1. Чь ԛәԝьми, гава Иса кʹәрәмәта хԝәйә пешьн кьр?

 БЬДӘ бәр чʹәʹве хԝә, кӧ дәстпека хьзмәтийа Иса чь ԛәԝьми. Әв йәк пайизе сала 29 Д.М.-да ԛәԝьми. Иса, дийа ԝи Мәрйәм у чәнд шагьртед ԝи, сәр дәʹԝатәке ль Ԛанайе һатьнә тʹәглифкьрьне. Әв гӧнд жь бажаре Иса, демәк жь Ньсрәте, алийе бакӧре бу. Мәрйәм һәвала мала бук у зәʹве бу, әԝе али ԝан дькьр ве йәкеда, кӧ бона мевана хәм дькьр. Ле ԝәʹде дәʹԝате, чәтьнайи пешда һат, жь бо чь жи һьм малбәт, һьм жи бук зәʹва, дькарьбун шәрми бьмана. b Дьбәкә меван дьһа зедә һатьн, нә кӧ әԝана һивийе бун. Мәрйәм зу чу щәм Иса у жерʹа гот: «Шәрава ԝан нәма» (Йуһʹәнна 2:1-3). Гәло Иса чь кьр? Әԝи тьштәки әʹщебмайи кьр, әԝи бь кʹәрәмәти ав кьрә «шәрава рʹьнд» (Йуһʹәнна 2:9, 10).

2-3. (а) Һьнә кʹәрәмәтед Иса кʹижан бун? (б) Әм ча дькарьн жь шеԝьркьрьна кʹәрәмәтед Иса кʹаре бьстиньн?

² Ԝәʹде хьзмәтийа хԝәйә сәр әʹрде, Иса гәләк кʹәрәмәт кьрьн. c Әԝи ԛәԝата хԝә дьда хәбате, ԝәки али бь дәһа һʹәзара мәрьва бькә. Мәсәлә, дӧ кʹәрәмәтед ԝи әв бун: Щарәке әԝи 5 000 мәрьв тʹер кьр у паше жи  4 000 мәрьв, һәрге әм жьн у зарʹа жи һʹәсаб кьн, әме бьгьһижьнә 27 000 мәрьва зедәтьр (Мәтта 14:15-21; 15:32-38). Һәрдӧ дәрәщада жи, Иса гәләк кәсед нәхԝәш жи ԛәнщ кьрьн (Мәтта 14:14; 15:30, 31). Бьдьнә бәр чʹәʹве хԝә, кӧ мәрьв чьԛас ша бун, гава Иса ԝана ԛәнщ кьр у тʹер кьр!

³ Кʹәрәмәтед Иса иро жи бона мә гәләк фәрз ьн. Ве готареда, әме дина хԝә бьдьн чәнд кʹәрәмәтед Иса, йед кӧ ԝе баԝәрийа мә дьһа ԛәԝи кьн. Паше әме бьвиньн, кӧ кʹәрәмәтед Иса ча мьлукти у дьлшәԝатийа ԝи дьдьнә кʹьфше, у ча әм дькарьн чʹәʹв бьдьнә һʹӧнӧред ԝи.

4. Әм жь кʹәрәмәтед Иса дәрһәԛа кʹе дькарьн пебьһʹәсьн?

⁴ Әм дькарьн жь кʹәрәмәтед Иса нә тʹәне дәрһәԛа ԝи, ле дәрһәԛа Баве ԝи жи гәләк тьшта пебьһʹәсьн. Йаһоԝа Хԝәде ԛәԝат дьда Иса, ԝәки әԝ кʹәрәмәта бькә. Мәтта 9:35-да ӧса те готьне: «Иса һʹәму гӧнд у бажара дьгәрʹийа, кʹьништед ԝанда һин дькьр, Мьзгинийа Пʹадшатийе даннасин дькьр у ль нав щьмәʹте һʹәму щурʹә нәхԝәши ԛәнщ дькьрьн». Иса пе хәбәрдан, кьред хԝә у кʹәрәмәтед кӧ дькьр, чʹәʹв дьда Баве хԝә, у бь ве йәке ньһерʹандьн у һәстед Баве хԝә әʹйан дькьр (Йуһʹәнна 14:9). Дина хԝә бьдьнә се дәрсед кӧ әм дькарьн жь кʹәрәмәтед Иса һин бьн.

