1. Ль гора 3 Йуһʹәнна 3, 4, әм жь чь шабуне дьстиньн?

БЬДЬНӘ бәр чʹәʹве хԝә Йуһʹәннайе шанди шабунәкә ча станд чахе бьһист, ԝәки әԝ мәрьвед кӧ бь аликʹарийа ԝи һатьбун сәр рʹийа рʹаст, бәрдәԝам дькьн бь амьни Йаһоԝарʹа хьзмәт кьн. Әԝи әԝана һʹәсаб дькьрьн зарʹед ԝийә рʹӧһʹани. Йуһʹәнна һʹәму тьшт дькьр, ԝәки баԝәрийа ԝан Мәсиһийед амьн ԛәԝи кә, чьмки әԝана рʹасти гәләк чәтьнайа дьһатьн. Әм жи шабуне дьстиньн чахе дьвиньн зарʹед мә у ӧса жи зарʹед мәйә рʹӧһʹани, хԝә тʹәсмили Йаһоԝа дькьн у бәрдәԝам дькьн ԝирʹа хьзмәт кьн. (Бьхунә 3 Йуһʹәнна 3, 4.)

2. Мәʹнийа ньвисандьна нәʹмед Йуһʹәнна чь бу?

² Сала 98 Д.М., Йуһʹәнна дьԛәԝьмә Әфәседа йан жи незики ԝе дьжит. Дьбәкә әԝ һьнге дәрбази ԝедәре бу чахе жь кәла Патмосе аза бу. Ԝан чаха Йаһоԝа пе рʹӧһʹе хԝәйи пироз али ԝи кьр, кӧ ԝан се нәʹма бьньвисә. Нета ԝан нәʹма әԝ бу, ԝәки Мәсиһийед амьн һелан кә, кӧ баԝәрийа хԝә һьндава Иса хԝәй кьн у бәрдәԝам кьн нава рʹастийеда бьжин.

3. Әме щабед кʹижан пьрса бьстиньн?

³ Ԝи чахи жь шандийа тʹәне Йуһʹәнна сах бу, у әԝ бәрхԝә дькʹәт, чьмки дәрсдаред ԛәлп сәр щьвата хьраб һʹӧкӧм дьбун * (1 Йуһʹн. 2:18, 19, 26). Әԝан рʹабәра дьготьн ԝәки Хԝәде нас дькьн, ле бь рʹасти гӧрʹа ԝи нәдькьрьн. Ԝәрә әм шеԝьр кьн ширәта кӧ Йуһʹәнна мәрʹа да, у щаба ван се пьрса пебьһʹәсьн: Чь те һʹәсабе нава рʹастийеда бьжин? Әм рʹасти чь чәтьнайа тен? У әм ча дькарьн али һәв бькьн, кӧ нава рʹастийеда бьминьн?

4. Ль гора 1 Йуһʹәнна 2:3-6 у 2 Йуһʹәнна 4, 6, әм гәрәке чь бькьн ԝәки нава рʹастийеда бьжин?

⁴ Сәва кӧ нава рʹастийеда бьжин, әм гәрәке рʹастийа Хәбәра Хԝәде бьзаньбьн. Әм гәрәке ӧса жи «тʹәмийед» Йаһоԝа бьԛәдиньн», демәк гӧрʹа ԝан тʹәмийа бькьн. (Бьхунә 1 Йуһʹәнна 2:3-6; 2 Йуһʹәнна 4, 6.) Иса мәсәләкә гәләк баш һишт ве йәкеда, кӧ гӧрʹа Йаһоԝа бькьн. Щурʹәки фәрз кӧ гӧрʹа Йаһоԝа бькьн әԝ ә, ԝәки чьԛас дькарьн пʹегәһа Исада һәрʹьн (Йуһʹн. 8:29; 1 Пәт. 2:21).

5. Әм гәрәке чьда баԝәр бьн?

