1. Гәдәки чаԝа да кʹьфше, ԝәки әԝ созе дәрһәԛа рʹабуна мьрийа баԝәр дькә?

 ГӘДӘКИ бь наве Метйу гәләк нәхԝәш бу. Ләма жи әԝ гәләк щара һатә операсикьрьне. Гава әԝ һʹәфт сали бу, әԝи тʹәви малбәта хԝә бәрнама JW Бродкастинге^® тʹәмашә дькьр. Хьлазийа бәрнаме, әԝи видео-мьԛамеда дит, кӧ хушк-бьред мә чаԝа ԝан кәсарʹа ша дьбьн, йед кӧ жь мьрьне рʹабунә. b Паше, Метйу дәсте де-баве хԝә гьрт у ԝанрʹа гот: «Дайе, баво, ԝә дит! Һәрге әз бьмьрьм жи, әзе диса бемә сахкьрьне. Һивийа мьн бьн. Әԝ рʹож ԝе бе». Гава де у баве ԝи бьһистьн кӧ һевийа рʹабуна мьрийа бона кӧрʹе ԝан реали йә, әԝана гәләк ша бун.

2-3. Чьрʹа әм гәрәке дәрһәԛа созе рʹабуна мьрийа бьфькьрьн?

² Щарна әм гәрәке дәрһәԛа созе рʹабуна мьрийа бьфькьрьн (Йуһʹәнна 5:28, 29). Гәло чьрʹа? Чьмки рʹожәке һәр кәс дькарә нәхԝәшикә гьран бькʹәвә, йан жи мәрьвәки хԝәйи һʹьзкьри ӧнда кә (Ԝаиз 9:11; Аԛуб 4:13, 14). Һевийа рʹабуна мьрийа али мә дькә, ԝәки әм һьмбәри дәрдед ӧса сәбьр кьн (1 Тʹесалоники 4:13). Кʹьтеба Пироз дьбежә, ԝәки Баве мәйи әʹзмана мә нас дькә у мә гәләки һʹьз дькә (Луԛа 12:7). Йаһоԝа Хԝәде мә ӧса баш нас дькә, кӧ әԝе мә вәгәрʹинә жийине хут бь ԝан хәйсәт-һʹӧнӧра, кʹижан кӧ пешийа мьрьне щәм мә һәбун. Әԝ мә гәләк һʹьз дькә, у әԝ дьхԝазә жийина һʹәта-һʹәтайе бьдә мә. Һәрге әм бьмьрьн жи, әԝе мә жь мьрьне рʹакә!

³ Ве готареда пешийе әме бьвиньн, кӧ чьрʹа әм дькарьн баԝәрийа хԝә созе дәрһәԛа рʹабуна мьрийа биньн. Паше, әме дина хԝә бьдьнә ве сәрһатийе, кӧ рʹеза сәрәкә бәʹса ве дькә: «Бьре тәйе жь мьрьне рʹабә» (Йуһʹәнна 11:23). Әв сәрһати ԝе баԝәрийа мә ԛәԝи кә. Паше жи, әме бьвиньн  кӧ әм чь дькарьн бькьн, ԝәки һевийа рʹабуна мьрийа бона мә дьһа реали бә.

4. Сәва кӧ әм баԝәрийа хԝә созәки биньн, әм гәрәке чьда баԝәр бьн? Мәсәле бинә.

⁴ Сәва кӧ әм баԝәрийа хԝә созәки биньн, әм гәрәке баԝәр бьн, ԝәки хԝәстьн у ԛәԝата кәсе кӧ соз дайә мә, һәйә, ԝәки созе хԝә бинә сери. Ԝәрә әм мәсәләке биньн. Бьдьнә бәр чʹәʹве хԝә, кӧ фьртонәкә ԛәԝи зьрарәкә мәзьн дайә ханийе тә. Һәваләки тә ӧса соз дьдә тә: «Әзе али тә бькьм, ԝәки тӧ ханийе хԝә диса ава ки». Әԝ бь дьл у щан дьхԝазә али тә бькә у тӧ дӧдьли наби, кӧ әԝе созе хԝә әʹсә бинә сери, чьмки әԝ һостәки щерʹьбанди йә у һащәтед ԝи жи һәнә, тӧ зани кӧ әԝ бь рʹасти дькарә али тә бькә. Ләма жи тӧ баԝәрийа хԝә созе ԝи тини. Ле гәло хԝәстьн у ԛәԝата Хԝәде һәйә, ԝәки созе хԝә дәрһәԛа сахкьрьна мьрийа бинә сери?

