1-2. (а) Чьма фәрз ә кӧ щотед тʹәзә зәԝьщи хԝә бьсперьн Йаһоԝа? (Зәбур 37:3, 4) (б) Ве готареда, әме чь шеԝьр кьн?

ДЬԚӘԜЬМӘ һуне дәмәкә незикда бьзәԝьщьн, йан һун тʹәзә зәԝьщи нә? Һәгәр ӧса йә, һун бешьк гәләк ша нә, ԝәки һуне жийина хԝә тʹәвай дәрбаз кьн. Диса жи, жийина кәсед зәԝьщи щарна һеса нинә, у лазьм ә кӧ һун һьнә сафикьрьнед фәрз бькьн. Әв йәк кӧ һуне чәтьнайа ча сафи бькьн у чь нета дайньн пешийа хԝә, ԝе гәләк сала сәр бәхтәԝарийа ԝә һʹӧкӧм бькә. Һәгәр һун хԝә бьсперьн Йаһоԝа, һуне сафикьрьнед баш бькьн, зәԝаща ԝә ԝе дьһа ԛәԝи бә у һуне дьһа бәхтәԝар бьн. Ле һәгәр һун ньһерʹандьна Хԝәде һьлнәдьн һʹәсаб, һуне рʹасти чәтьнайа бен у шабуна хԝә ӧнда кьн (Зәбур 37:3, 4 бьхунә).

² Ве готареда, әме дина хԝә бьдьнә сәрһатийед һьнә жьн-меред баԝәрмәнд, йед кӧ бәре дьжитьн. Әме бьвиньн ԝәки әм чь дәрса дькарьн жь сәрһатийед ԝан һин бьн. Ӧса жи, әме дина хԝә бьдьнә чәнд сәрһатийед жьн-меред иройин. Рʹаст ә әв готар бона кәсед тʹәзә зәԝьщи һатийә һазьркьрьне, ле диса жи һʹәму щотед зәԝьщи дькарьн жь ван ширәта кʹаре бьстиньн.

3-4. Һьнә щотед тʹәзә зәԝьщи рʹасти чь щурʹә чәтьнайа тен?

³ Һьнә кәс щотед зәԝьщирʹа дьбежьн, ԝәки әԝана мина гьшка бьжин. Мәсәлә, һьнә де-бав у мәрьвед дьн  кәсед тʹәзә зәԝьщи һелан дькьн кӧ зарʹа биньн. Щарна жи һьнә дост у һәвал ԝанрʹа дьбежьн, ԝәки әԝ хԝәрʹа маләке бькʹьрʹьн у мала хԝә пе тьштед бәдәԝ у бьһа тʹьжә бькьн.

⁴ Һәгәр йед тʹәзә зәԝьщи фәсал нибьн, әԝана дькарьн гәләк дәйн бькьнә стуйе хԝә. Паше, дьхԝази-нахԝази әԝана ԝе мәщбур бьн гәләк бьхәбьтьн, ԝәки дәйнед хԝә дадьн. Һьнге хәбата ԝан дькарә әв ԝәʹдә, кʹижан кӧ әԝана гәрәке сәр леколина шәхси, ԛӧльхкьрьна малбәте у хьзмәте хәрщ кьн, жь ԝан бьстинә. Сәрда жи, әԝана дьбәкә нькарьбьн һәрʹьн һʹәму щьвата, чьмки гәрәке зедә бьхәбьтьн сәва зедә пʹәрә ԛазанщ кьн, йан сәва кӧ хәбата хԝә ӧнда нәкьн. Ахьрийеда, әԝана ван мәщала жь дәсте хԝә бәрʹдьдьн, ԝәки хьзмәтеда һе зедә кʹар бькьн.

5. Сәрһатийа Мариса у Клаус чь мә һин дькә?

