Пешийа мьрьна хԝә, Иса Мәсиһ чьма готьнед Даԝьд Пʹадша йед жь Зәбур 22:1 ԝәкʹьланд?

Ль гора Мәтта 27:46, Иса Мәсиһ пешийа мьрьна хԝә ӧса гот: «Хԝәдейе мьн, Хԝәдейе мьн, тә чьма әз һьштьм?» Бь ван готьна, Иса Мәсиһ готьнед Даԝьд Пʹадша ԝәкʹьланд, йед кӧ Зәбур 22:1-да һатьнә ньвисаре (Марԛос 15:34). Гәрәке әм нәфькьрьн кӧ Иса Мәсиһ ӧса гот, чьмки әԝи һевийа хԝә йан баԝәрийа хԝә ӧнда кьрьбу. Әԝи рʹьнд заньбу кӧ чьрʹа лазьм ә кӧ әԝ бьмьрә, у әԝ һазьр бу кӧ әʹмьре хԝә бәрва бьдә (Мәтта 16:21; 20:28). Ӧса жи, әԝи заньбу кӧ ль дәма мьрьна ԝи, Йаһоԝа гәрәке ‹чәпәре› ль дәр-дора ԝи рʹакьра (Ибо 1:10). Ләма жи, Йаһоԝа мәщал да Иса Мәсиһ кӧ әԝ бь зәлали избат бькә кӧ чь жи һәбә, әԝе һʹәта мьрьне амьн бьминә (Марԛос 14:35, 36).

Гәло Иса Мәсиһ чьма готьнед ве зәбуре ԝәкʹьланд? Рʹаст ә әм сәд сәләфи ньзаньн, ле ԝәрә бьфькьрьн дәрһәԛа һьнә сәбәба кӧ дькарьбун бьбуна: *

Бь ван готьна, Иса Мәсиһ дьбәкә дьхԝәст нишан кьра кӧ ль дәма мьрьна ԝи, Йаһоԝа ԝе ԝи тʹәне бьһелә. Лазьм бу кӧ Иса Мәсиһ кʹьрʹине бе аликʹарийа Йаһоԝа бьда. Лазьм бу кӧ әԝ ча инсан бьмьрә, ԝәки «бона һʹәмуйа мьрьн бьдита» (Ибрани 2:9).

Бь ван готьна, Иса Мәсиһ дьбәкә дьхԝәст дина мәрьва бькʹьшанда сәр тʹәмамийа ве Зәбура 22. Ль рʹожед Иса  Мәсиһ, Щьһуйа гәләк зәбур әзбәр дькьрьн. Гава рʹезәкә жь зәбурәке дьһат готьн, тʹәмамийа ве зәбуре дьһат бира ԝан. Ль Зәбура 22, гәләк пʹехәмбәртийед дәрһәԛа мьрьна Мәсиһ һәнә. Иса дьԛәԝьмә дьхԝәст дина шагьртед хԝә бькʹьшанда сәр тьштед дьн, йед кӧ ль ве зәбуре жь бәрева дәрһәԛа ԝи һатьбун әʹйанкьрьн (Зәбур 22:7, 8, 15, 16, 18, 24). Ӧса жи, әв зәбур дьбежә кӧ Пʹадшатийа Йаһоԝа ԝе бьгьһижә чар алийед дьнйайе (Зәбур 22:27-31).

Бь ван готьна, Иса Мәсиһ дьбәкә дьхԝәст бьгота кӧ әԝ бесущ ә. Пешийа мьрьна хԝә, Иса Мәсиһ ниве шәве беԛануни һат диԝанкьрьн у ча кʹьфьр һат нәһәԛкьрьн (Мәтта 26:59, 65, 66; Марԛос 14:56-59). Бь ван готьна, Иса Мәсиһ бәлки дьхԝәст нишан кьра кӧ әԝ һежайи ви щәзайи нибу.

