1-2. (а) Әйньк кʹи бу, у ча дайик әԝ рʹасти чь чәтьнайе һат? (б) Шькьле рʹуйе журнале шьровәкә.

 КʹЬТЕБА ПИРОЗ бәʹса рʹожа ньхӧмандьна Тимотʹейо накә, ле әм дькарьн баԝәр бьн кӧ ве рʹоже дийа ԝи Әйньк, гәләки ша бу (Мәтʹәлок 23:25). Һәла бьдә бәр чʹәʹве хԝә кӧ Тимотʹейо чаԝа дькʹәвә аве. Әйньк у пирька Тимотʹейо Лойис, бь дьләки ша ԝи дьньһерʹьн. Гава Тимотʹейо жь аве дәрдькʹәвә, чʹәʹвед Әйньке бь һесьред шабуне тʹьжә дьбьн. Әԝ фьрнаԛ дьбә, чьмки щәфе ԝе, кӧ кӧрʹе хԝә дәрһәԛа Йаһоԝа у Иса Мәсиһ һин кә, бадиһәԝа нибу. Ле һʹәта ве гаве, гәло Әйньк рʹасти чь чәтьнайа һатьбу?

² Баве Тимотʹейо Йунан бу, ле де у пирька ԝи Щьһу бун (Кʹаред Шандийа 16:1). Паше ча те кʹьфше гава Тимотʹейо һе зарʹ бу, Әйньк у Лойис бунә Мәсиһи, ле баве ԝи әв рʹе ԛәбул нәкьр. Чахе Тимотʹейо мәзьн дьбу, лазьм бу ԝәки әԝ рʹийа хԝә бьжберә. Гәло әԝи чь кьр? Гәло әԝи хԝә ль баԝәрийа баве хԝә гьрт йан баԝәрийа Щьһуйа? Йан әԝи рʹийа Иса ԛәбул кьр у бу Мәсиһи?

3. Ль гора Мәтʹәлок 1:8, 9, Йаһоԝа сәр хирәта дайика ча дьньһерʹә?

³ Иро жи, дайикед кӧ Мәсиһи нә, зарʹед хԝә һʹьз дькьн. Жь һәр тьшти зедәтьр, әԝана дьхԝазьн али зарʹед хԝә бькьн ԝәки әԝана бьбьнә достед Йаһоԝа, у Йаһоԝа әмәке ԝан дайика гәләк дьшекьринә (Мәтʹәлок 1:8, 9 бьхунә). Йаһоԝа рʹебәрийа гәләк дайика кьрийә ԝәки әԝана зарʹед хԝә рʹастийеда мәзьн бькьн.

4. Һьнә дайик рʹасти чь чәтьнайа тен?

⁴ Һʹӧкӧме дьнйа Мире-щьна гәләк ԛәԝи йә. Ләма жи дайик щарна бәрхԝә дькʹәвьн, гәло зарʹед ԝан ԝе рʹийа Йаһоԝа бьжберьн йан на (1 Пәтрус 5:8). Сәрда жи,  гәләк дайик зарʹед хԝә тʹәне мәзьн дькьн, йан жи малхе ԝан Шәʹде Йаһоԝа нинә. Мәсәлә, хушкәкә бь наве Кристина * ӧса дьбежә: «Мере мьн бавәки баш бу, у әԝи бона мә хәм дькьр, ле әԝи нәдьхԝәст кӧ әз зарʹа ча Шәʹдед Йаһоԝа мәзьн кьм. Бь сала әз гәләк щар дьгьрийам, у әз бәрхԝә дькʹәтьм кӧ гәло зарʹед мьн ԝе бенә сәр рʹийа рʹастийе, йан на».

5. Ве готареда, әме чь шеԝьр кьн?

⁵ Дайикно, һун дькарьн мина Әйньке пешдачуйи бьн. Ве готареда, әме шеԝьр кьн кӧ һун чаԝа дькарьн зарʹед хԝә мина Әйньке һьм бь готьнед хԝә, һьм жи бь кьред хԝә һин кьн. Ӧса жи, әме бьвиньн кӧ Йаһоԝа ԝе ча али ԝә бькә.

6. Чаԝа кӧ 2 Тимотʹейо 3:14, 15 нишан дькә, Тимотʹейо чаԝа бу Мәсиһи?