⁵ Гәләк щотед зәԝьщи дьбежьн ԝәки кʹәтьна пәй мал у мьлкʹ бәхтәԝарийе найнә. Дина хԝә бьдьн, кӧ жьн у мерәки бь наве Мариса у Клаус чь һин бунә. * Гава әԝ тʹәзә зәԝьщи бун, һәрдӧ жи сьбәһ һʹәта еваре дьхәбьтин, ԝәки һәбуке ԛазанщ кьн у бь жийинәкә рʹьһʹәт бьжин. Ле диса жи дьле ԝан нә рʹьһʹәт бу. Клаус дьбежә: «Мал у мьлкʹе мә гәләк бу, ле нетед мәйә рʹӧһʹани ԛәт тʹӧнә бун. Рʹаст бежьм, жийина мә тʹәвльһәв у чәтьн бу». Дьԛәԝьмә ԝә жи дина хԝә дайә, ԝәки кʹәтьна пәй мал у мьлкʹ бәхтәԝарийа ԝә зедә нәкьрийә. Ле дьлтәнг нәбьн! Ԝәрен әм чәнд мәсәлед баш йед кәсед дьн шеԝьр кьн, кӧ дькарьн али ԝә бькьн жийина хԝәда гӧһастьна бькьн. Пешийе, ԝәрен әм дина хԝә бьдьне һәла мер дькарьн жь сәрһатийа Йәһошәфат Пʹадша чь һин бьн.

6. Гава Йәһошәфат Пʹадша рʹасти проблемәкә мәзьн һат, әԝи ча гӧһ да ширәта жь Мәтʹәлок 3:5, 6?

⁶ Мерно, дьбәкә һун щарна нав щабдарийед хԝәда дьхәньԛьн. Һәгәр ӧса йә, дина хԝә бьдьн мәсәла Йәһошәфат Пʹадша. Әԝ бона һʹалхԝәшийа тʹәмамийа мьләте хԝә щабдар бу! Гәло әԝи ча сәри бь ве щабдарийа гьранрʹа дәрдьхьст? Йәһошәфат чь жь дәсте ԝи дьһат дькьр, ԝәки щьмәʹте хԝәй кә. Мәсәлә, әԝи дәр-дора бажаред Щьһудайе сур кьрьн, у әԝи зедәтьри 1 160 000 әскәр тʹоп кьрьн (2 Дирок 17:12-19). Щарәке, Йәһошәфат рʹасти проблемәкә мәзьн һат. Ордикә мәзьн йа дьжмьна һʹьщуми сәр ԝи, малбәта ԝи у щьмәʹта ԝи кьр (2 Дирок 20:1, 2). Гәло Йәһошәфат чь кьр? Ль гора ширәта жь Мәтʹәлок 3:5, 6 (бьхунә), әԝи итʹбарийа хԝә Йаһоԝа ани. Дӧайе ԝийә бь мьлукти, йа кӧ 2 Дирок  20:5-12-да һатийә ньвисандьн, нишан дькә ԝәки әԝ Баве хԝәйи әʹзманида чьԛас гӧман бу. Гәло Йаһоԝа ча щаба дӧайе Йәһошәфат да?

7. Йаһоԝа ча щаба дӧайе Йәһошәфат да?

⁷ Йаһоԝа бь сайа Леԝики бь наве Йаһазиел Йәһошәфатрʹа ӧса гот: «Рʹез гьре бьдьн у бьсәкьньн, . . . хьлазийа [жь] Хӧдан бьвиньн» (2 Дирок 20:13-17). Бь рʹасти тʹӧ кәс бь ви щурʹәйи начә шәрʹ! Ле әв рʹебәри нә кӧ жь мәрьвәки, ле жь Йаһоԝа бу. Ләма жи Йәһошәфат хԝә бь тʹәмами спартә Хԝәде у гӧһ да ԝи. Гава әԝ тʹәви щьмәтʹа хԝә бәрбь дьжмьна чун, әԝи нә кӧ әскәред һәри щерʹьбанди, ле странбежед бечʹәк дани рʹеза пешьн. Йаһоԝа созе хԝә ани сери у ордийа дьжмьна ԛьрʹ кьр (2 Дирок 20:18-23).

