1. Мә пʹешкʹеша хәбәрдане жь кʹе стандийә?

 ӘԜ ЙӘК кӧ әм дькарьн хәбәр дьн пʹешкʹешәкә жь Хԝәде йә. Бь сайа ве пʹешкʹеше, мәрьве пешьн Адәм тʹәви Баве хԝәйи әʹзмана хәбәр дьда. Ӧса жи, Адәм хәбәред тʹәзә бәр хԝә дәрдьхьстьн. Мәсәлә, әԝи нав дьда сәр һʹәйԝана (Дәстпебун 2:19). Бьдьн бәр чʹәʹве хԝә, кӧ гава әԝи щара пешьн тʹәви жьна хԝә Һеԝайе хәбәр да, әԝ чьԛас ша бу! (Дәстпебун 2:22, 23).

2. Пʹешкʹеша хәбәрдане бәре чаԝа бь щурʹәки хьраб дьһатә хәбьтандьне, у иро һʹал чаԝа йә?

² Гәләк ԝәхт дәрбаз нәбу кӧ пʹешкʹеша хәбәрдане бь щурʹәки хьраб һатә хәбьтандьне. Мире-щьна Һеԝайе хапанд, у әв дәрәԝ бу сәбәба гӧнә у ԛьсурдарийе (Дәстпебун 3:1-4). Паше, Адәм сәва шашийед хԝә, һьм жьна хԝә һьм жи Йаһоԝа нәһәԛ кьр. Бь ви щурʹәйи, әԝи зьмане хԝә бь щурʹәки хьраб да хәбате (Дәстпебун 3:12). Паши кӧ Ԛайин бьре хԝә Һабил кӧшт, әԝи жи Йаһоԝарʹа дәрәԝи гот (Дәстпебун 4:9). Паше, Ламәх йәк жь нәвийед Ԛайин шер ньвиси. Әв шер нишан дькә, ԝәки рʹожед ԝида чьԛас зӧлм у хьраби һәбу (Дәстпебун 4:23, 24). Гәло иро һʹал чаԝа йә? Гәләк сәрԝеред политике бәр хәлԛе чʹерʹа дькьн. Ӧса жи, гәләк филмада гьлийед хьраб дьдьнә хәбате. Һьм мәкʹтәбада һьм жи щийед хәбате, гьлийед хьраб тенә бьһистьне. Хәбәрдана хьраб иро ӧса бәлабуйи йә, ԝәки әшкәрә те кʹьфше кӧ дьне чьԛас хьраб буйә.

3. Гәрәке әм чьрʹа һаш жь хԝә һәбьн, у ве готареда әме чь шеԝьр кьн?

³ Һәгәр әм һаш жь хԝә тʹӧнә бьн, әм дькарьн ӧса һини зьмане хьраб бьн, кӧ готьнед хьраб дькарьн бе һʹәмде мә жь дәве мә дәркʹәвьн. Әм Шәʹдед Йаһоԝа нә, ләма жи  әм дьхԝазьн дьле Йаһоԝа ша кьн. Бона ве йәке, бәс нинә кӧ әм тʹәне чʹерʹа нәкьн. Гәрәке әм бь хәбәрдана хԝә пәсьне Хԝәде бьдьн. Ве готареда әме бьвиньн кӧ әм чаԝа дькарьн ве йәке (1) хьзмәтеда, (2) щьватеда (3) у хәбәрдана һәррʹожида бькьн. Пешийе әме бьвиньн кӧ Йаһоԝа чьрʹа дина хԝә дьдә хәбәрдана мә.

4. Ль гора Малахи 3:16, Йаһоԝа чьма дина хԝә дьдә хәбәрдана мә?

⁴ Малахи 3:16 бьхунә. Гәло Йаһоԝа чьрʹа навед ԝан мәрьва ‹пʹьртукәкә биранинеда› дьньвисә, йед кӧ бь хәбәрдана хԝә нишан дькьн кӧ жь ԝи дьтьрсьн у сәр наве ԝи дьфькьрьн? Хәбәрдана мә нишан дькә, кӧ дьле мәда чь һәйә. Иса ӧса готьбу: «Чь кӧ дьлада һәйә зар жи ԝе дьбежә» (Мәтта 12:34). Әв йәк кӧ әм дәрһәԛа чь хәбәр дьдьн, нишан дькә кӧ әм чьԛас Йаһоԝа һʹьз дькьн. Әв йәк гәләк фәрз ә, чьмки Йаһоԝа ԝе жийина һʹәта-һʹәтайе бьдә ԝан мәрьва, кʹи кӧ ԝи һʹьз дькьн.