⁶ Чахе Тимотʹейо һе бьчʹук бу, дийа ԝи хирәт дькьр, ԝәки Ньвисаред Пироз ль гора баԝәрийа Щьһуйа ԝи һин кә. Әԝе Иса Мәсиһ нас нәдькьр, ләма жи занәбуна ԝе жь һьнә алийава кем бу. Диса жи, тьштед кӧ Тимотʹейо жь Ньвисаред Пироз һин бьбу, али ԝи кьр кӧ әԝ рʹийа рʹастийе ԛәбул кә. Ләма жи гава әԝ хорт бу, әԝи сафи кьр бьбә Мәсиһи. Бешьк, мәʹник кӧ Тимотʹейо рʹастийа дәрһәԛа Иса Мәсиһ ԛәбул кьр әв бу, кӧ дийа ԝи әԝ һин кьрьбу (2 Тимотʹейо 3:14, 15 бьхунә). Һәла биньн бәр чʹәʹве хԝә кӧ Әйньк чьԛас ша дьбу, ԝәки әԝе нава чәтьнайада карьбу кӧрʹе хԝә дәрһәԛа Йаһоԝа һин кә у рʹастийеда мәзьн кә. Наве «Әйньке» те һʹәсабе «сәркʹәтьн», у әԝ бь рʹасти жи һежайи наве хԝә бу!

7. Паши ньхӧмандьна Тимотʹейо, гәло Әйньке чаԝа дькарьбу али ԝи бькьра кӧ әԝ сафикьрьнед баш бькә?

⁷ Чахе Тимотʹейо һатә ньхӧмандьне, әԝи жийина хԝәда гавәкә фәрз авит, ле Әйньк бешьк дәрһәԛа тьштед дьн жи хәмгин дьбу: Гәло паше, кӧрʹе ԝе жийина хԝә ԝе ча дәрбаз кә? Гәло әԝе рʹәх һәвалед хьраб кʹәвә? Гәло әԝе ль Атʹинайе һәрʹә мәкʹтәбе у фькьред философед пʹутпʹарьст ԛәбул кә? Гәло әԝе ԝәхт, ԛәԝат у щаһьлтийа хԝә бона тʹопкьрьна һәбуке бьдә хәбате? Һәмьки Тимотʹейо гәрәке ван сафикьрьна хԝәха бькьра, ле диса жи Әйньке дькарьбу али ԝи бькьра ԝәки әԝ сафикьрьнед баш бькә. Гәло чаԝа? Мәсәлә, әԝе дькарьбу али кӧрʹе хԝә бькьра, ԝәки әԝ жь дьл Йаһоԝа һʹьз бькә у бона ԛӧрбана Иса рʹази бә. Һьлбәт, һәгәр тʹәне де йан бав Мәсиһи йә, әв йәк һеса нинә. Ле һәгәр һьм де һьм жи бав Шәʹдед Йаһоԝа нә, щарна ԝанрʹа жи һеса нинә кӧ рʹастийе бьгьһиньн дьле зарʹед хԝә, ԝәки әԝана Йаһоԝа һʹьз бькьн у бьбьнә хьзмәткʹаред ԝи. Гәло де у бав дькарьн жь мәсәла Әйньке чь дәрсе һин бьн?

8. Һәгәр бав Шәʹде Йаһоԝа йә, дайик чаԝа дькарә али ԝи бькә кӧ әԝ зарʹа рʹийа рʹастийеда һин кә?

⁸ Кʹьтеба Пироз тʹәви зарʹед хԝә леколин кьн. Хушкно, һәгәр мере ԝә нава рʹастийеда нә, Йаһоԝа дьхԝазә кӧ һун али ԝи бькьн, ԝәки әԝ зарʹа рʹийа рʹастийеда һин кә. Мәсәлә, бәрдәԝам кьн пьштгьрийа бәрнама Ԛӧльхкьрьна тʹәви Малбәте бькьн. Дәрһәԛа ве бәрнаме позитив хәбәр дьн, у бьфькьрьн һәла һун дькарьн чь бькьн, ԝәки әв һʹәԝас у хԝәш дәрбаз бә. Дьбәкә һун дькарьн бона һазьркьрьна бәрнама леколина Кʹьтеба Пироз али мере хԝә  бькьн. Ӧса жи, һәгәр һʹьше зарʹа ида дьгьһиже кӧ кʹьтеба «Ша бә Жийинерʹа Һʹәта-Һʹәтайе!» дәрбаз бьн, һун дькарьн тʹәви мере хԝә һәвкʹарийе бькьн, ԝәки әв һинбун рʹьнд у һʹәԝас дәрбаз бә.