⁵ Сәва әм бәрдәԝам кьн нава рʹастийеда бьжин, әм гәрәке баԝәр бьн ԝәки Йаһоԝа Хԝәдайе рʹастийе йә у әԝ чь кӧ бь Кʹьтеба Пироз мәрʹа дьбежә, рʹасти йә. Әм гәрәке ӧса жи баԝәр бьн, ԝәки Иса Мәсиһийе создайи йә. Гәләк дӧдьли дьбьн, ԝәки Иса һатийә кʹьфшкьрьне ча Пʹадше Пʹадшатийа Хԝәде. Йуһʹәнна дьгот ԝәки фәсал бьн, чьмки һәбун «гәләкед кӧ хәлԛе жь рʹе дәрдьхьн», кʹижана дькарьбун ԝан мәрьва бьхальфиньн, йед кӧ һазьр нибун баԝәрийа хԝә һьндава рʹастийа дәрһәԛа Йаһоԝа у Иса бьпарезьн (2 Йуһʹн. 7-11). Йуһʹәнна ньвиси: «Кʹи йә дәрәԝин? Һәма әԝ ә, йе кӧ дьбежә: ‹Иса нә Мәсиһ ә›» (1 Йуһʹн. 2:22). Сәва әм нәйнә хальфандьне, рʹийа тʹәк әв  ә, кӧ Хәбәра Хԝәде леколин бькьн. Тʹәне һьнге әме Йаһоԝа у Иса рʹьнд нас кьн (Йуһʹн. 17:3). У тʹәне һьнге әме баԝәр бьн, ԝәки әм рʹастийе заньн.

6. Чь дькарә рʹе Мәсиһийед щаһьл бьгьрә, кӧ нава рʹастийеда бьжин?

⁶ Һʹәму Мәсиһи гәрәке фәсал бьн, ԝәки нәкʹәвьнә бәр байе философийа мәрьва (1 Йуһʹн. 2:26). Илаһи Мәсиһийед щаһьл гәрәке фәсал бьн, ԝәки нәкʹәвьнә ве тʹәльке. Хушкәкә мә Алекса * жь Франсайе, йа кӧ 25 сали йә, дьбежә: «Әз чахе мәкʹтәбеда дәрһәԛа еволусийайе у ӧса жи дәрһәԛа философийа мәрьва пеһʹәсийам, әз хальфим у рʹастийа Кʹьтеба Пирозда дӧдьли бум. Әве һинкьрьне щара фькьред мьн дьрʹәванд. Ле әз хԝәрʹа дьфькьрим, ԝәки ԝе нәрʹаст бә һәрге чь кӧ Кʹьтеба Пироз һин дькә, пьшт гӧһе хԝәва бавежьм у ве йәке баԝәр кьм, чь кӧ  мәкʹтәбеда дәрсдара һин дькьрьн». Алексайе кʹьтеба бь наве «Әʹмьр Ча Пешда Һат? Бь сайа Еволусйайе йан Әʹфьрандьне?», леколин дькьр. Чәнд һʹәфтийада ида әԝ шьк жь дьле ԝе дәркʹәт. Әԝ дьбежә: «Әз избат бум, ԝәки чь кӧ Кʹьтеба Пирозда ньвисар ә, әԝ һәйә рʹасти. У мьн фәʹм кьр, кӧ һәрге әз ль гора принсипед Кʹьтеба Пироз бьжим, әзе шабун у әʹдьлайе бьстиньм».

7. Әм гәрәке чьда фәсал бьн, у чьрʹа?

⁷ Һʹәму Мәсиһи ча щаһьл ӧса жи йед әʹмьрда мәзьн, гәрәке фәсал бьн кӧ ӧса нибә, һьн Йаһоԝарʹа хьзмәт кьн, һьн жи тьштед нәрʹаст бькьн. Йуһʹәнна да кʹьфше ԝәки әм нькарьн һьн нава рʹастийеда бьжин, һьн жи бь әʹмьрәки нәщайиз бьжин (1 Йуһʹн. 1:6). Һәрге әм дьхԝазьн Йаһоԝа мә ԛәбул кә чаԝа ньһа ӧса жи ахьрийеда, әм гәрәке бир нәкьн, ԝәки Йаһоԝа һʹәму тьшти чь кӧ әм дькьн, дьвинә. Һәла һе жи чь әм дьзива дькьн кӧ тʹӧ кәс нькарә бьвинә, Йаһоԝа гьшки дьвинә, һәр тьшт ль бәр чʹәʹве ԝи вәкьри у әшкәрә йә (Ибрн. 4:13).

8. Әм гәрәке хԝә жь чь дур хԝәй кьн?

