз рʹьһʹәт бьминьм. Йаһоԝа бь сайа хушк у бьра али мьн дькьр. Әԝана әз һелан дькьрьм у бона һʹәԝщед мьнә физики хәм дькьрьн. Йаһоԝа жь хԝәстьна мьн зедәтьр тьшт дьда мьн, у ве йәке баԝәрийа мьн һе ԛәԝи дькьр».

10. Һәгәр тӧ рʹасти «фьртонәкә мәзьн» бейи, тӧ дькари чь бьки?

¹⁰ Гәло жийина тәда жи «фьртонәкә мәзьн» рʹабуйә? Дьбәкә тӧ жь бо тʹәшԛәләкә тʹәбийәте кʹәти тәнгасийе. Йан жи, дьбәкә тӧ сәва нәхԝәшикә хԝәйә гьран дьлтәнг дьби у ньзани чь бьки. Һәгәр тӧ щарна бәрхԝә дькʹәви жи, нәһелә ԝәки хәмед тә баԝәрийа тә сьст кьн. Бь сайа дӧа незики Йаһоԝа бә. Сәва кӧ баԝәрийа тә һе ԛәԝи бә, бьфькьрә кӧ Йаһоԝа бәре ча али тә дькьр (Зәбур 77:11, 12). Баԝәр бә кӧ әԝ ԝе тʹӧ щар тә нәһелә, нә ньһа, нә жи ахьрийе!

11. Чьма фәрз ә кӧ әм гӧһ бьдьн рʹебәрийа кәсед щабдар?

 ¹¹ Диса чь дькарә али тә бькә һьмбәри тәнгасийа сәбьр ки? Ча Анеле гот, гӧһдарикьрьн гәләк фәрз ә. Йаһоԝа у Иса Мәсиһ итʹбарийа хԝә кʹе тиньн, тӧ жи ԝанда итʹбар бә. Щарна, дьбәкә рʹебәрийа кәсед щабдар нә логики бе кʹьфше. Һәгәр әм диса жи гӧрʹа ԝан бькьн, Йаһоԝа ԝе мә хәлат кә. Кʹьтеба Пироз у сәрһатийед кәсед амьн нишан дькьн, ԝәки гӧһдарикьрьн жийине дьпарезә (Дәркʹәтьн 14:1-4; 2 Дирок 20:17). Сәрһатийед ӧса бьхунә у кʹур сәр бьфькьрә. Әв йәк ԝе али тә бькә тʹьме гӧһ бьди рʹебәрийа тʹәшкиләте (Ибрани 13:17). Ӧса тӧйе фьртона дьһа мәзьн, йа кӧ ԝе дәмәкә незикда рʹабә, ида нәтьрси (Мәтʹәлок 3:25).

12. Ль гора Луԛа 18:1-8, баԝәри ча дькарә али мә бькә бәр нәһәԛийе сәбьр кьн?

¹² Иса заньбу, ԝәки шагьртед ԝи ԝе рʹасти нәһәԛийа бен, у әв йәк ԝе баԝәрийа ԝан бьщерʹьбинә. Сәва кӧ али ԝан бькә һьмбәри нәһәԛийа сәбьр бькьн, Иса бәʹса жьнәбике кьр, йа кӧ тʹьме дьһат бал һʹакьмәки нәһәԛ у ԝирʹа дьгот: «Һәԛийе бькә, мьн жь дәсте нәйаре мьн хьлаз кә». Жьнәби баԝәр бу кӧ һәгәр әԝ сәбьр кә, зу йан дәрәнг әԝе һәԛийе бьвинә. Ахьрийа-ахьрийе, һʹакьм ль гора рʹәща ԝе кьр. Жь ве мәсәле әм дькарьн чь дәрс һин бьн? Йаһоԝа мина ԝи һʹакьмәки нәһәԛ нинә. Ләма Иса гот: «Гәло Хԝәде жи бьжартийед хԝәрʹа ԝе һәԛийе нәкә, йед кӧ шәв у рʹож һәԝара хԝә ԝи датиньн?» (Луԛа 18:1-8 бьхунә) Паше, Иса гот: «Гава Кӧрʹе Инсан бе, гәло сәр дьне ԝе баԝәрийе бьбинә?» Гава әм рʹасти нәһәԛийе тен, гәрәке әм бь сәбьра хԝә нишан кьн, ԝәки баԝәрийа мә мина баԝәрийа ве жьнәбийе ԛәԝи йә. Һәгәр баԝәрийа мә ӧса бә, әме дӧдьли нәбьн ԝәки ԝәхте хԝәда Йаһоԝа ԝе али мә бькә. Хенщи ве йәке, гәрәке әм баԝәр бьн, ԝәки ԛәԝата дӧа гәләк мәзьн ә. Щарна, дьбәкә әм щаба дӧайед хԝә ӧса бьстиньн, кӧ әм нә жи һивийе бун.