5. Чь Иса һелан дькьр кӧ кʹәрәмәта бькә? (Мәтта 20:30-34)

⁵ Йа пешьн, Иса у Баве ԝи гәләки мә һʹьз дькьн. Гава Иса бь кʹәрәмәта дәрде мәрьва сьвьк дькьр, әԝи нишан дькьр кӧ әԝ мәрьва гәләк һʹьз дькә. Щарәке, дӧ меред кор жь Иса лава дькьрьн кӧ али ԝан бькә (Бьхунә Мәтта 20:30-34). Дина хԝә бьдьне кӧ бәри пешьн «гӧне Иса ль ԝан һат», у паше әԝи әԝана ԛәнщ кьрьн. Ӧса жи, дьлшәԝатийа ԝи, йа кӧ нишана һʹьзкьрьна ԝи бу, ԝи һелан дькьр, кӧ әԝ кәсед бьрʹчи тʹер бькә у мерәки кʹоти ԛәнщ бькә (Мәтта 15:32; Марԛос 1:41). Йаһоԝа, Хԝәдейе рʹәʹм у дьлован у Кӧрʹе ԝи, гәләки мә һʹьз дькьн у бона мә хәм дькьн (Луԛа 1:78; 1 Пәтрус 5:7). Йаһоԝа у Иса һʹьзрәта ԝе рʹоже нә, кӧ һʹәму кӧл-дәрдед мәрьва бьдьнә һьлдане!

6. Хԝәде чь ԛәԝат дайә Иса?

⁶ Йа дӧда, Хԝәде ԛәԝат дайә Иса, ԝәки әԝ һʹәму проблемед мәрьва бьдә һьлдане. Пе кʹәрәмәтед хԝә, Иса нишан дькьр, кӧ ԛәԝата ԝи һәйә ван проблемед мә сафи кә, йед кӧ мәйе тʹӧ щар нькарьбуйа пе ԛәԝата хԝә сафи кьра. Мәсәлә, ԛәԝата ԝи һәйә, ԝәки мә жь кʹока кӧл-дәрдед мәрьва хьлаз бькә, демәк жь нәхԝәши у мьрьне, кӧ дәрбази сәр мә бунә (Мәтта 9:1-6; Рʹомайи 5:12, 18, 19). Кʹәрәмәтед ԝи бь зәлали нишан дькьрьн, ԝәки әԝ дькарә «һәр щурʹә» нәхԝәшийа ԛәнщ бькә у һәла һе мәрьва жи жь мьрьне рʹакә (Мәтта 4:23; Йуһʹәнна 11:43, 44). Ӧса жи, ԛәԝата ԝи һәйә кӧ фьртона бьдә сәкьнандьне у мәрьва жь һʹӧкӧме щьна хьлаз кә (Марԛос 4:37-39; Луԛа 8:2). Әм гәләк ша нә, ԝәки Йаһоԝа ԛәԝатәкә ӧса мәзьн дайә Кӧрʹе хԝә!

7-8. (а) Кʹәрәмәтед Иса чь нишан дькьн? (б) Дьнйа тʹәзәда, тӧ илаһи дьхԝази кʹижан кʹәрәмәте бьвини?

⁷ Йа сьсийа, әм дькарьн сәд сәләфи  баԝәр бьн, кӧ һʹәму созед Йаһоԝа ԝе бь сайа Пʹадшатийа Ԝи бенә сери. Кʹәрәмәтед кӧ Иса сәр әʹрде кьрьбун, мәсәлед ве йәке нә, кӧ ахьрийеда ча Пʹадше әʹзмана, әԝе кʹәрәмәтед һе мәзьн бькә. Бьдә бәр чʹәʹве хԝә, кӧ дәмәкә незикда, бьн сәрԝертийа Исада, жийин ԝе чаԝа бә. Һәр кәс ԝе сьһʹәт-ԛәԝат бә, чьмки Иса ԝе һʹәму мәрьвед нәхԝәш у сәԛәт ԛәнщ бькә (Ишайа 33:24; 35:5, 6; Әʹйанти 21:3, 4). Тӧ кәс ԝе бьрʹчи нәминә у жь тʹәшԛәлед тʹәбйәте зьраре нәстинә (Ишайа 25:6; Марԛос 4:41). Гава мәрьвед мәйә һʹьзкьри жь мьрьне рʹабьн, шабунәкә гәләк мәзьн ԝе бькʹәвә дьле мә! (Йуһʹәнна 5:28, 29) Дьнйа тʹәзәда илаһи кʹижан кʹәрәмәта тӧ дьхԝази бьвини?