9. Һәгәр бав Шәʹде Йаһоԝа нинә, дайик дькарә жь кʹӧ аликʹарийе бьстинә?

⁹ Һьнә дайик зарʹед хԝә тʹәне мәзьн дькьн йан жи бав Шәʹде Йаһоԝа нинә, ләма жи лазьм ә ԝәки әԝана хԝәха Кʹьтеба Пироз тʹәви зарʹед хԝә леколин бькьн. Һәгәр һʹале ԝә ӧса йә, гәләк бәрхԝә нәкʹәвьн, чьмки Йаһоԝа ԝе али ԝә бькә. Бона леколина Кʹьтеба Пироз, һун дькарьн ван һащәтед һинкьрьне бьдьнә хәбате, йед кӧ Йаһоԝа бь сайа тʹәшкиләта хԝә дьдә. Ӧса жи, һун дькарьн жь де у бавед дьн бьпьрсьн һәла әԝана ван һащәта чаԝа ԝәʹде Ԛӧльхкьрьна тʹәви Малбәте дьдьнә хәбате * (Мәтʹәлок 11:14). Хенщи ве йәке, Йаһоԝа дькарә али ԝә бькә кӧ һун фькьред зарʹа рʹьнд фәʹм кьн у рʹастийе бьгьһиньн дьле ԝан (Мәтʹәлок 20:5). Мәсәлә, пьрсәкә ӧса «Мәкʹтәбеда, һәри зедә чь тәрʹа чәтьн ә?», дькарә али тә бькә ԝәки хәбәрдана керһати тʹәви зарʹа хԝә дәстпеки.

10. Һун чаԝа дькарьн али зарʹед хԝә бькьн кӧ әԝана Йаһоԝа нас бькьн?

¹⁰ Мәщала бьгәрʹьн кӧ зарʹед хԝә дәрһәԛа Йаһоԝа һин кьн. Дәрһәԛа Йаһоԝа у кʹәрәмед кӧ ԝә жь ԝи стандьнә, зарʹед хԝәрʹа гьли кьн (Ԛануна Дӧщари 6:6, 7; Ишайа 63:7). Әв йәк гәләк фәрз ә, илаһи һәгәр һун нькарьн леколина Кʹьтеба Пироз һәр һʹәфте малда тʹәви зарʹед хԝә дәрбаз кьн. Кристина, йа кӧ мә бәʹса ԝе кьрьбу, дьбежә: «Тʹьме нәдьһатә стандьне ԝәки дәрһәԛа Йаһоԝа тʹәви зарʹед хԝә хәбәр дьм, ләма жи чьԛас дәсте мьн дьһат мьн һʹәму мәщал рʹьнд дьданә хәбате. Мәсәлә, гава әм тʹәбийәтеда һеса дьбун йан бь ԛәйьке дьгәрʹийан, мә дәрһәԛа чекьрьна дәсте Йаһоԝа у гәләк тьштед рʹӧһʹани хәбәр дьда. Гава зарʹед мьн ида һьнәки мәзьн бун, мьн ԝана һелан дькьр, ԝәки әԝана Кʹьтеба Пироз хԝәха леколин бькьн». Тʹәви зарʹед хԝә дәрһәԛа тʹәшкиләта Йаһоԝа у хушк-бьра позитив хәбәр дьн. Рʹуспийа сущдар нәкьн, ԝәки зарʹед ԝә чахе һʹәԝщә бьн, һеса незики ԝан бьн у аликʹарийе жь ԝан бьхԝазьн.

11. Ль гора Аԛуб 3:18, чьма фәрз ә кӧ әм малда әʹдьлайе хԝәй кьн?