5. (а) Һʹәбандьна мә чаԝа хәбәрдана мәва гьредайи йә? (б) Ча сәр шькьл те кʹьфше, чьрʹа фәрз ә кӧ әм мьԛати хәбәрдана хԝә бьн?

⁵ Әв йәк кӧ Йаһоԝа ԝе һʹәбандьна мә ԛәбул бькә йан на, хәбәрдана мәва жи гьредайи йә (Аԛуб 1:26). Һьнә кәсед кӧ Хԝәде һʹьз накьн, һерс, сәрт у ԛӧрʹә хәбәр дьдьн (2 Тимотʹейо 3:1-5). Һәмьки әм нахԝазьн мина ԝан бьн. Әм дьхԝазьн кӧ Йаһоԝа жь хәбәрдана мә рʹази бә. Ле һәгәр әм тʹәне хьзмәтеда йан щьватада ширьн-ширьн, бь мәʹрифәти у дьловани хәбәр дьн, ле чахе хушк-бьра мә навиньн, тʹәви нәфәред хԝә сәрт хәбәр дьн, гәло Йаһоԝа ԝе жь мә рʹази бә? (1 Пәтрус 3:7).

6. Әԝ йәк кӧ Кимберлийе хәбәрдана хԝә рʹаст да хәбате, чь кʹар ани?

⁶ Һәгәр әм пʹешкʹеша хәбәрдане рʹаст бьдьнә хәбате, мәрьвед дьн ԝе зәлал бьвиньн, кӧ әм хьзмәткʹаред Йаһоԝа нә. Әԝана ԝе фьрԛийа нав мәрьвед кӧ Хԝәдерʹа хьзмәт дькьн у кәсед кӧ жерʹа хьзмәт накьн, рʹьнд бьвиньн (Малахи  3:18). Ԝәрә әм дина хԝә бьдьнә сәрһатийа хушкәкә бь наве Кимберли. * Мәкʹтәбеда, әԝе дәрс стандьбу, кʹижан кӧ гәрәке тʹәви һәвалдәрсханәкә хԝә һазьр кьра. Чахе ԝана тʹәвайи дәрс һазьр дькьр, һәвалдәрсхана Кимберлийе дит кӧ әԝ дәрһәԛа тʹӧ кәси хьраб хәбәр надә, тʹьме позитив хәбәр дьдә у чʹерʹа накә. Әв йәк ӧса сәр ԝе һʹӧкӧм кьр, кӧ ԝәʹдә шунда әԝе дәстпекьр Кʹьтеба Пироз һин бә. Гава әм зар-зьмане хԝә рʹаст дьдьнә хәбате, әм мәрийа дькʹьшиньн сәр рʹийа рʹастийе у дьле Йаһоԝа гәләк ша дькьн!

7. Гәрәке әм пʹешкʹеша хәбәрдане чаԝа бьдьнә хәбате?

⁷ Әм гьшк дьхԝазьн бь хәбәрдана хԝә рʹумәте бьдьн Йаһоԝа у дьһа незики хушк-бьра бьн. Ԝәрә әм бьньһерʹьн кӧ әм чаԝа дькарьн хәбәрданеда бьбьнә мәсәлә.

8. Хьзмәтеда Иса чаԝа бь хәбәрдана хԝә, мәрʹа бу мәсәлә?

⁸ Гава кәсәк һерса тә рʹадькә, диса жи бь нәрми у бь ԛәдьр хәбәр дә. Чахе Иса хьзмәт дькьр, гәләк щар мәрьва әԝ сущдар дькьрьн. Ԝана дьгот кӧ әԝ пәй хԝарьн у вәхԝарьне кʹәтийә, хьзмәткʹаре Мире-щьна йә, Рʹожа Шәмийе нагьрә у кʹьфьрийа дькә (Мәтта 11:19; 26:65; Луԛа 11:15; Йуһʹәнна 9:16). Ле йәкә Иса бь готьнед сәрт, щаба ԝан нәдьда. Мина ԝи, әм жи гәрәке сәрт щаба мәрьва нәдьн (1 Пәтрус 2:21-23). Ле щарна һеса нинә кӧ әм хԝә бьгьрьн (Аԛуб 3:2). Гәло чь дькарә али мә бькә?