⁸ Гава Иса кʹәрәмәт дькьрьн, әԝи нишан дькьр кӧ әԝ йәки мьлук у дьлшәԝат ә. Әм гәрәке чʹәʹв бьдьнә ван һʹӧнӧред ԝи. Ньһа әме дина хԝә бьдьнә дӧ мәсәла. Йа пешьн дәрһәԛа дәʹԝате йә, йа кӧ Ԛанайеда дәрбаз дьбу.

9. Иса сәр дәʹԝате чь кьр? (Йуһʹәнна 2:6-10)

⁹ Бьхунә Йуһʹәнна 2:6-10. Гава сәр дәʹԝате шәрав хьлаз бу, гәло Иса борщдар бу тьштәки бькә? Һәмьки на! Кʹьтеба Пирозда нәһатьбу пʹехәмбәртикьрьне, кӧ Мәсиһ ԝе бь кʹәрәмәти  шәраве чекә. Ле һәла бьдә бәр чʹәʹве хԝә, ԝәки сәр тʹәхте дәʹԝата тә, тьштәк кем буйа, тәйе хԝә ча тʹәхмин кьра? Бешьк, дьле Иса сәр бук у зәʹва шәԝьти, у әԝи нәдьхԝәст кӧ әԝана бәр чʹәʹве хәлԛе шәрми буна. Ләма жи, Иса әв кʹәрәмәт кьр. Әԝи ԝәкә 390 литьр ав кьрә шәравәкә баш. Гәло әԝи чьрʹа һаԛас шәрав чекьр? Дьԛәԝьмә әԝи дьхԝәст али бук-зәʹве бькә, ԝәки әԝана ве шәраве бьфьрошьн, сәва кӧ паше әʹбура хԝә бькьн. Бешьк, бук у зәʹва бона ве пʹешкʹеше гәләки рʹази бун!

10. Һьнә фькьред һʹәԝас жь Йуһʹәнна сәре 2, дәрһәԛа чь нә? (Бьньһерʹә ӧса жи шькьл.)

¹⁰ Ԝәрә әм чәнд фькьред жь Йуһʹәнна сәре 2 шеԝьр кьн. Тә дина хԝә дайе, кӧ Иса хԝәха кʹупькед кәвьр бь аве тʹьжә нәкьр? Әԝи нәхԝәст дина мәрьва бькʹьшинә сәр хԝә, ләма жи хӧламарʹа гот кӧ әԝана кʹупькед аве тʹьжә кьн (Рʹеза 6 у 7). У паше гава әԝи ав кьрә шәрав, әԝи хԝәха һьнә шәрав нәбьрә бал Сәрдәʹԝати. Диса жи, әԝи хӧламарʹа гот ве йәке бькьн (Рʹеза 8). Бешьк, Иса кʹасәкә шәраве бәр чʹәʹве мевана һьлнәда у нәгот: «Һәла бьньһерʹьн, шәрава кӧ мьн чекьрийә чьԛас хԝәш ә!»

11. Әм дькарьн жь кʹәрәмәта Иса чь һин бьн?

¹¹ Әм дькарьн жь ве кʹәрәмәта Иса чь һин бьн? Әм дәрһәԛа мьлуктийе һин дьбьн. Иса тʹӧ щара пʹайе хԝә нәдьда у хԝә ԛӧрʹә нәдькьр, кӧ әԝи кʹәрәмәт дькьрьн. Дәԝса ве йәке, әԝи һәртʹьм бь мьлукти Баве хԝә рʹумәт дькьр (Йуһʹәнна 5:19, 30; 8:28). Мина Иса, һәрге әм жи бь мьлукти сәр хԝә бьфькьрьн, әме тʹӧ щар пʹайе хԝә нәдьн у хԝә ԛӧрʹә нәкьн, гава тьштәкида пешда дьчьн. Әм хьзмәтийеда чь бькьн жи, гәрәке әм пʹайе хԝә нәдьн, ле пәсьне Йаһоԝа Хԝәде бьдьн (Йерәмйа 9:23, 24). Бәле, Йаһоԝа һежайи рʹумәте йә. Бе аликʹарийа Хԝәде, әм ԛә нькарьн пешдачуйи бьн (1 Корьнтʹи 1:26-31).