5-6. Әм чьрʹа баԝәр дькьн кӧ Йаһоԝа дьхԝазә мәрьва жь мьрьне вәгәрʹинә жийине?

⁵ Гәло Йаһоԝа бь рʹасти дьхԝазә кәсед мьри диса вәгәрʹинә жийине? Бешьк, әре! Бь аликʹарийа рʹӧһʹе Пироз, Кʹьтеба Пирозда һатийә ньвисаре, ԝәки Хԝәде дәрһәԛа рʹабуна жь мьрьне чь соз дайә (Ишайа 26:19; Һосәйа 13:14; Әʹйанти 20:11-13). У Йаһоԝа созе хԝә тʹьме тинә сери (Йешу 23:14). Йаһоԝа бь дьл у щан дьхԝазә кәсед мьри диса вәгәрʹинә жийине. Чьрʹа әм дькарьн ве йәке бежьн?

⁶ Бьфькьрьн дәрһәԛа готьнед Ибо. Әԝи баԝәр дькьр кӧ һәрге әԝ бьмьрә жи, Йаһоԝа жь дьл дьхԝазә кӧ диса ԝи жь мьрьне рʹакә (Ибо 14:14, 15). Һʹәма бь ԝи щурʹәйи, Йаһоԝа бь дьл у щан һивийа ԝе рʹоже йә, ԝәки һʹәму хьзмәткʹаред хԝә жь мьрьне рʹакә у кӧ әԝана сьһʹәт-ԛәԝат у бәхтәԝар бьн. Гәло Кʹьтеба Пирозда чь те готьне дәрһәԛа ԝан мәрьва, мәщала кʹижана тʹӧнә бу дәрһәԛа Ԝи пебьһʹәсьн? Хԝәдайе мәйи дьлован дьхԝазә ԝана жи жь мьрьне рʹакә (Кʹаред Шандийа 24:15). Әԝ дьхԝазә мәщале бьдә ԝан, кӧ әԝана бьбьн достед ԝи у әʹмьре һʹәта-һʹәтайе бьстиньн (Йуһʹәнна 3:16). Бәле, Йаһоԝа һʹьзрәта ве рʹоже йә, кӧ мәрьва жь мьрьне вәгәрʹинә жийине.

7-8. Әм чьрʹа дькарьн баԝәр бьн, кӧ ԛәԝата Йаһоԝа һәйә ԝәки мьрийа диса вәгәрʹинә жийине?

⁷ Гәло ԛәԝата Йаһоԝа һәйә кӧ мьрийа диса вәгәрʹинә жийине? Бешьк, әре! Чьмки әԝ «Хԝәдейе Һʹәму Зорайийе» йә (Әʹйанти 1:8). Ԛәԝата Йаһоԝа ӧса мәзьн ә, кӧ әԝ дькарә һʹәму дьжмьна, һәла һе мьрьне жи кʹӧта кә (1 Корьнтʹи 15:26). Әв йәк мә ԛәԝи дькә у дьлбинийе дьдә мә. Ԝәрә әм дина хԝә бьдьнә сәрһатийа хушка мә Емма Арнолд. Шәрʹе Һʹәмдьнйайе йа II-да, баԝәрийа ԝе у малбәта ԝе гәләк щар һатә щерʹьбандьне. Ԛиза Еммайе гәләки хәмгин бу, чьмки мәрьвед ԝейә һʹьзкьри, гьртигәһед Натсистада мьрьн. Емма бәр дьле ԝеда һат у готе: «Һәрге йед мьри вәнәгәрʹьн жийине, әв йәк те һʹәсабе кӧ дьжмьне мә, демәк мьрьн жь Хԝәде ԛәԝаттьр ә. Тьште ӧса наԛәԝьмә, чьмки Хԝәде ԝе әʹсәйи ԝана жь мьрьне рʹакә». Бешьк, тʹӧ тьшт бәрамбәри ԛәԝата Йаһоԝа набә! Чаԝа кӧ Хԝәде мәрьв бь ԛәԝата хԝә әʹфьрандьнә, әԝ ӧса жи дькарә ԝана бь ԛәԝата хԝә жь мьрьне рʹакә.

