ГОТАРА БОНА ҺИНБУНЕ 19
Әм Ча Дькарьн Баԝәрийа Хԝә Һьндава Дьнйа Тʹәзә Ԛәԝи кьн?
«[Йаһоԝа] гот ԝе нәкә? Хәбәр да ԝе нәйнә сери?» (ЖЬМАР 23:19).
КʹЬЛАМА 142 Хԝә Ԛәԝи ль Баԝәрийе Дьгьрьн
ВЕ ГОТАРЕДА a
1-2. Һʹәта кӧ дьнйа тʹәзә бе, әм гәрәке чь бькьн?
ӘМ СОЗЕ Йаһоԝа гәләк ԛимәт дькьн, кӧ Әԝе дьнйа хьраб бькә щьнәт (2 Пәтрус 3:13). Рʹаст ә әм ньзаньн әʹрд ԝе кʹәнге бьбә щьнәт, ле тьштед кӧ дәр-доре мә дьԛәԝьмьн, нишан дькьн ԝәки әԝ йәк гәләк незик ә (Мәтта 24:32-34, 36; Кʹаред Шандийа 1:7).
2 Фьрԛи тʹӧнә әм чьԛас сал рʹастийеда ньн, һәр кәс жь мә гәрәке баԝәрийа хԝә һьндава ви созе Хԝәде ԛәԝи кә. Гәло чьрʹа? Чьмки һәла һе баԝәрийа ԛәԝи жи дькарә сьст бә. Паԝлосе шанди кембун йан тʹӧнәбуна баԝәрийе нав кьр ча «гӧне кӧ рʹьһʹәт ль мә» дьалә (Ибрани 12:1). Сәва кӧ баԝәрийа мә сьст нәбә, әм гәрәке һәртʹьм избатийед кӧ дьнйа тʹәзә незик ә, леколин бькьн (Ибрани 11:1).
3. Ве готареда әме чь шеԝьр кьн?
3 Ве готареда әме дәрһәԛа се тьшта шеԝьр кьн, йед кӧ дькарьн баԝәрийа мә һьндава дьнйа тʹәзә ԛәԝи кьн: (1) кʹур дәрһәԛа кʹьрʹине бьфькьрьн, (2) дәрһәԛа ԛәԝата Йаһоԝа бьфькьрьн у (3) ԝан тьшта бькьн, чь кӧ мә дьһа незики Йаһоԝа дькьн. Паше әме бьвиньн ԝәки гьлийед Йаһоԝа йед кӧ әԝи готә Һәбаԛуԛ, чаԝа баԝәрийа мә ԛәԝи дькьн. Пешийе ԝәрә әм дәрһәԛа һьнә дәрәща шеԝьр кьн, кʹижанада әм гәрәке баԝәрийа хԝә избат кьн.
ДӘРӘЩӘ, КʹИЖАНАДА ГӘРӘКЕ БАԜӘРИЙА ԚӘԜИ НИШАН КЬН
4. Чьда мәрʹа баԝәрийа ԛәԝи лазьм ә?
4 Әм һәр рʹож сафикьрьна дькьн у бона ԝе йәке мәрʹа баԝәрийа ԛәԝи лазьм ә. Мәсәлә, әм сафикьрьнед ӧса дькьн ча бьжартьна һәвала, ԝәʹдәдәрбазкьрьне, һинбуне, зәԝаще, зарʹа у хәбате. Әм дькарьн жь хԝә бьпьрсьн: «Гәло сафикьрьнед мьн дьдьнә кʹьфше, кӧ хьлазийа ве дьнйа хьраб гәләк незик ә у зутьрәке Хԝәде ԝе тʹәмамийа әʹрде бькә щьнәт? Гәло әз мина ԝан мәрьва сафикьрьна дькьм, йед кӧ баԝәр накьн ԝәки әʹмьре һʹәта-һʹәтайе һәйә?» (Мәтта 6:19, 20; Луԛа 12:16-21). Әме бькарьбьн сафикьрьнед баш бькьн, һәрге баԝәр кьн, кӧ дьнйа тʹәзә гәләк незик ә.