⁸ Әм гәрәке жь ньһерʹандьна ве дьнйайе сәр гӧнә, хԝә дур хԝәй кьн. Йуһʹәннайе шанди ньвиси: «Һәгәр әм бежьн: ‹Гӧне мә тʹӧнә›, әм хԝәха хԝә дьхапиньн» (1 Йуһʹн. 1:8). Ԝәʹде Йуһʹәннада рʹабәра дьготьн, ԝәки мәрьв дькарә ԝан тьшта бькә, чь кӧ бәр чʹәʹве Хԝәде нәрʹаст ә у һьн жи досте Хԝәде бә. Иро әм жи нав мәрьвед ӧсада дьжин. Гәләк мәрьв дьбежьн, ԝәки Хԝәде баԝәр дькьн, ле нәԛайил ьн тʹәви ньһерʹандьна Хԝәде сәр гӧнә, илаһи чахе хәбәрдан дьчә дәрһәԛа һәләԛәтийа сексуали. Чь кӧ бәр чʹәʹве Хԝәде гӧнә йә, әԝана дьбежьн әв йәк сәр хԝәстьна дьле мәрьва йә.

9. Чьрʹа баш ә чахе йед щаһьл ве йәке дькьн, чь кӧ Кʹьтеба Пироз һин дькә?

⁹ Илаһи щаһьлед мәрʹа чәтьн ә хԝә жь бенамусийе хԝәй кьн, чьмки щийе хәбате  йан жи мәкʹтәбеда, мәрьвед дәр-доре ԝан, принсипед Кʹьтеба Пироз ԛәбул накьн. Александьр жи рʹасти ве чәтьнайе һат. Әԝ дьбежә: «Һьнә кәчʹька зоре мьн дькьрьн, ԝәки сәре хԝә ԝанрʹа дайньм. Ԝана мьнрʹа дьгот һәрге кәчʹька тә тʹӧнә, ԝәки ӧса нә тӧ һомосексуалист и». Чахе һун рʹасти щерʹьбандьнед ӧса бен, бир нәкьн, һәрге һун хԝә ль принсипед Кʹьтеба Пироз бьгьрьн, һуне ԛәдьре хԝә, сьһʹәт-ԛәԝата хԝәйә физики у емосийали, у һәләԛәтийа хԝә тʹәви Йаһоԝа, хԝәй кьн. Чьԛас һун хԝә жь тʹәлькед ӧса хԝәй кьн, һаԛас ԝе ԝәрʹа һеса бә Хԝәдерʹа амьн бьминьн. Ӧса жи бир нәкьн, ԝәки ньһерʹандьна нәрʹаст сәр сексе, жь Шәйтʹан ә. Демәк, чахе һун фькьред мәрьвед ве дьнйайе инкʹар дькьн, ӧса һун «сәр Йе Хьраб» дькʹәвьн (1 Йуһʹн. 2:14).

10. Ча 1 Йуһʹәнна 1:9 али мә дькә, кӧ пе исафа тʹәмьз Йаһоԝарʹа хьзмәт кьн?

¹⁰ Әм дӧдьли набьн, ԝәки тʹәне Йаһоԝа дькарә бежә, кӧ кʹижан рʹабун-рʹуньштьн гӧнә те һʹәсабе. У әм алийе хԝәда һʹәму тьшти дькьн, ԝәки гӧнә нәкьн. Ле гава әм шашийа дькьн, әм бәр Йаһоԝа дӧада гӧне хԝә тиньн рʹуйе хԝә. (Бьхунә 1 Йуһʹәнна 1:9.) Ле һәрге әм гӧнед гьран дькьн, әм аликʹарийе жь рʹуспийа дьхԝазьн, чьмки Йаһоԝа әԝана кʹьфш кьрьнә, ԝәки бона мә хәм бькьн (Аԛуб 5:14-16). Ле әм гәрәке хԝә нәчәрчьриньн жь бо шашийед хԝәйә бәре. Чьрʹа? Чьмки Баве мәйи һʹьзкьри кӧрʹе хԝә да ԛӧрбан, ԝәки гӧне мә бенә бахшандьне. Чахе Йаһоԝа дьбежә кӧ әԝ ԝе бьбахшинә ԝан, йед кӧ гӧнед хԝә тʹобә дькьн, ԝе әʹсә ве йәке бькә. Ләма жи тʹӧ тьшт нькарә рʹе мә бьгьрә, кӧ пе исафа тʹәмьз Йаһоԝарʹа хьзмәт кьн (1 Йуһʹн. 2:1, 2, 12; 3:19, 20).

11. Әм ча дькарьн хԝә жь ԝан һинкьрьна хԝәй кьн, кʹижан кӧ дькарьн баԝәрийа мә сьст кьн?