⁸ Мәʹникә дьн кӧ чьрʹа әм заньн, ԝәки Хԝәде дькарә мьрийа диса вәгәрʹинә жийине, әԝ ә, кӧ биранина ԝи бесинор ә. Хԝәде наве һәр стәйркәке занә (Ишайа 40:26). Кәсед мьри жи бира Хԝәдеда ньн (Ибо 14:13; Луԛа 20:37, 38). Әԝ һәр тьшти һур бь һур дәрһәԛа кәсед мьри занә,  мәсәлә рʹәнг-рʹуйе ԝан, хәйсәт-һʹӧнӧред ԝан у ӧса жи биранин у сәрһатийа ԝан.

9. Чьрʹа әм баԝәрийа хԝә созе Йаһоԝа тиньн кӧ әԝе мьрийа вәгәрʹинә жийине?

⁹ Чьрʹа әм баԝәрийа хԝә созе Йаһоԝа тиньн, кӧ әԝе мьрийа вәгәрʹинә жийине? Чьмки һьм хԝәстьн һьм жи ԛәԝата ԝи һәйә, ԝәки ви созе хԝә бинә сери. Мәʹникә дьн жи әв ә, кӧ Йаһоԝа бәре жи кәсед мьри сах дькьр. Мәсәлә, әԝи ԛәԝат да Иса у һьнә хьзмәткʹаред хԝәйә амьн, кӧ ве йәке бькьн. Ньһа әме дәрһәԛа кʹәрәмәтәкә Иса кʹур шеԝьр кьн, кʹижан кӧ Йуһʹәнна сәре 11-да һатийә ньвисаре.

10. Чахе Иса жь Бәйтанйайе дур бу, чь ԛәԝьми у әԝи чь кьр? (Йуһʹәнна 11:1-3)

¹⁰ Бьхунә Йуһʹәнна 11:1-3. Бьдә бәр чʹәʹве хԝә, кӧ хьлазийа сала 32 Д.М., Бәйтанйайеда чь ԛәԝьми. Досте Иса, Лазар у һәрдӧ хушкед ԝи Мәрйәм у Мәртʹа ви гӧндида дьжитьн (Луԛа 10:38-42). Лазар нәхԝәш кʹәтьбу у хушкед ԝи хәмгин бун. Ԝана дәрһәԛа нәхԝәшийа ԝи әʹлами Иса кьр. Ԝи ԝәʹдәйи, әԝ дәрбази алийе дьн жь чʹәме Урдӧне бьбу у ԝәкә рʹийа дӧ рʹожа жь Бәйтанйайе дур кʹәтьбу (Йуһʹәнна 10:40). Ле йазьх, һʹәта хәбәр гьһиштә Иса, Лазар ида мьр. Рʹаст ә Иса бьһист кӧ досте ԝи мьрийә, ле әԝ диса жи дӧ рʹожа ԝедәре ма. Паше әԝ чу Бәйтанйайе. Чахе Иса гьһиштә ԝедәре, ида чар рʹож бу, кӧ Лазар мьрьбу. Иса дьхԝәст бона достед хԝә кʹәрәмәтәкә мәзьн бькә у бь ви щурʹәйи рʹумәте бьдә Хԝәде (Йуһʹәнна 11:4, 6, 11, 17).

11. Әм жь ве сәрһатийе чь дькарьн һин бьн дәрһәԛа һәвалтийе?