5-6. Чьрʹа ԝәʹде тәнгасийа, баԝәрийа ԛәԝи мәрʹа лазьм ә? Мәсәле бинә.
5 Ӧса жи әм рʹасти чәтьнайа тен, кʹижанада баԝәрийа ԛәԝи лазьм ә. Мәсәлә, пәйкʹәтьн, нәхԝәшийед гьран йан жи тәнгасийед дьн, дькарьн бьбьнә мәʹни кӧ әм дьлтәнг бьн. Чахе әм рʹасти тәнгасике тен, серида дьбәкә әм тәйах кьн. Ле һәрге әв тәнгаси дьреж бькʹьшинә, ԝи чахи ида баԝәрийа ԛәԝи ԝе мәрʹа лазьм бә, ԝәки әм сәбьр кьн у бь дьле ша бәрдәԝам кьн Йаһоԝарʹа хьзмәт кьн (Рʹомайи 12:12; 1 Пәтрус 1:6, 7).
6 Ԝәʹде тәнгасикә гьран, дьԛәԝьмә әм бьфькьрьн кӧ дьнйа тʹәзә ԝе ԛә нәйе. Ле гәло әв йәк те һʹәсабе кӧ баԝәрийа мә сьст ә? Һәмьки на! Ԝәрә әм дина хԝә бьдьнә ве мәсәле. Ԝәʹде зьвьстанәкә гәләк сар, дьбәкә әм бьфькьрьн кӧ һавин ԝе ԛә нәйе. Ле диса жи һавин те. Һәма мина ве йәке, гава әм жь бо тәнгасийа гәләк дьлтәнг дьбьн, дьбәкә әм бьфькьрьн кӧ дьнйа тʹәзә ԝе ԛә нәйе. Ле һәрге баԝәрийа мә ԛәԝи йә, әм заньн ԝәки һʹәму созед Хԝәде ԝе әʹсәйи бенә сери (Зәбур 94:3, 14, 15; Ибрани 6:17-19). Баԝәрийа ԛәԝи али мә дькә, кӧ әм жийина хԝәда шьхӧлед рʹӧһʹани дайньн сәр щийе пешьн.
7. Әм чьда гәрәке дӧдьли нәбьн?
7 Бона бәлакьрьна мьзгинийе жи мәрʹа баԝәрийа ԛәԝи лазьм ә. Гәләк мәрьв дьбежьн, ԝәки мьзгинийа дәрһәԛа дьнйа тʹәзә ӧса хԝәш ә, кӧ әԝана нькарьн ве йәке баԝәр кьн (Мәтта 24:14; Һәзәԛел 33:32). Әм гәрәке мьԛати хԝә бьн, ԝәки мина ван мәрьва, һьндава созе Йаһоԝа шьк нәкʹәвә дьле мә. Сәва кӧ әв йәк тʹӧ щар нәйе сәре мә, әм гәрәке бәрдәԝам кьн баԝәрийа хԝә ԛәԝи кьн. Ньһа әме се тьшта шеԝьр кьн, бь сайа кʹижана әме бькарьбьн баԝәрийа хԝә ԛәԝи кьн.
ДӘРҺӘԚА КʹЬРʹИНЕ БЬФЬКЬРЬН
8-9. Гава әм дәрһәԛа кʹьрʹине дьфькьрьн, баԝәрийа мә чьрʹа дьһа ԛәԝи дьбә?
8 Йа йәке, һәрге әм сәр ԛӧрбанбуна Иса Мәсиһ кʹур бьфькьрьн, әме баԝәрийа хԝә дьһа ԛәԝи кьн. Ԛӧрбанбуна Иса мә дьдә баԝәркьрьне, ԝәки һʹәму созед Хԝәде ԝе әʹсәйи бенә сери. Гава әм кʹур дьфькьрьн, кӧ Йаһоԝа чьрʹа Иса кьрә ԛӧрбан у әв ԛӧрбан бона Хԝәде чьԛас ԛимәт бу, әм дьһа зедә баԝәр дькьн, ԝәки Хԝәде ԝе созе хԝә дәрһәԛа дьнйа тʹәзә у әʹмьре һʹәта-һʹәтайе, бинә сери. Әм чьрʹа ве йәкеда баԝәр ьн?