8. Мер дькарьн жь сәрһатийа Йәһошәфат чь һин бьн?

⁸ Мерно, һун дькарьн жь мәсәла Йәһошәфат дәрсед фәрз һин бьн. Һун бона хер у хԝәшийа малбәта хԝә щабдар ьн, ләма һун бь дьл у щан бона әʹбура малбәта хԝә дьхәбьтьн. Гава һун рʹасти чәтьнайа тен, дьбәкә һун дьфькьрьн ԝәки дькарьн хԝәха вана сафи кьн. Ле хԝә нәсперьн ԛәԝат у аԛьле хԝә. Щара башԛә Йаһоԝарʹа дӧа бькьн у жь ԝи аликʹарийе бьхԝазьн. Ӧса жи, тʹәви жьна хԝә жь дьл дӧа бькьн. Кʹьтеба Пирозда у әʹдәбйәтада рʹебәрийа Йаһоԝа бьгәрʹьн у гӧһ бьдьн ван ширәта. Дьбәкә һьнә кәс бьфькьрьн ԝәки сафикьрьнед кӧ һун ль гора рʹебәрийа Кьтеба Пироз дькьн, нә баш ьн, у һәла һе жи дьбәкә бежьн ԝәки һун тьштед беаԛьлайи дькьн. Әԝана дьԛәԝьмә бежьн ԝәки бона хԝәйкьрьна малбәте, пʹәрә тьште һәри фәрз ә. Ле сәрһатийа Йәһошәфат биньн бира хԝә. Бь готьн у кьред хԝә, әԝи хԝә дьспарт Йаһоԝа. Йаһоԝа әԝ мәрьве амьн нәһишт, у әԝе ԝә жи нәһелә (Зәбур 37:28; Ибрани 13:5). Гәло жьн у мер диса чь дькарьн бькьн, ԝәки зәԝаща хԝәда бәхтәԝар бьн?

9. Ишайа пʹехәмбәр у жьна ԝи чь дькьрьн?

⁹ Ишайа у жьна ԝи, жийина хԝәда һәри зедә дина хԝә дьданә хьзмәта Йаһоԝа. Ишайа пʹехәмбәр бу у жьна ԝи жи ча «пʹехәмбәр» дьһатә навкьрьне (Ишайа 8:1-4, ИМ). Те кʹьфше ԝәки Ишайа у жьна ԝи хьзмәта Йаһоԝа датанин сәр щийе пешьн. Бона жьн-мера әва мәсәләкә гәләк баш ә!

10. Леколина Кʹьтеба Пироз ча дькарә али щотед зәԝьщи бькә, ԝәки бь дьл у щан Йаһоԝарʹа хьзмәт бькьн?

¹⁰ Ԝе баш бә жьн-мер чь жь дәсте ԝан те бькьн, ԝәки жийина хԝәда хьзмәта Йаһоԝа дайньн сәр щийе пешьн. Гава әԝана Кʹьтеба Пироз тʹәвайи леколин дькьн у дьвиньн кӧ созед Йаһоԝа чаԝа тенә сери, * баԝәрийа ԝан һьндава Йаһоԝа у созед ԝи дьһа ԛәԝи дьбә (Тито 1:2). Ӧса жи әԝана дькарьн бьфькьрьн, һәла әԝана хԝәха ча дькарьн пьштгьрийа пекһатьна һьнә пʹехәмбәртийед Кʹьтеба Пироз бькьн. Мәсәлә, Иса пешда готьбу ԝәки пешийа хьлазийа ве дьнйайе, мьзгина Пʹадшатийе ԝе сәр тʹәмамийа дьнйайе бе  бәлакьрьне, у әԝана жи дькарьн пеканина ве пʹехәмбәртийеда кʹар бькьн (Мәтта 24:14). Чьԛас жьн у мер баԝәр дьбьн ԝәки готьнед Кʹьтеба Пироз һәртʹьм тенә сери, һаԛас хԝәстьна ԝан ԝе дьһа зедә бьбә, ԝәки бь дьл у щан Йаһоԝарʹа хьзмәт бькьн.