¹¹ Малда әʹдьлайе хԝәй кьн. Дайикед дәлал у ԛимәт, тʹьме мер у зарʹед хԝәрʹа нишан кьн, кӧ һун ԝана һʹьз дькьн. Бь нәрми у бь ԛәдьр бәʹса мере хԝә бькьн, у зарʹед хԝә һин бькьн ԝәки әԝана жи бь хәбәрдана хԝә ԛәдьре баве хԝә бьгьрьн. Бь ви щурʹәйи, малбәта ԝәда ԝе әʹдьлайи һәбә, у ԝәрʹа ԝе дьһа һеса бә ԝәки зарʹед хԝә рʹастийеда мәзьн кьн (Аԛуб 3:18 бьхунә). Дина хԝә бьдьнә сәрһатийа бьраки бь наве Щозеф, йе кӧ Руманйайеда пешәнге мәхсус ә. Гава әԝ мәзьн дьбу, баве ԝи нәдьһишт ԝәки әԝ, дийа ԝи, хушка ԝи у дӧ бьред ԝи бь аза Йаһоԝарʹа хьзмәт бькьн. Щозеф дьбежә: «Дийа мә гәләк хирәт дькьр кӧ мала мәда әʹдьлайи һәбә. Чьԛас баве мьн сәрт дьбу, дийа мьн һаԛас нәрм дьбу. Гава әԝе дьдит кӧ мәрʹа чәтьн ә ԝәки ԛәдьре баве хԝә бьгьрьн у гӧрʹа ԝи бькьн, әԝе готьнед  жь Әфәси 6:1-3 тʹәви мә шеԝьр дькьр. Паше, әԝе бәʹса һʹӧнӧред ԝийә баш дькьр у нишан дькьр кӧ чьрʹа әм гәрәке баве хԝә ԛимәт кьн. Бь ви щурʹәйи, әԝе гәләк щара али мә дькьр, ԝәки малбәта мәда әʹдьлайи һәбә».

12. Ль гора 2 Тимотʹейо 1:5, мәсәла Әйньке чаԝа сәр Тимотʹейо һʹӧкӧм кьр?

¹² 2 Тимотʹейо 1:5 бьхунә. Әйньке Тимотʹейорʹа мәсәләкә баш һишт. Әԝе кӧрʹе хԝә һин дькьр, ԝәки баԝәрийа рʹаст кьред мәрьвада те кʹьфше (Аԛуб 2:26). Бешьк, Тимотʹейо жь кьред дийа хԝә дьдит, кӧ әԝ чьԛас Йаһоԝа һʹьз дькә. Гәло мәсәла Әйньке чаԝа сәр Тимотʹейо һʹӧкӧм кьр? Чаԝа кӧ Паԝлосе шанди гот, баԝәрийа Тимотʹейо мина баԝәрийа дийа ԝи, ԛәԝи бу. Әв йәк әʹщебмайи нинә. Тимотʹейо дина хԝә дьда мәсәла ԝе, у чʹәʹв дьда ԝе. Иро жи, гәләк дайик «бе готьн» нәфәред хԝә анинә сәр рʹийа рʹастийе (1 Пәтрус 3:1, 2). Һун жи дькарьн ӧса бькьн. Гәло чь щурʹәйи?

13. Чьма фәрз ә кӧ дайик жь һәр тьшти зедәтьр дина хԝә бьдьн достийа хԝә тʹәви Йаһоԝа?

¹³ Һәри зедә дина хԝә бьдьн достийа хԝә тʹәви Йаһоԝа (Ԛануна Дӧщари 6:5, 6). Мина гәләк дайика, һун жи гәләк ԛӧрбана дькьн. Бона һʹәԝщед физики йед зарʹед хԝә, һун ԝәхт, пʹәрә, хәԝ у тьштед дьн ԛӧрбан дькьн. Диса жи, гәрәке һун бь ван тьшта һаԛас мьжул нәбьн, ԝәки ԝәʹде ԝә нәминә кӧ һун достийа хԝә тʹәви Йаһоԝа ԛәԝи кьн. Ләма жи бәрдәԝам кьн ԝәʹдә вәԛәтиньн бона дӧайе шәхси, леколина Кʹьтеба Пироз у щьвина. Бь ви щурʹәйи, һуне незики Йаһоԝа бьн, у һуне һьм нәфәред хԝәрʹа һьм жи кәсед дьнрʹа бьбьнә мәсәла баш.