9. Гава әм мьзгине бәла дькьн, чь дькарә али мә бькә хәбәрдана хԝә контрол кьн?

⁹ Һәгәр хԝәйе мале сәрт щаба тә бьдә, һерс нәкʹәвә. Бьраки бь наве Сем дьбежә: «Әз тʹьме дина хԝә дьдьме һәла хԝәйе мале чьԛас һʹәԝще рʹастийе йә, у кӧ әԝ дькарә бе гӧһастьне». Щарна дьбәкә хԝәйе мале һерс бә, чьмки әм ԝәʹдәки нәбаш һатьн бал ԝи. Һәгәр әм рʹасти кәсәки һерс бен, әм дькарьн мина хушкәкә бь наве Лучиа бькьн. Әм дькарьн кьн дӧа бькьн, жь Йаһоԝа аликʹарийе бьхԝазьн кӧ әм рʹьһʹәтийе хԝәй кьн у хԝә бьгьрьн, ԝәки сәрт у беԛәдьр хәбәр нәдьн.

10. Ль гора 1 Тимотʹейо 4:13, гәрәке нета мә чь бә?

¹⁰ Бьбә дәрсдарәки дьһа баш. Тимотʹейо мьзгинванәки щерʹьбанди бу, ле диса жи лазьм бу кӧ әԝ рʹӧһʹанида пешда һәрʹә (1 Тимотʹейо 4:13 бьхунә). Гәло әм чаԝа дькарьн хьзмәтеда бьбьнә дәрсдаред дьһа баш? Гәрәке әм тʹьме хԝә рʹьнд һазьр бькьн. Дәсте мәда гәләк  һащәт һәнә, кʹижан кӧ дькарьн али мә бькьн ԝәки әм бьбьнә дәрсдаред һостә. Мәсәлә, брошура «Хԝәндьн у Һинкьрьнеда Щерʹьбанди бә» у пʹара «Хԝә бона Хьзмәтийе Һазьр кьн» жь «Мина Иса Мәсиһ Бьжин у Хьзмәт кьн; Бәрнама Щьвине». Һәгәр әм хԝә рʹьнд һазьр кьн, әме кем бькʹәвьнә стресе, у әме бькарьбьн бь мерхаси хәбәр дьн.

11. Һьнә хушк-бьра ча бунә дәрсдаред һостә?

¹¹ Сәва кӧ әм бьбьн дәрсдаред һостә, ԝе баш бә кӧ әм дина хԝә бьдьнә хушк-бьред дьн у жь ԝана һин бьн. Сем, бәʹса кʹижани кӧ мә жоре кьрьбу, дина хԝә дьдә хушк-бьред щерʹьбанди у чʹәʹв дьдә ԝан. Хушкәкә бь наве Талиа рʹьнд гӧһ дьдә готарванед щерʹьбанди. Бь сайа ве йәке, әԝ һин буйә кӧ хьзмәтеда чаԝа щаба ԝан пьрса бьдә, кʹижан кӧ мәрьв гәләк щар дьпьрсьн.

12. Бона һьнәка чь һеса нинә бькьн?

¹² Ԝе баш бә кӧ щьватеда әм бь дәнге бьльнд кʹьлама бьстьред у щабед рʹьнд һазьркьри бьдьн (Зәбур 22:22). Бона һьнәка чәтьн ә кӧ бәр кәсед дьн кʹьлама бьстьред йан щабед хԝә бьдьн. Гәло әв йәк тәрʹа жи чәтьн ә? Һәгәр әре, ԝәрә әм бьвиньн кӧ чь али һьнәка кьрийә ԝәки тьрса хԝә алт кьн?

13. Чь дькарә али тә бькә ԝәки тӧ сәр щьвате бь дьл у щан кʹьлама бежи?

¹³ Кʹьлама бь дьл у щан бьстьре. Гава әм щьватада кʹьлама дьбежьн, гәрәке нета мәйә сәрәкә әв бә, кӧ әм пәсьне Йаһоԝа бьдьн. Хушкәкә бь наве Сара хԝә ча странбежәкә баш һʹәсаб накә. Диса жи, әԝ дьхԝазә пе кʹьлама пәсьне Йаһоԝа бьдә. Ләма жи чахе әԝ хԝә бона щьвате һазьр дькә, әԝ кʹьлама жи һазьр дькә. Әԝ кʹьлама дьбьһе, дьстьре у дина хԝә дьде кӧ готьнед кʹьлама чаԝа тʹема щьвинева гьредайи йә. Әԝ дьбежә: «Бь сайа ве йәке, әз дькарьм дьһа баш дина хԝә бьдьмә готьнед кʹьлама, у ида һаԛас бәрхԝә накʹәвьм кӧ дәнге мьн хԝәш ә йан на».