Иса Мәсиһ дьбәкә дьхԝәст зәлал бькьра кӧ Даԝьд Пʹадша жи рʹасти тәнгасийа дьһат, ле әв йәк найе һʹәсабе кӧ Даԝьд ԛәбулкьрьна Хԝәде ӧнда кьрьбу. Даԝьд баԝәрийа хԝә ӧнда нәкьрьбу. Паши кӧ Даԝьд әв пьрс пьрси, әԝи баԝәрийа хԝә әʹйан кьр кӧ Йаһоԝа дькарә ԝи хьлаз бькә, у Йаһоԝа әԝ кʹәрәм дькьр (Зәбур 22:23, 24, 27). Мина ве йәке, «Кӧрʹе Даԝьд», демәк Иса Мәсиһ, рʹаст ә ль сәр стуна щәфайе һат мьхкьрьн жи, ле әв йәк нәдьһатә һʹәсабе кӧ Йаһоԝа ида жь ԝи рʹази нинә (Мәтта 21:9).

Иса Мәсиһ дьбәкә дьхԝәст нишан кьра кӧ әԝ чьԛас хәмгин ә, чьмки Йаһоԝа дәсте хԝә жь ԝи кʹьшанд, ԝәки әԝ бькарьбә амьнийа хԝә избат бькә. Нета сәрәкә йа Йаһоԝа нә әԝ бу кӧ Иса Мәсиһ бе кӧштьн. Әв йәк лазьм һат паши рʹабәрибуна Адәм у Һәԝайе. Иса Мәсиһ тʹӧ тьштәки нәрʹаст нәкьрьбу, ле лазьм бу кӧ әԝ еше бькʹьшинә у бьмьрә, ԝәки избат кә кӧ бӧхданед Мире-щьна дәрәԝ ьн, у һәԛе кʹьрʹине бьдә, ԝәки вәгәрʹинә ве йәке чь кӧ мәрьв ӧнда кьрьбу (Марԛос 8:31; 1 Пәтрус 2:21-24). Сәва ве йәке, лазьм бу кӧ Йаһоԝа дәсте хԝә жь бо дәмәке жь сәр Иса Мәсиһ бькʹьшинә у ԝи щара пешьн жийина ԝида ԝи нәпарезә.

Иса Мәсиһ дьбәкә дьхԝәст шагьртед хԝәрʹа зәлал бькьра кӧ Йаһоԝа чьма изьн да ԝәки әԝ бь ви аԝайи бьмьрә. * Иса Мәсиһ заньбу бь мьрьна ԝи щурʹәйи, гәләк кәс ԝе бьлькʹӧмьн (1 Корьнтʹи 1:23). Сәва кӧ шагьртед ԝи мәʹнийа мьрьна ԝи фәʹм бькьн, лазьм бу кӧ әԝ дина хԝә бьдьн сәбәба мьрьна ԝи (Галати 3:13, 14). Ве йәке ԝе али ԝан бькьра кӧ әԝ ԝи нә ча сущдарәки, ле ча Хьлазкʹар һʹәсаб кьн.

Сәбәба ван готьнед Иса Мәсиһ чь бу жи, әʹйан ә кӧ әԝи заньбу ԝәки мьрьна ԝи ль гора хԝәстьна Йаһоԝа бу. Паши кӧ Иса Мәсиһ готьнед ве зәбуре ԝәкʹьланд, әԝи гот: «Тʹәмам ԛәԝьми!» (Йуһʹәнна 19:30; Луԛа 22:37). Бәле, жь бәр кӧ Йаһоԝа дәсте хԝә жь бо дәмәке жь Иса Мәсиһ кʹьшандьбу, әԝи дькарьбу ԛьрара Йаһоԝа бь тʹәмами бинә сери. Ӧса жи, бь сайа ве йәке һʹәму тьштед кӧ «Ԛануна Муса, ньвисаред пʹехәмбәра у Зәбурада» дәрһәԛа ԝи ньвисар бун, һатьнә сери (Луԛа 24:44).