14-15. Һун жь сәрһатийед Леан, Мариа у Щау чь һин бун, ԝәки малбәтеда әʹдьлайе хԝәй кьн?

¹⁴ Һәла дина хԝә бьдә чәнд сәрһатийед щаһьла, йед кӧ бь сайа мәсәла дийа хԝә Йаһоԝа һʹьз кьрьнә у баԝәрийа хԝә ԝи анинә. Леан дәрһәԛа дийа хԝә, Кристинайе, ӧса дьбежә: «Чахе баве мә малда бу, мә нькарьбу Кʹьтеба Пироз леколин кьра. Ле дийа мә һәртʹьм дьчу щьвата. Ләма жи занәбуна мә дәрһәԛа Кʹьтеба Пироз чьԛас һьндьк бу жи, мә жь мәсәла ԝе у жь баԝәрийа ԝе гәләк кʹар дьстанд. Пешийа кӧ мә дәстпекьр һәрʹьн сәр щьвата, мә ида заньбу ԝәки рʹийа рʹаст әв ә».

¹⁵ Малбәта хушкәкә бь наве Мариа, щарна алийе баведа дьһатә щәзакьрьне, чьмки әԝана дьчун щьвата. Мариа дьбежә: «Дийа мьн йәкә гәләк мерхас ә. Чахе әз зарʹ бум, әз дьтьрсийам кӧ кәсед дьн ԝе чь бежьн, ләма щара мьн хԝә паш дьхьст у рʹӧһʹанида пешда нәдьчум. Ле гава мьн дьдит кӧ дийа мьн чьԛас мерхас ә у жийина ԝеда Йаһоԝа һәртʹьм сәр щийе пешьн ә, тьрса бәр мәрьва жь дьле мьн дәркʹәт». Бьраки бь наве Щау, баве кʹижани изьн нәдьда, ԝәки малда дәрһәԛа Кʹьтеба Пироз хәбәр дьн, дьбежә: «Әԝ йәк гәләк дьле мьн дьгьрт, кӧ дийа мьн һазьр бу һәр тьшти бьһелә, демәк һәр тьшти хенщи һʹьзкьрьна Йаһоԝа, ԝәки дьле баве мьн бькʹьрʹә».

16. Мәсәла дайика чаԝа дькарә сәр кәсед дьн һʹӧкӧм бькә?

¹⁶ Дайикно бир нәкьн кӧ мәсәла ԝә сәр кәсед дьн жи һʹӧкӧм дькә. Гәло чь щурʹәйи? Биньн бәр чʹәʹве хԝә кӧ мәсәла Әйньке чаԝа сәр Паԝлосе шанди һʹӧкӧм кьр. Әԝи фәʹм кьр кӧ баԝәрийа Тимотʹейойә «дьле сах» бь сайа ве  йәке бу, кӧ дьле Әйнькеда баԝәри һәбу (2 Тимотʹейо 1:5). Гәло Паԝлос щара пешьн кʹәнге баԝәрийа Әйньке дит? Дьбәкә чахе әԝ щара пешьн рʹеԝитийа мисйонертида бу у Листрайеда рʹасти Лойис у Әйньке һат. Дьԛәԝьмә Паԝлос али ԝан кьр, ԝәки бьбьнә шагьртед Иса Мәсиһ (Кʹаред Шандийа 14:4-18). Һәла бьфькьрә: Ԝәкә 15 сал шунда, гава Паԝлос Тимотʹейорʹа ньвиси, әԝи һәла һе бир нәкьрьбу кӧ баԝәрийеда Әйньке мәсәләкә чьԛас баш бу. Әшкәрә йә кӧ амьнийа ԝе сәр Паԝлос, у ча те кʹьфше сәр хушк-бьред дьн жи гәләк һʹӧкӧм кьрьбу. Һәгәр тӧ зарʹед хԝә тʹәне мәзьн дьки йан һәгәр мере тә Шәʹде Йаһоԝа нинә, баԝәр бә кӧ амьнийа тә хушк-бьра ԛәԝи дькә.

17. Һәгәр һун дьфькьрьн кӧ зарʹа ԝә нахԝазә Йаһоԝарʹа хьзмәт бькә, гәрәке һун чь бькьн?