¹¹ Әм гәрәке һинкьрьнед рʹабәра инкʹар кьн. Шәйтʹан тʹьме мәрьвед ԛәлп  дьда хәбате, сәва кӧ шьке бькә дьле хьзмәткʹаред Хԝәдейи амьн. Ләма жи әм гәрәке бьзаньбьн кӧ ча тедәрхьн рʹасти жь ԛәлпийе. * Дьжмьнед мә дькарьн интернете бьдьнә хәбате, сәва баԝәрийа мә һьндава Йаһоԝа у һʹьзкьрьна мә һьндава хушк-бьра, сьст кьн. Тʹӧ щар бир нәкьн, кӧ кʹе пьшт ве йәке сәкьни йә (1 Йуһʹн. 4:1, 6; Әʹйан. 12:9).

12. Чьрʹа әм гәрәке баԝәрийа хԝә һьндава рʹастийе ԛәԝи кьн?

¹² Сәва нәкʹәвьнә тʹәлькед Шәйтʹан, әм гәрәке баԝәрийа хԝә һьндава Иса у рола ԝи ԛьрара Хԝәдеда, дьһа ԛәԝи кьн. Әм ӧса жи гәрәке итʹбарийа хԝә ве канийа тʹәк биньн, кʹижан кӧ Йаһоԝа иро дьдә хәбате, ԝәки рʹебәрийе мә бькә (Мәт. 24:45-47). Һәрге әм дьхԝазьн ԝәки баԝәрийа мә мина бахед бь кʹокед ԛәԝи бә, әм гәрәке һәр гав Хәбәра Хԝәде леколин бькьн. Паԝлос жи нәʹма хԝәйә щьвата Колосирʹа ԝе йәке да кʹьфше: «Хӧдан Мәсиһ Иса ԛәбул кьр, ӧса жи йәктийа ԝида бьжин, рʹаԝ авити, сәр ԝи чекьри у баԝәрийеда шьдийайи һʹимгьрти бьн» (Колс. 2:6, 7). Һәрге баԝәрийа мә ԛәԝи бә, нә Шәйтʹан нә жи пьштгьред ԝи, ԝе нькарьбьн мә жь рʹийа рʹаст дәрхьн (2 Йуһʹн. 8, 9).

13. Әм чьда гәрәке әʹщебмайи нәминьн у чьрʹа?

¹³ Әм гәрәке әʹщебмайи нәминьн, кӧ әм бәр чʹәʹве ԝе дьне рʹәш ьн (1 Йуһʹн. 3:13). Йуһʹәннада те готьне, кӧ «тʹәмамийа дьнйайе бьн һʹӧкӧме Йе Хьрабда йә» (1 Йуһʹн. 5:19). Кʹӧтасийа ԝе дьнйайе бәр шемике йә, ләма жи һерса Шәйтʹан дьһа ԛайим дьбә (Әʹйан. 12:12). Әԝ нә кӧ тʹәне тʹәлькед вәшарти дьдә хәбате, мәсәлә бенамуси у дәрәԝед рʹабәра, ле ӧса жи әшкәрә пәй мә дькʹәвә у мә дьзеринә. Шәйтʹан занә кӧ ԝәʹде ԝи гәләк һьндьк майә бона ве йәке, кӧ хьзмәтийа мә бьдә сәкьнандьне у баԝәрийа мә сьст кә. Ләма әм әʹщебмайи наминьн, кӧ һьнә ԝәлатада шьхӧле мә йан бь тʹәмами йан жи нивида ԛәдәхәкьри йә. Ле йәкә хушк-бьред мә ԝан ԝәлатада бәр ве йәке тәйах дькьн у амьн дьминьн. Әԝана избат дькьн, кӧ фьрԛи тʹӧнә чь жи Йе Хьраб бькә, йәкә щьмәʹта Хԝәде дькарә сәркʹәвә!

14. Ча әм дькарьн али хушк-бьра бькьн, ԝәки әԝана нава рʹастийеда бьминьн?