¹¹ Әм дькарьн жь ве сәрһатийе дәрһәԛа достийе чь һин бьн? Һәла бьфькьрә: Гава Мәрйәм у Мәртʹайе дәрһәԛа нәхԝәшийа Лазар, Исарʹа әʹламәти шандьн, ԝана ԝирʹа нәгот кӧ бьра әԝ бе Бәйтанйайе. Ԝана тʹәне жерʹа гот кӧ досте ԝи нәхԝәш ә (Йуһʹәнна 11:3). Гава Лазар мьр, Иса дькарьбу дурва жи әԝ жь мьрьне рʹакьра. Ле Иса сафи кьр, ԝәки һәрʹә Бәйтанйайе, сәва кӧ кʹеләка Мәрйәме у Мәртʹайе бә. Гәло достәки тәйи ӧса һәйә, кӧ һазьр ә бе готьна тә жи кʹеләка тә бә у али тә бькә? Һәвале рʹаст «рʹожа охьрме гьран» һазьр ә аликʹарийе бьдә мә (Мәтʹәлок 17:17). Мина Иса, әм жи дькарьн бона кәсед дьн бьбьн һәвалед ԛәнщ! Гәло Иса паше чь кьр? Ԝәрә әм бьньһерʹьн.

12. Иса чь соз да Мәртʹайе у әԝе чьрʹа дькарьбу баԝәрийа хԝә ви сози бинә? (Йуһʹәнна 11:23-26)

¹² Бьхунә Йуһʹәнна 11:23-26. Чахе Хушка Лазар, Мәртʹайе бьһист, кӧ Иса незики Бәйтанйайе йә, әԝ чу пешийа ԝи у жерʹа гот: «Хӧдан, һәгәр тӧ вьр буйайи, бьре мьн нәдьмьр» (Йуһʹәнна 11:21). Иса дькарьбу Лазар ԛәнщ кьра. Ле әԝи дьхԝәст тьштәки дьһа мәзьн бькьра. Әԝи соз да Мәртʹайе: «Бьре тәйе жь мьрьне рʹабә». Паше әԝи Мәртʹайерʹа гот кӧ әԝ чьрʹа дькарә баԝәрийа хԝә гьлийед ԝи бинә: «Әз ьм рʹабун у жийин!» Бәле, Хԝәде ԛәԝат дайә Иса, ԝәки мьрийа вәгәрʹинә жийине. Щарәке,  Иса кәчʹькәк һьнә ԝәхт шунда паши мьрьна ԝе, вәгәрʹандә жийине. Щарәке жи, әԝи хортәк һʹәма рʹожа мьрьна ԝи, вәгәрʹандә жийине (Луԛа 7:11-15; 8:49-55). Ле гәло әԝи дькарьбу кәсәки кӧ ида чар рʹож мьрьбу у бин кʹәтьбуйе, жь мьрьне рʹакьра?

13. Ль гора Йуһʹәнна 11:32-35, гава Иса дит кӧ Мәрйәм у кәсед дьн дьгьрин, әԝи чь кьр? (Бьньһерʹә ӧса жи шькьл.)

¹³ Бьхунә Йуһʹәнна 11:32-35. Бьдә бәр чʹәʹве хԝә кӧ паше чь ԛәԝьми. Мәрйәм, хушка Лазарә дьн, чу пешийа Иса. Әԝе жи ӧса готә ԝи: «Хӧдан, һәгәр тӧ ль ве дәре буйайи, бьре мьн нәдьмьр». Мәрйәм у кәсед дьн жи гәләк хәмгин бун. Гава Иса еша дьле ԝан у һесьред чʹәʹве ԝан дитьн, әԝ гәләки хәмгин бу. Дьле Иса сәр ԝан шәԝьти у әԝ жи тʹәви ԝан гьрийа. Әԝи заньбу кӧ чахе достәки мәрьва дьмьрә, әв йәк ешәкә гәләк гьран ә. Бешьк, әԝи жь дьл дьхԝәст мәʹнийа һесьред ԝан кʹӧта кә!

14. Әм жь дьлшәԝатийа Иса һьндава һесьред Мәрйәме, дәрһәԛа Йаһоԝа чь һин дьбьн?