9 Йаһоԝа Хԝәде Кӧрʹе хԝәйи һʹьзкьри жь әʹзмана шандә сәр әʹрде, ԝәки әԝ мина мәрьвәки беԛьсур бе буйине. Гава Иса сәр әʹрде бу, әԝ рʹасти щурʹә-щурʹә чәтьнайа һат. Паше әԝи ешәкә гьран кʹьшанд у мьр. Бьдьнә һʹьше хԝә, Йаһоԝа ԛӧрбанәкә чьԛас мәзьн у ԛимәт бона мә дайә! Хԝәде ԝе тʹӧ щара изьн нәда, ԝәки Кӧрʹе ԝи еш бькʹьшанда у бьмьра тʹәне сәва ве йәке, кӧ әм бәхтәԝар бьн ле кьн бьжин (Йуһʹәнна 3:16; 1 Пәтрус 1:18, 19). Бәле, Йаһоԝа ԛӧрбанәкә гәләк ԛимәт бона мә бәрва да, ләма жи бешьк әԝе мәщале бьдә мә кӧ әм һʹәта-һʹәтайе дьнйа тʹәзәда бьжин.
ДӘРҺӘԚА ԚӘԜАТА ЙАҺОԜА БЬФЬКЬРӘ
10. Ль гора Әфәси 3:20, Йаһоԝа дькарә чь бькә?
10 Йа дӧда, һәрге әм дәрһәԛа ԛәԝата Йаһоԝа бьфькьрьн, әме баԝәрийа хԝә дьһа ԛәԝи кьн. Бешьк ԛәԝата ԝи һәйә, ԝәки һʹәму созед хԝә бинә сери. Ле диса жи, гәләк мәрьв дьфькьрьн ԝәки созе дәрһәԛа жийина һʹәта-һʹәтайе дьнйа тʹәзәда, тьштәки нәбуйи йә. Ле Йаһоԝа гәләк щара созед ӧса дьда, кӧ мәрьва ԝе тʹӧ щара хԝәха нькарьбуна банийана сери. Хԝәде чь дьбежә, тинә сери, чьмки ԛәԝата ԝи бесинор ә (Ибо 42:2; Марԛос 10:27). Ләма жи әм әʹщебмайи наминьн, ԝәки Әԝи созед ӧса баш у мәхсус дайә мә (Бьхунә Әфәси 3:20).
11. Дәрһәԛа созәки Йаһоԝа гьли кә, кʹижан кӧ мәрьварʹа гәләк әʹщебмайи дьһатә кʹьфше. (Бьньһерʹә чаргошә « Һьнә Созед Мәхсус кӧ Һатьнә Сери».)
11 Ԝәрә әм дина хԝә бьдьнә һьнә созед Йаһоԝа, йед кӧ бәре бона щьмәʹта ԝи ча тьштед әʹщебмайи у нәбуйи дьһатьнә кʹьфше. Мәсәлә, әԝи соз дабу Бьраһим у Сәрайе, кӧ әʹмьре ԝани мәзьнда ԝе кӧрʹәк ԝанрʹа бе буйине (Дәстпебун 17:15-17). Ӧса жи, әԝи Бьраһимрʹа соз дабу, кӧ ԝе ԝәлате Кәнане бьдә зӧрʹәта ԝи. Гәләк сала зӧрʹәта Бьраһим, демәк Исраели, Мьсьреда чаԝа дил бун, ләма жи ӧса дьһатә кʹьфше кӧ әв созе Хԝәде ԝе тʹӧ щар нәйе сери. Ле созе Йаһоԝа һатә сери! Паше Йаһоԝа соз да Елизабете, кӧ әԝе әʹмьре хԝәйә мәзьнда кӧрʹәки бинә. Ӧса жи әԝи Мәрйәма бькʹьррʹа гот, кӧ әԝе Кӧрʹе Ԝи бинә дьнйайе. Бь ве йәке, созе кӧ Йаһоԝа бь һʹәзара сала пешда бахче Еденеда дабу, һатә сери! (Дәстпебун 3:15)
12. Гьлийед жь Йешу 23:14 у Ишайа 55:10, 11 дәрһәԛа ԛәԝата Йаһоԝа чь әшкәрә дькьн?