12. Әм дькарьн жь мьлуктийа Иса чь һин бьн? Мәсәле бинә.

¹² Әм дькарьн жь мьлуктийа Иса Мәсиһ тьштәки дьн жи һин бьн. Ве мәсәле бинә бәр чʹәʹве хԝә: Рʹуспик али хьзмәткʹарәки щьвате дькә, кӧ әԝ готара хԝәйә пешьн һазьр кә. Паше, әв бьре щаһьл пе готарәкә гәләк хԝәш дәрте, у хушк-бьра гәләк ша дьбьн. Паши щьвине, чәнд кәс тенә щәм рʹуспи у жерʹа дьбежьн: «Ԝи бьре мәйи щаһьл готарәкә гәләк хԝәш хԝәнд». Гәло лазьм ә, кӧ рʹуспи ӧса бежә: «Рʹаст ә, ле мьн жи гәләк аликʹари да ԝи»? Йан әԝ гәрәке бь мьлукти бежә: «Рʹаст ә, әз гәләки ԝирʹа фьрнаԛ дьбьм»? Һәрге әм мьлук бьн, әме дина кәсед дьн нәкʹьшиньн сәр ԛәнщийа кӧ мә кьрийә. Йаһоԝа һәр тьшти дьвинә у ԛәнщийа мә дьшекьринә (Бәрамбәр кьн Мәтта 6:2-4; Ибрани 13:16). Һьлбәт, һәрге әм чʹәʹв дьдьнә мьлуктийа Иса, әме дьле Йаһоԝа ша бькьн (1 Пәтрус 5:6).

13. Иса незики бажаре Найине чь дит у әԝи чь кьр? (Луԛа 7:11-15)

¹³ Бьхунә Луԛа 7:11-15. Бьдә бәр чʹәʹве хԝә дәрәщәкә кӧ хьзмәтийа Исада ԛәԝьмибу. Әԝ һатә бажаре Найине, бажарәки Щәлиле. Әԝ бажар незики Шунәме бу. Ԝедәре, Елиша пʹехәмбәр ԝәкә 900 сал пешда, кӧрʹе жьнькәке жь мьрьне рʹакьрьбу (2 Пʹадшати 4:32-37). Гава Иса незики дәргәһе бажер бу, щьнйазәк жь бажер дәрдьхьстьн. Һәр кәс гәләк хәмгин бу, чьмки тʹәне  кӧрʹәки ве жьнәбийе һәбу у әԝ жи мьр. Щьмәʹт рʹәх дайике кʹәтьбу у бәрбь мәзәл дьчун. Иса әԝ данә сәкьнандьне у кʹәрәмәтәк кьр. Әԝи кӧрʹе ве дайика бәләнгаз жь мьрьне рʹакьр! Жь се сахкьрьнед кӧ Иса бь кʹәрәмәти кьрьн, әва сахкьрьна пешьн бу, дәрһәԛа кʹижани чар кʹьтебед Мьзгинийә пешьнда ньвисийә.

14. Һьнә фькьред һʹәԝас, жь Луԛа сәре 7 дәрһәԛа чь нә? (Бьньһерʹә ӧса жи шькьл.)

¹⁴ Дина хԝә бьдьнә һьнә фькьред һʹәԝас, жь Луԛа сәре 7. Кʹьтеба Пироз дьбежә кӧ Иса пешийе дайика хәмгин «дит» у паше «гӧне ԝи ле һат» (Рʹеза 13). Гава дайик пешийа щьнйазе кӧрʹе хԝә дьчу, Иса дит кӧ әԝ дьгьри у ләма жи дьле ԝи гәләки ешийа. Хенщи ве йәке, Иса нә тʹәне гӧне хԝә ле ани, ле бь дәнгәки дьлшәԝат жерʹа гот: «Нәгьри!» Паше, Иса кʹәрәмәтәк кьр, әԝи гәдә жь мьрьне рʹакьр у «әԝ да дийа ԝи» (Рʹеза 14 у 15).

15. Әм дькарьн жь ве кʹәрәмәта Иса чь һин бьн?