14. Һәгәр тӧ шәрмокә йи, чь дькарә али тә бькә, ԝәки сәр щьвате щаба хԝә бьди?

¹⁴ Тʹьме сәр щьвата щаба хԝә бьдә. Рʹаст ә, әв йәк һьнәкарʹа чәтьн ә. Талиа, бәʹса кʹижане мә жоре кьрьбу, ӧса дьбежә: «Дәнге мьн хԝә бь хԝә рʹьһʹәт ә, ләма кәс те дәрнахә кӧ бь рʹасти бона мьн стресәкә мәзьн ә чахе әз бәр мәрьва хәбәр дьдьм. Мьнрʹа һеса нинә кӧ сәр щьвате щабед хԝә бьдьм». Ле йәкә Талиа сәр хԝә дьхәбьтә, ԝәки щаба бьдә. Гава әԝ хԝә бона щьвата һазьр дькә, әԝ тинә бира хԝә кӧ гава пьрса пешьн те дайине, гәрәке щаба пешьн кьн у зәлал  бә. Әԝ дьбежә: «Һәгәр щаба мьн кьн у һеса бә у тʹәне фькьра сәрәкә нишан кә, әв йәк проблем нинә, чьмки кʹе кӧ щьват дәрбаз дькә, һивийа щабәкә ӧса йә».

15. Дәрһәԛа щабед сәр щьвате гәрәке әм чь бир нәкьн?

¹⁵ Һьнә хушк-бьра шәрмокә ниньн, ле йәкә сәр щьвата щаба надьн. Гәло чьрʹа? Хушкәкә бь наве Щулйета ӧса дьбежә: «Щар-щара әз щаб надьм, чьмки әз дьтьрсьм кӧ щаба мьн гәләк һеса йә у һаԛас хԝәш нинә». Чахе тӧ жи ӧса дьфькьри, бинә бира хԝә кӧ һәгәр әм чь жь дәсте мә те бькьн ԝәки щабед баш бьдьн, Йаһоԝа ԝе жь мә рʹази бә. * Гава әм жь алийе хԝәда һәр тьшти дькьн кӧ сәр щьвина пәсьне ԝи бьдьн у изьне надьн кӧ тьрс мә алт кә, әԝ гәләк ша дьбә.

16. Гәрәке әм хԝә жь чь щурʹә хәбәрдане дур бьгьрьн?

¹⁶ Хԝә жь һәр щурʹә хәбәрдана хьраб дур бьгьрә (Әфәси 4:31). Чаԝа кӧ мә пешда гот, Мәсиһи гәрәке чʹерʹа нәкьн у гьлийед хьраб нәдьнә хәбате. Ле диса һьнә щурʹе хәбәрдане һәнә, жь кʹижана кӧ әм гәрәке хԝә дур бьгьрьн. Мәсәлә, гәрәке әм фәсал бьн ԝәки ԛәрфе хԝә мьләт, бәрәк йан жи култура кәсед дьн нәкьн. Ӧса жи, әм нахԝазьн бь готьнед хԝә дьле мәрьва бешиньн. Бьрак ӧса дьбежә: «Щарна, мьн ԛәрфед хԝә мәрьва дькьр у дьфькьрим кӧ әз тʹәне һʹәнәка дькьм, ле бь рʹасти мьн дьле ԝан дешанд. Бь сала, жьна мьн гәләки али мьн дькьр, ԝәки әз сәр хԝә бьхәбьтьм. Гава әм тʹәне дьминьн, әԝ щарна мьнрʹа дьбежә кӧ хәбәрдана мьн хԝәш нинә у һьм дьле ԝе һьм жи дьле кәсед дьн дешинә».

17. Ль гора Әфәси 4:29, әм ча дькарьн мәрьва ԛәԝи кьн?