12 Чахе әм дәрһәԛа созед Йаһоԝа, йед кӧ ида һатьнә сери, дьфькьрьн, әв йәк баԝәрийа мә ԛәԝи дькә, ԝәки ԛәԝата ԝи һәйә созе хԝәйи дәрһәԛа дьнйа тʹәзә жи бинә сери (Бьхунә Йешу 23:14; Ишайа 55:10, 11). Һәрге баԝәрийа мә ԛәԝи бә, әме бькарьбьн али кәсед дьн бькьн, ԝәки әԝана жи баԝәрийа хԝә ԛәԝи кьн. Йаһоԝа хԝәха дәрһәԛа әʹрд у әʹзмане тʹәзә соз да у гот: «Әв хәбәрнә амьн у рʹаст ьн» (Әʹйанти 21:1, 5).
ТЬШТЕД ӦСА БЬКӘ, ЙЕД КӦ ԜЕ ТӘ ДЬҺА НЕЗИКИ ЙАҺОԜА КЬН
ЩЬВАТ
Ча шьхӧлед рʹӧһʹани дькарьн баԝәрийа мә дьһа ԛәԝи кьн? (Бьньһерʹә абзаса 13)
13. Щьватед мә чаԝа дькарьн баԝәрийа мә дьһа ԛәԝи кьн? Шьровәкә.
13 Йа сьсийа, һәрге әм ԝәʹде хԝә бона шьхӧлед рʹӧһʹани хәрщ кьн, әме баԝәрийа хԝә дьһа ԛәԝи кьн. Ԝәрә әм шеԝьр кьн кӧ әм жь щьвата чь кʹаре дьстиньн. Хушка мә Анна, йа кӧ бь дәһа сала щурʹә-щурʹә хьзмәтийа һәртʹьмда кʹар кьрийә, дьбежә: «Щьватед мә али мьн дькьн, ԝәки әз баԝәрийа хԝә ԛәԝи хԝәй кьм. Һәрге готарван нә йәки щерʹьбанди йә йан жи тьштәки тʹәзә набежә, диса жи әв йәк мьнрʹа кʹаре тинә у али мьн дькә, ԝәки әз рʹастийа Кʹьтеба Пироз дьһа баш фәʹм бькьм. Бь ви щурʹәйи, баԝәрийа мьн дьһа ԛәԝи дьбә». b Ӧса жи, әм щабед хушк-бьра гәләк ԛимәт дькьн, бь сайа кʹижана баԝәрийа мә ԛәԝи дьбә (Рʹомайи 1:11, 12; 10:17).
БӘЛАКЬРЬНА МЬЗГИНИЙЕ
Ча шьхӧлед рʹӧһʹани дькарьн баԝәрийа мә дьһа ԛәԝи кьн? (Бьньһерʹә абзаса 14)
14. Бәлакьрьна мьзгинийе ча дькарә баԝәрийа мә ԛәԝи кә?
14 Чахе әм мьзгинийе бәла дькьн, баԝәрийа мә дьһа ԛәԝи дьбә (Ибрани 10:23). Хушка мә Барбара, йа кӧ 70 сала зедәтьр Йаһоԝарʹа хьзмәт дькә, ӧса дьбежә: «Чахе әз мьзгинийе бәла дькьм, баԝәрийа мьн дьһа ԛәԝи дьбә. Чьԛас зедә әз дәрһәԛа созед Йаһоԝа мәрьварʹа гьли дькьм, һаԛас һе зедә баԝәрийа мьн ԛәԝи дьбә».
ЛЕКОЛИНА ШӘХСИ
Ча шьхӧлед рʹӧһʹани дькарьн баԝәрийа мә дьһа ԛәԝи кьн? (Бьньһерʹә абзаса 15)
15. Леколина шәхси чаԝа баԝәрийа мә дьһа ԛәԝи дькә? (Бьньһерʹә ӧса жи шькьл.)