11. Прьскила у Әкила чь кьрьн, у чьрʹа?

¹¹ Йед тʹәзә зәԝьщи дькарьн жь жьн-мерәки бь наве Прьскила у Әкила, йед кӧ Рʹомеда дьжитьн, һьнә дәрса һин бьн. Ԝана мьзгина дәрһәԛа Иса бьһист у бунә шагьртед ԝи. Әԝана бешьк әʹмьре хԝә рʹази бун. Ле ньшкева, Ԛәйсәр Клаԝдйо фәрман да ԝәки һʹәму Щьһу жь Рʹоме дәркʹәвьн. Ләма, Прьскила у Әкила мала хԝә бар кьрьн у чунә бажаре Корьнтʹе. Ԝедәре лазьм бу әԝана һәр тьшти тʹәзәда дәстпекьн. Гәло һʹале ԝани тʹәзә бу сәбәб ԝәки әԝ Пʹадшатийа Хԝәде ида данәйньн щийе пешьн? На! Корьнтʹеда ԝана пьштгьрийа щьвате дькьр у тʹәви Паԝлос һелане дьда хушк у бьра. Паше, әԝана дәрбази бажаред дьн жи бун, ԝәки мьзгине бәла кьн (Кʹаред Шандийа 18:18-21; Рʹомайи 16:3-5). Жийина ԝан бешьк гәләк хԝәш бу, чьмки әԝана тʹәвайи шьхӧле Йаһоԝава мьжул дьбун!

12. Ԝе чьма баш бә ԝәки жьн-мер хԝәрʹа нетед рʹӧһʹани дайньн?

¹² Иро жи, щотед зәԝьщи дькарьн мина Прьскила у Әкила шьхӧле Пʹадшатийе дайньн щийе пешьн. Ԝе баш бә ԝәки әԝана пешийа зәԝаще, гава һәвдӧ нас дькьн, дәрһәԛа нетед хԝә хәбәр дьн. Һәгәр жьн у мер тʹәвайи сафикьрьна бькьн у хирәт бькьн ԝәки бьгьһижьн нетед рʹӧһʹани, әԝана ԝе жийина хԝәда дьһа зедә дәсте Йаһоԝа бьвиньн (Ԝаиз 4:9, 12). Сәрһатийа Расел у Елизабете ве йәке нишан дькә. Расел дьбежә: «Гава мә һәвдӧ нас дькьр, мә дәрһәԛа нетед хԝәйә рʹӧһʹани хәбәр дьда». Елизабет дьбежә: «Мә дәрһәԛа ван тьшта хәбәр дьда, ԝәки әм сафикьрьнед баш бькьн у жь нетед хԝә  дур нәкʹәвьн». Паши зәԝаще, әԝана дәрбази Микронесйайе бун, ԝәки ԝедәре мьзгине бәла кьн.

13. Ль гора Зәбур 28:7, һәгәр әм хԝә бьсперьн Йаһоԝа, ахьри ԝе чь бә?

¹³ Мина Расел у Елизабете, гәләк щотед зәԝьщи дьхԝазьн ԝәхт у ԛәԝата хԝә һәри зедә бона бәлакьрьна мьзгине хәрщ кьн. Бона ве йәке, әԝана бь жийина сьвьк дьжин. Һәгәр щотед зәԝьщи хԝәрʹа нетед рʹӧһʹани дайньн у тʹәвайи һәр тьшти бькьн ԝәки бьгьһижьн ван нета, әԝана ԝе гәләк бәред баш бьстиньн. Гава әԝана бьвиньн кӧ Йаһоԝа ча ԝана хԝәй дькә, әԝана ԝе һе зедә итʹбарийа хԝә ԝи биньн, у ԝе гәләк бәхтәԝар бьн (Зәбур 28:7 бьхунә).