¹⁴ Дьлшәԝатийа Иса һьндава һесьред Мәрйәме нишан дькә, ԝәки дьле Йаһоԝа сәр мә дьшәԝьтә. Чьрʹа әм дькарьн ӧса бежьн? Чаԝа кӧ мә готара пешьнда дит, Иса бь тʹәмами чʹәʹв дьдә һәст у фькьред Баве хԝә (Йуһʹәнна 12:45). Дьле Иса сәр достед ԝи ӧса дьшәԝьти, кӧ һесьр жь чʹәʹве ԝи дьбарин. Жь ве йәке, әм фәʹм дькьн кӧ гава Йаһоԝа һесьред чʹәʹве мә дьвинә, әԝ гәләки хәмгин дьбә (Зәбур 56:8). Бешьк, занәбуна ве йәке, кӧ дьле Йаһоԝа сәр мә дьшәԝьтә, али мә дькә ԝәки әм дьһа незики Хԝәдайе хԝәйи дьлован бьн.

15. Ль гора Йуһʹәнна 11:41-44, бәр тʹьрба Лазар чь ԛәԝьми? (Бьньһерʹә ӧса жи шькьл.)

¹⁵ Бьхунә Йуһʹәнна 11:41-44. Гава Иса гьһиштә тʹьрба Лазар, әԝи гот кӧ бьра кәвьре ль бәр дәре шкәфте бьдьнә алики. Ле Мәртʹайе гот, кӧ ида бин кʹәтийә щьнйазе ԝи. Иса ӧса щаб да: «Мьн тәрʹа нәгот, һәгәр тӧ баԝәр бьки, те рʹумәта Хԝәде бьбини?» (Йуһʹәнна 11:39, 40). Паше Иса дина хԝә да әʹзмен у бәр  һʹәмуйа дӧа кьр. Әԝи дьхԝәст бона ве йәке рʹумәте бьдә Йаһоԝа. Паше Иса бь дәнге бьльнд гот: «Лазар, дәркʹәвә!» У Лазар жь тʹьрбе дәркʹәт! Иса кʹәрәмәтәкә ӧса кьр, кʹижан кӧ бона мәрьва тьштәки нәбуйи бу.

16. Сәрһатийа жь Йуһʹәнна сәре 11 чаԝа баԝәрийа мә һьндава рʹабуна мьрийа дьһа ԛәԝи дькә?

¹⁶ Сәрһатийа жь Йуһʹәнна сәре 11 баԝәрийа мә һьндава рʹабуна мьрийа дьһа ԛәԝи дькә. Гәло чаԝа? Иса Мәртʹайерʹа гот: «Бьре тәйе жь мьрьне рʹабә» (Йуһʹәнна 11:23). Иса мина Баве хԝә, һьм дьхԝазә һьм жи дькарә ви созе хԝә бинә сери. Жь һесьред ԝи те кʹьфше, кӧ әԝ бь дьл у щан дьхԝазә мьрьне у еша дьла жь бо дәрде мьрьне, бь тʹәмами бьдә һьлдане. Чахе Лазар жь тʹьрбе дәркʹәт, щарәке жи һатә избаткьрьне, кӧ ԛәԝата Иса һәйә ԝәки мьрийа вәгәрʹинә жийине. Ӧса жи, гьлийед кӧ Иса Мәртʹайерʹа готьбу, бинә бира хԝә: «Мьн тәрʹа нәгот, һәгәр тӧ баԝәр бьки, те рʹумәта Хԝәде бьбини?» (Йуһʹәнна 11:40). Гәләк мәʹни һәнә, кӧ әм баԝәрийа хԝә созе Йаһоԝа биньн, дәрһәԛа рʹабуна мьрийа. Гәло әм чь дькарьн бькьн, ԝәки һевийа рʹабуна мьрийа бона мә дьһа реали бә?

17. Гава әм Кʹьтеба Пирозда сәрһатийед дәрһәԛа рʹабуна мьрийа дьхуньн, гәрәке әм сәр чь бьфькьрьн?