15 Леколина шәхси жи дькарә баԝәрийа мә ԛәԝи кә. Мәсәлә, хушка мә Сусана жь һинбуна шәхси кʹарәкә мәзьн дьстинә, гава пешда бона ве йәке ԝәʹдә башԛә дькә. Әԝ дьбежә: «Рʹожед Ләʹда әз Бьрща Ԛәрәԝьлийе бона һʹәфтийа дьн леколин дькьм. Ле Дӧшәм у Сешәма, әз хԝә һазьр дькьм бона щьвина Мина Иса Бьжин у Хьзмәт кьн. Рʹожед дьн жи, әз леколина шәхси дәрбаз дькьм». Сусана тʹьме хԝә ве графике дьгьрә. Әв йәк али ԝе дькә баԝәрийа хԝә тʹьме ԛәԝи кә. Хушка мә Ирен, йа кӧ бь дәһа сала офиса сәрәкәда хьзмәт дькә, тедәрхьстийә кӧ леколина созед Кʹьтеба Пироз, баԝәрийа ԝе ԛәԝи дькә. Әԝ дьбежә: «Чьԛас хԝәш ә кӧ һʹәму созед Йаһоԝа һур бь һур тенә сери». c
ҺӘМУ СОЗЕД ЙАҺОԜА ԜЕ БЕНӘ СЕРИ
16. Тьштед кӧ Йаһоԝа Һәбаԛуԛ пʹехәмбәррʹа готьбун, чаԝа иро дьле мә ԛәԝи дькьн? (Ибрани 10:36, 37)
16 Һьнә хьзмәткʹаред Йаһоԝа ида гәләк ԝәхт ә һивийа хьлазийа ве дьнйа хьраб ьн. Бь ньһерʹандьна һьнәк мәрьва, созед Хԝәде ԝе нәйенә сери. Йаһоԝа занә кӧ хьзмәткʹаред ԝи ча хԝә тʹәхмин дькьн, ләма жи әԝи Һәбаԛуԛ пʹехәмбәррʹа гот: «Жь бәр кӧ хәԝн, бона дәмәк те занә йә. У бона даԝи һатьне ләз дькә у әԝе нәрʹаст дәрнәкʹәвә. Һәрге дәрәнг бькʹәвә, ль бәнда ԝе бә; жь бәр кӧ әԝе мӧһәԛәԛ [бешьк] бе. Әԝ дәрәнг наминә» (Һәбаԛуԛ 2:3). Гәло бь ван гьлийа Хԝәде дьхԝәст тʹәне дьле Һәбаԛуԛ пʹехәмбәр ԛәԝи кә, йан дьле мә жи? Жь бина бәр Хԝәде, Паԝлосе шанди әв гьли готьнә Мәсиһийед кӧ гәләк һивийа дьнйа тʹәзә бун (Бьхунә Ибрани 10:36, 37). Дьбәкә әм жи щарна дьфькьрьн, кӧ созед Хԝәде ԝе нәйнә сери. Ле әм дькарьн баԝәр бьн, ԝәки созед Йаһоԝа ԝе дәрәнги нәкʹәвьн.
17. Хушкәке чаԝа ширәта кӧ Йаһоԝа дабу Һәбаԛуԛ, әʹмьре хԝәда да хәбате?
17 Гәләк хьзмәткʹаред Йаһоԝа ида гәләк сала ль гора ве ширәте дьжин, йа кӧ Йаһоԝа дабу Һәбаԛуԛ у бь сәбьр һивийа рʹожа ԝи нә. Мәсәлә, хушка мә Луиз, сала 1939-да дәстпекьр Йаһоԝарʹа хьзмәт кә. Әԝ дьбежә: «Ԝи чахи, әз дьфькьрим ԝәки Һармәгәдон пешийа кӧ әз мәкʹтәбе хьлаз кьм, ԝе бе. Ле әв йәк нә ԛәԝьми. Гәләк сал, сәрһатийед Нӧһ, Бьраһим, Усьв у мәрьвед дьн, али мьн дькьрьн кӧ әз сәбьр кьм, чьмки әԝана жи гәләк ԝәхт һивийе бун, һʹәта кӧ Йаһоԝа созед хԝә бинә сери. Әве йәке чаԝа али мьн ӧса жи али кәсед дьн дькьр, ԝәки баԝәрийа хԝә һьндава созе Йаһоԝа ӧнда нәкьн, кӧ дьнйа тʹәзә ԝе бе». Гәләк хьзмәткʹаред Йаһоԝа, йед кӧ гәләк сал ԝирʹа хьзмәт дькьн, ве йәкерʹа ԛайил ьн!