14. Пәтрусе шанди у жьна ԝи ча нишан кьрьн, ԝәки баԝәрийа хԝә ве созе тиньн, кӧ Мәтта 6:25, 31-34-да ньвисийә?

¹⁴ Ӧса жи, щотед зәԝьщи дькарьн жь сәрһатийа Пәтрусе шанди у жьна ԝи һьнә дәрса һин бьн. Ԝәкә шәш мәһ йан саләк, паши кӧ Пәтрус щара пешьн рʹасти Иса Мәсиһ һат, әԝи гәрәке сафикьрьнәкә фәрз бькьра. Пәтрус пе мәʹсигьртьне әʹбура малбәта хԝә дькьр. Ләма жи гава Иса гази ԝи кьр кӧ пәй ԝи һәрʹә, Пәтрус гәрәке һʹале малбәта хԝә жи һьлда һʹәсаб (Луԛа 5:1-11). Пәтрус сафи кьр пәй Иса һәрʹә у мьзгине тʹәви ԝи бәла кә. Әԝи сафикьрьнәке гәләк баш кьр! Те кʹьфше жьна Пәтрус пьштгьрийа сафикьрьна ԝи дькьр. Кʹьтеба Пироз нишан дькә ԝәки паши кӧ Иса жь мьрьне рʹабу, жьна Пәтрус щарна тʹәви мере хԝә рʹеԝити дькьр (1 Корьнтʹи 9:5). Жь бо ве йәке кӧ жьна Пәтрус Мәсиһикә баш бу, Пәтрус бь азайи дькарьбу ширәта бьдә жьн у мера (1 Пәтрус 3:1-7). Әшкәрә йә, ԝәки һьм Пәтрус һьм жьна ԝи баԝәрийа хԝә ве созе Йаһоԝа дьанин, кӧ әԝе бона һʹәԝщед ԝан хәм бькә, һәгәр әԝана Пʹадшатийа ԝи дайньн сәр щийе пешьн (Мәтта 6:25, 31-34 бьхунә).

15. Әм жь сәрһатийа Әстәр у Тиаго чь һин дьбьн?

¹⁵ Һәгәр ида чәнд сал ә кӧ һун зәԝьщи нә, гәло һун ча дькарьн хԝәстьне пешда биньн, ԝәки хьзмәта хԝә зедә бькьн? Мәсәлә, һун дькарьн дина хԝә бьдьн сәрһатийед ԝан жьн-мера, йед кӧ рʹеза готареда бь наве «Әԝана бь Рʹәзәдьли Хьзмәт Дькьн» һәнә. Готаред ӧса хԝәстьна жьн у мерәки бь наве Әстәр у Тиаго зедә кьр, ԝәки әԝана жь Бразилйайе дәрбази щики дьн бьн, кʹидәре һʹәԝщәти һәйә. Тиаго дьбежә: «Гава мә әԝ сәрһати дьхԝәндьн кӧ нишан дькьн, ԝәки Йаһоԝа ча али хьзмәткʹаред хԝә дькә, мә жи хԝәст дәсте Йаһоԝа жийина хԝәда бьвиньн». Ԝәʹдә шунда, әԝана дәрбази Парагӧԝайе бун. Жь сала 2014 һʹәта ньһа, әԝана ԝедәре дәшта Португалида хьзмәт дькьн. Әстәр дьбежә: «Йәк жь рʹезед кӧ әм гәләк һʹьз дькьн, Әфәси 3:20 йә. Хьзмәта мәда, готьнед ве рʹезе гәләк щара һатьн сери.» Әв рʹез дьбежә кӧ Йаһоԝа ԝе һе зедә мә кʹәрәм кә, нә кӧ чьԛас әм һивийе нә. Бь рʹасти жи ӧса йә!