¹⁴ Сәва али хушк-бьра бькьн кӧ нава рʹастийеда бьминьн, әм гәрәке һьндава ԝанда дьлшәԝат бьн (1 Йуһʹн. 3:10, 11, 16-18). Әм гәрәке һәвдӧ һʹьз бькьн нә тʹәне һьнге чахе һʹәму тьшт баш ә, ле ӧса жи чахе проблем пешда тен. Мәсәлә, дьбәкә кәсәк мәрьве хԝәйи незик ӧнда кьрийә, у һʹәԝще бәрдьлийе йә у жерʹа тьштәкида аликʹари лазьм ә. Йан жи дьбәкә ԝә бьһистийә, кӧ хушк-бьра жь бо хәзәбед тʹәбийәте зьрар стандьнә у ԝанрʹа аликʹари лазьм ә, ԝәки Одед щьватед ԝан, йан жи малед ԝан тʹәзәда ава кьн. Әм һʹьзкьрьн у дьлшәԝатийе һьндава хушк-бьра нә тʹәне пе гьлийед хԝә нишан дькьн, ле илаһи пе кьред хԝә.

15. Ль гора 1 Йуһʹәнна 4:7, 8, әм гәрәке чь бькьн?

¹⁵ Чахе әм һʹьзкьрьна хԝә һьндава һәвда нишан дькьн, әм чʹәʹв дьдьнә Баве хԝәйи әʹзмана. (Бьхунә 1 Йуһʹәнна 4:7, 8.) Щурʹе лапә фәрз кӧ ча һʹьзкьрьне бьдьнә кʹьфше әԝ ә, кӧ һәвдӧ бьбахшиньн. Мәсәлә, кәсәк дьбәкә ԝе дьле мә бешинә, ле паше бахшандьне жь мә бьхԝазә. Һʹьзкьрьна мә һьндава ԝида ԝе һьнге бе кʹьфше, һәрге әм бьбахшиньнә ԝи у шашийа ԝи бир кьн (Колс. 3:13). Бьре мә  Алдо дьлтәнг бу чахе бьраки, ԛәдьре кʹижани әԝи дьгьрт, дәрһәԛа мьләте ԝи нәбаш хәбәр да. Әԝ гьли дькә: «Мьн гәләк Йаһоԝарʹа дӧа дькьр, ԝәки али мьн бькә кӧ әԝ бьра бәр чʹәʹве мьн нәкʹәвә». Ле Алдо диса тьштәк кьр. Хенщи ве йәке, әԝи сафи кьр кӧ тʹәви ԝи бьрайи дәркʹәвә хьзмәтийе. Ԝәʹде хьзмәтийе Алдо жерʹа гот, ԝәки гьлийед ԝи бьрайи гәләк дьле ԝи ешандьн. Әԝ дьбежә: «Чахе әԝи бьрайи бьһист кӧ гьлийед ԝи ча дьле мьн ешандьн, әԝи бахшандьне хԝәст. Мьн жь хәбәрдана ԝи тедәрхьст, кӧ әԝ бона гьлийед хԝә ча пʹошман буйә. Паши ве йәке, әм диса жи ча һәвал ман, у мә әԝ проблем бир кьр».

16-17. Әм гәрәке хԝәрʹа чь ԛьрар кьн?

¹⁶ Жь ширәтед кӧ Йуһʹәннайе шанди нәʹмед хԝәда ньвиси, әшкәрә те кʹьфше кӧ әԝ гәләк хушк-бьра һʹьз дькьр, у бона рʹӧһʹанийа ԝан хәм дькьр. Әм чьԛас ша дьбьн кӧ тʹәви Иса ԝе хьзмәткʹаред ӧса сәрԝертийе бькьн, йед кӧ мина Йуһʹәнна бона һʹалхԝәшийа хушк-бьра хәм дькьн (1 Йуһʹн. 2:27).

¹⁷ Ԝәрә әм бь дьл у щан ԛәбул кьн ширәтед, кӧ мә ве готареда шеԝьр кьр. Ԝәрә әм хԝәрʹа ԛьрар кьн, кӧ тʹьме рʹийа рʹастийеда һәрʹьн у һәр тьштида гӧрʹа Йаһоԝа бькьн. Тʹьме Хәбәра ԝи леколин бькьн у дӧдьли нәбьн, ԝәки ширәтед теда, бона кʹара ԝә йә. Баԝәрийа хԝә һьндава Иса дьһа ԛәԝи кьн. Тʹӧ щар гӧһ нәдьнә философийа мәрьва у һинкьрьнед рʹабәра. Пе принсипед Йаһоԝа бьжин. Ԝәрә әм тʹьме бьбахшиньнә хушк-бьра у ԝәʹде чәтьнайа али ԝан бькьн, ԝәки әԝана ԛәԝи бьминьн. Һьнге чь жи бьԛәԝьмә, әме сәр рʹийа рʹаст бьминьн.