18. Гава әм дина хԝә дьдьнә әʹфрина, әԝ йәк ча баԝәрийа мә ԛәԝи дькә кӧ дьнйа тʹәзә ԝе бе?
18 Һәмьки дьнйа тʹәзә һе нәһатийә. Ле ԝәрә әм бьфькьрьн ԝәки иро гәләк тьшт һәнә, кʹижан кӧ бәре тʹӧнә бун, мәсәлә стәйрк, бах, һʹәйԝан у ӧса жи мәрьв. Ле иро тʹӧ кәс ԝан тьштада дӧдьли набә. Иро әԝ һʹәму тьшт һәнә, чьмки Йаһоԝа әԝ әʹфьрандьнә (Дәстпебун 1:1, 26, 27). Бир нәкә, нета Хԝәде әԝ ә, кӧ созе хԝә дәрһәԛа дьнйа тʹәзә бинә сери у ԝе әʹсәйи ве йәке бькә! Дьнйа тʹәзәда, әме сьһʹәт-ԛәԝат бьн у һʹәта-һʹәтайе бьжин. Әм дькарьн сәд сәләфи баԝәр бьн, ԝәки рʹожа Хԝәде ԝе бе. Чаԝа кӧ иро әʹрд у әʹзман һәйә, дьнйа тʹәзә жи ԝе һәбә (Ишайа 65:17; Әʹйанти 21:3, 4).
19. Тӧ чаԝа дькари баԝәрийа хԝә дьһа ԛәԝи ки?
19 Һʹәта кӧ дьнйа тʹәзә бе, чь жь дәсте тә те бькә, ԝәки баԝәрийа хԝә дьһа ԛәԝи ки. Тʹьме бона ԛӧрбана Иса рʹази бә у дәрһәԛа ԛәԝата Йаһоԝа бьфькьрә. Һәр тьшти бькә, ԝәки дьһа незики Йаһоԝа би. Һәрге тӧ ӧса бьки, тӧйе жи нава ԝанда би, «йед кӧ бь баԝәрийе у сәбьре созед Хԝәде ԝар дьбун» (Ибрани 6:11, 12; Рʹомайи 5:5).
КʹЬЛАМА 139 Һәр Тьштед Ну Бьдьн Бәр Чʹәʹве Хԝә
a Иро гәләк мәрьв баԝәрийа хԝә созе Кʹьтеба Пироз найньн, кӧ дьнйа тʹәзә ԝе һәбә. Әԝана дьфькьрьн, ԝәки тьштед ӧса баш тʹәне чʹирʹокада һәнә. Ле әм баԝәр дькьн, кӧ һʹәму созед Йаһоԝа, ԝе әʹсә бенә сери. Ләма жи әм гәрәке тʹьме хирәт бькьн, кӧ баԝәрийа хԝә дьһа ԛәԝи кьн. Ле чаԝа? Ве готареда әме дәрһәԛа ве йәке шеԝьр кьн.
b Һьнә навед ве готареда һатьнә гӧһастьне.
c Гәләк готар дәрһәԛа пʹехәмбәртийед Кʹьтеба Пироз, һун дькарьн бьвиньн Индекса Әʹдәбйәтед Бьрща Ԛәрәԝьлийеда, бьн наве «Пʹехәмбәрти». Мәсәлә, бьньһерʹьн готар «Чь Йаһоԝа Дьбежә, Те Сери», жь Бьрща Ԛәрәԝьлийе йа 1 Чьләйе, сала 2008.