16. Сәва кӧ щотед тʹәзә зәԝьщи хԝәрʹа нетед баш дайньн, әԝана дькарьн жь кʹе ширәта бьхԝазьн?

¹⁶ Щотед зәԝьщи дькарьн жь мәсәла  хушк-бьред кӧ итʹбарийа хԝә Йаһоԝа тиньн, кʹаре бьстиньн. Һьнә щотед зәԝьщи дьбәкә бь дәһа сала хьзмәта һәртʹьмда нә. Сәва кӧ һун хԝәрʹа нетед баш дайньн, һун дькарьн жь кәсед ӧса ширәта бьхԝазьн. Бь ви щурʹәйи һуне нишан кьн, ԝәки хԝә дьсперьн Йаһоԝа (Мәтʹәлок 22:17, 19). Ӧса жи рʹуспи дькарьн али жьн у меред щаһьл бькьн, ԝәки әԝана хԝәрʹа нетед рʹӧһʹани дайньн у бьгьһижьн ван нета.

17. Сәрһатийа Мариса у Клаус чь мә һин дькә?

¹⁷ Щарна, гава әм сафи дькьн ԝәки хьзмәта хԝә аликида зедә бькьн, дьԛәԝьмә Йаһоԝа алийе дьнда рʹебәри бьдә мә у рʹекә дьн нишани мә кә. Мәсәлә, дина хԝә бьдьнә сәрһатийа Мариса у Клаус. Гава әԝана ида се сал зәԝьщи бун, ԝан мала хԝә һишт, ԝәки филиала Финландайе сәр проекта авакьрьне бьхәбьтьн. Ле ԝанрʹа готьн ԝәки әԝана дькарьн тʹәне шәш мәһа ԝедәре бьминьн. Серида әԝана хәмгин бун. Ле гәләк ԝәхт дәрбаз нәбу кӧ әԝана һатьнә тʹәглифкьрьне ԝәки курса һинбуна зьмане Әʹрәби дәрбаз бьн. Ньһа әԝана ԝәлатәки дьнда, дәшта Әʹрәбида хьзмәт дькьн. Мариса дьбежә: «Һеса нинә кӧ мәрьв һәр тьшти бьһелә у бь тʹәмами итʹбарийа хԝә Йаһоԝа бинә. Ле Йаһоԝа һәртʹьм, гава әм һивийе нибун али мә дькьр. Ләма жи баԝәрийа мә һьндава Йаһоԝа дьһа ԛәԝи буйә». Ча әв сәрһати нишан дькә, һәгәр һун бь тʹәмами итʹбарийа хԝә Йаһоԝа биньн, баԝәр бьн кӧ әԝе әʹсәйи ԝә хәлат кә.

18. Щотед зәԝьщи чаԝа дькарьн нишан кьн, ԝәки итʹбарийа хԝә Йаһоԝа тиньн?

¹⁸ Зәԝащ пʹешкʹешәкә жь Йаһоԝа йә (Мәтта 19:5, 6). Әԝ дьхԝазә ԝәки щотед зәԝьщи жь ве пʹешкʹеше шабуне бьстиньн (Мәтʹәлок 5:18). Жьн-меред щаһьл, бьфькьрьн һун жийина хԝә ча дәрбаз дькьн. Гәло һун чь жь дәсте ԝә те дькьн, ԝәки рʹазибуна хԝә Йаһоԝарʹа нишан бькьн? Тʹьме дӧада тʹәви Йаһоԝа хәбәр дьн. Дина хԝә бьдьне кӧ кʹижан принсипед Кʹьтеба Пироз дькарьн али ԝә бькьн сафикьрьнед баш бькьн. Паше жи ԝан ширәтед Йаһоԝа жийина хԝәда бьдьнә хәбате. Баԝәр бьн кӧ һәгәр һун зәԝаща хԝәда хьзмәта Йаһоԝа дайньн щийе пешьн, һуне гәләк бәхтәԝар бьн!