¹⁷ Сәрһатийед дәрһәԛа рʹабуна мьрийа бьхунә у сәр ԝан кʹур бьфькьрә. Кʹьтеба Пироз бәʹса һʹәйшт мәрьва дькә, йед кӧ жь мьрьне һатьбун рʹакьрьне. c Ван һәр сәрһатийа кʹур леколин кә. Гава тӧ ван сәрһатийа дьхуни, бинә бира хԝә кӧ әԝана мәрьвнә мина мә бун. Бьфькьрә, тӧ жь ԝан чь дькари һин би. Жь хԝә бьпьрсә: Һәр сәрһати чаԝа нишан дькә, кӧ хԝәстьн у ԛәԝата Хԝәде һәйә, ԝәки кәсед мьри вәгәрʹинә жийине. У дәрһәԛа сахкьрьна Иса кʹур бьфькьрә, кʹижан кӧ  һәрә фәрз бу. Бь сәда мәрьв бунә шәʹдә, кӧ Иса жь мьрьне һатә рʹакьрьне, у әв йәк буйә һʹиме баԝәрийа мә (1 Корьнтʹи 15:3-6, 20-22).

18. Кʹьламед дәрһәԛа һевийа рʹабуна мьрийа ча дькарьн али мә бькьн? (Ӧса жи бьньһерʹә спартьн.)

¹⁸ Кʹьламед дәрһәԛа һевийа рʹабуна мьрийа бьбьһе, бьстьре у сәр ԝан бьфькьрә d (Әфәси 5:19). Әв кʹьлам баԝәрийа мә һьндава рʹабуна мьрийа ԛәԝи дькьн у бона мә дьһа реали дькьн. Гӧһ бьдә ван кʹьлама у бьстьре. Ԝәʹде Ԛӧльхкьрьна тʹәви малбәте сәр хәбәред кʹьлама бьфькьрьн. Хәбәред кʹьлама әзбәри бькә у бьра әԝ тʹьме һʹьш у дьле тәда бьн. Һәрге әʹмьре тә бькʹәвә ԛәзийе йан мәрьвәки тәйи һʹьзкьри бьмьрә, рʹӧһʹе пироз ԝе али тә бькә, ԝәки тӧ ван кʹьлама бини бира хԝә, йед кӧ ԝе ԛәԝате бьдьн тә у дьле тә рʹьһʹәт бькьн.

19. Әм дькарьн дәрһәԛа рʹабуна мьрийа чь бьдьн бәр чʹәʹве хԝә? (Бьньһерʹә чаргошә « Тӧйе Чь жь Ԝана Бьпьрси?»)

¹⁹ Дьнйа тʹәзә бьдьнә бәр чʹәʹве хԝә. Йаһоԝа әм ӧса әʹфьрандьнә, кӧ әм дькарьн дьнйа тʹәзә бьдьнә бәр чʹәʹве хԝә. Хушкәк ӧса дьбежә: «Мьн дьнйа тʹәзә һаԛас дьани бәр чʹәʹве хԝә кӧ һәла һе бина кӧлирка жи дьһатә мьн». Бьдә бәр чʹәʹве хԝә кӧ тӧ дьнйа тʹәзәда хьзмәткʹаред Йаһоԝайә амьн, йед һена бәре пе чʹәʹве хԝә дьвини. Тӧ дьхԝази илаһи кʹе бьвини? Тӧйе кʹижан пьрса бьди ԝан? Ӧса жи, бьдә бәр чʹәʹве хԝә, кӧ чахе тӧ һәвал у мәрьвед хԝәйә незик у һʹьзкьри бьвини, тӧйе чьԛас ша би, чь ԝанрʹа бежи у ча ԝана һʹәмез ки!

20. Әм бь дьл у щан чь дьхԝазьн бькьн?

²⁰ Әм бона созе Йаһоԝайә дәрһәԛа рʹабуна мьрийа гәләки шекьрдар ьн! Әм баԝәр дькьн кӧ әԝе созе хԝә бинә сери, чьмки һьм хԝәстьн у һьм жи ԛәԝата ԝи һәйә. Әм ньһада, бь дьл у щан дьхԝазьн баԝәрийа хԝә һьндава рʹабуна мьрийа дьһа ԛәԝи кьн. Ӧса әме дьһа незики Хԝәде бьн, йе кӧ әв созе хԝәш дайә мә: «Мәрьве Тә ԝе Диса Рʹабә!»