13. Дӧа чаԝа али малбәтәке кьр?

¹³ Дина хԝә бьдьнә сәрһатийа хушка мә Веро, йа кӧ Кʹомара Конгойа Демократикда дьжи. Щарәке гава әскәра һʹьщуми сәр гӧнде ԝе кьр, лазьм бу әԝ тʹәви мере хԝә, йе кӧ Шәʹде Йаһоԝа нибу, у ԛиза хԝәйә 15 сали, бьрʹәвә. Рʹева, әскәра әԝ данә сәкьнандьн у дьхԝәстьн ԝана бькӧжьн. Веройе гьрийа, у ԛиза ԝе бь дәнге бьльнд дӧа кьр. Дӧада, әԝе чәнд щара наве Йаһоԝа һьлда. Һьнге сәроке әскәра же пьрси: «Кәчʹе, кʹе тӧ һин кьри дӧа бьки?» Әԝе гот: «Дийа мьн әз һин кьрьм ль гора дӧайе кӧ Мәтта 6:9-13-да ньвиси йә, дӧа бькьм». Сәрок гот: «Кәчʹе, тʹәви де у баве хԝә сьламәт һәрʹә, бьра Хԝәдайе ԝә Йаһоԝа ԝә бьпарезә!»

14. Чь дькарә баԝәрийа мә бьщерʹьбинә, у чь дькарә али мә бькә кӧ әм сәбьр кьн?

 ¹⁴ Сәрһатийед ӧса нишани мә дькьн, ԝәки ԛәԝата дӧа гәләк мәзьн ә. Ле һәгәр тӧ щаба дӧайе хԝә зу нәстини, йан һәгәр хԝәстьна тә бь щурʹәки мәхсус нәйе сери, гәрәке тӧ чь бьки? Мина жьнәбийа жь мәсәла Иса, бәрдәԝам кә дӧа бькә у баԝәр бә кӧ Хԝәде ԝе тʹӧ щар тә нәһелә. Баԝәр бә ԝәки әԝе ԝәхтда у бь щурʹе лапи баш щаба дӧайе тә бьдә. Бәрдәԝам кә жь Йаһоԝа рʹәща бькә, ԝәки рʹӧһʹе пироз бьдә тә (Филипи 4:13). Зутьрәке, Йаһоԝа ԝе кʹәрәмед һаԛас мәзьн сәр тә бьбаринә, кӧ тӧйе һʹәму кӧл у дәрдед бәре бир бьки. Чьԛас тӧ бь аликʹарийа Йаһоԝа нава тәнгасийада амьн бьмини, һаԛас тӧйе дьһа ԛәԝи би у бона тәнгасийед ахьрийе һазьр би (1 Пәтрус 1:6, 7).

15. Ль гора Мәтта 17:19, 20, шагьртед Иса рʹасти чь чәтьнайе һатьн?

¹⁵ Иса шагьртед хԝәрʹа готьбу кӧ бь сайа баԝәрийе, әԝана ԝе бькарьбьн сәри чәтьнайарʹа дәрхьн (Мәтта 17:19, 20 бьхунә). Щарәке, ԝана нькарьбу щьнәк жь мерәки дәрхьста. Пешда ԝана чәнд щара щьн дәрхьстьбун, ле ижар ԝана нькарьбу әв йәк бькьра. Гәло проблем чь бу? Иса ԝанрʹа гот ԝәки дьһа зедә баԝәри ԝанрʹа лазьм ә. Әԝи ԝанрʹа гот кӧ һәгәр баԝәрийа ԝан һәбә, әԝе бькарьбьн чәтьнайед кӧ ԛаси чʹийайәки мәзьн ьн жи, алт кьн. Дьԛәԝьмә әм жи щарна рʹасти тәнгасийед мәзьн тен, йед кӧ ԝәк чʹийайәки бьльнд тенә кʹьфше.

16. Баԝәри ча али хушкәкә мә кьр, ԝәки әԝ бәр дәрдәки гьран сәбьр бькә?

¹⁶ Дина хԝә бьдә сәрһатийа хушка мә Гейди, йа кӧ Гӧатәмалайе дьжи. Щарәке, гава әԝ тʹәви мере хԝә Еди жь щьвине вәдьгәрʹийа мале, мере ԝе һатә кӧштьн. Гәло баԝәрийа Гейдийе чаԝа али ԝе кьр, ԝәки бәр дәрдәки ӧса гьран сәбьр кә? Әԝ дьбежә: «Дӧа али мьн дькә баре хԝә бьдьмә дәсте Йаһоԝа, у әв йәк ԛәԝате дьдә мьн. Әз дьвиньм ча Йаһоԝа бь сайа мәрьвед мьн у хушк-бьра, мьн хԝәй дькә. Хьзмәта Йаһоԝа дәрде мьн сьвьк дькә у али мьн дькә кӧ әз бона рʹожа дьн бь зедәйи хәм нәкьм. Мьн ида фәʹм кьрийә кӧ чь жи бьбә, бь аликʹарийа Йаһоԝа, Иса у тʹәшкиләте әз дькарьм сәбьр кьм».