¹⁵ Әм дькарьн жь ве кʹәрәмәта Иса чь һин бьн? Әм педьһʹәсьн ԝәки әм чаԝа дькарьн һьндава кәсед кӧ шине дькьн, дьлшәԝат бьн. Һәмьки, әм нькарьн мина Иса ԝана жь мьрьне рʹакьн. Ле мина Иса, әм жи дькарьн бәр дьле ԝанда бен. Әм дькарьн бь готьн у кьред хԝә аликʹари у дьлбинийе бьдьнә ԝан d (Мәтʹәлок 17:17; 2 Корьнтʹи 1:3, 4; 1 Пәтрус 3:8). Һәла һе бь чәнд готьн у кьред бьчʹук жи, әм дькарьн бәр дьле кәсед дьнда бен.

16. Ча сәр шькьл те кʹьфше, әм жь сәрһатийа дайика кӧ зарʹа хԝә ӧнда кьрийә, чь һин дьбьн?

¹⁶ Ԝәрә әм дина хԝә бьдьнә сәрһатийа хушкәкә мә. Чәнд сал пешда, чахе сәр щьвате кʹьлама дәрһәԛа һевийа рʹабуна мьрийа һатә стьране, хушкәке дит кӧ дайикәк дьгьри. Чәндәк пешда ԛиза ԝе мьрьбу. Ләма жи хушка мә зу чу щәм  ԝе, ле һʹәмез кьр, у ԝана әв кʹьлам һʹәта хьлазийе тʹәвайи гот. Паше әве дайике ӧса гот: «Мьн дәстпекьр хушк-бьра дьһа зедә һʹьз бькьм». Әԝ гәләк ша бу, кӧ әԝ чубу щьвине. Әԝе гот: «Әм Ода Щьватеда аликʹарийе жь хушк-бьра дьстиньн». Әм дькарьн баԝәр бьн, кӧ гава әм бь дьлшәԝати бәр дьле кәсед дьлшкәстида тен, Йаһоԝа ве йәке гәләк дьшекьринә (Зәбур 34:18).

17. Жь ве готаре әм чь һин бун?

¹⁷ Сәрһатийед дәрһәԛа кʹәрәмәтед Иса, йед чар кʹьтебед Мьзгинида, һежайи леколине нә. Әԝ мә һин дькьн, ԝәки Йаһоԝа у Иса мә һʹьз дькьн, у ԛәԝата Иса һәйә һʹәму проблемед мәрьва бьдә кʹӧтакьрьне. Әм дькарьн сәд сәләфи баԝәр бьн, ԝәки дәмәкә незикда, Пʹадшатийа Хԝәде ԝе һʹәму созед Хԝәде бинә сери. Гава әм ван кʹәрәмәта леколин дькьн, гәрәке әм кʹур бьфькьрьн, кӧ әм чаԝа дькарьн чʹәʹв бьдьнә һʹӧнӧред Иса. Ԝәʹде леколина шәхси йан Ԛӧльхкьрьна Тʹәви Малбәте, әм дькарьн кʹәрәмәтед Иса леколин бькьн. Әм дькарьн дәрһәԛа тьштед кӧ педьһʹәсьн кәсед дьнрʹа жи бежьн. Һәрге әм ӧса бькьн, ԝе мәщаләкә баш бькʹәвә дәсте мә, кӧ мәрьварʹа хәбәр дьн! (Рʹомайи 1:11, 12)

18. Готара дьнда, әме дәрһәԛа чь шеԝьр кьн?

¹⁸ Ль гора сәрһатийед кӧ Кʹьтеба Пирозда һатьнә ньвисаре, Иса се кәс жь мьрьне рʹакьрьн. Мәсәлә, хьлазийа хьзмәтийа хԝә, әԝи мерәк жь мьрьне рʹакьр. Ле әв сахкьрьн жь йед дьн щӧдә бу, әԝи достәки хԝәйи дәлал вәгәрʹандә жийине. Әԝ кʹәрәмәтәкә мәхсус бу. Әм жь ве кʹәрәмәте чь дькарьн һин бьн? У әм чаԝа дькарьн баԝәрийа хԝә һьндава рʹабуна мьрийа дьһа ԛәԝи кьн? Готара дьнда әме щабед ван пьрса бьстиньн.