¹⁷ Һәгәр һун дьфькьрьн кӧ зарʹед ԝә һинкьрьна ԝә ԛәбул накьн, һун дькарьн чь бькьн? Бир нәкьн кӧ сәва һинкьрьна зарʹа, ԝәхт лазьм ә. Ча шькьл нишан дькә, гава мәрьв тʹохьмәки дьчинә, әԝ щарна бәрхԝә дькʹәвә һәла рʹожәке тʹохьм ԝе бьбә дарәкә бәрдар йан на. Әв йәк дәсте мәрьвда нинә, ле диса жи әԝ дькарә ав бьдә, ԝәки мәщала даре һәбә кӧ мәзьн бә (Марԛос 4:26-29). Мина ве йәке, һун дьԛәԝьмә бәрхԝә дькʹәвьн һәла готьнед ԝә, дьгьһижьн дьле зарʹед ԝә йан на. Һәмьки, ахьрийеда зарʹ хԝәха сафикьрьне дькьн. Ле диса жи гава һун чь жь дәсте ԝә те дькьн кӧ ԝан  һин кьн, һун мәщаләкә баш дьдьнә ԝан, ԝәки бьбьнә достед Йаһоԝа (Мәтʹәлок 22:6).

18. Йаһоԝа чаԝа дькарә али зарʹед ԝә бькә ԝәки әԝана бьбьнә достед ԝи?

¹⁸ Бь һʹәзара сала, Йаһоԝа али гәләк зарʹа у щаһьла кьрийә кӧ әԝ бьбьнә достед ԝи (Зәбур 22:9, 10). Бь аликʹарийа Йаһоԝа зарʹед ԝә жи дькарьн бьбьнә достед ԝи (1 Корьнтʹи 3:6, 7). Ле һәгәр зарʹед ԝә иро бь дьл у щан Йаһоԝарʹа хьзмәт накьн жи, баԝәр бьн кӧ чʹәʹве Йаһоԝа ԝе рʹийа ԝан бә (Зәбур 11:4). Һәгәр әԝана бь гавәкә бьчʹук нишан кьн, ԝәки ‹дьле ԝан бона жийина һәрһәйи һазьр ә›, Йаһоԝа ԝе дәсте ԝан бьгьрә (Кʹаред Шандийа 13:48; 2 Дирок 16:9). Әԝ дькарә али ԝә бькә кӧ һун ԝәʹде рʹастда, демәк гава зарʹед ԝә һʹәԝщә бьн, тьште рʹаст бежьнә ԝан (Мәтʹәлок 15:23). Йан жи, Йаһоԝа дькарә сәр дьле хушк йан бьраки һʹӧкӧм кә, ԝәки әԝ дина хԝә бьдә зарʹед ԝә у али ԝан бькә. Гава зарʹед ԝә ида мәзьн бьн жи, Йаһоԝа дькарә тьштәки ӧса бинә бира ԝан, чь кӧ бьчʹуктайеда ԝә әԝана һин кьрьбу (Йуһʹәнна 14:26). Һәгәр һун зарʹед хԝә пе готьн у кьред хԝә бәрдәԝам кьн һин кьн, Йаһоԝа ԝе ԝә хәлат кә.

19. Һун чьма дькарьн баԝәр бьн кӧ Йаһоԝа ԝә рʹази йә?

¹⁹ Дайикно, Йаһоԝа ԝә һʹьз дькә у бир нәкьн кӧ һʹьзкьрьна ԝи һьндава ԝә, сафикьрьнед зарʹед ԝәва гьредайи нинә. Әԝ ԝә һʹьз дькә, чьмки һун ԝи һʹьз дькьн. Һәгәр һун зарʹед хԝә тʹәне мәзьн дькьн, баԝәр бьн кӧ Йаһоԝа ԝе зарʹед ԝәрʹа бьбә Бав, у ԝе ԝә бькә бьн пʹәрʹе хԝә (Зәбур 68:5). Сафикьрьнед зарʹед ԝә дәсте ԝәда ниньн. Диса жи, һәгәр һун бәрдәԝам кьн һәԝара хԝә Йаһоԝа дахьн у чь жь дәсте ԝә те бькьн, әԝе жь ԝә рʹази бә.