17. Гава әм рʹасти проблемед мәзьн тен, әм чь дькарьн бькьн?

¹⁷ Һәгәр тӧ сәва мьрьна мәрьвәки хԝәйи һʹьзкьри хәмгин и, ԝе баш бә ԝәки тӧ рʹезед Кʹьтеба Пироз йед дәрһәԛа рʹабуна мьрийа, бьхуни. Һәгәр тӧ хәмгин и, чьмки мәрьвәки тә жь щьвате һатийә дәрхьстьне, ԝе баш бә ԝәки  тӧ леколин бьки һәла щәзакьрьна жь Йаһоԝа чь кʹаре тинә. Проблема тә чь бә жи, сәр ве проблеме ча сәр мәщаләке бьньһерʹә, ԝәки баԝәрийа хԝә дьһа ԛәԝи бьки. Дьле хԝә Йаһоԝарʹа вәкә. Хԝә башԛә нәкә, ле хԝә незики хушк-бьра бьгьрә (Мәтʹәлок 18:1). Һәгәр диса жи дьле тә дьшәԝьтә у тәрʹа гәләк чәтьн ә, бәрдәԝам кә ван тьштава мьжул бә чь кӧ ԝе баԝәри у сәбьра тә ԛәԝи кьн (Зәбур 126:5, 6). Тʹьме Кʹьтеба Пироз бьхунә, хьзмәт у щьвина бәрнәдә, у дина хԝә бьдә кʹәрәмед кӧ һивийа тә нә. Чьԛас тӧ бьвини кӧ Йаһоԝа чаԝа али тә дькә, һаԛас баԝәрийа тә ԝе дьһа ԛәԝи бә.

18. Һәгәр тӧ тедәрдьхи ԝәки баԝәрийа тә һьнә алийава сьст ә, тӧ дькари чь бьки?

¹⁸ Һәгәр тәнгасийед ԝәйә бәре у йед ньһа дьдьнә кʹьфше, ԝәки баԝәрийа ԝә һьнә алийава сьст ә, дьлтәнг нәбьн, ле һәр тьшти бькьн ԝәки баԝәрийа хԝә дьһа ԛәԝи бькьн. Чаԝа шандийед Иса, һун жи ӧса жь Хԝәде лава кьн: «Баԝәрийа мә зедә кә» (Луԛа 17:5). Ӧса жи, бьфькьрьн дәрһәԛа сәрһатийед кӧ мә ве готареда шеԝьр кьр. Мина Мигел у жьна ԝи Йорайе, бинә бира хԝә кӧ бәре Йаһоԝа чаԝа али тә кьрьбу. Мина ԛиза Веройе у ӧса жи мина Анеле, бь дьл у щан дӧа бькә, илаһи гава тӧ рʹасти тәнгасикә мәзьн тейи. У мина Гейдийе баԝәр бә, ԝәки Йаһоԝа дькарә бь сайа мәрьв у һәвалед тә али тә бькә. Гава тӧ изне дьди, ԝәки ԝәʹде тәнгасийа Йаһоԝа али тә бькә, һьнге баԝәрийа тә ԝе дьһа ԛәԝи бьбә у тӧйе дӧдьли нәби кӧ һәгәр тӧ рʹожәке рʹасти тәнгасикә дьн бейи, әԝе али тә бькә сәбьр ки.

19. Иса чьда баԝәр бу, у тӧ жи дькари чьда баԝәр би?

¹⁹ Иса Мәсиһ шандийед хԝәрʹа дьгот ԝәки баԝәрийа ԝан кʹижан алийава сьст ә, ле әԝ баԝәр бу ԝәки бь аликʹарийа Йаһоԝа, әԝана ԝе бькарьбьн бәр щерʹьбандьнед ахьрийе амьн бьминьн (Йуһʹәнна 14:1; 16:33). Иса дӧдьли нәдьбу кӧ бь сайа баԝәрикә ԛәԝи, «әʹлаләтәкә мәзьн» ԝе ԝәʹде «тәнгасийа мәзьн» сах бьминә (Әʹйанти 7:9, 14). Бь сайа рʹәʹма Йаһоԝа, һәгәр тӧ һәр мәщала бьди хәбате, ԝәки баԝәрийа хԝә дьһа ԛәԝи бьки, тӧ жи дькари нав ԝанда би! (Ибрани 10:39)