¹⁷ Бь гьлийед хԝә мәрьва һелан кә у ԛәԝи кә. Дәԝса кӧ гьли-газьна бьки у мәрьва сущдар ки, пʹайе ԝан бьдә (Әфәси 4:29 бьхунә). Бона Исраелийа гәләк мәʹни һәбун кӧ шекьрдар бьн, ле ԝана һәртʹьм дькьрә кӧтә-кӧт. Һәгәр әм бәрдәԝам кьн газьнед хԝә бькьн, әв йәк дькарә сәр кәсед дьн жи һʹӧкӧм кә. Бинә бира хԝә кӧ хәбәра хьраб йа 10 щәʹсуса чаԝа бу сәбәб кӧ һʹәму Исраели дәстпекьрьн сәр Муса бькьнә кӧтә-кӧт (Жьмар 13:31–14:4). Ле гава әм пʹайе мәрьва дьдьн, һәр кәс кʹаре дьстинә. Мәсәлә, һәвалед ԛиза Йәфтаһ пʹайе ԝе дьдан, у әм дькарьн баԝәр бьн кӧ әԝ йәк али ԝе дькьр, ԝәки хьзмәта хԝә бь амьни  бинә сери (Һʹакьмти 11:40). Сара, йа кӧ мә жоре бәʹса ԝе кьрьбу, ӧса дьбежә: «Гава әм пʹайе хушк-бьра дьдьн, әм нишани ԝан дькьн кӧ һьм Йаһоԝа һьм жи хушк-бьра ԝана һʹьз дькьн». Ләма жи мәщала бьгәрʹә, ԝәки жь дьл пʹайе мәрьва бьди.

18. Ль гора Зәбур 15:1, 2, чьма фәрз ә кӧ әм рʹастийе бежьн, у әв йәк чь те һʹәсабе?

¹⁸ Рʹастийе бежә. Йаһоԝа дәрәԝа нәфрʹәт дькә. Һәгәр әм дьхԝазьн дьле ԝи ша кьн, гәрәке әм тʹьме рʹастийе бежьн (Мәтʹәлок 6:16, 17). Иро гәләк мәрьв дьфькьрьн, ԝәки дәрәԝи тьштәки хьраб нинә. Ле Йаһоԝа ӧса нафькьрә, у гәрәке әм жи мина ԝи бьфькьрьн (Зәбур 15:1, 2 бьхунә). Һьнә кәс рʹастә-рʹаст дәрәԝа накьн, ле бона кʹара хԝә һьнә информасийа вәдьшерьн. Әм гәрәке ве йәке нәкьн у һәр тьштида һʹәлал бьн.

19. Гәрәке әм хԝә жь чь дур бьгьрьн?

¹⁹ Гәвәзтийе нәкә (Мәтʹәлок 25:23; 2 Тʹесалоники 3:11). Щулйета, йа кӧ мә бәʹса ԝе кьрьбу, дьбежә кӧ гәвәзти сәр ԝе чаԝа һʹӧкӧм дькә: «Гава кәсәк гәвәзтийе дькә, әз хәмгин дьбьм у ида итʹбарийа хԝә ԝи мәрьви найньм. Кʹе занә, әԝ дьбәкә паше дәрһәԛа мьн жи гәвәзтийе бькә». Һәгәр тӧ тʹәхмин дьки ԝәки хәбәрдан ԝә һеди-һеди дәрбази сәр гәвәзтийе дьбә, тӧ дькари бь нәрми тʹема хәбәрдане бьгӧһези (Колоси 4:6).

20. Гәрәке әм пʹешкʹеша хәбәрдане чаԝа бьдьнә хәбате?

²⁰ Иро хәбәрдана хьраб гәләк бәлабуйи йә, гәрәке әм хирәт бькьн кӧ хәбәрдана мә Йаһоԝа хԝәш бе. Бир нәкә кӧ пʹешкʹеша хәбәрдане жь Йаһоԝа йә, у әԝ дьхԝазә кӧ әм ве пʹешкʹеше бь щурʹәки баш бьдьнә хәбате. Һәгәр әм жь дьл алийе хԝәда чьԛас дькарьн пʹешкʹеша хәбәрдане ԝәʹде хьзмәтийе, сәр щьвата у жийина һәррʹожида рʹаст дьдьнә хәбате, Йаһоԝа ԝе хирәта мә кʹәрәм кә. Дьнйа тʹәзәда әме жь һʹӧкӧме ве дьнйа хьраб бь тʹәмами хьлаз бьн, у мәрʹа ԝе ида дьһа һеса бә кӧ бь хәбәрдана хԝә рʹумәте бьдьнә Йаһоԝа (Щьһуда 15). Һʹәта ԝе дәме, ԝәрә әм хирәт бькьн, ԝәки готьнед кӧ жь дәве мә дәртен Йаһоԝа хԝәш бен (Зәбур 19:14).